Dagiti Tampok iti Napalabas a Tawen

IMPAKPAKAUNA ni Jehova nga “iti kamaudianan a paset dagiti aldaw,” sumang-atto dagiti tattao iti piguratibo a bantayna tapno isurona ida. (Mik. 4:1, 2) Idi napan a tawen, agtultuloy a natungpal dayta a padto bayat nga umad-adu ti nagtignay a maitunos iti teksto para iti tawen 2003, “Umadanikayo iti Dios, ket isu umadaninto kadakayo.” (Sant. 4:8) Ti kangrunaan a probision a nangtulong iti adu tapno sukayenda ti nasingsinged a relasion ken ni Jehova ket dagiti serye ti “Idayawyo ti Dios” a Distrito ken Internasional a Kombension.

Dagiti “Idayawyo ti Dios” a Kombension

“Tangay ti awan biagna a parsua maidaydayawna ni Jehova, datayo nga addaan iti panunot ken makapagsao nangnangruna a  rumbeng nga idaydayawtayo ti Naindaklan a Namarsua kadatayo!” kinuna ti maysa kadagiti ispiker iti nadakamat a kombension. Inadawna ti Apocalipsis 4:11, a kunana: “Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin a bambanag, ket gapu iti pagayatam napaaddada ken naparsuada.”

Dagiti “Idayawyo ti Dios” a Kombension ket nangipaay iti naisangsangayan a gundaway a mangidayaw ken ni Jehova, gapu kadagiti 32 nga internasional a panagtataripnong. Naangay dagitoy idiay Australia, Canada, Chile, Denmark, Espania, Estados Unidos, Ghana, Hawaii, Hungary, Japan, Mexico, South Africa, Switzerland, ken Ukraine. Adu a misionero ken dadduma pay nga agserserbi iti sabali a pagilian ti nakapagsubli iti pagilianda, a sadiay ti nakainterbiuanda maipapan iti trabahoda a mainaig iti Pagarian kadagiti nakaad-adayo a teritoria. Timmabuno met kadagitoy a kombension dagiti rinibu a delegado manipud kadagiti sabali a pagilian.

Ti naisangsangayan a nagragsakan dagiti internasional a delegado ket ti panangbisitada kadagiti sanga nga opisina kadagiti nangsangaili a pagilian. Naaddaan ti sanga nga opisina iti Estados Unidos iti pribilehio a nangsangaili iti nasurok nga 6,750 a delegado manipud iti 36 a pagilian, a sinerbianda ida iti agarup 15,000 a pannangan! Kalpasan ti maysa a pangngaldaw, dagiti sanga-bus a kakabsat manipud South Africa kinantaanda ti pamilia ti Bethel iti uppat a boses iti innem a pagsasao: Aprikaans, Ingles, Sepedi, Sesotho, Xhosa, ken Zulu. Makatukay unay iti rikna ken nagpintas ti panangkantada nga uray la nakalua dagiti adu nga agdengdengngeg.

Iti sabali a grupo dagiti agpaspasiar, maysa a delegado a ti lapel card-na ket mangipakita a nagbiahe iti kagudua ti lubong, kinunana: “Maminsan laeng iti unos ti panagbiagko a mapadasak ti kastoy a pannakikadua kadagiti kakabsat iti naespirituan. Diakto pulos a malipatan daytoy. Pangramanan daytoy iti baro a sistema.” Ti kabsat a lalaki manipud idiay Britania a nangpanaw iti  kinapudno idi agtawen iti 17, ngem nabiit pay a nagsubli ket natukay ti riknana idi nakitana ti lamina maipapan iti bayanggudaw nga anak. Kalpasanna, bayat a tagtagiragsakenna ti pangngaldaw a kadua ti pamilia ti Bethel iti Brooklyn, inut-utobna ti kinamanangngaasi ni Jehova, ket nagarubos ti lua kadagiti matana. Kinuna ti maysa a kabsat a lalaki manipud idiay Espania nga iti uneg ti 29 a tawen a panagasawada, pulos a saan pay a nakita ni baketna a nagsangit. Ngem nagsangit idi a ti grupoda nga agpasiar ket inabrasa ti naragsak a bunggoy dagiti Saksi iti internasional nga eropuerto idiay Houston, Texas.

Kadagiti dadakkel a kombension, mabalin a narigat ti mangbirok kadagiti nasayaat a pasilidad a nainkalintegan ti abangna. Ngem masansan a makatulong ti naimbag a reputasion a naipasdek dagiti Saksi ni Jehova iti napalabas. Makita daytoy iti report ti maysa a sanga nga opisina: “Kalpasan ti naanep a panagbirok, nakasarakkami iti maysa laeng a pasilidad a makalaon iti agarup 50,000 a delegado a manamnama a tumabuno iti kombension. Ngem naammuan dagiti kakabsat a nakanginngina ti abang idi nakasaritada dagiti opisial ti istadium. Sumagmamano nga aldaw kalpasan ti panagimtuod dagiti pannakabagi ti sanga, napan dagiti isu met la nga opisial ti istadium iti sanga nga opisina ket kiniddawda ti kanayonan a panagsasarita. Idi agangay, maysa kadagiti nabayagen a manedyer ti nagkuna: ‘Idi damo, saanmi unay a naawatan ti ibagbagayo. Ngem ita ta naawatanmin ti maipapan iti kombensionyo ken ti kabaelanyo a mangorganisar kadagiti bambanag, magagarankami unay iti dayta. Apresiarenmi ti nangato a kalidad ti panangorganisaryo, ti detalyado a panagplanoyo, ken ti kinapropesionalyo.’” Kas resultana, dagiti Saksi ni Jehova nausarda ti istadium kas pakaangayan ti kombensionda ken nainkalintegan ti abangna.

Dagiti Baro a Publikasion a Nairuar iti Kombension

Naanepka kadi a mangad-adal iti Sao ti Dios? Sigurado ngarud a naragsakanka nga immawat iti 36 ti panidna ken de-kolor a broshur a ‘Kitaem ti Nasayaat a Daga.’ Dagiti diagrama, mapa,  ladawan, naikompiuter a ladawan, ken ti dadduma pay a pasetna parayrayenna koma ti personal a panagadalmo. Isu a siguraduem nga addaanka iti kopia ti ‘Kitaem ti Nasayaat a Daga’ a karaman ti Bibliam ken dagiti katulongan iti panagadal a kanayon nga us-usarem. Ken laglagipem nga itugot ti broshurmo kadagiti gimong iti kongregasion no dagiti palawag ken diskusion ramanenna dagiti lugar a nadakamat iti Biblia.

