Report iti Intero a Lubong
Report iti Intero a Lubong
◼ EUROPA
Bilang dagiti pagilian: 46
Populasion: 728,162,887
Bilang dagiti agibumbunannag: 1,476,554
Bilang dagiti panangyadal iti Biblia: 697,044
Mabalin a naunday ti dalan nga agturong iti kinapudno. Idi 1951, ni Steponas ket nasentensiaan a maibalud iti maysa a kampo idiay Kazakhstan gapu iti politika. Nakipagtrabaho sadiay ken ni Edvardas, maysa a naregta nga agtutubo a Saksi a taga Lithuania, a naibalud gapu iti panagimprentana iti magasin a Pagwanawanan. Inranud ni Edvardas ti naibatay-Biblia a namnamana, ket kombinsido ni Steponas a nabirokannan ti kinapudno. Idi 1955, nawayawayaan ni Steponas. Iti panagsinada, kinuna kenkuana ni Edvardas: “Mabalin nga addanto aldaw nga agkitatanto manen.” Nupay saan a nabautisaran ni Steponas, patien ti Soviet State Security Committee nga isu ket maysa kadagiti Saksi ni
Jehova. Rinubbuot dagiti polis ti apartment-na ken kinompiskarda dagiti papel a nakailistaan dagiti adres dagiti kakabsat. Nagbanaganna, awanen ti nakasaritana a Saksi.Naglabas ti 47 a tawen. Iti dayta a tiempo, nagnaed ni Steponas iti bassit a purok idiay makin-amianan a Lithuania. Awan ti Saksi sadiay. Kalpasanna, idi primavera ti 2002, nakaala iti sumagmamano a literatura ken nangibuson iti kupon iti sanga nga opisina dagiti Saksi ni Jehova idiay Lithuania tapno agkiddaw iti libro a Ti Sekreto ti Kinaragsak iti Pamilia. Inlawlawagna: “Imbusonko ti kupon ket ninamnamak a makasaritak manen dagiti kakabsat.” Adda agassawa nga special pioneer a simmarungkar kenkuana ket inyadalanda iti Biblia. Awan pay makatawen kalpasanna, nabautisaran ni Steponas iti edad a 80.
Nagkitada kadi ken ni Edvardas, a nangikuna agarup 50 a tawenen ti napalabas: “Mabalin nga addanto aldaw nga agkitatanto manen”? Wen! Iti sumuno nga aldaw kalpasan ti bautismona, dagitoy dua a lallaki nga agkabsat itan iti naespirituan, sibabara a naginnarakup ken nagrag-oda.
Idiay Britania, da Tim ken Sam, agpada nga agtawen iti 11 ken di bautisado nga agibumbunannag, ket makiramraman iti serbisio iti tay-ak a kaduada ti nanang ni Tim. Agkasapulan dagitoy nga ubbing iti baro a bag a pangikabilanda kadagiti Biblia ken literaturada, ngem awan ti kuartada. Sakbay a napanda mangasaba iti dayta nga aldaw, dagiti inna dagiti dua nga ubbing nga agibumbunannag inkararagda daytoy a banag. Iti maudi a balay a sarungkaranda iti dayta nga agsapa, ni Tim ti nakisarita iti bumalay ken imbasaanna iti teksto ti Biblia. Bimmallaet ti babai tapno damagenna no ania ti relihionna. Idi imbaga ni Tim nga isu ket maysa kadagiti Saksi ni Jehova, pinagungtan ti babai ken kinunana iti nanang ni Tim a dina maawatan no apay a dagiti Saksi bay-anda a matay dagiti annakda imbes nga ipalubosda a mayalisonan iti dara.
Ti nanang ni Tim imbagana iti babai a damagenna kadagiti ubbing no ania ti makunada iti daytoy a banag, ket kasta ti inaramidna.
Inlawlawag ni Tim a pilienna a kanayon ti alternatibo a panangagas imbes a salungasingenna ti sinanay-Biblia a konsiensiana. Kinuna met ni Sam a nasaysayaat ti panagimbag ti kabsatna a babai nga immawat iti alternatibo a panangagas ngem kadagiti dadduma a pasiente a nagpayalison iti dara.Kimmita manen ti bumalay iti nanang ni Tim. Iti daytoy a gundaway, kinunana a saan a rumbeng a maikuyog a mamalaybalay dagiti ubbing. Agpada nga imbaga dagiti ubbing a pagragsakanda ti mangasaba, ken kunada pay a kaykayatda daytoy ngem ti agkatangkatang kadagiti kalsada a kas iti ar-aramiden dagiti dadduma a katawenanda. Nasdaaw ti babai iti sungbatda ket kinunana kadagiti ubbing nga agurayda iti apagbiit, sa simrek iti balayna. Anian a siddaawda idi rimmuar ti bumalay ket inikkanna ida iti nagpintas ken kabarbaro a lalat a bag, a mausarda iti ministerioda! Tagilakona dagitoy a bag. Gapu ta nagbalbaliwen ti kababalinna, napalubosan met dagiti ubbing a sumarungkar. Idi pumanawdan, ti 94 ti tawenna a nanang ti bumalay a dumdumngeg iti saritaan ket napan iti ridaw sa kiniddawna ti isasarungkar kenkuana ti nanang ni Tim iti pagtaenganna.
Bayat a mangaskasaba ti dua a kakabsat a babbai, napaliiwda daytoy a mensahe a naipaskil iti pagsardengan ti bus idiay Portugal: “Maysaak nga estudiante iti sikologo ket agar-aramidak iti tesis maipapan iti an-anito. No matulongannak, pangngaasim ta agsuratka iti daytoy nga adres iti E-mail . . .” Iti dayta a malem, itamtampok dagiti kakabsat ti artikulo iti Ti Pagwanawanan a napauluan iti “Im-impluensiaan Kadi ti An-anito ti Biagyo?” Nagsuratda iti E-mail ket intukonda ti magasin.
Kalpasan ti makalawas, ti babai a nangipaskil iti mensahe ket simmungbat iti kastoy: “Agyamanak iti tulongyo. Ladingitek ta diak nakasubalit a dagus. Kayatko ti maaddaan iti magasin a dinakamatyo. Itay laeng nabiit, tunggal adda dagiti Saksi nga umasideg kaniak, agdardarasak a mapan agtrabaho wenno aglugan iti bus isu nga awan pay ti nakasaritak kadakuada. Ammok a mangituktukonkayo kadagiti panagadal iti Biblia ket interesadoak iti dayta.”
