Dagiti Tampok iti Napalabas a Tawen

BAYAT a mapaspasaran ti lubong ti nariribuk a panawen, tagtagiragsaken ti ili ti Dios ti rumangrang-ay ken nabaknang a naespirituan a kasasaad. (Mal. 3:12, 18) Daytoy agtultuloy nga irarang-ay ipalagipna kadatayo ti kari ni Jesus kadagiti adalanna sakbay la unay nga immuli sadi langit: “Adtoy! addaak kadakayo iti amin nga al-aldaw agingga iti panungpalan ti sistema ti bambanag.”​—Mat. 28:20.

Dagiti napasamak idi napalabas a tawen ti ad-adda pay a mangpaneknek a matungtungpal ti makaliwliwa a kari ni Jesus. Umuna, usigentayo ti naespirituan a bangkete a sinagrap dagiti adipen ni Jehova kadagiti “Makipagnakayo iti Dios” a Kombension Distrito.

 Dagiti “Makipagnakayo iti Dios” a Kombension

Impakita ni mammadto a Mikias ti nagdumaan dagiti nalinteg ken nakillo idi impadtona: “Amin dagiti ili, iti biangda, magnadanto tunggal maysa iti nagan ti diosna; ngem datayo, iti biangtayo, magnatayto iti nagan ni Jehova a Diostayo agingga iti tiempo a di nakedngan, iti mismo nga agnanayon.” (Mik. 4:5) Kas imbatad daydiay nangiparang iti pannakatema a palawag, magupgop dagita a sasao iti kababalin dagiti matalek a lallaki idi ugma, kas kada Enoc ken Noe, a nakipagna iti Dios bayat dagiti nariribuk a tiempo. (Gen. 5:22-24; 6:9, 22) Anian a pribilehio ti panangsurottayo kadagiti addangda!

Pinabilegnaka kadi ti kombension distrito nga agtultuloy a ‘makipagna iti nagan ni Jehova’? Apay a dimo repasuen dagiti notam iti kombension? No repasuem, maipalagip kenka ti programa ket manayonto a magunggonaanka.

Dagiti Publikasion a Nairuar iti Kombension

Adu kadi a pagsasao ti maus-usar iti teritoria ti kongregasionyo? No kasta, mabalin nga inusarmon ti baro a bokleta a Good News for People of All Nations. Naipablaak daytoy a bokleta iti tallo a nadumaduma nga edision, a naglaon iti 32, 64, ken 96 a panid, ket naibagay iti kasapulan ti kada pagilian. Isu a siguraduem nga addaanka iti daytoy nagsayaat a baro nga alikamen iti bagmo. No makasarakka iti maysa a tao a di makaammo iti pagsasaom, pangngaasim ta surotem ti tallo nga addang a naibinsabinsa iti panid 2 ti bokleta. Mabalin a maispal ti biag dagiti tattao gapu iti dayta!

Maibatay iti teksto ti tawen iti 2004 nga​—“Agtultuloykayo nga agbantay . . . Paneknekanyo a sisasaganakayo”​—inruar ti naudi a nagpalawag ti broshur nga Agtultuloyka nga Agbantay! (Mat. 24:42, 44) Sapay koma ta daytoy a publikasion ket makatulong iti ad-adu pay a makarikna iti kinaganat ti tiempotayo ket sipapasnek a panunotenda ti masanguanan ken dagiti banag a kellaatto a mapasamak. Ken kas kinuna ti nagpalawag, makatulong koma daytoy iti tunggal maysa a mangsaranget kadagiti  pakarigatan ken pakadanagan ket masalimetmetantayo ti kinatimbengtayo iti naespirituan no masuottayo.

Eskuelaan nga Agpaay Kadagiti Agdaldaliasat a Manangaywan

Iti napalabas nga innem a tawen, nasurok nga 600 a manangaywan iti sirkito ken distrito iti Canada ken Estados Unidos, agraman ti Alaska ken Hawaii, ti nageskuela iti Eskuelaan nga Agpaay Kadagiti Agdaldaliasat a Manangaywan a naangay iti Watchtower Educational Center idiay Patterson, New York, E.U.A. Bayat ti 2004 a tawen serbisio, naangay met ti eskuelaan iti 87 a dadduma pay a sanga nga opisina. Iti 23 kadagitoy a sanga nga opisina, adda dagiti estudiante a naggapu iti dadduma a pagilian. Kas pagarigan, inawis ti Alemania dagiti kakabsat manipud iti Austria, Israel, Macedonia, Switzerland, ken Turkey. Inawis met ti Portugal dagiti estudiante a naggapu iti Luxembourg ken iti adu nga isla, a kas iti Azores, Cape Verde, Madeira, ken São Tomé ken Príncipe. Inawat met ti Kenya dagiti agdaldaliasat a manangaywan manipud iti Etiopia, Rwanda, Tanzania, Uganda, ken dadduma a pagilian ti Africa.

Mairaman iti kurso ti tunggal aspeto ti trabaho dagiti manangaywan iti sirkito ken distrito. Ti kalat daytoy ket tulongan dagitoy a nagaget a kakabsat nga agbalin nga ad-adda nga epektibo a mangitungpal iti adu nga akemda, a pakairamanan ti panangisuro kadagiti kongregasion ken kadagiti asamblea ken ti panangidaulo iti panangasaba. (2 Tim. 2:2; 4:5; 1 Ped. 5:2, 3) Ti kurso ti mangparegta met kadakuada a mangsalimetmet iti espiritualidadda ken mangyaplikar kadagiti kasuratan a buyogen ti kinaannad ken pannakaawat no tultulonganda dagiti sabsabali.

Tangay maangay ti kaaduan a klase kadagiti sanga nga opisina, mapadasan dagiti agdaldaliasat a manangaywan ken ti assawada ti agnaed iti Bethel. Insurat ti maysa a klase: “Nagunggonaankami iti naespirituan iti kaaddami idiay Bethel. Tinagiragsakmi ti programa iti agsapa, a pakairamanan ti panagbasa iti Biblia ken ti Tinawen a Libro. Nupay adu ti isaganami a leksion, tumabunokami  met iti Panagadal iti Pagwanawanan ti pamilia ti Bethel iti rabii ti Lunes ken nagunggonaankami iti nagsayaat a panaglalangen.”

Iti kada aldaw, iti umuna nga oras kalpasan ti pangngaldaw, agsusublat dagiti kakabsat nga agtrabaho iti Service Department. Masursuroda sadiay no kasano ti makitinnulong a naan-anay iti sanga nga opisina, no kasano nga epektibo nga ipatungpal dagiti maawatda nga instruksion, ken no kasano ti panangaramid iti umiso ken nabagas a report.

