Surat ti Bagi a Manarawidwid

Patgenmi a Kakabsat:

ANIAN a ragsakmi nga agsurat kadakayo! Komendarandakayo gapu iti ayat ken panagsakripisio nga ipakpakitayo. Makitayo kadagiti panid daytoy Tinawen a Libro nga adu dagiti nagsayaat a naaramidantayo iti napalabas a tawen serbisio. Nakabusbostayo manen iti nasurok a sangabilion nga oras iti panangasaba ken panangisuro, a direkta a mangparparegta kadagiti tattao nga umadani ken ni Jehova. Saan aya a pakaidayawan ti agbalin a katrabahuan ti nadayag a Dios ken nailangitan nga Amatayo?​—1 Cor. 3:9.

Bayat a pampanunotentayo ti trabaho iti masanguanan, agtalekkami nga itultuloyyo a tuladen ti regta ken pammati dagiti adipen ti Dios a nailanad iti Biblia ti pakasaritaanda. Kas pagarigan, magagaran ni apostol Pablo a mangaramid iti amin a kabaelanna a mangidur-as iti intereses ti Pagarian. Agparang nga insuratna ti umuna a suratna iti kongregasion Kristiano sadi Corinto iti maudi a tawen a kaaddana idiay Efeso. Maipapan kadagiti planona, insuratna: ‘Agtalinaedak ditoy Efeso agingga iti piesta ti Pentecostes; ta naluktan kaniak ti maysa a dakkel a ruangan a mangiturong iti panagaramid, ngem adu dagiti bumusbusor.’​—1 Cor. 16:8, 9.

Plano ni Pablo ti mapan idiay Macedonia ken Corinto. Nupay kasta, nabigbigna nga adda gundawayna a mangaramid iti napateg a trabaho no agtalinaed pay laeng idiay Efeso. Nalaing a makibagay ni Pablo; nakitana nga adda nasayaat a gundawayna a mangidur-as iti intereses ti Pagarian iti mismo nga ayanna, isu a binaliwanna ti iskediulna. Silulukat kenkuana ti dakkel a gundaway nga agtrabaho, ket sigagagar ni Pablo a mangusar iti dayta.

Adu a trabaho ti kasapulan tapno maikasabana ti naimbag a damag ken mapabilegna ti kongregasion idiay Efeso. Idi agangay,  imbaga ni Pablo kadagiti panglakayen iti kongregasion iti dayta a siudad: “Saanko a minedmedan ti panangibaga kadakayo ti aniaman kadagiti banag a makagunggona wenno uray ti panangisuro kadakayo iti publiko ken iti binalaybalay. Ngem naan-anay a nangsaksiak agpadpada kadagiti Judio ken kadagiti Griego maipapan ti panagbabawi iti Dios ken ti pammati ken Apotayo a Jesus.”​—Ara. 20:20, 21.

Kasta met, adu kadakayo a patpatgenmi a kakabsat ti nanggundaway kadagiti oportunidad a nailukat kadakayo. Iti napalabas a tawen serbisio, iti promedio, 798,938 ti nakabael a nangyurnos kadagiti aktibidadda tapno makapagpayunirda. Napan ti dadduma kadakayo kadagiti adayo a lugar tapno makapagserbi kas misionero. Sireregta nga isaksaknapyo ti naimbag a damag ken pabpabilgenyo dagiti kongregasion. Nagadal ti dadduma kadakayo iti sabali a pagsasao tapno matulonganyo dagiti ganggannaet nga agnanaed iti asidegyo. Adda met dagidiay nangyurnos kadagiti aktibidadda tapno makapagtrabahoda iti di naituding a teritoria wenno makapagserbi iti lugar a dakdakkel ti pakasapulan. Natakuatan pay ketdi ti dadduma nga adda silulukat a dakkel a gundaway iti eskuelaan, panggedan, wenno iti dadduma pay a kasasaad a mabalinda ti mangasaba a sieepektibo, kas ti panangusar iti telepono. Paneknekan dagiti kapadasan iti intero a lubong a sigagagar dagiti agtutubo ken nataengan nga adipen ti Dios nga agsapsapul iti gundaway a mangipakaammo iti kinapudno kadagiti tattao iti sadinoman a lugar.

Masiguradoyo a makitkita ken apresiaren ni Jehova ti panangikagumaanyo. Kastoy ti kuna ti Biblia: “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna.” (Heb. 6:10) Itultuloyyo nga aprobetsaren dagiti kasasaad a mangted kadakayo iti gundaway a mangidur-as iti nasin-aw a panagdayaw. Mabalin a mapalawa ti dadduma kadakayo ti ministerioyo. Mabalintayo amin nga ikagumaan a pagbalinen nga ad-adda nga epektibo ti ministeriotayo.

Adda dagiti bumusbusor iti panangaskasabatayo. Lagipenyo a kalpasan a dinakamat ni Pablo ti dakkel a ruangan a mangiturong iti  trabaho a nailukat kenkuana, insuratna: “Adu dagiti bumusbusor.” Para ken Pablo, mairaman dagiti Judio ken Gentil kadagidiay a bumusbusor, a dadduma ti direkta a nangbusor kenkuana ken adda met dagidiay sililimed a nangisikat kenkuana.​—Ara. 19:24-28; 20:18, 19.

Kasta met laeng ti maipaspasango kadatayo ita. Bayat nga umad-adanitayo iti pannakadadael daytoy dakes a sistema, manamnamatayo ti nakarkaro pay a pannakaidadanes. Napno ni Satanas iti “dakkel nga unget” wenno pungtot, ket dagidiay agserserbi iti Dios ti nangnangruna a nakaiturongan dayta a pungtot. (Apoc. 12:12) Diyo pulos liplipatan a ni Satanas “ti agturay iti lubong.” Kinuna ni Jesus kadagiti adalanna: “No pasetnakayo koma ti lubong, ti lubong maayatan iti kukuana. Ita agsipud ta saankayo a paset ti lubong, no di ket pinilikayo manipud iti lubong, gapu iti daytoy guraennakayo ti lubong.”​—Juan 14:30; 15:19.

Determinadotayo a ditay palubosan ti siasinoman a mangpakapuy iti pammatitayo iti Dios wenno mangpaginad iti trabahotayo a panangasaba. Ammotayo nga agtultuloy nga adda dagidiay bumusor ken mangisikat kadatayo. Ngem itultuloytayo latta nga ikasaba ti naimbag a damag ti Pagarian, nga agtalektayo a dadaelento ni Jesus ni Satanas ken dagiti buyotna iti panawen nga inkeddeng ni Jehova. Dagiti bumusbusor saanda a napagulimek ni apostol Pablo; ket saanda met a mapagulimek dagiti adipen ni Jehova ita. Nupay makapungtot ni Satanas ken ti lubong, sibibileg nga agtigtignay ti espiritu ni Jehova iti ilina. Anian a makaparagsak a maammuan a dimmanonen iti 6,304,645 ti baro a kangatuan a bilang dagidiay mangiwarwaragawag iti naimbag a damag!

Ikarkararagmi nga itultuloyyo nga aprobetsaren dagiti gundaway a mangidur-as iti intereses ti nadayag a Pagarian ni Jehova. Inanamaenyo ti naayat a pannakaseknanmi iti tunggal maysa kadakayo bayat nga “abagan-abaga” nga agserbitayo iti Kangatuan a Dios a ni Jehova.​—Sof. 3:9.

Dagiti kakabsatyo,

Bagi a Manarawidwid Dagiti Saksi ni Jehova