Kinuna dagiti kakabsat: “Iti damo nga isasarungkarmi, nagadu dagiti saludsodna. Inikkanmi iti libro a Pannakaammo ken inyurnosmi ti panangyadalmi iti Biblia kenkuana. Kanayon a nakasagana a naimbag para iti panagadal ken tabtabunuanna itan dagiti amin a gimong ti kongregasion.”
Bayat a mangaskasaba iti lansangan, ni Lina, a maysa nga agibumbunannag iti maysa a siudad iti makin-abagatan nga Alemania, ket inasitgan ti maysa a babai nga agnagan iti Tatjana. “Malagipnak pay?” insaludsod ni Tatjana. Kuna ni Lina a saan. “Saan a nakaskasdaaw dayta,” intuloy ni Tatjana. “Naminsan laeng a nagam-ammota, ket lima a tawenen ti napalabas.” Inlawlawagna: “Idi primavera ti 1998, immasidegka kaniak iti lansangan ket intukonmo ti broshur nga Ania ti Kalikaguman ti Dios Kadatayo? Nagbalinak a nasabrak kenka ngem ti kinaanus ken kinamannakigayyemmo ti nangtignay kaniak a mangyawid ken mangbasa iti broshur. Natukay unay ti riknak kadagiti linaonna.” Idi agangay, dua a Saksi a saan a makaam-ammo ken ni Lina ti napan simmarungkar iti balay ni Tatjana. Gapu iti nabasa ni Tatjana iti broshur, immanamong a makipagadal iti Biblia. Idi nakitana manen ni Lina idi 2003, isu ket maysan a bautisado a Saksi. Kinapudnona, agpadada ken ni Lina a nag-auxiliary pioneer iti dayta a bulan!
Ti maysa a kabsat a babai idiay Pskov, Russia, ket nakaawat manipud iti sanga nga opisina iti adres ti maysa a lalaki nga agnanaed iti nasulinek a lugar. Mabayag a madanonna daytoy a lugar. Idi nakadanonen, naammuanna a ti lalaki saanna nga ammo a nagkiddaw iti panagadal iti Biblia. Iti maysa a puesto, gimmatang iti magasin a ti bookmark-na ket kupon a naggapu iti maysa kadagiti polietotayo. Kinuna ti lalaki nga impagarupna nga adda maited a premio, isu nga impatulodna ti kupon bareng no mangabak. Insungbat ti kabsat: “Nangabakka iti libre a panagadal iti Biblia!” Naginteres ti lalaki ken ti pamiliana, ket nairugi ti panagadal iti Biblia. Mamindua iti kada bulan a maikondukta ti panagadal, tangay adayo ti pagtaengan daytoy a pamilia manipud iti pagtaengan ti kabsat.
◼ OCEANIA
Bilang dagiti pagilian: 30
Populasion: 34,355,946
Bilang dagiti agibumbunannag: 93,718
Bilang dagiti panangyadal iti Biblia: 47,270
Ti 14 ti tawenna a ni Alyce, nga agnanaed idiay Australia, ket us-usarenna dagiti topiko kadagiti magasintayo no aramidenna dagiti asaynmentna iti eskuelaan. Makalawas nga insuratna ti salaysay maipapan iti saludsod nga, “Ania ti Pagbanagan ti Lubong?” Inlawlawag daytoy ti kaipapanan ti tiempotayo sigun iti padto ti Biblia. Dinamag ti maestrana no ania ti relihionna. Inlawlawag ni Alyce nga isu ket makipagad-adal iti Biblia kadagiti Saksi ni Jehova, ken inikkanna ti maestrana iti sumagmamano kadagiti magasintayo a basaenna.
Nupay ti maestra ket interesado kadagitoy, adda maestro a nangbalakad iti maestra ni Alyce a liklikanna dagiti Saksi ni
Jehova. Nupay kasta, kalpasan ti sumagmamano a bulan a panangpaliiw ti maestra iti nasayaat a kababalin ni Alyce, inkeddengna nga ammuen ti ad-adu pay. Gapu ta maseknan di la ket ta karaman ni Alyce iti napeggad a relihioso a kulto, napan iti lokal a libraria ken bimmulod iti libro a Dagiti Saksi ni Jehova—Manangiwaragawag iti Pagarian ti Dios. Binasana ti intero a tomo iti maysa a ngudo ti lawas! Gapu ta kombinsido a nabirokannan ti kinapudno, tineleponuanna ti nanang ni Alyce tapno agkiddaw iti ad-adu pay a literatura ken rinugianna ti makipagadal iti Biblia kadagiti Saksi. Iti uneg ti makabulan, tumabtabunon iti amin a gimong ken naguyugoyna ni lakayna ken ni nanangna a tumabuno kadagiti gimong iti Domingo. Nagpayadalda met iti Biblia ken nasayaat ti panagrang-ayda. Iti uneg ti tallo a bulan, nagbalin a di bautisado nga agibumbunannag ti maestra ni Alyce ken damo a naikkan iti paset iti Teokratiko nga Eskuelaan ti Panagministro. Kalpasan ti sumagmamano a bulan, nabautisaran da Alyce ken ti maestrana a ni Linda iti isu met la nga aldaw.Panunotem nga agnanaedka iti maysa nga isla a sika laeng ti agdaydayaw ken ni Jehova! Idiay Marshall Islands, kasta ti kasasaad ti maysa a kabsat a babai a ti asawana ket nakastrek iti trabaho idiay isla ti Mejatto. Aw-awisen dagiti kaarrubana a makigimong kadagiti Protestante, ngem nagkedked. Imbes ketdi, impamaysana nga insuro dagiti annakna babaen ti panangusarna iti libro a Ti Librok Dagiti Estoria ti Biblia. Inranudna pay ti pammatina kadagiti kaarrubana, ken ubba-ubbana ti inaudi nga anakna bayat a namalaybalay. Di nagbayag, naginteres dagiti dadduma, ket daytoy agmaymaysa a kabsat mangikonkondukta itan iti sumagmamano a panangyadal iti Biblia babaen ti broshur a Kalikaguman. Binulan nga ipatpatulodna ti reportna iti dati a kongregasionna. Itugtugotna dagiti annakna nga agbiahe iti napaut babaen ti bangka tapno tumabuno iti Memorial ken kadagiti asamblea a maang-angay idiay isla ti Ebeye. Dagiti kameng ti kongregasion idiay Ebeye ket agsursuratda kenkuana tapno paregtaenda, iranudda dagiti kapadasan iti serbisio iti tay-ak ken dagiti bambanag a naadalda kadagiti gimong ti kongregasion. Iti biang dagiti kakabsat,
