Surat ti Bagi a Manarawidwid

Patgenmi a Kakabsat:

“MAADDAANKAY koma iti di kaikarian a kinamanangngaasi ken talna manipud iti Dios nga Amatayo ken iti Apo a ni Jesu-Kristo.” (1 Cor. 1:3) Anian a panangseggatayo iti tiempo inton amin nga agang-anges a banag ipaayda ken ni Jehova ti dayaw a pakaikarianna! (Sal. 150:6) Bayat nga ur-urayentayo dayta a naindaklan nga aldaw, itultuloytayo nga iwaragawag ti naimbag a damag maipapan iti Pagarian ti Dios ken mangaramid kadagiti adalan.

Ti panangasaba ket isu ita ti nakaipamaysaan dagiti aramid ni Jehova ditoy daga. (Mar. 13:10) Gapu ta sipapanunottayo unay iti pannakaseknan ni Jehova iti daytoy a trabaho, ikararagtayo daytoy kenkuana, a bigbigentayo a tunggal tao ket adda gundawayna a magunggonaan iti naipaay a subbot. (Apoc. 14:6, 7, 14, 15) Pudno, adda dagiti sangsanguentayo a karit, ngem anian a yamantayo ta ‘nakawesantayo iti pannakabalin manipud iti ngato’ tapno maitungpaltayo daytoy a ministerio!​—Luc. 24:49.

Makapnek ti panangtaliaw iti napalabas a tawen serbisio ken panangutob no ania ti nairingpas ni Jehova babaen dagiti nasungdo nga adipenna. Gapu ta pinabileg ti nasantuan nga espiritu, dagiti adipen ti Dios impakitada ti ayat a kas iti impakita ni Kristo, a parparmekenda ti guranggura iti intero a lubong. Nabatad ti kasta nga ayat kadagiti kombensiontayo. Manipud idi Hunio agingga idi Disiembre 2003, dagiti delegado manipud iti nasurok a sangagasut a pagilian, tinabunuanda ti 32 nga internasional a kombension a naangay kadagiti innem a kontinente. Dagiti misionero, international servant, ken Bethelite nga agserserbi kadagiti sabali a pagilian ket nainterbiu kadagiti distrito ken internasional a kombension.

Kadagitoy a kombension, naawattayo dagiti publikasion a ‘Kitaem ti Nasayaat a Daga’ ken Agsursuroka iti Naindaklan a Mannursuro. Maysa pay, nayanunsio a mangrugi a mausar ti narebisar a libro para iti Pioneer Service School iti ngudo ti 2004 a tawen serbisio. Dagiti nabayagen  a payunir a nagturpos iti daytoy a klase ket in-inut a maawis a tumabuno kadagiti klase nga agpaay kadagiti kabbaro a payunir.

Babaen ti tulong ti Dios ken kinamanagparabur dagiti tattao, adu pay a Kingdom Hall ti nabangon, nangruna kadagiti nakurapay a pagilian. Adu a pagilian ti mangpalpalawa kadagiti sanga nga opisina gapu ta dumakdakkel ti panagkasapulan iti naespirituan a taraon iti intero a lubong. Ti broshur a Tagiragsakenyo ti Biag nga Agnanayon Ditoy Daga! ket magun-odanen iti 299 a pagsasao, a nayimprenta iti dagup a 139 a milion a kopia; ti Pannakaammo a Mangiturong iti Biag nga Agnanayon ket nasuroken a 93 a milion a kopia iti 161 a pagsasao; ken nasurok a 200 a milion a kopia ti broshur nga Ania ti Kalikaguman ti Dios Kadatayo? ti nayimprenta iti 267 a pagsasao.

Sibabara nga abrasaentayo dagiti 258,845 a nangisimbolo iti dedikasionda babaen ti panagpabautisarda iti danum bayat ti napalabas a tawen serbisio! Nupay no ti panangsuportayo iti Pagarian ti Dios pinagbalinnakayo a naisangsangayan a puntiria ti gura ni Satanas, pinagbalinnakayo met a naisangsangayan nga umawat iti pamendision ken naespirituan a pannalaknib ni Jehova bayat a tarayenyo ti lumba nga adda iti sanguananyo. (Heb. 12:1, 2; Apoc. 12:17) Wen, namnamaenyo a ‘Daydiay mangay-aywan kadakayo saanna a mabalin ti agsaguyepyep.’​—Sal. 121:3.

