Zacarias 1:1-21
1 Iti maikawalo a bulan ti maikadua a tawen ti panagturay ni Dario,+ kinuna ni Jehova ken ni propeta Zacarias*+ nga anak ni Berekias ken apoko ni Iddo:
2 “Makapungtot unay ni Jehova kadagiti ammayo.+
3 “Ibagam kadakuada, ‘Kastoy ti kinuna ni Jehova a panguluen dagiti armada: “‘Agsublikayo kaniak,’ impaibaga ni Jehova a panguluen dagiti armada, ‘ket agsubliakto kadakayo,’+ kuna ni Jehova a panguluen dagiti armada.”’
4 “‘Diyo tultuladen dagidi ammayo a nangibagaan dagiti propeta idi un-unana: “Daytoy ti kinuna ni Jehova a panguluen dagiti armada, ‘Pangngaasiyo ta isardengyo ti dakes a panagbiagyo ken dagiti dakes nga ar-aramidenyo.’”’+
“‘Ngem saanda a dimngeg, ken saandak nga inkankano,’+ kuna ni Jehova.
5 “‘Sadino itan ti ayan dagidi ammayo? Ken nagbiag kadi iti agnanayon dagidi a propeta?
6 Imbagak kadagidi ammayo dagiti bilin a masapul a surotenda ken imbaonko dagiti adipenko a propeta a mangipakdaar iti mapasamak no dida agtulnog. Saan kadi a napasamak amin dagitoy kadakuada?’+ Isu a nagsublida kaniak ket kinunada: ‘Maiparbeng laeng ti inaramid ni Jehova a panguluen dagiti armada gapu iti wagas ti panagbiagtayo ken kadagiti ar-aramidtayo.’”+
7 Iti maikadua a tawen ti panagturay ni Dario,+ iti maika-24 nga aldaw ti Sebat* a maika-11 a bulan, adda imbaga ni Jehova ken ni Zacarias nga anak ni Berekias ken apoko ni Iddo.
8 Kinuna ni Zacarias: “Rabii idi ket nakakitaak iti sirmata. Adda lalaki a nakasakay iti nalabaga a kabalio ken nagsardeng iti ayan dagiti kayo a mirto iti nauneg a rangkis. Iti likudanna, adda dagiti nakakabalio iti nalabaga, kayumanggi, ken puraw.”
9 Isu nga insaludsodko: “Apo, siasino dagita?”
Insungbat ti anghel a makisarsarita kaniak: “Ibagak kenka no siasinoda.”
10 Kinuna ti nakakabalio a lalaki a simmardeng iti ayan dagiti kayo a mirto: “Isuda dagidiay imbaon ni Jehova nga agsursor iti daga.”
11 Ket imbagada iti anghel ni Jehova a simmardeng iti ayan dagiti kayo a mirto: “Nagsursorkami ket nakitami a naulimek ken natalna ti intero a daga.”+
12 Isu a kinuna ti anghel ni Jehova: “O Jehova a panguluen dagiti armada, agingga iti kaano a dimo kaasian ti Jerusalem ken dagiti siudad iti Juda,+ a kapungpungtotmo iti 70 a tawen?”+
13 Nasayaat ken makaliwliwa ti panangsungbat ni Jehova iti anghel a makisarsarita kaniak.
14 Kalpasanna, kastoy ti imbaga kaniak ti anghel a makisarsarita kaniak: “Ipukkawmo, ‘Daytoy ti kinuna ni Jehova a panguluen dagiti armada: “Talaga a kasta unay ti panangipategko ken pannakaseknanko iti Jerusalem ken iti Sion.+
15 Saan unay a nakaro ti pungtotko+ kadagiti tattaok ngem makapungtotak unay kadagiti nanam-ay a nasion+ a mangpakpakaro iti rigat dagiti tattaok.”’+
16 “Isu a daytoy ti imbaga ni Jehova: ‘“Kaasiakto ti Jerusalem+ ket maibangonto manen ti balayko iti dayta,”+ kuna ni Jehova a panguluen dagiti armada, “ken marukodto ti Jerusalem tapno mabangon manen dayta.”’+
17 “Ipukkawmo pay, ‘Daytoy ti kinuna ni Jehova a panguluen dagiti armada: “Mapnonto manen iti kinasayaat dagiti siudadko; ket liwliwaento manen ni Jehova ti Sion+ ken piliennanto manen ti Jerusalem.”’”+
18 Kalpasanna, timmangadak ket nakakitaak iti uppat a sara.+
19 Isu a dinamagko iti anghel a makisarsarita kaniak: “Ania dagitoy?” Insungbatna: “Dagitoy dagiti sara a mangirepresentar kadagiti nabileg a nasion a nangiwarawara kadagiti tattao ti Juda,+ Israel,+ ken Jerusalem.”+
20 Idi kuan, impakita kaniak ni Jehova ti uppat a nalaing a trabahador.
21 Insaludsodko: “Apo, ania ti umayda aramiden?”
Kinunana: “Dagita a sara ti nangiwarawara iti Juda nga uray la awan ti makaitangad iti ulona. Dagita a trabahador ti umay mangbutbuteng kadakuada ken mangdadael kadagiti nasion a nangparmek iti Juda ken nangwarawara kadagiti umilina.”
