Report iti Intero a Lubong

◼ AFRICA

Bilang dagiti pagilian: 56

Populasion: 770,301,093

Bilang dagiti agibumbunannag: 983,057

Bilang dagiti panangyadal iti Biblia: 1,769,182

Ammoyo kadi a maikaskasaban ti naimbag a damag iti Sahara? Agnanaed ti agtawen iti 17 a ni Nafissatou iti pagminasan nga ili iti amianan a Niger. Idi nagbalin a pornograpia ti pagsasaritaan ti ummong dagiti kaeskuelaanna, pimmanaw ni Nafissatou. Simmurot kenkuana ti maysa nga estudiante ket dinamagna no ania ti dakes a napasamak. Kuna ni Nafissatou a dina kayat ti kasta a pagsasaritaanda. Idi damo, pinagang-angawan ti babai, a kunkunana a saan a dakes ti panangkita laeng iti pornograpia. Kuna ni Nafissatou a serioso a banag dayta ta ti Namarsua dina anamongan dagita a bambanag. Kalpasanna  inruarna iti bagna ti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo ket impakitana iti babai ti paset a mangisalaysay kadagiti peggad ti pornograpia. Sa inruarna ti Biblia ket imbasana ti 2 Corinto 7:1. Inamin ti babai a no agbuya kadagiti imoral a video, rumasok ti riknana ket dina mailawlawag dayta. Nagkiddaw ti babai iti kopia ti libro a Dagiti Saludsod nga Iyimtuod ti Agtutubo. Inikkan ni Nafissatou ket idi agangay, kinunana: “Iti sumaganad a pannakakitak kenkuana, agmaymaysa isu a dinamagko no ayan dagiti gagayyemna. Kinunana, ‘Daytoy a libro ti gayyemko.’ Rinugiak nga inyadalan, ket timmabuno iti Memorial.”

Nasurok a 15 a tawen ti napalabasen, adda babai a nakipagadal iti Biblia iti maysa a misionera idiay Tanzania. Sumagmamano a tawen a nayadalan. Gapu iti panangbusor ti pamiliana, saanna a sinalimetmetan ti kinapudno ket idi agangay naisardeng ti panagadalna. Nupay kasta, siuulimek idi a nagim-imdeng ti dua a balasitangna bayat ti panagadalna. Idi agtawenen iti 18 ti inauna nga anakna, immakar iti pagtaengan ket dagus a napan idiay Kingdom Hall sa kiniddawna a mayadalan. Napartak ti irarang-ayna ket nabautisaran. Kiniddaw ti adingna nga agadal met iti Biblia, sa nabautisaran met. Gapu ta naparegta ti ina iti natibker a takder dagiti babbalasangna, inkeddengna nga ituloy ti panagadalna iti Biblia. Iti daytoy a gundaway, naparmekna ti panagbutengna iti tao a nanglapped idi kenkuana, ket nabautisaran iti asamblea sirkito idi Mayo 2004.

No tungpalen ti kongregasion ti bilin a “panangtaripato kadagiti ulila ken balo a babbai kadagiti rigatda,” sigurado a dumteng ti pamendision ni Jehova. (Sant. 1:27) Napaneknekan a pudno daytoy iti maysa a kongregasion idiay Lesotho. Ni Mapolo nga agsolsolo a nagannak nga addaan iti uppat a babbarito ket maysa kadagiti bautisado a kameng ti kongregasion. Ammo ni Mapolo a makapapatay ti sakitna isu nga insaganana dagiti annakna tapno maaywananda ti bagbagida. Inyadalanna ida iti Biblia, inkuyogna ida kadagiti gimong, ken insurona ida nga  agaramid iti kaykay, nga ilakoda iti igid ti kalsada. Idi natay ni Mapolo idi 1998, dagiti naulila nga annakna ket inaywanan ti apongda a baket. Ti misionera a timmulong ken Mapolo nga agbalin a bautisado a Saksi, immadani iti ahensia ti social welfare maigapu kadagiti ulila, tapno makagun-od iti pagbayadda kadagiti babayadanda iti eskuelaan. Dadduma a kakabsat ti nangted met iti kawes kadagiti babbarito. Kalpasanna, natay ti apongda a baket. Maysa a kabsat ti nangyadal iti Biblia kadakuada ken nangbayad ti abangda. Regular a makigimgimong dagitoy nga uppat a babbarito. Dua kadakuada ti di bautisado nga agibumbunannag, ket ti inauna a ni Rantso, nga agtawen itan iti 20, nabautisaran iti asamblea sirkito idi Marso 2004. Inyadalanna ti kasinsinna a ni Retselisitsoe, a nabautisaran iti dayta met la nga aldaw. Kasta unay ti panagyaman ni Rantso iti adu a tawen a naayat a panangaywan dagiti kakabsat kenkuana ken kadagiti kakabsatna.

