Iceland

mangngegmo ti nagan nga Iceland mabalin a mapanunotmo ti yelo, niebe, ken igloo. Madegdegan daytoy a panangipapan no kitaentayo ti mapa. Manmano ti tao nga agnanaed iti amianan nga Iceland ta ti makin-amianan nga igid daytoy a pagilian ket dandanin dumanon iti Arctic Circle!

Ngem iti kinapudnona, saan a nalamiis ti Iceland kas ipamatmat ti nagan ken lugarna. Adda nabara nga agus ti taaw nga aggapu iti amianan la bassit ti equator a mamagbalin iti klima a di unay nalamiis kas iti pagaruptayo. Awan dagiti igloo wenno balay dagiti Eskimo. Moderno unay ti kagimongan iti Iceland, ket dagiti tattao agnanaedda kadagiti napipintas a balay nga addaan kadagiti alikamen a pagpaimeng a paandaren ti pudot nga agtaud iti uneg ti daga.

Nagpaiduma ti pagilian nga Iceland. Iti ngalay ti kalam-ekna, sumagmamano la nga oras a makita ti init iti kada aldaw. Nupay naraniag dagiti atiddog a rabii gapu kadagiti makapaamanga a silsilaw iti amianan, wenno aurora borealis, kasla saan a kayat ti init ti sumingising. Nupay kasta, masupapakan daytoy babaen ti sumagmamano a bulan a panagsilnagna iti kalgaw. Iti kaamiananan a pungto ti pagilian, sumagmamano a lawas nga agtalinaed ti init iti ngatuen ti nagtugmokan ti baybay ken tangatang. Makitam sadiay ti init iti tengnga ti rabii.

Maitutop ti deskripsion iti Iceland kas pagilian ti yelo ken apuy. Naabbungotan iti dadakkel a yelo ti agarup kakasangapulo a paset ti pagilian. Adda met apuy​—ta ti Iceland ket lugar ti adu a bulkan ken nabara a burayok. Nagadun dagiti bulkan a  bimtak sadiay, ket iti promedio iti naudi a sumagmamano a siglo, adda bumtak iti kada lima wenno innem a tawen. Adu met dagiti napudot nga ubbog.

Natural ti kinapintas ken aglaplapusanan iti atap nga animal daytoy bassit ti populasionna a pagilian. Ti nadalus nga angin, makapaamanga a dissuor, nagduduma ti katayagda a bambantay, ken adu a let-ang ket makaatrakar kadagiti adu a bumisbisita. Iti rugrugi ti primavera, adu nga immakar a tumatayab ti agsubli kadagiti rangkis iti igid ti baybay ken kadagiti baresbes a pagnanaedanda iti kalgaw. Karaman kadagitoy a tumatayab ti arctic tern, a tinawen nga umakar iti Antarctica, iti sabali a pungto ti daga. Kadagiti rangkis ken kosta, makita dagiti puffin, eider, ken sea gull. Dagiti karnero agarabda kadagiti away, ket dagiti babassit ken naandur a kabalio iti Iceland agdakiwasda kadagiti bambantay. Iti rugrugi ti kalgaw, agsubli ti rinibu a salmon, nga aglangoy ken aglagtoda kadagiti karayan ken dissuor tapno agbugida sadiay.

Ti 290,570 nga umili iti Iceland ket kaputotan dagiti Viking, a nagindeg sadiay nasurok a 1,100 a tawen ti napalabasen. Kaaduan kadagitoy a nagindeg ket naggapu iti Norway, ken Old Norse ti pagsasaoda, nga isu ti nagtaudan ti pagsasao nga Islandiko. Dagiti nagsayaat a naipatawid a libro agraman ti pannakaiputputong ti pagilian ti makagapu a nataginayon ti pagsasaoda. Isu a dagiti tattao iti kaaldawantayo, mabasada dagiti kadaanan a salaysay, a kaaduan kadagitoy ti naisurat idi maika-13 a siglo. Ipagpannakkel dagiti taga Iceland ti pagsasaoda, ket saanda a kayat a malaokan ti pagsasaoda kadagiti sasao a nagtaud kadagiti ganggannaet.

“Pagano” ti kaaduan kadagiti immuna a nagindeg, ket idi laeng arinunos ti maikasangapulo a siglo a naikagumaan a nakomberte iti “Kristianidad” dagiti taga Iceland. Sakbay la unay ti arinunos dayta a siglo, nakomberte ti dadduma a nalatak a pangulo iti Iceland, ket idi tawen 1000, ti Althing a parliamento  ti Iceland, kiniddawna iti maysa kadagiti kangrunaan a panguluen ti relihion a pagano nga ikeddengna no ania ti nasaysayaat kadagiti dua a relihion. Makapasiddaaw ta inkeddengna a maysa laeng a relihion ti rumbeng nga annuroten, ti “Kristianismo.” Kasla inawat ken dida sinupiat daytoy. Nupay kasta, ti bilinna ket nangted iti pammalubos kadagiti tattao nga agdayaw a sililimed kadagiti pagano a didiosen ken mangitultuloy kadagiti pinapagano a kaugalianda. Nupay ad-adda a napolitikaan imbes a narelihiosuan ti bilin, dakkel ti naitulongna tapno makadesision a bukbukod dagiti taga Iceland ken agbalinda a mannakaawat kadagiti narelihiosuan nga isyu.

Ita, agarup 90 a porsiento iti populasion ti kameng ti Evangelical Lutheran Church, ti opisial a relihion ti nasion. Nupay adda Biblia iti dandani amin a pagtaengan, manmano ti mamati a Sao ti Dios dayta.

 Nakagteng ti Naimbag a Damag iti Iceland

Idi rugrugi ti maika-20 a siglo, adun a taga Iceland ti immakar idiay Canada tapno maliklikanda ti rigat nga itden dagiti panagbettak ti bulkan ken ti nakaro a lamiis. Sadiay a damo a nangngegan ti dadduma ti naimbag a damag maipapan iti Pagarian ti Dios. Maysa kadagitoy ni Georg Fjölnir Lindal. Nagpayunir kalpasan la unay ti panangidedikarna iti biagna ken Jehova a Dios. Ammo ni Kabsat Lindal ti agsao iti Islandiko, isu nga idi 1929, idi agtawen iti 40, inkeddengna ti umakar idiay Iceland. Simmangpet idiay Reykjavík idi Hunio 1 iti dayta a tawen ket isu ti immuna a nangikasaba iti naimbag a damag idiay Iceland.

Tallo a bulan a naguray ni Kabsat Lindal sakbay a simmangpet ti damo a naipatulod a literatura, ngem apaman a simmangpet, rinugianna ti nangasaba tapno madanonna ti amin a tattao iti pagilian. Idi arinunos ti Oktubre 1929, nakaipaiman iti 800 a kopia ti The Harp of God iti Islandiko. Iti daydi a tiempo, kastoy ti insuratna: “Sipud idi simmangpetak, agarup 11,000 a tattaon ti nakasabaak iti adu nga ili. Ti dagup ti populasion ti Iceland ket agarup 100,000 wenno ad-adu pay, isu nga adda pay 90,000 a masapul a makasabaan. Masapul ti adu a tiempo tapno madanon ti amin a teritoria ditoy ta nagrigat ti agbiahe. Kabambantayan ti Iceland, adu ti lasaten a baybay, awan dagiti riles ti tren, manmano ti kalsada, isu a kaaduanna nga agbilogak.”

Awan ti reklamo kadagiti sumagmamano a surat a naidulin iti daan a folder a nasuratan iti “Iceland.” Iti dayta a surat idi 1929, kinuna ni Lindal: “Maragsakanak a mangisalaysay iti makaparegta a kapadasak iti nabiit pay. Adda gundaway a simmarungkarak iti lugar a nangaskasabaak idi. Nakitak ti sumagmamano a tattao a gimmatang kaniak kadagiti libro idi damo a napanak sadiay. Kinuna ti maysa a lalaki: ‘Naminduan a naungpotko a binasa ti Harp ket basbasaek manen iti maikatlo a gundaway.  Napintas daytoy a libro. Agyamanak ta simmarungkarka.’ Kinuna ti sabali pay: ‘Imbag man ta nagsublika. Nagsayaat dayta a libro. Apay a dika itugot amin a libro ni Judge Rutherford iti Islandiko?’ Imbagak kenkuana a Danes ti kaaduan kadagita. Kinunana: ‘Ipatulodmo ti aniaman nga adda kenka, wen, dagiti pay tomo ni Pastor Russell, tapno adda umdas nga adalek iti panawen ti lam-ek.’ Inyebkas met ti dadduma ti panangapresiarda kadagiti libro. Agyamanak iti Dios ta pinalubosannak a mangidanon iti mensahe ti kinapudno kadagidiay mayat a dumngeg.”

Nagdakkel a trabaho para iti maymaysa a tao ti panangdanon iti amin a tao iti isla a nalawlawa  ngem iti kagudua ti England. Ti Iceland ket agarup 300 a kilometro ti kalawana manipud amianan nga agpaabagatan ken agarup 500 a kilometro manipud daya nga agpalaud. Ti kosta, agraman dagiti fjord ken luek, ket dandani 6,400 a kilometro ti kaatiddogna. Ngem iti las-ud ti sangapulo a tawen, nawanas ni Kabsat Lindal ti intero nga isla, nga inkasabana ti naimbag a damag ken nagiwaras kadagiti literatura. Dinaliasatna ti baybay babaen iti bilog, ket no bumisita kadagiti away, agusar iti dua a kabalio. Pagsakayanna daydiay maysa ken paraawit kadagiti literatura ken gargaretna daydiay maysa. Sigun kadagiti kakabsat a nakikadua idi kenkuana sumagmamano a tawen sakbay a pimmanaw iti Iceland, napasnek ken serioso ni Kabsat Lindal, managbabain ken saan a mannanao. Dakkel a lalaki ken nakataytayag no idilig kadagiti pagsaksakayanna a babassit a kabalio iti Iceland nga us-usarenna kadagiti panagdaliasatna. No dadduma,  no awan ti kabalio, isu ket napigsa a mangawit kadagiti libro ken gargaretna.

Idi inrugi ni Kabsat Lindal ti trabahona idiay Iceland idi 1929, dina impagarup a nagrigat ken agkasapulan iti adu nga anus ken tured ti pannakisaritana kadagiti tattao. Iti agarup 18 a tawen, ni laeng Kabsat Lindal ti Saksi idiay Iceland. Nupay nagaget, awan a pulos ti nakitana a dimmasig iti Pagarian. Idi 1936, insuratna: “Bayat ti kaaddak ditoy, nakaipaimaak iti 26,000 agingga iti 27,000 a libro. Adu a tattao ti nangbasa kadagitoy. Dadduma ti nangbusor iti kinapudno, ket ti kaaduan saanda a nangikankano.”

Ngem adda met dagiti nangipateg iti mensahe a naidanon kadakuada. Kas pagarigan, adda maysa a lakay nga immawat iti kopia ti The Harp of God. Idi sinarungkaran ni Kabsat Lindal kalpasan ti sumagmamano a bulan, naam-ammona ti balasang ti lakay. Imbaga ti balasang a kaay-ayo ni tatangna ti libro ket inadalna a naimbag dayta sakbay a natay. Maitunos iti kaugalian a pagano, kiniddawna pay ketdi nga iti ipapatayna, maikabil ti libro iti lungonna, ket kasta ti napasamak.

Nagpatingga idi Marso 25, 1947 ti napaut ken naliday a panagnaed ni Kabsat Lindal idiay Iceland idi simmangpet dagiti nagraduar iti Watchtower Bible School of Gilead. Intultuloyna ti nagserbi sadiay agingga a nagawid idiay Canada idi 1953. Kalpasan ti 16 a tawen, ni Páll Heine Pedersen, nga agserserbi idi kas special pioneer idiay Iceland inkeddengna ti mapan idiay Winnipeg, Canada. Kayatna a makita ni Kabsat Lindal tapno maammuanna a mismo ti maipapan iti trabahona idiay Iceland agsipud ta iti daydi a tiempo, pimmanawen dagiti misionero a nakipagtrabaho ken ni Kabsat Lindal idiay Iceland. Bayat nga agbakbakasion ni Kabsat Pedersen idiay Estados Unidos, naglugan iti bus nga agpa-Winnipeg. Idi nakasangpet sadiay, naammuanna nga iti dayta nga agsapa, naturposen ni Kabsat Lindal ti biagna ditoy daga. Isu ket nagserbi a simamatalek ken Jehova agingga iti ipapatayna.