maparparegtada met iti kinamatalek daytoy agmaymaysa a kabsat.Awan ti koriente kadagiti adu a nasulinek a purok idiay Papua New Guinea. Tapno agandar dagiti de koriente nga alikamen, agus-usar dagiti tattao sadiay kadagiti henerador wenno bateria. Tapno matulonganna dagidiay kapurokanna a mangtarus iti ad-adu pay maipapan iti Biblia, ti maysa a kabsat a babai a kabbaro a nabautisaran ket kayatna nga ipabuya ti sumagmamano a video nga inaramid dagiti Saksi ni Jehova. Apaman a nakategged babaen ti panaglakona iti taraon nga immulana, inasitganna ti maysa a babai a negosiante nga addaan iti telebision, VCR, ken henerador tapno damagenna no mabalin nga abanganna dagitoy. Inlawlawag ti kabsattayo a kayatna nga awisen ti amin a kapurokanna tapno buyaenda ti sumagmamano a naibatay iti Biblia a video a patienna a makatulong kadakuada iti naespirituan. Dagus a kinissayan ken naglaka ti panangpaabang ti negosiante kadagiti alikamenna, ket kunana a kayatna met a buyaen dagiti video. Immay ti dandani amin a kapurokanna. Kalpasanna, adu ti nangikuna a saanda nga ammo a nakasaksaknap ti trabaho dagiti Saksi ni Jehova. Nasdaawda met iti sangalubongan a panagkakabsat, banag a dida pay nakita iti bukodda a relihion. Adu a tattao a saan a mayat a makisarita idi kadagiti Saksi ti nangawis iti kabsat a sumarungkar iti pagtaenganda ta kayatda itan a maammuan ti ad-adu pay maipapan kadagiti patpatientayo.
Idiay Savaii, ti kadakkelan nga isla ti Samoa, imparit ti dadduma a lider ti komunidad a mangasaba dagiti Saksi ni Jehova kadagiti purokda. Ti maysa a kabsat a babai nga agnanaed iti kasta a purok ket nagtalinaed a natibker iti kinapudno bayat nga as-asikasuenna ti pumpon ti anakna. Tangay maangay ti pamumpon iti pagtaenganna, timmulong dagiti kakabsat manipud iti dua a kongregasion iti isla a mangdalus iti balay ken paraanganna, ken nangikabilda iti henerador. Nakita dagiti pumurok daytoy naayat a tulong. Ti panangorganisar ken panangpumpon dagiti kakabsat ket nagpaiduma la unay iti kaugalian iti Samoa.
Dua nga aldaw kalpasan ti pumpon, ti konsilio iti purok ket nangangay iti miting ken pinagsasaritaanda ti pasamak. Naay-ayo amin a miembrona no kasano a tinulongan dagiti Saksi ti natayan a pamilia, sakbay ken kalpasan ti pumpon. Nagustuan unay dagiti panguluen ti purok ti pannakaaramid ti pumpon nga uray la nagnunumuanda a baliwanda dagiti kaugalian iti pumpon iti Faa-Molimau a Ieova (Ti Pamay-an Dagiti Saksi ni Jehova). Kalpasan ti dua nga aldaw, naangay ti tinawen a Panglaglagip iti ipapatay ni Kristo iti maysa a bassit a Kingdom Hall a sumagmamano a kilometro ti kaadayona. Tallo a trak ti nagluganan dagiti pamilia iti daytoy a purok tapno makatabunoda. Ita, nawayan a mangasaba dagiti kakabsattayo iti daytoy maysa kadagiti kadakkelan a purok iti isla. Dua nga special pioneer ti mangikonkondukta iti innem a panagadal iti Biblia sadiay. Ti Panagadal iti Libro ti Kongregasion ket saan laeng a tabtabunuan dagiti interesado iti purok no di pay ket ti panguluen ti purok.
Idiay Fiji, nakatugaw iti sirok ti kayo ti maysa a baro a mangpampanunot iti biag ken masakbayanna. Inawisna ti maysa a lumablabas a makikatugaw kenkuana. Nairana a maysa a kabsat a lalaki ti limmabas, isu a ginundawayanna ti nangasaba. Nupay nangnangngegen daytoy a baro ti kari ti Biblia maipapan iti paraiso a daga, napabaro ti interesna iti pannakisaritana iti kabsat. Inkeddengna ti agsubli iti isla a pagnanaedan ni nanangna ken rinugianna ti nagadal iti Biblia. Apaman a nakasangpet sadiay, dagiti bumusbusor a kameng ti pamiliana dinadaelda dagiti mulana. Pinapanaw ti panguluen ti purok, a kinunana nga awan ti ipalubosda a relihion no di laeng ti relihionda. Kalpasanna, napan iti purok nga ayan ni tatangna iti sabali a bassit nga isla. Nangaramid sadiay iti bangka manipud iti daan a galba, ket linawas nga aggaud a bumallasiw iti nadawel a baybay tapno makitaripnong kadagiti Saksi. Nagtultuloy ti ibubusor ti pamiliana, isu a napilitan nga agbiag a bukbukod iti naiputputong a lugar iti isla. Kamaudiananna, immakar iti kadakkelan nga isla, nga asideg iti dakkel a kongregasion. Nagtultuloy a rimmang-ay iti naespirituan kas di bautisado nga agibumbunannag.
