Uk-ukom 16:1-31
16 Naminsan, napan ni Samson idiay Gaza ket nakakita iti babai a balangkantis sa simrek iti balayna.
2 Naipadamag kadagiti Gazita: “Adda ditoy ni Samson.” Gapuna, pinalawlawanda ti lugar ket agpatnag a pinadpadaananda iti ruangan ti siudad. Siuulimek a nagur-urayda iti intero a rabii, ta kinunada: “Papatayentayo apaman nga aglawag.”
3 Ngem nagidda ni Samson agingga iti tengnga ti rabii sa bimmangon ket iniggamanna dagiti rikep ti ruangan ti siudad ken ti dua a makin-igid nga adigi sa pinarutna dagita agraman ti trangka. Imbaklayna dagita sa insang-atna iti tuktok ti bantay a sumango iti Hebron.
4 Kalpasanna, nagayat iti maysa a babai nga agnagan iti Delaila+ nga agnanaed idiay Tanap* ti Sorek.
5 Immasideg ken Delaila dagiti panguluen dagiti Filisteo ket kinunada: “Allilawem*+ ket ammuem ti pagtataudan ti naisangsangayan a pigsana ken no kasanomi nga abaken ken galutan. No aramidem dayta, tunggal maysa kadakami ket mangted kenka iti 1,100 a pedaso a pirak.”
6 Iti kasta, dinamag ni Delaila ken ni Samson: “Pangngaasim ta ibagam kaniak ti pagtataudan ti naisangsangayan a pigsam ken no ania ti mabalin a panggalut kenka tapno maabakka.”
7 Insungbat ni Samson: “No galutandak iti pito a saan a nagango a linas ti bai ti pana, kumapuyak a kas iti ordinario a tao.”
8 Dagiti panguluen dagiti Filisteo inikkanda ngarud ni Delaila iti pito a saan pay a nagango a linas ti bai, ket ginalutanna ni Samson.
9 Adda lallaki a pinaglemmengda iti sabali a kuarto, ket impukkaw ni Delaila: “Umayen dagiti Filisteo, Samson!” Linaklakana a pinugsat ti linas a kas iti pannakapugsat ti sinulid a lino* no maisagid iti apuy.+ Saan a naammuan ni Delaila ti sekreto ti pigsana.
10 Kinuna ni Delaila ken ni Samson: “Loklokuennak* ta nagulbodka kaniak. Ibagam no ania ti mabalin a panggalut kenka.”
11 Insungbat ni Samson: “No galutandak kadagiti baro a tali a saan pay a nausar iti panagtrabaho, kumapuyak a kas iti ordinario a tao.”
12 Gapuna, nangala ni Delaila kadagiti baro a tali ket ginalutanna ni Samson sa impukkawna: “Umayen dagiti Filisteo, Samson!” (Adda lallaki a naglemmeng iti sabali a kuarto a mangtiliw kenkuana.) Pinugsatna dagiti tali a naigalut kadagiti takiagna a kas kadagiti sinulid.+
13 Kalpasanna, kinuna ni Delaila ken ni Samson: “Loklokuennak ta agingga ita, agul-ulbodka kaniak.+ Ibagam no ania ti mabalin a panggalut kenka.” Insungbat ni Samson: “No lagaem ti pito a sallapid ti buokko babaen ti sinulid a pagabel, kumapsutak.”
14 Iti kasta, pinairutanna dagita iti pasok ti pagabelan sa impukkawna: “Umayen dagiti Filisteo, Samson!” Nagriing ni Samson ket inikkatna ti pasok ken ti sinulid a pagabel.
15 Kinuna ni Delaila: “Kasano koma nga ibagam nga ay-ayatennak+ ket dika met agtalek kaniak? Namitlon a linoklokonak ta saanmo nga imbaga no ania ti pagtataudan ti naisangsangayan a pigsam.”+
16 Nauma ni Samson ta kasta ti inaldaw nga irengrengreng ken ibagbaga ni Delaila.+
17 Iti kasta, impudnona ti amin ken Delaila ket kinunana: “Pulos a saan pay a napukisan ti buokko, ta maysaak a Nazareo ti Dios manipud pannakayanakko.*+ No mapukisanak, mapukaw ti pigsak ket kumapuyak ken agbalinak a kas iti ordinario a tao.”