 Ad-adu a Trabahador Para iti Panagani

Idi 1947, nangrugi ti baro a panawen ti panangikasaba iti naimbag a damag idi simmangpet dagiti damo a misionero a nagraduar iti Gilead, nga agpada a naggapu iti Denmark. Maysa kadakuada ni Leo Larsen. Dua pay a misionero ti simmangpet idi Disiembre 1948: Da Ingvard Jensen manipud Denmark ken ni Oliver Macdonald manipud England. Dagitoy a kabbaro nga agani intultuloyda ti trabaho nga inaramid ni Kabsat Lindal ken nagiwarasda iti adu a literatura. Bayat ti panawen ti lam-ek mangasabada idiay Reykjavík ken iti aglawlawna, ket bayat ti ababa a kalgaw, mangasabada kadagiti away nga asideg iti kosta. Malagip a nangnangruna ni Ingvard Jensen ti maysa a panangasabada. Insuratna: “Bayat ti umuna a kalgaw a kaaddak idiay Iceland, kinaduaak ti maysa kadagiti misionero a napan kadagiti away. Kaaduanna, aglugankami iti bus wenno bilog a mapan iti napili a teritoria, ken mangitugotkami kadagiti  bisikleta, tolda, sleeping bag, literatura, ken taraon. Maysa a rabii, napankami iti ili ti Stykkishólmur iti makinlaud a kosta, ket simmangpetkami iti malem iti kabigatanna. Planomi a sarungkaran ti amin a pagtaengan iti ili sa agbisikletakami a mapan iti ili ti Borgarnes, nga agarup 100 a kilometro ti kaadayona. Adda lantsa nga inaldaw nga agbiahe sadiay a mapan iti Reykjavík. Nagsayaat ti rugi ti biahemi. Ngalay idi ti Hunio, ken agin-init. Iti umuna a rabii, simrekkamin iti sleeping bag kalpasan ti panangasabami iti dadduma a paset ti ili. Ngem bayat ti rabii, saan a naimeng dagiti nagturoganmi. Kabigatanna, natakuatanmi no apay: Adda nagtinnag a niebe bayat ti rabii ket 10 a sentimetro ti kapuskolna! Imposible a paababaenmi ti panangasabami, ta makalawas nga awan ti agbiahe a bilog. Isu a masapul a surotenmi ti eskediulmi, mangasabakami iti ili, ken agbisikletakami iti  dalan iti bantay a mapan iti sumaganad nga ili, sa mangasabakami kadagiti talon a madalananmi.”

Nakagtengda idiay Borgarnes kalpasan ti uppat nga aldaw. Nagbisikletada a nangsarakusok iti niebe, tudo, ken napigsa nga angin a 110 a kilometro iti kada oras. Ngem naibturanmi daytoy dakes a paniempo gapu iti kinamanagpadagus dagiti mannalon iti dalanmi, a kanayon a mangawis kadakami a makipangan ken agkape a kaduada. Malagip ni Kabsat Jensen a maminwalo wenno maminsangapulo a manganda iti kada aldaw! Kinunana: “Ammok nga agsakit ti nakem dagiti tattao no dimi patgan ti naayat nga awisda, ket daytoy ti nangted kadakami iti gundaway a mangted iti naan-anay a pammaneknek maipapan iti naipasdeken a Pagarian ni Jehova.”

Bayat ti umuna a tallo a tawen a panangasaba dagiti misionero idiay Iceland, nakaipaima dagiti kakabsat iti nasurok a 16,000 a literatura. Ngem saan a rimmang-ay ti panagsarungkar ken panangyadal iti Biblia. Dagiti tattao sitatallugod nga inawatda dagiti literatura ngem saanda nga impangag ti mensahe. Kas pagarigan, da Kabsat Larsen ken ni baketna a Missie​—a naggapu idiay Denmark idi 1950 tapno makikallaysa ken Leo—napanda iti makindaya a kosta, a sadiay a nangasabada kadagiti ili ti Höfn, Eskifjördhur, Neskaupstadhur, ken Seydhisfjördhur. Bayat daytoy makabannog a biahe, nakaipaimada iti 300 a libro ken agarup kasta met a kaadu a bokleta. Nairagpin iti amin a libro dagiti pagsenial iti libro a nakayimprentaan ti ababa a Nainkasuratan a mensahe ken ti adres dagiti misionero idiay Reykjavík. Maawis nga agsurat ti amin a mangala kadagiti literatura tapno makagun-odda iti ad-adu pay nga impormasion maipapan iti kinapudno​—ngem awan ti uray maysa a nagsurat.

Idi 1952, naikeddeng nga ad-adda a matrabaho dagiti teritoria iti makin-amianan a kosta. Isu nga idi Hunio iti dayta met la a tawen, da Oliver Macdonald ken ni baketna a Sally, a naggapu idiay England idi 1949 tapno makikallaysa ken Oliver,  naidestinoda idiay Akureyri kas special pioneer. Napasaranda sadiay ti nakaro a pannakaidadanes manipud iti grupo dagiti Plymouth Brethren, nga indauluan ti Britano a konsul iti ili. Adu dagiti pasurotna, ken umimdeng ti dadduma kenkuana no busorenna dagiti Saksi kadagiti palawagna ken kadagiti artikulona. Nupay saan a nairuam dagiti payunir iti kasta nga ibubusor idiay Reykjavík, situtured a sinarangetda ti ibubusor, ken intultuloyda ti nangasaba kas iti dati ken inusarda ti amin a gundaway a mangsungbat kadagiti ulbod a pammabasol. Naipablaak dagiti sungbatda kadagiti dadduma a periodiko.

Malaksid iti panangasaba iti ili, napan met dagiti payunir kadagiti adayo a lugar, nagipaimada kadagiti literatura ket adu ti nangpadagus kadakuada ngem bassit ti nasarakanda a pudno nga interesado iti mensahe maipapan iti Pagarian. Nagsubli da  Kabsat Macdonald idiay Reykjavík idi Hulio 1953, ngem sakbay a pimmawda idiay Akureyri, nakaimulada kadagiti bukel ti kinapudno, nga agtubonto inton agangay.

Naisaad ti Pundasion

Kalpasan ti 27 a tawen a panagmula ken panagsibug, makita met laengen dagiti kakabsat idiay Iceland dagiti bunga ti nagbannoganda. Idi rugrugi ti 1956, pito a kabbaro ti dimmasig iti Pagarian ket indedikarda ti biagda ken Jehova. Agingga iti daydi a tiempo, kaaduan kadagidiay naginteres iti kinapudno ti saan a nagtalinaed iti dayta, malaksid ken ni Iris Åberg a maysa nga Ingles a kabsat a babai a pimmanaw iti pagilian idi agangay. Ita, piton a kabbaro ti nabautisaran, ket naisaaden ti natibker a pundasion. Ngem idi tawen 1957, dagiti misionero ken payunir a sigaganetget a nangasaba tapno makitada a maipasdek a sititibker ti kinapudno idiay Iceland, pimmanawdan gapu kadagiti parikut iti salun-at.

Isu nga idi 1957, maysa a babai nga special pioneer​—ni Edith Marx, a simmangpet idi 1956 manipud Denmark—ti nabati a mangaywan iti bassit a kongregasion. Kasapulan idi dagiti agani a tumulong iti grupo, a kellaat a pinanawan dagidiay timmulong kadagiti kabbaro a mangammo iti kinapudno ken agbalin a natibker iti dayta. Ngem di nagbayag, simmangpet dagiti special pioneer a naggapu idiay Denmark, Sweden, ken Alemania. Kanayonanna, adu nga agibumbunannag ken payunir ti immakar idiay Iceland tapno makiraman iti panangikasaba iti Pagarian. Sipud idin, nagtultuloy ti irarang-ay ngem in-inut.

Ti irarang-ay ket nangyeg met kadagiti makaparagsak a pasamak, agraman ti regular nga ibibisita ti manangaywan iti sirkito ken dagiti tinawen a kombension distrito. Masapul ti ad-adu a literatura iti pagsasao nga Islandiko. Ti Enero 1, 1960 nga isyu ti immuna a magasin a Pagwanawanan iti pagsasao nga Islandiko. Daytoy ti nangyeg iti dakkel a pammaregta  iti trabaho. Anian a ragsak dagiti kakabsat ta mabalindan nga itukon daytoy a publikasion kadagiti taga Iceland iti bukodda a pagsasao! Ken anian a makapabileg iti pammati dagiti kakabsat a mismo ti mangsagrap iti nagsayaat a naespirituan a taraon iti kada bulan! Idi nayanunsio iti asamblea sirkito idiay Reykjavík a maipablaak ti Ti Pagwanawanan iti pagsasao nga Islandiko, naipakita ti dakkel a kopia ti magasin iti likudan ti nagpalawag. Anian a ragsak dagiti kakabsat iti daytoy baro a sagut ni Jehova!

Malagip ni Kabsat Pedersen nga idi simmangpet idiay Iceland idi Oktubre 1959, ti laeng publikasion a naipablaak iti Islandiko a mausar iti tay-ak ket ti bokleta a “Daytoy Naimbag a Damag ti Pagarian,” ket adun a bumalay ti addaan iti kopia. Dagiti agibumbunannag itukonda Ti Pagwanawanan ken Agriingkayo! iti pagsasao nga Aleman, Danes, Ingles, wenno Sueko kadagidiay makabasa iti maysa kadagitoy a pagsasao. Nupay adu ti makaawat iti maysa kadagitoy a pagsasao, ad-adda a magunggonaanda no mabasada Ti Pagwanawanan iti bukodda a pagsasao. Dakkel ti epekto daytoy a publikasion a naipablaak iti Islandiko iti trabaho a panangasaba. Nakagun-od dagiti 41 nga agibumbunannag ken payunir iti 809 a suskripsion ken nakaipaimada iti 26,479 a magasin bayat dayta a tawen serbisio. Rimmang-ay met ti bilang dagiti panangyadal iti Biblia.

Dimteng ti sabali pay a napateg a pasamak idi naipasdek ti sanga nga opisina idi Enero 1, 1962. Ti Iceland ket imatmatonan idi ti sanga nga opisina iti Estados Unidos ken sakbay dayta, ti sanga nga opisina iti Denmark. Kalpasanna, idi 1969, legal  a nabigbig ken nairehistro dagiti Saksi ni Jehova iti Ministry of Justice and Ecclesiastical Affairs. Ita, dagiti Saksi idiay Iceland addaandan iti kalintegan a kas iti amin a sabsabali a relihion ken mabalindan ti mangasar ken mamumpon.

Panangbusor ti Klero

Iti bulan a pannakaipasdek ti sanga nga opisina, napasaran dagiti kakabsat ti ibubusor ti klero. Maysa nga agsapa, dagiti paulo ti damag iti kangrunaan a periodiko inwaragawagna a ti obispo ti relihion ti nasion ket nangiruar iti bokleta a mangpakpakdaar maibusor kadagiti Saksi ni Jehova, a bagbagaanna dagiti tattao a saanda a dumngeg kadakuada. Vottar Jehóva​—advörun (Dagiti Saksi ni Jehova​—Maysa a Pakdaar) ti titulo ti bokleta. Nangipablaak met ti dadduma a periodiko iti impormasion maipapan kadagiti Saksi. Ti Vísir, a kangrunaan a periodiko iti malem, impablaakna ti interbiu ti maysa a kabsat nga agserserbi iti sanga nga opisina. Inlawlawag ti artikulo dagiti panangmatmattayo, ket di nagbayag, nangipablaak met ti dadduma a periodiko kadagiti artikulo maipapan kadagiti Saksi. Iti daytoy a wagas, naipaay ti dakkel a pammaneknek, ket adu a tattao ti nakaammo iti trabahotayo. Nagsurat pay ti dadduma nga agbasbasa kas panangsuportada kadagiti Saksi, ket naipablaak dagitoy kadagiti periodiko. Bimmales met ti obispo, ket nangipablaak iti “sungbat” kadatayo. Nupay kasta, iti maysa a panid nga artikulo a naipablaak iti kalatakan a diario, ti Morgunbladid, inlawlawag a naan-anay dagiti Saksi ni Jehova ti trabaho ken patpatienda.

Naiwaras iti intero a pagilian ti bokleta a naglaon iti pakdaar. Nagbanaganna, limmatak iti kasta unay dagiti Saksi ni Jehova, ket nagpaut iti adu a tawen ti epekto daytoy iti teritoria. Gapu iti amin a publisidad, impadamag ti maysa a diario: “Ti obispo ti nangidaulo iti pannakayam-ammo dagiti Saksi ni Jehova iti publiko.” Limmatak dagiti adipen ni Jehova uray kadagiti nasulinek a lugar iti pagilian nga awanan pay laeng kadagiti  Saksi mangaskasaba. Nupay tinungpal ti dadduma ti balakad ti obispo, kaaduan ti nagusioso. Ngem iti amianan, iti Akureyri, adda ibubusor. No dadduma, uboren dagiti agtutubo da Heinrich ken Katherine Karcher, a nagpayunir sadiay. Adu a tawen kalpasanna, ti dadduma a relihioso a bumusbusor idiay Akureyri, inwarasda manen ti bokleta a naggapu iti obispo, nga impayimprentada manen sadiay. Kasta met la ti inaramid dagiti Pentecostal idiay Reykjavík, ta pagarupenda a mapasardengda wenno malapdanda ti panangasaba.