◼ DAGITI KONTINENTE TI AMERICA
Bilang dagiti pagilian: 56
Populasion: 857,137,983
Bilang dagiti agibumbunannag: 3,095,083
Bilang dagiti panangyadal iti Biblia: 2,898,369
Iti maysa nga agsapa ti Domingo idi Setiembre 2002, maysa a kabsat a babai iti Estados Unidos ti simmarungkar iti akinkukua iti pagtagilakuan. Tangay okupado pay laeng ti aglaklako kadagiti aggatgatang, nagpagnapagna ti kabsat iti uneg ti pagtagilakuan. Napaliiwna ti maysa a babai nga agdardaras nga immuneg tapno gumatang iti mala, ti katupag ti rosario ti Katoliko iti Hindu. Ti mala ket naubon a beads a kolor kayumanggi a mausar para iti maulit-ulit a panagkararag kadagiti adu a didiosen ti Hindu. Ti babai nga agnagan iti Shwe ket kasla nakabirok iti kapkapnekanna a mala, isu nga inasitgan ti kabsat sa
kinunana: “Dispensarennak. Damagek man, naaramid kadi iti sandalwood dayta a mala?”“Wen! Inkarkararagko iti dios a maaddaanak koma iti nasayaat a mala, ket nakabirokak ita. Angotem!”
“Nagbanglo! Siasino a dios ti pagkararagam iti dayta?”
“No dadduma, ni Ganesa wenno ni Siva wenno ni Durga. Isuda ti pagkararagak iti daytoy a mala.”
“Maisaludsodko man, ammom kadi no siasino kadakuada ti katan-okan a dios?”
“Mariroak iti dayta. Diak ammo no siasino ti katan-okan a dios.”
“Kanayon a mariroak met idi maysaak pay a Hindu ken agdaydayawak kadagidiay a didiosen. Ngem ita, ammokon no siasino ti mannakabalin-amin a Dios. Palubosannak a mangyam-ammo kenka. [Imbasana ti Salmo 83:18.] Ni Jehova a Dios ti Mannakabalin-amin iti intero a daga. Natantan-ok ngem da Siva, Ganesa, ken Durga. Mabalinko nga isuro kenka nga awan bayadna ti maipapan iti mannakabalin-amin a Dios.”
“Talaga nga isurom kaniak ti maipapan iti pudno a Dios? Nasungbatan ita nga aldaw ti amin a kararagko!”
“Kasano?”
“Inaldaw nga inkarkararagko a maaddaanak iti nasayaat a mala tapno babaen iti daytoy, mabirokak ti pudno a Dios. Inkarkararagko pay a maaddaanak koma iti pudno a gayyem a makatulong kaniak gapu ta awananak iti kasta a gayyem. Ania ti naganmo?”
“Mala ti naganko, ket wen, mabalin a siak ti gayyem a mangiwanwan kenka babaen ti Biblia.”
“Diak mamati nga inikkannak ti Dios iti sibibiag a Mala!”
Dagiti dua a babbai inyurnosda nga adalen ti broshur a Kalikaguman. Kanayon a makigimgimongen ni Shwe ken kalatna ti agpabautisar.
Idiay Honduras, ti kabsat a babai a misionero a mangikarkarigatan nga agsursuro iti Espaniol ket simrek iti maysa a pagopisinaan ken nangipaima kadagiti magasin iti resepsionista. Kalpasanna, nagkiriring ti telepono iti opisina, ket impagarup ti kabsat a pagtugtugawen ti resepsionista, isu a nagtugaw. Sabali ti nagawatanna. Kinapudnona, pappapanawen ti reseptionista. Kabayatanna, adda maysa a babai iti asideg nga opisina a mangikarkararag iti tulong tapno maisardengna ti imoral a relasionna iti naasawaan a lalaki ken tapno maammuanna ti umiso a pamay-an ti panagdayaw iti Dios. Idi nangngegna ti timek ti kabsattayo iti reception area, patienna a nasungbatan ti kararagna. Ngem idi nangngegna ti resepsionista a mangpappapanaw iti kabsat, nagamak amangan no nakapanawton ti misionero sakbay pay a makasaritana. Nupay kasta, kinuna ti misionero idi agangay: “Gapu ta sabali ti nagawatak iti imbaga ti resepsionista, addaak pay laeng sadiay idi agdardaras nga immasideg ti babai tapno makisarita kaniak. Agpadakami a kombinsido nga inturong ni Jehova daytoy.” Adu a tawen sakbayna, adda dagiti nabasa ti babai a publikasion dagiti Saksi ni Jehova, ket ita, desidido a mangipamaysa kadagiti naespirituan a banag. Insardengnan ti pannakirelasionna iti naasawaan a lalaki, agad-adalen iti Biblia ken makigimgimongen a kanayon.
Ti maysa a kabsat a babai nga special pioneer idiay El Salvador ket naidestino iti kongregasion nga addaan iti teritoria a manmano laeng ti mangipangag iti kinapudno. Inkararagna ti tulong ni Jehova tapno makabirok kadagiti interesado. Iti maysa a Domingo, adda agkabannuag a lalaki a nakasaritana maipapan iti Biblia. Inawatna ti libro a Pannakaammo ken immanamong a masarungkaran. Agkarasubli ti kabsat, ngem pulos a dina nadanon ti lalaki iti pagtaenganna. Naam-ammona ti asawa ti lalaki a saan unay nga interesado iti Biblia. Iti maikalima nga isasarungkarna, pinastrek ti asawa a babai nupay kinunana a “sangapulo a minuto laeng.” Dinamag ti kabsat no ammona ti ayan daydiay libro a Pannakaammo. Nabirokanna ti libro, ket ti kabsat
inlawlawagna iti apagbiit dagiti sumagmamano a punto manipud iti libro ken indemostrana ti panagadal iti Biblia. Kalpasan ti tallo a bulan a panagadal, inrugi ti babai ti tumabuno kadagiti gimong ken nangiparangarang kadagiti pudno a pagilasinan ti panagrang-ay. Ni ngay lakayna? Iti panaglabas ti tiempo, nakipagadal met. Kalpasanna, inrugina ti tumabuno kadagiti gimong a kaduana ti pamiliana. As-asikasuen itan dagitoy nga agassawa a pagbalinen a legal ti panagtiponda. Nagsayaat dagiti resulta ti kinapinget buyogen ti kararag.Ni Margarita, nga agnanaed idiay Mexico, insalaysayna ti panagballigina iti di pormal a panangasaba: “Iti klasemi maipapan iti panagdait, insarsaritak iti maysa kadagiti kaklasek ti maipapan iti Biblia. Kinunana a patienna a naragsak ti panagbiag dagiti pamilia a Saksi ni Jehova, tangay kanayonda a nakaisem ken kasla nakaragragsakda. Imbagak kenkuana nga umiso ti kapanunotanna ket dagidiay agtalek ken ni Jehova ken agbiag a maitunos kadagiti prinsipio ti Biblia mapasaranda ti pudno a kinaragsak.” Inrugi ni Margarita nga iyadalan iti Biblia iti pagtaengan ti kaklasena, a kanayon itan a makigimgimong ken rumangrang-ay ti pannakaammona iti kinapudno.
