Uk-ukom 3:1-31
3 Dagitoy ti nasion a binay-an ni Jehova nga agtalinaed tapno masubok ti amin nga Israelita a saan pay a nakapadas a nakigubat kadagiti Canaanita+
2 (inaramidna daytoy tapno mapadasan met dagiti sumarsaruno a henerasion dagiti Israelita ti makigubat):
3 ti lima a panguluen dagiti Filisteo,+ amin a Canaanita, dagiti Sidonio,+ ken dagiti Heveo+ nga agnanaed idiay Bantay Lebanon+ manipud Bantay Baal-hermon agingga idiay Lebo-hamat.*+
4 Nagtalinaed dagitoy tapno maammuan no tungpalen dagiti Israelita dagiti bilin ni Jehova kadagidi ammada babaen ken Moises.+
5 Gapuna, nagnaed dagiti Israelita iti tengnga dagiti Canaanita,+ Heteo, Amoreo, Perizeo, Heveo, ken Jebuseo.
6 Inasawa dagiti Israelita ti annak a babbai dagita a nasion, ken dagiti met annakda a babbai ti inasawa ti annak a lallaki dagita a nasion, ket nagserbida kadagiti diosda.+
7 Gapuna, inaramid dagiti Israelita ti dakes iti imatang ni Jehova, ket nalipatanda ni Jehova a Diosda ken nagserbida kadagiti Baal+ ken kadagiti sagrado a poste.*+
8 Nakapungtot ni Jehova iti Israel ket inyawatna* ida ken Cusan-risataim nga ari ti Mesopotamia.* Walo a tawen a nagserbi dagiti Israelita ken Cusan-risataim.
9 Idi nagpatulong dagiti Israelita ken Jehova,+ nangted ni Jehova iti mangisalakan kadakuada,+ ni Otniel+ nga anak ni Kenaz, nga ading ni Caleb.
10 Nagtignay ti espiritu ni Jehova ken ni Otniel,+ ket nagbalin nga ukom iti Israel. Idi napan nakigubat, inted kenkuana ni Jehova ni Cusan-risataim nga ari ti Mesopotamia* ket inabakna.
11 Iti kasta, 40 a tawen nga adda talna* iti daga. Kalpasanna, natay ni Otniel nga anak ni Kenaz.
12 Inaramid manen dagiti Israelita ti dakes iti imatang ni Jehova.+ Gapuna, impalubos ni Jehova nga abaken ni Eglon nga ari ti Moab+ ti Israel ta inaramidda ti dakes iti imatang ni Jehova.
13 Nakikadua pay ni Eglon kadagiti Ammonita+ ken Amalekita+ a mangraut iti Israel ket sinakupda ti siudad dagiti kayo a palma.+
14 Nagserbi dagiti Israelita ken Eglon nga ari ti Moab iti 18 a tawen.+
15 Kalpasanna, nagpatulong dagiti Israelita ken Jehova+ isu a nangted ni Jehova iti mangisalakan kadakuada,+ ti anak ni Gera a ni Ehud+ a maysa a Benjaminita+ ken kattigid.+ Idi agangay, intulodna ti buis dagiti Israelita a dinawat ni Eglon nga ari ti Moab.
16 Nangaramid ni Ehud iti espada a dua ti tademna nga agarup maysa a kasiko* ti kaatiddogna, ket inlemmengna iti uneg ti badona iti kannawan a luppona.
17 Kalpasanna, intedna ti buis ken Eglon, ti nakaluklukmeg nga ari ti Moab.
18 Idi naiteden ni Ehud ti buis, pimmanaw a kaduana dagiti tattao a nangawit kadagita.
19 Ngem idi nakadanonda kadagiti nakitikitan a batbato nga imahen* idiay Gilgal,+ nagsubli ket kinunana: “Adda nalimed a mensahe nga ibagak kadakayo, O ari.” Kinuna ti ari: “Panawandakami!” ket rimmuar dagiti adipenna.
20 Immasideg ni Ehud iti ari a nakatugaw nga agmaymaysa iti nalamiis a siled iti tuktok ti balayna, ket kinunana: “Adda mensahe ti Dios nga ibagak kadakayo.” Iti kasta, timmakder ti ari iti tronona.*
21 Inasut ni Ehud ti espada iti kannawan a luppona babaen ti kannigid nga imana ket dinuyokna ti tian ti ari.
22 Limmumlom ti espada agingga iti putanna iti nataba a tian ti ari ta saanna nga inuksot dayta, ket nagruar ti takki ti ari.
23 Rimmuar ni Ehud iti beranda* ket inserra ken inkandadona dagiti ridaw ti siled.
24 Idi nakapanawen, nagsubli dagiti adipen ket nakitada a nakakandado dagiti ridaw ti siled isu a kinunada: “Tumaktakki la ketdi* iti nalamiis a siled.”
25 Nagur-urayda iti nabayag ket nagdanagda idi saan latta a naglukat dagiti ridaw ti siled. Innalada ti tulbek ket idi linuktanda dagiti ridaw, nakitada a nakaidda ti apoda iti suelo* a natayen!
26 Naglibas ni Ehud bayat nga agur-uray dagiti adipen. Linabsanna dagiti nakitikitan a batbato nga imahen*+ agingga a sitatalged a nakadanon idiay Seira.
27 Idi nakadanon sadiay, pinuyotanna ti tangguyob+ iti kabambantayan ti Efraim;+ ket indauluanna a simmalog dagiti Israelita.
28 Kinunana kadakuada: “Surotendak ta inted ni Jehova iti imayo dagiti kabusoryo a Moabita.” Simmurotda ket nagpuestoda kadagiti pagballasiwan ti Jordan tapno saan a makalibas dagiti Moabita, ken awan ti pinalubosanda a bumallasiw.
29 Iti dayta a tiempo, agarup 10,000 a napipigsa ken nabibileg a Moabita+ ti napapatayda ket awan ti nakalasat uray maysa.+
30 Inabak ti Israel ti Moab iti dayta nga aldaw; ket 80 a tawen nga adda talna* iti dagada.+
31 Kalpasan ni Ehud, ni Samgar+ nga anak ni Anat ti nangisalakan iti Israel. Pinapatayna ti 600 a Filisteo+ babaen ti atiddog ken natirad a kayo a pagabug iti baka.+
Footnotes
^ Wenno “pagserkan ti Hamat.”
^ Lit., “inlakona.”
^ Lit., “Aram-naharaim.”
^ Lit., “Aram.”
^ Wenno “kappia.”
^ Wenno mabalin nga, “abut a pagalaan iti batbato.”
^ Wenno “tugawna.”
^ Wenno mabalin a, “pagnaan ti angin.”
^ Lit., “Ab-abbonganna la ketdi dagiti sakana.”
^ Lit., “daga.”
^ Wenno mabalin nga, “abut a pagalaan iti batbato.”
^ Wenno “kappia.”