Ti Karit a Mangorganisar Kadagiti Kombension

Dagiti asamblea ken kombension ket kanayon a naragsak ken nagpateg nga okasion para kadagiti adipen ti Dios idiay Iceland. Nupay manmano dagiti agibumbunannag, saan a nagkedked dagiti kakabsat a mangorganisar kadagiti asamblea. Naangay ti damo nga asamblea idi Hulio 1951, idi bimmisita idiay Iceland ti dua a kakabsat​—da Percy Chapman manipud Canada ken ni Klaus Jensen manipud Brooklyn—tapno tabunuanda ti agsasaruno nga asamblea a naangay idiay Europa iti dayta a kalgaw. Nupay manmano dagiti agibumbunannag idiay Iceland iti daydi a tiempo, adda 55 a kangatuan a bilang ti timmabuno iti asamblea. Naangay ti sumaganad nga asamblea kalpasan ti pito a tawen, idi Hunio 1958, bayat ti ibibisita ti manangaywan ti sona a ni Filip Hoffmann, ket 38 ti dimngeg iti palawag publiko. Sipud idin, tinawenen a maang-angay dagiti asamblea ken kombension.

Maysa ni Fridrik Gíslason kadagiti sumagmamano a kakabsat nga addaan kadagiti paset kadagiti programa iti kombension bayat ti dekada 1950. Insalaysayna: “Malagipko a kadagiti immuna nga asamblea, siak idi ti agay-aywan iti Food Service Department. Malaksid iti panangaramidko a bukbukod iti kaaduan a trabaho, gagangayen nga addaanak iti tallo wenno uppat a paset iti programa iti kada aldaw. Agusarak iti apron no agtrabahoak iti kosina. No agap-apuraak a mapan agpalawag,  isuotko ti amerikanak, nupay palagipandak no dadduma dagiti kakabsat nga uksobek ti apron-ko. Ita, addan 400 agingga iti 500 a tumabtabuno kadagiti asamblea, ket adun a nalalaing a panglakayen ti kualipikado a mangiparang kadagiti paset iti programa.”

Makaparagsak ken makaisuro a paset ti programa dagiti drama iti Biblia kadagiti kombension distrito. Ngem gapu ta manmano dagiti agibumbunannag iti Iceland, maiparang laeng dagiti drama babaen iti tape. Tapno agbalin a kasla agpaypayso dagiti drama, timmulong ti sanga nga opisina iti Denmark a mangipaay iti de kolor nga slide a mabalin a maigiddan iti uni. Kaskasdi, masapul ti adu a tiempo a mangisagana. Umuna, masapul a maipatarus dagita iti Islandiko. Sa mairekord ti boses dagiti kakabsat a mangisao kadagita iti Islandiko. Kalpasanna, mainayon dagiti musika ken uni manipud kadagiti Ingles a tape. Agduduma ti akem ti sumagmamano a kakabsat, a baliwanda ti  timekda sigun iti karakter nga iparangda. Idi agangay, aktualen a naiparang dagiti drama a nakausaran dagiti kawes idi unana.

Ti immuna a drama a naiparang iti kombension distrito idi 1970 ket maipapan ken ni Reyna Ester. Dagiti kakabsat sigagagar nga insaganada ti drama ken siaanep nga inensayoda dayta. Baro a kapadasan ti agkawes a kas kadagiti tattao idi panawen ti Biblia, ken para kadagiti kakabsat a lallaki, ti mangipigket iti barbas kadagiti rupada. Nailimed nga adda maiparang a drama iti kombension. Makaparagsak daytoy a sorpresa. Kadagiti babassit a kombension, a dandani agaammo amin a tattao ken asidegda iti entablado, ikagkagumaan ti dadduma a bigbigen no siasino ti nagakem. Kalpasan ti pannakabuyana iti maysa a drama, kinuna ti maysa a kabsat a babai, “Agasem, maysa laeng a kabsat a lalaki ti nabigbigko iti drama, ket isu ti nagakem kas Ari Nabucodonosor!” Imbagana ti nagan ti kabsat a lalaki ngem nasdaaw ta nagbiddut gayam. Pudno nga inapresiar dagiti kakabsat ti bannog ti nagadu a kakabsat tapno maiparang ti programa kadagiti babassit a kombension ken asamblea. Nagunggonaan ti amin kadagiti nagsayaat a leksion kadagiti drama a naiparang iti bukodda a pagsasao.

Mangyeg iti Rag-o Dagiti Internasional a Kombension

Iti adun a tawen, tinagiragsak met dagiti kakabsat idiay Iceland a tinabunuan dagiti kombension kadagiti sabali a pagilian. Lima a delegado manipud Iceland ti naaddaan iti gundaway a timmabuno iti Nadibinuan a Pagayatan nga Internasional nga Asamblea iti New York idi 1958. Adu ti timmabuno kadagiti Nagkaykaysa a Managdaydayaw nga Asamblea idiay Europa idi 1961 ken kadagiti “Agnanayon a Naimbag a Damag” nga Asamblea idi 1963. Tinagiragsak ti dadduma ti nakilangen kadagiti kakabsat a naggapu iti adu a pagilian kadagiti “Nadiosan a Balligi” nga Internasional nga Asamblea idi 1973. Nasurok a 100 nga agibumbunannag manipud Iceland ti timmabuno iti “Talna Ditoy Daga” nga Internasional nga Asamblea idiay  Copenhagen, Denmark, idi Agosto 5-10, 1969. Daytoy ti kadakkelan a grupo a naggapu idiay Iceland a timmabuno iti internasional a kombension iti sabali a pagilian. Iti dayta a kalgaw, 80 a porsiento kadagiti agibumbunannag idiay Iceland ti napan iti sabali a pagilian tapno tumabuno iti kombension.

Gapu ta nagadu a taga Iceland ti nagplano a tumabuno iti kombension idi 1969, inyurnos ti sanga nga opisina iti Denmark nga agkakatugaw dagiti kakabsat a taga Iceland. Kadagiti agsapa, sakbay a mangrugi ti sesion, agtitipon dagiti kakabsat a taga Iceland iti lugar a naituding a pagtugawanda tapno repasuenda ti programa iti bukodda a pagsasao.

Karaman kadagidiay timmabuno iti daytoy a kombension ti maysa nga agtutubo a lalaki nga agnagan iti Bjarni Jónsson. Isu ket anak ti abogado a makinkukua iti pasdek nga ab-abangan dagiti kakabsat kas pagtaengan dagiti misionero ken sanga nga opisina. Bassit ti ammo ni Bjarni maipapan iti kinapudno, ken saan a tumabuno iti kombension ti panggepna a nagbiahe a kadua dagiti kakabsat. Kasano a napasamak daytoy?

Ti branch servant idi iti sanga nga opisina a ni Kjell Geelnard, adda bambanag a nakisaritaanna iti ama ni Bjarni. Naisarita kenkuana ni Kjell maipapan iti internasional nga asamblea idiay Copenhagen ken ti grupo dagiti kakabsat nga agpalplano a tumabuno. Idi nangngeg ti abogado daytoy, kiniddawna no mabalin a makikuyog iti grupo ti inauna nga anakna a lalaki. Imbagana ken Kabsat Geelnard a katurturpos ti barona iti haiskul, isu a kayatna a sagutan ti panagbiahe iti sabali a pagilian, ket nasayaat ti Copenhagen a kas met iti sabali a lugar. Imbaga ni Kjell a nasayaat dayta nga ideya ket imbagana iti abogado a no kayat ni Bjarni ti tumabuno iti asamblea tapno makitana no ania ti maar-aramid sadiay, mabalin a mayurnos ti pagdagusanna idiay Copenhagen. Naay-ayo ti abogado a nakangngeg iti daytoy, isu a dinamagna iti anakna no kayatna ti makikuyog iti grupo dagiti Saksi ni Jehova a mapan makiasamblea. Immanamong a dagus ti barona.

 Nakiuman dagiti kakabsat iti Rooming Department tapno makabirokda iti pagdagusan ni Bjarni idiay Copenhagen. Nakabirok dagiti kakabsat iti pagdagusanna a balay ti maysa a pamilia a Saksi. Kinanselar ti maysa a delegado nga Americano, a kakuarto koma ti taga Iceland a kabsat a lalaki nga agnagan iti Jakob, ti naireserba a dagusna, isu a ni Bjarni ti naisukat. Nupay kasta, gapu iti sumagmamano a rason, saan a simmangpet ni Jakob. Ni laeng Bjarni ti napan nagdagus. Tangay saan a naibaga ti Rooming Department a ni Bjarni ti kasukat ti kabsat nga Americano, impagarupda a ti sangailida ket ni Jakob.

Kas iti kanayon a mapasamak, no agtitipon dagiti kakabsat a naggapu iti nadumaduma a lugar, estoriaenda dagiti kapadasanda. Nasdaaw dagiti taga Denmark a kakabsat ta awan ti kapadasan a maisalaysay ni “Jakob.” Iti sabali a bangir, mariro ni Bjarni no kanayon nga awagan dagiti nakidagusanna iti Jakob. Tangay adda iti Biblia ti nagan a Jakob, impagarupna a nalabit kadawyan kadagiti Saksi ni Jehova ti agusar kadagiti nagnagan iti Biblia iti panagsasaritada. Nalawlawagan ti pannakariro idi maysa kadagiti kakabsat a lallaki nga adda idiay nagdagusan ni Bjarni ti nakiam-ammo iti taga Denmark a kabsat a lalaki nga  agpaypayunir idiay Iceland. Dinamag ti taga Denmark a kabsat no kabbaro ni “Jakob” iti kinapudno ta awan ti maestoriana maipapan iti panangasaba idiay Iceland. Inlawlawag ti taga Denmark a kabsat a ti aw-awaganda a “Jakob” ket isu ni Bjarni, maysa nga estudiante a taga Iceland a nakikuyog kadagiti kakabsat nga immay iti Copenhagen. Nagsayaat ti panangsangaili dagiti nangpadagus ken ni Bjarni ken inawisda a makipagnaed kadakuada iti maysa pay a lawas bayat ti panagpasiarna idiay Denmark. Naallukoy ni Bjarni iti kasta a kinaimbag.

Kinapudnona, tinabunuan ni Bjarni ti asamblea. Nupay awan ti pannakaammona iti kinapudno tapno magunggonaan a naan-anay iti programa, naragsakan unay iti nakita ken nangngegna. Apaman a nakaawid idiay Iceland, isu ken ti pamiliana rinugiandan ti nagadal iti Biblia. Nagsayaat ti irarang-ay ni Bjarni iti kinapudno ket nabautisaran idi 1971. Nagserbi kas miembro ti Branch Committee idiay Iceland sipud idi 1979.

Adu a tawenen nga agipatpatarus ni Svanberg Jakobsson idiay sanga nga opisina iti Iceland ket isu itan ti manangaywan  iti Departamento ti Panagipatarus. Kas agtutubo nga agibumbunannag, tinabunuanna ti “Nadiosan a Balligi” nga Internasional nga Asamblea idiay London, England, idi 1973. Insalaysayna: “Malagipko a naragsakanak unay a nakakita iti rinibu a kakabsat nga immay iti istadium a pagkombensionan. Naragsakanak a nakakita kadagiti nagadu a kakabsat a naggapu idiay Africa, a nakakawes iti nagduduma ti kolorna a nailian a kawesda. Diak malipatan ti kapadasak a nakikadua kadagiti rinibribu a kakabsat, nakipagdengngeg kadakuada iti programa, nakipagkanta, nakipagkararag, nakipangan, ken uray ti pannakilangen laeng kadakuada.”

Ni Sólborg Sveinsdóttir, a nabautisaran idi 1958, ket nagbarko iti innem nga aldaw, a kaduana dagiti uppat nga annakna tapno tabunuanda ti kombension idiay Copenhagen idi 1961. Karaman ni Sólborg iti bassit a naiputputong a grupo idiay Keflavík. Ania ti epekto kenkuana ti itatabunona iti dakkel nga internasional a kombension? Kinunana: “Makakayaw a mangngeg ti nasurok a 30,000 a kakabsat nga agdadanggay a mangkankanta kadagiti kanta ti Pagarian iti lima a pagsasao​—dakkel ti epekto dayta kaniak. Nagsayaat ti pannakaorganisar ti amin.”