Idiay Dominican Republic, nangibati ni Ana iti broshur a Kalikaguman iti lalaki a kasla madandanagan. Naospital ni baketna tapno maopera gapu iti kanser. Kinunana a kaay-ayo ni baketna ti agbasa, isu nga itugotna ti broshur idiay ospital. Ti asawa ti lalaki a naam-ammo ni Ana idi agangay kinunana: “Mabalinen nga irugita ti agadal. Nakasaganaak.” Idi agangay, inlawlawag ti babai a bayat ti kaaddana iti ospital, nagkarkararag iti Dios tapno tulonganna a mangbirok iti pudno a relihion. Iti dayta met la a gundaway, insangpetan ni lakayna iti broshur a Kalikaguman. Binasana ket nabigbigna a dayta ti sungbat ti Dios iti kararagna, isu a dagus nga inkeddengna ti agbalin a maysa kadagiti Saksi ni Jehova. Nupay masapul a magmagna iti maysa nga oras tapno makatabuno kadagiti gimong iti Kingdom Hall, napartak ti panagrang-ayna ket di nagbayag, naaprobaran
kas agibumbunannag. “Ita, matungpalkon ti inkarik iti Dios,” kinunana. Iti awan pay innem a bulan, nabautisaran iti kombension distrito, ket agingga ita siraragsak nga agserserbi ken ni Jehova.Ni Martin, 13 ti tawenna nga agibumbunannag nga agnanaed idiay Paraguay, kaay-ayona ti mangasaba iti di pormal a pamay-an. Maysa nga aldaw bayat nga agaw-awid manipud iti eskuelaan ken mangaskasaba iti lumablabas, adda nakitana a bassit a pakete iti kalsada. Pinidut ni Martin ket nakitana a naglaon daytoy iti kuarta. Imbulsana daytoy tangay awan met ti mangsapsapul. Bayat nga intultuloyna ti nagna, pampanunotenna: ‘Iti daytoy a kantidad, mabayadakon ti tallo a bulan nga utangko a matrikula ken makatulongak pay a mangbayad iti sumagmamano a paggastuan dagiti dadakkelko.’ Kabayatanna, dina napuotan a nagna iti dalan a dati a dina pagpagnaan. Nakitana sadiay ti maysa a lalaki a nakadkadlaw nga adda birbirokenna. Nangngegna a kinuna ti lalaki nga adda napukawna a 115,000 a guarani ($18.25, U.S.) ket dayta laengen ti nabatbati a kuartana iti dayta a bulan. Dagus a nalagip ni Martin ti sasao ti maysa kadagiti panglakayen a nangirepaso kenkuana kadagiti saludsod iti bautismo. Kinuna ti panglakayen: “Maipasangokanto kadagiti adu a pannubok, nangnangruna ita ta agpabautisarkan.”
Kasapulan unay ni Martin dayta a kantidad. Iti dayta nga aldaw, nagbassit ti kinnanna idiay eskuelaan, ken awan pay ti umdas a pagbayadna iti matrikulana. Nupay kasta, gapu ta ammona nga umiso ti aramidenna, dinamag ni Martin iti lalaki no mano ti napukawna. Ti kantidad ket eksakto iti napidut ni Martin. Insubli ni Martin ti kuarta ti lalaki sa nangted iti polieto ken kinunana nga isu ket maysa kadagiti Saksi ni Jehova. Gapu iti ragsakna, inulit-ulit ti lalaki ti nagyaman ken inarakupna ni Martin. Intedna ti adresna ken ni Martin tapno masarungkaranna. Nabautisaran ni Martin ken dagiti dadakkelna iti nabiit pay nga asamblea sirkito.
◼ ASIA KEN TI MAKINTENGNGA A DAYA
Bilang dagiti pagilian: 47
Populasion: 3,931,574,927
Bilang dagiti agibumbunannag: 568,370
Bilang dagiti panangyadal iti Biblia: 417,308
Ni Kumiko, a maysa a kabsat a babai a payunir nga agnanaed iti asideg ti Tokyo, Japan, ket limitado ti maaramidanna iti panagbalaybalay a ministerio gapu iti parikutna iti salun-at. Gapuna, ad-adu ti busbusbosenna nga oras a mangasaba babaen ti surat. Dagiti kakongregasionna intedda kenkuana dagiti adres dagidiay saanda a makasarsarita gapu ta manmano nga addada iti pagtaenganda. Nagaramid kadagiti surat, ket intulod dagita dagiti agibumbunannag iti kongregasion. Iti nasurok a makatawen, awan ti naawatna a subalit. Kaskasdi, siaanus nga intultuloyna ti nagsurat. Kamaudiananna, kalpasan a nakaaramid
iti agarup 1,500 a surat, nakaawat iti postcard a nagkuna: “Pagyamanan iti suratmo. Interesadoak unay iti imbagam. Nawayaak kadagiti sumaganad nga aldaw, ket urayenka a sumarungkar kaniak.” Buyogen ti lua gapu iti rag-o, sinarungkaranna dayta a tao, ken dagus a nairugi ti panangyadal iti Biblia. Kinunana: “Idi damo, adda bassit danagko maipapan iti panagsurat, ngem ita, agtalekak a no siaanus a birokentayo dagiti marakarnero a tattao, sigurado a bendisionan ni Jehova dagiti panagreggettayo.”Maysa nga agsapa bayat a mamalaybalay idiay India, nagtuktok iti ridaw ti maysa a kabsat a babai. Naliday ti rupa ti babai a nanglukat iti dayta. Nakadalupisak ti dua nga ubbing a mangsangsango kadagiti awan nagyanna a plato. Inranud ti kabsattayo ti makaliwliwa a mensahe maipapan iti Pagarian ti Dios ken dagiti itdenna a bendision, ket dimngeg a naimbag ti babai. Kabayatanna, dagiti mabisin nga ubbing maulit-ulit a dumawdawatda iti taraon iti inada. Nagkedked. Kinuna ti kabsat a maragsakan nga aguray agingga a mapakan ti babai dagiti annakna. Kalpasanna, agsangiten ti babai. Inlawlawagna nga adda sabidong ti taraon. Ipakanna koman kadagiti annakna ngem nangngegna nga adda nagtuktok iti ridaw. Gapu kadagiti parikut iti pamilia, a pakairamanan ti mammartek nga asawana, inkeddengnan a papatayen ti bagina ken ti dua a babassit pay nga annakna. Apaman a nangngeg daytoy ti kabsat, imbellengna ti taraon, nagdardaras a napan iti asideg a paggatangan, ket gimmatang iti taraon para iti pamilia. Duada a nangluto iti taraon ket intedda kadagiti ubbing. Naliwliwa unay ti babai gapu iti mensahe maipapan iti Pagarian. Immanamong a mayadalan iti Biblia ket maysa itan a bautisado a Saksi. Kaduana ti dua nga annakna a makigimgimong. Itay nabiit, makigimgimong metten ni lakayna ken nagsayaat ti panagrang-ayna.