Iti palawag a “Dagiti Annaktayo​—Napateg a Tawid,” inruar ti ispiker ti napintas ti pannakayilustrarna ken 256 ti panidna a libro a napauluan iti Agsursuroka iti Naindaklan a Mannursuro. Dagiti nagannak a mangipatpateg unay iti tawidda a naggapu iti Dios, sigurado a pagragsakanda nga adalen daytoy baro a publikasion a kaduada dagiti ubbing pay nga annakda. “Dagiti annak,” kuna ti libro, “kasapulanda ti moral a panangiwanwan ken prinsipio a surotenda. Ket kasapulanda dagita manipud iti kinaubingda. Nakalkaldaang ti ibungana no naladaw unayen ti panangtulong kadagiti annak.”

Naglaon ti Agsursuroka iti Naindaklan a Mannursuro iti nasurok a 230 a ladawan​—dandani mamindua nga ad-adu ngem kadagiti ladawan a masarakan iti libro nga Estoria ti Biblia. Addaan iti kapsion, a kaaduan ket saludsod, ti tunggal ladawan wenno grupo dagiti ladawan. Masarakan dagiti sungbat iti isu met la a panid. Dagitoy ken dagiti dadduma pay a saludsod iti intero a libro ket mabalin a pangparayray iti nasayaat a saritaan, a mangipalubos kadagiti ubbing a naimpusuan a mangyebkas iti kapanunotanda. Kas pagarigan, kastoy ti mabasatayo iti kapsion iti panid 101: “Apay a napateg a laglagipem ti agyaman?” Ket dakayo a nagannak, siguraduenyo a basaen ti pakauna a sasao, “Ti Kasapulan Dagiti Annak Kadagiti Nagannak.” No aramidenyo dagiti singasing a nadakamat sadiay, apitento ti pamiliayo ti kadakkelan a gunggona iti daytoy nagsayaat a katulongan iti panagadal.

Ti Video a Tinagiragsak Dagiti Tuleng

Iti Estados Unidos idi tawen 1915, ti pilgrim, wenno agdaldaliasat a panglakayen, nga agnagan iti John A. Gillespie, inseniasna  dagiti kanta kadagiti sumagmamano a tuleng a timmabuno iti kombension dagiti International Bible Student, kas pangawag idi kadagiti Saksi ni Jehova. Ita, addan nasurok a 1,200 a kongregasion ken grupo dagiti tuleng nga agibumbunannag ken interesado a tattao iti intero a lubong. Kasano a matartaraonan dagitoy iti naespirituan?

Iti agdama, dagiti katulongan iti panagadal iti Biblia ket magun-odanen iti 18 a sign language, ken agtultuloy nga umad-adu dayta a bilang. Dagidiay agus-usar iti American Sign Language (ASL) nakaawatda iti naisangsangayan a sorpresa idi Setiembre 2002. Nangrugi iti dayta a bulan, dagiti maadal nga artikulo iti Pagwanawanan ket magun-odanen iti video kas binulan nga edision. Daytoy a probision tultulonganna dagiti tuleng a tattao kadagiti pamay-an a mabalin a nalaka a tagtagilag-anen dagiti dadduma.

Usigem: Adu a teksto ti memoriado ti kaaduan a Saksi a saan a tuleng. Daytoy ket gapu ta kadarato a mangngeg wenno eksakto a mabasada dagiti isu met la a sasao. Ngem kadagiti tuleng nga agibumbunannag, saan a kanayon nga agpapada ti pannakaisenias dagiti sasao. Apay? Gapu ta saan a magun-odan ti Biblia iti ASL, ken dagidiay addaan iti paset kadagiti gimong iti kongregasion saan a kanayon nga eksakto nga agpapada ti panangiseniasda kadagiti teksto iti Kasuratan. Ngem nagbalbaliw daytoy idi nairuar ti ASL a video dagiti publikasion. Ita, magun-odan metten iti video dagiti artikulo a maadal iti Pagwanawanan, ket dagiti mangbuya a tuleng matagiragsakdan ti agpapada a pannakaipatarus dagiti teksto iti Biblia.

Kanayonanna, dagiti ASL a kongregasion ken grupo saanen a kasapulan a mangtudingda kadagiti managipatarus a para basa iti Panagadal iti Pagwanawanan. Kadagiti kongregasion dagiti saan a tuleng, ti natudingan nga agbasa iti parapo ket mabalin a mangbusbos iti maysa nga oras wenno nasursurok pay nga agsagana iti Pagwanawanan tapno nasaysayud ti panagbasana. Ngem iti kongregasion dagiti tuleng nga agibumbunannag, masansan nga adu  nga oras nga agsagana dagidiay nakaiskediul a mangisenias iti artikulo a maadal. Ita, mabalinen a mausar dayta a napateg a tiempo kadagiti dadduma pay a naespirituan nga aktibidad. Ania ti makuna dagiti kakabsat maipapan iti daytoy baro a probision?

Insurat ti maysa a grupo dagiti tuleng nga agibumbunannag idiay estado ti Rhode Island, E.U.A.: “Nalapunoskami iti rag-o idi nayanunsio a magun-odanmin Ti Pagwanawanan iti video. Kinapudnona, nakalua ti sumagmamano nga agibumbunannag.” Ti mangidadaulo iti Panagadal iti Pagwanawanan idiay Florida kinunana a nakaad-adu itan ti agitaytayag iti imada tapno agkomento ket “maragsakan a makakita kadagiti nakaad-adu nga ima a pagpilianna!” Kinunana pay a “nabatad a simmayaat metten ti panagkomentoda.” Insurat ti sabali pay a panglakayen: “Nagsayaat dagiti imbungana! Nagsayaat ti pannakaawatda uray kadagiti naririkut a banag.” Wen, gapu iti nabaknang a pamendision ni Jehova, umad-adu dagiti tuleng nga agragrag-o gapu iti pribilehioda a mangam-ammo ken mangidaydayaw iti Dios.​—Roma 10:10.

Tulong Kadagiti Agipatpatarus

Ti naespirituan a taraon nga ipapaay ti klase matalek a mayordomo ket magun-odan itan iti 390 a pagsasao. (Luc. 12:42) Gapuna, ti panagipatarus ket maysa a nagpateg ken agtultuloy a dumakdakkel a paset ti trabaho iti organisasion ni Jehova.

 Ti umiso a panagipatarus ket saan a basta sao por sao a panangipatarus kadagiti kaibatogan a sasao ti orihinal a teksto. Imbes ketdi, masapul a mayallatiw ti umiso a kababagasna. Nalawag ngarud a dagiti agipatpatarus nasken a naan-anay a maawatanda ti orihinal a teksto sakbay a rugianda ti agipatarus. Narigat daytoy no dadduma.

Gapuna, iti panangiturong ti Bagi a Manarawidwid, dagiti kualipikado a kakabsat a nadutokan nga agserbi kas instruktor immawatda iti pannakasanay iti programa a maawagan iti Course in Improved English Comprehension. Kalpasan a naturposda ti kurso a naangay idiay Watchtower Educational Center iti Patterson, New York, dagiti kakabsat binisitada dagiti grupo dagiti agipatpatarus iti intero a lubong bayat ti 2002 ken 2003 a tawen serbisio. Agarup tallo a bulan ti binusbosda iti tunggal grupo, a mangisursuro iti kurso ken mangipapaay iti praktikal a tulong iti trabaho. Babaen ti tulong daytoy a programa, nalalaing itan dagiti agipatpatarus a manganag iti naan-anay a kaipapanan ti Ingles a sasao.

