Uk-ukom 7:1-25
7 Kalpasanna, nasapa a bimmangon ni Jerubaal, wenno Gideon,+ ken ti amin a kimmuyog kenkuana ket nagkampoda iti Ubbog ti Harod. Iti amiananda, nagkampo met ti Midian iti turod ti More idiay tanap.*
2 Kinuna ni Jehova ken ni Gideon: “Adu unay ti kimmuyog kenka. Bassit laeng ti kasapulak a mangparmek iti Midian+ tapno saan nga agpangas ti Israel ket ibagada kaniak, ‘Siak ti nangisalakan iti bagik.’+
3 Pangngaasim ta ibagam kadagiti tattao: ‘Agawiden ti asinoman a mabuteng wenno maamak.’”+ Sinubok ngarud ida ni Gideon, ket 22,000 ti nagawid ken 10,000 ti nabati.
4 Ngem kinuna ni Jehova ken ni Gideon: “Aduda latta. Ibaonmo ida iti danum tapno masubokko ida. No ibagak, ‘Kumuyog daytoy kenka,’ alaem, ngem no ibagak, ‘Saan a kumuyog daytoy kenka,’ saanmo nga alaen.”
5 Imbaonna ngarud dagiti lallaki iti danum.
Kalpasanna, kinuna ni Jehova ken ni Gideon: “Ilasinmo dagiti nangdilpat iti danum a kas iti panagdilpat ti aso manipud kadagiti nagparintumeng nga uminum.”
6 Ti bilang dagiti lallaki nga imminum iti danum babaen ti dakulapda ket 300. Nagparintumeng nga imminum ti dadduma pay.
7 Kinuna ni Jehova ken ni Gideon: “Isalakankayto babaen iti 300 a lallaki nga imminum iti danum babaen ti dakulapda, ket maparmekmonto ti Midian.+ Pagawidemon ti dadduma pay.”
8 Kalpasan nga innala ti 300 a lallaki dagiti abasto a taraon ken tangguyob nga iggem ti dadduma pay a lallaki, pinagawid idan ni Gideon ngem pinagbatina ti 300 a lallaki. Nagkampo idi ti Midian iti tanap iti baba dagiti Israelita.+
9 Iti dayta a rabii, kinuna ni Jehova: “Bumangonka, rautem ti kampoda, ta intedko dayta iti imam.+
10 Ngem no mabutengka a rumaut, ikuyogmo ni Pura a katulongam ket mapankayo iti kampoda.
11 Denggem ti ibagbagada, ket tumuredkanto* a mangraut kadakuada.” Gapuna, immasideg da Gideon ken Pura a katulonganna iti igid ti kampo dagiti kabusor.
12 Kasla dudon a naiwaras iti tanap dagiti Midianita, Amalekita, ken amin a taga-Daya,+ ket saan a mabilang dagiti kamelioda,+ a kas iti kaadu ti darat iti igid ti baybay.
13 Idi nakadanonen ni Gideon, adda lalaki a mangyes-estoria iti kaduana iti natagtagainepna. Kinunana: “Natagtagainepko nga adda kano idi nagbukel a tinapay a sebada a nagtulidtulid nga agturong iti kampo ti Midian.+ Naidungpar dayta iti maysa a tolda, ket natumba ti tolda sa nayaplag.”
14 Insungbat ti kaduana: “Daytoy la ketdi ti espada ti Israelita a ni Gideon+ nga anak ni Joas. Inted ti Dios iti imana ti Midian ken ti amin a kakaduana a nagkampo.”+
15 Idi nangngeg ni Gideon ti tagtagainep ken ti kaipapananna,+ nagruknoy ket nagdaydayaw iti Dios. Kalpasanna, nagsubli iti kampo ti Israel ket kinunana: “Tumakderkayo, ta inted ni Jehova iti imayo ti kampo ti Midian.”
16 Biningayna ti 300 a lallaki iti tallo a grupo ket inikkanna amin ida iti tangguyob+ ken karamba nga adda nagyanna nga aluten.
17 Kinunana kadakuada: “Siputanyo ti aramidek, ket tuladenyo. Inton makadanonak iti igid ti kampo, aramidenyo ti aramidek.
18 Inton puyotak ken dagiti kakaduak ti tangguyob, puyotanyo met dagiti tangguyobyo iti aglawlaw ti kampo sa ipukkawyo, ‘Ti espada ni Jehova ken ni Gideon!’”
19 Ni Gideon ken ti 100 a lallaki a kaduana immasidegda iti igid ti kampo iti rugi ti panagbantay iti tengnga ti rabii,* apaman a nakapagsinnukat dagiti parabantay. Pinuyotanda dagiti tangguyob+ ken binurakda dagiti dadakkel a karamba nga iggemda.+
20 Iti kasta, pinuyot ti tallo a grupo dagiti tangguyob ken binurakda dagiti dadakkel a karamba. Iniggaman ti kannigid nga imada dagiti aluten ken pinuyotanda dagiti tangguyob nga iggem ti kannawan nga imada, ket impukkawda: “Ti espada ni Jehova ken ni Gideon!”
21 Nagtalinaedda a nakatakder iti aglawlaw ti kampo, ket nagtataray ken nagririaw ti intero nga armada bayat nga agliblibasda.+
22 Intuloy ti 300 a puyoten dagiti tangguyob, ket pinaglalaban ni Jehova dagiti adda iti kampo.+ Nagtataray dagiti kabusor nga agpa-Zerera agingga idiay Bet-sita ken iti pagpatinggaan ti Abel-mehola+ iti asideg ti Tabat.
23 Naayaban dagiti lallaki ti Israel, manipud Neftali, Aser, ken iti intero a Manases,+ ket kinamatda ti Midian.
24 Nangibaon ni Gideon kadagiti mensahero iti intero a kabambantayan ti Efraim tapno ibagada: “Darupenyo ti Midian, ket bantayanyo dagiti pagballasiwan ti Jordan agingga iti Bet-bara.” Nagtitipon ngarud ti amin a lallaki ti Efraim, ket binantayanda dagiti pagballasiwan ti Jordan agingga iti Bet-bara.
25 Natiliwda met ti dua a prinsipe ti Midian, da Oreb ken Zeeb. Pinatayda ni Oreb iti dakkel a bato, a naawagan iti bato ni Oreb,+ ket pinatayda met ni Zeeb iti pagpespesan iti ubas a naipanagan ken Zeeb. Intultuloyda a kinamat ti Midian,+ ket inyegda ken Gideon idiay Jordan dagiti ulo da Oreb ken Zeeb.
Footnotes
^ Wenno “kapatagan.”
^ Lit., “pumigsanto dagiti imam.”
^ Agarup 10:00 ti rabii agingga iti agarup 2:00 ti parbangon.