SARS! Daytoy a sao ti namagbuteng kadagiti adu a tattao idiay Taiwan. Madandanagan a binuya dagiti agnanaed sadiay dagiti damag no kasano a nagraira daytoy a sakit idiay Hong
Kong. Kalpasanna, naapektaran ti Taiwan! Masapul a makuarentinas dagiti sumagmamano nga ospital gapu iti panagwaras ti impeksion, ken adu a tattao ti nagbuteng amangan no isuda ti sumaruno a biktima. Sakbay pay nga inkalikagum ti gobierno, ti sanga nga opisina tinulonganna dagiti kongregasion a maaddaan kadagiti termometro tapno maammuan dagiti kakabsat ti temperatura dagiti amin a makigimong.Kalpasanna, kiniddaw ti gobierno nga amin a rehistrado a relihion liklikanda ti mangasaba kadagiti kabalbalayan. Ti naisangsangayan a programa ti Gimong ti Serbisio tinulonganna dagiti kakabsat a mangkita no kasanoda a mabaliwan dagiti aktibidadda tapno maliklikanda dagiti pakarigatan. Maysa nga special pioneer ti nangyaplikar iti singasing a sumarungkar uray kadagidiay nangipakita iti bassit laeng nga interes. Kas resultana, immadu dagiti iyad-adalanna iti Biblia. Nasayaat ita ti panagrang-ay dagiti sumagmamano kadagitoy a kabbaro nga iyad-adalanna. Kinunana: “Ti dati a narigat a situasion, nagbanag iti panangtagiragsakko iti nabungbunga a ministerio.”
Bayat a mangaskasaba idiay Cyprus, ti maysa a kabsat a babai naam-ammona ti babai a nagkuna nga isu ket okupado. Babaen ti silulukat a tawa iti kosina, nagsao iti apagbiit ti kabsat, imbasana ti Salmo 72:12-14, ken inyurnosna ti agsubli iti tiempo a kombeniente kenkuana. Idi nagsubli, nasdaaw ti kabsat a nakangngeg a sigagagar ti babai a mangur-uray iti panagsublina. Apay? Naliwliwa unay ti babai iti nadakamat a kasuratan—agmalmalem a pinampanunotna dayta. Ti kabsat intukonna ti panagadal iti Biblia iti pagtaengan, ket sidadaan nga immanamong ti babai. Ita, daytoy a babai ap-apresiarennan dagiti maad-adalna iti Sao ti Dios.
Ni Polo, maysa a lalaki a taga Cambodia, ket inrugina ti makipagadal iti maysa a misionero ken nasayaat ti panagrang-ayna. Tabtabunuanna ti amin a lima a gimong ti kongregasion idiay Phnom Penh. Kalpasanna, imbaga ti amona a mayakar idiay Battambang, maysa a siudad nga adda iti asideg ti beddeng
ti Thailand. Awan ti kongregasion sadiay, isu nga inted ni Polo ti numero ti cell phone-na iti mangyad-adal kenkuana, ket intultuloyda ti nagadal babaen ti telepono iti 30 a minuto kada Mierkoles ken Biernes. Kayat pay ni Polo ti makiraman iti panagkomento iti Panagadal iti Pagwanawanan. Gapu ta nakaad-adayo ti kongregasion, isuratna dagiti tallo wenno uppat a sungbatna para iti panagadal iti dayta a lawas sa itedna dayta iti manangaywan iti Panagadal iti Libro ti Kongregasion tapno ibasana iti gimong iti dayta a lawas. Napabileg dagiti agibumbunannag iti kongregasion gapu iti kinaregtana. Padpadasenna met a kasabaan dagidiay masarakanna. Iti panagluganna iti bus nga agpapan ken aggapu iti Phnom Penh, kinasabaanna ti nakaad-adu a tattao ken pinaregtana ida a tumabuno kadagiti gimong. Ti sumaruno a kalatna ket ti panagbalin a di bautisado nga agibumbunannag.Idiay Mongolia, naam-ammo ti dua a kabsat a babbai ti lalaki nga agarup 30 ti tawenna. Pinagurayna ida, simrek iti balayna, sa inruarna ti dua a libro: Ti Panangbiruk ti Sangatauan iti Dios ken Ti Katan-okan a Tao a Nagbiag Pay Laeng. Kinunana a nakipagadal iti Biblia kadagiti Saksi ni Jehova idiay Poland, 12 a tawenen ti napalabas. Idi nagsubli idiay Mongolia idi 1993, dagus a nagsurat tapno agkiddaw kadagiti Saksi a sumarungkar kenkuana. Ngem iti dayta a tiempo, awan ti Saksi idiay Mongolia isu nga awan ti napan nangsarungkar kenkuana. Idi agangay, napan idiay India tapno agadal iti maysa nga unibersidad, a nagyananna iti lima a tawen. Bayat dagidiay a tawen, manipud idi 1994 agingga idi 1998, awan ti nakasaritana a Saksi ni Jehova. Kalpasanna, nagsubli idiay Mongolia, ket iti kaaddana sadiay nakabirok met laengen kadagiti kakabsat. Nairugi manen ti panagadal iti Biblia iti pagtaengan, ket damo a timmabuno iti gimong idi Abril 2003. Siraragsak itan nga ad-adalenna ti broshur a Kalikaguman.