Kinuna ti maysa a grupo dagiti agipatpatarus: “Gapu iti kinamanangngaasina, siaayat a tinulongannakami ni Jehova tapno nasaysayaat a maaramidmi ti annongenmi. Ita, ad-addan a natalged  ti riknami. Babaen ti pamendision ni Jehova, mangnamnamakami kadagiti nasayaat a resulta.” Kinuna ti maysa a manangaywan iti panagipatarus: “Iti napalabas, no mano nga oras a marigatan ti adu kadakami a mangipatarus kadagiti nauuneg nga Ingles a sasao ken sentensia. Daytoy ti mangpabuntog iti trabahomi. Isu a maragsakankami unay iti Course in Improved English Comprehension. Naipakita kadakami no kasano nga anagen ti Ingles a sasao iti sistematiko a pamay-an, ken impaayannakami kadagiti napateg a metodo iti panangtarus iti narigat a sentensia. Kas resultana, saankami unayen a maringgoran ken naal-alistokamin a makalpas iti mas umiso a patarus.”

Insurat ti sabali pay a grupo: “Ad-adda a praktikal daytoy a kurso ngem iti aniaman nga umasping a sekular nga edukasion ta maitutop daytoy kadagiti espesipiko a kasapulanmi. Patienmi a daytoy a probision tulonganna dagiti agipatpatarus iti intero a lubong, ket dagiti marakarnero a tattao nalaklakada a ‘matarusan ti kababagas’ ti kinapudno.”​—Mat. 13:23.

Iti agdama, agarup 1,660 nga agipatpatarus iti nasurok a 150 a pagsasao ti nagunggonaanen iti daytoy a kurso. Maysa pay, nairanta ti programa tapno matulongan dagidiay agipatpatarus iti sign language ken dagidiay agipatpatarus iti Espaniol iti katutubo a pagsasao iti Sentral ken Abagatan nga America.

Nakabalan Kas Nasaysayaat a Mannursuro

Ti komunikasion ket napateg unay ken ni Jehova ken iti bugbugtong nga Anakna​—“ti Sao.” (Juan 1:1, 14; 3:16; Apoc. 19:13) Kas panangtulad iti kasta a panangmatmat, ti klase matalek nga adipen agtultuloy a sipipinget a tultulonganna dagiti adipen ti Dios a mangparang-ay kadagiti abilidadda a mangasaba ken mangisuro. Gapu iti dayta a kalat, insagana ti organisasion ni Jehova ti libro a Magunggonaan iti Edukasion nga Ipaay ti Teokratiko nga Eskuelaan ti Panagministro. Adu nga agibumbunannag ti nangyebkas iti apresasionda iti daytoy a libro sipud idi damo a nausar iti Teokratiko nga Eskuelaan iti Panagministro idi Enero 2003.

 “Awanen ti sabali a narelihiosuan a grupo a maseknan unay iti panangtulong kadagiti miembrona, ubing ken nataengan, a makikomunikar a sieepektibo,” insurat ti maysa a panglakayen iti Pilipinas. Kinuna ti maysa a panglakayen idiay Brazil: “Para kaniak, ti Enero 2003 ket nangrugian ti nagpateg a panangisuro iti historia dagiti Saksi ni Jehova.” Kinuna ti sabali pay a panglakayen: “Nadlawko a dagiti ubbing iti kongregasion ad-adda a magagaranda a makipaset iti eskuelaan. Dagiti dadduma nabasadan amin a linaon ti libro ken inaramidda amin nga ensayo​—amin dagitoy sakbay pay a mausig ti material iti eskuelaan!” Masansan nga usaren ti agdaldaliasat a manangaywan ti libro nga Eskuelaan ti Panagministro no mapan agsarungkar kadagiti kakabsat. Insuratna: “Dagiti kapitulo kas iti ‘Igaedmo ti Agbasa,’ ‘Makagunggona ti Panagadal,’ ken ‘Ammuem No Kasano ti Rumbeng nga Isusungbatmo’ ket nagdakkel ti maitulongna iti panagsagana kadagiti gimong ken iti ministerio.”

Kinuna ti maysa a kabsat a babai idiay Britania a ti “pannakairaman dagiti ensayo ket nagsayaat a paset iti panangisuro. No kayattayo a mapatanor dagiti paglaingan a maisursuro iti eskuelaan, nasken nga aramidentayo dagitoy iti inaldaw a panagbiagtayo. Dagiti ensayo ti tumulong kadatayo a mangaramid iti daytoy.” Idiay Japan, kastoy ti insurat ti maysa a kabsat a lalaki nga adda depekto ti panagsaona: “Tunggal matudinganak nga agbasa, madandanaganak amangan no saan a nasayaat ti panagbasak iti plataporma. Nabigbigko a ti negatibo a kapanunotak ti ad-adda a mangpadanag kaniak. Isu nga idi naawatko daydiay kaudian a pasetko, insuratko dagiti punto iti libro nga Eskuelaan ti Panagministro iti sidong ti subtitulo a ‘No Kasano ti Nalawag a Panagsao’ (panid 87 ken 88) ken iti kahon a ‘Panangparmek iti Panagbeddal’ (panid 95). Pudno, diak namnamaen a dagus a maparmekko ti parikutko iti panagbeddal, ngem determinadoak a di sumuko!”

“Idiay Burundi,” insurat ti sanga nga opisina idiay Kenya, “inyebkas dagiti kakabsat ti apresasionda iti baro a libro, a magun-odanen iti pagsasao a Kirundi. Iti pagilian nga adu dagiti nababa ti adalda, dagiti estudiante iti Teokratiko nga Eskuelaan iti Panagministro  ad-adda a maawatandan dagiti punto a pakabalakadan. Kas resultana, ad-adda a magagaranda a mangiparang kadagiti pasetda.”

Nakatulong met ti libro kadagiti dadduma a mangparang-ay iti abilidadda nga agsurat. Kinuna ti maysa a nataengan ken nakapuyen ti salun-atna a kabsat a babai idiay Mexico: “Iti libro nga Eskuelaan ti Panagministro, panid 71 agingga iti 73, nakakitaak iti sumagmamano a praktikal a singasing maipapan iti panagsurat. Mangaskasabaak iti kastoy a wagas gapu kadagiti pisikal a limitasionko. Saanak idi nga agsursurat kadagiti kakabagiak. Ngem iti tulong ti baro a libro, nasaysayaat itan ti panangasabak kadakuada.” Kinuna ti maysa a manangaywan iti distrito idiay South Africa: “Pudno a naisangsangayan daytoy a libro. Saan a basta ilawlawagna dagiti kualidad ti panagpalawag no di ket naespirituan ti pamay-anna a mangilawlawag, nga ipakpakitana no kasano a dagitoy a kualidad ket bunga ti Nakristianuan nga ayat ken pannakaseknan kadagiti dadduma.”

