Un-unnoy 4:1-22
א [Alef]
4 Anian ta limmidem ti nasileng a balitok, ti nasayaat a balitok!+
Anian ta naiwarawara dagiti nasantuan a bato+ iti tunggal suli ti kalsada!*+
ב [Beth]
2 No maipapan iti napateg nga annak ti Sion, a kas kapateg ti nasayaat a balitok,Anian ta naibilangda kas damili a pagkargaan,Nga inaramid ti ima ti agdamdamili!
ג [Gimel]
3 Uray dagiti chakal pasusuenda dagiti ukenda,Ngem nagbalin a naranggas ti anak a babai ti ilik,+ a kas kadagiti abestrus iti let-ang.+
ד [Daleth]
4 Ti dila ti agsussuso a maladaga dimket iti ngadasna gapu ta mawaw.
Agpakaasi dagiti ubbing iti tinapay,+ ngem awan ti mangted.+
ה [He]
5 Dagiti naruam a mangan iti naimas a taraon napalalo ti bisinda* a nakaidda kadagiti kalsada.+
Dagiti napadakkel nga agbadbado iti nalabaga+ nagiddada iti bunton ti dapdapo.
ו [Waw]
6 Nakarkaro ti dusa* ti anak a babai ti ilik ngem ti dusa ti Sodoma gapu iti basolna,+A nadadael iti apagbiit, ken awan ti timmulong kenkuana.+
ז [Zayin]
7 Nasinsin-aw dagiti Nazareona+ ngem iti niebe, napurpurawda ngem iti gatas.
Nalablabagada ngem iti korales; kaslada napasileng a safiro.
ח [Heth]
8 Nagbalin ti langada a nangisngisit ngem iti uging;*Saanda a mailasin kadagiti kalsada.
Kimbet ti kudilda iti tulangda;+ nagbalinda a kasla nagango a kayo.
ט [Teth]
9 Nasaysayaat pay dagiti natay iti espada ngem dagiti natay iti nakaro a bisin,+Dagiti agkakapsuten, a kasla naduyok iti espada gapu ta awan ti taraon manipud iti talon.
י [Yod]
10 Ti ima ti naasi a babbai ti nangluto iti bukodda nga annak.+
Dagita ti nagbalin a taraonda iti panagladingitda bayat ti pannakadadael ti anak a babai ti ilik.+
כ [Kaf]
11 Impeksa ni Jehova ti ungetna;Imbukbokna ti sumsumged a pungtotna.+
Ken nangpasged iti apuy iti Sion a nanguram kadagiti pundasionna.+
ל [Lamed]
12 Saan a namati dagiti ari ti daga ken amin nga agnanaed iti daytaA makastrek ti kalaban ken ti kabusor kadagiti ruangan ti Jerusalem.+
מ [Mem]
13 Gapu dayta iti basol dagiti propetana, iti biddut dagiti padina,+A nangibukbok iti dara dagiti nalinteg iti tengnga ti siudad.+
נ [Nun]
14 Nagpagnapagnada a kasla bulsek+ kadagiti kalsada.
Narugitanda iti dara,+Isu nga awan ti makasagid kadagiti badoda.
ס [Samekh]
15 “Umadayokayo! Narugitkayo!” impukkawda kadakuada. “Umadayokayo! Umadayokayo! Didakam sagiden!”
Ta awanen ti pagyananda ken agakar-akarda.
Kinuna ti tattao dagiti nasion: “Dida mabalin ti makipagnaed kadatayo.*+
פ [Pe]
16 Inwarawara ida ni Jehova.+Dinton maayatan kadakuada.
Saanton a raemen ti tattao dagiti papadi,+ didanto maayatan kadagiti panglakayen.”+
ע [Ayin]
17 Uray ita, nabannogen ti matami nga agbirbirok iti tulong.+
Agpatpatulongkami iti maysa a nasion a saan a makaisalakan kadakami.+
צ [Tsade]
18 Binirbirokdakami iti sadinoman+ isu a saankami a makapagna kadagiti plasami.
Asidegen ti patinggami; agngudon dagiti aldawmi, ta agpatinggakamin.
ק [Qof]
19 Naparpartak dagiti mangkamkamat kadakami ngem kadagiti agila iti tangatang.+
Kinamatdakami iti bambantay; tinambangandakami iti let-ang.
ר [Resh]
20 Ti anges dagiti agongmi, daydiay dinutokan* ni Jehova,+ ket natiliw iti dakkel nga abutda,+Daydiay nangibagaanmi: “Agbiagkamto iti linongna iti tengnga dagiti nasion.”
ש [Sin]
21 Agragsak ken agrag-oka, O anak a babai ti Edom,+ kas iti panagnaedmo idiay Uz.
Ngem maipasanto met kenka ti kopa,+ ket mabartekkanto ken makita ti kinalamolamom.+
ת [Taw]
22 Agpatinggan ti dusam gapu iti biddutmo, O anak a babai ti Sion.
Saannakanto nga ipanaw manen.+
Ngem dusaennakanto gapu iti biddutmo, O anak a babai ti Edom.
Ibutaktaknanto dagiti basolmo.+
Footnotes
^ Lit., “iti ulo ti amin a kalsada.”
^ Lit., “nabaybay-anda.”
^ Lit., “kamali.”
^ Lit., “nangisit.”
^ Wenno “agnaed ditoy kas ganggannaet.”
^ Wenno “pinulotan.”
