Dagiti Tampok iti Napalabas a Tawen

“UMAYKAYO kaniak, . . . ket pagin-awaenkayto.” Dagita a sasao ni Jesu-Kristo, a masarakan iti Mateo 11:28, ti teksto ti tawen idi 2002. Iti napalabas a tawen serbisio, pudno nga adu ti immay ket​—265,469 ti nangipangag iti awis ti Dios babaen ken ni Jesus ket nabautisaran, ken nagin-awaanda a kadua ti nasurok nga innem a milion a sabsabali nga agserserbi iti sidong ti nalanay a sangol ti panagbalin nga adalan ni Kristo.

Kadagiti sumaruno a panid, mabasayo no kasano nga agtultuloy a siwawadwad a bembendisionan ni Jehova ti ilina iti intero a lubong. Amirisentayo ti sumagmamano a napapateg a teokratiko a nagapuanan iti 2002 a tawen serbisio.

 Makaparegta Dagiti Kombension Distrito

Kas nakairuamandan, nagtitipon dagiti Saksi ni Jehova kadagiti ginasut a lugar iti intero a lubong tapno tumabuno kadagiti tinawen a kombension distrito. Ti tema ti kombension iti 2002/03 ket “Dagiti Naregta a Manangiwaragawag iti Pagarian.” Impatuldo ti pannakatema a palawag a tultuladen ti ili ti Dios ita ti kinaregta ken kinatured ni Jesu-Kristo a mangitungpal iti ministerioda. Inlawlawag ti dadduma a palawag a mapatanor ti kinaregta babaen ti panagadal iti Sao ti Dios ken maiparangarang dayta babaen ti panagaramid iti naimbag ken nangnangruna babaen ti sigagagar a panangiwaragawag iti Pagarian ti Dios.

Adda drama a nausar dagiti kawes idi unana a napauluan “Agtakder a Sititibker Bayat Dagiti Nariribuk a Panawen” a naisentro ken mammadto a Jeremias. Kas ken Jesus, imparangarangna ti naisangsangayan a kinaregta ken panagibtur nupay adu ti pakarigatan. Nagtalek ni Jeremias ken Jehova ket situtured nga inwaragawagna ti mensahe ti Dios. Anian a nagsayaat a pagwadan dagiti Kristiano itatta!

Dua a libro ti nairuar iti daytoy a kombension. Idi Biernes, inawat dagiti delegado ti Agdayawkayo iti Maymaysa a Pudno a Dios. Daytoy a 192-panid a libro ket mausarto a kas maikadua a katulongan iti panagadal iti Biblia tapno maipasagepsep iti puso dagiti mayad-adalan iti Biblia ti kinapudno ti Sao ti Dios. Agtalekkami a makatulongto daytoy a publikasion kadagiti kabbaro tapno rumang-ayda iti naespirituan ken magnada iti nailet a dalan nga agturong iti biag iti nalinteg a baro a lubong ti Dios.

Nairuar ti libro nga Umadanika ken Jehova iti Sabado. Nabingaybingay daytoy kadagiti benneg a mangisalaysay kadagiti uppat a kangrunaan a galad ni Jehova: pannakabalin, kinahustisia, sirib, ken ayat. Naipakpakauna ti panggep daytoy iti introduksionna: “Sapay koma ta tulongannaka daytoy a libro nga ad-adda a suminged ken Jehova a Dios, a maaddaan iti  relasion kenkuana a dinto aggibus uray kaanoman tapno maidaydayawmo iti agnanayon.” Ti programa ti kombension, agraman dagitoy baro a publikasion, matulonganda dagiti nasingpet panagpuspusoda iti sadinoman a mangparayray iti ayatda iti Namarsua kadatayo.

Panangsaranget Kadagiti “Napeggad a Tiempo”

Insurat ni apostol Pablo ken Timoteo a “kadagiti maudi nga aldaw” ket “napeggad a tiempo a narigat a pakilangenan.” (2 Tim. 3:1) Mangyeg kadagiti pakasuotan ken pakarigatan dagiti natural ken dadduma pay a didigra. Ngem, mangipaayda met iti gundaway kadagiti Kristiano a mangipakita iti panagiinnayatda. Adu ti didigra iti napalabas a tawen serbisio. Isalaysaymi ti dua kadagitoy.

Ti Didigra iti World Trade Center: Naaramid ti panagturpos ti maika-111 a klase ti Watchtower Bible School of Gilead idi Sabado, Setiembre 8, 2001. Tallo nga aldaw kalpasanna, idi Setiembre 11, agpaspasiar dagiti naggraduar ken dagiti pamiliada iti New York City, iti Estados Unidos. Nabara ken napintas dayta nga aldaw ken nalawag ti asul a langit. Ngem iti 8:46 t.b., dinungpar ti pangpasahero nga eroplano ti makin-amianan a pasdek ti World Trade Center iti makimbaba a Manhattan. Sumagmamano a minuto kalpasanna, dinungpar ti sabali pay a pangpasahero nga eroplano ti makin-abagatan a pasdek.

Iti 9:59 t.b., narbek ti makin-abagatan a pasdek, a nangisaknap iti napuskol a tapok ken rebbek iti intero a makimbaba a Manhattan. Kalpasanna, narbek ti makin-amianan a pasdek. Dandani 3,000 a tattao ti natay. Nakompleto ti tunggal pasdek a 110 a kadsaaran idi 1973. Naitayab ti napuskol a tapok ket nakagteng iti Bethel idiay Brooklyn, a kurang a tallo a kilometro ti kaadayona.

Dagus a sinapul dagiti kakabsat iti sanga nga opisina ti Estados Unidos dagiti Saksi a naapektaran daytoy nakaro a didigra ken tapno maammuan no ania a tulong ti kasapulanda. Idi rabii  ti Martes, Setiembre 11, naammuan a natalged dagiti kameng ti pamilia ti Bethel iti amin a tallo a grupo dagiti pasdek ti Bethel idiay Brooklyn, Patterson, ken Wallkill. Idi malem ti Huebes, amin a nagturpos iti Gilead impakaammoda iti Gilead Office a natalgedda agraman dagiti pamiliada. Kabayatanna, naawagan iti telepono dagiti 37 a manangaywan iti sirkito iti New York. Inawaganda met dagiti panglakayen iti kongregasion, ket inammo dagiti panglakayen ti kasasaad ti tunggal agibumbunannag. Iti agsapa ti Biernes, Setiembre 14, naammuan ti sanga nga opisina a 14 kadagiti kakabsattayo ti mabalin a natay wenno mapukpukaw. Saan a nabaliwan dayta a bilang agingga ita.

