Report iti Intero a Lubong

Africa

Idiay Côte d’Ivoire naammuan ti maysa nga agtutubo nga estudiante nga agnagan Edith nga aggiddan ti aldaw a panagbautisarna ken ti panageksamenna. Situtured a kiniddawna iti maestrona a saan nga ageksamen ket isut’ immanamong. Rinabrabak dagiti kaeskuelaanna, ket binirngasanda iti Maria, ti ina ni Jesus. Rinay-aw ti maysa a barito dagiti kaeskuelaanna babaen ti panangibagana a di nagpabautisar ni Edith, no di ket nakisalip nga aglangoy. Tinukonan ni Edith ti barito iti tract maipapan iti patpatien dagiti Saksi ni Jehova.

Kalpasan a binasa ti barito dayta, dinan rinabrabak ket imbagana a kayatna met ti agbalin a Saksi. Inadalna ti libro a Pannakaammo a Mangiturong iti Biag nga Agnanayon, ket nabautisaran nupay binusor ti pamiliana. Maragsakan ni Edith ta impangpangrunana iti biagna ti dedikasionna ken Jehova, ket gapu itoy, natulongan ti maysa a tao tapno agdedikar met.

Impadamag ti maysa a misionero idiay Makinlaud nga Africa: “Ti panagbalin a paset ti maysa nga organisasion a naimbag ti pakasarsaritaanna, uray iti kabassitan a bario ditoy daga ket maysa kadagiti bendision ni Jehova. Nakitak  a naiparangarang a naimbag daytoy ditoy Ghana. Agdindinamag ken mararaem dagiti Saksi ni Jehova ditoy. Agitultulodkami kadagiti binulan a literatura a maitultulod kadagiti kongregasion iti probinsia. Iti maysa a bassit nga ili, dimi masarakan ti Saksi a kanayon a mangal-ala iti literatura. Dinamagko iti tsuper no ania ti aramidenmi. Kinitanak, immisem, ket kinunana: ‘Saan a problema dayta.’ Insardengna ti trak iti aduan tao a tiendaan, timman-aw iti tawa, sana inayaban ti maysa kadagiti babbalasitang nga aglaklako iti ikan iti igid ti kalsada. Inyawatna ti kahon ti literatura iti balasitang sana kinuna: ‘Pangngaasim ta itedmo daytoy kadagiti Saksi.’ Di nagtagtagari a binagkatna ti kahon sana insusuon, timmalikud ket saanmin a nakita gapu iti kaadu ti tao. Idi mapankamin iti sumaganad nga ili, dinamagko iti tsuper no am-ammona ti balasitang. Immisem manen ket kinunana: ‘Saan, ngem am-ammonatayo.’ Pinanunotko no maawatto ngata dagiti kakabsat ti literatura. Diak nagdanag. Naawatda dayta iti daydi met la nga aldaw.”

Iti bario ti Gbolobo, Liberia, nagsurat dagiti kakabsat iti hepe ti ili tapno ipakaammo ti panggepda a mangangay iti ilina iti kapatgan a narelihiosuan a gimong iti tawen. Impalubosna nga usaren ti kakabsat para iti okasion ti pagay-ayaman iti football ket pinakaammuanna ti amin a relihion iti pito nga ili a masakupanna. Ti pakaammo ti nangawis iti tattao a tumabuno iti Memorial. Dimteng iti bario ti dakkel a grupo dagiti Saksi tapno mangibangon iti entablado para iti Memorial iti tengnga ti pagay-ayaman ti football. Siaayat ken siraragsakda a nagtrabaho a sangsangkamaysa. Nagustuan dagiti pumurok daytoy. Nupay limlima ti agibumbunannag idiay Gbolobo, 636 ti timmabuno iti Memorial!

Nagtaraken ti 10-anyos a barito idiay amianan a Rwanda iti kalding agingga a nagpasngay daytoy iti tallo nga urbon. Nabiit pay a pinatulodanna ti sanga nga opisina iti retratona ken ti kabaian a kalding. Iti naipakuyog a surat, kinunana:  “Aglaplapusanan ti panangbendision ni Jehova kaniak, isu nga idonarko daytoy kabaian a kalding para iti sangalubongan a trabaho a panangasaba a nadakamat idiay Mateo 24:14.” Intedna ti kalding kadagiti panglakayen ti kongregasion ket kiniddawna nga ilakoda dayta. Inlakoda ket impatulodda ti kuarta iti sanga.

Nakilugan ti maysa nga special pioneer idiay Nigeria idi intukon ti tsuper nga aglugan. Idi dimmenden ti sabali a pasahero tapno adda pagtugawanna, nakita ti tsuper ti iggem ti kabsat a Ti Pagwanawanan. Pinababana ti kabsat. Din inlawlawag ti tsuper no apay ngem pinababana latta. Idi nakita dagiti agpalpaliiw a napanen ti lugan kalpasan a pinababada ti kabsat, imbagada kenkuana nga isut’ insalakan ti Diosna. Imbagada a “daytat’ lugan dagiti kidnaper.” Inispal ni Jehova ti kabsat gapu iti “pakabigbiganna.”

Ni Grant ket maysa a walo-ti-tawenna nga agibumbunannag iti Copperbelt Province idiay Zambia. Idi bassit pay, makaestoria babaen kadagiti ladawan iti libro a Ti Katan-okan a Tao a Nagbiag Pay Laeng. Pinaregta ti dadakkelna nga agikabesa kadagiti teksto ti Biblia sakbay a makabasa. Maysa itan a di bautisado nga agibumbunannag. Mangikonkondukta ni Grant iti adu a panagadal iti Biblia, a dadduma kadagitoy ket babaen iti tulong ti publikasion a Ti Librok dagiti Estoria ti Biblia ken ti dadduma ket babaen iti broshur nga Ania ti Kalikaguman ti Dios Kadatayo? Gaput’ kinaregtana, binirngasan ti ub-ubbing iti lugarna iti shimapepo mukalamba a “ti nangato a padi” ti kaipapananna iti lenguahe a Cibemba.