Adu ti magastos iti panagbiahe a tumabuno kadagiti internasional a kombension, ngem ammo dagiti kakabsat a masupapakan dayta. Ti itatabuno kadagiti kasta a makaparagsak a naespirituan a padaya nga insagana ni Jehova ken ti pannakitaripnong kadagiti dadduma a kapammatian ket maysa a bendision.

Simmarungkar ti Naespirituan a “Serbidor”

Adu ti immakar idiay Iceland tapno agserbida kadagiti lugar nga addaan iti dakdakkel a panagkasapulan. Para kadakuada amin, ti iyaakar kaipapananna ti napaut ken narigat a panangikagumaan a mangadal iti narikut a pagsasao nga Islandiko. Nupay kasta, mabalin a bendision no dadduma ti di panagkikinnaawatan iti pagsasao. Kas pagarigan, maysa nga aldaw namalaybalay  ni Heinrich Karcher, ket impakaammona ti bagina kas maysa nga agserserbi, wenno adipen. Iti maysa a balay, adda agkabannuag a babai a rimmuar iti ridaw, ket apaman a nayam-ammo ni Heinrich ti bagina, pinauneg ti babai. Sabali ti nagawatanna no siasino daytoy a lalaki agsipud ta iti Islandiko, ti sao a ministro ket agpada a kaipapananna ti “adipen” ken “serbidor.” Impagarupna nga isu ket kadua ni lakayna, a maysa a serbidor iti hotel iti lugarda. Ammona a dandanin agawid ni lakayna, isu a mabalin a paunegenna ti impagarupna a katrabahuan ni lakayna tapno agkitada. Siempre, nagkatawada idi naammuanda a dida nagkinnaawatan.

Simmangpet ni lakayna, ket ti naespirituan a ‘serbidortayo’ indasarna kadagiti agkabannuag nga agasawa ti nagsayaat a naespirituan a taraon, a kaay-ayoda unay. Kiniddawda pay nga agsubli ni Heinrich ken ikuyogna ni baketna. Di nagbayag naipasdeken ti regular a panagadal iti Biblia, ken rinugianen ti agkabannuag nga agassawa ti nangasaba kadagiti sabsabali. Uray no madama nga agtartrabaho iti hotel iti lugarda, nakisarita ti agkabannuag a serbidor iti amin a dumngeg. Idi agangay, nabautisaranen ti agassawa. Naragsakanda ta simmarungkar kadakuada daytoy naespirituan a “serbidor” ken saan a nagkedked a nangasaba kadakuada iti pagsasao a naiduma iti pagsasaona.

Bayat ti adu a tawen, adun dagiti nakakatkatawa a pasamak gapu kadagiti di panagkinnaawatan no ad-adalen pay laeng dagiti kakabsat ti pagsasao nga Islandiko. Kas pagarigan, idi kasangsangpet pay laeng ni Sally Macdonald idiay Iceland, nangisagana iti maysa nga introduksion: “Sumarsarungkarak kadagiti tattao iti daytoy a sangakaarrubaan tapno iranudko kadakuada dagiti makaparagsak a bambanag manipud iti Biblia.” Ngem napagsinnukatna ti sao a sarungkar (heimsækja) ken ti sao nga idadanes (ofsækja) ket nakaisem a kinunana: “Idaddadanesko dagiti tattao iti daytoy a sangakaarrubaan.”

 Namalaybalay a Kadua ti Ministro a Luterano

Iti adu a tawen, da Holger ken Tove Frederiksen a naggapu idiay Denmark nagserbida a simamatalek kas special pioneer idiay Iceland, ken nagserbida iti apagbiit kas agdaldaliasat a manangaywan. Nupay narigatan ni Tove a nagsursuro ken mangadal a naimbag iti pagsasao nga Islandiko, adu ti natulonganna a nakaammo iti kinapudno gapu iti regta ken kinapasnekna.

Naminsan, bayat nga agserserbi iti sirkito, namalaybalay ni Holger ken ti maysa nga agtutubo nga agibumbunannag iti maysa a bassit a purok. Nasdaawda ta nakikadua kadakuada ti ministro a Luterano. Kasano a napasamak dayta?

Saan pay a nabayag sakbay dayta, sinarungkaranda ti ministro iti pagtaenganna. Kasla mannakigayyem ken inawisna pay ida iti opisinana. Kalpasan ti panangsukimat ti ministro kadagiti libro nga ituktukonda, kinunana, “Naglaon dagitoy a libro kadagiti ulbod a sursuro!” Kalpasanna kellaat a timmakder, intag-ayna dagiti imana, ket imbagana nga ilunod ida ti Dios. “Iparitko ti panangasabayo iti parokiak!” impukkawna. Imbaga ni Holger nga awan ti kalinteganna a mangiparit kadakuada ket intultuloyda ti nangasaba. Kalpasanna, kinuna ti ministro, “No itultuloyyo ti mangasaba iti parokiak, kumuyogak kadakayo.” Imbaga ni Holger a naimbag no makikuyog.

Kalpasan ti isusurot ti ministro a simmarungkar iti dua a balay a kaasitgan iti pagtaenganna, nasabatda ni Tove ken ti sabali pay a kabsat a babai, a nasdaaw a nakakita a kaduada ti ministro a mamalaybalay. Ket ti ministro inawisna ida iti pagtaenganna tapno agkapeda. Naaddaanda iti nainggayyeman a panagsasarita. Pagarup ni Holger a ti kellaat ken di ninamnama a naimbag a pannakilangen ti ministro ket nairanta a manglapped iti panangasabada iti amin nga adda iti teritoria. Isu nga iti simmaganad nga aldaw, nagsublida ket kinasabaanda ti intero a purok, a nagipaimada iti adu a literatura ken nakisaritada kadagiti adu a tattao a mayat a dumngeg.

 Pinasardeng ti Reggaay

Ti panangasaba kadagiti tattao iti away masansan a kasapulanna ti panagbiahe iti kabambantayan a sadiay dagiti kalsada ket napno iti yelo ken naabbungotan iti niebe no panawen ti lam-ek. Idi Disiembre 1974, bayat nga agserserbi ni Kjell Geelnard kas agdaldaliasat a manangaywan a kaduana ni Iiris nga asawana, bimmisitada iti Akureyri, iti makin-amianan a kosta. Iti makalawas a kaaddada iti kongregasion sadiay, nagbiaheda iti nasurok a 80 a kilometro a mapan iti ili ti Húsavík. Inkuyogda da Holger ken Tove Frederiksen. Nangasabada nga uppat idiay Húsavík ken iti aglawlawna iti sumagmamano nga aldaw ket inleppasda ti bisita babaen iti maysa a palawag publiko agraman ti panangipabuyada iti slide iti maysa nga eskuelaan. Idi mangrugin ti miting, dimteng ti bagyo a nangyeg iti naglamiis nga angin, niebe, ken tudo a kasla yelo. Kalpasan ti miting, bayat nga ur-urnongen dagiti timmabuno dagiti alikamenda tapno agawiddan, naawan ti koriente iti intero nga ili gapu iti bagyo. Awan ti silaw idi pinanawan dagiti kakabsat ti eskuelaan, ngem naragsakanda amin ta naipabuya ti slide sakbay a naawan ti koriente.

Masapul nga agawiden idiay Akureyri dagiti pagassawaan a Geelnard ken Frederiksen. Dinamagda kadagiti polis ken dadduma a drayber ti trak ken bus ti kasasaad ti kalsada ket naipasigurado kadakuada a saan a nakaro ti kasasaad. Isu a nagrubbuatda a dagus, ngem naibayagda bassit a nagempake ta kandela laeng ti silawda. Ket idi napanda gimmatang iti gasolina ti luganda, ti agbambantay iti paggasolinaan masapul a manomano a bombaenna ti gasolina. Agarup alas nuebe ti rabiin idi nakasaganadan a pumanaw.

Kastoy ti panangestoria ni Kjell iti biaheda: “Idi damo nasayaat ti amin, ngem umad-adun ti agtinnag a niebe. Pasaray narigaten a makita ti kalsada ket masapul a rummuar ni Holger iti lugan tapno lenteanna ti dalanmi. Idi kuan saankamin a  makaabante gapu iti kapuskol ti niebe. Indurduronmi ti lugan ken nagpalpalakami iti niebe, ngem idi agangay simmardengkami gapu iti nagabsuon a niebe a nangbangen iti dalanmi. Natakuatanmi kalpasanna a nargaay dayta a niebe manipud iti bantay. Iti gagangay a kasasaad, dua nga oras laeng ti biahe manipud Húsavík agingga iti Akureyri, ngem innem nga orasen nga addakami iti dalan ket kagkagudua pay laeng ti nabiahemi.

“Alas tres ti parbangon idin. Nabasa, nabannog, ken kumkumterkamin. Anian a ragsakmi idi makitami nga adda silaw iti asideg a talon. Dayta ti nangpakired kadakami a mapan sadiay ken agtuktok iti ridaw. Ni Holger, a maysa a nadayaw ken nakonsiderasion a tao, ti nagtuktok iti makinsango a ridaw. Idi awan ti nangilukat, linukatanna ti ridaw, immuli iti agdan, ket siaalumamay a nagtuktok iti ridaw ti kuarto. Nupay nakigtot  ti mannalon ken ti asawana, natanang ti pannakisaritada. Inlawlawagda a naturogdan idi naawan ti koriente ket nalipatanda nga iniddep dagiti silaw!

“Napasaranmi ti naimpusuan a kinamanagpadagus dagiti taga Iceland. Inyakar ti mannalon ken ni baketna dagiti matmaturog nga annakda iti sabali a kuarto tapno adda dua a kuarto a mabalin a pagturoganmi nga uppat, ket sumagmamano pay a kanito, nangidasar dagiti agassawa iti napudot a kape ken naimas a tinapay iti lamisaan iti kosina. Kabigatanna, kalpasan ti pammigat, impilit ti mannalon a mangaldawkami pay. Kalpasan ti pannakipangaldawmi iti pamilia, intuloymi ti nagbiahe nga agpa-Akureyri ta ti dua a dadakkel a pagikkat iti niebe nawaknitandan ti kalsada. Ti kinamanagpadagus ti mannalon ken ti baketna nangted kadakami iti gundaway a mangiranud kadakuada iti kinapudno a linaon ti Biblia.”

Panangasaba iti Pagkalap a Barko

Sumagmamano a tawenen ti napalabas, nakasabaan ni Kjell Geelnard ti maysa nga agtutubo a lalaki nga agnagan Fridrik. Isu ti inauna nga anak a lalaki, ken naespirituan ti panagpampanunotna ket maragsakan a makisarsarita maipapan iti Biblia. Adu ti saludsodna ket interesado a maaddaan iti pannakaammo iti Biblia. Nupay kasta, narigat a masarungkaran, ta maysa nga inheniero iti pagkalap a barko. Kaaduanna, adda iti baybay, ket sumagmamano laeng nga aldaw nga adda iti pagtaenganna iti nagbabaetan dagiti panagbiahena. Kaskasdi, babaen ti panangammona iti eskediul ti barko ken panangdamagna iti ina ni Fridrik no kaano a namnamaenna nga agawid, nasarungkaran ni Kjell, no dadduma iti sangladan ken no dadduma iti pagtaengan. Iti kasta, natulongan dagiti kakabsat a rumang-ay iti naespirituan.

Idi arinunos ti 1982, naawis ni Fridrik iti maysa nga asamblea idiay Reykjavík. Umun-uneg idin ti pammatina ken Jehova,  ket inkararagna a maaddaan koma iti gundaway a tumabuno. Naiparna nga adda miembro ti tripulantena a nangikeddeng a saan nga agbakasion. Isu a naaddaan ni Fridrik iti gundaway nga agbakasion ken tumabuno iti asamblea. Nagustuan unay ni Fridrik ti programa, isu a kayatnan ti agserbi ken Jehova.

Idi nakaawid ni Fridrik iti ilina, imbagana iti nobiana ti maipapan iti desisionna ken ti epekto dayta iti biagna. Imbagana a kayatna ti makikallaysa kenkuana ngem no dina kayat ti makiasawa iti maysa a Saksi ni Jehova, masapul a waswasenna ti tulaganda. Kabigatanna, adda nagtuktok iti ruangan ti pagtaengan dagiti misionero. Nakatader iti ruar da Fridrik ken ti nobiana. Ababa ngem nalawag ti imbaga ni Fridrik: “Kayat ni Helga ti agpayadal iti Biblia!” Isu nga inyurnos dagiti misionero nga iyadalanda ni Helga. Kamalmanna, maysa kadagiti ading a lalaki ni Fridrik ti nagkiddaw met a payadalan iti Biblia. Iti dayta met la a lawas, inkuyog ni Fridrik ti buridek nga adingna a babai a nakigimong ket kinunana: “Kayat ni Unnur ti makipagadal iti Biblia!”