Impadamag ti maysa a misionero idiay Cameroon: “Kada lawas, bayat ti panangyadalko iti Biblia iti maysa nga agtutubo a lalaki, nangngegko nga adda agkankanta kadagiti relihioso a kanta. Dinamagko iti iyad-adalak, ‘Sino ti diak am-ammo a kumakanta?’ Dayta ti bulsek a kabsatna, a ni Stephen. Rinugiak nga inyadalan iti Biblia ni Stephen babaen ti panangusarko iti audiocassette ti broshur nga Ania ti Kalikaguman ti Dios Kadatayo? Kalatmi ti mangikabesa iti maysa a bersikulo ti Biblia iti kada leksion. Nalaing nga agikabesa ni Stephen ket adu ti naikabesana a bersikulo ti Biblia. Makigimong met ken kanayon nga agkomento. Nabiit pay nga impaayna ti damo a palawagna iti Teokratiko nga Eskuelaan ti Panagministro. Panagbasa iti Biblia dayta, ket gapu ta saan nga ammo ni Stephen ti Braille, masapul nga ikabesana dayta. Mangnamnamaak a mabiiten a kibinek ken kuyogek ni Stephen a mangasaba. Maysa kadagiti paborito ni Stephen a bersikulo ti Biblia ket ti Isaias 35:5, a kunana: ‘Maluktanto ti matmata dagidiay bulsek.’ Maragsakan ni Stephen ta naluktanen dagiti naespirituan a matana, ken agkankanta itan iti  pangidaydayaw ken Jehova, nga agyamyaman kenkuana ta iti masanguanan makakitanto met ti pisikal a matana.”

Idiay Liberia a pakapaspasamakan iti gubat, maysa a babai nga agnagan iti Nancy kiniddawna iti maysa a Saksi a mayadalan iti Biblia. Imbaga ti pastorna a ti Dios ipanna dagiti Saksi ni Jehova idiay impierno agsipud ta ulbodda a Kristiano. Nupay kasta, kaarruba ni Nancy ti dadduma a Saksi, ket napaliiwna a no agsardeng ti putok iti panagpipinnnaltog, kanayon a kitaen dagiti panglakayen iti lokal a kongregasion ti pagimbagan dagiti kakabsatda. Nadlawna met a gundawayan dagiti Saksi ti mangasaba no natalinaay ti panawen. Naallukoy ni Nancy ken ti dadduma pay nga umili idi a ti lugan ti sanga nga opisina nga addaan kadagiti kasapulan unay nga abasto nga indonar dagiti Saksi idiay Francia ken Belgium ti immuna a limmasat iti lugar a nagbaetan dagiti agbibinnusor. “Patiek nga adda kadakayo ti kinapudno,” kinunana. Nagsayaat ti irarang-ayna iti panagadalna.

Adda agtutubo a lalaki nga immay iti maysa a purok iti Uganda tapno agsemento iti balay a paggigimongan dagiti kakabsat. Ginundawayan ti maysa a payunir a kasabaan ti kantero, ket nagustuanna ti nangngegna. Ngem di nagbayag, masapul nga agawiden iti purokna nga adda iti nangatngato pay a paset ti bantay. Tangay awan ti Saksi iti pagnanaedan ti lalaki, imbaga ti payunir no sadino ti pakasarakanna iti kaasitgan a Kingdom Hall. Nagbisikleta ti lalaki iti akikid ken natapuk a kalsada nga agarup 30 a kilometro a sumalog iti kabambantayan tapno birokenna dagiti kakabsat. Tangay awan ti nadanonna iti Kingdom Hall, nangibati iti surat iti sirok ti ridaw, nga agkidkiddaw a mayadalan iti Biblia. Idi agangay, maysa a payunir a nangbirok kenkuana iti purokna ti nasdaaw a nakakita iti agarup 200 a tattao nga agur-uray kenkuana tapno dumngeg iti mensahe ti Biblia! Adu kadakuada ti nangipakita iti napasnek nga interes nga agadal iti Biblia. Maang-angay itan dagiti gimong iti daytoy a nasulinek a lugar.

