Uk-ukom 18:1-31
18 Awan ari ti Israel kadagidi a tiempo.+ Agsapsapul idi ti tribu dagiti Danita+ iti tawid a pagnaedanda ta saanda pay a natagikua a naan-anay ti tawid a naalada kadagiti tribu ti Israel.+
2 Nangibaon dagiti Danita iti lima a makabael a lallaki iti pamiliada manipud Zora ken Estaol+ a mapan mangespia ken mangkita iti daga. Kinunada kadagiti lallaki: “Inkay kitaen ti daga.” Idi nakadanonda iti balay ni Mikias+ iti kabambantayan ti Efraim, imyanda sadiay.
3 Bayat nga addada iti asideg ti balay ni Mikias, nailasinda ti timek* ti agtutubo a lalaki a Levita, isu nga immasidegda kenkuana ket insaludsodda: “Asino ti nangipan kenka ditoy? Ania ti ar-aramidem ditoy a lugar? Apay nga immayka ditoy?”
4 Imbagana ti inaramid kenkuana ni Mikias, ket kinunana: “Tangtangdanannak kas padina.”+
5 Isu a kinunada: “Pangngaasim ta damagem iti Dios no agballiginto ti panggepmi.”
6 Insungbat ti padi: “Sapay koma ta agballigikayo. Aywanannakayto ni Jehova iti papananyo.”
7 Intultuloy ti lima a lallaki ti nagdaliasat ket nakadanonda idiay Lais.+ Nakitada a saan nga agdepdepende dagiti tattao sadiay iti sabsabali a kas kadagiti Sidonio. Natalnada ken saanda a managsuspetsa,+ ken awan ti nangsakup ken nangirurumen kadakuada. Adayoda kadagiti Sidonio, ken awan bibiangda iti sabali a tattao.
8 Idi nagawidda idiay Zora ken Estaol,+ dinamag dagiti kakabsatda: “Komusta ti napananyo?”
9 Insungbatda: “Intay rauten ida, ta nakitami a nakasaysayaat ti dagada. Alistuanyo, intay tagikuaen ti dagada.
10 Inton makadanonkayo sadiay, saandakay a pagsuspetsaan dagiti tattao+ ken naglawa ti dagada. Ited ti Dios kadakayo dayta a lugar, ken adda amin sadiay a kasapulantayo.”+
11 Kalpasanna, nagrubbuat a makigubat ti 600 a lallaki iti pamilia dagiti Danita manipud Zora ken Estaol.+
12 Nagkampoda iti asideg ti Kiriat-jearim+ iti Juda. Dayta ti makagapu a napanaganan dayta a lugar iti Mahane-dan*+ agingga ita nga aldaw. Masarakan daytoy iti laud ti Kiriat-jearim.
13 Manipud sadiay, napanda iti kabambantayan ti Efraim ket nakadanonda iti balay ni Mikias.+
14 Kalpasanna, kinuna ti lima a lallaki a nangespia iti daga ti Lais+ kadagiti kakabsatda: “Ammoyo kadi nga adda efod, terafim nga estatua,* kinitikitan nga imahen, ken metal nga estatua*+ kadagitoy a balay? Panunotenyo no ania ti rumbeng nga aramidenyo.”
15 Gapuna, nagsardengda ket napanda iti balay ti agtutubo a lalaki a Levita+ iti balay ni Mikias, ket kinomustada.
16 Kabayatanna, nagtakder iti ruangan ti 600 a mannakigubat a lallaki iti tribu ni Dan.+
17 Simrek ti lima a lallaki a nangespia iti daga+ tapno alaenda ti imahen, efod,+ terafim nga estatua,*+ ken metal nga imahen.*+ (Nakatakder idi ti padi+ iti ruangan agraman ti 600 a lallaki a nakasagana a makigubat.)
18 Simrekda iti balay ni Mikias ket innalada ti kinitikitan nga imahen, efod, terafim nga estatua,* ken metal nga imahen.* Dinamag kadakuada ti padi: “Ania ti ar-aramidenyo?”
19 Insungbatda: “Agulimekka. Apputem ta ngiwatmo, ket kumuyogka kadakami ken agbalinka nga ama* ken padimi. Ania ti nasaysayaat—agserbika a padi iti balay ti maymaysa a tao+ wenno padi iti maysa a tribu ken pamilia ti Israel?”+
20 Nakombinsirda ti padi, ket innalana ti efod, terafim nga estatua,* ken ti kinitikitan nga imahen,+ sa kimmuyog kadakuada.
21 Kalpasanna, nagrubbuatda ket napandan. Pinaunada dagiti ubbing, dagiti tarakenda, ken napapateg a bambanag.
22 Nakaadayodan iti balay ni Mikias idi naguummong dagiti lallaki a kaarrubana tapno kumamatda ket nakamatanda dagiti Danita.
23 Timmaliaw dagiti Danita idi pinukkawanda ida. Kinunada ken Mikias: “Ania ti problemam? Apay a nagadu ti kaduam?”
24 Insungbat ni Mikias: “Innalayo dagiti didiosen nga inaramidko ken inkuyogyo pay ti padik. Awan ti imbatiyo. Sa ita, damagenyo no ania ti problemak?”
25 Kinuna dagiti Danita: “Saannakami a bugbugkawan; amangan no dangrandaka dagiti nauyong a lallaki ket papatayendaka ken ti intero a pamiliam.”
26 Nagtuloy dagiti Danita iti dalanda. Idi makita ni Mikias a saanna a kabaelan ida, nagawiden iti balayna.
27 Kalpasan a naalada dagiti didiosen nga inaramid ni Mikias agraman ti padina, nagturongda idiay Lais,+ iti ayan dagiti natalna ken saan a managsuspetsa a tattao.+ Pinapatayda ida babaen ti espada ken pinuoranda ti siudad.
28 Awan idi ti mangisalakan kadakuada, ta adayoda iti Sidon ken awan ti bibiangda iti sabali a tattao ken agnanaedda iti tanap* a paset ti Bet-rehob.+ Kalpasanna, tinarimaan dagiti Danita ti siudad ket nagnaedda iti dayta.
29 Pinanagananda met ti siudad iti nagan ti amada a ni Dan,+ nga anak ni Israel.+ Ngem Lais ti dati a nagan ti siudad.+
30 Kalpasanna, implastar sadiay dagiti Danita ti kinitikitan nga imahen,+ ket ni Jonatan+ a kaputotan ni Gersom,+ nga anak ni Moises, ken dagiti annakna ti nagserbi a papadi iti tribu dagiti Danita agingga a napapanaw dagiti agnanaed iti dayta a daga.
31 Gapuna, implastarda ti kinitikitan nga imahen nga inaramid ni Mikias, ket nagtalinaed sadiay kabayatan nga adda idiay Shilo ti balay ti pudno a Dios.+
Footnotes
^ Wenno “ayug.”
^ Kaipapananna, “Kampo ni Dan.”
^ Wenno “didiosen ti pamilia; idolo.”
^ Wenno “sinukog nga estatua.”
^ Wenno “sinukog nga estatua.”
^ Wenno “didiosen ti pamilia; idolo.”
^ Wenno “didiosen ti pamilia; idolo.”
^ Wenno “sinukog nga estatua.”
^ Wenno “mamalbalakad.”
^ Wenno “didiosen ti pamilia; idolo.”
^ Wenno “kapatagan.”
