Uk-ukom 21:1-25
-
Naispal ti tribu ni Benjamin (1-25)
21 Naguummong dagiti lallaki ti Israel idiay Mizpa+ ket insapatada: “Awan kadatayo ti mangyasawa iti annaktayo a babbai kadagiti lallaki a Benjaminita.”+
2 Kalpasanna, napan dagiti umili idiay Bethel+ ket nagtugaw ken nagsangsangitda iti sanguanan ti pudno a Dios agingga iti rabii.
3 Kinunada: “O Jehova a Dios ti Israel, apay a napasamak daytoy iti Israel? Apay a masapul a maawan ti maysa a tribu ti Israel ita nga aldaw?”
4 Kabigatanna, nasapa a bimmangon dagiti umili ket nangaramidda iti altar a pangikabilanda kadagiti daton a mapuoran ken daton a pakikappia.+
5 Kalpasanna, kinuna dagiti Israelita: “Asino kadagiti tribu ti Israel ti saan nga immay idi iti sanguanan ni Jehova?” ta insapatada a mapapatay ti asinoman a saan a mapan idiay Mizpa iti sanguanan ni Jehova.
6 Gapuna, nagladingit dagiti Israelita iti napasamak kadagiti Benjaminita a kakabsatda. Kinunada: “Maysa a tribu ti naawan iti Israel ita nga aldaw.
7 Ania ti aramidentayo tapno maikkan iti asawa dagidiay nabati a lallaki, ta inkaritayo ken Jehova+ a ditay iyasawa kadakuada ti annaktayo a babbai?”+
8 Insaludsodda: “Ania kadagiti tribu ti Israel ti saan a napan idiay Mizpa+ iti sanguanan ni Jehova?” Naammuanda nga awan ti napan a taga-Jabes-gilead.
9 Idi mabilang dagiti umili, natakuatanda nga awan sadiay dagiti taga-Jabes-gilead.
10 Gapuna, nangibaonda iti 12,000 a katuturedan a lallaki, ket kinunada: “Inkay papatayen iti espada dagiti taga-Jabes-gilead, agraman dagiti babbai ken ubbing.+
11 Kastoy ti aramidenyo: Masapul a papatayenyo ti amin a lalaki, kasta met ti amin a babai a nakidenna iti lalaki.”
12 Adda nasarakanda nga 400 a babbai a birhen idiay Jabes-gilead a saan pay a nakidenna iti lalaki. Impanda ida iti kampo idiay Shilo+ iti Canaan.
13 Kalpasanna, nangibaonda kadagiti mensahero a makikappia kadagiti Benjaminita iti dakkel a bato ti Rimmon.+
14 Gapuna, nagsubli dagiti Benjaminita iti dagada. Inted kadakuada dagiti Israelita dagiti babbai manipud Jabes-gilead+ a saanda a pinapatay, ngem kurang ti bilangda.
15 Naladingitan dagiti Israelita iti napasamak iti Benjamin+ ta insina ida ni Jehova iti dadduma a tribu ti Israel.
16 Dinamag dagiti panglakayen ti Israel: “Ania ti aramidentayo tapno maikkantayo iti assawa dagiti natedda a lallaki, ta naibus metten ti babbai iti Benjamin?”
17 Insungbatda: “Masapul nga adda tawid dagiti nakalasat a Benjaminita, tapno saan a mapukaw ti maysa a tribu ti Israel.
18 Ngem ditay mabalin nga iyasawa kadakuada dagiti annaktayo a babbai, ta inkari dagiti umili ti Israel: ‘Mailunod ti mangted iti asawa a babai iti Benjamin.’”+
19 Kalpasanna, kinunada: “Adda tinawen a piesta para ken Jehova idiay Shilo,+ nga adda iti amianan ti Bethel, dayaen ti kalsada manipud iti Bethel nga agpa-Sikem, ken abagatan ti Lebona.”
20 Gapuna, imbilinda kadagiti Benjaminita: “Aglemmengkayo kadagiti kaubasan.
21 Inton rummuar dagiti babbalasang* iti Shilo tapno agsalada iti sirkulo, rummuarkay met kadagiti kaubasan ket mangguyodkayo iti asawaenyo a babbai, sa agsublikayo iti daga ti Benjamin.
22 Inton umay agreklamo kadakami dagiti ammada wenno kakabsatda a lallaki, ibagaminto, ‘Maawatanyo koma ida, ta saanmi a maikkan amin ida iti asawa. Saan ngamin nga umanay ti naalami a babbai iti gubat.+ Uray ta saankayo a nakabasol ta diyo inted dagiti annakyo.’”+
23 Kasta ti inaramid dagiti Benjaminita. Nangala ti tunggal maysa kadakuada iti asawaenna kadagiti agsalsala a babbai. Kalpasanna, nagsublida iti tawidda a daga ket tinarimaanda dagiti siudadda+ ken nagnaedda kadagita.
24 Iti dayta a tiempo, nagsisina dagiti Israelita ket nagsublida iti tawidda a daga, iti tunggal tribu ken pamiliada.
25 Awan ari ti Israel kadagidi a tiempo.+ Aramiden ti tunggal maysa ti umiso iti imatangna.*