Uk-ukom 8:1-35
8 Nakiriri dagiti lallaki ti Efraim ken ni Gideon,+ ket kinunada: “Apay a kastoy ti inaramidmo kadakami? Apay a dinakam inayaban idi nakilabanka iti Midian?”+
2 Ngem insungbatna: “Bassit laeng ti naaramidak no maidilig kadakayo. Saan kadi a nasaysayaat dagiti tedtedda nga ubas a naala ti Efraim+ ngem kadagiti ubas nga apit ti Abi-ezer?+
3 Saan kadi a dakayo ti inusar ti Dios a nangparmek kada Oreb ken Zeeb+ a prinsipe ti Midian? Isu nga ania koma ti naaramidak no idilig iti naaramidanyo?” Nagkalmada* idi naibagana daytoy.
4 Nakadanon ni Gideon idiay Jordan ket bimmallasiw. Nabannogen agraman ti 300 a lallaki a kaduana ngem intultuloyda latta ti kimmamat.
5 Kinunana kadagiti lallaki iti Succot: “Pangngaasiyo ta ikkanyo dagiti kakaduak iti tinapay ta nabannogdan. Kamkamatek da Zeba ken Zalmuna, dagiti ari ti Midian.”
6 Insungbat dagiti prinsipe ti Succot: “Apay koma nga ikkanmi ida iti tinapay? Natiliwyo kadin da Zeba ken Zalmuna?”
7 Gapuna, kinuna ni Gideon: “Gapu ta kasta ti kunayo, inton ited ni Jehova iti imak da Zeba ken Zalmuna, ablatankayto kadagiti siitan a mula iti let-ang.”+
8 Napan ni Gideon idiay Penuel ket kasta met laeng ti kiniddawna. Ngem ti insungbat dagiti lallaki iti Penuel ket kas met laeng iti insungbat dagiti lallaki iti Succot.
9 Gapuna, kinunana met kadagiti lallaki iti Penuel: “Inton mangabakak, rebbaekto ti torreyo.”+
10 Adda idi da Zeba ken Zalmuna idiay Karkor agraman ti agarup 15,000 a soldadoda. Dagitoy laengen ti nabati iti intero nga armada dagiti taga-Daya+ ta natayen ti 120,000 a soldado a kakaduada.
11 Nagtultuloy a kimmamat ni Gideon iti dalan nga asideg kadagiti agnanaed iti tolda iti daya ti Noba ken Jogbea+ ket rinautna ti kampo dagiti kabusor, a saan a nakasagana.
12 Idi naglibas da Zeba ken Zalmuna, kinamatna ida agingga a natiliwna dagitoy a dua nga ari ti Midian, ket nagbuteng ti intero a kampo.
13 Idi nagsubli ni Gideon nga anak ni Joas manipud iti gubat, limmabas iti dalan nga agturong idiay Heres.
14 Iti dalan, tiniliwna ti maysa nga agtutubo a lalaki manipud Succot sa pinagsaludsodanna. Insurat ti agtutubo ti nagan dagiti prinsipe ken panglakayen ti Succot, 77 ti bilangda.
15 Gapuna, napan kadagiti lallaki ti Succot ket kinunana: “Adtoy da Zeba ken Zalmuna a makagapu a linalaisdak idi kinunayo, ‘Apay koma nga ikkanmi iti tinapay dagiti nabannog a lallaki? Natiliwyo kadin da Zeba ken Zalmuna?’”+
16 Innalana dagiti panglakayen ti Succot ket dinusana ida babaen ti panangyablatna kadakuada kadagiti siitan a mula iti let-ang.+
17 Rinebbana met ti torre ti Penuel+ ken pinatayna dagiti lallaki iti siudad.
18 Kalpasanna, insaludsodna kada Zeba ken Zalmuna: “Ania ti langa dagiti lallaki a pinatayyo idiay Tabor?” Insungbatda: “Kalanglangam ida. Kasla annak ti ari ti langada.”
19 Iti kasta, kinunana: “Kakabsatko ida, maymaysa ti nanangmi. Isapatak iti nagan ti sibibiag a Dios a ni Jehova a patayenkayo ta pinatayyo ida.”
20 Imbagana ken Jeter nga inauna nga anakna: “Patayem ida.” Ngem saan a kayat ti agtutubo; saanna a maitured ta ubing pay.
21 Gapuna, kinuna da Zeba ken Zalmuna ken ni Gideon: “Sika ti mangpatay kadakami, no talaga a malalakika.”* Pinatayna ngarud da Zeba ken Zalmuna+ ket innalana dagiti sinanbulan nga arkos iti tengnged dagiti kamelioda.
22 Idi agangay, kinuna dagiti Israelita ken ni Gideon: “Iturayannakami—sika, ti anakmo, ken ti apokom—ta insalakannakami kadagiti Midianita.”+
23 Insungbat ni Gideon: “Saan a siak wenno ti anakko ti mangituray kadakayo. Ni Jehova ti mangituray kadakayo.”+
24 Kinuna pay ni Gideon: “Maysa laeng ti kiddawek: Mangted ti tunggal maysa kadakayo iti naalayo nga aritos ti agong.” (Ta adda dagiti balitok nga aritos ti agong a naalada kadagiti Ismaelita.)+
25 Insungbatda: “Itedmi kenka dayta.” Nangyaplagda iti lupot ket nangikarga ti tunggal maysa iti naalana nga aritos ti agong.
26 Ti kadagsen dagitoy a balitok nga aritos ti agong ket 1,700 a siklo* a balitok, malaksid pay kadagiti sinanbulan nga arkos, aritos, purpura a delana a bado dagiti ari ti Midian, ken kadagiti kuentas ti kamelio.+
27 Inaramid dagita ni Gideon kas efod+ sa implastarna idiay Ofra a siudadna.+ Ngem nagserbi dayta kas silo ken Gideon ken iti pamiliana+ ta nagdaydayaw iti dayta* dagiti Israelita.+
28 Iti kasta, naparmek dagiti Israelita ti Midian+ ket saandan nga inrurumen* ti Israel. Gapuna, naadda ti talna* iti daga iti 40 a tawen idi kaaldawan ni Gideon.+
29 Nagsubli ni Jerubaal+ nga anak ni Joas iti balayna ket nagyan sadiay.
30 Naaddaan ni Gideon iti 70 nga annak a lallaki* ta adu ti assawana.
31 Adda pay anakna a lalaki iti sabali nga asawana idiay Sikem, ket pinanagananna iti Abimelec.+
32 Lakayen ni Gideon idi natay ket naitabon iti nakaitaneman ni Joas nga amana idiay Ofra a pagnanaedan dagiti Abi-ezerita.+
33 Idi natayen ni Gideon, nagdaydayaw manen* dagiti Israelita kadagiti Baal,+ ket pinagbalinda ni Baal-berit kas diosda.+
34 Linipat dagiti Israelita ni Jehova a Diosda,+ a nangisalakan kadakuada iti amin a kabusorda.+
35 Saanda met a nangipakita iti napudno nga ayat iti pamilia ni Jerubaal, wenno Gideon, kas subad iti amin a naimbag nga inaramidna iti Israel.+
Footnotes
^ Wenno “Bimmaaw ti pungtotda.”
^ Wenno “ta no ania ti lalaki, kasta met ti bilegna.”
^ Wenno “ta gapu iti dayta a nagbalangkantis iti naespirituan.”
^ Lit., “inngato ti ulo.”
^ Wenno “kappia.”
^ Lit., “iti 70 nga annak a lallaki a nagtaud iti luppona.”
^ Wenno “nagbalangkantis manen iti naespirituan.”