18 Idi narikna ni Delaila nga impudno ni Samson ti amin, dagus nga impaibagana kadagiti panguluen dagiti Filisteo:+ “Umaykayo ta impudnonan kaniak ti amin.” Napan kenkuana dagiti panguluen dagiti Filisteo nga intugotda ti inkarida a kuarta.
19 Pinaturogna iti saklotna ni Samson sa nangayab iti lalaki a mangputed iti pito a sallapid ti buokna. Iti kasta, nakontrolna ni Samson ta awanen ti pigsana.
20 Impukkawna: “Umayen dagiti Filisteo, Samson!” Nagriing ni Samson ket kinunana iti bagina: “Rumuk-at ken lumapsutak kas iti sigud nga ar-aramidek.”+ Ngem saanna nga ammo a pimmanawen kenkuana ni Jehova.
21 Tiniliw dagiti Filisteo ket sinuatda dagiti matana sa impanda idiay Gaza. Pinosasanda iti dua a gambang, ket pinagbalinda a paragiling iti bukbukel iti pagbaludan.
22 Ngem nangrugi nga umatiddog manen ti buokna kalpasan a napukisan.+
23 Naguummong dagiti panguluen dagiti Filisteo tapno mangipaayda ken Dagon+ a diosda iti adu a daton ken tapno agselebrarda, ta ibagbagada: “Impalubos ti diostayo nga abakentayo ni Samson a kabusortayo!”
24 Idi nakita dayta dagiti tattao, indaydayawda ti diosda ket kinunada: “Impalubos ti diostayo nga abakentayo ti kabusortayo, a nangdadael iti dagatayo+ ken nangpapatay iti adu a kailiantayo.”+
25 Gapu iti kasta unay a ragsakda, kinunada: “Ipanyo ni Samson ditoy tapno pagraragsakantayo.” Inruarda ngarud ni Samson iti pagbaludan ket pinagtakderda iti nagbaetan dagiti adigi.
26 Kinuna ni Samson iti ubing a mangkibkibin kenkuana: “Ipaarikapmo kaniak dagiti adigi a nakaisaadan daytoy a balay, tapno makasadagak kadagita.”
27 (Napno idi ti balay iti adu a lallaki ken babbai. Adda sadiay ti amin a panguluen dagiti Filisteo ken ti agarup 3,000 a lallaki ken babbai iti tuktok nga agbuybuya bayat a pagkakatawaanda ni Samson.)
28 Inkararag ni Samson+ ken ni Jehova: “O Jehova a Kangatuan* nga Apo, pangngaasim ta lagipennak ket papigsaennak,+ uray iti daytoy laengen a gundaway, O Dios, ket palubosannak a mangibales kadagiti Filisteo iti uray maysa laeng kadagiti dua a matak.”+
29 Iniggaman ni Samson ti dua a makintengnga nga adigi a nangsuporta iti balay, ket induron ti dua nga imana ti agsumbangir nga adigi.
30 Impukkaw ni Samson: “Bay-am a matayak a kadua dagiti Filisteo!” Impanna ti amin a pigsana a nangiduron kadagiti adigi, ket nagtupak ti balay kadagiti panguluen ken iti amin a tattao nga adda sadiay.+ Iti kasta, ad-adu ti napapatayna iti dayta a gundaway ngem kadagiti napapatayna bayat a sibibiag.+
31 Kalpasanna, immay dagiti kakabsatna ken ti intero a pamilia ni amana ket innalada ti bangkayna. Intabonda iti nagbaetan ti Zora+ ken Estaol iti nakaitaneman ni Manoa+ nga amana. Nagserbi ni Samson kas ukom iti Israel iti 20 a tawen.+
Footnotes
^ Karayan a maaddaan laeng iti danum no panagtutudo.
^ Wenno “Guyugoyem.”
^ Wenno “pagguyod.”
^ Wenno “Al-allilawennak.”
^ Lit., “manipud iti aanakan ni nanangko.”
^ Wenno “Soberano.”
