Report iti Intero a Lubong

◼ OCEANIA

Bilang dagiti pagilian: 30

Populasion: 33,773,304

Bilang dagiti agibumbunannag: 92,691

Bilang dagiti panangyadal iti Biblia: 44,999

Iti nasulinek nga estasion ti tren iti away idiay New South Wales, Australia, adda dua nga agibumbunannag a mangipuesto iti pagikabilan kadagiti literatura tunggal nakaeskediul a sumangpet ti maysa kadagiti dua a tren nga agbibiahe iti nadumaduma nga estado. Agsipud ta agsardeng iti dua nga oras dagiti tren nga Indian Pacific ken The Ghan, tinagiragsak dagiti agibumbunannag ti nasayaat a pannakisarita iti adu a pasahero ken nakaipaimada iti adu a literatura. Kinapudnona, kabayatan ti panagsubli dagiti pasahero, sumagmamano kadakuada ti “nangsarungkar” pay ketdi kadagiti agibumbunannag.

 Ti konduktor iti The Ghan kadawyanen nga iyanunsiona dagiti aniaman a mabalin a tagiragsaken dagiti pasahero bayat a sumardeng ti tren iti nadumaduma a lugar. Gapu ta impakadanan kadagiti agibumbunannag ti Pagarian, iramanna met nga iyanunsio ti pagikabilan kadagiti literaturada. Wen, gapu ta manangipamuspusan dagitoy a naiputputong a Saksi, dagiti biahero iti intero nga Australia ken dagidiay aggapu iti sabali a pagilian umaw-awatda iti nagsayaat a pammaneknek.

Idiay Kosrae, Micronesia, nakaipaima ti agassawa a misionero iti libro a Pannakaammo iti ministro ti Baptist nga agtawenen iti nasurok a 80. Ti libro ket nayimprenta iti lenguahe a Kosraean, nga awan pay 10,000 a tattao ti agsasao iti dayta. Inapresiar ti ministro ti libro. Idi sinarungkaran ti agassawa, imbagana a pinaregtana dagiti miembro ti relihionna nga awatenda dagiti literaturatayo. Siempre, dinamag dagiti misionero no apay. “Agsipud ta ti relihionmi di agitukon kadagiti libro iti bukodmi a lenguahe,” kinunana. Ita, regularen a kasarsarita ti agassawa a misionero daytoy lakayen a ministro.

Idiay Marshall Islands, maysa a misionera ti nakiddaw a mangyadal iti Sao ti Dios iti inaktibo a sister. Gapu ta awan ti interes a makitana, dinamag ti misionera iti babai: “Ania ti riknam no adda mangibaga kenka nga ay-ayatennaka?” Gapu ta mariro, simmungbat: “Awan pay ti nangibaga kaniak iti kasta.” Nagsadag ngarud ti misionera, inarakupna, sa kinunana: “Ay-ayatenka. Ken ad-adda pay nga ay-ayatennaka ni Jehova.” Nakasangit ti inaktibo a sister, ket sipud idin nagbaliwen ti riknana ken Jehova. Rimmang-ayen iti naespirituan babaen ti inaldaw a panagbasa iti Biblia, itatabuno iti amin a gimong, ken nag-auxiliary pioneer pay. Kalpasanna, idi Enero 2002, nagaplikar a regular pioneer. Sipud idin, nakairugi iti adu a panangyadal iti Biblia ken makabulan pay a nangasaba iti adayo nga isla nga adda dakdakkel a panagkasapulan.

Idiay New Caledonia, bayat ti panagrelaks ti maysa a misionera iti aplaya a kaduana ti sumagmamano a gagayyem, di pormal a kinasabaanna ti agkabannuag a babai a taga Francia nga  adda iti isla gapu ta bumisbisita kadagiti kabagianna. Soldado ti babai ket nakapagserbin idiay Sarajevo. Dinamag ti misionera no kayat ti babai ti makipagnaed kadagiti tattao a talaga nga agiinnayat. Wen, kinuna ti soldado, ngem pagarupenna a ti laeng nabileg a gobierno nga addaan iti episiente nga armada ti makaiyeg iti pudpudno a talna.

Kalpasanna, inlawlawag ti misionera nga agkaykaysa dagiti gagayyemna a Saksi, nupay nadumaduma ti nasionalidadda, gapu iti pammatida iti Dios ken ayatda kenkuana. Kalpasan ti naragsak a panagsarita, inyurnosda nga agkitada iti sumaganad nga aldaw tapno ad-adu pay ti mapagsaritaanda. Tinungpal ti soldado ti tulaganda ket tinagiragsakna ti damo unay a panagadalna iti Biblia. Kalpasanna, nangrugi a tumabuno iti amin a gimong. Rimmayray ti interesna iti naespirituan, ket idi dandanin agpatingga ti bakasionna, inaldawen nga agadal. Sa kalpasan ti itatabunona iti asamblea ken panagpasiarna iti sanga nga opisina sadiay, nagsubli idiay Francia, a sadiay intultuloyna ti rimmang-ay iti naespirituan.

Maysa ni Jeannie nga agtutubo nga agibumbunannag a taga Papua New Guinea. Masansan nga itugotna idiay eskuelaan ti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo. Maysa nga aldaw, kiniddaw ti maestroda iti Ingles iti amin nga adda iti klase a mangisaganada iti ababa a palawag maipapan iti aniaman a topiko a kayatda. Pinili ni Jeannie ti maipapan iti droga ken alkohol, nga imbasarna ti palawagna iti seksion 8 iti libro nga Iyimtuod ti Agtutubo. Nagustuan unay ti maestrona ti palawagna isu nga imbagana a mabalinna a “busbosen ti intero a panawen ti klase” no kayatna. Isu a kasta ti inaramid ni Jeannie. Kalpasanna, dinamag ti maestrona no kayatna ti agpalawag iti klase ti maikasangapulo a grado iti sumaganad nga aldaw. Immanamong ni Jeannie. Kalpasan ti palawag, imbaga ti maestrona iti Ingles a no adda angayen ti eskuelaan a panagpalawag dagiti estudiante iti rabii, ikagumaanna a pagpalawagen ni Jeannie iti programa. Kas resulta ti dua a palawagna, 64 a libro nga Iyimtuod ti Agtutubo ti nakiddaw ken ni Jeannie. Maysa pay, dua a babbai ti nagkiddaw iti broshur a Kalikaguman, ket nakairugi ni Jeannie iti panagadal iti Biblia kadakuada.