Kayat idin ni Fridrik nga isimbolo ti dedikasionna ken Jehova babaen ti panagpabautisarna. Ngem, umuna pay a nasken a paaduenna ti pannakaammona sa repasuenna dagiti saludsod nga agpaay iti bautismo. Ti parikut, ad-adu ti tiempo nga adda ni Fridrik iti baybay. No di masarungkaran ni Kjell iti pagtaengan, mabalin nga iti pagtrabahuanna. Ania ti solusion? Ni Fridrik tinangdananna ni Kjell nga agtrabaho a kaduana iti kuarto nga ayan ti makina iti barko. Idi rugrugi ti 1983, limmugan ni Kjell iti barko a Svalbakur a tugotna ti Biblia ken ti publikasion nga adalenda.

“Nakallalagip a kapadasan ti panagtrabaho ken ti panagserbik a nakalugan iti Svalbakur,” kuna ni Kjell. “Irugik ti agtrabaho iti alas 6:30 ti bigat ken agpatingga iti alas 6:30 ti rabii. Iti agmatuon, mangaldawkami, ken aginanakami nga agkape  iti agsapa ken malem. Agadalkami ken Fridrik kalpasan ti trabaho, ken adu ti gundawayko a mangasaba iti dadduma pay a tripulante. Iti rabii, agadal ken pagtutungtonganmi dagiti naespirituan a topiko. No dadduma pasado alas dosen iti rabii no maturogkami. Bayat ti pangngaldaw, apagbiitkami laeng iti panganan tapno pagsasaritaanmi ti inaldaw a teksto iti kuarto ni Fridrik.”

Siempre, dimlaw dagiti lallaki nga adda iti barko ta kameng itan ti tripulante ti maysa a misionero. Iti umuna a sumagmamano  nga aldaw, agatap dagiti lallaki ken Kjell, ta dida ammo no ania ti mabalinna nga aramiden. Nupay kasta, dimngeg ti dadduma kadagiti tripulante ken Kjell. Interesado unay ti maysa kadakuada, ket idi nadamagna ti panagsasarita maipapan iti inaldaw a teksto bayat ti pangngaldaw, kayatna ti makipaset. Maysa nga aldaw idi napaut ti panagsasaritada iti panganan, di nakauray ket imbagana kada Kjell ken Fridrik iti imatangda amin: “Ditay kadin mapan iti kuarto nga agbasa iti inaldaw a teksto?”

Maysa a rabii, inawis da Kjell ken Fridrik dagiti tripulante iti kuarto ni Fridrik tapno usigenda ti artikulo iti magasin nga Agriingkayo! maipapan iti alkoholismo. Pito kadagiti tripulante ti immay iti daytoy a nakallalagip a taripnong, ket nadamag daytoy dagiti tripulante ti dadduma pay a pagkalap a barko.

“Kalpasan ti dandani dua a lawas a panangasaba ken panagtrabahok iti Svalbakur, simmangladkami manen,” kuna ni Kjell. “Narepasomi idin ken ni Fridrik dagiti saludsod para iti bautismo, malaksid pay iti panangusigmi iti dadduma pay a topiko ti Biblia, panangasaba iti dadduma a tripulante, ken panagipaima kadagiti magasin ken literatura kadakuada.” Nabautisaran ni Fridrik idi primavera ti 1983. Ti nobia ni Fridrik a ni Helga, ti nanangna, ken ti adingna a babbai inawatda met ti kinapudno.

Panangyadal Babaen iti Telepono

Kanayon a makakarit ti panangikasaba iti naimbag a damag kadagiti tattao nga agnanaed iti nasulinek a lugar iti daytoy a dakkel nga isla. Nagsayaat nga alikamen ti telepono tapno madanon ken kanayon a makasarita dagiti interesado a tattao.

Adu ti nagunggonaan iti kastoy a panangiranud iti naimbag a damag. Sumagmamano a tawenen ti napalabas,  sinarungkaran ti maysa a babai nga agnagan iti Oddný Helgadóttir ti anakna a lalaki ken manugangna, a makipagad-adal kadagiti Saksi ni Jehova. Idi inestoriada kenkuana dagiti maad-adalda, kayatna met ti agadal iti Biblia. Nupay kasta, agnanaed ni Oddný iti nasulinek a lugar iti makin-amianan a laud a kosta ti Iceland, a nasurok a 300 a kilometro manipud iti kaasitgan a kongregasion. Idi intukon ti maysa a kabsat a babai, a ni Gudrún Ólafsdóttir, ti makipagadal kenkuana babaen iti telepono, siraragsak nga inawatna. Kalpasan ti panglukat a kararag, sisasaganan a sumungbat ni Oddný kadagiti saludsod a nailanad iti libro. Iti naan-anay a panagsaganana para iti panagadal, insurat ni Oddný dagiti naisitar a teksto tapno mabasana dagitoy no madakamatda. Iti kasta, saanen a masapul a birokenna dagiti teksto bayat ti panagadal. Naminsan, nagadalda iti pagtaengan ni Gudrún idi bimmisita ni Oddný iti dayta a lugar. Gapu ta damoda ti agadal iti sangon-sango, agpadada nga alusiisen, isu nga inyangaw nga insingasing ni Gudrún a mapan ni Oddný iti bangir a kuarto ta adda sabali a telepono sadiay!

Idi nangrugin a naawatan ni Oddný ti kinapudno, rinugianna a kinasabaan ti lakayna a ni Jón. Idi naginteres, saan a sigurado ni Oddný no maitutop nga iyadalanna. Naammuanna a mabalinna nga iyadalan ngem maitutop nga agdalungdong no iyadalanna. Malaksid iti panangyadalna ken lakayna, kinasabaanna met dagiti kaarrubana. Simmaganad, inyebkasna ti tarigagayna nga agpabautisar. Inyurnos ni Gudrún ti panangirepaso kenkuana ti maysa a panglakayen kadagiti saludsod iti libro nga Organisado a Mangitungpal iti Ministeriotayo babaen iti telepono, tapno maammuan no isu ket kualipikado. Nabatad a kualipikado malaksid iti maysa a banag: Saan pay a pormal a nagikkat iti relihionna.

Agarup makalawas kalpasanna, immawag ni Oddný ken Gudrún tapno ibagana a nagikkaten iti relihionna. Kasta met  ti inaramid ni lakayna. Dakkel a desision daytoy para ken Jón, tangay isu ti tserman idi iti lokal a konsilio ti parokia. Idi agangay, nabautisaran ni Oddný iti asamblea sirkito. Makaparagsak a kapadasan ti asamblea para kenkuana ta bassit laeng a grupo dagiti Saksi ti naam-ammona sakbay dayta. Iti interbiu iti programa ti asamblea, napagsaludsodan no narigat ti maiputputong. Imbagana a dina pulos narikna nga agmaymaysa, tangay ammona nga adda met ni Jehova iti makin-amianan a laud a kosta ti Iceland. Kalpasanna, innayonna a maladingitan ta di nakatabuno ni lakayna iti asamblea ngem impasiguradona a tumabuno inton nakasaganan nga agpabautisar. Tinungpal ni lakayna ti karina! Di nagbayag immakardan iti aduan tao a lugar tapno regular a matabunuanda dagiti gimong.

 Pannakasapul Kadagiti Pagtaengan Dagiti Misionero ken Kingdom Hall

Idi bimmisita ni Nathan H. Knorr manipud iti sangalubongan a hedkuarter dagiti Saksi ni Jehova iti Iceland idi 1968, kayatna ti agsapul iti nasaysayaat a pasdek nga agpaay a sanga nga opisina ken pagtaengan dagiti misionero. Sakbay dayta, nadumaduma a pagtaengan ti naabangan. Rinugianen dagiti kakabsat ti agbirok iti lote a pangibangonanda iti pasdek nga addaan iti Kingdom Hall, pagtaengan dagiti misionero, ken sanga nga opisina. Kabayatanna, naabangan ti maitutop a balay iti Hrefnugata 5 idiay Reykjavík, ket immakar sadiay ti innem a misionero idi Oktubre 1, 1968. Daytoy a pasdek ti nagserbi a sentro ti trabaho idiay Iceland bayat ti simmaganad a lima a tawen. Kalpasanna, nakagatang dagiti kakabsat iti nagsayaat ti puestona a lote iti Sogavegur 71, Reykjavík. Idi primavera ti 1972, nangrugin ti pannakaibangon ti baro a sanga nga opisina. Dakkel a karit daytoy para iti sumagmamano a kakabsat sadiay, a bassit ti ammoda maipapan iti inhenieria ken panagibangon. Awan kadakuada ti kontratista wenno mason, isu a nasken a mangtangdanda kadagiti di Saksi a kontratista. Situtulok dagitoy a kontratista a makitinnulong ken impalubosda a makipagtrabaho dagiti kakabsat iti proyekto. Nangabang dagiti kakabsat iti daan a balay iti abay ti pagibangonan tapno paglinongan ken pangananda. Nagsisinnublat dagiti kakabsat a babbai a nagluto iti taraon iti pagtaenganda sada ibalon kadagiti trabahador iti pagibangbangonanda.

Ti panangibangon ket nagserbi a nasayaat a pammaneknek iti dayta a lugar. Adda nasayaat a gundaway dagiti kontratista ken dagiti autoridad iti siudad a mangam-ammo kadagiti Saksi ni Jehova. Dimmagas ti dadduma tapno kitaenda ti rinang-ayan ti konstruksion. Idi panawenen ti panagpalitada, immay timmulong ti maysa a nalaing a mason a kabsat a lalaki a taga Denmark. Adu met ti naaramidan dagiti kakabsat a  babbai. Idi bimmisita ti dadduma a superbisor iti siudad, nakitada nga agus-usar dagiti babbai iti mixer ti semento. Kinuna ti maysa a superbisor: “Panagkunak, dagiti babbai iti relihionmi makasursuroda iti daytoy. Sigurado a naim-imbag nga agibangonda kadagiti simbaan babaen iti panagtrabaho ngem ti agsursor a nakaawit iti kahon tapno agdawat iti kuarta.”  Naidedikar ti pasdek idi Mayo 1975, idi bimmisita ni Milton G. Henschel iti Iceland ket isu ti nagpalawag iti dedikasion. Ti pasdek ti nagserbi a kangrunaan a pagtaengan dagiti misionero iti pagilian iti adu a tawen ken kas Kingdom Hall para kadagiti kongregasion idiay Reykjavík. Ita, maus-usaren kas sanga nga opisina.

Idi 1987 naibangon ti maysa a baro a Kingdom Hall ken pagtaengan dagiti misionero iti ili ti Akureyri. Nakadkadlaw ti panagkaykaysa ken ti internasional a panagkakabsat iti ili ni Jehova idi nasurok nga 60 a kakabsat manipud Finland ken Sweden ti immay timmulong kadagiti kakabsat idiay Iceland iti dayta a panagibangon.

“Ti Kaimasan a Kayo”

Iti panaglabas dagiti tawen, adda dagiti pannakabagi ti Bagi a Manarawidwid dagiti Saksi ni Jehova a bimmisita iti Iceland, ket dagitoy nga ibibisita ti kanayon a makapabileg kadagiti kakabsat. Ti ibibisita ni Kabsat Knorr, a nadakamat itay, ti tampok idi 1968. Nangted iti makapikapik a palawag, nagisalaysay kadagiti kapadasan, ken insalaysayna ti rinang-ayan ti panangikasaba iti Pagarian iti Iceland.

Idi Mayo 1970 ti damo nga ibibisita ni Kabsat Henschel iti Iceland. Makatugtuglep ti dadduma a misionero a nangpasangbay kenkuana. Makatugtuglepda saan laeng a gapu ta nakasapsapa a dimteng ni Kabsat Henschel iti dayta a bigat no di ket nangrugi a bimtak ti Hekla, maysa a nalatak a bulkan, maysa nga aldaw sakbayna, ket nagpatpatnag a binuybuya dayta dagiti misionero!

Impaayan ni Kabsat Henschel iti naisangsangayan nga atension dagiti misionero ken special pioneer. Inawisna amin ida iti naisangsangayan a miting ket inranudna kadakuada dagiti mismo a kapadasanna idi nagpaypayunir bayat ti Great Depression, ti panawen a panagsuek ti ekonomia. Inestoriana  a dagiti payunir insukatda idi dagiti literatura iti manok, itlog, mantekilia, nateng, anteohos, ken uray pay ti uken! Iti kasta, nagtultuloy ti trabaho bayat dagidi a narigat a tiempo, ket saan a nagkurang dagiti payunir kadagiti masapsapulda iti biag.