Dagiti nakalasat insalaysayda dagiti kapadasanda. Agtartrabaho ni Cynthia Tucker, a maysa a regular pioneer, iti World Financial Center iti ballasiw laeng ti kalsada nga ayan ti World Trade Center. Adda idi iti maika-37 a kadsaaran idi nakitana ti umuna nga eroplano a nangdungpar iti pasdek. Impagarupna a maysa a nakaro nga aksidente daytoy isu a rimmuar ket tinangadna ti pasdek a dinungpar ti eroplano. Adda rebbek iti isuamin a lugar. Kalpasanna adda sabali pay nga eroplano a nakababbaba ti panagtayabna. Kinuna ni Sister Tucker: “Nagdakkel ti eroplano. Makitak a dungparenna ti pasdek. Kayatko ti agtaray, ngem naikulengak​—diak ammo ti aramidek. Kasla sumalpot ti eroplano iti pasdek. Nakapigpigsa ti ungor ta kasla addaak iti uneg ti danum; nariknak ti ungor. Makapatunglab ti angin a kasla nalaokan iti darat. Maangsanka. Agtataray dagiti tattao iti amin a direksion. Simrekak iti maysa a pasdek ket binuyak ti pannakarbek ti umuna a pasdek. Inuksob ti tattao dagiti kamisadentroda tapno iyabbungotda kadagiti rupada ta nakataptapok. Rimmuar kadagiti pasdek dagiti tattao a kaduada dagiti ubbing ken tarakenda. Mabutbuteng ti amin. Uray dagiti animal saan a normal ti panagtignayda. Diak mailadawan ti butengda.” Agyaman unay ni Sister Tucker kadagiti panglakayen nga immay nangiranud kenkuana kadagiti makaliwliwa a sasao iti Biblia.

 Kadagiti simmaruno a bulan, indanon dagiti kakabsat iti New York dagiti makaliwliwa ken makaipaay iti namnama a mensahe ti Biblia kadagiti tattao iti komunidad. Sumagmamano a kakabsat a lallaki ti napalubosan a mangiranud kadagiti Nainkasuratan a mensahe iti lugar a nakarbekan ti Twin Towers. Maysa kadagitoy ti regular pioneer a ni Roy Klingsporn. Kinunana: “Buyogen ti panangapresiar, kinuna ti maysa a sarhento ti air force a nakiraman a timmulong: ‘Nangyeg ti amin iti taraon, napudot a kape, ken namaga a kawes, ngem sika ti damo a nangibasa iti kasuratan. Kasapulantayo ti Dios iti kastoy a tiempo.’”

Panagbettak ti Bulkan iti Makindaya nga Africa: Napasaran ti adu a kakabsat iti makindaya a Congo (Kinshasa) ti gerra sibil, sakit, kinapanglaw, ken kinaawan ti panggedan. Nagkamang iti sabali a lugar ti dadduma sada nagsubli ken adda dagidiay saan pay laeng a nagsubli. Nainayon kadagitoy a parikut ti kellaat a panagbettak ti Mount Nyiragongo, maysa a bulkan nga adda iti asideg ti ili ti Goma. Idi agsapa ti Enero 17, 2002, nangrugi a mangipugso ti bulkan iti asuk ken apuy. Iti rabii, nagayus iti Goma ti lava a naggapu iti bulkan. Rinibu a napabutngan a tattao ti nagkamang iti asideg nga ili ti Gisenyi, iti Rwanda. Napusek dagiti kalsada kadagiti tattao a nagawit iti sumagmamano a sanikua a mabitbitda. Agpegpeggad met ti Gisenyi, ngem inyurnos dagiti kakabsat sadiay a ti Kingdom Hall ti pagkamangan dagiti kakabsat nga aggapu iti Congo. Dadduma a kakabsat iti Gisenyi ti dagus a nangitukon kadagiti balayda a pagkamangan dagidiay tumaltalaw gapu iti bulkan.

Kinuna ti maysa a panglakayen: “Idi makitami ti mapaspasamak, kaduak ti dadduma a kakabsat a napan iti kangrunaan a kalsada a mamagkamang iti Goma ken Gisenyi. Adda magasin a Pagwanawanan ken Agriingkayo! nga iggemmi ket intag-aymi dagitoy. Nasipnget, ngem napankami iti lugar a nalaka a makita. Idi nakita ti kakabsat dagiti magasin, nabigbigda a Saksikami, ket inturongmi ida iti Kingdom Hall-mi, a nagserbi a pagkamangan. Nagtakderkami iti igid ti kalsada agingga iti agsapa.  Iti kasta, tinuladmi ti inaramid idi dagiti kakabsat idiay Goma kadakami sumagmamano a tawen ti napalabasen. Kalpasan ti gubat idiay Rwanda, ginasut a ribu ti nagkamang idiay Goma. Iti daydi a tiempo, dagiti kakabsat idiay Goma nagtakderda a nagmalem ken nagpatnag iti igid dagiti kalsada a  mangitagtag-ay kadagiti magasin tapno matulongankami a mangilasin kadagiti kakabsat. Inturongdakami kadagiti pagkamangan nga inorganisar dagiti Saksi.”

Masapul a maturog iti kannag ti kaaduan kadagidiay tumaltalaw gapu iti bulkan. Nairaman ditoy dagiti kakabsat a saan a nakakita kadagidiay mangitagtag-ay kadagiti magasin gapu iti riribuk wenno kinasipnget. Kinuna ti maysa a panglakayen: “Nasapa unay iti kabigatanna, rimmuar dagiti kakabsat nga iggemda manen dagiti magasin. Nagturongda iti intero a Gisenyi tapno makita ida ti tunggal maysa. Iti kasta, nasarakanda amin a kakabsat iti Goma a saan a nakakita kadagiti Saksi iti rabii sakbayna. Di nagbayag, agpeggad metten ti Kingdom Hall-mi gapu iti lava nga agtultuloy pay la nga agayus. Inyurnosmi a dagus ti lima pay a Kingdom Hall a pagkamangan.” Dagiti dadduma a kakabsat a naggapu iti 24 a kongregasion idiay Goma nagkamangda iti uneg ti Congo, ngem ti kaaduan, agarup 2,000, nagkamangda idiay Rwanda.