Kada Biernes, tabunuan dagiti estudiante ken ti assawada ti diskurso a pakairamanan dagiti naespirituan a pammaregta a nairanta a nangnangruna kadagitoy a nasungdo a kakabsat a babbai. Kas pagarigan, magunggonaanda kadagiti palagip nga agtultuloy a mangipakita iti nasayaat a pagwadan iti panagpasakup iti asawa, ken maisuroda kadagiti pamay-an ti panangsuportar kadagiti assawada babaen ti pannakipagtrabaho kadagiti kakabsat a babbai iti kongregasion. Inyarig ti maysa nga agdaldaliasat a manangaywan dagitoy a linawas a palawag iti “naimas a naespirituan a dulse.”

Siempre, kanayon a maipaganetget ti Biblia​—nangruna ti New World Translation of the Holy Scriptures​—With References. Kinuna ti maysa nga estudiante iti Alemania: “Planok nga usaren ti Reference Bible iti personal a panagadalko ken kadagiti gimong iti kongregasion. Ita laeng a maapresiarko ti kinapategna.” Marikna ti maysa a nabayagen nga agdaldaliasat a manangaywan iti Britania a rimmang-ay ti espiritualidadna ken ti panangisurona babaen iti kanayon a panangadalna iti Sao ti Dios. Insuratna: “Nasursurok a nupay makatulong ti nasayaat nga ilustrasion no agpalpalawagak, napatpateg ti panangbasa ken panangilawlawag kadagiti kasuratan.”

Adu nga estudiante ti nagsurat a nangyebkas iti panangapresiarda iti eskuelaan. Kinuna ti maysa a kabsat iti Estados Unidos: “Agyamankami unay ken ni Jehova ken iti organisasionna gapu iti pammaregta ken panangsanayna kadakami a mangitungpal iti  annongenmi. Sapay koma ta agtultuloy a makapagserbikami nga addaan iti naun-uneg a pannakaawat kadagiti daldalan ni Jehova, ken dakdakkel nga ayat kadagiti nagpateg a karnerona.” Insurat ti maysa nga estudiante iti Francia: “Ti kurso pinagbalinnak a sipapanunot iti naayat a pannakipagtrabaho kadagiti kakabsat ken iti panangikagumaan a mangparagsak kadakuada nga agserbi ken Jehova.” Kas panggupgop iti rikna ti adu, kinuna ti maysa nga agdaldaliasat a manangaywan iti Portugal: “Ti eskuelaan ti kangrunaan a makagunggona a kapadasan iti nateokratikuan a karerak.”

Kastoy met ti komento ti maysa nga instruktor: “Maysa a pribilehio ken nadagsen a rebbengen ti mangisuro kadagiti lallaki a mangipaay iti panangiwanwan a mangapektar iti biag ti rinibu a kakabsat. Agtalekkami a babaen ti pammendision ni Jehova, agpautto dagiti gunggona nga itden daytoy nga eskuelaan.”​—Sant. 3:1.

Iti arinunos ti 2004 a tawen serbisio, nasuroken a 1,700 nga agdaldaliasat a manangaywan ti nageskuela, a naangay iti 14 a pagsasao. Agtultuloy a maangay ti eskuelaan kadagiti dadakkel a sanga nga opisina bayat ti 2005 a tawen serbisio.

Dagiti Kaso iti Korte

Idi Mayo 19, 2004, impablaak ti European Court of Human Rights (ECHR) iti Strasbourg, Francia, ti pangngeddengna iti kaso a Lotter v. Bulgaria. Nagdarum dagiti dati a misionero dagiti Saksi ni Jehova, dagiti Lotter, agsipud ta pinadas ti gobierno a papanawen ida idiay Bulgaria gapu iti relihionda. Immanamong dagiti autoridad ti Bulgaria nga agbayadda iti danios kadagiti nagdarum ken pinalubosanda ida nga agtalinaed iti pagilian. Immanamong met dagiti autoridad a mangipablaak iti nalawag a panangbigbig iti legal a kasasaad dagiti Saksi ni Jehova iti Bulgaria, a sadiay opisial a nairehistroda kas maysa a relihion idi 1998.

Impaulog ti ECHR ti pangngeddeng a pabor ken Séraphine Palau-Martínez idi Disiembre 16, 2003. Iti 6 kontra 1 a botos, inkeddeng ti korte a linabsing ti Francia ti kalintegan ni  Kabsat Palau-Martínez maipapan iti pamiliana. Nagdarum ni Séraphine iti ECHR idi saan a naited kenkuana ti panangaywan kadagiti dua nga annakna gapu ta inkeddeng dagiti korte a pagapelaran iti Francia a nasaysayaat a “saan a maipalubos a maipasidong [dagiti ubbing] kadagiti naulpit ken nainget a paglintegan iti panangpadakkel kadagiti annak . . . dagiti Saksi ni Jehova.” Iti pangngeddengna, inkeddeng ti ECHR a saan nga imbatay dagiti korte a pagapelaran ti desisionda iti pudno a kasasaad ti panagbiag ken pagimbagan dagiti ubbing no di ket nabatad a naibatay ti desision iti narelihiosuan a panangidumduma.

Kalpasan ti adu a tawen a panangibtur iti panangraut dagiti managderraaw a relihioso a panatiko, dagiti Saksi ni Jehova iti pagilian ti Georgia, a dadduma ti naibalud pay, sitatalna a tinabunuanda ti “Makipagnakayo iti Dios” a Kombension Distrito. Ti pannakairuar ti Baro a Lubong a Patarus ti Kristiano a Griego a Kasuratan iti Georgiano ti naisangsangayan a sorpresa kadagiti kakabsat. Kasta met idi Nobiembre 28, 2003, inrehistro ti Ministry of Justice iti Georgia ti lokal a sanga nga opisina ti Watch Tower Bible and Tract Society of Pennsylvania. Iti kasta, nupay impaulog ti Korte Suprema iti Georgia ti desision daytoy a pannakawaswas ti korporasion nga us-usaren idi dagiti Saksi ni Jehova, adda itan baro a korporasion nga opisial a bigbigen ti linteg, isu a maragsakan dagiti kakabsat.

Nupay kasta, adda pay laeng dagiti di narisut a kaso iti Georgia nga adda iti ECHR. Ngem makaparagsak a makita a sumaysayaat ti kasasaad dagiti kakabsattayo.

