Uk-ukom 5:1-31
5 Iti dayta nga aldaw, inkanta da Debora+ ken Barak+ nga anak ni Abinoam:+
2 “Idaydayawyo ni Jehova,Ta nagboluntario ti Israel+Gapu kadagiti mannakigubat a nakawakray ti buokda!
3 Dumngegkayo, dakayo nga ari ken agtuturay!
Kantaakto ni Jehova.
Agkantaakto iti panangidaydayaw* ken Jehova,+ a Dios ti Israel.+
4 O Jehova, idi pinanawam ti Seir,+Idi napanka iti teritoria ti Edom,Nagunggon ti daga, nagtudo ti langit,Nangibuyat dagiti ulep iti danum.
5 Nargaay* dagiti bantay iti sango ni Jehova,+Uray ti Sinai iti sango ni Jehova+ a Dios ti Israel.+
6 Idi tiempo ni Samgar+ nga anak ni Anat,Idi tiempo ni Jael,+ awan ti agbibiahe iti dadakkel a kalsada;Agbiaheda iti babassit a kalsada.
7 Awanen* dagiti agnanaed kadagiti purok ti Israel;Awanda agingga a siak, ni Debora,+ immayak,Agingga nga immayak kas ina ti Israel.+
8 Nangpilida kadagiti sabali a dios;+Adda gubat kadagiti ruangan.+
Awan ti makita a kalasag, wenno gayang,Iti 40,000 a lallaki iti Israel.
9 Addaak iti dasig dagiti komander ti Israel,+A nagboluntario a kadua dagiti umili.+
Idaydayawyo ni Jehova!
10 Dakayo a nakasakay iti kayumanggi nga asno,Dakayo a nakatugaw iti nangina a karpet,Ken magmagna iti kalsada,Panunotenyo daytoy:
11 Mangmangngeg ti timek dagiti agsaksakdo iti inumen dagiti animal;Pagsasaritaanda dagiti nalinteg nga aramid ni Jehova,Dagiti nalinteg nga aramid dagiti agnanaed iti Israel.
Napan ti ili ni Jehova kadagiti ruangan.
12 Agriingka, agriingka, O Debora!+
Agriingka, agriingka, agkantaka!+
Tumakderka, Barak!+ Ipanawmo dagiti baludmo, sika nga anak ni Abinoam!
13 Dagidiay nakalasat napanda kadagiti prinsipe;Immay kaniak ti ili ni Jehova a makilaban kadagiti kabusor.
14 Naggapuda idiay Efraim, nga agnanaed iti tanap;*Sursurotendaka, O Benjamin, a kaduada dagiti tattaom.
Simmalog dagiti komander manipud Makir,+Ken dagiti mangig-iggem iti sarukod* manipud Zabulon.
15 Kimmuyog ken Debora dagiti prinsipe ti Isacar,Kasta met ti Isacar, ken Barak.+
Nagnagna a napan iti tanap.*+
Saan a makapagdesision no kumuyog dagiti benneg ti Ruben.
16 Apay a nakatugawka iti dua a silia,A dumdumngeg iti panagpito dagiti pastor?+
Ta saan a makapagdesision no kumuyog dagiti benneg ti Ruben.
17 Nagtalinaed ti Gilead iti ballasiw ti Jordan;+Ken apay a nagbati ti Dan kadagiti barko?+
Nakatugaw lattan ti Aser iti igid ti baybay,Ken nagtalinaed kadagiti sangladanna.+
18 Inrisgo dagiti umili ti Zabulon ti biagda;*Kasta met ti Neftali,+ nga adda kadagiti turod.+
19 Immay dagiti ari, ket nakilabanda;Nakilaban dagiti ari ti Canaan+Idiay Taanak, iti asideg dagiti danum ti Megiddo.+
Ngem awan ti nasamsamda a pirak.+
20 Manipud langit nakilaban dagiti bituen;Nakilabanda ken Sisera manipud kadagiti pagrikusanda.
21 Ti napegges nga ayus* ti Kison inyanudna dagiti kabusor,+Wen, ti napegges nga ayus,* ti ayus* ti Kison.
Imbaddebaddekko dagiti napigsa.
22 Dumanapeg ti saka dagiti kabalio a pakigubatBayat nga agtartarayda a sipapartak.+
23 ‘Ilunodyo ti Meroz,’ kinuna ti anghel ni Jehova,‘Wen, ilunodyo dagiti agnanaed sadiay,Ta saanda a tinulongan ni Jehova,Saanda a nakilaban para ken Jehova.’
24 Ni Jael+ ti napadayawan unay kadagiti babbai,Ti asawa ni Heber+ a Keneo;Isu ti kararagsakan kadagiti babbai nga agnanaed iti tolda.
25 Dimmawat ni Sisera iti danum, ngem gatas ti intedna;
Nangted iti nagbalay a gatas* a naikabil iti napintas a dakkel a malukong.+
26 Nangala iti pasok ti tolda,Iniggaman ti kannawan nga imana ti martilio ti trabahador.
Minartiliona ti ulo ni Sisera ket naburak,Ken minalo ken linussokna ti pispisna.+
27 Nagkuyegyeg iti baet dagiti saka ni Jael; ket napaidda;Natumba iti sakaananna;Natay iti mismo a nakatumbaanna.
28 Tumantan-aw iti tawa ti maysa a babai,Simmirip ti ina ni Sisera iti rehas,‘Apay ngata nga awan pay ti karuahena?
Apay ngata nga awan metten ti mangngeg nga uni dagiti karuahena?’+
29 Simmungbat kenkuana dagiti kasisiriban a babbai;Wen, maulit-ulit nga imbagana iti bagina,
30 ‘Madamada la ketdi a pagbibingayan dagiti naalada,Maysa a babai,* dua a babbai,* iti tunggal soldado,Dekolor a lupot para ken Sisera, wen, dekolor a lupot,Maysa a nabordaan a bado, dekolor a lupot, dua a nabordaan a badoPara iti tengnged dagiti nakigubat.’
31 Mapapatay koma ti amin a kabusormo,+ O Jehova,Ngem agbalin koma a kas iti sumingsingising a naraniag nga init dagidiay mangay-ayat kenka.”
Ket 40 a tawen nga adda talna* iti daga.+
Footnotes
^ Wenno “Agputarakto iti musika.”
^ Wenno mabalin a, “Nagginggined.”
^ Wenno “Nagpatinggan.”
^ Wenno “kapatagan.”
^ Wenno mabalin a, “dagidiay agig-iggem iti alikamen ti maysa nga eskriba.”
^ Wenno “kapatagan.”
^ Wenno “Linais dagiti umili ti Zabulon ti kararuada.”
^ Wenno “karayan.”
^ Wenno “karayan.”
^ Wenno “karayan.”
^ Wenno “iti krema.”
^ Lit., “nga aanakan.”
^ Lit., “nga aanakan.”
^ Wenno “kappia.”