Dagus a gimmatang ti sanga nga opisina iti Kigali, Rwanda, kadagiti taraon, agas, ules, ken plastik a pagkargaan iti danum. Naipatulod a dagus dagitoy a suplay kadagiti pagkamangan. Anian a ragsak dagiti kakabsat a naggapu idiay Goma idi simmangpet ti maysa a trak a napno kadagiti suplay a pangsaranay, maysa nga aldaw laeng kalpasan ti didigra! Adu a nagsayaat a komento ti nangngegan kadagiti saan a Saksi. Nangngeg ti maysa a kabsat nga ibagbaga dagiti tattao: “Nagsayaat a relihion daytoy. Talaga nga agiinnayatda.”

Agarup kakatlo ti nadadael iti Goma. Napukaw ti adu a kakabsat ti amin a sanikuada. Nupay kasta, dagiti Saksi a di nadadael dagiti balayda nagboluntarioda a nangpadagus iti pamilia dagiti kakabsat a nadadael dagiti balayda. (Roma 12:12, 13) Di nagbayag, inyurnos dagiti kakabsat a taga Rwanda ti natalged a panagsubli ti amin a nagkamang a taga Goma. Timmulong met dagiti Saksi idiay Europa babaen ti panangipatulodda iti dua nga eroplano a napno iti suplay a naggapu iti Belgium.

 Maysa a didigra ti panagbettak ti Mount Nyiragongo. Adu ti natay ken nadadael a sanikua, ngem nailasin dagiti pudno a Kristiano babaen ti panagiinnayatda.​—Juan 13:35.

Ipaganetget ti Kingdom Ministry School ti Espiritualidad

Nangrugi ti Kingdom Ministry School idi 1959, kas maysa a bulan a panagadal. Naaramid idi dayta idiay South Lansing iti makin-amianan a paset ti New York, E.U.A. Iti dadduma a pagilian, naaramid dayta kadagiti lugar nga inyurnos dagiti sanga nga opisina. Idi damo, dagiti panglakayen iti kongregasion (a maawagan idi nga adipen ti kongregasion) ken dagiti special pioneer ti nailista nga agadal. Ngem, idi 1966, narebisar ti kurso; dua a lawas laengen, ket dagiti laeng panglakayen ti timmabuno. Idi 1977, nayurnos a tumabuno ti amin a panglakayen iti 15-oras a kurso. Manipud idin, adda ti kakasta met la a panagadal a nadumaduma ti kapautda a maang-angay iti tunggal sumagmamano a tawen. Sipud idi 1984, masansanay metten dagiti ministerial nga adipen iti Kingdom Ministry School.

Iti daytoy a tawen, adda tallo a klase a naangay iti dayta nga eskuelaan. Ti umuna, a naaramid iti Martes agingga iti Huebes, ket para kadagiti agdaldaliasat a manangaywan; ti maikadua, a naaramid iti Biernes ken Sabado, ket para kadagiti panglakayen iti kongregasion; ken ti maikatlo, a naaramid iti Domingo, ket para kadagiti ministerial nga adipen. Ti kurso impaganetgetda ti panangtaginayon iti espiritualidad. Idi unana, inkararag ni Moises ken Jehova: “Ipakaammom kaniak, pangngaasim, ti daldalanmo, iti kasta maam-ammoka, tapno makasarakak iti pabor kadagita matam.” (Ex. 33:13) Nayebkas daytoy a kararag kalpasan a naimatangan ni Moises ti Sangapulo a Saplit, napasaranna ti pannakabisngay ti Nalabaga a Baybay, nakisarita ken Jehova iti 40 nga aldaw idiay Bantay Sinai, ken inawatna ti Sangapulo a Bilin. Iti edad a 80 ken kalpasan nga inusar ni Jehova iti naisangsangayan a pamay-an, nabigbig ni Moises ti naespirituan a kasapulanna. Maitunos iti daytoy nga  ehemplo, naparegta dagiti panglakayen ken ministerial nga adipen nga itultuloyda ti agbalin a naespirituan a lallaki, kasano man ti kapauten ti panagserbida ken Jehova.

Ti material nga adalen ket naipatarus ken inusar dagiti sanga nga opisina iti intero a globo. Adu a surat a panagyaman ti naggapu iti adu a pagilian. Insurat ti maysa a panglakayen idiay Guinea: “Diak pagbabawyan dagiti sakripisio ken ti panagbiahek iti 1,000 a kilometro tapno agadal.” Adda met nangisurat iti kastoy: “Diak mayebkas iti sasao ti panangapresiarko iti daytoy a pannakasanay. Agyamanak unay kadakayo!”

Idiay Korea, insurat ti maysa a kabsat: “Tinulongannak ti eskuelaan a mangtingiting a naimbag no maysaak a naespirituan a tao wenno saan.”

Insurat ti sanga nga opisina iti El Salvador: “Adda naisangsangayan nga interes a naipakita kadagiti baro nga urnos para iti Panagadal iti Libro ti Kongregasion. Ammomi a makatulong daytoy kadakami a mangipaay iti nasaysayaat ken nasingsinged a personal nga atension kadagiti adda iti tunggal grupo.”

Idiay Germany, insurat ti maysa a bagi dagiti panglakayen: “Realistiko dagiti singasing ken instruksion ken mabalin nga iyaplikar a pakagunggonaan dagidiay naitalek kadatayo.”

Kastoy ti kuna ti sanga nga opisina ti Switzerland: “Nakatulong ti eskuelaan a mangipaay iti kasapulan a pammaregta tapno malapdan ti naespirituan a panangyaleng-aleng.”