 Gapu iti kinaranggas a mapaspasamak kadagiti etniko a grupo idiay Solomon Islands, adu a kakabsat ti naawanan kadagiti sanikua ken marigatanda iti pinansial. Maysa a pagassawaan a nadadael ti balayda ti nangikeddeng a makiraman a mangasaba iti di naituding a teritoria, nupay masapul a gastuenda ti sangkabassit a pondoda. Intukonda nga usaren ti bilogda a pagluganan. Tinagiragsakda dayta ket idi agangay, kunada a dayta ti kasasayaatan a kapadasanda a nangasaba. Implanoda a sarungkaran dagidiay nangipakita iti interes. Ngem sadino ti pangalaanda iti gastuenda? Kastoy ti napasamak. Agarup makalawas kalpasan ti panangasabada iti manmano a makasabaan a teritoria, maysa a lalaki nga addaan iti kuarta ti immadani kadakuada a nangibaga a kayatna a gatangen ti sanikua a pinanawanda bayat ti panaggugubat.

Iti isla ti Santo idiay Vanuatu, ti Kingdom Hall sadiay ti kadawyan a maus-usar kadagiti kombension distrito. Ngem idi 2001, saanen a malaon ti Kingdom Hall ti kinaadu dagiti kakabsat. Isu nga inabangan dagiti kakabsat ti bassit nga istadium a dati a maus-usar laeng para kadagiti paay-ayam. Gapu ta madanagan di la ket ta madadael dagiti delegado ti pasdek, nangina unay ti abang a siningir ti manedyer, nupay impasigurado dagiti kakabsat a dalusan ken tarimaanenda ti istadium sakbay ken kalpasan ti kombension.

Agsipud ta adda paglakuan ti manedyer, nakitana dagiti Saksi a gimmatang kadagiti materiales a pagdalus ken pagtarimaan iti istadium. Gapu iti panagusiosona, napanna kinita ti mapaspasamak. Idi simmangpet iti istadium, nakitana ti nasurok a 100 a boluntario nga agis-is-is, agsagsagad, agpimpintura, ken mangtartarimaan kadagiti kasilias. Napalalo ti siddaawna. Di nagbayag, nagdinamagen iti intero nga ili ti kinadalus ti istadium ken ti pannakatarimaanna. Idi napan nagbayad dagiti kakabsat kalpasan ti kombension, naan-anayen a nagbaliw ti kababalin ti manedyer. Nangted iti 80 a porsiento a diskuento ket kinunana nga iti masanguanan, saanen nga agbayad dagiti Saksi ni Jehova a mangusar iti istadium! Naragsakan dagiti 300 nga agibumbunannag gapu ta adda 832 a timmabuno iti kombension ken 13 ti nabautisaran.

 ◼ ASIA KEN TI MAKINTENGNGA A DAYA

Bilang dagiti pagilian: 47

Populasion: 3,869,881,970

Bilang dagiti agibumbunannag: 561,276

Bilang dagiti panangyadal iti Biblia: 390,151

Maragsakan ti sanga nga opisina ti India a mangireport a nagsayaat a pammaneknek ti naipaay iti adu a paset ti pagilian babaen ti pannakaipabuya ti video iti telebision. Nadamag ti maysa nga estasion ti TV ti maipapan iti video a The Bible​—Its Power in Your Life, a pinataud dagiti Saksi ni Jehova. Kalpasanna, nagsurat ti estasion iti sangalubongan a hedkuarter idiay New York tapno dumawat iti pammalubos a mangipabuya iti video a mairaman iti programa a Home Shanti (Home Peace). Napalubosan, ket kuna ti sanga nga opisina ti India a “naipabuya kadagiti pamilia iti intero a teritoria” idi kattapog ti 2002.

 Idiay Israel, magmagna iti kalsada ti maysa a sister a makaammo iti sign language idi malabsanna ti agassawa a tuleng, da Benny ken Sharon. Imbes a lumugan iti bus nga agawid, simmardeng ket kinasabaanna ti agassawa, ket inawisda ti sister iti pagtaenganda. Naginteres ni Benny iti mensahe ti Pagarian, idinto ta nagusioso laeng idi damo, ket di nagbayag, makigimgimongen iti kongregasion. Nupay kasta, saan laeng a naan-anay a tuleng no di ket nakapuy pay ti panagkitana. Isu a marigatan unay idi nga agbiahe a mapan makigimong ken mangtarus iti agipatpatarus babaen ti senias. Ngem inkagumaanna, ken intultuloyna nga intunos ti biag ken personalidadna kadagiti prinsipio ti Biblia.

Nakaskasdaaw ti irarang-ay ni Benny, nupay adda dagiti pisikal a parikutna. Agkomkomento kadagiti gimong, agpaspaset iti Teokratiko nga Eskuelaan ti Panagministro​—nupay iseniasna ken adda mangipatarus iti dayta. Nabiit pay a nagbalin a di bautisado nga agibumbunannag. Naud-udi a nagpayadal ngem nasayaat met ti irarang-ay ni baketna a Sharon, a di met unay makangngeg ken makakita. Iranranuden da Benny ken Sharon ti kabbaro a nasarakanda a pammati kadagiti am-ammoda a tuleng.

Idiay Japan imbilang ti maysa a sister nga agnagan Fukue a naisangsangayan a teritoriana dagiti tattao a maam-ammona babaen kadagiti tallo nga annakna. Ti teritoriana ket pakairamanan dagiti kaarruba ken nagannak a maam-ammona iti kindergarten, iti eskuelaan, ken iti miting dagiti nagannak idiay eskuelaan. No iyam-ammona ti bagina, simple ngem naimpusuan nga ibagana a ti Biblia ket nagpateg a tulong kenkuana iti panangsanay kadagiti annakna. Kalpasanna, nainsiriban nga umallatiw iti dadduma a topiko. Agsipud ta narugiannan ti makisarita, nalaklakan a makisarita maipapan iti Biblia kadagiti sumaganad a panagsasarita. Epektibo aya ti pamay-an ni Fukue? Wen, ta nakatulongen iti 12 a tattao agingga a nabautisaranda, lima kadakuada ti agpaypayunir itan. Nagaget ni Fukue a mangasaba  iti di pormal agsipud ta naammuanna a mismo ti kinapudno babaen ti di pormal a panangasaba.

