Uk-ukom 10:1-18
10 Kalpasan ni Abimelec, ni Tola manipud iti tribu ni Isacar ti nangisalakan iti Israel.+ Isu ket anak ni Pua, nga anak ni Dodo, ken agnanaed idiay Samir iti kabambantayan ti Efraim.
2 Nagserbi nga ukom iti Israel iti 23 a tawen. Kalpasanna, natay ken naitabon idiay Samir.
3 Ni Jair a Gileadita ti simmukat kenkuana kas ukom ti Israel iti 22 a tawen.
4 Adda 30 nga annakna a lallaki a nagsakay iti 30 nga asno, ken adda 30 a siudadda, a maawagan iti Havot-jair+ agingga ita. Masarakan dagita iti daga ti Gilead.
5 Kalpasanna, natay ni Jair ket naitabon idiay Kamon.
6 Inaramid manen dagiti Israelita ti dakes iti imatang ni Jehova.+ Nagserbianda dagiti Baal,+ dagiti imahen ni Astoret, dagiti dios ti Aram,* Sidon, Moab,+ Ammon,+ ken dagiti Filisteo.+ Tinallikudanda ni Jehova ken saanda a nagserbi kenkuana.
7 Gapuna, nakapungtot ni Jehova iti Israel ket inyawatna* ida kadagiti Filisteo ken Ammonita.+
8 Pinarigat ken inrurumenda dagiti Israelita iti dayta a tawen—ta 18 a tawen nga inrurumenda ti amin nga Israelita iti daya ti Jordan, iti daga dagiti Amoreo nga adda idiay Gilead.
9 Bimmallasiw met iti Jordan dagiti Ammonita tapno makigubatda kadagiti tribu ni Juda, Benjamin, ken Efraim ket nakaro ti pannakaparigat ti Israel.
10 Nagpatulong dagiti Israelita ken ni Jehova,+ ket imbagada: “Nagbasolkami kenka, ken tinallikudandaka, O Diosmi, ket nagserbikami kadagiti Baal.”+
11 Insungbat ni Jehova kadagiti Israelita: “Saan kadi nga insalakankayo kadagiti Egipcio,+ Amoreo,+ Ammonita, Filisteo,+
12 Sidonio, Amalekita, ken Midianita, idi pinarparigatdakayo? Insalakankayo idi nagpatulongkayo kaniak.
13 Ngem tinallikudandak ket nagserbikayo kadagiti sabali a dios.+ Gapuna, saankayon nga isalakan.+
14 Inkay agpatulong kadagiti dios a piniliyo.+ Bay-anyo nga isalakandakayo iti panagrigatyo.”+
15 Ngem kinuna dagiti Israelita ken ni Jehova: “Nagbasolkami. Aramidem kadakami ti aniaman a kayatmo. Pangngaasim ta isalakannakami ita nga aldaw.”
16 Inikkat dagiti Israelita dagiti didiosenda ket nagserbida ken Jehova,+ isu a saannan a maibturan* ti panagrigatda.+
17 Kalpasanna, naguummong dagiti Ammonita+ ket nagkampoda idiay Gilead. Naguummong ken nagkampo met dagiti Israelita idiay Mizpa.
18 Kinuna dagiti umili ken dagiti prinsipe ti Gilead iti maysa ken maysa: “Asino ti mangidaulo kadatayo a makilaban kadagiti Ammonita?+ Isunto ti agbalin a panguluen ti amin nga agnanaed iti Gilead.”