Dagiti Pasamak a Mainaig iti Linteg

Idi Hunio 17, 2002, ti Korte Suprema ti Estados Unidos inyetnagna ti napateg a desision iti kaso a Watchtower Bible and Tract Society of New York, Inc. kontra iti Village of Stratton. Iti 8 kontra 1 a desision, patien ti kangatuan a Korte iti Estados Unidos a dagiti ordenansa a mangkalikagum iti pammalubos nga agur-or ket maikontra iti konstitusion no iti publiko a ministerio dagiti Saksi ni Jehova.

Kalpasan daytoy a panagbiktoria, ti Legal Department iti sanga nga opisina ti Estados Unidos sinarungkaranda dagiti ili iti intero a pagilian. Kas resultana, narisut dagiti parikut mainaig iti panangasabatayo kadagiti 238 nga ili a naggandat idi a mangyaplikar iti ministeriotayo ti ordenansa maipapan iti panagur-or. Kanayonanna, gapu iti desision iti kaso nga Stratton, dagiti agibumbunannag iti Pagarian iti 216 a dadduma pay nga ili ket saanen a masapul nga agpakadada kadagiti polis wenno kadagiti dadduma pay nga opisial iti ili sakbay a mapanda mangasaba. Sapay  koma ta itultuloy nga ikkaten ni Jehova dagiti kasta a lapped.​—Isa. 40:4; Mat. 24:14.

Agtultuloy ti pannakaaresto ken pannakaibalud dagiti kakabsat idiay Armenia gapu iti panagkedkedda nga agsoldado. Ti piskal idiay Yerevan, ti kabesera a siudad, inyapelarna ti kaso dagiti sumagmamano a kakabsat tapno umatiddog ti sentensiada a pannakaibalud. Pinatgan dagiti hues ti kiddawna, ket nangyetnagda kadagiti nadagdagsen a sentensia.

Idi Pebrero 2003, indeklara ti European Court of Human Rights a palubosan ti Korte a denggen ti darum ti dua a dati a misionero dagiti Saksi ni Jehova. Idi napapanawda idiay Bulgaria idi 1995, narikna dagiti agassawa a nasalungasing ti kalinteganda iti wayawaya ti relihion ken wayawaya iti panangidumduma. Napaneknekan ti Korte a “nainkalintegan” ti darum.

Kalpasan unay ti panangrambak ti maysa a kongregasion iti Pangrabii ti Apo idiay Asmara, Eritrea, pinalikmutan dagiti polis ti nagtataripnonganda ken tiniliwda amin dagiti 164 a timmabuno​—lallaki, babbai, ken ubbing. Agpatnag a naibalud ken napagsaludsodanda. Kabigatanna, dagiti autoridad winayawayaanda dagiti ubbing ken kaaduan kadagiti kakabsat a babbai ken dagiti interesado. Dagiti dadduma ket nayakar iti kadakkelan a pagbaludan idiay Asmara, a sadiay ti nakaibaludan dagiti dadduma iti dandani makabulan sakbay a nawayawayaanda. Malaksid iti daytoy, sangapulo a kabsat ti adda pay laeng iti kampo a pagbaludan gapu iti panagkedkedda nga agsoldado. Tallo ti naibalud iti siam a tawen.

Agtultuloy ti nadangkok a panangraut kadagiti kakabsattayo idiay Georgia. Dagiti kombension distrito ket puersado a pinasardeng dagiti lokal nga opisial ken armado a polis a napan kadagiti pagkombensionan a madama idi a maang-angay. Napanda iti plataporma ket pinapanawda dagiti agdengdengngeg. Naminsan, sinerraanda dagiti asideg a kalsada tapno malapdan dagiti kakabsat a mapan makikombension. Naidarum ti kangrunaan a manangidadanes kadagiti Saksi ni Jehova, ngem saan a naaresto. Sangapulo  ket siam a daras a naitantan ti pannakabistana. Naminsan, dagiti mangsupsuporta kenkuana rimmautda iti korte, a rinanggasan ken pinagsasawanda dagiti kakabsat. Winaswas ti Tax Department ti tax registration number dagiti Saksi, a kasapulanda tapno makaipatulodda kadagiti literatura ken makaaramidda kadagiti transaksion.

Adda naimbag a damag idiay Kosovo ken Romania. Idi Mayo 20, 2003, legal a nabigbig ken nairehistro ti karta dagiti 90 nga agibumbunannag iti Pagarian idiay Kosovo. Umasping iti dayta, idi Mayo 22, 2003, ti gobierno ti Romania impaulogna ti bilin nga opisial a mangpasingked iti takder dagiti Saksi ni Jehova kas maysa a relihion. Kuna ti Artikulo 3 ti bilin: “Ti Kristiano a relihion a ‘Ti Narelihiosuan nga Organisasion Dagiti Saksi ni Jehova’ ket addaan iti amin a karbengan ken obligasion nga ipaay ti linteg kadagiti relihion a bigbigen ti Estado ti Romania.” Naipaulog ti bilin kas panagtungpal iti Romanian Supreme Court of Justice nga agturturay sipud idi tawen 2000.

Idiay Russia, nasuspende idi Mayo 22, 2003 dagiti darum a mangpadpadas a mangiparit iti trabaho dagiti Saksi ni Jehova idiay Moscow. Iti di nakedngan a tiempo, imbilin ti hues ti sabali pay a naanep a panangadal kadagiti kapanunotan nga adda kadagiti literatura nga impablaak dagiti Saksi ni Jehova bayat ti napalabas a sangapulo a tawen. Mapagduaduaan ti kinaumiso dagiti kasta a panangadal. Kabayatanna, ti European Court of Human Rights rinugianna nga improseso ti inyapelar dagiti kakabsat. Maipapan daytoy iti hudisial a panangirurumen ken diskriminasion a napasaran dagiti Saksi idiay Moscow iti napalabas a pito a tawen.

Ti Council of Ministers iti makin-amianan a deppaar ti Cyprus, babaen ti Decision No. E-1516-2002 idi Agosto 8, 2002, winaswasna ti pannakaiparit ti trabaho dagiti Saksi ni Jehova a nangipawil kadakuada a sumrek iti makin-amianan a paset ti isla. Napapanaw dagiti payunir sadiay idi 1997, idi naiparit ti trabaho. Naisubli kadagiti kakabsat ti dua a Kingdom Hall a nakompiskar.