Ti maysa a babai a Budista idiay Sri Lanka ket pinagsiddaawna dagiti dua a Saksi babaen ti sibabara a panangawatna
kadakuada iti pagtaenganna, a kunana nga isuda ti sungbat ti kararagna! Inlawlawagna a nabiit pay a nagpakamatay ti ubing pay nga anakna a babai gapu iti panangdisiplinana kenkuana. Ti Budista a padi a kinasaritana tapno agpaliwliwa, kinunana a mayanakto manen ti anakna ken agsubli tapno agibales kenkuana. Daytoy ti namagbuteng unay iti babai. Maysa kadagiti gagayyemna ti nagkuna a dagiti Kristiano saanda a patien dagiti kasta a banag. Isu nga inkarkararag ti babai a makabirok koma iti pudno a Kristiano, a pampanunotenna a mabalin a Katoliko ti maibaon. Imbes ketdi, dua a Saksi ni Jehova ti simmarungkar ken nangliwliwa kenkuana babaen ti kinapudno iti Biblia. Agad-adal itan iti Biblia iti laksid ti ibubusor ti Budista a padi.Idiay Kyrgyzstan, adda maysa nga agkabannuag a babai nga adun a tawen a tumabtabuno iti iglesia Evangelical. Idi binasana ti Biblia, nakitana ti nagdumaan ti naisurat sadiay ken ti maisursuro iti simbaanda. Kas pagarigan, saanna a maawatan ti isursuro ti simbaan a ni Jesu-Kristo ket isu met laeng ti Ama ken ti Anak. Gapu ta kombinsido a ti anak ket masapul nga adda amana, naimpusuan a nagkararag iti Ama ni Jesu-Kristo, a dumawdawat iti tulong tapno mabirokanna dagiti sungbat dagiti saludsodna maipapan iti Biblia. Iti sumaganad nga aldaw, adda dua a Saksi ni Jehova a simmarungkar kenkuana. Insaludsodda: “Ania ti panagkunam? Siasino ti insuro ni Jesu-Kristo a pagkararagan dagiti adalanna, ken ania a nagan ti indagadagna a santipikarenda?” Nasdaaw idi malagipna ti inkararagna maysa nga aldaw sakbay a sinungbatan ti Ama ni Jesu-Kristo dagitoy a saludsod. Kalpasan ti panagsasaritada, awan panagduaduana a ti Dios sinungbatanna ti kararagna. Immanamong ti babai a regular a mayadalan iti Biblia ken rinugianna ti tumabuno kadagiti gimong dagiti Saksi ni Jehova. Idi naammuanna a ni Jehova ti Ama ni Jesus, rinugianna ti agkararag ken ni Jehova nga us-usarenna ti personal a naganna. Ita, rumangrang-ayen iti naespirituan ken iranranudna kadagiti kakabagianna dagiti naammuanna.
◼ AFRICA
Bilang dagiti pagilian: 56
Populasion: 755,145,559
Bilang dagiti agibumbunannag: 950,321
Bilang dagiti panangyadal iti Biblia: 1,666,518
Kadagiti adu a biahe ti bus iti nagbabaetan dagiti siudad idiay Zambia, malinglingay dagiti pasahero babaen kadagiti video a masansan a naranggas ken imoral ti estoriana. Ti agassawa a misionero a naglugan iti bus a mapan iti kabesera sinaludsodda no mabalin nga ipabuyada ti video a The Bible—Its Power in Your Life. Immanamong ti drayber. “Nakitami a sipapasnek a nagbuya ken nagimdeng a naimbag dagiti pasahero,” malagip ni Ruth. “Kalpasanna, nakisaritakami kadakuada, ken nangitukonkami kadagiti polieto ken magasin. Sibabara nga inawatda dagita.” Dagiti agassawa dinamagda iti drayber no mabalin nga ipabuyada manen ti video, ta pampanunotenda a mabalin nga agipabuyanto
manen. Dagus nga in-rewind ti drayber ket impabuyana manen dayta. Kinuna ni Richard: “Dagiti pasahero tinagiragsakda a binuya ti video iti maikadua a gundaway, ket maragsakankami ta insaludsodmi no mabalin nga ipabuyami dayta.”Idiay Malawi, ti agtutubo nga estudiante a ni Miranda ipakpakitana ti libro a Ti Sekreto ti Kinaragsak iti Pamilia iti maysa a kaklasena bayat ti panaginanada kalpasan ti klase. Nangngeg ti mannursuro ti saritaanda ket inayabanna ni Miranda iti opisinana. Dinamagna no apay nga imbaga ni Miranda a masapul a makiasawa ti gayyemna. Kinuna ni Miranda a saanna nga imbaga a makiasawa ti gayyemna. Imbes ketdi, inlawlawagna no kasano a ti libro matulonganna dagiti pamilia a mangbirok iti napaypayso a kinaragsak. Nakapungtot ti mannursuro ket binugkawanna ni Miranda: “Nakaub-ubingka pay tapno mangbalakadka maipapan iti panagasawa!”
Malmaldaangan ken agpigpigerger a pimmanaw ni Miranda iti opisina ti mannursuro. Kalpasan ti dua nga aldaw, inayaban manen ti mannursuro iti opisinana. Insalaysay ni Miranda no ania ti simmaruno a napasamak: “Kinuna ti maestrok a ladingitenna ti panangbugkawna kaniak, ken imbagana a kanayonda nga agap-apa ken ni baketna agingga a nagsinada. Nagkiddaw kaniak iti kopia ti libro nga impakitak iti kaklasek. Naragsakanak a nangted kenkuana iti maysa. Kalpasan ti dua a lawas, imbagana kaniak a dakkel ti naitulong ti libro ken inranudna dayta ken ni baketna. Idi agangay, nagsinnubliananda ken ni baketna.”