 Sipud idi 1990 di nagballigi ti panangpadas dagiti kakabsat iti Alemania a mangirehistro iti legal nga asosasion iti sidong ti paglintegan dagiti publiko a korporasion. Idi kinalikaguman ti Federal Administrative Court kadagiti Saksi ni Jehova ti naing-inget a kinasungdo ken ni “Cesar” ngem ti kalikaguman ti linteg, inkeddeng ti Federal Constitutional Court a di nainkalintegan ti desision ket insublina ti kaso tapno mabista manen. (Mar. 12:17) Idi Marso 25, 2004, rinugian ti orihinal a korte a rinepaso ti kaso. Kinalikaguman ti korte ti kanayonan nga impormasion iti takdertayo maipapan iti dara, panangpadakkel iti annak, panangilaksid, ken neutralidad. Imbaga ti hues a nangbista iti kaso a ti kaso ti gobierno ket masapul a maibatay kadagiti mapagtalkan a pammaneknek​—estadistika ken opisial a dokumento​—saan a kadagiti mapagduaduaan a sasao a naadaw iti Internet ken surat dagiti tattao nga addaan personal a reklamo.

Iti maysa a porma a nausar iti sensus dagiti maayaban iti militar idiay Grecia, nairaman dagiti “Chiliast wenno Jehovist” kas pagpilian iti listaan dagiti relihion. Gapu ta ibilang dagiti Saksi ni Jehova a makainsulto dagitoy a termino, ti sanga nga opisina iti Grecia nagdarum iti Ministry of Defense. Iti suratna kadagiti Saksi ni Jehova idi Marso 24, 2004, kinuna ti Ministry of Defense nga awan rantana a manginsulto ket “nagtignayen daytoy tapno maatur a dagus dagiti naaramat a di umiso a sasao.” Idi naaturen, kastoy ti adda a mabasa iti listaan: “Kristiano a Saksi ni Jehova.”

Idiay Peru, adun a dekada a mabigbigbig dagiti Saksi ni Jehova kas opisial a relihion. Nupay kasta, idi Nobiembre 1997, rinugian ti Ministry of Education a pagkedkedan ti kalikagum a di mabuisan dagiti literaturatayo ket kinalikagumanna ti dakkel a buis sakbay nga iruar ti aduana dagiti literatura. Nayuli ti kaso iti korte. Idi Disiembre 11, 2003, nagdesision ti hues a pabor kadagiti Saksi ni Jehova. Imbagana a “mapagduaduaan, minamaag, ken di maawatan” ti tignay ti Ministry of Education. Kinunana a “mangidumduma [ken] di nainkalintegan” dagiti opisial. Dagus a narisut dagiti parikut maipapan iti pannakaiserrek dagiti literatura.

 Ti Puerto Rico ket maysa a komunidad a kaaliado ti Estados Unidos. Addaan daytoy iti linteg a mangipalubos kadagiti sangakaarrubaan a mabakudan ken maaddaan kadagiti guardia. Dagitoy a bakud lapdanda ti panangasabatayo. Iti dadduma a lugar, adda dagiti agibumbunannag a pinapanaw pay ketdi dagiti polis ti estado. Gapu ta di nagballigi dagiti panangpadas a mangrisut iti dayta a banag a di kasapulan a mayuli iti korte, nayamangen ti kaso iti Federal District Court for the District of Puerto Rico, nga agkidkiddaw a ti linteg ket maibilang a di maitunos iti konstitusion, pannakibiang iti kalintegan a mangalagad iti relihion ken iti kalintegan nga agsao. Awan pay ti desision ti korte.

Idi Oktubre 28, 2003, impaulog ti Bucharest Court of Appeals ti Pangngeddeng Num. 1756, a mangbilbilin iti gobierno ti Romania a mangiraman kadagiti Saksi ni Jehova iti listaan dagiti mabigbig a relihion a saklawen ti linteg ti panagbuis. Idi Pebrero 6, 2004, impablaak ti Official Gazette No. 112 ti listaan dagiti “opisial a nabigbig a relihion idiay Romania.” Nairaman dagiti Saksi ni Jehova.

Idi Marso 21, 2004, ti Seoul District Court iti Republika iti Korea inabsueltona ti tallo a kakabsat kadagiti kaso kriminal a mainaig iti panagkedkedda nga agserbi iti militar gapu iti relihion. Daytoy ti damo a panangbigbig ti korte iti dayta a pagilian a kalintegan ti umili ti agkedked gapu iti konsiensiana. Ginasut pay a kakabsattayo ti naibalud gapu iti “krimen” a ‘panangpitpit kadagiti kampilanda a pagbalinen a subsob ti arado.’ (Isa. 2:4) Ngem nakalkaldaang ta agpadpada ti korte suprema ken ti korte konstitusional a dida kayat nga ipatungpal ti sagudayen ti konstitusion ti Korea a manggarantia iti wayawaya ti relihion tapno masalakniban koma dagiti kakabsattayo. Nupay kasta, nabiit pay a nangigakat ti lehislatura ti Korea iti linteg a mangipaay iti trabaho nga imatonan ti gobierno para iti amin nga umili a mabalinen nga agsoldado.​—Prov. 21:1.

Ti desision ti Korte Suprema ti Estados Unidos mainaig iti kaso a Watchtower . . . v. Village of Stratton ket agtultuloy a  pagimbagan dagiti Saksi ni Jehova iti ministerioda a panagbalaybalay. Kas pagarigan, iti maysa a komunidad iti estado ti New York, E.U.A., intultuloy dagiti polis a kalikaguman ti permiso dagiti Saksi sakbay a mangasabada. Nupay kasta, insurat ti hepe ti polis kalpasan a napakaammuan maipapan iti kasasaad ken ti desision ti korte: “Nabainanak iti inaramid dagiti opisialko ket dispensarenyo koma no nangpataud daytoy iti problema kadakayo.”

Iti maysa a komunidad iti estado ti Illinois, nabilin ti departamento ti polisia sadiay a pakaammuanna ti amin a polis nga agpatpatrolia ken dadduma pay nga opisial ken kamengna a gapu iti desision ti Korte Suprema ti Estados Unidos, “saan a masapul dagiti Saksi ni Jehova ti permiso sakbay a mamalaybalayda.” Kuna pay ti bilin: “Saan a masapul nga ipakadada kadakami ti panangasabada.”

Idi Oktubre 8, 2003, nangabak ni Lester Campbell iti Korte Suprema ti Iowa iti kaso a mainaig iti panagkedkedna nga agpayalison iti dara. Nagdarum ni Kabsat Campbell tapno agsingir iti danios gapu iti pannakayalison ti darana a mismo kalpasan ti pannakaoperana nupay insurat ken imbagana a dina kayat ti agpayalison. Iti nababbaba a korte, nangabak ti doktor ken ti ospital. Nupay kasta, ti Korte Suprema ti Iowa winaswasna ti desision ti nababbaba a korte, a pinatalgedanna a saan a kasapulan ni Lester Campbell ti nalaing a doktor tapno mapaneknekan a ti panangyalison nga awan ti pammalubosna ket di maitunos iti kadawyan a panangagas. Inkeddeng pay ti korte a mabalin ni Lester ti agsingir iti danios.