Iti bassit nga ili ti Kazakhstan, nagsakit ti anak ti maysa a babai ket kalpasanna natay. Simmaganad, natay ti maikadua nga anakna idi kappasngay. Gapu ta narigatan unay iti pisikal ken emosional, nayospital ti babai. Bayat a nakaidda iti kamana iti maysa a rabii, nangngegna ti nars nga agar-arasaas. Immimdeng a naimbag ket naammuanna nga ikarkararagan gayam ti nars, a maysa a Saksi ni Jehova, a dinakamatna pay ti naganna. Kabigatanna, liniwliwa ti nars ti babai babaen ti namnama a panagungar. Di nagbayag, nakaruaren ti babai iti ospital.

Maysa nga aldaw kalpasan ti lima a tawen, naallingag daytoy a babai nga adda kasarsarita dagiti kabagianna, nga ibagbagana ti isu met la a bambanag nga imbaga idi ti nars iti ospital. Gapu ta patienna a maysa daytoy a Saksi ni Jehova, nakiam-ammo, ket nayurnos ti panagadal iti Biblia. Gapu ta dinan kayat a masayang manen ti lima a tawen, sigagaget a nagadal ket nagsayaat ti irarang-ayna iti naespirituan. Di nagbayag, indedikarna ti biagna ken Jehova ket nabautisaran. Agasenyo ti ragsakna idi nasabetna ti nars a nangliwliwa kenkuana lima a tawen sakbayna, iti umuna a pannakiasambleana! Makalua a nagkuna: “Mabalin a diak koma inawat ti kinapudno no saan a gapu iti inyarasaasmo a kararag iti daydiay nga ospital. Natukay unay ti pusok.”

Idiay Taiwan, inkeddeng ti maysa a sister nga agtartrabaho iti banko nga agusar iti baro a pamay-an tapno magutugotna dagiti 20 a katrabahuanna a babbai nga aginteres iti Sao ti Dios. Naminsan, kabayatan ti panaginanada iti aldaw, nangisagana iti naisurat nga imbitasion a “tumabuno iti libre a panagsasarita maipapan iti Biblia a mabalin nga agpaut iti 30 agingga iti 45 a minuto iti kada lawas bayat ti panaginanada kalpasan ti pangngaldaw.” Ti panagsasarita, kinunana, “tulongannakayo a maaddaan iti pamunganayan a pannakaammo maipapan iti  Biblia.” Pinirmaanna ti imbitasion sa nangibati iti kopia iti kada lamisaan iti opisina. Iti dayta a malem, uppat a tattao ti nangawat iti tukonna.

Idiay Thailand, maysa a lalaki nga agnagan Arun ti naginteres kadagiti Saksi ni Jehova babaen ti gayyemna iti panggedanna. “Nadlawko a sipud idi nakikadua ti katrabahuak kadagiti Saksi,” inlawlawag ni Arun, “binalbaliwanna ti biagna, ket kasta met ti kayatko nga aramiden.” Dati nga agsugsugal ken agdodroga ni Arun. Nupay pinadasna nga isardeng dagitoy a bisio, saan a nagballigi. Adda asawana ket iti naminsan napanunotna a no adda anakna nalabit agbalinen a responsable. Ngem idi naipasngay ti balasitangna, saan a nagbalbaliw. “Kamaudiananna,” kinuna ni Arun, “saanen a makaandur ti asawak, ket pinanawannak, ken impaaywanna ti balasitangmi iti ikitna.”

Kabayatan daytoy a nakalkaldaang a paset ti biag ni Arun, inawis ti katrabahuanna a makigimong iti Kingdom Hall. Napan ni Arun, ket nupay bassit ti naawatanna kadagiti palawag, tinagiragsakna ti nabara, nainggayyeman a kasasaad. Kalpasanna, regularen a nakigimong, inawatna ti tukon a panagadal iti Biblia, ken rinugiannan nga iyaplikar dagiti nasursurona. Gapu ta magagaran a mangisubli iti relasionda nga agassawa, kiniddawna dayta iti asawana, ngem di mamati ti baketna a nagbalbaliwen. “Kinasabaak ken inawisko a makiam-ammo kadagiti kabbaro a gagayyemko,” kinuna ni Arun, “ngem nagkedked, a kunana a naallilawak. Nupay kasta, intultuloyko a binisita ken pinaregta. Kalpasan ti agarup lima a bulan, limmukneng ti pusona ket immay nakigimong. Di nagbayag kalpasanna, nagpayadal metten iti Biblia.”

Ita, nagtitiponen da Arun, ni baketna, ken ti balasitangda kas nagkaykaysa ken naragsak a pamilia. Naggiddan a nabautisaran ti agassawa idi 2001 iti kombension distrito idiay Bangkok. Maysa pay, ti lalaki nga ading ni Arun, a dati met nga imoral ti panagbiagna, naginteres met iti naimbag a damag ken maysa itan a di bautisado nga agibumbunannag.

 ◼ EUROPA

Bilang dagiti pagilian: 45

Populasion: 727,550,200

Bilang dagiti agibumbunannag: 1,456,309

Bilang dagiti panangyadal iti Biblia: 647,279

Gapu iti nainkasigudan a sakit, 113 a sentimetro laeng ti katayag ti 25 ti tawenna a ni Eva, nga agnanaed idiay Tiranë, Albania. Ngem nupay adu ti karit, tagtagiragsakenna ti panag-auxiliary pioneer, uray no uy-uyawen dagiti tattao gapu iti kinabassitna. Imbes a makaunget ni Eva, raemenna amin a tao ken kanayon a nakaisem, isu a madlaw dayta dagiti mannakaawat a tattao. Maysa kadagita ti babai nga addaan iti malmaldaangan a balasang nga agtawen iti 26. Impan ti babai ti anakna idiay ospital ken iti nadumaduma a relihion, a manginanama a maagasan. Kalpasanna, iti maysa nga aldaw napaliiwna  ti kinaragsak ni Eva ket inkeddengna a bisitaen. Idi linuktan ni Eva ti ruangan, kiniddaw ti babai no mabalin nga iyadalanna ti balasangna iti Biblia. Siempre, immanamong ni Eva. Di nagbayag, simmayaaten ti salun-at ti balasangna​—isu a kayat met ti ina ti makipagadal. Ita, kanayonen nga ikuyog ni Eva dagiti agina iti gimong, ket nagsayaat ti irarang-ayda iti naespirituan.