Dagus a dumlaw dagiti bisita iti Iceland kadagiti saanda a nakairuaman a taraon. Karaman kadagiti naisangsangayan a putahe dagiti taga Iceland ket ti svid, nga ulo ti karnero a nagudua sa naanger. Agasem ta kitkitaem iti platom ti kagudua ti ulo ti karnero nga addaan kadagiti ngipen ken maysa a mata! Adu a ganggannaet ti maariek a mangkita “iti mata ti karnero iti platoda.” Siempre kanayon nga adda sadiwa nga ikan. Maysa a naisangsangayan a putahe ti Iceland ti hardfiskur: naiw-iwa nga ikan ken nabilag. Mapulagidan iti mantekilia sa makilaw. Kadawyan a natangken daytoy nga ikan isu a masapul a taltalen tapno lumukneng. Gapuna, pinadpadaanan dagiti misionero no ania ti aramiden ni Kabsat Henschel no maidasar kenkuana daytoy nga ikan. Idi naramananna, dinamag dagiti misionero no magustuanna met laeng. Nagpanunot ket kalpasanna simmungbat a sitataktika: “Panagkunak, daytoy pay laeng ti kaimasan a kayo a naramanak.”

Adu pay dagiti nakallalagip ken makaparegta nga ibibisita dagiti pannakabagi ti Bagi a Manarawidwid. Dagitoy nga ibibisita impasagepsepda kadagiti kakabsat a nupay manmano ken naiputputong ti lugarda, paset ida ti internasional a panagkakabsat, a pinagkaykaysa ti Nakristianuan nga ayat.

Pannakitinnulong Kadagiti Doktor ken iti Media

Idi 1992, nangrugi nga agserbi iti Iceland ti Hospital Liaison Committee (HLC) a buklen ti uppat a kakabsat a lallaki. Tapno masanayda, dua kadagiti kakabsat a lallaki ti nagseminar idiay England ken ti dua pay, idiay Denmark. Idi naorganisaren ti kabbaro a nabuangay nga HLC, naangay ti miting  kadagiti doktor iti ospital ti dakkel nga unibersidad. Adda 130 nga immay iti miting, a pakairamanan dagiti doktor, nars, abogado, ken administrador ti ospital. Tangay daytoy ti umuna a miting nga inangay ti HLC kadagiti doktor, medio maamak dagiti kakabsat. Nupay kasta, naballigi ti miting, ket kalpasanna, inyurnosda ti makipagkita iti sumagmamano a doktor ken dadduma pay a propesional iti nadumaduma nga ospital. Nakaipasdek met dagiti kakabsat iti nainggayyeman a relasion kadagiti mabigbigbig a siruhano ken anestesiologo. Dagitoy a pannakilangen ti nakatulong a manglapped ken mangrisut kadagiti parikut maipapan iti panangagas a di agusar iti dara.

Naipaulog idi 1997 ti baro a linteg maipapan kadagiti kalintegan ti pasiente. Impaulog ti linteg nga awan ti maaramid a panangagas a di anamongan ti pasiente ket no ammoda ti pagayatan ti awan puotna a pasiente, masapul a raemenda dayta. Sagudayen pay ti linteg a dagiti annak nga agtawen iti 12 ken natataengan pay ket masapul a kanayon a makonsulta maipapan iti pannakaagasda. Impadamag ni Gudmundur H. Gudmundsson, a tserman ti HLC: “Kaaduanna mannakitinnulong dagiti doktor, ket manmano dagiti parikut. Saanda nga agusar iti dara uray iti narikut nga operasion.”

Idi naipablaak ti Enero 8, 2000, nga Agriingkayo! maipapan iti panangagas ken panagopera a di mausar ti dara, pinaregta ti sanga nga opisina dagiti kakabsat nga ikagumaanda nga iwaras dayta a ruar ti magasin iti amin a mabalinda a warasan. Nangipaay ti sanga nga opisina kadagiti singasing no kasano nga itukon ti magasin ken no kasano a sungbatan dagiti saludsod maipapan iti dara. Idi damo agkedked ti dadduma a mangiparang iti magasin, ngem di nagbayag nakitada a kayat dagiti tattao a maammuan ti maipapan iti dara. Nasurok a 12,000 a kopia ti naiwaras kadagiti tattao. Agdagup dayta iti 1 a magasin iti kada 22 nga umili. Kinuna ti maysa a kabsat a  lalaki, “Parikutko no kasano a mawanasko ti teritoria ta adu dagiti mayat a makisarita.” Kinuna ti maysa a kabsat a babai, “Dua laeng a tao ti di nangala kadagiti magasin kaniak!”

Maysa a babai a mangimatmaton iti linawas a programa iti radio ti nakaawat iti magasin maipapan iti panangagas a di agusar iti dara. Iti programana, inestoriana no kasano a nagun-odanna ti magasin, sana rinepaso ti pakasaritaan ti panangyalison iti dara kas inlawlawag ti Agriingkayo! Inngudona ti salaysayna babaen ti panagkunana a siasinoman a mayat a maaddaan iti ad-adu pay nga impormasion maipapan iti panangagas a di agusar iti dara mabalinda ti agkiddaw iti publikasion maipapan iti dayta a tema kadagiti Saksi.

Ti naisangsangayan a kampania a panangiwaras iti daytoy a ruar ti Agriingkayo! tinulonganna ti adu a makabigbig a nainkalintegan ti takdertayo maipapan iti dara. Kasta met, naammuanda a di kayat dagiti Saksi ni Jehova ti matay no di ket tarigagayanda ti kasayaatan a panangagas. Nagbanaganna, madadaanen a dumngeg iti mensahe ti Pagarian ti dadduma a di umiso idi ti ammoda maipapan iti takdertayo.

Dua a Kingdom Hall iti Uppat nga Aldaw

Para kadagiti kakabsat idiay Iceland, maysa a naisangsangayan a pasamak idi 1995 a tawen serbisio ti pannakaibangon ti dua a Kingdom Hall iti bulan ti Hunio, maysa idiay Keflavík, ken ti maysa idiay Selfoss. Dagitoy dagiti immuna a Kingdom Hall iti Iceland a naibangon iti nadaras a pamay-an. Uppat laeng nga aldaw a naibangon dagita a dua. Nairingpas daytoy a panagibangon gapu iti naayat a tulong dagiti kakabsat idiay Norway. Impatulod ti sanga nga opisina ti Norway ti kaaduan a materiales a pagibangon, ket nasurok a 120 a kakabsat manipud Norway ti immay timmulong nga agibangon. “Nakaskasdaaw,” kasta ti gagangay a komento a mangngegan iti pagibangbangonanda. Nabasa ken nangngegen dagiti  kakabsat iti Iceland ti maipapan kadagiti Kingdom Hall a napartak ti pannakaibangonda, ngem ita makitkitadan a mismo. Siempre, nakaskasdaaw dayta ta iti sumagmamano laeng nga aldaw, nagbalin nga uppat ti dua laeng a Kingdom Hall iti Iceland!

Malaksid iti kaadda ti dua a baro a Kingdom Hall, naparegta dagiti kakabsat iti Iceland iti nagsayaat a pannakilangenda kadagiti kakabsat a naggapu iti Norway, a nagbakasion ken nangbusbos iti kuartada tapno agibangon kadagiti Kingdom Hall. Anian a pammaneknek ti internasional a panagkakabsattayo! Timmulong met dagiti kakabsat iti Iceland kadagitoy a panagibangon. Nasurok a 150 a lokal nga agibumbunannag ti nakiraman iti panagibangon, agarup kagudua ti bilang dagiti agibumbunannag iti intero a pagilian.

Dagitoy a Kingdom Hall ket nagsayaat met a pammaneknek iti publiko. Dua nga estasion ti telebision iti intero a nasion ti nangipadamag iti pannakaibangon dagita a Kingdom Hall ken impakitada pay ti ladawan dagitoy. Impadamag met dayta ti sumagmamano nga estasion ti radio ken periodiko. Saan a kayat ti maysa a ministro ti lokal a relihion ti publisidad a maipapaay kadagiti Saksi. Iti lokal a periodiko, nangipablaak iti artikulo a mangpakpakdaar maibusor iti pagarupenna a napeggad nga ulbod a pannursuro dagiti Saksi ni Jehova. Dinakamatna a rumbeng nga agannad a nangnangruna dagiti nakapuy ken nalaka a mamatpati. Iti interbiu iti radio, inulitna ti isu met laeng a pakdaar. Nupay kasta, saan a kas iti ninamnamana ti epekto dagiti sasaona. Imbes ketdi, nasdaaw ti kaaduan a tattao iti pannakaibangon dagiti Kingdom Hall, ket adu kadagiti nakasabaan dagiti kakabsat ti nasdaaw iti reaksion ti ministro.

Agarup makalawas kalpasan a naipablaak ti pakdaar ti ministro, nangyimprenta ti periodiko iti karikatura. Iti sango ti karikatura, makitam ti simbaan, ket iti likudan, ti Kingdom  Hall. Adda karayan iti nagbaetan ti dua a pasdek, ket dadduma a nakaisem ken nagsayaat ti panagkawkawesda a kakabsat a nakaiggem iti bag ti naggapu iti Kingdom Hall ken lumaslasat iti rangtay ket agturongda iti simbaan. Iti ruar ti simbaan, limmagto ti agam-amangaw a babai manipud iti wheelchair-na. Maysa a lalaki a nasemento ti sakana ken ti sabali pay a lalaki, a nabatad a bulsek, ti agtartaray nga agpukpukkaw: “Pumanawkayo, pumanawkayo, umayen dagiti Saksi!” Iti agdan ti simbaan nakatakder a masmasdaaw ti ministro. Adu ti naragsakan iti daytoy a karikatura. Daytoy ti pinili dagiti kameng ti editorial a kasayaatan a karikatura iti tawen. Impadakkelda dayta, ket imbaskagda iti diding ti opisinada a nagtalinaedanna iti adu a tawen.

Nagsayaat a Pammaneknek ti Eksibit

Bayat ti 2001 a tawen serbisio, adda naiparang nga eksibit a nangipamaysa iti neutral a takder dagiti Saksi ni Jehova nga  indadanes dagiti Nazi sakbay ken bayat ti Gubat Sangalubongan II. Naipabuya daytoy iti tallo a lugar, ket agdagup iti 3,896 ti nagbuya. Iti maudi a lawas, nasurok a 700 dagiti sangaili a napan nagbuya iti eksibit idiay Reykjavík. Naipabuya ti video a Jehovah’s Witnesses Stand Firm Against Nazi Assault iti lenguahe nga Islandiko iti tallo a lugar. Adu a bisita ti nagtugaw ken nangbuya iti intero a video.

Dagiti bisita a di makaammo iti daytoy a paset ti pakasaritaantayo naallukoyda iti natibker a takder dagiti Saksi a naipupok kadagiti kampo konsentrasion. Maysa a propesora a nakabuya iti eksibit iti namin-adu a daras ti nangibaga a nagustuanna unay ti nabuyana ket binalbaliwannan ti panangmatmatna kadagiti Saksi ni Jehova. Naallukoy a nangnangruna iti natibker a pammati dagiti Saksi kadagiti kampo konsentrasion. Saan a kas iti dadduma a balud, nawayawayaanda koma no pinagtallikudanda ti pammatida.

Nagsayaat met ti pannakaipadamag ti eksibit kadagiti nasional ken lokal nga estasion ti telebision ken radio. Idi nanglukat ti eksibit, immay ti maysa a ministro a Luterano a kaduana ni baketna ken ti balasangda. Di nagbayag, inawis ti maysa a kabsat ti ministro a bumisita iti Bethel, ket immanamong. Sumagmamano nga aldaw kalpasan ti ibibisita, maysa a babai ti nagsaludsod maipapan iti maysa a teksto ti Biblia iti ministro. Pinaregta ti ministro a makiuman iti sanga nga opisina dagiti Saksi ni Jehova, ta sigurado a masungbatanda. Idi agangay, maysa a kabsat a lalaki ti nangyadal iti Biblia iti dayta a ministro.