Ti Panangiparit ti Moscow ken ti Epektona

Inkeddeng ti Golovinsky Intermunicipal District Court iti Russia idi Marso 26, 2004, ti pannakaiparit ti amin nga aktibidad dagiti Saksi ni Jehova iti Moscow ken ti pannakawaswas ti legal a korporasionda. Nayapelar daytoy a pangngeddeng. Idi Hunio 16, 2004, pinasingkedan ti Moscow City Court ti desision ti nababbaba a korte, ket naipatungpal ti pannakaparit ken pannakawaswas  ti legal a korporasion. Nagapelar dagiti kakabsat iti ECHR ket mangnamnamada iti nasapa a pannakabista gapu iti adu a rigat a patpatauden ti pannakaiparit.

Nupay kasta, naregta latta dagiti kakabsat uray no naparitanda. Kinapudnona, adu ti natignay a mangparang-ay pay iti panagserbida ken Jehova. Ti regtada ipalagipna ti sasao ni apostol Pablo idi naibalud idiay Roma. Kinunana: “Dagiti aramidko nagbanagda a pakaparang-ayan ti naimbag a damag.”​—Fil. 1:12.

Kas pagarigan, idi Marso 2004, adda baro a kangatuan a bilang dagiti agibumbunannag a 136,034 ken 136,903 a panangyadal iti Biblia. Daytoy ti kaunaan iti las-ud ti pito a tawen a ti bilang dagiti agibumbunannag ket linab-awan ti bilang ti panangyadal iti Biblia! Ket manipud Marso agingga iti Hunio, nakaawat ti sanga nga opisina iti nasurok a 1,000 nga aplikasion para kadagiti regular pioneer, ket idi Abril adda kangatuan a bilang dagiti regular pioneer a 15,489. “Kasta met,” impadamag ti sanga nga opisina a, “ti pangngeddeng a nayetnag idi Hunio 16 pinaregtana ketdi dagiti kakabsat nga ad-adda pay a mangparang-ay iti panagserbida.” Dayta met ti nangtignay kadagiti sabsabali​—agraman dagiti di manamati nga assawa​—a mangrugi a tumabuno kadagiti Nakristianuan a gimong.

Maysa nga estudiante a taga Estados Unidos ti naiparna nga adda idiay Russia idi naipaulog ti desision. “Inrantana ti napan idiay Bethel, iti kabangibang ti St. Petersburg, tapno maammuanna ti ad-adu pay maipapan iti kasasaad,” insurat ti sanga nga opisina. “Nasdaaw iti kinadalus ti pasilidad ken iti nagsayaat a panangpasangbayda kenkuana.” Nasdaaw no apay nga adda mayat a mangparit kadagiti Saksi ni Jehova. Nagkiddaw kadagiti publikasion ken video nga iyawidna idiay California tapno ipakitana kadagiti propesor a mangisursuro iti maipapan kadagiti relihion.

Natalna a Pannakaangay Dagiti Kombension iti Moscow

Sipud idi Hunio 11 agingga iti 13, sakbay la unay a naipaulog ti ditay panangabak iti korte a pagapelaran, dua a  “Makipagnakayo iti Dios” a Kombension ti naangay idiay Moscow, maysa iti Ruso a Sign Language. Maangay koma idi dagiti kombension kalpasan ti bista, ngem nabaelan ti Branch Committee nga intantan ti bista. Impadamag dagiti kakabsat a naannayas ti pannakaangay dagiti kombension ket nakitinnulong dagiti autoridad iti siudad. Kinapudnona, imbaga dagiti opisialda kadagiti polis nga agbambantay iti ruangan ti istadium: “No pastrekenyo dagiti tattao iti istadium, dikay agsigarilio wenno agsalawasaw.”

Iti subway ti Moscow, pinabasol ti maysa a lalaki ti sumagmamano a kakabsat a babbai a tinakawda kano ti kuartana. Impapilitna a kumuyogda kenkuana iti presinto ti polis. Idi addadan iti presinto, pinabasolna saan laeng a dagiti kakabsat no di ket amin dagiti “kameng ti sekta” gapu ta igaggagarada kano ti mangpataud iti panaglilinnetlet tapno matakawanda dagiti tattao. Insaludsod ti polis kadagiti kakabsat a babbai, “Siasinokayo?”

Intudoda dagiti lapel badge-da sada kinuna, “Dakami dagiti Saksi ni Jehova a mapan makikombension.”

Kalpasanna, sinango ti polis ti mangpabpabasol ket kinunana: “Saan nga agtaktakaw dagiti Saksi ni Jehova. Agpakawanka kadakuada, ta imbabainmo ida.” Kalpasanna kinuna ti opisial kadagiti kakabsat, “Darasenyo ti mapan makikombension.” “Ngem sika,” kinunana iti lalaki, “agbatika. Kayatka pay a kasarita.”

Adda 21,291 a kangatuan a bilang ti timmabuno iti kombension, ket 497 ti nabautisaran. Adda met 929 a timmabuno iti kombension iti sign language a naangay iti Kingdom Hall, ket 19 ti nabautisaran!

Panangsaranget Kadagiti Suot Idiay Haiti

Bayat ti 2004, nagsagaba ti Haiti iti riribuk gapu iti politika, kinaranggas, panagkirang dagiti masapsapul iti biag, ken ingingina dagiti gagatangen. Mainayon pay kadagitoy a parikut, nasurok  a 1,500 a tattao ti natay ken rinibu dagiti naawanan iti pagtaengan gapu iti nakaro a layus a napasamak iti bulan ti Mayo. Awan ti natay a Saksi, ngem adu ti interamente a naawanan iti sanikua ken pagtaengan.

Kaskasdi, napabileg dagiti kakabsat gapu iti nalawag a pammaneknek a tultulongan ken iwanwanwan ida ni Jehova ken gapu iti ayat ken pannakaseknan ti Bagi a Manarawidwid ken kakabsat iti nagduduma a pagilian. Naiparangarang ti kasta nga ayat babaen kadagiti namaterialan a tulong kadagiti biktima ti didigra. Siempre, nagtitinnulong met dagiti lokal a kakabsat a manggun-od iti taraon ken kadagiti masapsapul iti biag.

Kanayon a nakiuman ti sanga nga opisina iti Haiti maipapan iti kasasaad tapno maiwanwanna dagiti kongregasion. Kas pagarigan, bayat a kumarkaro ti kinaranggas iti Port-au-Prince a kabesera, binalakadan ti Branch Comittee dagiti panglakayen nga isapsapada iti maysa nga aldaw dagiti gimong a kadawyan a maar-aramid iti Domingo, Pebrero 29. Napaneknekan a nainsiriban dayta a singasing, ta iti dayta a Domingo, naglusulos ti mariribukan a presidente ti Haiti ket pimmanaw iti pagilian. “Nagkanalbuong dagiti paltog ket nagari ti riribuk iti kabesera,” kuna ti maysa a damag. Insurat ti sanga nga opisina: “Awan ti nangipagarup a kastoy ti mapasamak. Mabalin nga imposible koma ti aggigimong iti dayta a Domingo. Agyamankami ken Jehova gapu ta natalged dagiti kakabsat.”