Maipapan Kadagiti Legal a Banag

ARMENIA: Naipadamag iti nadumaduma a pagilian ti kaso iti korte a mainaig ken Lyova Margaryan. Naidarum ni Brother Margaryan gapu kadagiti aramidna kas maysa a Saksi ni Jehova. Nairaman kadagiti darum ti “panangikasaba iti di nairehistro a relihion.” Idi Setiembre 18, 2001, naabsuelto ni Brother Margaryan iti amin a darum. Nayapelar daytoy a kaso, ket pinatalgedan ti korte a pagapelaran ti pannakaabsuelto ni Brother Margaryan, nga imbagana a ti panangisurona iti relihion  kas maysa kadagiti Saksi ni Jehova ket saan a kriminal nga aramid ken salsalakniban ti Konstitusion ti Armenia. Ngarud, inyapelar dagiti abogado ti kaso dagiti nagdarum iti kangatuan a pagapelaran a korte iti pagilian, ti Court of Cassation. Idi Abril 19, 2002, ti innem a miembro a mangbukel iti Korte pinatalgedanda ti pannakaabsuelto ni Brother Margaryan a maitunos iti desision ti dua a nababbaba a korte. Nupay maragsakantayo iti daytoy a panagbiktoria, agtultuloy ti pannakaaresto ken pannakaibalud idiay Armenia dagiti agtutubo a kakabsat nga agkedked nga agsoldado gapu iti narelihiosuan a rason.

GEORGIA: Agtultuloy ti naulpit a kinaranggas maibusor kadagiti Saksi ni Jehova iti pagilian ti Georgia, a di man la madusa dagidiay mangrangranggas. Sipud idi Oktubre 1999, adda nasurok a 80 a napaneknekan a naranggas a panangraut a pakairamanan dagiti nasurok a 1,000 a lallaki, babbai, ubbing, lallakay ken babbaket, ken dagiti baldado. Natakawan, nasamsaman, ken napuoran ti pagtaengan ti dadduma a Saksi. Nasurok a 700 ti nayamang a darum, ngem awan man la ti uray maysa a nasentensiaan kadagiti rimmaut. Kamaudiananna, naidarum da Petre Ivanidze ken ti naikkat a padi ti Orthodox a ni Vasili Mkalavishvili idi Setiembre 2001, gapu iti pannakairamanda kadagiti panangraut. Ngem di nagballigi ti namin-adu a panangikagumaan a mangirugi iti bista gapu kadagiti kasasaad iti korte. Napalubosan dagiti pasurot dagiti naidarum a simrek iti korte nga addaan kadagiti nagdadakkel a krus, a dati a nausar nga armas, ken mangiwagwagayway kadagiti bandera a nasuratan iti sasao a maibusor kadagiti Saksi ni Jehova. Agingga idi Mayo 30, 2002, namimpiton a naitantan ti bista. Nangisubmitir dagiti Saksi ni Jehova iti dua nga aplikasion iti European Court of Human Rights (ECHR). Ti maysa ket kas protesta iti di panangikankano ti gobierno iti awan sarday a kinaranggas ket ti sabali kas panangkuestion iti paglintegan ti Korte Suprema ti Georgia a nangwaswas iti pannakairehistro ti dua a legal nga ahensia nga us-usaren dagiti Saksi ni Jehova. Idi Oktubre 2001,  pinagmaymaysa ti ECHR dagiti aplikasion tapno naparpartak ti pannakatamingda.

Idi Hulio 23, 2002, nangisubmitir manen dagiti Saksi ni Jehova iti sabali pay a legal nga aplikasion iti ECHR. Daytoy nga aplikasion imbinsabinsana dagiti 30 a kaso a mangipakita a dagiti Saksi idiay Georgia ket rinanggasan dagiti panatiko a relihioso a tattao, dagiti klero nga Orthodox, ken dagiti polis. Maysa a napateg a dokumento ti mainaig iti maysa kadagiti kaso. Sagudayen ti dokumento ti plano ti agarup 100 a polis a mangpasardeng iti natalna a kombension dagiti Saksi ni Jehova idi Setiembre 2000. Daytoy a dokumento ket inaprobaran ken pinirmaan dagiti nangato nga opisial iti Ministry of Interior iti makinlaud a siudad iti Zugdidi.

RUSSIA: Naituloy ti pannakabista iti panangparit kadagiti Saksi ni Jehova idiay Moscow idi Pebrero 12, 2002. Daytoy ti maikapito a daras a masapul nga idepensa dagiti Saksi ni Jehova ti bagbagida maibusor kadagiti isu met laeng nga awan nakaibatayanda a pammabasol. Idi Abril 4, 2002, kalpasan ti dua a bulan a panangamiris iti aplikasion a naggapu iti opisina ti abogado dagiti nagdarum, nangipaulog ti Korte iti paglintegan a mangtuding kadagiti eksperto a mangadal kadagiti relihioso a literatura dagiti Saksi ni Jehova ken dagiti sursurat iti organisasionda. Nagdesision ti Korte, uray no awan ti naidatag ti abogado dagiti nagdarum nga espesipiko nga ebidensia a mangpaneknek a mangirugrugi dagiti Saksi ni Jehova iti riribuk gapu iti relihion, pagsisinaenda dagiti pamilia, wenno makibibiangda iti kalintegan ken wayawaya dagiti umili. Naisardeng ti bista tapno maitantan ti resulta ti panagadal dagiti eksperto.

SOUTH KOREA: Idi arinunos ti Disiembre 2001, agdagupen iti 1,640 dagiti Saksi ni Jehova a naibalud idiay South Korea gapu iti panagkedkedda nga agsoldado. Tinawen nga umad-adu ti bilangda. Babaen ti Military Service Law, masentensiaan a maibalud agingga iti tallo a tawen dagidiay agkedked nga agsoldado. Saan a bigbigen ti South Korea ti pannakaipuera iti  panagsoldado dagiti ministro ti relihion wenno dagiti agkedked nga agsoldado gapu iti konsiensia. Sipud pay idi dekada 1950, nasurok a 7,000 a Saksi idiay South Korea ti naibaluden gapu iti panagkedkedda nga agsoldado. Idi Enero 29, 2002, iti awan kapadana a kaso, inyamang ni Senior Judge Si-hwan Park ti Seoul District Court ti kaso ni Kyung-soo Lee iti Constitutional Court. Nagkiddaw ni Judge Park iti opinion maipapan iti kuna ni Brother Lee a ti di panangbigbig iti kalinteganna nga agkedked nga agsoldado gapu iti konsiensiana labsingenna ti kalinteganna a maaddaan iti wayawaya iti relihion ken konsiensia. Idi insubmitirna ti kalikagumna iti korte, sinuspende ni Judge Park ti bista ket winayawayaanna ni Brother Lee babaen ti piansa. Maituloy laeng ti bista inton naikeddengen ti Constitutional Court no maitunos iti konstitusion wenno saan ti kinuna ni Brother Lee.