Idiay South Africa, ti lakay nga agnagan iti Eric ket adun a tawen a makipagad-adal iti Biblia kadagiti Saksi ni Jehova, ngem ti panagsigariliona ti manglaplapped kenkuana a rumang-ay iti naespirituan. Kalpasan a nabautisaran ni baketna, inkeddengna met a ragpaten dayta a kalat. Nangaramid iti sumagmamano a dadakkel ti letrana a kopia ti teksto iti Biblia a masarakan iti 2 Corinto 7:1, a kunana: “Yantangay adda kadatayo dagitoy a kari, dungdungnguen, dalusantayo koma ti bagbagitayo iti tunggal pakatulawan iti lasag ken iti espiritu, nga an-anayentayo ti kinasanto iti panagbuteng iti Dios.” Dagiti teksto ket inkabil ni Eric kadagiti lugar a nalakana a makita iti amin a paset ti pagtaenganna. Tunggal makasigsigarilio, basaenna ti teksto ken agkararag ken ni Jehova tapno tulonganna nga agsardeng nga agsigarilio. Kas resultana, naisardengna ti agsigarilio iti nasurok a sangapulo a bulan. Maysa itan ni Eric a di bautisado nga agibumbunannag ken planona ti agpabautisar iti sumaganad a kombension distrito.
Bayat nga agur-uray iti bangka idiay isla ti Seychelles, napaliiw ti kabsat a babai a misionero ti maysa a babai a nakatugaw nga agmaymaysa. Nupay nabannog ti kabsat kalpasan ti agmalmalem a panangasabana, inasitganna ti babai ken intukonanna iti polieto. Inawatna dayta, ken kinunana nga isu ket maysa a Hindu. Kalpasan ti sumagmamano nga aldaw, nagsarakda manen, iti kalsada, ken intulag ti kabsat nga iyadalanna iti Biblia. Ti asawa ti babai ket maysa a doktor ken Katoliko, ngem kalpasan a nabasana dagiti libro a Panangbiruk ti Sangatauan iti Dios ken ti Pannakaammo, immanamong a makipagadal. Maysa a rabii, ti agassawa inawisda ti kabsat ken ni lakayna para iti espesial a barbecue. Duada a nangpuor kadagiti rebultoda ken linutoda ti taraon iti rabaw ti apuyna! Di nagbayag, rinugiandan ti makigimong ken makiraman iti serbisio iti tay-ak. Kalpasan ti bautismoda, duada a nag-auxiliary pioneer. Tangay nagbassit ti isla, nalatak ti kabsat a lalaki iti komunidad. “Ti doktor ket nagbalinen a padi,” inyang-angaw dagiti dadduma. Agserserbi itan kas ministerial nga adipen, ket siraragsak nga agserserbi ni baketna kas regular pioneer.
Nagsursuro ni Ishmael iti sign language tapno matulonganna a mangammo iti kinapudno dagiti tuleng idiay Zimbabwe. Maysa nga aldaw bayat a nakalugan iti bus, nakakita iti tuleng a babai a dumawdawat iti kuarta kadagiti pasahero. Kinasabaan ni Ishmael ken inyurnosna no kaanona a sarungkaran. Idi insaludsodna iti babai no ania ti insuro ti relihionna no apay a tuleng, insungbat ti babai: “Kunada a pagayatan ti Dios nga agbalinak a tuleng.” Inlawlawag ni Ishmael a saan a pagayatan ti Dios nga agbalin a tuleng dagiti tattao, a dagiti kasta a kasasaad ket bunga ti natawidtayo a basol ken kinaimperpekto. Inlawlawagna pay nga iti saanen
a mabayag, pukawento ti Dios ti amin nga an-annayen. Insungbat ti babai: “Kayatko a maammuan no apay a kinaulbod ti insuro kaniak ti relihionko.” Idi sinarungkaran ni Ishmael iti maikatlo a gundaway, kinuna ti babai: “Manipud ita, kaduadakon. Diak kayaten ti mamati kadagiti kinaulbod.” Nayadalan iti Biblia, ken kanayonen a makigimgimong ken namnamaenna a di agbayag, kualipikadon kas di bautisado nga agibumbunannag.Idiay Ghana, bassit ti panawen dagiti tattao a mangusig kadagiti naespirituan a banag gapu ta okupadoda a mangged. Ti kabsat a babai a regular pioneer kinasaritana ti maysa nga agkabannuag a lalaki iti panagbalaybalay a ministerio ken kiniddawna ti uray lima a minuto laeng iti tiempona tapno pagsaritaanda ti Biblia. Kinuna ti lalaki: “Kanayon nga okupadoak iti agmalmalem. Agaw-awidak laeng iti pasado alas otso iti rabii tapno maturog.”
Dinamag ti kabsat: “Mabalin kadi ti mangbusbos iti bassit laeng a tiempo iti pannaturogmo tapno adalenta ti Biblia?”
Kinuna ti lalaki: “No la ket ta umayka iti pasado alas otso iti rabii.” Iti sumaganad nga aldaw, ti kabsat ken ti lakayna napanda iti balay ti lalaki iti eksakto alas otso iti rabii. Kasangsangpetna laeng manipud iti trabaho. Nairugi ti panangyadal iti Biblia, ket di nagbayag, makigimgimongen. Kalpasanna, kualipikadon kas di bautisado nga agibumbunannag ken nagpabautisar idi agangay. Natukay unay ti rikna ni baketna gapu kadagiti panagbalbaliw nga inaramidna iti biagna isu nga immanamong met a mayadalan iti Biblia ket di nagbayag, kualipikadon kas di bautisado nga agibumbunannag. Dagiti kaarruba ken ti kaaduan kadagidiay makaammo iti napalabas a kabibiag ti lalaki nasdaawda idi makitada a mangaskasaban iti binalaybalay. Adu ti mayat a mangammo no ania ti namagbalbaliw iti kasta a tao a pagaammo kas mammartek, mannanakaw, ken adikto iti droga. Idi agangay, 22 a tattao iti ili ti nagkiddaw a mayadalan iti Biblia. Sangapulo ket dua kadakuada ti tumabtabunon kadagiti gimong iti kongregasion ket mabalin a di agbayag, kualipikadodan kas di bautisado nga agibumbunannag.
[Ladawan iti panid 43]
Da Steponas ken Edvardas, Lithuania
[Ladawan iti panid 47]
Ni Alyce ken ti maestrana a ni Linda, Australia
[Ladawan iti panid 51]
Ni Mala, Estados Unidos
[Ladawan iti panid 56]
Ni Kumiko, Japan
[Ladawan iti panid 61]
Da Ruth ken Richard, Zambia