Uk-ukom 9:1-57
9 Idi agangay, napan ni Abimelec+ nga anak ni Jerubaal idiay Sikem nga ayan dagiti kakabsat ni nanangna, ket kinunana kadakuada ken iti intero a pamilia ni apongna:*
2 “Pangngaasiyo ta isaludsodyo kadagiti lider* ti Sikem, ‘Ania ti kaykayatyo? Iturayannakayo ti 70 nga annak a lallaki ni Jerubaal+ wenno maysa laeng ti mangituray kadakayo? Laglagipenyo a kabagiandak.’”*
3 Gapuna, nakisarita dagiti kabagian ni nanangna iti amin a lider ti Sikem, ket nakombinsirda* a mangsuporta ken Abimelec, ta kinunada: “Isu ket kabsattayo.”
4 Inikkanda iti 70 a pedaso a pirak a naggapu iti balay* ni Baal-berit,+ ket inusar dayta ni Abimelec a nangtangdan kadagiti awan trabahona ken naranggas a lallaki a mangkuyog kenkuana.
5 Kalpasanna, napan iti balay ni amana idiay Ofra+ ket pinatayna ti 70 a kakabsatna a lallaki+ nga annak ni Jerubaal iti rabaw ti maysa a bato. Ni laeng Jotam nga inaudi nga anak ni Jerubaal ti nakalasat ta naglemmeng.
6 Naguummong ti amin a lider ti Sikem ken amin nga agnanaed iti Bet-millo ket pinagbalinda nga ari ni Abimelec,+ idiay ayan ti dakkel a kayo, iti asideg ti adigi nga adda idi idiay Sikem.
7 Idi naipadamag dayta ken Jotam, dagus a napan ken nagtakder iti tuktok ti Bantay Gerizim+ ket impukkawna: “Dumngegkayo, dakayo a lider ti Sikem, tapno denggennakayo ti Dios.
8 “Naminsan, adda dagiti kayo a naguummong tapno mangpilida iti ari a mangituray kadakuada. Kinunada iti kayo nga olibo, ‘Iturayannakami.’+
9 Insungbat ti kayo nga olibo, ‘Isardengko kadin ti mangpataud iti lana,* a pakaidayawan ti Dios ken dagiti tattao, ket iturayak* ti dadduma a kayo?’
10 Kalpasanna, kinuna dagiti kayo iti kayo a higos, ‘Umayka, iturayannakami.’
11 Insungbat ti kayo a higos, ‘Isardengko kadin ti mangpataud kadagiti nasam-it ken nasayaat a bungak, ket iturayak* ti dadduma a kayo?’
12 Kinuna pay dagiti kayo iti puon ti ubas, ‘Umayka, iturayannakami.’
13 Insungbat ti puon ti ubas, ‘Isardengko kadin ti mangpataud iti baro nga arak a pakaragsakan ti Dios ken dagiti tattao, ket iturayak* ti dadduma a kayo?’
14 Kamaudiananna, kinuna ti amin a kayo iti siitan a kayo, ‘Umayka, iturayannakami.’+
15 Insungbat ti siitan a kayo, ‘No talaga a kayatdak a pilien kas ariyo, umaykayo agkamang kaniak. Ngem no saan, rummuar koma ti apuy kaniak ket uramek dagiti sedro ti Lebanon.’
16 “Gapuna, talaga kadi a napudno ken umiso ti panangisaadyo ken Abimelec kas ari?+ Naimbag kadi ti impakitayo ken Jerubaal ken iti intero a pamiliana ken inaramidyo kadi ti maiparbeng kenkuana?
17 Idi nakigubat ni amak para kadakayo,+ inrisgona ti biagna* a nangisalakan kadakayo iti Midian.+
18 Ngem ita, binusoryo ti intero a pamilia ni amak ket pinatayyo ti 70 nga annakna a lallaki iti rabaw ti maysa a bato.+ Pinagbalinyo nga ari ni Abimelec, nga anak ti adipenna a babai,+ a mangituray kadagiti lider ti Sikem gapu laeng ta kabsatyo.
19 Wen, no talaga a napudno ken umiso ti inaramidyo ken Jerubaal ken iti intero a pamiliana ita nga aldaw, agragsakkayo gapu ken Abimelec ket bay-anyo a makipagragsak met kadakayo.