Iti dayta a nariribuk a tiempo, dagiti polis ken rebelde a soldado agraman dagiti mannibrong binangenanda dagiti kalsada, ket nangipatungpal ti gobierno iti curfew manipud sardam agingga iti parbangon. Ngem sakbay pay a naipatungpal ti curfew, binaliwan dagiti kakabsat ti oras ti gimongda tapno makaawidda a sitatalged sakbay a sumipnget. Impadamag ti adu a kongregasion nga immadu dagiti tumabtabuno!

Okupado met dagiti kakabsat iti panangasaba, ket rinaem dayta dagiti kaarruba. Kuna ti dadduma: “Makaliwliwa ti pannakakitami kadakayo a Saksi a mangaskasaba kas iti kadawyan nga  ar-aramidenyo.” Siempre, nagannad latta dagiti kakabsat ket pinakaammuanda ti amin no sadino ti natalged a pangasabaan.

Ti Pakabigbigantayo Kas Kristiano​—Maysa a Proteksion

Insurat ti sanga nga opisina ti Haiti: “Nasalakniban ti adu kadagiti kakabsattayo iti pannakakabil ken pannakatakaw dagiti sanikuada gapu ta nalatakda iti lugarda ken pagaammo a neutralda iti politika.” Kas pagarigan, dagiti armado a butangero pinasardengda ti agassawa a misionero iti tallo a bangen ti kalsada. Dua a banag ti inaramid dagiti agassawa: Impakaammoda nga isuda ket Saksi ni Jehova, ken siuulimek ken sipigpigsa a nagkararagda. Iti tallo a bangen, adda nangikalintegan kadakuada, a nangibaga a naimbag a tattao dagiti Saksi ni Jehova ket saanda a makibiang iti politika. Nakaawid a sitatalged dagiti agassawa.

Dagiti armado a grupo pinasardengda met dagiti miembro ti pamilia ti Bethel. Kas kadagiti misionero, impakaammo met dagitoy a Saksida, ken nagkararagda, ket umasping ti resultana. Iti maysa a pasamak, kinuna ti maysa a mannibrong: “Mapanka a sitatalna, ket ikararagandakami!” Sabali pay a kameng ti Bethel ti pinasardeng ti polis iti maysa a bangen ti kalsada, ket kayat dagiti opisial a sukimaten ti luganna no adda armas. Imbaga ti kabsat: “Ti laeng armas nga adda kaniak ket ti magasin a Pagwanawanan ken Agriingkayo!” Nagisem ti polis ket impayapayna a mapanen. Kalpasan dayta, nailasinda ti luganna ket pinalabasda nga awan ti saludsod.

Impadamag ti sanga nga opisina a simmayaat metten ti kasasaad kadagiti simmaganad a bulan. Ngem adda pay dagiti parikut, ken nariribuk pay laeng ti kasasaad. Gapuna, kanayon a naannad dagiti kakabsat.

Napasayaat ti Pagimprentaan ti Estados Unidos

Babaen ti panangiturong ti Bagi a Manarawidwid, nangrugi a naorganisar ti panagimprenta idi 2002 iti lima a kangrunaan a lugar​—Abagatan nga America, Africa, Amianan nga America,  Asia, ken Europa. Nagbanag daytoy nga urnos iti nasaysayaat a pannakausar dagiti pasilidad ti sanga nga opisina, a pakairamanan dagidiay adda iti Estados Unidos, a basbassit itan ti iyimprentada.

Bayat ti 2004, naipamaysan iti Wallkill, New York, ti printing, binding, ken shipping a maar-aramid iti Estados Unidos. Naidatag ti plano iti hunta dagiti agipalplano iti ili idi Agosto 6, 2002. Nausig dayta iti publiko idi Setiembre 3, ket kalpasanna naanamongan. Iti tinawen a miting ti Watch Tower Bible and Tract Society of Pennsylvania idi Oktubre 5, 2002, nayanunsio nga inanamongan ti Bagi a Manarawidwid ti pannakaipamaysa ti panagimprenta idiay Wallkill. Nagatang ti dua a baro a MAN Roland Lithoman a pagimprenta, ket nayeskediul a nakasaganan iti Pebrero 2004 ti pasdek a pangikabilan kadagitoy.

Kasano a maileppas daytoy nagdakkel a proyekto iti las-ud laeng ti 14 a bulan? Nagtalek dagiti kakabsat nga iturong ni Jehova  dagiti bambanag ken tignayenna dagiti adipenna a mangipaay a situtulok iti bagbagida. Nasupapakan ti panagtalekda. Nangrugi ti trabaho iti lugar idi Pebrero 2003, ket nakasaganan ti kanayonan a pagimprentaan iti Setiembre. Nalasang dagiti dati a pagimprentaan idiay Wallkill ken nayakarda iti baro a nainayon a pasdek iti Disiembre. Simmangpet ti dua a baro a pagimprentaan idi Abril ken Mayo 2004 ket nairugi ti panagimprenta idi Hunio ken Hulio. Agan-andaren ti lima a pagimprentaan idi Setiembre.

Idi napalabas, 11 a kadsaaran iti tallo a pasdek iti Adams Street idiay Brooklyn ti nakaikabilan ti bindery. Ita, naikabil ti intero a bindery iti maymaysa a kadsaaran idiay Wallkill ken 42 porsiento laeng ti espasio a sinaklawna. Nangrugi idi Hulio 2004 ti paperback bookbinding, kayatna a sawen, pamuskolen a papel ti mausar nga akkub dagiti libro. Idi arinunos dayta a bulan, dagiti umuna a natangken ti akkubna a libro ket naaramid iti baro a bindery line, a nasurok a 400 a metro ti kaatiddogna ken addaan iti 33 a makina a pinagsisilpo ti 70 a conveyor. Maminsan laeng a lumasat dagiti paset ti libro iti pangrugian ti bindery line. Iti kada minuto, 120 a libro ti maaramid, isu a 25 laeng a kakabsat ti kasapulan a mangpaandar iti pagaramidan kadagiti natangken ti akkubda a libro. Kayatna a sawen, naksayan dagiti trabahador iti 66 a porsiento. Naan-anay a maus-usaren ti intero a bindery idi Oktubre 2004.