Dimmakkel ti maysa nga agtutubo nga agnagan Benjamin iti Kristiano a pamilia idiay Belgium. Nupay kasta, idi agtin-edyer, doble ti panagbiag ni Benjamin. Nupay agpampammarang a sursurotenna dagiti prinsipio ti Biblia, makikadkadua iti grupo dagiti agtutubo a mammartek, agdodroga, ken agsigsigarilio. Magustuan met ni Benjamin dagiti naalas a musika. Di nagbayag, riniribuk dagiti demonio ken naawanan ti puot gapu iti nalabes a panagbartek​—ngem, intultuloyna ti nagdroga. Nabaybay-annan a dalusan ti bagina ket nagsakit iti nakaro. Iti kastoy a nakalkaldaang a biagna, natakuatanna nga awan a pulos ti pannakaseknan kenkuana dagiti imbilangna a gagayyem! Idi laeng nga inusig a naimbag ni Benjamin ti biagna ken no sadino ti pagturonganna. Sisisirib nga inkeddengna ti agsubli kadagidiay pudno a mangay-ayat kenkuana, nga isu ti pamiliana ken ni Jehova.

Ngem iti damo, nasubok ti pangngeddeng ni Benjamin. Riniribuk dagiti demonio, ken kiniddaw ti nobiana a di makitimpuyog kadagiti Saksi. Nagpatulong pay ketdi ti nobiana kadagiti padi a Katoliko ken apostata tapno ikagumaanda nga upayen. Ngem babaen ti naayat, naasi a tulong dagiti nagannak kenkuana ken dagiti panglakayen iti kongregasion, napatanor ni Benjamin ti nabiag a pammati ken Jehova, ket nabigbigna a ti linteg ti Dios ket pudno a “perpekto, mamagsubli iti kararua.” (Sal. 19:7) Nagbanaganna, tinallikudanna ti napalabas a panagbiagna. Simmalun-at ni Benjamin, ket nasarakannan ti pudno a kinaragsak.

Bayat ti panangasabada iti lansangan, inasitgan ti agassawa manipud iti kongregasion a Pranses idiay Britania ti dua  a babbai a taga Zimbabwe. Inlawlawag dagiti Saksi nga agituktukonda iti libre a panagadal iti Biblia ket dinamagda no ammo dagiti babbai ti agsao iti Pranses. Kinunada a dida ammo ngem imbagada a kayatda ti agadal iti Sao ti Dios. Di nagbayag, rinugian dagita a babbai ti timmabuno iti Panagadal iti Libro ti Kongregasion. Idi nalpas ti damo nga itatabunoda iti panagadal iti libro, impakita ti kabsat a lalaki ti kapadasan ni Nathan Muchinguri iti Zimbabwe, a naisalaysay iti panid 20 iti 2002 Tinawen a Libro. Idi nakitada ti retrato da Brother ken Sister Muchinguri iti panid 21, napalalo ti siddaawda. Retrato dayta dagiti apongda! Inlawlawag dagiti babbai nga idiay Zimbabwe, adayoda iti dadduma a pamiliada ket awanen ti komunikasionda kadakuada. Kiniddawda no mabalin a dawatenda ti Tinawen a Libro. Ita, regular a makipagad-adalen ti dua a babbai gapu ta napabilegda iti kinamatalek dagiti apongda.

Bayat nga agserserbi ti dua a sister iti naiputputong a teritoria idiay Czech Republic, naam-ammoda ti managpadagus a babai a nangpauneg kadakuada. Nupay kasta, adda bukodna nga opinion maipapan kadagiti suheto ti Biblia, kas iti kaipapanan ti maaddaan iti “sagsagut ti espiritu.” (1 Cor. 14:12) Kasta met, dina kayat a basaen ti Baro a Lubong a Patarus ti Nasantuan a Kasuratan, ta kaykayatna nga usaren ti Ecumenical a bersion a kukuana. Kalpasan ti kasla awan mamaayna a maysa nga oras a panagsasarita, nagapura dagiti sister a pumanaw tapno makaluganda iti tren. Nabang-aranda a makapanaw iti dayta a narikut a sinarungkaranda. Nupay kasta, natakuatan ti maysa kadagiti sister a nabatina ti Biblia ken kuadernona iti balay ti babai, isu a masapul nga agsublida sadiay. Anian a nagsayaat a sorpresa ti naammuanda! Imbaga ti babai a ginundawayanna a sinukimat ti Biblia ti sister ket nagustuanna ti kalidad ti pannakaipatarus, dagiti cross-reference, ken ti konkordansia. Kalpasanna, nagkiddaw no mabalin a maaddaan iti Baro a Lubong a Patarus. Maysa pay,  immanamong nga agpayadal iti Biblia. Sipud idin, nakipagadal metten ti inana.

Maysa a kabsat a babai idiay Reykjavík, Iceland, ti agtartrabaho iti Marine Research Institute a mangipapaay iti programa a panagsanay iti piskeria. Iti di pay nabayag, 14 a tattao iti nadumaduma a pagilian ti timmabuno iti innem a bulan a kurso. Intukon ti sister iti kada agsansanay ti libro nga Is There a Creator Who Cares About You? Nangala iti kopia a Tsino, Ingles, Portugues, Español, ken Vietnamese. Amin dagiti 14 a tattao inawatda ti libro. Naragsakan ti maysa a lalaki ken babai a taga Vietnam idi nakitada ti publikasion iti bukodda a lenguahe. “Kasla diak patien!” kinuna ti lalaki. “Masdaawak unay. Kasanoka a nakaala iti libro?” Maysa a lalaki a taga Uganda ti pamiliaren iti libro ket inrekomendana dayta iti sabsabali. Kinuna ti maysa a babai a taga Cuba a kayatna ti mangala iti maysa agsipud ta ti 13 ti tawenna a balasitangna ket nangrugin nga agimtuod kadagiti narigat a saludsod maipapan iti biag.

