Uk-ukom 17:1-13
-
Dagiti imahen ni Mikias ken ti padina (1-13)
17 Adda idi maysa a lalaki nga agnagan Mikias idiay kabambantayan ti Efraim.+
2 Kinunana ken nanangna: “Malagipyo daydi 1,100 a pedaso a pirak a natakaw kadakayo nga uray la inlunodyo daydiay nangala iti dayta? Adda kaniak dagiti pirak. Siak ti nangala.” Kinuna ni nanangna: “Bendisionannaka koma ni Jehova, anakko.”
3 Iti kasta, insublina ti 1,100 a pedaso a pirak ken nanangna, ngem imbaga ni nanangna: “Itedko ken Jehova dagitoy a pirak kas banag a nasantuan. Kayatko nga usaren tapno iyaramidanka iti kinitikitan nga imahen ken metal nga estatua.*+ Isu a kukuamto dagitoy a pirak.”
4 Idi naisublina ti pirak, nangala ni nanangna iti 200 a pedaso a pirak ket intedna iti mammanday iti pirak, a nangaramid iti kinitikitan nga imahen ken metal nga estatua* a naikabil iti balay ni Mikias.
5 Addaan idi ni Mikias iti balay a naglaon kadagiti didiosen. Nangaramid iti efod+ ken kadagiti terafim nga estatua*+ sa insaadna* kas padina+ ti maysa kadagiti annakna.
6 Awan ari ti Israel kadagidi a tiempo.+ Aramiden ti tunggal maysa ti umiso iti imatangna.*+
7 Adda met agtutubo a lalaki a Levita+ idiay Betlehem+ iti Juda, ket makipagnanaed iti pamilia ni Juda.
8 Pinanawan daytoy a lalaki ti siudad ti Betlehem iti Juda tapno agbirok iti pagyananna. Iti dalanna, nakadanon iti balay ni Mikias idiay kabambantayan ti Efraim.+
9 Kinuna ni Mikias: “Naggapuam?” Insungbat ti lalaki: “Maysaak a Levita manipud idiay Betlehem iti Juda, ket agbirbirokak iti pagyanak.”
10 Kinuna ni Mikias: “Agyanka kaniak ket agserbika kas ama* ken padik. Tinawen nga ikkanka iti 10 a pedaso a pirak, bado, ken taraon.” Iti kasta, simrek ti Levita.
11 Immanamong ti agtutubo a Levita a makipagyan ken Mikias, ket nagbalin a kas maysa kadagiti annakna.
12 Kasta met, ni Mikias insaadna* daytoy a Levita kas padina,+ isu a nagnaed iti balay ni Mikias.
13 Kinuna ni Mikias: “Sigurado a naimbagto kaniak ni Jehova ta addaanak iti padi a Levita.”
Footnotes
^ Wenno “sinukog nga estatua.”
^ Wenno “sinukog nga estatua.”
^ Lit., “pinunnona ti imana.”
^ Wenno “didiosen ti pamilia; idolo.”
^ Wenno “pagarupna nga umiso.”
^ Wenno “mamalbalakad.”
^ Lit., “pinunnona ti ima.”