 Idiay Uzbekistan, napabasol ni Marat Mudarisov gapu kano iti “panangsugsogna iti panaggiginnura gapu iti relihion ken panangguyugoyna kadagiti ubbing” a mamati iti patpatienna. Napatawan iti suspendido a sentensia. Kinapudnona, ti laeng “nakabasolanna” ket ti panangikasabana iti naimbag a damag kadagiti kaarrubana ken ti linawas a panangikonduktana kadagiti diskusion maipapan iti Biblia kadagiti gimong ti kongregasion. Iti nabiit pay, nayapelar daytoy iti Korte Suprema ti Uzbekistan, ket nawaswas ti di nainkalintegan a sentensia ni Kabsat Mudarisov.

Panangdaer Kadagiti Pakasuotan

Bayat nga umad-adanin ti panungpalan ti agdama a sistema ti bambanag, kumarkaro ti kinaranggas ken riribuk gapu iti politika, a masansan a pakaigapuan ti nakaro a rigat. Idi napan a tawen, nagtultuloy ti gerra sibil idiay Liberia ken iti Monrovia a kabeserana. “Makalawas a nagtultuloy dagiti panagdadangadang iti kalsada ken nariribuk ti intero a siudad,” impadamag ti Reuters. “Kasla timmalna ti kasasaad idi nagsanud dagiti kumunkontra, ngem idi Hunio 24 adda napasamak a nakarkaro pay a panagdadangadang a nagbanag iti pannakadadael dagiti adu nga imprastruktura ken pannakatay dagiti tattao.” Iti maysa a paset ti siudad, masapul a kumleb dagiti kakabsat iti nabasa a suelo ti Kingdom Hall-da gapu kadagiti panagpipinnaltog ken panangbomba, inlawlawag ti sanga nga opisina. “Nagkas-ang ti kasasaad iti siudad,” insurat dagiti kakabsat. “Maang-angotmi dagiti nabuyoken a bangkay.” Adu pay ti natay gapu iti panagsaknap ti kolera.

Kanayon ken sistematiko ti panagsamsam dagiti armado a lallaki kadagiti pagtaengan ken Kingdom Hall. Gapu ta ammo dagiti kakabsat a mabalin a matakaw ti aniaman a banag a napateg, dagiti laeng kangrunaan a kasapulanda iti biag ti adda kadakuada, inlawlawag ti agassawa a misionero a taga Monrovia. Adda dagiti pamilia a saandan a sinuktan dagiti natakaw a katreda no di ket naturogda kadagiti ikamen iti suelo. Nagbakuit wenno nagkamang  iti kabangibang a pagilian dagidiay saanen a makasubli iti pagtaenganda.

“Ti laeng panagbiagda iti agdama nga aldaw ti pakaseknan dagiti tattao,” insurat ti sanga nga opisina. “Kaskasdi, makaparegta unay a makita dagiti kakabsat a sigagagar a makigimong ken mangasaba no ipalubos ti kasasaad.” No sumangpet dagiti abasto, kuna dagiti nadakamat itay a misionero, “karaman kadagiti umuna a banag a kiddawen dagiti kakabsat dagiti naibatay-Biblia a literatura, ken no dadduma, bag a pangasaba tapno masuktan daydiay napukawda.”

Rehional a Panagimprenta

Idi Setiembre 1, 2001, pito a kakabsat manipud iti nadumaduma a paset ti lubong ti napili nga agserbi kas Printing Study Group. Kiniddaw ti Bagi a Manarawidwid kadagitoy a kakabsat nga adalenda amin nga agim-imprenta a sanga nga opisina iti intero a lubong ken mangirekomendada kadagiti nasaysayaat pay a pamay-an iti panangusar kadagitoy agdama a pasilidad. Maibatay kadagiti rekomendasion ti grupo a nagadal, idi Oktubre 17, 2001, inaprobaran ti Bagi a Manarawidwid a maaramid ti panagimprenta iti tunggal rehion. Masapul nga asikasuen ti tunggal rehion dagiti kasapulanda iti panagimprenta. Dagiti rehion ket Abagatan nga America, Africa, Amianan nga America, Asia, ken Europa.

Naipatungpal daytoy nga urnos idi rugrugi ti 2002. Makaparegta dagiti resultana. Usigem ti pannakayimprenta dagiti libro. Idi tawen 2000, ti sanga nga opisina iti Estados Unidos ket nakayimprenta iti agarup 50 a porsiento kadagiti libro para iti intero a lubong. Ngem ita, babaen ti urnos a panagimprenta iti tunggal rehion, 26 a porsiento laengen ti iyim-imprentada. Kas resultana, bimmassit dagiti gastos iti panagipatulod, bimmassit ti bilang dagiti agtartrabaho ken makina, ken limmawa ti espasio ti pagimprentaan iti Estados Unidos a nagbanag iti nasaysayaat a pannakausar dagiti agdama a pasilidad iti dadduma a pagilian.

Maitunos iti panagbalbaliw iti panagimprenta iti tunggal rehion, inaprobaran ti Bagi a Manarawidwid ti pannakagatang ti  pito a baro a MAN Roland Lithoman a pagimprentaan. Dagitoy ti mangsukat iti daanen ken saan unayen a nasayaat nga alikamen, ket ngarud makatulong kadagiti kasapulan iti panagimprenta iti masanguanan. Lima kadagiti baro a pagimprentaan, a dadduma kadagitoy ti naipasdeken, ket agpaay kadagiti sanga nga opisina idiay Brazil, Britania, Japan, Mexico, ken South Africa. Ti dua pay ket agpaay iti pagimprentaan iti Wallkill, New York, a maipasdekto pay laeng inton Abril ken Mayo 2004. Tunggal pagimprentaan nga 40 a metro ti kaatiddogna, ket makapataud iti 90,000 a magasin wenno kas kadakkel ti magasin a yunit ti libro iti kada oras (25 kada segundo), ken de kolor a mayimprentana ti amin a panid.

Kanayonan a Panagbalbaliw iti Brooklyn ken Wallkill

Karaman kadagiti baro a pagimprentaan, makaawat met ti Wallkill iti baro nga alikamen a pagaramid iti libro a makapataud kadagiti natangken ti akkubna a libro ken deluxe a Biblia iti kapartak a 120 kada minuto. Ti Shipping Department, a mayakar idiay Wallkill manipud iti Brooklyn, ket magunggonaan iti baro a natayag a bodega a mabalin a pagipempenan kadagiti literatura a basbassit ngem iti gudua ti kalawa ti espasio a maus-usar iti Brooklyn.

Mausarto kadagiti sabali a panggep dagiti nabakantean a patakder iti Brooklyn. Kanayonanna, idi Hunio 2003, inyanunsio ti Bagi a Manarawidwid a mabalin a mailako ti 95,000 a metro  kuadrado a patakder a masarakan idiay 360 Furman Street, nga ayan idi ti Shipping ken dadduma pay a departamento. Ti dadduma a departamento iti patakder ket nayakaren wenno dandanin mayakar iti dadduma a patakder iti Brooklyn.

