Uk-ukom 6:1-40
6 Inaramid manen dagiti Israelita ti dakes iti imatang ni Jehova+ isu nga impalubos ni Jehova nga iturayan ida ti Midian iti pito a tawen.+
2 Dinominaran ti Midian ti Israel+ ket gapu ta kabutengda ti Midian, nangaramidda kadagiti paglemmengan* kadagiti bantay, kueba, ken lugar a narigat a madanon.+
3 No agmula ti Israel iti bin-i, rauten ida ti Midian, Amalek,+ ken dagiti taga-Daya.+
4 Agkampoda maibusor iti Israel ken dadaelenda dagiti maapit iti daga agingga idiay Gaza. Awan ti ibatida a kanen dagiti Israelita, awan uray karnero, baka, wenno asno.+
5 Ikuyogda dagiti taraken ken toldada a kas kaadu ti dudon,+ ket saan a mabilang ti kaaduda agraman dagiti kamelioda.+ Mapanda dadaelen ti daga.
6 Iti kasta, pimmanglaw unay dagiti Israelita gapu iti Midian ket nagpatulongda ken Jehova.+
7 Idi nagpatulong dagiti Israelita ken Jehova gapu iti Midian,+
8 nangibaon ni Jehova iti propeta a nangibaga kadakuada: “Kastoy ti kinuna ni Jehova a Dios ti Israel, ‘Inruarkayo idiay Egipto, a nakaadipenanyo.+
9 Insalakankayo kadagiti Egipcio ken iti amin a mangparparigat kadakayo. Pinapanawko ida ket intedko kadakayo ti dagada.+
10 Kinunak kadakayo: “Siak ni Jehova a Diosyo.+ Dikay agbuteng kadagiti dios dagiti Amoreo a makindaga iti pagnanaedanyo.”+ Ngem dikay nagtulnog kaniak.’”*+
11 Idi agangay, adda anghel ni Jehova+ a nagtugaw iti sirok ti dakkel a kayo idiay Ofra, a kukua ni Joas nga Abi-ezerita.+ Agibabaut idi iti trigo ti anakna a ni Gideon+ iti pagpespesan iti ubas tapno saan a makita dagiti Midianita.
12 Nagparang kenkuana ti anghel ni Jehova ket kinunana: “Adda kenka ni Jehova,+ sika a nabileg a mannakigubat.”
13 Insungbat ni Gideon: “Dispensarem, apo, ngem no adda kadakami ni Jehova, apay ngarud a kastoy ti mapaspasamak kadakami?+ Ayannan ti amin a nakaskasdaaw nga inaramidna nga imbagbaga dagidi ammami?+ Kinunada: ‘Inruarnatayo ni Jehova idiay Egipto.’+ Binaybay-annakamin ni Jehova+ ken intednakami iti ima dagiti Midianita.”
14 Simmango ni Jehova ket kinunana: “Usarem ti pigsam, ket isalakanmonto ti Israel kadagiti Midianita+ ta siak ti mangibaon kenka.”
15 Insungbat ni Gideon: “Dispensarennak, Apo Jehova. Kasanok koma a maisalakan ti Israel? Ti pamiliak* ti kanunumuan iti Manases, ket siak ti kanunumuan iti balay ni amak.”
16 Ngem kinuna ni Jehova: “Tulongankanto+ ket abakemto ti Midian a kasla maymaysa a tao.”
17 Insungbat ni Gideon: “No tulongannakto, mangipakitaka iti pagilasinan a sika ti makisarsarita kaniak.
18 Pangngaasim ta saanka a pumampanaw ditoy agingga a makasubliak ken idasaranka iti makan.”+ Iti kasta, kinunana: “Diak pumanaw ditoy agingga a makasublika.”
19 Napan nangparti ni Gideon iti urbon a kalding ken nanggamay iti maysa nga efa* nga arina+ ket inaramidna a tinapay nga awan lebadurana. Inkabilna ti karne iti basket ken ti digo iti banga ket indasarna dagita iti sirok ti dakkel a kayo.
20 Kinuna itan ti anghel ti pudno a Dios: “Alaem ti karne ken ti tinapay nga awan lebadurana ket iparabawmo iti dakkel a bato sadiay, ken bukbokam iti digo.” Inaramid dayta ni Gideon.
21 Insagid ti anghel ni Jehova ti murdong ti sarukodna iti karne ken iti tinapay nga awan lebadurana.+ Simged ti apuy iti bato ket nauram ti karne ken ti tinapay. Kalpasanna, nagpukaw ti anghel ni Jehova.
22 Iti kasta, nabigbig ni Gideon nga anghel dayta ni Jehova.+
Dagus a kinuna ni Gideon: “O Kangatuan* nga Apo Jehova, nakitak ti anghel ni Jehova iti rupanrupa!”+
23 Simmungbat ni Jehova: “Agkalmaka.* Dika agbuteng+ ta saankanto a matay.”
24 Gapuna, nangbangon sadiay ni Gideon iti altar para ken Jehova ket naawagan dayta iti Jehova-salom*+ agingga ita nga aldaw. Adda pay laeng dayta idiay Ofra nga ayan dagiti Abi-ezerita.
