Uk-ukom 12:1-15
12 Kalpasanna, naayaban dagiti lallaki ti Efraim ket bimmallasiwda idiay Zafon.* Imbagada ken ni Jefte: “Apay a saannakami nga inayaban idi bimmallasiwka a nakilaban kadagiti Ammonita?+ Puorandaka agraman ti balaymo.”
2 Insungbat ni Jefte: “Naaddaanak ken dagiti kailiak iti nakaro a pannakigubat kadagiti Ammonita. Nagpatulongak kadakayo ngem saandak nga insalakan iti imada.
3 Idi makitak a saandak nga isalakan, inrisgok ti biagko* ket nakilabanak kadagiti Ammonita.+ Tinulongannak ni Jehova a mangparmek kadakuada. Isu nga apay nga immaykayo ita a makiriri kaniak?”
4 Inummong ni Jefte ti amin a lallaki iti Gilead+ ket nakilabanda iti Efraim. Inabak dagiti Gileadita dagiti Efraimita, a nangibaga: “Nagtalawkayo laeng iti Efraim, dakayo a Gileadita nga agnanaed iti Efraim ken Manases.”
5 Sinakup ti Gilead dagiti pagballasiwan ti Jordan+ ket inunaanda ti Efraim. No ikagumaan dagiti lallaki ti Efraim ti aglibas, kunada, “Palubosandak a bumallasiw”; isaludsod ngarud dagiti lallaki iti Gilead, “Maysaka kadi nga Efraimita?” No sumungbat iti “Saan!”
6 ibagada kenkuana, “Shibboleth kunam man.” Ngem no “Sibboleth” ti ibagana, ta saan nga umiso ti panangibalikasna, tiliwen ken papatayenda kadagiti pagballasiwan ti Jordan. Gapuna, 42,000 nga Efraimita ti napapatay iti dayta a gundaway.
7 Nagserbi ni Jefte kas ukom iti Israel iti innem a tawen. Kalpasanna, natay ni Jefte a Gileadita ket naitabon iti siudadna idiay Gilead.
8 Ni Ibzan a taga-Betlehem ti simmukat kenkuana kas ukom.+
9 Adda annakna a 30 a lallaki ken 30 a babbai. Imbaonna ti annakna a babbai a makiasawa kadagiti lallaki a sabali ti tribuna, ken nangala iti 30 a babbai nga inyasawana iti annakna a lallaki. Nagserbi kas ukom iti Israel iti pito a tawen.
10 Kalpasanna, natay ni Ibzan ket naitabon idiay Betlehem.
11 Ni Elon a Zabulonita ti simmukat kenkuana kas ukom iti Israel iti 10 a tawen.
12 Kalpasanna, natay ni Elon a Zabulonita ket naitabon idiay Aijalon iti daga ti Zabulon.
13 Ni Abdon nga anak ni Hilel a Piratonita ti simmukat kenkuana kas ukom iti Israel.
14 Adda 40 nga annakna a lallaki ken 30 nga appokona a lallaki a nagsakay iti 70 nga asno. Nagserbi kas ukom iti Israel iti walo a tawen.
15 Kalpasanna, natay ni Abdon nga anak ni Hilel a Piratonita ket naitabon idiay Piraton iti daga ti Efraim iti bantay dagiti Amalekita.+