 Maysa a lalaki a taga Senegal a nangrugi a nagadal iti Biblia ti nakabasa iti salaysay iti Setiembre 22, 1999, nga Agriingkayo! maipapan iti agina a Saksi idiay Canada, a nangisubli iti $1,000 a nasarakanda iti segunda mano a bag a ginatangda iti paglakuan ti baratilio. Di nagbayag kalpasan a nabasana ti artikulo, daytoy a lalaki ket nakapidut iti kalsada iti pitaka nga addaan kadagiti kard a pakabigbigan (ID) ken kuarta a $500 (E.U.). Pinampanunotna ti artikulo a nabasana ket di nakaturog iti daydi a rabii.

Kabigatanna, iti alas otso, tineleponuan ti lalaki ti makinkukua iti pitaka ket inyurnosna ti makipagkita a dagus kenkuana tapno isublina ti pitaka ken amin a kuarta a nagyanna. Nagustuan ti makinkukua ti kinamapagpiaran daytoy nga estudiante ti Biblia ket intedna ti kagudua ti kuarta nga adda iti pitaka​—$250! “Gapu iti dayta nga Agriingkayo!,” kinuna ti estudiante ti Biblia, “nakapagtignayak iti wagas a maipagpannakkelko iti intero a panagbiagko!” Nanipud idin, impasneknan ti panagadalna iti Biblia.

Idiay pagilian ti Uganda iti Makindaya nga Africa, agtugaw a siuulimek ken agim-imdeng a naimbag ni Kandole a 12-anyos, bayat a makipagad-adal ni nanangna kadagiti Saksi ni Jehova. Idi agangay, din interesado nga agadal ti nanangna, ngem mailiw ti barito a dumngeg iti Sao ti Dios isu a dinamagna no sadino ti paggigimongan dagiti Saksi. Iti simmaganad a Domingo, nagnagna iti 11 a kilometro a napan idiay Kingdom Hall ket sipud idin, kanayonen a nakigimong. Maysa a payunir a kabsat a lalaki ti nangyadal iti Biblia ken Kandole. Rimmang-ay ket nabautisaran idi agtawen iti 14. Ag-17 itan ti tawenna ket nabiit pay a nagbalin a regular pioneer. Kalatna ti agbalin nga special pioneer. Idi agangay intuloy ni nanangna ti nagadal ket maysa itan a bautisado a kabsat. Din magmagna ni Kandole no mapan makigimong. Addan bisikletana, a paglugananda ken nanangna a mapan idiay Kingdom Hall.

 Dagiti Kontinente Ti America

Naawis ni Márcio nga agserbi iti Bethel idiay Brazil. Naggapu iti napanglaw a paset ti pagilian, ket awan ti Saksi iti pamiliana. Tapno makaurnong iti kuarta a pagpletena iti bus, inlakona dagiti personal a sanikuana, sana innayon iti inted kenkuana dagiti kalugaranna a Saksi tapno makapan idiay Bethel. Kalpasan ti tallo nga aldaw a biahe, dagiti armado a mannanakaw pinasardengda ti bus iti igid ti kalsada. Rinikisa dagiti mannanakaw ti karga ti tunggal tao ket innalada ti amin a kayatda. Idi linukatanda ti bag ni Márcio, nakitada ti Bibliana ket inserradan ti bag nga awan a pulos ti innalada. Mabisinen dagiti pasahero idi simmangpet ti bus iti sumaganad nga ili, ngem kaaduan ti awanan iti kuarta nga igatangda iti taraon. Tangay saan nga innala dagiti mannanakaw ti pitaka ni Márcio, gimmatang ti taraon para iti dadduma a pasahero, ket nakaipaay daytoy iti dakkel a pammaneknek.

Ni Osvaldo, a makipagad-adal kadagiti Saksi ni Jehova idiay Chile, ket napakaammuan a mangrugin nga agtrabaho uray iti Domingo. Imbagana iti superbisorna a Lunes agingga iti Biernes ti kontratana a panagtrabaho. Imbaga pay ni  Osvaldo: “Nabiit pay a nangasawaak, ket masapul nga adda tiempok para iti asawak. Kasta met, inyeskediulko ti Domingo a para iti Dios.” Imbaga ti superbisorna a maikkat ni Osvaldo iti trabahona inton agtapos ti bulan. Kadagiti 3,000 nga empleado, ni laeng Osvaldo ti saan nga agtartrabaho iti Domingo. Ngem intuloyna ti nakigimong, ket nagtalek ken ni Jehova.

Di nagbayag, ti kompania ket binisita ti nangato ti saadna a manedyer a naggapu idiay Francia. Simmardeng iti lamisaan ni Osvaldo tapno padayawanna iti sipapasnek a panagtrabahona. Kinuna ti manedyer: “Sika laeng ti awanan kadagiti ay-ayam iti computer-mo, ket naurnos ti panagtrabahom.” Nagyaman ni Osvaldo kenkuana gapu iti komendasion, sa imbagana a mabiiten a panawanna ti kompania. Inimtuod ti manedyer: “Nakaalaka kadi ti nasaysayaat a trabaho?” Imbaga ni Osvaldo a saan sana inlawlawag ti kasasaad.

Sumagmamano nga aldaw ti napalabas, naawis a makimiting iti superbisor ken iti manedyer. Makapanerbios ti kasasaad. Kinuna ti manedyer: “Osvaldo, saanka nga agtrabaho iti Domingo, ken manmanonto laengen nga agtrabahoka iti Sabado. Manayonan met ti rebbengem iti kompania.” Iti daydi met la a lawas nabautisaran ni Osvaldo. Auxiliary pioneer itan a kadua ti asawana.

Idiay Ecuador maysa nga agtutubo a baro, a nagbautisar iti daytoy laeng a tawen, ti naikkan iti damo a panagpalawagna iti kangrunaan a pasilio ti Kingdom Hall. Imbilangna a dakkel a pribilehio ti agpalawag isu a nagurnong iti kuarta nga igatangna iti baro nga amerikana. Idi nakaurnongen iti $30, naammuanna a maysa a sister iti kongregasion ti awanan iti kuarta nga igatangna iti agas. Intedna amin iti sister ti naurnongna a $30, a kunkunana: “Ay-ayatennak latta ni Jehova, daan man wenno baro ti amerikana nga usarek nga agpalawag!”