Sakbay a nagawid dagiti nagsanay kadagiti pagilianda, impakaammo kadakuada ti sister a nangikabil kadagiti literatura (10 a libro a Pannakaammo, 30 a magasin, ken 10 a broshur) iti maysa a lamisaan iti kuarto a pagadalan tapno adda basaenda iti eroplano inton agawidda. Siempre, ti immuna nga inaramidna iti agsapa ti Lunes idi nakapanawdan ket napan iti lamisaan. “Kunak no adda pay nabati a libro a Pannakaammo ken magasin,” kinunana, “ngem awan a pulos ti nabati iti lamisaan!”

Saan nga interesado iti Dios, ti maysa nga agtutubo idiay Latvia, nga awagantayo iti Arthur. Ngem dina awaten a bakes ti nagtaudan dagiti tattao. Idi 1996, adda nakaro a riribuk a nakairamanan ni Arthur ket naibalud. Idiay a rinugianna nga inutob a naimbag ti maipapan iti biag. Idi sinarungkaran dagiti dadakkelna, pinaregtada nga agbasa iti Biblia, ta pampanunotenda a mabalin a makatulong kenkuana. Kalpasanna, iti  maysa nga aldaw idi 1998, bayat nga agsursurat ni Arthur, inyawatan ti kaseldana iti maysa a libro a paglandaganna. Dayta a libro naiparna a ti Mabalinmo ti Agbiag nga Agnanayon iti Paraiso a Daga. Nagusioso ni Arthur isu nga inukradna, ket nagustuanna dayta. Inungpotna a binasa ti libro iti tallo nga aldaw. Adda sabali pay a kaseldana nga addaan iti libro a Pannakaammo. Idi nakitana nga interesado ni Arthur iti Biblia, intedna ti libro kenkuana. Intedna met ti address ti Saksi nga am-ammona.

Sinuratan ni Arthur ti Saksi ket kalpasanna, narugian ti panagadal iti Biblia babaen ti surat. Idi nawayawayaan iti pagbaludan idi Abril 2000, dagus a nakigimong iti kongregasion. Ket dagiti ngay dadakkelna, a nangparegta kenkuana nga agbasa iti Biblia? Siempre, inranud ni Arthur kadakuada ti maipapan iti kabbaro a pammatina. Ania ti resultana? Rinugianda met ti nakipagadal iti Sao ti Dios. Agasenyo ti rag-oda idi mabautisaranda a tallo iti isu met la nga aldaw ti espesial nga asamblea idi Marso 2002!

Maysa nga agtutubo a siruhano ti orthopedic idiay España ti nagadal iti kinapadi iti maysa a seminario ti relihion. Gapu ta naburiboran, kalpasan ti tallo a tawen rimmuar iti seminario kas maysa nga ateista. Nupay negatibo ti panangmatmatna kadagiti Saksi ni Jehova, magagaran a mangammo no kasano a dagiti kakasta a “di edukado” a tattao ket nagsayaat ti pannakaawatda iti Kasuratan, idinto ta bassit laeng ti ammona uray adu a tawen a nagadal iti seminario. Kimmaro ti panaginteresna kadagiti Saksi idi napasaranna ti panangidumduma dagiti kameng ti ospital. Naipalagip kenkuana ti panangidumduma a mapaspasaran dagiti Saksi no dadduma. Kalpasan dayta a kapadasan, inawat ti siruhano ti libre a panagadal iti Biblia. Di nagbayag, nagustuanna ti maad-adalna isu a nagadal iti mamitlo iti makalawas! Rinugianna met a tabunuan amin a gimong ken agpaset iti Teokratiko nga Eskuelaan ti Panagministro. Itay laeng nabiit, nabautisaranen.

 ◼ AFRICA

Bilang dagiti pagilian: 56

Populasion: 739,543,571

Bilang dagiti agibumbunannag: 915,262

Bilang dagiti panangyadal iti Biblia: 1,550,572

Idiay Benin, kasta unay ti kinaanep dagiti kakabsat nga agibangon iti Kingdom Hall, a nangipaay iti nagsayaat a pammaneknek. Iti dedikasion ti maysa a Kingdom Hall, kinuna ti maysa a nalatak a miembro ti lokal a komunidad iti maysa kadagiti Saksi ni Jehova: “Ti simbaanyo ti kapipintasan a lugar a pagdaydayawan ditoy, ket kanayonto a kasta. Apay a nakunak ti kasta, idinto ta maysaak a napeklan a Katoliko? Nabiit pay, adda 17,000,000 CFA [$23,000, U.S.] a naited iti komunidadmi a Katoliko tapno maileppas ti konstruksion ti simbaanmi, a nairugi idi dekada 1950. Ngem sabali ti nangusaran dagiti klero.  Maysa a komunidad dagiti Katoliko iti sabali a paset ti siudad ti nakaurnong iti 3,000,000 CFA [$4,000, U.S.] tapno pagibangon iti simbaan iti lugarda, ngem ‘naawan’ met daytoy. Isu a makunak a daytoy ti kapipintasan a pasdek iti daytoy a siudad ket awanto ti makaartap.”

Iti dadduma a pagilian, marigatan dagiti kabbaro a mangsalimetmet iti kinapudno ti Biblia gapu iti pannakaigamerda kadagiti anting-anting. Usigenyo, kas pagarigan ti maysa a pamilia idiay Côte d’Ivoire nga inaldaw nga addaan iti ritual iti sanguanan ti anting-antingda. Idi adda maysa kadagiti balasitang a nangsalimetmet iti kinapudno ti Biblia ken saan a nakiraman iti palso a panagdayaw, nagbuteng ti pamilia di la ket ta mailunod. Nupay kasta, nagtalinaed a natibker ti balasitang, isu a binusor ken pinapanawda iti pagtaenganda. Ngem di nagimpen iti sakit ti nakem iti pamiliana no di ket intultuloyna a binisita ida.