Panagibangon Kadagiti Kingdom Hall

Bayat ti 2003 a tawen serbisio, 2,340 a Kingdom Hall ti naibangon iti intero a lubong. Ipakita daytoy nga agpromedio iti 195 a Kingdom Hall ti maibangbangon iti kada bulan, wenno nasurok nga 6 iti kada aldaw! Sipud idi Nobiembre 1999, idi nangrugi ti programa a panagibangon kadagiti nakurapay a pagilian, agdagupen iti 7,730 dagiti Kingdom Hall a naibangon. Iti adu a lugar, no nalpasen ti maysa a Kingdom Hall, umadu dagiti makigimong ken nagbiit a mapunno ti Kingdom Hall.

Idi nangrugi ti programa idiay Africa, addan 550 a maitutop a lugar a pagdayawan iti 38 a pagilian iti dayta a kontinente. Awan pay uppat a tawen kalpasanna, ti isu met la a 38 a pagilian ket addaanen iti nasurok a 5,060 a Kingdom Hall​—agpromedio a 1 iti tunggal 3 agingga iti 4 a kongregasion. Iti maysa a report maipapan iti maikuna dagiti tattao maipapan kadagiti proyekto a panagibangon iti Kingdom Hall, dinakamat ti sanga nga opisina idiay Malawi ti baro a diksionario nga impablaak ti Christian Literature Association of Malawi. “Ti diksionario,” kuna ti sanga nga opisina, “ramanenna ti maysa a sao maipapan kadagiti Saksi ni Jehova ken siuumiso nga impatarusna ti nagantayo iti Chichewa. Kalpasanna, tapno maipakita no kasano nga usaren daytoy a  nagan iti sentensia, innayon ti diksionario: ‘Dagiti Saksi ni Jehova nangbangonda kadagiti adu a simbaan.’”

Insurat ti sanga nga opisina iti sabali pay a pagilian iti Africa: “Idi napan dagiti kakabsat iti opisina ti maysa nga opisial tapno irehistroda ti aplikasionmi a mangibangon iti Kingdom Hall, dagus a pinigis ken imbasura ti lalaki dagiti papelesmi. Idi napasamak daytoy iti maikatlo a gundaway, impabiangen dagiti kakabsat daytoy a banag ken ni Jehova. Di nagbayag kalpasan dayta, dagiti autoridad intalekda iti maysa kadagitoy a kakabsat, a pagaammo gapu iti kinamapagpiaranna, ti trabaho a panangiwaras kadagiti maipautang para kadagiti opisial ti gobierno.

“Karaman kadagidiay umutang daydiay opisial a nangpigis kadagiti papelesmi. Isu nga idi nakitana ti kabsattayo, dagus a pinanawanna ti opisina ket agsublinto kalpasan ti makalawas a namnamaenna a sabalinton ti opisial a mangtamtaming kadagiti utang. Ngem iti daytoy a gundaway, inasitgan ti kabsattayo, dinamagna ti aplikasionna, ken inaprobaranna ti utangenna. Gapu iti bainna, kiniddaw ti opisial nga ited manen dagiti kakabsat ti aplikasionda. Personal nga impakitana dagitoy iti superiorna tapno aprobaranna ken nangala iti pammalubos agpaay iti lote a pakaibangonan ti Kingdom Hall. Napnuan panagraem a kinunana maipapan kadagiti Saksi: ‘Saanda a subadan ti dakes iti dakes.’”

Kuna ti sanga nga opisina idiay Ukraine: “Bayat nga agsapsapul dagiti kakabsat iti maysa a lote iti siudad ti Artsyz, kinasaritada ti maysa nga arkitekto iti rehion. Impakitada kenkuana dagiti retrato dagiti naibangonen a Kingdom Hall. Gapu ta nasdaaw, kinunana: ‘Ti kastoy a Kingdom Hall ket masapul nga adda iti asideg ti administrasion ti distritotayo, ta papintasenna ti sentro ti siudad.’ Kalpasanna, nangisingasing iti lote. Idi agangay, kinuna met ti kangrunaan nga arkitekto iti rehion: ‘Daytoy ti damo a pannakakitak iti narelihiosuan a komunidad nga immanamong kadagiti plano sakbay a mangrugi ti panagibangon. Gagangay a ti kasumbangirna ti mapaspasamak.’”

Iti maysa a pakaibangbangonan ti Kingdom Hall iti siudad ti Lysychans’k, kinuna ti maysa a negosiante a babai manipud iti  kabangibang a siudad: “Binuybuyakayo. Panagkunak masapul a mangibangonkayo iti kastoy a Kingdom Hall iti siudadmi. Tulongankayo pay a mangala iti maitutop a lugar.” Dagiti kakabsat kinunada kenkuana a lima laeng dagiti Saksi iti dayta a lugar​—nagbassit tapno mabuangay ti maysa a kongregasion ken maibangon ti maysa a Kingdom Hall. “Mano aya ti kasapulanyo?” insaludsodna sana innayon: “Ibilangdak kas maikanem.” Mabalin nga agang-angaw. Kaskasdi, immanamong a mayadalan iti Biblia.

Dagiti Baro nga Assembly Hall

Idi napalabas a tawen serbisio, naibangon ken naidedikar dagiti Assembly Hall idiay Nhandeara ken Goiânia, Brazil; El Trébol, Santiago, Chile; Morne Daniel, Dominica; Machala, Ecuador; Syracuse, Sicily, Italia; Gerehu, Papua New Guinea; Lomé, Togo; Newburgh, New York, ken West Palm Beach, Florida, E.U.A. Maipapan iti proyekto idiay Newburgh, kinuna ti maysa a lokal a negosiante a lalaki: “Nakaskasdaaw ti organisasionyo! Boluntario dagiti trabahadoryo nga addaan iti nagduduma a nalikudan, talento, ken paglaingan, ken agtartrabahoda amin a sangsangkatunos. Pulos a diak pay nakakita iti kastoy!” Nasdaaw ti lokal nga inspektor ti patakder saan laeng nga iti pannakaibangon ti Assembly Hall no di pay ket kadagiti kakabsat. “Pagaayatko ti umay ditoy,” kinunana. “Naragragsakak no kaduakayo.”

Idi dandanin malpas ti proyekto idiay Newburgh, adda uram a nangdadael iti agarup 20 porsiento ti estruktura. Imbes a naupay dagiti kakabsat, dagus a nagtignayda a timmulong a nangtarimaan iti patakder. Kas resultana, natarimaan dayta iti awan pay makabulan, ken naidedikar iti naikeddeng a petsa, idi Oktubre 19, 2002. Maipapan kadagiti boluntario, kinuna ti maysa a lokal a pagiwarnak: “Nabarbara ti pammatida ngem iti apuy a nanguram iti agarup kakalima ti 60,000 pie kuadrado a patakder.” Kas panangbigbig iti napateg a panagkaykaysa dagiti adipen ti Dios, dagiti kakabsat dimmawatda iti pammalubos tapno panagananda iti Unity Place ti dalan nga agturong iti Assembly Hall.