 Mangaskasaba iti lansangan ti maysa a sister idiay Guatemala. Nakitana ti maysa a lalaki a nakatugaw iti agdan ti maysa a balay, ngem pinanunotna a dina kasabaan ta ti balay ket adda iti teritoria ti sabali a kongregasion. Linabsanna ngem mariknana a masapul a kasaritana. Isu a nagsubli ket nakisarita kenkuana maipapan iti Pagarian ni Jehova. Sipapasnek nga immimdeng ti lalaki. Kalpasanna, kinunana: “Miss, agyamanak ta kinasaritanak, agsipud ta addaak ditoy tapno patayek ti maysa a lalaki nga umay inton alas 7:45 ti bigat. Isut’ maitanem, ket maibaludak met koma! Ammok a dika immay ditoy a bukodmo; imbaonnaka ti Dios kaniak tapno mabigbigko ti ayatna. Agawidak itan tapno diak maaramid daytoy a krimen. Bendisionannaka koma ti Dios!”

Idi Disiembre 2000 ken Enero 2001, nangorganisar ti sanga nga opisina idiay Colombia iti kampania a mangasaba kadagiti naiputputong a teritoria. Naparegta dagiti Saksi iti dayta a pagilian nga umakar kadagita a teritoria iti maysa wenno dua a lawas, sigun iti kasasaadda, tapno mangasaba ken mangpatanor iti interes.

Gapu ta kayat ti agtutubo a babai a taga Bogotá ti makipaset, napan idiay ili ti Guasca. Naragsakan iti dua a bulan a kaaddana sadiay nga uray la kiniddawna ken Jehova a makasarak koma iti trabaho tapno makapagtalinaed sadiay. Gimmatang kadagiti niog, nagaramid iti bukayo nga inlakona kadagiti lansangan ken tersena. Maysa pay, simrek a labandera ken plantsadora ket nasursurona pay ti manggatas iti baka. Iti kasta, nakabirok iti pagbiagna ket nagtultuloy a nagserbi a regular pioneer idiay Guasca. Mangikonkondukta iti 25 a panagadal iti Biblia.

Maysa a babai idiay Jamaica ti nagkuna iti maysa a sister nga awan ti makakombinsir kenkuana nga agbalin a Saksi. Imbaga ti sister a ti panggepna a simmarungkar ket tapno  mangiranud iti mensahe ti Biblia, agraman ti namnama a biag nga agnanayon. Bayat ti panagsaritada, nadlaw ti sister a dakkel ti panagraem ti babai iti Biblia. Nadlawna met a maparmek ti di panamati ti babai iti dadduma a punto babaen ti panangibasa kadagiti maitutop a teksto iti Biblia. Daytoy ti nanggutugot iti sister a kanayon a mangusar iti Biblia no sumarungkar iti daytoy a tao ken uray idi naipasdeken ti panagadal iti Biblia. Kalpasanna, nangrugin a makigimong ti estudiante iti Biblia ket nagbalin a maysa kadagidiay imbagana idi damo a dina pulos pagbalinan​—maysa a dedikado ken nabautisaran a Saksi ni Jehova.

Ni Carol, a maysa a sister a taga Bolivia, ket nangyadal iti agassawa a makipagnanaed iti ina ti lalaki, a maysa a napasnek a Katoliko a kanayon a makimisa wenno makiprosesion. Adu ti rebulto iti balayda, a tunggal maysa adda sumsumged a kandela iti sanguananna. Maysa nga aldaw bayat ti panagadal ti agassawa, kellaat nga immay iti kuarto ti ina, a nakaiggem iti Biblia dagiti Katoliko. Kinaritna ni Carol: “Sadino ti pakabasaam nga adda annak ni Maria?” Impakita kenkuana ni Carol ti Mateo 12:46-50 ken 13:55. Nalpay a pimmanaw ti ina. Nagsubli kalpasan ti sumagmamano la a minuto, a sitatangsit a nangawit iti sabali a Biblia, dakkel ken nakalupkopan iti balitok ken addaan retrato. Pimmanaw manen idi naipakita kenkuana dayta met la a teksto. Di nagbayag simrek manen nga addaan iti sabali pay a Biblia, ngem kasta met la ti mabasa kadagiti teksto. Di nakatagari.

Kadagiti simmaganad a lawas, ad-adu pay dagiti makasinga. Nagsaludsod ngem in-inuten a namati. Maallukoyen kadagiti sungbat. Idi agangay, nakipagadalen iti Biblia. Ti dati a kinapasnekna iti Katolisismo nagbalinen a kinapasnek iti pudno a panagdayaw. Rinugiannan nga intugot ti gagayyemna idiay Kingdom Hall ket, idi agangay, nabautisaranen.

 Asia Ken Ti Makintengnga A Daya

Ni Gary, nga agnanaed idiay Sri Lanka, ket nangitukon iti broshur a Mabalinmo ti Makigayyem iti Dios! iti lalaki a Katoliko ken iti Budista nga asawana. Impilit ti babai a ti laeng asawana ti interesado a makaammo ti ad-adu pay maipapan iti Biblia. Nupay kasta, iti simmaganad nga isasarungkar ni Gary, imbaga ti babai nga interesado met a makaammo no kasano ti makigayyem iti Dios. Nairugi ti panagadal iti broshur iti simmaganad a lawas, ket nagkiddaw ti agassawa iti Biblia. Kinuna ti babai: “Nalabit kasapulantayo ti Biblia tapno agbalintayo a gayyem ti Dios.”

Idi adalenda ti leksion 3 iti broshur a Makigayyem iti Dios, naginteres unay ti babai iti adalenda. Iti dayta a rabii, adda kaduada a nakipagadal​—ti agtutubo a baro nga agkaskasero iti balayda. Sumagmamano la nga aldaw sakbay ti maikapat a panagadal, nangitugot ni Gary iti Bibliada. Dagus a naikadua dayta kadagiti broshur a naurnos iti lamisaan. Iti rabii ti maikapat a panagadal, siraragsak nga innalada ti Biblia nga addaan kadagiti asul a linas. Kinuna ti lalaki: “Insaganami amin dagiti leksion.” Kinitada ti amin a teksto a nadakamat iti leksion ket minarkaanda iti asul a linas ti panid nga ayan ti kada bersikulo.