20 Ngem no saan, rummuar koma ti apuy ken Abimelec ket uramenna dagiti lider ti Sikem ken Bet-millo,+ ken rummuar koma met ti apuy kadagiti lider ti Sikem ken Bet-millo ket uramenna ni Abimelec.”+
21 Kalpasanna, naglibas ni Jotam+ ket napan idiay Beer, sa nagnaed sadiay gapu ken Abimelec a kabsatna.
22 Nagturay* ni Abimelec iti Israel iti tallo a tawen.
23 Kalpasanna, impalubos ti Dios nga adda panagginnura* iti nagbaetan ni Abimelec ken dagiti lider ti Sikem, ket trinaidorda ni Abimelec.
24 Naaramid daytoy tapno maibales ti kinaranggas a naaramid iti 70 nga annak ni Jerubaal ken masingir ti darada ken Abimelec a kabsatda ta pinatayna ida,+ kasta met kadagiti lider ti Sikem ta tinulonganda a mangpapatay kadagiti kakabsatna.
25 Gapuna, nangibaon dagiti lider ti Sikem iti lallaki a mangtambang kenkuana manipud iti tuktok dagiti bantay, ken agawenda ti awit ti asinoman a magna iti dalan. Naipadamag dayta ken Abimelec.
26 Kalpasanna, napan idiay Sikem+ ni Gaal nga anak ni Ebed ken dagiti kakabsatna, ket nagtalek kenkuana dagiti lider ti Sikem.
27 Napanda iti talon ket binurasda ti bunga dagiti kaubasanda, impayatpayatda dagita, ken nagpiestada. Kalpasanna, simrekda iti balay ti diosda+ ket nangan, imminum, ken inlunodda ni Abimelec.
28 Kinuna ni Gaal nga anak ni Ebed: “Asino ni Abimelec, ken asino ni Sikem tapno pagserbiantayo? Saan kadi nga isu ti anak ni Jerubaal,+ ket saan kadi a ni Zebul ti komander iti Sikem? Agserbitayo kadagiti annak ni Hamor, nga ama ni Sikem! Apay koma nga agserbitayo ken Abimelec?
29 No siak la koma ti mangituray iti daytoy nga ili, ikkatek ni Abimelec, sa ibagak: ‘Paaduem ti armadam ket labanannak!’”
30 Nakapungtot ni Zebul a prinsipe ti siudad idi nadamagna ti imbaga ni Gaal nga anak ni Ebed.
31 Sililimed* a nangibaon kadagiti mensahero a mangibaga ken Abimelec: “Adda ita idiay Sikem ni Gaal nga anak ni Ebed ken dagiti kakabsatna, ket sugsugsoganda dagiti tattao a bumusor kenka.
32 Inton rabii, rummuarka ken ikuyogmo dagiti tattaom, ket aguraykayo iti ruar ti siudad.
33 Inton bigat apaman a sumingising ti init, bumangonka a nasapa ket rautem ti siudad. Inton rummuar ni Gaal ken dagiti tattaona a lumaban kenka, aramidem ti amin a kabaelam a mangparmek kenkuana.”*
34 Iti rabii, rimmuar ni Abimelec ken ti amin a tattaona, ket nabingayda iti uppat a grupo sa nagurayda iti ruar ti Sikem.
35 Idi rimmuar ni Gaal nga anak ni Ebed sa nagtakder iti ruangan ti siudad, timmakder met ni Abimelec ken dagiti tattaona iti paglemlemmenganda tapno dumarupda.
36 Idi nakita ida ni Gaal, kinunana ken ni Zebul: “Adda tattao a sumalsalog kadagiti tuktok ti bantay.” Ngem insungbat ni Zebul: “Anniniwan ti bantay ti makitkitam, saan a tattao.”
37 Kinuna manen ni Gaal: “Kitaem! Adda tattao a sumalsalog iti tengnga ti kangatuan a paset ti daga, ken adda maysa a grupo a sumalsalog iti ayan ti dakkel a kayo ti Meonenim.”
38 Insungbat ni Zebul: “Ayannan ti kinapangasmo idi imbagam, ‘Asino ni Abimelec tapno pagserbiantayo?’+ Saan kadi a dagitoy a tattao ti tinagibassitmo? Rummuarka ket labanam ida.”