Panagipatarus iti Panaglabas Dagiti Tawen

Masansan a maysa a karit iti sumagmamano nga agibumbunannag iti Iceland ti panangipatarus iti amin a naespirituan a taraon nga aggapu iti “matalek ken masirib nga adipen” iti lenguahe nga Islandiko. (Mat. 24:45) Kadagiti immuna a tawen, dagiti taga Iceland a Saksi nga agnanaed iti Canada ti  kaaduan a nagipatarus. Idi agangay, maar-aramiden daytoy a trabaho idiay Iceland. Idi simmangpet dagiti immuna a misionero idi 1947, naam-ammoda ti lakayen a dumadaniw nga agnanaed iti balay a pagnanaedanda. Ammona ti Ingles ket tinulonganna dagiti misionero nga agsursuro iti Islandiko. Intukonna pay a tulonganna ida nga agipatarus, isu a tinangdanan dagiti kakabsat a mangipatarus iti libro a “Mapapati Coma ti Dios” ken ti bokleta a The Joy of All the People. Ngem nakalkaldaang ta inusarna ti daan a naindaniwan nga estilo ken nagaramat iti adu a kadaanan a sasao ken ebkas, ket uray no ti patarus ket kinorehir ken immakinilia manen da Kabsat Lindal ken dagiti kabbaro a misionero, ti libro saan a pulos a nagbalin a nasayaat a katulongan iti panagadal. Nupay kasta, adu ti naiwaras a libro sipud idi damo a pannakayimprentana, ket agdagup iti 14,568 dagiti kopia a nayimprenta. Nasurok a 20,000 a kopia ti bokleta ti nayimprenta idi 1949. Kalpasanna nangtangdan dagiti kakabsat iti sabali a managipatarus a mangipatarus iti libro a What Has Religion Done for Mankind?

Bayat dagita a tawen, maysa a bassit a grupo dagiti kakabsat ti nagipatarus iti sumagmamano a bokleta. Maysa ti “Daytoy Naimbag a Damag ti Pagarian,” a nairuar idi 1959. Daytoy a bokleta ket nakatulong kadagiti kakabsat a mangirugi iti adu a panangyadal iti Biblia. Kalpasan a naipablaak daytoy a bokleta, naanamongan ti pannakaipablaak Ti Pagwanawanan iti Islandiko.

Adu a nagsasayaat a libro ti naipatarus ken nairuar kadagiti simmaganad a tawen: Ti “Daytoy Kaipapananna ti Biag nga Agnanayon” ket nairuar idi 1962; ti Manipud Paraiso a Napukaw Agingga iti Paraiso a Naisubli, idi 1966; ti Ti Kinapudno a Mangiturong iti Biag nga Awan Inggana, idi 1970; ti Mabalinyo ti Agbiag nga Agnanayon iti Paraiso a Daga, idi 1984; ken ti Pannakaammo a Mangiturong iti Biag  nga Agnanayon, idi 1996. Idi 1982, nainayon iti listaan dagiti publikasion nga Islandiko ti maminsan iti kada tallo a bulan nga edision ti Agriingkayo!

Iti adu a tawen awan ti pagkantaan dagiti kakabsat a naipablaak iti Islandiko. Idi 1960, uppat a kanta ti naipatarus ken nai-mimeograph para iti asamblea. Kalpasanna, iti kombension distrito idi Nobiembre 1963, adda nairuar a bassit a pagkantaan a naglaon iti 30 a napili a kanta a nairuar iti lenguahe nga Islandiko, ket naragsakan dagiti kakabsat.

Agingga idi, aglalaok a lenguahe ti maus-usar iti panagkanta iti kongregasion. Simmangpet da Günther ken Rut Haubitz iti Iceland manipud iti Alemania idi 1958 kas special pioneer. Malaglagip pay laeng ni Rut ti panangusar dagiti ganggannaet a kakabsat kadagiti pagkantaanda iti bukodda a lenguahe. Agkantada iti Aleman, Danes, Fijiano, Ingles, Norwego, wenno Sueko. Agkanta met dagiti taga Iceland iti lenguahe a kabesadoda. Kinunana, “Aglalaok a koro ti pinamay-anmi!” Iti adu a tawen, in-inut nga ad-adu a kanta ti Pagarian ti naipatarus, ngem idi laeng 1999 a nakompleto ti pagkantaan nga addaan iti 225 a kanta a magun-odan iti lenguahe nga Islandiko. Anian a panagyaman dagiti kakabsat iti daytoy a sagut a pangidayaw ken Jehova!

Adda baro a paset ti kombension distrito a naangay idi Agosto 1999 para iti Iceland. Kagiddan ti Ingles a nairuar ti libro nga Ipangagyo ti Padto ni Daniel! iti Islandiko. Iti kombension, idi inyanunsio ti nagpalawag ti pannakairuar ti libro iti Ingles, nagpalakpak ti amin nga adda iti tallaong. Ngem imbes nga ibagana a mairuarto met daytoy a libro iti Islandiko, impakitana ti Islandiko a kopia ti libro, sana imbaga a naipatarusen ti libro iti Islandiko, ket naragsakan ti amin! Sipud idin, nairuar met a naigiddan iti edision nga Ingles ti Ti Padto ni Isaias​—Lawag nga Agpaay iti Sangatauan I ken II.

 Panangpalawa iti Bethel ken Ad-adu Pay nga Irarang-ay

Napabaro dagiti pasilidad ti sanga nga opisina idi 1998. Dua nga apartment ti nagatang iti ballasiw ti kalsada tapno adda pagnaedan dagiti agtartrabaho iti Bethel ken adda nalawlawa a lugar para iti Departamento ti Panagipatarus. Kadagiti kallabes a tawen, nagunggonaan met dagiti agipatpatarus iti ibibisita dagiti kakabsat manipud iti sangalubongan a hedkuarter idiay New York. Insuro ida dagitoy a kakabsat no kasano nga usaren dagiti programa ti computer a nadisenio para iti panagipatarus, nga inaramid a mismo dagiti Saksi ni Jehova.

Iti di pay nabayag, inangay dagiti pannakabagi ti hedkuarter ti Course in Improved English Comprehension iti sanga nga opisina. Nakatulong ti kurso kadagiti agipatpatarus tapno  nasaysayaat ti pannakaawatda kadagiti artikulo nga Ingles sakbay a rugianda nga ipatarus.

Insurat ti sanga nga opisina: “Iti panaglabas dagiti tawen, maragsakankami ta determinado ti dadduma a nangirugi nga agipatarus iti Islandiko, uray awan idi dagiti umno a kasapulanda ken limitado ti pannakaammoda iti lenguahe. Nupay saan a kas iti kalidadna itatta ti kalidad dagiti naipatarus a pagbasaan idi un-unana, ditay ‘umsien ti aldaw dagiti babassit a banag.’ (Zac. 4:10) Maragsakantayo a makakita a naiwaragawag metten ti nagan ken Pagarian ni Jehova iti Iceland ket adu a tattao ti nakaammo iti kinapudno.”

Iti agdama, adda walo nga amin-tiempo nga agtartrabaho iti sanga nga opisina. Dadduma ti agbiahe a mapan idiay Bethel  ket tumulongda iti paset-tiempo. Tapno masukatan ti Kingdom Hall iti sanga nga opisina, naibangon ti maysa a baro a Kingdom Hall para kadagiti kongregasion iti Reykjavík. Nagbanaganna, maipalplanon ti pannakapabaro ti pasdek ti sanga nga opisina, tapno pagtaengan ti ad-adu pay a trabahador iti Bethel.

Masapul ti anus, panagsakripisio, ken ayat tapno maikasaba ti naimbag a damag idiay Iceland. Agpayso a maikuna a saan nga ubbaw ti panagbannog dagiti naregta a manangiwaragawag iti Pagarian idiay Iceland iti napalabas a 76 a tawen. Adu a matalek a kakabsat ti nakiraman iti trabaho a panagani. Adu ti immakar a naggapu iti sabali a pagilian tapno agserbi iti sumagmamano a tawen, ket malaglagipto latta ti naaramidanda. Nagtalinaed dagiti dadduma ket imbilangda a permanente a pagtaenganda ti Iceland. Makomendaran met ti anus ti adu a naregta a katutubo nga agibumbunannag iti Iceland.

Bassit ti promedio a bilang dagiti agibumbunannag, ngem agdindinamag dagiti Saksi ni Jehova iti pagilian. Ita, pito a misionero ti agserserbi kadagiti away ken babassit a kongregasion iti isla. Iti daytoy napalabas a tawen serbisio, 543 a tattao ti timmabuno iti Pananglaglagip iti ipapatay ni Kristo, ken agarup 180 a panagadal iti Biblia ti maikonkondukta.

Nalabit a mapasaranto dagiti kakabsat idiay Iceland ti irarang-ay a nadeskribir iti Isaias 60:22: “Daydiay met laeng bassit agbalinto a sangaribu, ket daydiay nagbassitan maysa a mannakabalin a nasion. Siak, ni Jehova, papardasekto dayta iti bukodna a tiempo.” Kabayatanna, determinado dagiti Saksi ni Jehova iti Iceland a mangturpos iti trabaho nga intalek kadakuada ti Ari a ni Jesu-Kristo​—ti panangikasaba iti naimbag a damag ti Pagarian. Agtalekda a pagtubuen ti Dios dagiti bukel ti kinapudno a naimula kadagiti mangipangag ken managyaman a puso!​—Mat. 24:14; 1 Cor. 3:6, 7; 2 Tim. 4:5.

[Kahon iti panid 205]

Lugar a Sadiay Agbalin nga Apelyedo ti Nagan

Maitunos iti kaugalian, awan ti apelyedo dagiti taga Iceland: Agiinnawag dagiti tattao babaen ti naganda. Maikeddeng ti apelyedo ti maysa nga ubing babaen ti panangisilpo iti sao a -son no lalaki wenno -dóttir no babai iti nagan ti ama. Kas pagarigan, ti anak a lalaki ken babai ti maysa nga ama nga agnagan iti Haraldur ket maikkan iti apelyedo a Haraldsson ken Haraldsdóttir. Saan a mabaliwan ti nagan ti babai no makiasawa. Gapu ta nagadu ti agkakanagan, saan laeng a ti nagan, adres, ken numero ti telepono ti naikabil iti listaan ti telepono no di ket ti pay panggedanda. Babaen kadagiti rekord ti kapuonan, matunton dagiti taga Iceland no siasino dagiti kapuonanda uray pay nasurok a sangaribu a tawenen ti napalabas.

 [Kahon iti panid 208]

Maipapan iti Iceland

Pagilian: Naisaad daytoy a pagilian iti baba ti Arctic Circle ken adda iti tengnga ti North Atlantic Ocean, Baybay ti Greenland, ken Baybay ti Norway. Adu dagiti bulkan, napudot nga ubbog, ken naangep a burayok. Kakasangapulo a paset ti pagilian ti nasaknapan kadagiti dadakkel a yelo.

Umili: Dagiti taga Iceland ket kaputotan dagiti Viking a kaaduanna ti naggapu iti Norway. Kadawyan a nagaget, managpartuat, ken mannakaawatda. Agnanaed ti kaaduan a tattao iti igid ti baybay.

Lenguahe: Nupay Islandiko ti opisial a lenguahe, dua wenno ad-adu pay a ganggannaet a lenguahe ti us-usaren ti kaaduan. Kadawyan a maus-usar ti Ingles, Aleman, wenno ti lenguahe ti Scandinavia.

Pagbiagan: Dakkel ti paset ti industria a panagkalap iti ekonomia ti Iceland. Dagiti bilog nga addaan iti kitang ti mausar a pagkalap kadagiti capelin, bakalaw, haddock, ken tamban, a kaaduanna ti maproseso ken mailako iti sabali a pagilian.

Taraon: Gagangay ti ikan ken karnero. Ti naisangsangayan a putahe dagiti taga Iceland ket lauya nga ulo ti karnero.

Klima: Kalkalainganna ti klima gapu iti nabara nga agus iti Atlantico. Kalkalainganna dagiti tiempo ti lam-ek ngem naangin. Nalamiis ti kalgaw.

[Kahon/Ladawan iti panid 210]

Setiembre 6, 1942: “Maymaysa pay laeng ti payunir a mangaskasaba iti daytoy a pagilian, isu nga awan ti adu a maipadamag. Ti populasion ti Iceland ket agarup 120,000, ken adda agarup 6,000 a pagtalonan. Ti kakaisuna a pamay-an tapno madanon dagitoy a talon ket babaen iti panagkabalio. Tapno masarungkaran ti amin a pagtaengan, nasken nga agdaliasat iti agarup 16,000 a kilometro, ket adu a bambantay ken naapres a karayan ti ballasiwen. Manmano dagiti interesado iti mensahe.”

Naisurat dagitoy a sasao ni Georg F. Lindal kalpasan ti panagpayunirna idiay Iceland iti 13 a tawen. Isu ti nabati a kakaisuna nga agibumbunannag idiay Iceland iti lima pay a tawen.