 Ni Rowena, a maysa nga agsolsolo nga ina nga agtawen iti nasurok a 20 nga agnanaed iti Pilipinas, ket naginteres iti kinapudno. Nairugi a nayadalan iti Biblia, ket di nagbayag rinugiannan ti nakigimong. Nupay kasta, gapu kadagiti parikut iti pinansial, napilitan a pimmanaw iti ilina tapno agsapul iti trabaho iti adayo a siudad. Nakastrek a katulong iti pamilia a napasnek a Katoliko. Dinamagna ti address ti kaasitgan a Kingdom Hall iti siudad, ngem di kayat ti pamilia a tulongan a mangsapul kadagiti Saksi.

Adu a bulan ti limmabas, ket sipapasnek a nagkararag ni Rowena ken Jehova nga ipalubosna a masarakanna dagiti Saksi tapno maituloyna ti panagadalna iti Biblia. Maysa a bigat, naguni ti telepono, ket sinungbatanna. Kinuna ti immawag: “Hello, daytoy kadi ti Kingdom Hall?”

Dagus a kinuna ni Rowena: “Birbirokek ti Kingdom Hall. Matulongannak kadi a mangbirok iti dayta?” Nayurnos ti panangbirokda iti Kingdom Hall. Intuloy ni Rowena ti panagadalna iti Biblia ket ita nabautisaranen.

Nagsurat ti 12-anyos a babai idiay sanga nga opisina idiay Russia. Kinunana: “Napanglawak nga ubing. Agnanaedak iti Tyumen a rehion ti Siberia. Nabiit pay ti damo a panangawatmi iti magasin a Pagwanawanan iti naiputputong a bassit a bariomi. Nakitak dayta iti libraria ti eskuelaanmi. Inyawidko dayta tapno basaek. Babaen iti daytoy a magasin, adu a baro ken makapainteres a bambanag ti naammuak. Maragsakanak uray no buyaek laeng dagiti ladawan. Kayatko a maammuan ti adu-adu pay nga impormasion. Kayatko nga adalen ti libro nga Apocalipsis ken ti Biblia, ken maammuan ti ad-adu pay maipapan iti organisasionyo.” Nayurnos ti panangtulong kenkuana.

Idi mangaskasabada iti binalaybalay idiay Lebanon, napan ti dua a Saksi iti maysa a balay. Apaman a nakatuktokda, nadlawda ti pakaammo nga agkunkuna a di maawat dagiti Saksi. Maysa a lalaki ti nanglukat iti ruangan. Nakisarita ti sister kenkuana, ket pinastrekna ida. Idi naammuanna a Saksi dagitoy, dinamagna  no nadlawda ti pakaammo iti ruangan. “Wen,” kinunada, “ngem nakatuktokkamin idi nadlawmi.” Kalpasanna imbagana a ti balay ket balay ti dadakkelna, ket karurodda dagiti Saksi ni Jehova. Nupay kasta, kayatna a maammuan ti ad-adu pay ken ad-adda nga interesado gapu iti pakaammo a kadawyan a makita kadagiti ruangan iti dayta a lugar.

Inyurnos dagiti sister a sarungkaranda ti lalaki iti pagtaenganna. Nairugi ti panagadal iti Biblia kenkuana ken iti asawana, ket di nagbayag makigimgimong ken iyap-aplikardan dagiti prinsipio ti Biblia. Kinuna ti lalaki a pulos a dina pay idi naukag ti Biblia, ngem dagiti Saksi ti timmulong kenkuana tapno mabasa ken maawatanna dayta.

Idiay Korea, maysa a sister nga addaan iti beauty shop ti nangi-display iti Biblia agraman ti dadduma a publikasion nga ipabpablaak dagiti Saksi ni Jehova. Masansan met a patokarenna ti audiocassette ti libro a Ti Katan-okan a Tao a Nagbiag Pay Laeng. Idi nangngeg ti maysa a babai ti cassette, nagkiddaw ti maysa a kopia, ket nairugi a mayadalan iti Biblia. Nagdamag met ti asawa ti pastor maipapan iti cassette, a kunkunana a di pay nakangngeg a pulos kadagita a mamagpanunot a bambanag iti simbaanna. Nagkiddaw met kadagiti cassette ken nakipagadalen kadagiti Saksi. Gapu kadagiti naiparang a literatura, naginteres met ti maysa a Budista ket ita, makipagad-adalen iti Biblia. Tapno maipaayna ti naespirituan a kasapulan dagidiay nakasaritana babaen iti di pormal a panangasaba, nag-regular pioneer ti sister.

Maysa nga agassawa nga special pioneer idiay Malaysia ti nangasaba iti lalaki a magmagna iti lansangan. Adu ti saludsod ti lalaki, isu nga inawisna ti agassawa iti pagtaenganna. Simmurotda kenkuana ket nagsayaat ti panagsasaritada. Idi pumanawdan a tumabuno iti Panagadal ti Libro iti Kongregasion, inawisda a kumuyog, ket kimmuyog. Nagustuanna ti gimong. Idi nalpas ti gimong, inikkanda iti broshur a Kalikaguman ken inyurnosda ti sumarungkar kenkuana iti sumaganad nga aldaw. Idi  simmangpetda, imbagana kadakuada a kalpasan ti gimong idi napalabas a rabii, idi nakasangpeten, nagbasa ken nagkarkararag agingga iti alas 4:00 ti parbangon.

Daytoy a lalaki ket ministro ti maysa a relihion iti Kakristianuan. Nupay adu a tawen a nagadal kadagiti eskuelaan ti teolohia, pulos a dina maawatan ti Trinidad. Ti broshur a Kalikaguman ti nangtignay kenkuana a mangbasa kadagiti teksto ti Biblia a nangipalgak iti kinapudno maipapan iti daytoy a di nainkasuratan a doktrina. Gapu ta maragsakan a nakaammo no asino a talaga ti Dios, imbagana iti agassawa: “Diakon patien ti Trinidad.” Sipud idin, madin a mangasaba iti simbaanna. Imbes ketdi, nakigimongen kadagiti Saksi ni Jehova.