ESTADOS UNIDOS: Idi Hunio 17, 2002, adda historiko a pangngeddeng ti Korte Suprema iti Estados Unidos iti kaso a Watchtower Bible and Tract Society of New York, Inc. v. Village of Stratton. Rimsua daytoy a kaso gapu iti panangipapilit ti munisipio a mangala dagiti Saksi ni Jehova iti permiso ti mayor sakbay a mamalaybalayda. Kinuna ti Korte: “Inlawlawag [dagiti Saksi ni Jehova] iti bista a saanda a nangala iti permiso agsipud ta agtaud iti Kasuratan ti autoridadda a mangasaba. [Kinuna dagiti Saksi:] ‘Ibilangmi a kasla pananginsulto iti Dios no mangalakami iti permiso manipud iti munisipio iti panangasabami.’” Iti panangwaswasna iti ordinansa, inkeddeng ti Korte a ti ordinansa a panangala iti permiso “ket pananginsulto​—saan laeng a kadagiti prinsipio a salsalakniban ti First Amendment, no di ket iti mismo a kaipapanan ti nawaya a kagimongan​—a no kayat ti maysa nga umili ti makipatang kadagiti sabsabali, masapul nga ibagana pay nga umuna iti gobierno a kayatna ti makisarita kadagiti kaarrubana sa dumawat iti pammalubos a makisarita.” Kinuna pay ti Korte: “Uray pay no ti panangted ti opisina ti mayor iti permiso ket serbisio a saan a bayadan ti aplikante, ti linteg a masapul a mangala iti permiso a makisarita  ket nakaro a panangtallikud iti tawid ti nasiontayo ken iti konstitusional a tradisiontayo.”

Nagsayaat met ti komento ti Korte maipapan iti dakkel nga epekto ti naaramidan dagiti Saksi ni Jehova iti pannakaipasdek ti linteg ti konstitusion iti E.U. Kinuna ti Korte: “Iti nasuroken a 50 a tawen, di inanamongan ti Korte ti panangiparit iti isasarungkar ken panangiwaras iti pampleta kadagiti balbalay. Saan laeng a naiparna iti historia a ti kaaduan kadagitoy a kaso ket dagiti isyu a mainaig kadagiti kalintegan a sagudayen ti First Amendment nga indatag dagiti Saksi ni Jehova, agsipud ta ipaannurot ti relihionda ti panangasaba kadagiti balbalay.” Kas nakita ti Korte, dagitoy a “kaso ipakitada a saan laeng a dagiti kalinteganda ti iruprupir dagiti Saksi ni Jehova iti panangikagumaanda a mangsaranget iti regulasion a manglimitar iti panagsao.”

Maysa pay, idi Hulio 1, 2002, pinatalgedan ti Korte Suprema ti South Carolina ti kalintegan ti maysa kadagiti Saksi ni Jehova a di agpayalison iti dara. (Ara. 15:28, 29) Indarum ni Charles Harvey ti doktorna tapno makasingir iti danios gapu iti ginagara a di panangikabilangan ti doktorna iti panagkedkedna a mayalisonan. Sakbay a maopera, nalawag nga impakaammo ni Brother Harvey iti doktorna ti naibatay iti Biblia a takderna. Nupay kasta, tapno mayalisonan iti dara idi adda komplikasion bayat nga awan puot ni Brother Harvey kalpasan ti pannakaoperana, dinawat ti doktor ti pammalubos ti saan a Saksi nga ina ni Brother Harvey. Saan nga inawat ti Korte Suprema ti South Carolina ti pammalubos ti ina ta kinunana a “ti panagkedked ti pasiente iti maysa a kita ti panangagas, no naipakaammo sakbay ti pannakaopera, ket masapul a tungpalen ti doktorna.” Iti kasta, inkeddeng ti korte a kalintegan ni Brother Harvey nga ikeddeng ti hurado no linabsing ti doktor ti tulagna a mangagas ken Brother Harvey a di mayalisonan iti dara ken no adda “medical malpractice” a naaramid ti doktor gapu ta inyalisonanna ni Brother Harvey nga awan ti pammalubosna.

 Pananglagip iti Kinatibkerda

Iti nasurok a 30 a tawen, awan ti dinakdakamat ti Buchenwald Memorial, iti dati a kampo konsentrasion dagiti Nazi, maipapan kadagiti Saksi ni Jehova. Saan laeng a maitutop a panunoten dagiti autoridad iti East Germany a dagiti Saksi ket biktima ken bumusbusor iti turay a Nazi. Uray itatta adu a tattao iti Alemania ti di mangbigbig iti naisangsangayan a kinatibker dagiti Saksi. Ngarud, ti Mayo 9, 2002, ket aldaw a naisangsangayan ti kaipapananna. Maysa a plake a mangipalagip kadagiti Saksi a nagsagaba idiay Buchenwald ti linukasan ni Mr. R. Lüttgenau, katulongan a direktor iti Buchenwald and Mittelbau-Dora Memorials Foundation.

Nabara ken napintas ti tiempo iti dayta nga aldaw. Ti dati a kampo, nga adda iti aduan kayo a turod a mangtannawag iti napintas a buya ti probinsia, ket naadornuan iti makapabang-ar a berde a mulmula iti tiempo ti primavera. Ngem daytoy a lugar ket naawagan idi a berde nga impierno ti Buchenwald. Kasla di matukod a panunoten ti kaaduan a bumisbisita ita ti panagladingit dagiti balud a mangbuya iti napintas nga aglawlaw iti kampoda ngem awan man la ti namnamada a mangsagrap manen a siwayawaya iti dayta.