 Pannakaidedikar Dagiti Sanga nga Opisina

Iti baet ti sibil ken politikal a riribuk, dagiti kakabsat idiay Côte d’Ivoire nagtataripnongda a sitatalna idi Marso 29, 2003, tapno idedikarda ti sumagmamano a baro a patakder iti sanga nga opisina idiay Abidjan. Karaman kadagitoy ti baro a Kingdom Hall, dua a pagtaengan, ken maysa a patakder nga ayan ti nalawa a komedor, kosina, paglabaan, bodega, ken pagtarimaanan. Dagiti baro a pasilidad ket adda iti ballasiw ti kalsada manipud iti orihinal a sanga nga opisina, a naibangon idi 1982. Dagiti boluntario manipud iti 15 a pagilian, nga adu kadakuada ti napan a bukodda ti gastos, tinulonganda dagiti 110 a kameng ti lokal a grupo dagiti agibangbangon. Ni Sébastien Johnson, ti manangaywan iti sona a bumisbisita iti sanga nga opisina, ti nangipaay iti palawag ti dedikasion a napauluan iti, “Ipapusoyo ti Nasin-aw a Panagdayaw.”

Iti Sabado, Pebrero 15, 2003, tinabunuan ti 332 ti pannakaidedikar ti baro a sanga nga opisina idiay Guyana. Ni Richard Kelsey, manipud iti sanga nga opisina idiay Alemania, ti nangipaay iti palawag ti dedikasion. Inturongna ti atension ken ni Jehova kas ti Naindaklan a Nangaramid iti uniberso. Nupay kasta, inlawlawag ni Kabsat Kelsey a ti kasayaatan a panamarsua ni Jehova, nga isu met laeng ti immuna, ket nagbanag iti nadayag nga espiritu a parsua​—ti bugbugtong nga Anakna. Adu nga immun-una a misionero ti nagsubli tapno tumabuno iti dedikasion, a dadduma kadakuada ti damo a nagawid iti unos ti nasurok nga 40 a tawen! Nupay nasurok laeng a 2,000 ti agibumbunannag iti naimbag a damag idiay Guyana, naragsakan ti amin a nakakita iti 4,752 a tattao manipud iti 12 a pagilian a timmabuno iti naisangsangayan a programa iti Domingo.

Iti inagurasion ti pannakapalawa ti Bethel idiay Haiti, nagpigerger ti boses ti lakayen a ni George Corwin gapu iti emosion idi impadamagna ti nabiit pay nga isasarungkarna iti St. Marc, maysa nga ili iti puerto nga 60 a kilometro ti kaadayona iti amianan ti Port-au-Prince. Kas misionero idiay St. Marc iti nasurok nga  40 a tawen, timmulong a nangbuangay iti kaunaan a kongregasionda. Ita, addan uppat a dadakkel a kongregasion iti ili. Naragsak a nangabrasa kenkuana dagiti inyadalanna idi iti Biblia a nabayag itan a matalek a Saksi. Idi simmangpet ni Kabsat Corwin idiay Haiti, awan pay idi iti 900 nga agibumbunannag iti dayta a pagilian, ket dua laeng ti aggigian iti sanga nga opisina​—a bassit ken maab-abangan.

Naibangon ti baro a sanga nga opisina idiay Haiti idi 1986, ngem saan met nga immanay dayta. Ti kabbaro a naidedikar ken napalawa a sanga nga opisina ti paggigianan ti 40 a kameng ti pamilia ti Bethel, nga agserserbi iti nasurok a 12,000 nga agibumbunannag. Dagiti boluntario manipud iti Alemania, Australia, Britania, Canada, Denmark, ken Estados Unidos nakiramanda iti konstruksion. Sinanayda pay dagiti boluntario a taga Haiti kadagiti napateg a paglaingan iti panagibangon.

Gapu ta awan ti umdas a materiales iti dayta a lugar, masapul a maangkat dagiti nadagsen nga alikamen ken dandani amin a materiales a mausar iti panagibangon. No dadduma, daytoy ti mangpabuntog iti trabaho ngem saanna a napasardeng daytoy. Naangay ti dedikasion iti Sabado, Nobiembre 23, 2002. Ti 3,122 a timmabuno ramanenna ti 240 a delegado manipud iti 13 a pagilian. Ti kameng ti Bagi a Manarawidwid a ni David Splane ti nangipaay iti palawag ti dedikasion. Iti sumaganad nga aldaw, nasurok a 20,000 ti timmabuno iti naisangsangayan a programa idiay Sylvio Cator Stadium iti Port-au-Prince.

“Tumakdertayo, ket masapul a bangonentayo.” (Neh. 2:18) Dagitoy a makaparegta a sasao nga imbaga dagiti matalek a Judio idi kaaldawan ni Nehemias, ket nagparang iti suplemento ti Hunio 2000 nga isyu Ti Ministeriotayo iti Pagarian idiay Hungary. Naawis dagiti adipen ni Jehova iti intero a pagilian a makiraman iti pannakaibangon ti baro a pasdek ti sanga nga opisina idiay Budapest. Manipud kadagiti 251 a kongregasion iti pagilian, 13,741 a boluntario ti nakiraman iti proyekto, nga immabut iti dua a tawen agraman ti pannakapabaro ti dati a kampo militar.  Naangay idi Mayo 10, 2003 ti dedikasion a tinabunuan ti 554 a bisita manipud iti 22 a pagilian. Ti kameng ti Bagi a Manarawidwid a ni Guy Pierce ti nangipaay iti palawag ti dedikasion a napauluan iti “Agtultuloy a Padpadakkelen ni Jehova.”

Kanayon a maitampok ti pannakapalawa ti sanga nga opisina idiay Mexico. Ti 14 a baro a patakder, a naidedikar idi Marso 15, 2003, ket nainayon kadagidiay naidedikar idi 1974, 1985, ken 1989. Adda dua a rason no apay a makakarit unay ti panangipasdek iti pundasion dagiti baro a patakder iti kalawa a 80,000 metro kuadrado. Umuna, dan-aw idi ken bassit ti daga iti lugar a pakaibangonanna. Maikadua, kanayon a maginggined dayta a rehion. Gapuna, tapno maaddaan iti natibker, ken natalged a pundasion, dagiti trabahador nasken a mangisaadda iti 3,261 a pilote iti daga, iti kauneg a 24 a metro! Immabut iti 12 a tawen ti panagplano  ken panagibangon ket adda 28,600 a boluntario a nagtrabaho manipud iti Mexico ken 734 manipud kadagiti sabali a pagilian.