Idi Nobiembre 2004, nagiproseson ti baro a Shipping Department iti Wallkill kadagiti pedido ti kongregasion a literatura babaen iti baro a de kompiuter a sistema a mangsaklaw iti 45 a porsiento a basbassit nga espasio ngem iti dati idiay Brooklyn. Kalkularen dagiti kompiuter ti kaadu ti maipatulod ken pilienda ti maitutop a kahon. Maysa a 800 a metro a conveyor ti mangipan iti kada pedido iti naisangsangayan a plataporma a pakaisaganaan dagiti maipatulod. Adda lugar a mabalin a pagparadaan dagiti lugan tapno nawaya dagiti kongregasion a mangdagas kadagiti pedidoda.

 Pagyamanan unay iti adu a kakabsat a timmulong iti daytoy a proyekto. Karaman kadakuada dagiti boluntario iti Bethel ken dagiti temporario a boluntario, dagiti grupo dagiti kakabsat nga agtartrabaho iti sidong dagiti Regional Building Committee kadagiti lima nga estado, ken dagiti kakabsat a nangipaay kadagiti alikamen ken materiales manipud iti bukodda a negosio. Siempre, pagyamanan met kadagiti adu a ‘naragsak a nangted’ iti pinansial a tulong.​—2 Cor. 9:7, 11.

Dagiti Panagbalbaliw iti Brooklyn

Ti pannakayakar ti pagimprentaan, binding, ken shipping idiay Wallkill binalbaliwanna ti Brooklyn Bethel. Idi Abril 29, 2004, adda napasamak a historiko ken emosional a kanito. Iti dayta a rabii, buyogen ti ragsak ken ladingit, ni Max Larson, ti manangaywan iti panagimprenta iti nasurok nga 60 a tawen, impatingganan ti panagimprenta ti naudi a pagimprentaan idiay Brooklyn. Dayta ti nangipatingga iti 84 a tawen nga agtultuloy a panagimprenta sadiay. Sumagmamano a lawas kalpasanna, nagpatingga metten ti bindery.

Gapu ta ammoda a bassiten ti kasapulan nga espasio iti Brooklyn, inyanunsio ti Bagi a Manarawidwid ti pannakailako ti pasdek iti 360 Furman Street idi Hunio 2003. Napatalgedan ti kontrata iti Biernes, Hunio 18, 2004. Mayakar iti pasdek iti 117 Adams Street ti paglabaan, dagiti opisina, ken pagtrabahuan nga adda iti dayta a 93,000 a metro kuadrado a pasdek.

Maysa pay, mapabpabaron ti pasdek iti 107 Columbia Heights. Nayeskediul a malpas ti pagtaengan iti maudi a kagudua ti 2005, ken maileppas ti intero a proyekto inton Setiembre 2006. Ti napabaro a pasdek ket makalaon iti nasurok a 300 a miembro ti pamilia ti Bethel ken addaan daytoy iti komisaria, Kingdom Hall, libraria, lobby, dagiti opisina, personal a paglabaan, ken baro a paraangan a minuyongan.

Nakabalan Maipaay iti Sangalubongan nga Irarang-ay

Nakaawat met ti Brazil, Britania, Japan, Mexico, ken South Africa iti baro a MAN Roland Lithoman a pagimprentaan. Ti  Britania ti immuna a sanga nga opisina a nangipasdek iti baro a makina, a simmangpet idi Hulio 2003 ket nangrugi nga agimprenta idi Oktubre. Iti inaldaw, 750,000 a magasin ti mayimprentana​—1.5 a milion a magasin ti maimprenta ti dua nga agsinnublat a grupo​—dandani mamitlo nga ad-adu ngem iti mayimprenta ti dati a pagimprentaan.

Ti baro a pagimprentaan makaimprenta met kadagiti signature ti Biblia ken dadduma a publikasion. Kas pagarigan, ti sanga nga opisina ti South Africa ket nakaimprentan kadagiti signature nga agpaay iti Baro a Lubong a Patarus iti Sesotho, a pagsasao iti South Africa. Impadamag ti sanga nga opisina iti Japan nga idi napalabas, maysa nga aldaw ti mabusbos iti panagsinnublat ti panagimprenta kadagiti babassit a libro ken dadakkel a libro. Ita, maysa nga oras laengen. Ket agpaut laengen iti lima nga oras ti sangapulo nga aldaw a panagimprenta idi iti sangamilion a polieto. Iti umuna a tallo a bulan a panagimprentana, ti pagimprentaan iti Japan ket nakaimprenta iti 12 a milion a polieto; 12 a milion a magasin ken broshur; 240,000 a libro; ken 48,000 a Biblia.

Adda met dagiti baro nga automatiko a makina nga agtabas, agbilang, agipempen, agikabil iti etiketa, ken agbalkut kadagiti literatura. Nagsayaat ken umiso unay ti pannakaaramid dagiti printing plate babaen iti pamay-an a maawagan computer-to-plate. Saanen a masapul dagiti negative iti daytoy a proseso, isu a maikkat nga interamente ti maysa nga addang. Impadamag ti sanga nga opisina iti Britania a saan laeng nga immadu dagiti maimprenta gapu kadagitoy amin nga irarang-ay no di ket naksayan pay ti kasapulan a trabahador.

Panagsanay Idiay Alemania

Maysa a grupo ti innem a sanga nga opisina ti napan iti kompania ti MAN Roland idiay Alemania tapno agsanay a mangpaandar iti pagimprentaan. Manipud iti kapadasanda iti panangsanay kadagiti di-Saksi nga agim-imprenta, ninamnama dagiti instruktor a matmatan dagiti kakabsat ti tiempo a kaaddada sadiay a kas bakasion. Isu a nasdaaw ken naallukoy dagiti instruktor  iti kinapasnek dagiti kakabsat. Kinapudnona, kiniddaw dagiti Saksi a mangrugida a nasapa ken agtrabahoda agingga a naladawen tapno adu ti masursuroda iti kurso.

Para iti dadduma a nagsanay, maysa a karit ti pagsasao agsipud ta Ingles ti nausar iti panangisuro agraman dagiti libro. Sakbay a napanda idiay Alemania, nagsagana ti grupo a naggapu iti Japan babaen ti panangikagumaanda a mangpasayaat iti panagsaoda iti Ingles. Adu ti temporario nga immakar pay ketdi kadagiti kongregasion nga agus-usar iti Ingles.