 Ngem dagiti Saksi ni Jehova adda namnamada a naibatay iti Biblia ket naan-anay nga agtalekda ken Jehova. Daytoy ti nangpabileg kadakuada a mangsalimetmet iti kinatarnawda ken situtured a mangsurot iti pagwadan dagiti apostol a nagkuna: “Masapul nga agtulnogkami iti Dios kas agturay imbes a kadagiti tattao.” (Ara. 5:29) Gapu iti pammatida, agarup 38 a Saksi ti natay iti uneg wenno iti ruar ti kampo, kadagiti trabahador ti kampo. Ti teksto a naadaw iti Aramid ket naisurat iti pakalaglagipan a plake, a sinaruno dagitoy a sasao: “Pakalaglagipan Kadagiti Saksi ni Jehova a Nagsagaba ken Natay Ditoy, Naidadanes Gapu iti Narelihiosuan a Pammatida.”

Karaman kadagiti 250,000 nga imbalud dagiti Nazi iti adu a tawen iti kampo ti agarup 800 a balud a nabigbig kas Bibelforscher (Estudiante ti Biblia) babaen ti lila a trianggulo a naidait  iti kawesda. Adda sadiay idi 1937 ti dadduma kadagiti Saksi ken napilitda a tumulong a mangibangon iti kampo. Idi 1945, idi naruk-atanen dagiti nakalasat a balud, dagiti nawayawayaan a Saksi indayawda ni Jehova gapu iti pannakaisalakanda. Iti intero a kaaddana kas kampo dagiti Nazi, kanayon nga adda 300 agingga iti 450 a Saksi idiay Buchenwald.

Ti plake impaayanna dagiti balud nga addaan kadagiti lila a trianggulo iti maitutop a pannakabigbig kas biktima ti turay a Nazi. Ipalagipna met kadagiti bisita ti kinatibker dagiti Saksi. “Ipakita ti plake,” kinuna ni Mr. Lüttgenau, “nga iti kagimongan iti kaaldawantayo nakita ken nabigbigen ti kasasaad idi dagiti Saksi ni Jehova.”

Idi Huebes, Marso 7, 2002, linukasan dagiti opisial iti ili ti Körmend iti makinlaud a paset ti Hungary ti maysa a pakalaglagipan a plake para iti tallo a Saksi ni Jehova a natay kas martir​—da Bertalan Szabó, Antal Hőnisch, ken Ján Žondor. Nagkedked dagitoy a tallo nga agsoldado idi Gubat Sangalubongan II ket napapatayda iti imatang ti publiko. Kastoy ti naisurat iti plake: ‘Pakalaglagipan kadagiti Kristiano a napapatay idi Marso 1945 gapu iti panagkedkedda nga agsoldado gapu iti konsiensia.’ Impadamag ti sanga nga opisina a tapno makiramanda iti pananglaglagip idi nalukasan ti plake, nasurok a 500 a tattao ti nagnagna iti ili a mapan iti pasdek a nakatayan dagiti kakabsat.

Naipasdek ti Branch Committee iti Estados Unidos

Idi Biernes, Pebrero 9, 2001, impakaammo ti Bagi a Manarawidwid iti pamilia ti Bethel iti Estados Unidos a mangrugi iti Abril 1, 2001, addan Branch Committee iti Estados Unidos. Bayat ti 2002 a tawen serbisio, sirarang-ay nga intultuloy ti Branch Committee nga imbaklay dagiti rebbengenda. Ti sanga nga opisina ti Estados Unidos ti mangimatmaton iti panangikasaba iti Pagarian iti intero nga Estados Unidos agraman iti Bermuda ken kadagiti isla ti Turks ken Caicos. Adda nasurok a  maysa a milion nga agibumbunannag iti Estados Unidos, ket 215,000 ti naitimpuyog kadagiti kongregasion nga agus-usar iti Español. Kadagiti nasurok a 11,700 a kongregasion, agarup 2,600 ti agus-usar iti Español. Idi napan a tawen serbisio, 210 a baro a kongregasion ti nabuangay. Adda 123 kadagitoy ti agus-usar iti Español, 63 ti agus-usar iti Ingles, ken 24 ti agus-usar iti dadduma a lenguahe.

Iti Estados Unidos, adda itan 37 a lenguahe nga us-usaren dagiti kongregasion wenno grupo, malaksid iti Ingles ken Español. Iti adu a kongregasion nga agus-usar iti Español ken dadduma pay a sabali a pagsasao, masansan a nasurok a 200 a porsiento dagiti tumabtabuno. Kadagiti dadduma a kongregasion, ad-adu dagiti naireport a mayad-adalan iti Biblia ngem kadagiti agibumbunannag. Dagiti kakabsat a makaammo iti Ingles agad-adalda iti dadduma a lenguahe tapno tumulongda iti daytoy napartak ti irarang-ayna a tay-ak.

Naisangsangayan ti sanga nga opisina ti Estados Unidos ta adda iti tallo a lugar dagiti pasilidad ti Bethel​—Brooklyn, Patterson, ken Wallkill. Tapno adda maapit a prutas nga agpaay iti pamilia ti Bethel, adda maay-aywanan a talon iti asideg ti South Lansing, New York, ken Immokalee, Florida. Agdagupen iti 5,465 dagiti kameng ti pamilia ti Bethel iti Estados Unidos.

Adda itan 109 a sanga nga opisina iti sangalubongan. Manipud pay idi 1976 nga adda dagiti Branch Committee a mangay-aywan iti naespirituan a kasapulan dagiti kakabsat nga agnanaed iti nadumaduma a pagilian. Dagitoy a komite sursurotenda dagiti Nainkasuratan a bilin ken agpapaidalanda iti Bagi a Manarawidwid. Rebbengen dagiti Branch Committee nga imatonan ti pannakaikasaba ti naimbag a damag iti teritoria a naituding iti sanga nga opisina. Ti komite ti mangas-asikaso kadagiti kongregasion Kristiano, misionero, ken payunir. Organisarenna met dagiti kongregasion a mangbukel kadagiti sirkito ken distrito ken agirekomendar iti Bagi a Manarawidwid  kadagiti madutokan a manangaywan iti sirkito ken distrito, miembro ti pamilia ti Bethel, ken estudiante ti Gilead School. Malaksid iti panangaywanna iti panagserbi iti tay-ak, ti Branch Committee ti mangorganisar iti trabaho iti Bethel. Awan duadua a sibabaknang a bembendisionan ni Jehova daytoy nga urnos.