 [Kahon/Ladawan iti panid 213, 214]

Pakakitaan ti Matalek a Panagserbi

Karaman ni Oliver Macdonald, a nagraduar iti maika-11 a klase ti Gilead, kadagiti immuna a misionero a naidestino idiay Iceland. Nagbarkoda ken Ingvard Jensen manipud iti New York ket simmangpetda idi Disiembre 1948. Nadawel ti Taaw Atlantico ket 14 nga aldawda a nagbiahe. Naulawda a dua iti panagbiaheda.

Idi Marso 1950, inkallaysa ni Kabsat Macdonald ni Sally Wild a taga England, a nagtrabaho idi iti Bethel iti Britania. Naregta kadagidi a panawen da Sally ken Mac, kas nadungngo nga awag kenkuana, ket matalek pay laeng nga agserserbi ken Jehova dagiti tattao nga inyadalanda iti Biblia.

Idi 1957, nagsubli da Mac ken Sally idiay England, ket sadiay a natay ni Sally gapu iti kanser a natakuatan kenkuana idi addada idiay Iceland. Kalpasan ti ipapatay ni Sally, nagserbi manen ni Mac iti amin tiempo. Nag-regular pioneer sa nagserbi kas agdaldaliasat a manangaywan iti 13 a tawen. Idi 1960, inkallaysana ni Valerie Hargreaves, a maysa nga special pioneer. Nagkaduada a nagserbi iti nadumaduma a sirkito iti Britania, manipud iti makin-amianan nga Scotland agingga iti Channel Islands, iti taaw ti makin-abagatan a kosta ti England. Iti panagdaliasatda iti sirkitoda nga agpaamianan agingga iti Shetlands iti taaw ti makin-amianan a kosta ti Scotland, kinuna ni Mac, “Iceland ti sumaruno a pagsardengan!” a pulos a dina pinampanunot a mapandanto sadiay.

Nupay kasta, idi 1972, nadutokan kas misionero da Mac ken Valerie ket naidestinoda manen iti Iceland. Nagserbi ni Mac kas adipen ti sanga sa coordinator ti Branch Committee kalpasanna. Pito a tawen a nagnaedda ken Valerie iti Iceland sa naidestinoda kas misionero idiay Ireland, immuna idiay Dublin sa iti Amianan nga Ireland. Kalpasan ti 20 a tawen a panagserbida idiay Ireland, natay ni Mac idi Disiembre 1999 gapu iti kanser, kalpasan ti 60 a tawen a panagserbina iti amin a tiempo. Agserserbi pay laeng ni Valerie kas regular pioneer idiay Belfast, Amianan nga Ireland.

[Ladawan]

Da Valerie ken Oliver Macdonald idiay Reykjavík, dekada 1970

[Kahon/Ladawan iti panid 218]

Reykjavík

Ti Reykjavík, a ti kaipapananna ket “Naangep a Baybay,” ti kabesera ti Iceland. Pinanaganan dayta ti immuna a permanente a nagindeg a ni Ingólfur Arnarson, gapu ta kanayon a tumayok ti angep manipud kadagiti nabara nga ubbogna. Ita ti Reykjavík ket maysan a narang-ay a siudad nga agdagup iti agarup 180,000 ti populasionna.

 [Kahon/Ladawan iti panid 223, 224]

Nagindegda Iti Iceland

Taga Denmark ni Páll Heine Pedersen. Naidestino iti Iceland kas special pioneer idi 1959. Idi 1961 tinabunuanna ti dua kadagiti “Nagkaykaysa a Managdaydayaw” nga Internasional a Kombension iti Europa, a sadiay a naam-ammona ni Violet. Naggapu ni Violet idiay California, E.U.A. ket immay iti Europa tapno tabunuanna ti sumagmamano kadagitoy a kombension.

Kalpasan dagiti kombension, nagsubli ni Páll iti Iceland, sa nagawid met ni Violet idiay California. Nagsinnuratda iti lima a bulan, ket idi Enero 1962, immay ni Violet iti Iceland tapno makikallaysa ken ni Páll. Agpaypayunir pay laeng idi ni Páll, ta maymaysana a Saksi iti awan unay ti matataona a paset ti makin-amianan a laud nga Iceland. Nagnaedda iti bassit nga ili a sadiay saan a makita ti init iti unos ti dua a bulan. Tapno madanon dagiti tattao iti teritoria, masapul nga agdaliasatda kadagiti naparsed ken masansan a naabbungotan iti yelo a kalsada iti bantay. Ti kakaisuna a luganda ket ti motorsiklo nga intugot ni Páll manipud Denmark. Tangay nayanak ken dimmakkel iti nainar a California, adu kadagiti kakabsat ti nangipagarup a saan a makapagbayag ni Violet iti Iceland. Ngem nakapagbayag, ket nagustuanna ti pagilian ken dagiti tattao.

Nagpayunir da Páll ken Violet agingga iti pannakaipasngay ti anakda a ni Elísabet, idi 1965. Intultuloy ni Páll ti nagpayunir agingga idi 1975, ket sagpaminsan a nagpayunir met ni Violet bayat dagidiay a tawen. Idi 1977, inkeddengda ti agawid idiay California gapu iti salun-at ni Páll. Idi agangay, kasta unay ti tarigagayda nga agserbi iti lugar nga addaan iti dakdakkel a panagkasapulan kadagiti agibumbunannag iti Pagarian. Nagpayunirda manen, ket idi nakaturpos a nageskuela ken balasangen ti anakda, naidestinoda manen iti Iceland kas misionero. Sumagmamano a tawen a nagserbida kas misionero ken kas agdaldaliasat a manangaywan. Idi 1989, nakiddaw nga agserbi ni Páll kas miembro ti Branch Committee. Kalpasanna, idi 1991, opisial a naluktan ti Pagtaengan a Bethel iti Iceland, ket da Páll ken Violet ti immuna a kameng ti pamilia a Bethel. Agserserbida pay laeng sadiay agingga ita.

 [Kahon/Ladawan iti panid 228, 229]

Nalatakda Gapu iti Kinamanagpadagusda

Karaman da Fridrik Gíslason ken ni baketna nga Ada kadagiti pito a nabautisaran idi 1956. Naammuan da Fridrik ken Ada ti kinapudno manipud kada Oliver ken Sally Macdonald. Idi damo, ni laeng Fridrik ti nayadalan, bayat a ni Ada ket okupado iti intero a panawen ti lam-ek gapu kadagiti aktibidad ti gunglo dagiti mannait a nakaikamenganna. No malpasen dagiti aktibidad ti gunglo dagiti mannait iti panawen ti primavera, agtugaw ni Ada iti kosina bayat ti panagadal. Idi agangay, gapu ta naginteres iti panagadal iti Biblia, kiniddawna no mabalin a makikatugaw bayat ti panagadal ngem saan a makipaset. Ngem di nagbayag, nakipaset met laeng.

Kalpasanna, maang-angayen iti balayda ti regular a Panagadal iti Pagwanawanan iti Ingles. Rinugianda ti nakigimong iti pagtaengan dagiti misionero. “Malagipko nga aggigimongkami idi iti bassit a kuarto iti attic a pagnanaedan dagiti misionero,” kuna ni Fridrik. “Umdas a pangikabilan iti 12 a tugaw, ngem no dadduma, no ad-adu ti makigimong, lukatanmi ti ridaw a mapan iti bangir a bassit a kuarto. Anian a nagpaiduma ita ta addan tallo a kongregasion nga aggigimong iti Kingdom Hall iti Reykjavík!”

Limmatak da Fridrik ken Ada gapu iti kinamanagpadagusda. Nupay addaanda iti innem nga annak, kanayon a silulukat ti pagtaenganda kadagiti kakabsat. Kadagiti immuna a tawen ti kongregasion, adu nga immay iti Iceland a naggapu iti dadduma a pagilian ti naragsakan a nakipagnaed kada Fridrik ken Ada, a nangpadagus kadakuada agingga a nakabirokda iti bukodda a pagtaengan.

 [Kahon/Ladawan iti panid 232]

Ti Biblia iti Pagsasao nga Islandiko

Ti kaunaan a patarus ti Biblia iti Islandiko ket masarakan iti maika-14 a siglo a maawagan iti Stjórn, nga addaan kadagiti patarus ken nagupgop a paspaset ti Hebreo a Kasuratan. Idi 1540, nayimprenta ti umuna a kompleto a “Baro a Tulag” iti Islandiko. Ni Oddur Gottskálksson nga anak ti obispo a ni Hólar ti nagipatarus. Isu ket miembro ti Iglesia a Luterano iti Norway ken nakilanglangen ken ni Martin Luther idiay Alemania. Sigun iti historia, kalpasan ti panagawid ni Oddur iti Iceland, inkarigatanna ti nagipatarus iti uneg ti maysa a kamarin, gapu ta dina kayat a masaktan ti nakem ti amona a Katoliko, ti obispo iti Skálholt. Impatarus ni Oddur ti Latin Vulgate, ket isu a mismo ti nangipan iti manuskrito idiay Denmark tapno mayimprenta. Idi 1584, imbilin ni Obispo Gudbrandur Thorláksson ti pannakayimprenta ti umuna a kompleto a Biblia iti Islandiko. Nayimprenta idi 1908 ti umuna a kompleto a patarus ti Biblia manipud iti orihinal a Hebreo ken Griego, ken nayimprenta idi 1912 ti rebisado a bersion.

[Ladawan]

“Gudbrandsbiblía,” ti umuna a kompleto a Biblia iti Islandiko

 [Tsart/Graph iti panid 216, 217]

ICELAND—DAGITI AGSASARUNO A NAPATEG A PASAMAK

1929: Simmangpet ni Georg F. Lindal, ti immuna nga agibumbunannag iti pagilian.

1940

1947: Simmangpet dagiti immuna a misionero.

1950: Nabuangay ti bassit a kongregasion.

1960

1960: Naipablaak Ti Pagwanawanan iti Islandiko.

1962: Naipasdek ti sanga nga opisina iti Reykjavík.

1975: Nairingpas ken naidedikar ti baro ken napalawa a sanga nga opisina.

1980

1992: Nabuangay ti Hospital Liaison Committee.

1995: Uppat nga aldaw a naibangon ti dua a Kingdom Hall idi Hunio.

2000

2004: 284 nga agibumbunannag ti aktibo idiay Iceland.

[Graph]

(Kitaem ti publikasion)

Dagup Dagiti Agibumbunannag

Dagup Dagiti Payunir

 300

200

100

1940 1960 1980 2000

 [Dagiti Mapa iti panid 209]

(Para iti aktual a pannakaurnosna, kitaem ti publikasion)

ICELAND

Húsavik

Hólar

Akureyri

Seydhisfjördhur

Neskaupstadhur

Eskifjördhur

Stykkishólmur

Borgarnes

Höfn

REYKJAVÍK

Skálholt

Keflavík

Selfoss

 [Ladawan iti panid 202]

[Ladawan iti panid 207]

Kannawan: Ni Georg F. Lindal, 1947

[Ladawan iti panid 207]

Baba: Ni Kabsat Lindal nga addaan iti kabalio iti Iceland, rugrugi ti dekada 1930

[Ladawan iti panid 212]

Dadduma kadagiti immuna a misionero idiay Iceland, manipud kannigid nga agpakannawan: Ingvard Jensen, Oliver Macdonald, ken Leo Larsen

[Ladawan iti panid 220]

Daytoy a pasdek ti nausar a sanga nga opisina manipud idi 1962 agingga iti 1968

[Ladawan iti panid 227]

Nasurok a sangagasut nga agibumbunannag manipud Iceland ti timmabuno iti “Talna Ditoy Daga” nga Internasional nga Asamblea idiay Copenhagen, Denmark, 1969

[Ladawan iti panid 235]

Da Iiris ken Kjell Geelnard idiay Akureyri, Enero 1993

[Ladawan iti panid 238]

Kannawan: Ti pagkalap a barko a “Svalbakur”

[Ladawan iti panid 238]

Baba: Da Fridrik ken Kjell

[Ladawan iti panid 241]

Kannawan: Ni Oddný Helgadóttir

[Ladawan iti panid 241]

Baba: Ni Gudrún Ólafsdóttir

[Ladawan iti panid 243]

Kannawan: Kingdom Hall ken pagtaengan dagiti misionero idiay Akureyri

[Ladawan iti panid 243]

Baba: Ni Bjarni Jónsson iti sango ti sanga nga opisina

[Ladawan iti panid 249]

Ngato: Pannakaibangon ti Kingdom Hall idiay Selfoss, 1995

[Ladawan iti panid 249]

Kannawan: Ti nairingpas a pasdek

[Ladawan iti panid 253]

Ti pamilia ti Bethel iti Iceland

[Ladawan iti panid 254]

Branch Committee, manipud kannigid nga agpakannawan: Bjarni Jónsson, Gudmundur H. Gudmundsson, Páll H. Pedersen, ken Bergthór N. Bergthórsson