39 Rimmuar ni Gaal ket indauluanna dagiti lider ti Sikem a nakilaban ken Abimelec.
40 Kinamat ni Abimelec ni Gaal, ngem nakalibas ni Gaal. Adu ti napapatay agingga iti pagserkan ti siudad.
41 Intultuloy ni Abimelec ti nagyan idiay Aruma, ket pinapanaw ni Zebul+ ni Gaal ken dagiti kakabsatna idiay Sikem.
42 Kabigatanna, napan dagiti umili ti Sikem iti ruar ti siudad ket naipadamag dayta ken Abimelec.
43 Biningayna dagiti tattao iti tallo a grupo ket nagurayda iti ruar ti siudad. Idi nakitana a rumrummuar iti siudad dagiti umili ti Sikem, dinarup ken pinatayna ida.
44 Dimmarup ni Abimelec ken ti grupo a kaduana iti ruangan ti siudad ket binantayanda dayta. Rinaut ti dua pay a grupo ti amin nga adda iti ruar ti siudad ket pinatayda ida.
45 Nagmalmalem a nakilaban ni Abimelec iti siudad ket naparmekna dayta. Pinatayna dagiti umili ken rinebbana ti siudad+ sa binukbokanna iti asin.
46 Idi nadamag dayta dagiti lider ti Sikem, napanda a dagus iti maysa a siled a paglemmengan* iti balay* ni El-berit.+
47 Apaman a naipadamag ken Abimelec a naglemmeng ti amin a lider ti Sikem iti maysa a siled,
48 simmang-at ni Abimelec ken dagiti tattaona idiay Bantay Zalmon. Nangala ni Abimelec iti wasay, nangpukan iti sanga ti kayo, imbaklayna, sa kinunana kadagiti tattao: “Darasenyo, aramidenyo ti inaramidko!”
49 Gapuna, nangpukan dagiti tattao kadagiti sanga ket simmurotda ken Abimelec. Impanda dagita a sanga iti sanguanan ti siled a paglemmengan sa pinuoranda dayta. Iti kasta, natay ti amin a tattao, lallaki ken babbai, iti torre ti Sikem, agarup 1,000 ti bilangda.
50 Kalpasanna, napan ni Abimelec idiay Tebez ket nagkampo sadiay maibusor iti Tebez ket sinakupna.
51 Adda natibker a torre iti tengnga ti siudad, ket nagkamang sadiay ti amin a lallaki ken babbai ken amin a lider ti siudad. Inserrada ti ruangan sa immulida iti tuktok ti torre.
52 Napan ni Abimelec iti torre ket nakilaban kadagiti tattao sadiay. Immasideg iti ruangan ti torre tapno puoranna.
53 Kalpasanna, adda babai a nangitinnag iti makinrabaw a paset ti gilingan a bato iti ulo ni Abimelec isu a naburak ti ulona.+
54 Dagus nga inayaban ni Abimelec ti adipenna a paraawit iti armasna ket kinunana: “Asutem ta espadam ket papatayennak, tapno awanto ti mangibaga, ‘Babai ti nangpatay kenkuana.’” Gapuna, dinuyok ti adipen ket natay ni Abimelec.
55 Idi nakita dagiti lallaki ti Israel a natayen ni Abimelec, nagawiddan.
56 Iti kasta, binales ti Dios ni Abimelec gapu iti dakes nga inaramidna ken amana idi pinatayna ti 70 a kakabsatna.+
57 Dinusa met ti Dios dagiti lallaki ti Sikem gapu iti dakes nga inaramidda. Iti kasta, natungpal kadakuada ti lunod nga imbaga ni Jotam+ nga anak ni Jerubaal.+
Footnotes
^ Lit., “pamilia ti balay ti ama ni inana.”
^ Wenno mabalin a, “makinkukua iti daga.”
^ Wenno “kadaraandak.”
^ Lit., “agannayas ti pusoda.”
^ Wenno “templo.”
^ Wenno “ti kinabungak.”
^ Lit., “agampayagak iti ngatuen.”
^ Lit., “agampayagak iti ngatuen.”
^ Lit., “agampayagak iti ngatuen.”
^ Wenno “kararuana.”
^ Wenno “Nagbalin a prinsipe.”
^ Lit., “nangibaon ti Dios iti dakes nga espiritu.”
^ Wenno “Sisisikap.”
^ Wenno “aramidem kenkuana ti aniaman a posible a masarakam.”
^ Wenno “pagkamangan.”
^ Wenno “templo.”