Nagresulta dayta iti panaginteres ni apongna a baket iti Biblia, ket kiniddawna pay nga agsubli ti apokona iti pagtaenganda, isu a nagsubli. Nagtultuloy a rimmang-ay ni apongna a baket iti naespirituan ket nabautisaran idi agtawen iti 62. Gapu ta nasdaaw iti naadal ti baket, rinugian met ti ina ti balasitang ti nagadal iti Sao ti Dios, ket ita mangaskasaba metten iti sabsabali. Wen, tallo a kaputotan ti nawayawayaan iti palso a panagdayaw, gapu laeng ta sinalimetmetan ti balasitang ti kinatarnawna ken ni Jehova ken intultuloyna nga impakita ti ayat iti pamiliana.

Idiay Mozambique, regular a bumisita dagiti kakabsat kadagiti pagbaludan tapno mangyadalda iti Biblia kadagiti balud. Idi 2001, addada naglibas iti maysa kadagitoy a pagbaludan. Ngem, dagiti balud a tumabtabuno iti panagadal dida kinayat ti naglibas. Napaliiw daytoy dagiti autoridad ket kinomendaranda dagiti Saksi ni Jehova gapu iti ar-aramidenda. Ita, parparegtaen dagiti autoridad ti amin a balud a makipagadal kadagiti kakabsat. Gapu ta simmayaat ti kababalinda, naksayan ti sentensia ti dua a balud. Segseggaan ti maysa kadakuada ti pannakabautisarna iti sumaganad a kombension distrito.

 Agnanaed idiay Namibia ti duapulo ket pito ti tawenna a ni Judith, a nairaman iti aksidente ti lugan isu a naparalisado manipud tengnged agingga iti sakana. Kayatna idin ti agpakamatay, a pampanunotenna: ‘Apay a napasamak daytoy kaniak?’ Sinarungkaran ti nadumaduma a relihion ken inkararaganda tapno makapagna manen. Idi saan a nasungbatan dagiti kararagda, imbagada ken Judith a mabalin nga isu ket dusdusaen ti Dios. Ad-adda manen a napanunot ni Judith ti agpakamatay. Ngem umuna pay a kayatna nga ammuen no apay nga isut’ dusdusaen ti Dios. Gapuna, iti maysa nga aldaw kiniddawna ken nanangna nga awisenna ti pastor ti simbaanda iti pagtaenganda. Idi ur-urayen ni Judith ti pastor, simmarungkar dagiti Saksi ni Jehova. Inawat ni Judith ti naitukon a panagadal iti Biblia nga usarenda ti libro a Pannakaammo, a manginanama a masungbatan ti Biblia dagiti makaburibor a saludsodna. Idi naadalna ti kapitulo 8, “Apay nga Ipalubos ti Dios ti Panagsagaba?,” naammuanna a saan nga aramid ti Dios ti pannakaaksidentena. “Agasenyo ti pannakabang-ar ken ragsakko idi naammuak a saan nga agtaud ken ni Jehova dagiti dakes a bambanag!” kinunana. Intultuloy ni Judith ti nagadal, indedikarna ti biagna ken Jehova, ket ita segseggaanna ti baro a sistema tapno matagiragsaknanto manen ti nasayaat a salun-at.

Kabayatan ti panangikisap ti puli idiay Rwanda idi 1994, maysa nga agtutubo a babai nga agnagan Chantal ti nagkamang iti kabangibang a Burundi. Nakasarak sadiay iti libro a Mabalinyo ti Agbiag nga Agnanayon iti Paraiso a Daga ket inungpotna a binasa dayta. Idi nakasublin idiay Rwanda, dina masarakan dagiti Saksi agsipud ta agnanaed ti pamiliana iti naiputputong a lugar. Nupay kasta, nasabet ti inana ti dua nga agibumbunannag ti Pagarian a mangaskasaba iti tiendaan. Tapno maam-ammoda ni Chantal, insuratda iti papel dagiti planoda nga aldaw a kaaddada iti tiendaan ket intedda iti ina ni Chantal. Iti maysa kadagita nga aldaw nagtugaw ni Chantal iti ruangan ti tiendaan, nga iggemna ti papel tapno makita ti amin a lumabas. Anian a ragsakna idi nakita dagiti kakabsat ket nakiam-ammoda  kenkuana! Gapu ta nakitada a pudno nga interesado, inawisda iti umadani a Memorial, a tinabunuan ni Chantal, uray pay no masapul a magna iti dua nga aldaw tapno makagteng iti lugar a paggigimongan!

Sipud idin, regularen a makigimgimong ni Chantal, nupay adayo. Nakalkaldaang ta bimmusor kenkuana ti pamiliana. Iti naminsan, buneng pay ketdi ti inkamat kenkuana ti maysa a manongna tapno pumanaw iti balay! Ngem sinalimetmetan ni Chantal ti kinatibkerna. Makatawen kalpasanna, as-asidegen ti pakigimonganna, nupay walo nga oras pay a magna. Nupay kasta, iti damo a gundaway, addan mangyad-adal ken Chantal. Idi agangay, indedikarna ti biagna ken Jehova, ket maysa itan a regular pioneer. Ket ti ngay pamiliana? Bueno, nagbalbaliwen ti panangmatmatda. Ti manongna a nangpapanaw kenkuana ket maysa itan a regular pioneer, ti adingna a lalaki ket nabiit pay a nabautisaran, ken maysan a di bautisado nga agibumbunannag ni nanangna. Kasta met, addan naiputputong a grupo a naipasdek iti lugarda, isu a lima a minuto laengen ti pagnaenda a mapan makigimong.