Tallo a kameng ti Bagi a Manarawidwid ti timmabuno iti dedikasion. Impalawag ni Guy Pierce ti maipapan iti dakdakkel a kinaragsak nga itden ti pannakaadda ti nasinged a relasion ken ni Jehova. Inlawlawag ni Theodore Jaracz nga ad-adu nga amang dagiti gunggona iti matalek a panagserbi iti Dios ngem kadagiti pakasuotan a sangsanguen dagiti Kristiano iti daytoy tiempo ti panungpalan. Ket ni Gerrit Lösch ti nangipaay iti palawag iti dedikasion a napauluan, “Dayawenyo ti Dios ti Kinapudno!” iti pagsasao nga Espaniol.

Idi Nobiembre 23, 2002, naidedikar ti sumagmamano a pasilidad ti sanga nga opisina idiay Peru, a pakairamanan ti napintas a baro a lima ti kadsaaranna nga opisina ken pagnaedan. Ni Gerrit Lösch ti nangipaay iti palawag ti dedikasion a natemaan iti, “Pakaidayawan ni Jehova ti Panagbangon.” Iti simmaganad nga aldaw, Domingo, 59,940 ti nagtataripnong idiay San Marcos Stadium iti Lima, a nakaangayan ti naisangsangayan a programa a naipamaysa iti nabaknang a panangbendision ni Jehova iti trabaho ti Pagarian idiay Peru. Ket anian a nagbatad dayta a bendision! Idi 1946, idi simmangpet dagiti immuna a misionero tapno idauloda ti trabaho, sumagmamano laeng dagiti agibumbunannag ken interesado a tattao iti dayta a pagilian. Ita, addan 87,318 nga agibumbunannag ken 916 a kongregasion idiay Peru.

Iti sanga nga opisina idiay Russia, nagtataripnong idi Mayo 17, 2003, dagiti 600 a bisita ken 350 a kameng ti pamilia ti  Bethel​—a mangirepresentar iti 30 a nadumaduma a pagilian—​tapno tabunuanda ti pannakaidedikar dagiti baro a pasdek a pagnaedan, pagopisinaan, ken bodega. Naangay ti immuna a dedikasion innem a tawen sakbayna, isu nga apay a nagbiit a nasken nga agpalawada?

Ti sanga nga opisina idiay Russia, a masarakan idiay Solnechnoye iti away ti St. Petersburg, imatmatonanna ti trabaho a panangikasaba iti Pagarian iti sangapulo a pagilian. Nasurok a 100 a pagsasao ti maus-usar iti daytoy nalawa a rehion, nga addaan iti 11 nga agsasabali nga oras. Gapuna, ti panagipatarus ti maysa kadagiti kangrunaan ken dumakdakkel a paset ti trabaho iti sanga nga opisina. Iti agdama, ipatpatarus dagiti kakabsat dagiti naibatay iti Biblia a literatura iti 34 a pagsasao. Maysa pay, sipud idi naudi a dedikasion, immadu iti nasurok nga 40,000 ti bilang dagiti agibumbunannag iti rehion​—dandani 7,000 kada tawen! “Ket agtultuloy ti iyaadu,” insurat ti sanga nga opisina. Isu a kas pangsubad iti nabaknang a panangbendision ni Jehova, pagragsakan dagiti kakabsat idiay Russia a ‘paatiddogen dagiti singdan ti toldada.’​—Isa. 54:2.

Adu a matalek a lallakay ken babbaket a nagsagaba iti nakaro a pannakaidadanes idi panawen ti Soviet ti timmabuno iti dedikasion iti Sabado. Nagimdeng a naimbag ti amin bayat nga impaay ni David Splane ti palawag iti dedikasion a natemaan iti, “Daytoy a Balay Punnuekto iti Dayag,” a naadaw iti Haggeo 2:7. Inlawlawagna a nupay napintas ken mangted iti dayaw dagiti baro a patakder, ti nadiosan a kondukta ken dagiti naespirituan a galad ti tunggal Kristiano ti nangnangruna a mangidayaw ken ni Jehova ken mangpapintas iti pudno a panagdayaw. Iti Domingo, 9,800 ti nangibtur iti nalamiis nga arimukamok tapno tagiragsakenda ti naisangsangayan a programa idiay Kirov Stadium iti St. Petersburg.

Iti sangalubongan, agdagup iti 19,848 dagiti ordinado a ministro nga agserserbi kadagiti sanga nga opisina. Bin-igda a miembro ti Worldwide Order of Special Full-Time Servants of Jehovah’s Witnesses.

 [Tsart/Dagiti Ladawan iti panid 12, 13]

DADDUMA A PASAMAK ITI 2003 A TAWEN SERBISIO

Setiembre 1, 2002

Setiembre 1: Dagiti maadal nga artikulo iti Pagwanawanan ket magun-odanen iti video iti American Sign Language.

Nobiembre 23: Naidedikar dagiti sanga nga opisina idiay Haiti ken Peru.

Enero 1, 2003

Enero 1: Maus-usaren kadagiti kongregasion ti baro a libro a Magunggonaan iti Edukasion nga Ipaay ti Teokratiko nga Eskuelaan ti Panagministro.

Pebrero 15: Naidedikar ti sanga nga opisina idiay Guyana.

 Marso 15 ken 29: Naidedikar dagiti sanga nga opisina idiay Mexico ken Côte d’Ivoire.

Abril 16: Dagiti polis idiay Asmara, Eritrea, imbaludda dagiti 164 a timmabuno iti Memorial.

Mayo 1, 2003

Mayo 10 ken 17: Naidedikar dagiti sanga nga opisina idiay Hungary ken Russia.

Mayo 20: Legal a nairehistro dagiti Saksi ni Jehova idiay Kosovo.

Mayo 22: Opisial a pinasingkedan ti Romania ti takder dagiti Saksi ni Jehova kas maysa a relihion. Nasuspende ti kaso a mangiparit iti trabaho dagiti Saksi idiay Moscow.

Agosto: Ti baro a MAN Roland Lithoman a pagimprentaan a naipasdek iti sanga nga opisina ti Britania.

Agosto 31, 2003

Agosto 31: Kadagiti napanglaw a pagilian, nabangon ti 7,730 a Kingdom Hall sipud idi Nobiembre 1999. 6,429,351 nga agibumbunannag ti aktibo kadagiti 235 a pagilian.

[Dagiti Ladawan]

Haiti

Peru

[Graph iti panid 11]

(Kitaem ti publikasion)

Iyaadu iti bilang dagiti pagsasao:

Amin a publikasion

“Ti Pagwanawanan”

“Agriingkayo!”

400

300

200

100

1880 1920 1960 2000

[Ladawan iti panid 14]

Dagiti instruktor iti Course in Improved English Comprehension, ken dagiti assawada

[Ladawan iti panid 22, 23]

Ti pagimprentaan ket nayarig iti bus

Estadistika ti pagimprentaan:

Kaatiddog: 133 pie

Kangato: 18 pie

Kadagsen: 201 tonelada

[Dagiti Ladawan iti panid 28, 29]

Dagiti nabiit pay a naidedikar a pasilidad ti sanga nga opisina idiay (1) Guyana, (2) Hungary, ken (3) Côte d’Ivoire