Naintiempuan la unay ti teksto para iti tawen 2004 nga, “Agtultuloykayo nga agbantay . . . Paneknekanyo a sisasaganakayo.” (Mat. 24:42, 44) Dagiti Kristiano ket nadeskribir iti Biblia kas temporario nga agnanaed iti daytoy matmatayen a sistema ti bambanag. (1 Ped. 2:11; 4:7) Gapuna, nasken nga ipamaysatayo dagiti naespirituan a bambanag, pagtalinaedentayo a simple ti panagbiagtayo, ken sukimatentayo a naimbag ti pusotayo. “Ti dakkel a dragon” kayatnatayo nga alun-onen, ken kayatna a makiramantayo iti sistema ti bambanagna.​—Apoc. 12:9.

Nasken ti inaldaw a panagbasa iti Biblia tapno agtalinaedtayo a nasalukag. Matulongannatayo a mamagbalin iti ‘Wentayo a kaipapananna ti Wen’ tapno maitungpaltayo ti dedikasiontayo ken ‘mairutantayo a sititibker ti panangpetpettayo iti panagtalek nga adda kadatayo idi damo agingga iti panungpalan.’ (Sant. 5:12; Heb. 3:14) Ti inaldaw a panagbasa iti Biblia tulongannatayo a manglagip no kasano kaadayon a simiasi ti lubong kadagiti di agbaliw a pagalagadan ti Dios. (Mal. 3:6; 2 Tim. 3:1, 13)  Ti pannakaammo iti Biblia matulongannatayo a mangliklik kadagiti “nalaing pannakapartuatna nga ulbod a sarsarita” ken agtalinaed a matalek ken ni Jehova.​—2 Ped. 1:16; 3:11.

Dakayo a nagannak, bayat a padpadakkelenyo dagiti annakyo iti disiplina ken panangiturong-panunot ni Jehova, tultulonganyo kadi ida a mangikeddeng kadagiti naespirituan a kalat ken ‘agtultuloy nga agbantay’? (Efe. 6:4) Sansanayenyo kadi ida a mangmatmat iti masanguananda a kas iti panangmatmat ti kasisiriban a tao a nagbiag ditoy daga? Kadagiti amin a nagbiag, mabalin a ni Jesus ti kalaingan koma nga allawagi, imbentor, wenno mangngagas, ngem impangpangrunana ti amin-tiempo a ministerio. Sapay koma ta ti ehemplona tignayennakayo a mangtulong kadagiti annakyo a mangipangpangruna kadagiti interes ti Pagarian iti biagda.

Ti klase matalek nga adipen, nga irepresentar ti Bagi a Manarawidwid, ket napnuan iti naimpusuan a panagyaman iti “dakkel a bunggoy” gapu iti panangtulongyo kadakami a mangitungpal iti responsabilidadmi a ‘mangikasaba iti naimbag a damag ti pagarian iti intero a mapagnaedan a daga maipaay a pangsaksi.’ (Apoc. 7:9; Mat. 24:14, 45) Impanamnama ni Jehova kadakayo, patgenmi a kakabsat, a dinanto lipaten ti “aramidyo ken ti ayat nga impakitayo maipaay iti naganna, ta nagserbikayo kadagiti sasanto ken agtultuloykayo nga agserbi.” (Heb. 6:10) Bayat a basaenyo dagiti makapagagar a kapadasan ken kitaenyo dagiti resulta ti nagkaykaysa a panagreggetyo kadagiti sumaganad a panid, laglagipenyo a nakatulongkayo iti daytoy sangalubongan a panangsaksi.

Sapay koma ta situtured a sanguenyo ti masakbayan bayat nga itultuloyyo ti ‘kumita a sipapasnek iti pannakabayad ti gunggona,’ a diyo ipalubos nga adda tao wenno demonio a mangikapis kadakayo iti dayta. (Heb. 11:26; Col. 2:18) Wen, agtalekkayo ken ni Jehova ken inanamaenyo a tulonganna dagiti amin a mangay-ayat kenkuana a manggun-od iti naan-anay a biag.​—Juan 6:48-54.

Namnamaenyo a pagrag-oanmi ti makipagtrabaho kadakayo nga agpaay iti pakaidayawan ni Jehova.

Dagiti kakabsatyo,

Bagi a Manarawidwid Dagiti Saksi ni Jehova