Maysa a naregta a sister ni Thembisile, nga agnanaed iti asideg ti maysa a kraal, wenno purok, a pagnanaedan ti pamilia ti ari, idiay Swaziland. Kayatna ti mangasaba kadagiti agnanaed iti kraal, ngem narigat gapu ta nainget ti pannakaguardiada. Kalpasan ti panangikararagna iti dayta, timmured ket napan iti kraal. Kinasabaanna dagiti guardia, ket inawat ti maysa ti broshur a Mabalinmo ti Makigayyem iti Dios! Kalpasan ti panangpalutpot ken panangrekisa kenkuana, pinaunegda, ket naragsakan unay. Ad-adda pay a nasdaaw ni Thembisile iti kinamannakigayyem dagiti agnanaed sadiay. Kanayonen a mangaskasaba iti dayta a teritoria ken nakairugin iti tallo a panagadal iti Biblia. Maysa pay, maragsakan dagiti polis a mangpasangbay kenkuana. Kinapudnona, maysa nga aldaw kinuna kenkuana ti guardia: “Dika agalumiim Madam; sumrekka laeng. Nagsayaat ti ar-aramidem ditoy.”

 ◼ DAGITI KONTINENTE TI AMERICA

Bilang dagiti pagilian: 56

Populasion: 807,517,534

Bilang dagiti agibumbunannag: 3,023,062

Bilang dagiti panangyadal iti Biblia: 2,676,288

Iti bassit nga ili idiay Argentina, nakita ti dua nga special pioneer ti agassawa a mangidurduron iti kariton a nakailuganan ti nasugatan nga aso. Intukon dagiti payunir nga iluganda ida ken ti aso a mapan iti beterinario. Siyayaman nga inawat ti agassawa, nangruna ta awan kadagiti kaarrubada ti nangitukon iti tulong. Naammuan dagiti payunir a ti lalaki ket katekista a Katoliko ken makipaspasetda nga agassawa iti amin a prosesion iti lugarda a pangidaydayaw kadagiti santo. Ngem ti kinapeklanda iti Katoliko di nakalapped kadakuada nga umawat kadagiti magasin a Pagwanawanan ken Agriingkayo! Kalpasan  ti agarup dua a tawen nga isasarungkar iti daytoy nga agassawa, inawis ida dagiti payunir iti Memorial. Nagpigsa ti tudo iti daydi a rabii, ngem dimteng ti agassawa ket nasdaawda iti nabara a pannakapasangbayda. Maysa pay, imbagada a damo unay a naawatanda ti kaipapanan ti Pangrabii ti Apo. Ita, tagtagiragsakendan ti regular a panagadal iti Biblia ken tumabtabunoda iti amin a gimong, a saanda a madanagan iti mabalin nga ibaga dagiti Katoliko a kaarrubada.

Idi mangaskasaba ti maysa a payunir a babai ken ti sabali pay a Saksi idiay Barbados, nalabsanda ti maysa a babai a nakatakder iti ruanganna. Kinasabaanda, ngem nasdaawda idi pastrekenna ida a kasla adda pinadpadaananna a sumangpet. Kinunana: “Umunegkayo. Alaek ti Bibliak.” Immuneg dagiti kakabsat, nakikatugawda iti bumalay, ken indemostrada ti panagadal, ken inusarda ti leksion 1 iti broshur a Kalikaguman. Kalpasanna, dinamag ti babai iti payunir no isu daydiay nagtelepono ken nangitukon iti libre a panagadal iti Biblia iti dayta nga agsapa. “Imbagak kenkuana a saan a siak daydiay,” inlawlawag ti payunir. “No asinoman ngarud ti immawag, nalawag a saan a dimteng. Ngem maragsakankami ta apagisu a dimtengkami iti 11:30 t.b., nga isu ti nagtulaganda a panagadalda koma.” Rumangrang-ayen ti babai ken makigimgimongen.

Mabalin a nabunga a teritoria a pangasabaan dagiti tiendaan iti bangketa. Isalaysay ti maysa a misionera idiay Bolivia: “Nangipaima ni lakayko iti tract iti maysa a babai a nakakariton dagiti lakona iti tiendaan a paglakuan dagiti mannalon. Mannakigayyem, isu a sinubliak ken intukonko ti panagadal iti Biblia, nga inusarko ti broshur a Kalikaguman. ‘Agadalta aya ditoy?’ dinamagna. ‘Wen, awan problema,’ kinunak. ‘Naruamakon iti kastoy.’ Isu a no sumangpetak, itedna ti bangkitona, ket agadalkami iti abay ti karitonna. No adda gumatang, lakuanna ida, kalpasanna ituloymi ti agadal.”

 Maysa a babai idiay Canada ti nakagun-od iti Baro a Lubong a Patarus ti Nasantuan a Kasuratan manipud iti maysa a gayyem. Tinagiragsakna a binasa dayta ket kayatna a maammuan ti ad-adu pay. Gapuna, nagkonsulta iti opisial a web site dagiti Saksi ni Jehova iti Internet (www.watchtower.org) ket kalpasanna, nagsurat tapno agpayadal iti Biblia ken nagkiddaw iti libro a Pannakaammo. Idi simmarungkar ti dua a sister ken intedda ti libro, pinetpetanna dayta ket imbagana a maungpotna a basaen ti libro iti kabigatanna! Iti karabyanna, rinugiannan ti makigimong ket dagus a nalag-an ti riknana a makilangen kadagiti kakabsat. Napartak ti irarang-ayna iti naespirituan ket maysa itan a di bautisado nga agibumbunannag ken segseggaannan ti agpabautisar.

Idiay Colombia nabaldado ti maysa a babai nga agnagan Sol isu a naidalit. Dina kayat a makita ti siasinoman malaksid dagiti miembro ti pamiliana. Maysa nga aldaw, adda maysa a Saksi ni Jehova a kaarrubana a nangted iti ina ni Sol kadagiti kopia Ti Pagwanawanan ken Agriingkayo! tapno itedna ken Sol. Idi agangay, immanamong ni Sol a makipagkita iti kaarrubana, a nangitukon iti panagadal iti Biblia kenkuana. Inawat ni Sol dayta, ket kalpasan ti makatawen, tinabunuanna ti Memorial. Dayta ti damo unay nga iruruarna iti balay kalpasan ti pito a tawen. Dua nga aldaw kalpasanna, nakiasamblea iti damo a gundaway. Nupay di makatugaw, mangaskasaba itan ni Sol. Kasano? Ilugan dagiti kakabsat iti naisangsangayan a kama a nairanta nga agpaay kenkuana. Gapu iti pagwadan ken pammaregta ni Sol, nabautisaranen ti inana ket payunir metten ti dua kadagiti kakabsatna.