Panagipatarus Tapno Maaywanan ti Adu a Kasapulan

Kadagiti kallabes a tawen, adu a publikasion ti magun-odanen iti umad-adu a bilang dagiti lenguahe. Di pagaammo ti publiko a ginasut a nagaget a managipatarus ti mangikagkagumaan a mangpataud kadagiti publikasion nga umiso, maawatan, ken makaparagsak a basaen.

Ti kangrunaan a kasapulan ti ili ti Dios ket maysa nga umiso a patarus ti Biblia. Gapu itoy, nairuaren ti Baro a Lubong a Patarus iti 44 a lenguahe. Kadagitoy, 29 ti kompleto nga edision. Idi napan a tawen serbisio, nakompleton ti Kristiano a Griego a Kasuratan iti tallo a lenguahe ti Africa​—Cibemba, Igbo, ken Lingala—​ket nairuar ti kompleto a Biblia iti Afrikaans.

Maapresiar unay dagiti edision ti Biblia a nairuar iti nabiit pay. Kinuna ti maysa a report a naggapu iti Europa: “Nangnangruna nga inapresiar dagiti kakabsat a mangaskasaba iti tay-ak a Tsino ti Biblia a naipatarus iti lenguaheda, nga ibagbagada a maibilang dayta a ‘nagsayaat a patarus.’” Kinuna ti dadduma nga interesado iti Biblia a Tsino idiay Canada: “Mabalin nga impatarus dagiti Tsino daytoy a Biblia! Nalakami a maawatan!” Idiay South Africa, maysa a bumalay a Xhosa ti nagdamag: “Sadino ti nangalaanyo iti daytoy a Biblia a naglaka a maawatan?” Idiay Albania, kinuna ti maysa a kabsat a lalaki: “Ti pamay-an ti pannakaipatarus ti Baro a Lubong a Patarus ipaawatna ti pampanunot ni Jehova tapno madanon ti puso.” Insurat ti maysa nga agibumbunannag idiay Croatia: “Nalaklaka a mailadawanko ti bambanag, ket kasla siak ti agsasao kadagidiay. Nakasimsimple ti baro a patarus, natural, ngem nainsiriban unay.  Ita, naan-anayen a maawatak a nakapimpintas ti mensahe ni Jehova ken dagiti bilinna kadatayo.”

Kasapulan pay laeng dagiti simple a publikasion tapno maisaknap ti naimbag a damag ti Pagarian iti ‘amin a nasion ken tribu ken ili ken pagsasao.’ (Apoc. 7:9) Kadagiti kallabes a tawen, adda nagsayaat nga epekto dagiti broshur a naipatarus iti lenguahe a Lahu, nga us-usaren dagiti tribu iti katurturodan ti makin-amianan a Thailand ken kadagiti kabangibang a pagilian. Insurat ti maysa a misionero: “Ti broshur a Kalikaguman ti kangrunaan nga alikamen iti Lahu. Naisaknapen dayta.” Ti resultana? “Aw-awisendakami iti adu a purok, ngem gapu iti kinaadayoda ken narigat ti kasasaad ti kalsada, saankami a makapan iti amin. Agpaypayso kadakami ti kuna ti Mateo 9:37. Kas pagarigan, naammuanmi nga iti nasulinek a purok nga agarup 160 a kilometro iti amianan ti Chiang Mai, adda interesado a babai a regular a mangisursuro a bukodna iti broshur a Kalikaguman iti maysa a grupo dagiti ulila.”

Idiay Estados Unidos, adu a Katutubo nga Americano ti makaskasabaan iti bukodda a lenguahe. Sumagmamano a publikasion ti magun-odanen iti lenguahe a Navajo, agraman dagiti audiocassette ti broshur nga Ania ti Kalikaguman ti Dios Kadatayo? Insurat ti maysa nga agibumbunannag: “Iti Kabambantayan ti Navajo, iti kaadayuan a paset ti teritoriami, adda dati nga agpaspastor iti karnero nga agtawen iti nasurok a walopulo a nakudrepen ti panagkitana. Dinamag ti apokona no kayatna ti dumngeg iti tape maipapan iti Biblia iti lenguahe a Navajo. Kinunana a kayatna. Bimmangon iti kamana ket napan iti sopa tapno agimdeng. No makitam la koma ti itsura ti  rupana bayat a dumdumngeg kadagiti kasuratan manipud iti Biblia iti bukodna a lenguahe. Makaluaak a mangestoria iti dayta. Kalpasanna kinunana, ‘Nizhoni,’ a kayatna a sawen, ‘napintas.’”

Idiay Mozambique, mayim-imprentan dagiti publikasion iti lima a lenguahe dayta a pagilian. Tapno matulongan dagiti agbasa, nayimprenta ti broshur nga Apply Yourself to Reading and Writing kadagitoy a lenguahe, ket maar-aramiden ti nasaknap a panangisuro iti panagbasa ken panagsurat. Nagustuan unay daytoy ni Presidente Chissano iti Mozambique ket inyebkasna ti naan-anay a panangsuportarna iti panangisurotayo iti Biblia ken ti trabaho a panangisuro iti panagbasa ken panagsurat.

Magun-odanen ti magasin a Pagwanawanan iti 146 a lenguahe ken ti Agriingkayo! iti 87 a lenguahe​—talaga nga internasional ti sirkulasionna. Maapresiar unay dagitoy iti intero a lubong gapu iti naespirituan ken edukasional a pategda. Kas pagarigan, Gilbertese ti pagsasao ti dandani 80,000 nga umili iti Kiribati, maysa a grupo dagiti isla iti Taaw Pacifico. Dagiti Saksi sadiay, nga awan pay 100 ti bilangda, agpromedio iti dandani 20 a magasin kada bulan ti sigagaget a maipapaima ti tunggal agibumbunannag. Nasurok a 100,000 a magasin ti naipaima dagiti 1,200 nga agibumbunannag idiay Bulgaria idi Abril 2002.

Awan duadua a kabkabalan ni Jehova ti ilina a mangibanag iti trabaho nga impaaramidna kadakuada. Iti intero a lubong, maibambanag dayta a trabaho iti adu a lenguahe.​—Fil. 4:20.