Inadal ti lalaki ti literatura ti Biblia a nagun-odanna kadagiti Saksi ket indiligna ti naammuanna kadagiti naadalna iti teolohia. Idi naturpos ti dua a lawas, inkeddengnan a balbaliwan ti intero a panagbiagna. Manipud India, intuloyna ti nagadal iti teolohia iti Trin​ity Col​lege idiay Singapore. Ngem kinuna: “Kasano nga agadalak iti dayta a kolehio? Uray ti naganna laengen ket Trinity!” Nagawid iti pagilianna, a sigagagar a nangbirok kadagiti Saksi sadiay. Buyogen ti naimpusuan a panagyaman, kinunana: “Nasarakakon ti kinapudno!”

Maysa a sister a taga Kazakhstan ti mabuteng unay a mangasaba kadagiti kailianna. Idi nangrugi a nagpayunir, nangasaba iti teritoria a pagnanaedan ti dadduma nga etniko a grupo. Nupay kasta, iti maysa nga aldaw nga adda iti teritoriana, nakasabet iti babai a Kazakh. Inawat ti babai ti intukonna a kopia ti Agriingkayo! Dua a lawas ti napalabas sakbay a naituredna ti simmarungkar. Nasdaaw ta makarurod ti babai gapu iti dina panagsarungkar a nasapsapa. Talaga nga ingguyod ti babai iti apartment-na, ket impakitana kenkuana ti libro a Pannakaammo, ket kinunana: “Adalenta ti Biblia!” Kalpasan ti sumagmamano a tiempo, nabautisaran ti babai ken ti inauna a barona iti nabiit pay nga asamblea sirkito. Ita, ti inaudi a barona ket maysa a di bautisado nga agibumbunannag, ket  makipagad-adal iti Biblia ti balasangna, kasinsinna, ken kaanakanna.

Iti maysa a pagilian idiay Makintengnga a Daya, sinarungkaran ti maysa nga special pioneer ti lalaki nga agnagan iti Mr. John nga agtarigagay a mangpabaro ti suskripsionna iti Pagwanawanan ken Agriingkayo! Imbaga ni Mr. John a nabayagen a Saksi ti lolona nga agnanaed idiay India. Nakigimong idin ni Mr. John idiay India, ngem saanen a nagnaed sadiay iti 19 a tawen. Dina ammo no kasano a masarakan dagiti Saksi iti lugarna.

Idi pinaregta ti payunir a makigimong, kinuna ni Mr. John nga adda maang-angay a gimong iti balayna a maigiddato iti dayta, sana innayon a ti gimong ket “panagadal iti Biblia ken panagkararag.” Babaen ti panangusarda iti Ti Pagwanawanan ken ti libro a Pannakaammo, ad-adalen ni Mr. John ti Biblia a kadua dagiti 25 a padana nga Indian. Adu a tawenen a linawas nga aggigimongda. Kabayatanna, ti grupo nga Ingles sadiay ket buklen laeng ti 12 nga agibumbunannag. Nasarungkaran ti grupo nga Indian, ket maar-aramiden dagiti addang tapno maaywanan ti naespirituan a kasapulan dagitoy nga interesado.

Idiay Nepal, agnanaed ti maysa a balasitang iti pagaywanan kadagiti ulila nga imatmatonan dagiti boluntario a taga Korea. Isut’ agad-adal iti eskuelaan dagiti ulila, ket imbaga ti maysa kadagiti maestrana a nasarakannan dagiti “pudno a Kristiano.” Kanayon idi a pinati daytoy ulila a balasitang nga isut’ maysa a pudno a Kristiano. Tangay dagiti tattao a mangimatmaton iti pagaywanan ti ulila kunaenda met a Kristianoda, pinampanunotna ti komento. Tapno mapnek ti interesna kayatna a maam-ammo dagitoy “pudno a Kristiano.” Naiparna a ti maestrana ket makipagad-adal kadagiti Saksi ni Jehova ken kanayonen a makigimgimong. Nakiuman ti balasitang iti maestrana ket kimmuyog kenkuana a nakigimong. Nagustuan unay ti balasitang ti nakitana ket dagus nga inawatna ti panagadal iti Biblia. Rimmang-ay a dagus ket nabautisaran iti las-ud ti uppat a bulan. Kalpasan ti panagbautisarna, nangrugi a nag-auxiliary pioneer.

 Europa

Tinawen nga adda maorganisar nga eksibision idiay London, England, tapno maimpormaran dagiti tuleng. Iti puesto dagiti Saksi ni Jehova, adda dagiti Biblia ken literatura, ken maipabpabuya ti video nga Ania ti Kalikaguman ti Dios Kadatayo? iti British Sign Language wenno senias. Gapu ta maragsakan a makakita iti dayta a puesto, immasideg ti tuleng a babai a nangibaga nga isut’ nagbirbiroken iti sadinoman a lugar kadagiti tuleng a Saksi. Imbagana a maysa a tuleng a Saksi ti kanayon a makisarita kenkuana idi nagnaed idiay Mongolia. Nupay kasta, naapresiarna laeng ti namnama a panagungar idi natay ni tatangna ket nangrugi a nagadal iti Biblia. Kalpasan ti innem a bulan immakar idiay England, ket nupay nakasarak iti Kingdom Hall, dina maawatan ti gimong ket dina imbaga nga isut’ tuleng. Nagkararag ken Jehova a makasarak koma kadagiti tuleng a Saksi ni Jehova, ket nakasarak. Ita, isu ken ti balasangna ket makipagad-adalen iti Biblia ken tumabtabunodan kadagiti gimong a sign-language.

Ni Andreia, a maysa a walo ti tawenna a Saksi idiay Portugal, nadlawna ti maysa a malidliday unay a kaeskuelaanna agsipud ta nagsina dagiti dadakkelna. Sumagmamano  nga aldaw kalpasanna, naawat ni Andreia ti Agriingkayo! nga Enero 8, 2001, a naitampok iti akkubna iti serye a “Mabalinmi Kadi a Salbaren ti Panagasawami?” Maragsakan a nangibaga ken nanangna a makatulong dagiti artikulo para iti nagannak ti kaeskuelaanna. Inyurnos ngarud ni Andreia a maitulod ti maysa a kopia iti tatang ti kaeskuelaanna ken sabali a kopia ti maitulod iti nanangna.

