Uk-ukom 14:1-20
14 Kalpasanna, napan ni Samson idiay Timna ket nakakita iti maysa a babai a Filisteo.*
2 Nagawid ket imbagana kadagiti nagannakna: “Adda nagustuak a babai a Filisteo idiay Timna. Kayatko nga alaenyo kas asawak.”
3 Insungbat dagiti nagannakna: “Awan kadi ti magustuam a babai kadagiti kabagian ken kailiantayo?+ Masapul kadi a mangalaka iti asawaem kadagiti di nakugit a Filisteo?” Insungbat ni Samson ken tatangna: “Alaenyo ta isu laeng ti magustuak.”*
4 Saan nga ammo dagiti nagannakna a ni Jehova ti mangtigtignay kenkuana. Agbirbirok ngamin ti Dios iti gundaway a makilaban kadagiti Filisteo, ta isuda idi ti mangiturturay iti Israel.+
5 Iti kasta, napan ni Samson idiay Timna a kaduana dagiti nagannakna. Idi nakadanon kadagiti kaubasan ti Timna, adda nasabatna a leon* a ngumerngernger kenkuana.
6 Nagtignay kenkuana ti espiritu ni Jehova,+ ket rinangkayna ti leon a kas iti panangrangkay ti maysa a tao iti urbon a kalding babaen kadagiti imana. Ngem saanna nga imbaga ken tatangna wenno ni nanangna ti inaramidna.
7 Kalpasanna, napan kinasarita ni Samson ti babai, ket isu latta ti kayatna.+
8 Idi nagsubli tapno iyawidna ti babai,+ nagna iti sabali a dalan tapno kitaenna ti bangkay ti leon. Nakitana ti adu nga uyokan a nagbalay iti bangkay ti leon ken adda diro iti dayta.
9 Gapuna, nangala iti diro babaen ti dakulapna ket nangan bayat a magmagna. Idi nakamakamna dagiti nagannakna, inikkanna ida iti kanenda. Ngem saanna nga imbaga nga innalana ti diro iti bangkay ti leon.
10 Napan ni tatangna iti ayan ti babai, ket nangaramid sadiay ni Samson iti selebrasion ta kasta idi ti kaugalian dagiti agtutubo a lallaki.
11 Idi nakitada ni Samson, nangalada iti 30 nga abay a lallaki a mangkadua kenkuana.
12 Kinuna kadakuada ni Samson: “Palubosandak a mangibaga iti maysa a burburtia. No masungbatanyo iti uneg ti pito nga aldaw a selebrasion, ikkankayo iti 30 a lienso a lupot ken 30 a bado.
13 Ngem no saanyo a masungbatan, ikkandak iti 30 a lupot a lienso ken 30 a bado.” Kinunada: “Ibagam ti burburtiam; kayatmi a mangngeg.”
14 Insungbatna:
“Iti maysa a managkaan, adda rimmuar a makan,Ken iti maysa a napigsa, adda rimmuar a nasam-it.”+
Tallo nga aldaw ti limmabas ngem saanda pay a nasungbatan ti burburtia.
15 Iti maikapat nga aldaw, kinunada iti asawa ni Samson: “Allilawem ti asawam+ tapno ibagana ti sungbat ti burburtia. Ta no saan, puorandaka ken ti sangakabbalayan ni amam. Inawisdakami kadi ditoy tapno alaenyo dagiti sanikuami?”
16 Gapuna, nagsangsangit ti babai a nangibaga ken Samson: “Kagurguranak; saannak nga ay-ayaten.+ Nangtedka iti burburtia kadagiti kailiak, ngem saanmo nga imbaga kaniak ti sungbatna.” Kinuna ni Samson: “Apay koma nga ibagak kenka ket saanko pay nga imbaga iti mismo nga ama ken inak?”
17 Ngem nagtultuloy a nagsangit bayat ti pito nga aldaw a selebrasion. Kamaudiananna, imbaga ni Samson ti sungbat iti maikapito nga aldaw gapu ta pinilit ti babai. Imbaga met ti babai kadagiti kailianna ti sungbat ti burburtia.+
18 Gapuna, sakbay a limnek ti init* iti maikapito nga aldaw, kinuna kenkuana dagiti lallaki iti siudad:
“Ania ti nasamsam-it ngem iti diro,Ken ania ti napigpigsa ngem iti leon?”+
Insungbat ni Samson:
“No saanyo koma a pinagarado ti urbon a bakak,+Saanyo koma a nasungbatan ti burburtiak.”
19 Kalpasanna, nagtignay kenkuana ti espiritu ni Jehova,+ ket napan idiay Askelon.+ Nangpapatay iti 30 a lallaki sa innalana dagiti badoda ket intedna dagita kadagiti nakasungbat iti burburtiana.+ Sipupungtot a nagawid iti balay ni tatangna.
20 Gapuna, naited ti asawa ni Samson+ iti maysa kadagiti abayna a lalaki.+
Footnotes
^ Lit., “maysa a babai iti annak a babbai dagiti Filisteo.”
^ Lit., “isu ti umiso kadagiti matak.”
^ Wenno “burboran a bumaro a leon.”
^ Wenno mabalin a, “sakbay a simrek iti makin-uneg a siled.”