Nangted Dagiti Bethelite iti Nasayaat a Pammaneknek

Kalpasanna, idi simmangpet dagiti pagimprenta kadagiti sanga nga opisina, dagiti inheniero iti MAN sinangalda dagita a makina ket timmulong dagiti trabahador ti Bethel. Kadagiti innem a sanga nga opisina, ti naragsak, makaay-ayo a kasasaad iti Bethel ket nagsayaat ti epektona kadagiti di-Saksi a trabahador. Maysa a lalaki a nangsangal iti pagimprenta idiay London ti nagkuna kadagiti kakabsat: “Nagawidak idi rabii ket nakitak ti kaarrubak nga adda iti hardinna. Pulos a diak idi ikaskaso, ngem idi rabii nagsaritakami iti 20 a minuto ket natakuatak a talaga a nagsayaat a tao.” Imbaga pay daytoy a teknisian a nadlaw met ti asawana ti panagbalbaliw ti ugali ken kababalinna. “Mannakigayyemka, nakaisem, ken kablaawam dagiti tattao,” kinunana.

“Nakipagtrabahoak kadagiti Saksi iti innem a lawas,” kinunana. “Ket iti naudi a dua a lawas, diak pulos nagsao iti dakes. Kinapudnona, namnamaek a diakton pulos agsao iti dakes.”

Idi nalpas a nasangal dagiti makina iti sanga nga opisina ti London, ti ehekutibo ti MAN inawaganna ti sanga opisina ket nagyaman kadagiti kakabsat iti panangaywanda kadagiti kameng ti kompaniana. Imbagana a dayta ti panangsangal nga awan a pulos ti problemana.

Dadduma a sanga nga opisina ti nangyurnos iti kuarto a panganan dagiti nagsangal iti makina. Para iti adu, baro a kapadasan  ti kaadda dagiti nagsayaat ti panagkawkawesda a serbidor no pangngaldaw, nangruna kadagiti di-Saksi. Maysa a teknisian idiay Japan ti di pay nakakita iti nakadaldalus, organisado a pagimprentaan a kas iti daydiay adda iti sanga nga opisina. Kinunana: “Awanen ti sabali a lugar a nasaysayaat a pagtrabahuan.” Inapresiarna met ti kinamapagpiaran dagiti kakabsat. Awanen ti sabali a lugar a mabalin a pangibatianna kadagiti alikamenna a di masipsiputan, ta agtalek a saanda a takawen dagitoy. Nangala iti adu a publikasion ken pinasiarna ti sanga nga opisina ta kayatna a maammuan ti ad-adu pay maipapan kadagiti Saksi ni Jehova.

Inawis dagiti kakabsat idiay Mexico dagiti teknisian ti MAN iti Memorial. Uppat ti timmabuno. Nupay kasta, awan ti desente a kawesda. Agsipud ta kayatda ti gumatang iti amerikana, maysa a Bethelite ti nangkuyog kadakuada a naggatang. Dagiti kakabsat inikkanda dagiti lallaki iti Biblia ket bayat ti palawag iti Memorial, tinulonganda ida nga agbirok kadagiti teksto. Kalpasan  ti gimong, nagparetrato dagiti teknisian ken kanayonda a nakaisem isu nga adu ti nangipagarup iti kongregasion a dagitoy ket Bethelite a naggapu iti Alemania.

Iti amin a sanga nga opisina, nagsayaat ti impresion dagiti kontraktor ken suplayer. Insurat ti maysa a kontraktor idiay Estados Unidos: “Raemek unay ti kinasayaat ti organisasionyo, nangruna dagiti tattao. Awanen ti sabali pay a proyekto a panagibangon nga ad-adda a tinagiragsakko no saan a ti pannakipagtrabahok kadakayo. Naaddaanak iti namnama iti masanguanan ti sangatauan gapu iti organisasionyo. No maibotelia la koma ken mailako ti regget ken panangipateg, sigurado a ti grupoyo ti addaan iti produkto a kayat a gatangen ti amin.”

Nasdaaw ti maysa a lalaki a nangipaay kadagiti tubo para iti baro a pagimprentaan idiay Mexico gapu iti natalna a kasasaad iti sanga nga opisina. Adu ti saludsodna, ket ita agad-adaldan iti Biblia a sangapamiliaan ket nagsayaat ti irarang-ayda. Naisangsangayan ti kiddaw ti kapatas ti maysa a lokal a grupo dagiti kontraktor. Kinunana: “Kadawyan a papetpetandakami dagiti tattao iti kuarta kas panangipakita iti panagyamanda iti trabahomi. Mabalin kadi a Biblia laengen ti itedyo iti tunggal maysa kadakami? Kas makitak ditoy, panagkunak napatpateg ti pannakaammo ngem ti kuarta.”

Pannakaidedikar ti Sanga nga Opisina iti India

“Dimteng met laengen ti nabayagen nga ur-urayenmi nga aldaw idi Disiembre 7, 2003,” insurat ti sanga nga opisina iti India. “Dayta ti aldaw a pannakaidedikar ti kaibangbangon a sanga nga opisina idiay Bangalore, iti abagatan a tengnga ti India.”

Naisaad iti 17 nga ektaria, ti 30,000 a metro kuadrado a pasdek ket arigna maysa a bassit nga ili. Daytoy ti damo a dakkel a sanga nga opisina iti lubong a binangon ti komersial a kompania. Addaan daytoy iti planta a pangdalus iti danum nga inumen, planta a pangdalus iti narugit a danum, ken bukodna a generator. Addaan ti pasdek iti 122 nga opisina, a pakairamanan ti 80 a para kadagiti agipatpatarus; napintas a Kingdom Hall; ken dakkel  a pagimprentaan. Adda tallo a pasdek a pagtaengan nga addaan kadagiti komportable a kuarto, paglabaan, panganan, ken kosina a kompleto ti alikamenna. Naileppas iti las-ud ti dua a tawen ti intero a proyekto a nagusar kadagiti lokal a materiales.

Idiay India, nangrugi ti trabaho a mainaig iti Pagarian idi 1905. Ita, maar-aramiden ti panagipatarus ken panagimprenta iti 26 a pagsasao. Iti aldaw a pannakaidedikar ti pasilidad, dagiti misionero a nagserbi idiay India iti pinulpullo a tawen insalaysayda dagiti makaparegta a kapadasanda, ket ni Stephen Lett a kameng ti Bagi a Manarawidwid ti nangipaay iti pangdedikar a diskurso. Adda 2,933 a timmabuno a pakairamanan dagiti 150 a bisita a naggapu iti 25 a pagilian.

Pannakaidedikar ti Sanga nga Opisina iti Pilipinas

“Kayatmi met ti trabaho a kas kapintas ti naaramid iti Watch Tower!” Dayta ti kinuna ti dadduma kadagiti kontratista iti Manila idi nakitada ti napintas a pannakaaramid ti sanga nga opisina iti Pilipinas. Kinapudnona, idi bimmisita ti maysa a grupo dagiti kameng ti telebision a mangar-aramid iti presentasion maipapan kadagiti paglintegan iti panagibangon, imbaga kadakuada ti city engineer: “No kayatyo ti makakita iti lugar a mangan-annurot a  naimbag kadagiti paglintegan iti panagibangon, mapankayo iti Watch Tower.”