Di nagbayag kalpasan dayta, imbaga ti kaeskuelaanna kenkuana: “Nagsinnubliananen ti dadakkelko, ket imbaga ni tatangko nga ibagak kenka a nagkaykaysan ti pamiliami, gapu iti magasin nga intedmo kadakami!” Ti simmaganad nga inted ni Andreia ket ti libro a Ti Sekreto ti Kinaragsak ti Pamilia. Ni nanang ni Andreia iyad-adalannan iti Biblia ti nanang ti kaeskuelaanna.

Bayat ti panangasabada idiay Italia, dua a Saksi ti nangipaima iti magasin a Pagwanawanan ken Agriingkayo! iti maysa a lakay. Imbaga ti lakay a di makabasa. Inlawlawagna nga agpaspastoren idi pito pay laeng ti tawenna. Kalpasanna, nagnaed iti kabambantayan iti 15 a tawen, a ti laeng kaduana ket dagiti karnerona. Di pulos nageskuela. No agpaspastor, agkarkararag a sipapasnek a maam-ammona koma a naimbag ti Dios. Imbagana kadagiti kakabsat a simmarungkar: “No mabasak la koma dagiti magasinyo, mabalin a matungpal dayta nga arapaap.”

Kinuna ti maysa a kabsat: “Di pay naladaw a makasursuroka nga agbasa.” Iti simmaganad nga aldaw, napan iti King​dom Hall ti agpaspastor. Babaen iti tulong dagiti Saksi, nakasursuro  nga agbasa ken agsurat. Ita, daytoy a lakay kanayonen nga agbasa iti Biblia ken di mabambannog a mangiwarwaragawag iti naimbag a damag.

Ti Greenland, a naikadua iti Europa iti daytoy a report, ti kadakkelan nga isla iti lubong, nupay agarup 56,000 laeng ti intero a populasionna. Adda pito a kongregasion iti pagilian, ket nagbassit ti dadduma kadagitoy.

Ni Harald ket 15-anyos a di bautisado nga agibumbunannag a kameng ti maysa kadagita a kongregasion. Idi nagekskursion ti klasena, di kimmuyog ni Harald. Timmabuno ketdi iti sabali a klase, a sadiay natudingan dagiti estudiante nga agsao maipapan iti relihionda. Nupay dua a bulan ti panagsaganada, awan ti maibaga ti sumagmamano nga estudiante, ket dagidiay adda naibagada nagsaoda laeng iti sumagmamano a minuto. Tangay adda pay kaguduat’ oras sakbay a malpas ti klase, nagsaludsod ti mannursuro: “Ania ti aramidentayo iti natda nga oras?” Ni Harald​—a bisita​—intayagna ti imana ket imbagana a maragsakan a mangibaga kadakuada ti maipapan iti relihionna.

Kinuna ti mannursuro: “Siguradoka? Awan tiempom a nagsagana.” Imbaga ni Harald a nakasagana, ket nakaited iti nagsayaat a pammaneknek iti klase. Idi naammuan ti maestro iti klasena ti inaramid ni Harald, kiniddawna ken Harald nga aramidenna met dayta iti klasena. Iti daytoy a gundaway, naikkan iti makalawas a panagsagana. Nangitugot iti sumagmamano a publikasion iti Biblia nga ipakitana kadagiti kaklasena ken iti maestrona.

Kayat ni Pia, nga agnanaed idiay Denmark, a mabuniagan iti simbaan ti kappasngay a maladagana. Ti asawana ket di mamati iti buniag ti maladaga, isu a nagdebateda maipapan iti dayta. Kamaudiananna, inkeddengda a pagsaritaan dayta a kadua ti ministroda. Imbaga ti ministro kadakuada a di Nainkasuratan ti buniag ti maladaga. Nakaunget ni Pia iti simbaan ken kadagiti ministrona agsipud ta iti 32 a tawen, naisuro a patienna  ti maysa a palso. Dinan pinampanunot a pabuniagan ti maladagana ket inkeddengnan a basaen ti Biblia a mismo tapno maammuanna ti naimbag ken dakes.

Idi Mayo 2000, maysa a Saksi ti simmarungkar ken Pia, ket inawatna ti panagadal iti Biblia. Idi timmabuno iti kombension distrito, kinunana: “Diak pay maawatan ti amin, ngem ammok itan a saan a pudno ti National Church.” Ni Pia ket maysa itan a di bautisado nga agibumbunannag ket napartak ti irarang-ayna nga agturong iti panagpabautisar.

Maysa a kabsat a lalaki idiay Slovenia ti agin-inana iti parke a kadua ti barona idi nadlawna ti maysa a babai nga estudiante a nakisina iti maysa a grupo dagiti estudiante. Kinasaritana daytoy maipapan kadagiti naespirituan a banag. Kalpasanna, rinugianda ken ni baketna nga inyadalan iti Biblia daytoy nga estudiante nga agnagan Silvia. Intugot ti estudiante ti nobiona iti panagadal ti Biblia, ket makipagad-adal metten iti Biblia ti lalaki. Inranud ni Silvia ti kinapudno ken ni nanangna, a nangrugi met a nagadal. Ita, ti tallo ket regularen a makigimgimong idiay Kingdom Hall, ket maysan ni Silvia a di bautisado nga agibumbunannag. Makapainteres ta malagip ni Silvia nga iti daydi aldaw a naam-ammona ti kabsat a lalaki iti parke, nagkararag iti Dios nga agkidkiddaw iti tulong tapno matarusanna no apay a napalalo ti kinagulo ti lubong.