Sinarungkaran ti kabbaro nga special pioneer nga agassawa idiay Costa Rica ti maysa a babai iti teritoriada. Idi simmangpetda, imbagada kenkuana a nakaawat ti sanga nga opisina dagiti Saksi ni Jehova iti lugarda iti awag a naggapu iti manugangna a babai, a maysa a Saksi idiay Estados Unidos, nga agkidkiddaw a sarungkaranda ti katuganganna a babai. Kinuna  ti agassawa a payunir: “Nasdaawkami ta agsangit metten daytoy 65 ti tawenna a baket. Kunana a kasla di mamati nga addakamin gapu ta nabiit pay a nagsaritada iti manugangna, a nangparegta kenkuana nga umimdeng iti ibagbaga dagiti Saksi. Dina pulos pagarupen a mapankami a dagus.”

Sigun kadagiti payunir, daytoy ti damo unay a kayat ti baket ti makisarita kadagiti Saksi. Napeklan ngamin a Katoliko, ket kadagiti napalabas a 12 a tawen inadalna a naimbag dagiti pannursuro ti Katoliko tapno isurona kadagti sabsabali. Naragsakan dagiti payunir a nanglawlawag iti adu a saludsodna maipapan iti Biblia ken kadagiti Saksi ni Jehova. Kalpasanna, immanamong nga agpayadal iti Biblia. Kayat met ni lakayna ken ti balasangna a maammuan ti ad-adu pay maipapan iti Sao ti Dios.

Kuna ti maysa a miembro ti pamilia ti Bethel idiay Puerto Rico: “Inyurnosko ti mangipan iti Hulio 8, 2002, nga Agriingkayo! a napauluan ‘Dagiti Polis​—Apay a Kasapulantayo Ida?’ iti hepe iti hedkuarter ti polis. Naayatan kadagiti artikulo ti magasin ket inrekomendana nga ikkak ti mayor ken ti dadduma pay a presinto iti dayta a lugar. Kinapudnona, inyurnos ti maysa nga opisial nga itulodnak babaen iti lugan ti polisia tapno makapanak iti amin a dadduma pay a presinto. Maysa pay, nangted met daytoy nga opisial iti autorisasion a mangipanak kadagiti masanguanan nga artikulo kadagidiay polis nga adda iti babaenna. ‘Daytoy ti mangipaay iti sikolohikal ken naespirituan a tulong a kasapulan ti polisia,’ kinunana.” Iti makabulan, nasarungkaran daytoy a Bethelite ti walo a presinto, ket adu nga opisial ti nagkiddaw kadagiti kanayonan a magasin. Nakaipaima iti 164 a magasin ken nanayonan ti lima a tattao ti rutana iti magasin.

Iti isla ti Trinidad ken Tobago, maysa a babai a nalatak a miembro ti Nazarene Church iti 25 a tawen ti timmabuno iti palawag ti manangaywan ti sirkito gapu ta inawis ti katrabahona. Idi nalpasen ti gimong, inasitgan ti manangaywan ti sirkito  ket kinasaritana iti nainggayyeman. Nagsiddaaw ta iti kapiliana, makilangen laeng dagiti tattao kadagiti kapulida ken kapadada ti kasasaad iti kagimongan. Kinapudnona, gapu ta saanda nga agkapulian ken lakayna, di naasi dagiti karelihionna kenkuana. Gapuna, ti napaliiwna idiay Kingdom Hall ken ti panangparegta ti manangaywan ti sirkito ti nangtignay kenkuana nga agpayadal iti Biblia. Iti innem a bulan, nagbalin a di bautisado nga agibumbunannag, a mangipapaay iti 70 agingga iti 100 nga oras iti ministerio iti kada bulan. Nabautisaran iti “Dagiti Naregta a Manangiwaragawag iti Pagarian” a Kombension Distrito idi 2002 ket namnamaenna ti agbalin a regular pioneer. Tultulonganna met ti balasitangna nga agtawen iti pito, nga agpaspaseten iti Teokratiko nga Eskuelaan ti Panagministro.

Idiay Uruguay, maysa a negosiante nga aglaklako kadagiti kuentas nga addaan krusipiho iti binalaybalay ti naisar-ong iti pagtaengan ti maysa a Saksi. Ginundawayan ti sister ti nangilawlawag manipud iti Biblia no apay a saan a gumatang iti produktona. Rinaem ti negosiante dagiti imbaga ti sister ken inyebkasna pay ti panaginteresna kadagiti naespirituan a banag. Kinapudnona, imbagana nga adun a relihion ti nakitimpuyoganna tapno masungbatan dagiti saludsodna, ngem di nasungbatan. Idi agangay, imbagana nga ad-adda nga interesado dagiti relihion iti kuarta ngem iti tumulong kadagiti tattao iti naespirituan. Sakbay a pimmanaw, inawis ti sister a makigimong iti Kingdom Hall.

Dayta ti naudin a pannakakitana kenkuana agingga nga agarup makatawen kalpasanna, immay manen iti pagtaenganna. Nasdaaw ti sister idi kinuna ti negosiante: “Saanak nga immay tapno lakuanka no di ket tapno ibagak kenka nga addaakon iti kapitulo 15 ti libro a Pannakaammo.” Inlawlawagna a makipagad-adal ken makigimgimongdan a sangapamiliaan. Idi pumanawen, kinunana: “Agkikitatayto iti asamblea iti sumaganad a lawas.”

[Ladawan iti panid 43]

New Zealand

[Ladawan iti panid 43]

Tahiti

[Ladawan iti panid 43]

Papua New Guinea

[Ladawan iti panid 47]

Thailand

[Ladawan iti panid 47]

India

[Ladawan iti panid 47]

Japan

[Ladawan iti panid 51]

Britania

[Ladawan iti panid 51]

Albania

[Ladawan iti panid 51]

España

[Ladawan iti panid 56]

Namibia

[Ladawan iti panid 56]

Benin

[Ladawan iti panid 56]

Congo (Kinshasa)

[Ladawan iti panid 60]

Canada

[Ladawan iti panid 60]

Tobago

[Ladawan iti panid 60]

Bolivia