 Pannakaidedikar ti Sanga nga Opisina

Bayat ti 2002 a tawen serbisio, naidedikar ti sanga nga opisina iti napintas nga isla ti Trinidad iti Caribe. Naidedikar ken Jehova dagiti pasilidad ti sanga nga opisina idi 1985, ngem sipud idin, 94 porsiento ti nginatuan ti bilang dagiti agibumbunannag iti Trinidad. Kas resulta, nasken a mapabaro dagiti pasilidad ti sanga nga opisina ken mangbangon iti kanayonan a doble ti kalawana. Addaan itan ti sanga nga opisina kadagiti baro a pagtaengan, opisina, libraria, lobby a pagawatan kadagiti bisita, kumidor,  ken kosina. Napabaro ken napalawa met ti naisilpo a Kingdom Hall. Bin-ig a taga Trinidad dagiti nagboluntario a nangileppas iti daytoy a proyekto.

Idi Setiembre 29, 2001, agarup 220 a delegado a naggapu iti 14 a pagilian ken 695 a lokal a kakabsat ti nagtataripnong para iti dedikasion. Immimdengda kadagiti makaparegta a report maipapan iti teokratiko a pakasaritaan ti trabaho, a pakairamanan ti nagapuanan da Evander J. Coward ken ni William R. Brown. Adda sumagmamano a ganggannaet a misionero, a  pakairamanan ti 88 ti tawenna a sister a regular pioneer pay latta, a nangisalaysay kadagiti makaguyugoy a kapadasan maipapan iti panagserbida iti Trinidad nasurok a 50 a tawenen ti napalabas.

Ni Stephen Lett, a kameng ti Bagi a Manarawidwid ti nagdiskurso iti dayta a dedikasion. Iti panangbukelna iti tema a “Panangapresiar Kadagiti Balay a Pagdaydayawan ken Jehova Idi ken Ita,” impaganetgetna a dagiti tattao, saan a dagiti pasdek, ti agdayaw ken Jehova. Ngarud, siaayat a pinaregta ni Brother Lett dagiti kakabsat nga agbalinda a manangapresiar a managdaydayaw babaen ti kinatulnog ken kababalinda.

Iti sumaganad nga aldaw, naangay ti naisangsangayan a taripnong iti siudad ti Port of Spain para kadagidiay saan a naawis iti programa ti dedikasion. Nasurok a 13,000 ti timmabuno. Iti kabangibang nga isla ti Tobago, nasurok a 300 a kakabsat ti dimngeg iti programa a naikonektar babaen ti telepono. Impalawag ni Brother Lett ti “Saluadam ti Relasionmo ken Jehova Babaen ti Panagbalin a Napakumbaba.” “Maragsakan” ti amin a timmabuno iti pannakaidedikar dagitoy a napalawa a pasilidad ti sanga nga opisina.​—Deut. 16:15.

Iti nabiit pay, napalawa met ti sanga nga opisina iti Czech Republic. Napan sadiay ni Samuel F. Herd a kameng ti Bagi a Manarawidwid a mangidedikar iti pasdek ti Bethel, maysa a nainayon a pasdek, ken dua nga Assembly Hall. Naaramid ti programa ti dedikasion idi Sabado, Mayo 4, 2002, ken adda 2,125 a timmabuno a dimngeg iti palawag ni Brother Herd. Iti sumaganad nga aldaw, adda naaramid a naisangsangayan a taripnong, ket 5,286 ti nangtagiragsak iti makapabileg a palawag ni Brother Herd a napauluan iti “Panangpabaro iti Bileg​—Di Mabannog.” Naparegta unay dagiti kakabsat idiay Czech Republic iti dayta a programa.

Iti sangalubongan, adda dagup a 19,823 nga ordinado a ministro kadagiti sanga nga opisina. Bin-igda a miembro ti Worldwide Order of Special Full-Time Servants of Jehovah’s Witnesses.

 [Tsart/Dagiti Ladawan iti panid 12, 13]

DADDUMA A PASAMAK IDI 2002 A TAWEN SERBISIO

Setiembre 1, 2001

Setiembre 11: Pannakarbek ti World Trade Center.

Setiembre 29: Pannakaidedikar ti sanga nga opisina iti Trinidad.

Nobiembre 20: Nangrugi dagiti Kingdom Ministry School.

Enero 1, 2002

Enero 17: Bimtak ti bulkan idiay Congo.

 Abril 4: Nagpatingga ti pannakabista ti plano a panangiparit kadagiti Saksi ni Jehova idiay Moscow.

Mayo 1, 2002

Mayo 4: Pannakaidedikar ti sanga nga opisina iti Czech Republic.

Mayo 9: Nalukasan ti plake a mangipalagip iti panagsagaba dagiti Saksi iti dati a kampo konsentrasion dagiti Nazi.

Hunio 17: Pinatalgedan ti Korte Suprema ti E.U. ti kalintegan a mangasaba kadagiti balbalay a di mangala nga umuna iti permiso.

Agosto 31, 2002

Agosto 31: 6,304,645 dagiti agibumbunannag iti 234 a pagilian.

[Dagiti Ladawan iti panid 11]

◼ Ngato: Iti tiempo dagiti didigra a kas kadagitoy, iparangarang dagiti kakabsattayo ti Nakristianuan nga ayat

[Ladawan iti panid 11]

◼ Baba: Nagserbi a pagkamangan daytoy a Kingdom Hall idiay Rwanda

[Ladawan iti panid 22]

Ti kabbaro a nabuangay a Branch Committee iti Estados Unidos, manipud kannigid nga agpakannawan: (nakatugaw) John Kikot, Max Larson, George Couch, Maxwell Lloyd; (nakatakder) Baltasar Perla, Harold Corkern, Leon Weaver, William Van De Wall, John Larson, ken Ralph Walls

[Ladawan iti panid 26]

Ti “Baro a Lubong a Patarus” iti Afrikaans

[Ladawan iti panid 27]

“Ania ti Kalikaguman ti Dios Kadatayo?” iti lenguahe a Navajo

[Dagiti Ladawan iti panid 28, 29]

Kadua dagiti lokal a kakabsat dagiti delegado a naggapu iti 14 a pagilian a timmabuno iti pannakaidedikar ti sanga nga opisina iti Trinidad

[Dagiti Ladawan iti panid 29]

◼ Nagragsakan dagiti kakabsat idiay Czech Republic iti pannakaidedikar ti baro a pasdek ti Bethel, maysa a kanayonan a pasdek, ken dua nga Assembly Hall