Kadagiti nabiit pay a tawen, nakaad-adu ti umakar idiay España nga aggapu iti Abagatan ken Sentral nga America. Maysa a payunir a sister a mangaskasaba iti binalaybalay, nakasaritana ti maysa a babai a taga Colombia. Dimngeg a naimbag ti babai ken inawatna ti naitukon a panagadal iti Biblia. Iti simmaganad nga isasarungkar, intukon ti payunir ti panagadal ti Biblia iti dadduma nga agnanaed iti apartment. Sumagmamano kadakuada ti immawat. Tangay kanayon nga umakar dagiti agnanaed iti apartment, kasabaan ti sister ti asinoman a madanonna sadiay. Nakairugin sadiay iti 20 a panagadal iti Biblia. Immakaren ti dadduma, ket di pay ammo no intultuloyda ti nakipagadal.  Nupay kasta, sangapulo a panagadal ti regular a maitultuloy ket makigimgimongen ti dadduma kadagiti mayad-adalan.

Nupay 40 a tawenen a mangmangngegna ti mensahe, nabiit pay a nagbalin a di bautisado nga agibumbunannag ti 82-anyos a baket idiay Creta. Ti personal nga interes nga impakita ti maysa nga special pioneer a babai ti nangtignay kenkuana a rumang-ay, ket nabautisaranen.

Dadduma iti pamiliana tinuladda ti ulidan daytoy a baket. Ti 86-anyos a lakayna, nga agsigsigarilio idi iti 60 a tawen, ket nangrugin a makipagadal iti Biblia, insardengnan ti agsigarilio, ket nagbalinen a di bautisado nga agibumbunannag. Ti 55-anyos nga anak ti agassawa ket rumangrang-ay met iti panagadalna. Makigimgimongen, ket insardengnan ti agsigarilio. Kamaudiananna, maysa kadagiti appoko ti tumeng dagiti agassawa ti nangrugi a nagadal iti Biblia ket inyebkasnan ti tarigagayna nga agpasalista iti Teokratiko nga Eskuelaan ti Panagministro.

Bayat a mangaskasaba iti maysa nga apartment a dumna iti pagnanaedanna, naam-ammo ti maysa a misionera idiay Estonia ti maysa a babai a nangdamag no isut’ addaan iti nadungngo nga asawa. Wen ti sungbat ti sister. Dinamag ti babai no sadino ti pagnanaedanna. Imbaga ti sister nga agnanaed iti dumna a patakder. Iti kasta, naragsakan ti babai ket kinunana: “O sika ngarud daydiay​—sika gayam. Kanayon a mangankayo iti balkon, di ngamin?”

“Wen, kaduak ni lakayko,” kinuna ti sister.

Kinuna ti babai: “Bueno, buybuyaenkayo. Adda apron ni lakaymo, ket kanayon nga isu ti agidasar iti taraon. O makitak a naragsak ken naballigi ti panagasawayo! Dikay makita manipud iti apartmentko, ngem kanayon a mapanak iti balkon ti gayyemko tapno buyaenkayo. Nadlawmi a kanayon nga agkararagkayo sakbay a mangankayo. Nakapimpintas a buyaen. Pangngaasim, mabalin kadi a sumrekka?” Sipud idin, sarsarungkarannan ti babai.

 Oceania

Saklawen daytoy a rehion ti daga dagiti isla iti abagatan, laud, ken sentral a Taaw Pasipiko, agraman ti Melanesia, Micronesia, ken Polynesia. Mairaman met ti Australia, New Zealand, ti Malay Archipelago, ken dagiti isla ti Hawaii.

Maysa nga aldaw, nakita ti dua a sister idiay New Zealand ti maysa nga agharhardin a babai ket simmardengda a tumulong kenkuana a mangbag-ut iti sumagmamano a kawayan iti hardinna. Gapu ta nasdaaw iti kinamanangngaasida, pinagkapena ida, ket kinasabaanda met. Insuratna iti agipabpablaak iti periodiko iti lugarda ti napasamak. Binirok ti agipabpablaak iti periodiko ti kongregasion tapno ipakaammona nga adda premioda a nagpintas a bugkong ti sabsabong gapu iti kinamanangngaasida.

Kinuna ti artikulo: “Idi binag-ut dagiti Saksi ni Jehova ti makapasikor a kawayan ti maysa a balo, inaramidda laeng ti kadawyanen nga ar-aramidenda​—tinulonganda ti agkasapulan. Ti kinamanangngaasida pinaragsakna la unay ti balo iti dayta nga aldaw. Kasta unay ti panagyaman ti babai isu nga imbagana dayta kadakami. Napili daytoy nga estoria kas nangabak iti bugkong ti sabsabong para iti Agosto. Namnamaenmi a ti bugkong  ti sabsabong ti mangparagsak kadakuada a kas met iti panangparagsak ti kinamanangngaasida.”

Iti maysa kadagiti isla ti Vanuatu, kinasabaan ti dua a payunir ti maysa a balasang nga agtartrabaho iti tersena. Inawatna ti broshur a Kalikaguman ken nakipagadal iti Biblia. Nakaro ti panangbusor ti amana ket dina kayat a makipagadal ti balasangna kadagiti Saksi. Dinadaelna ti literaturana iti Biblia, nakaro ti panangkabilna, ket kamaudiananna imbagana a pumanaw iti pagtaenganna. Kabayatanna, rimmang-ay ti pannakaammo ti balasang, nakigimong, ken pinatanorna dagiti bunga ti espiritu. (Gal. 5:22, 23) Idi agangay, gapu ta managraem, naallukoy ti amana, ket pinagawidna ti balasang iti balayda. Nagpasalista iti Teokratiko nga Eskuelaan ti Panagministro ken damona ti timmabuno iti asamblea sirkito iti asideg nga isla ti Santo. Idi dinamagda no kasano a nabaelanna ti timmabuno, immisem sa simmungbat: “Inggatangannak ni tatangko iti tiket.”

Mannakigayyem ni Clarence, a kanayon a mangala kadagiti magasin no sumarungkar dagiti agibumbunannag iti balayna idiay Hawaii. Maysa a payunir a nakasabet kenkuana iti maysa nga aldaw ti nakadlaw nga adda librona a Mabalinyo ti Agbiag nga Agnanayon iti Paraiso a Daga ket intukon daytoy kenkuana ti panagadal ti Biblia. Dagus nga inawat ni Clarence, a kinunana a kanayon a kayatna a maammuan ti maipapan iti Biblia. Nagsagana a naimbag ni Clarence iti panagadalna iti Biblia ket di nagbayag, makigimgimongen.