Nagibangon dagiti kakabsat iti sangapulo ti kadsaaranna a pagtaengan ken dadduma pay a pasdek ken rinitubarda ti sangapulo ti kadsaaranna a pasdek a naibangon idi 1991. Apay a kasapulan ti panangpalawa? Sipud idi 1991 agingga iti 2003, immadu dagiti agibumbunannag iti 34,000, isu nga adda baro a kangatuan a bilang dagiti manangiwaragawag iti Pagarian nga agdagup iti nasurok a 144,000!

Naaramid ti dedikasion idi Nobiembre 1, 2003, iti naraniag nga agsapa ti Sabado. Agdagup iti 2,540 ti timmabuno, a pakairamanan ti pamilia ti Bethel, dagiti dati a misionero ken dadduma a bisita a naggapu iti 13 a pagilian, ken ti nasurok a 2,000 a kakabsat iti intero a Pilipinas. Impalawag ni Stephen Lett ti tema a “Panangapresiar Kadagiti Balay a Pagdaydayawan ken ni Jehova iti Napalabas ken iti Agdama.” Iti sumuno nga aldaw, dagiti lokal a payunir agraman dagiti panglakayen ken dagiti assawada, nga agdagup iti 8,151, tinagiragsakda ti naisangsangayan a programa a naangay iti Metro Manila Assembly Hall.

Iti sangalubongan, agdagup iti 20,092 ti bilang dagiti ordinado a ministro nga agserserbi kadagiti sanga nga opisina. Bin-igda a miembro ti Worldwide Order of Special Full-Time Servants of Jehovah’s Witnesses.

 [Ladawan iti panid 21, 22]

Nakidnap iti Agmatuon

Idi agmatuon iti Biernes, Marso 19, 2004, magmagna ni Carl, maysa a Saksi nga agtawen iti 20, iti adu ti taona a kalsada iti Pétionville, Haiti, idi kellaat nga adda armado a lallaki a nakakawes iti nangisit a puersado a nangilugan kenkuana iti pickup truck, inabbungotanda ti ulona, sa nakaparpardas ti luganda a pimmanaw. Inestoria ni Carl ti napasamak:

Idi dimsaagkami iti lugan, impandak iti maysa a kuarto a nakaipupokan ti dadduma pay a biktimada, a nalawag nga estudiante iti unibersidad a naakusaran a makiramraman kadagiti napolitikaan a demonstrasion. Iti napalalo a pungtotda, agsasaruno a nagpaputok dagiti nangkautibo, ket natay ti maysa a kautibo. Nagdisso ti ulona iti sakak. Kalpasanna, rinugiandakon a pagsaludsodan ken butbutngen. Nakarurodda ket kinabil ken indurondak iti ayan ti naidasay a lalaki.

“Sungbatam dagiti saludsodmi!” imbilin ti liderda.

“Ngem awan a pulos ti ammok iti politika,” kinunak.

“No kasta papatayenka itan!” impukkawna.

“Sakbay a patayennak,” kiniddawko, “pangngaasim ta palubosannak nga agkararagak iti Diosko a ni Jehova, tapno dawatek a tulonganna dagiti dadakkelko ken kakabsatko, ta didakton makita.”

“Darasem! Agap-apuraak,” imbugtakna.

Idi agkarkararagak a sipipigsa, pimmanaw ti lalaki. Idi nagsubli, kinunak iti bagik, ‘Carl, daytoyen ti kanito. Agsaganakan a matay.’ Ngem kasta unay ti siddaawko.

“Sika kadi ti agnagan iti Carl?” sinaludsod ti lalaki.

“Wen,” kinunak a masmasdaaw no kasano a naammuanna ti naganko.

Imbagana a namin-adun nga inluganko, ket ita ta ammonan no siasinoak, dinak mabalin a dangran. Nalawag a nabigbignak gapu kadagiti imbagak iti kararagko, nupay naabbungotanak. Rimmuar manen ket nakisarita kadagiti kakaduana. Kamaudiananna, adda nangilugan kaniak, impanawnak, ket kalpasanna induronnak nga inruar iti lugan sa binay-annak iti kalsada. Nakaam-amak a kapadasan dayta ngem pinabilegna ti pammatik ken ni Jehova ken iti bileg ti kararag.

 [Tsart/Dagiti Ladawan iti panid 12, 13]

DADDUMA A PASAMAK ITI 2004 A TAWEN SERBISIO

Setiembre 1, 2003

Setiembre: Iti 2004 a tawen serbisio, naangay ti Eskuelaan Dagiti Agdaldaliasat a Manangaywan iti 88 a sanga nga opisina.

Oktubre: Nangrugi ti Britania nga agimprenta babaen iti MAN Roland Lithoman.

Oktubre 28: Inraman ti korte ti Romania dagiti Saksi ni Jehova iti listaan dagiti naaprobaran a relihion a mailaksid iti buis.

Nobiembre 1: Pannakaidedikar ti sanga nga opisina iti Pilipinas.

Nobiembre 28: Inrehistro ti Ministry of Justice iti Georgia ti sanga nga opisina dagiti Saksi ni Jehova.

Disiembre 7: Pannakaidedikar ti sanga nga opisina iti India.

Enero 1, 2004

 Marso 26: Inkeddeng ti korte iti Golovinsky ti pannakaiparit dagiti Saksi ni Jehova iti Moscow. Nayapelar ti kaso.

Abril: Naaddaan ti Russia iti kangatuan a bilang dagiti regular pioneer a 15,489.

Abril 29: Kalpasan ti 84 a tawen nga agtultuloy a panagimprenta, simmardeng ti pagimprentaan idiay Brooklyn. Adda baro a pagimprentaan idiay Wallkill.

Mayo 1, 2004

Mayo: Iti kangitingitan ti napolitikaan a riribuk, napasaran ti Haiti ti nakaro a layus. Awan ti natay a kakabsat.

Hunio 16: Pinagtalinaed ti Moscow City Court ti desision idi Marso 26. Nangrugi ti pannakaiparit ken pannakawaswas ti legal a korporasion. Nayapelar ti kaso iti ECHR.

Agosto 31, 2004

[Ladawan iti panid 11]

Nairuar iti pagsasao a Giorgiano ti “Baro a Lubong a Patarus ti Kristiano a Griego a Kasuratan”

[Dagiti Ladawan iti panid 27]

Dagiti kakabsat a mangpapaandar iti maysa kadagiti dua a baro a pagimprentaan a MAN idiay Wallkill, New York, E.U.A.

[Ladawan iti panid 29]

Nabiit pay a naidedikar a sanga nga opisina iti Bangalore, India

[Ladawan iti panid 30]

Napalawa a sanga nga opisina iti Pilipinas