25 Iti dayta a rabii, imbilin ni Jehova: “Alaem ti urbon a kalakian a baka a kukua ni tatangmo, ti maikadua a baka a pito ti tawenna, sa rakrakem ti altar ni Baal a kukua ni tatangmo, ken pukanem ti sagrado a poste* iti abayna.+
26 Inton makaibangonka iti altar a naaramid iti naintar a batbato para ken Jehova a Diosmo iti rabaw daytoy natalged a disso, alaem ti maikadua nga urbon a baka ket ipaaymo kas daton a mapuoran, nga usarem dagiti kayo ti sagrado a poste* a pinukanmo.”
27 Iti kasta, nangikuyog ni Gideon iti 10 a lallaki kadagiti adipenna ket inaramidna ti imbilin ni Jehova. Ngem gapu ta mabuteng unay iti pamilia ni tatangna ken kadagiti lallaki iti siudad, saanna nga inaramid dayta iti aldaw no di ket iti rabii.
28 Kabigatanna, nasapa a bimmangon dagiti lallaki iti siudad ket nakitada a narakrak ti altar ni Baal ken napukan ti sagrado a poste* iti abayna. Adda pay maikadua nga urbon a baka a naidaton iti kaibangbangon nga altar.
29 Insaludsodda iti maysa ken maysa: “Asino ti nangaramid iti daytoy?” Kalpasan a nagimbestigarda, kinunada: “Ni Gideon nga anak ni Joas.”
30 Gapuna, kinunada ken Joas: “Iruarmo ti anakmo ta papatayenmi. Rinakrakna ti altar ni Baal ken pinukanna ti sagrado a poste* iti abayna.”
31 Insungbat ni Joas+ iti amin a nangkompronta kenkuana: “Kasapulan kadi nga idepensa ken isalakanyo ni Baal? Masapul a mapapatay ita a bigat ti asinoman a mangidepensa kenkuana.+ No isu ket dios, bay-anyo nga idepensana ti bagina,+ ta adda nangrakrak iti altarna.”
32 Iti dayta nga aldaw, inawaganna ni Gideon iti Jerubaal* ta kinunana: “Bay-anyo nga idepensa ni Baal ti bagina, ta adda nangrakrak iti altarna.”
33 Nagtitipon ti Midian,+ Amalek,+ ken dagiti taga-Daya+ ket bimmallasiwda* a napan idiay Tanap* ti Jezreel sa nagkampoda sadiay.
34 Nagtignay* ken Gideon+ ti espiritu ni Jehova ket pinuyotanna ti tangguyob.+ Napan kenkuana dagiti Abi-ezerita+ tapno suportaranda.
35 Nangibaon kadagiti mensahero iti intero a teritoria ti Manases, ket napanda met kenkuana tapno suportaranda. Nangibaon pay kadagiti mensahero iti intero a teritoria ti Aser, Zabulon, ken Neftali, ket timmulongda kenkuana.
36 Kinuna ni Gideon iti pudno a Dios: “No isalakanmo ti Israel babaen kaniak, kas inkarim,+
37 mangyaplagak iti lupot a delana iti pagirikan. No ti laeng lupot ti malinnaawan ngem namaga ti daga iti aglawlawna, maammuakto nga isalakanmo ti Israel babaen kaniak, kas inkarim.”
38 Kasta ti napasamak. Kabigatanna, nasapa a bimmangon ni Gideon ket idi pinekkelna ti lupot, nakaala iti danum nga umanay a mangpunno iti dakkel a malukong.
39 Ngem kinuna ni Gideon iti pudno a Dios: “Saanka koma a makaunget kaniak ket bay-annak nga agkiddaw iti maminsan pay. Pangngaasim ta dumawatak pay iti maysa a pagilasinan iti daytoy a lupot. Kayatko koma a ti laeng lupot ti namaga ngem malinnaawan ti daga iti aglawlawna.”
40 Kasta ti inaramid ti Dios iti dayta a rabii. Ti laeng lupot ti namaga ngem nalinnaawan ti daga iti aglawlawna.
Footnotes
^ Wenno mabalin a, “pagidulinan iti uneg ti daga.”
^ Lit., “dimngeg iti timekko.”
^ Lit., “sangaribuk.”
^ Wenno “Soberano.”
^ Lit., “Maadda koma kenka ti talna.”
^ Kaipapananna, “Ni Jehova ket Talna.”
^ Kaipapananna, “Bay-anyo ni Baal a Mangidepensa iti Kasona (Makiranget).”
^ Wenno “bimmallasiwda iti karayan.”
^ Wenno “Kapatagan.”
^ Lit., “Naikawes.”