Ngem masapul nga agbalbaliw ni Clarence. Kas beterano idi Gubat Sangalubongan II, pagpannakkelna ti makiparada kadagiti selebrasion a kadua ti dadduma a beterano. Ket no panawen ti Krismas, agboluntario nga agpauni iti kampana ti Salvation Army tapno agkiddaw iti donasion. Napalabas ti sumagmamano pay a tiempo sana nabigbig a dayta ket pannakipaset iti lubong ni Satanas. Ngem idi agangay, kualipikadon a makiraman iti ministerio.

Ag-85 anyos ni Clarence idi nabautisaran ket agtultuloy nga  aktibo iti ministerio. Agpaspaseten iti Teokratiko nga Eskuelaan ti Panagministro. Nabiit pay a nasursurona ti agusar iti computer isu a makapagsukimaten babaen ti panangusarna iti Watchtower Library iti CD-ROM. Sititibker a kinuna ni Clarence: “Awanen ti makapagbaw-ing kaniak nga agserbi ken Jehova itan ta nasarakak ti kinapudno.”

Bayat ti panangasabana babaen iti telepono, kiniddaw ti maysa a sister idiay Australia, no maiwayaan ti maysa a lalaki ti 15 a minuto iti kada lawas tapno pagsaritaanda ti Biblia. Imbaga ti lalaki a dina maaramid dayta. Insingasing ti sister: “No ngay lima a minuto?” Medio agkedked ngem immanamong. Iti simmaganad a lawas, rinugianda ti lima a minuto a panagadal. Idi agangay, nagsaludsoden kadagiti mamagpanunot a salsaludsod. Tangay tungtungpalen ti sister ti lima a minuto a panagadal, kunaenna: “Bueno, nagsayaat a saludsod dayta, ngem naibusen ti tiempota, isu a daytanto ti tema a pagsaritaanta iti sumaganad a leksion. Sige, agpakadaakon.”

Idi inimtuod ti lalaki no kasano a maammuanna no ania ti pudno a relihion, pinagsaritaanda dayta a tema iti sumaganad a leksion. Kalpasan dayta a leksion, kinunana: “Mabalin a dagiti Saksi ni Jehova ti pudno a relihion, ngem diak basta mamati ken makomberte. Mabalin a kasapulak ti ad-adu pay a pannakaammo.” Bayat a rumayrayray ti interesna, in-inut nga immatiddog ti panagadalda manipud 5 a minuto agingga iti 30 a minuto.

Idi naturposda ti broshur a Kalikaguman, dinamag ti sister iti lalaki no mabalinda ken ni lakayna a sarungkaran iti pagtaenganna tapno mapagsaritaanda pay dagiti naammuanna. Immanamong. Sinarungkaranda, ket impakaammoda a maragsakanda iti pribilehio a timmulong kenkuana iti napalabas nga innem a bulan ket pinaregtada nga agtultuloy. Ita, linawasen nga iyad-adalan ti asawa ti sister ti estudiante iti pagtaenganna.

Saan pay a naikasaba ti naimbag a damag iti adu a paset ti Papua New Guinea agsipud ta narigat a madanon dagiti bario. Kaaduanna, ti kakaisuna a pamay-an tapno makasao dagiti  tattao kadagitoy a bario ket am-ammuen ida no agudongda. Iti kastoy a pamay-an nakagun-od iti maysa a kopia ti Pagwanawanan ti maysa a lalaki manipud iti nasulinek a bario. Kalpasan a binasana dayta, nagsurat iti sanga nga opisina maipaay iti ad-adu pay nga impormasion. Nakiddaw iti maysa a misionero a sumarungkar kenkuana. Ti kakaisuna a pamay-an ket babaen ti surat. Nagbanaganna, adu nga interesado ti nayadalan babaen ti surat.

Gapu ta determinado ti dadduma a misionero a bumisita iti lugar, nagluganda iti de dual a lugan. Innem nga oras a biahe dayta, a kaaduanna ket babaen iti napeggad ken manglikaw iti bantay nga akikid a kalsada ken bumallasiw kadagiti karayan. Iti maysa a lugar, ti karayan ti nagserbi a “kalsada.” Idi nakadanondan iti destinasionda, natakuatanda ti napintas a kapatagan a 10 agingga iti 12 a kuadrado kilometro a nalikmut iti nalasbang a bakir iti kabambantayan a nakataytayag ti tuktokda. Kasla addaka iti sabali a panawen. Naaramid iti kawayan dagiti balay, a kas idi sinigsiglon ti napalabas. Idi nangngeg dagiti tattao a simmangpeten dagiti misionero, siraragsak a nagtataripnongda. Nupay idi pay laeng a naam-ammoda dagiti Saksi ni Jehova, mamindua iti makalawas nga ad-adalendan Ti Pagwanawanan, ket dandani immikkatda aminen iti Lutheran Church.

Indemostra dagiti misionero no kasano nga ikondukta dagiti gimong ken inyanunsioda met nga addanto palawag publiko iti sumaganad nga aldaw iti alas 8:00 ti bigat. Kabigatanna, dadduma a lallaki ti nariing iti alas 4:30 ti agsapa ket napanda iti asideg a bario tapno imbitaran dagiti tattao iti palawag. Dagiti nabati a taga bario nangibangonda iti sapaw a paggigimongan. Nagserbi a bangko dagiti dadakkel a sanga, ket dagiti aduan bulong a sanga ti nangipaay iti linong. Naaramid iti kawayan ti podium. Magagaran ti amin. Adda 44 a nakigimong, ket 11 a kabarbaro ti nangted iti naganda nga agadal babaen iti surat. Nabannog dagiti misionero idi nagawidda ngem napnekda unay iti nagapuananda.

[Ladawan iti panid 45]

Ti walo ti tawenna a ni Grant a taga Zambia ket mangikonkondukta iti adu a panagadal ti Biblia

[Ladawan iti panid 57]

Ti puesto idiay England a nausar kadagiti eksibision para kadagiti tuleng