 Maysa a sardam iti bassit a purok a pagnanaedan ti agarup 600 a tattao iti abagatan a daya a Nigeria, nakakita dagiti pumurok iti naraniag a lawag iti langit a mayan-anninaw iti karayan. Kasla umas-asideg ti lawag iti ayanda, isu a nagkamang dagiti pumurok iti natalged a lugar. Adu ti nangipagarup a dayta ti pannakadadael nga ikaskasaba dagiti Saksi ni Jehova, isu a nagtatarayda a napan iti Kingdom Hall, a kunkunada, “Saan a dadaelen ti Armagedon daytoy a pasdek.” Kamaudiananna, idi agarup alas-dies ti rabii, naammuan dagiti pumurok a ti lawag ket naggapu iti dakkel nga uram iti kasamekan. Idi dinamag dagiti kakabsat no apay a saanda a nagkamang kadagiti asideg a simbaan, simmungbat ti maysa a lalaki: “Awan ti mamaay ti dadduma a simbaan. Dadaelen ti Armagedon nga ibagbagayo dagita ngem dina dadaelen ti Kingdom Hall.”

Kinuna ti maysa a babai a regular pioneer iti kampo a pagkamangan idiay Guinea: “Bayat a mangaskasabaak, naam-ammok iti pagtaenganna ti maysa a balasitang a walo ti tawenna. Isu ket baldado. Imbagana kaniak a masansan nga agmalmalem a panawan dagiti dadakkelna sa tulbekanda ti ridaw. Imbagak a kayatko ti makigayyem kenkuana. Kalpasanna, dinamagko no ania ti kayatna nga aramiden ti Dios para kenkuana. Imbagana a kayatna a papagnaen koma ti Dios. Inukagko ti Isaias 35:5, 6 ket impakitak kenkuana nga inkari ni Jehova a magnanto dagiti pilay. Kalpasanna inukagko ti broshur a Tagiragsakenyo ti Biag nga Agnanayon Ditoy Daga! iti ladawan a mangipakita nga ag-agasan ni Jesus dagiti masakit. Imbagak met kenkuana a magun-odanna dagitoy a bendision no agadal iti Biblia ken aramidenna dagiti kalikaguman ni Jehova. Immanamong nga agadal iti Biblia. Nalpasmin nga inadal ti broshur a Biag Ditoy Daga ken dandanin malpasmi ti broshur a Mabalinmo ti Makigayyem iti Dios! Kalpasan ti tallo a lawas a panagadalmi, imbagana a kayatna ti makigimong. Tangay saan a makapagna, dagasek iti balayna, ket sallabayek a mapan makigimong. Pagay-ayatna ti makigimong isu a no diak dagasen, gumura kaniak ken agsangit pay ketdi.”

 ◼ DAGITI KONTINENTE TI AMERICA

Bilang dagiti pagilian: 56

Populasion: 868,871,739

Bilang dagiti agibumbunannag: 3,165,925

Bilang dagiti panangyadal iti Biblia: 3,089,453

Ipadamag ni Marie a taga Guadeloupe: “Iti aplaya a kaabay ti pagtartrabahuak a hotel, imbaga kaniak ti sumagmamano a kostumermi nga adda sumagmamano a kawes ken sapatos a nabati iti rabaw ti bato dua nga aldaw ti napalabasen. Innalak dagitoy tapno maammuak no adda pakabigbigan iti makinkukua. Nakasarakak iti pitaka nga addaan iti 1,067 a euro [$1,372 U.S.]! Sumagmamano a nakakita ti nangsugsog kaniak nga idulinko ti dadduma a kuarta sa itedko ti dadduma kadakuada. Dagus nga imbagak kadakuada a maysaak a Saksi ni Jehova ket idiktar ti konsiensiak a masapul a mapagpiaranak. Isu nga impanko  ti isuamin iti pagawatan ti bisita iti hotel. Nasdaaw met dagiti empleado sadiay ta diak indulin ti kuarta. Inlawlawagko manen ti takderko. Idi nagsubliak iti aplaya, dadduma a tattao nga adda sadiay ti magagaran a makaammo iti ad-adu pay maipapan kadagiti patpatientayo. Inusarko ti Biblia a nangasaba kadakuada. Karaman kadakuada ti babai a nagkuna, ‘Dagiti laeng Saksi ni Jehova ti awatek nga agtrabaho kaniak.’” Nabirokanda ti makinkua kadagiti bambanag, ket dagiti polis pinadayawanda ti kabsat a babai gapu iti kinamapagpiaranna.

Ni Antonio a maysa a Bethelite idiay Mexico gunggundawayanna ti amin a tiempo a makisarita kadagiti tattao maipapan iti kinapudno. Iti nabiit pay, bayat a nakalugan iti bus a mapan makigimong, nakaipaima iti tract iti nagsayaat ti panagkawkawesda a lalaki ken babai. Naragsak ti panagsasaritada. “Nagpakadaak kadakuada idi dumsaagakon,” kinuna ni Antonio, “ngem nasdaawak ta kayatda met ti dumsaag tapno maitultuloyda ti makisarita kaniak, uray no saanda pay koma a dumsaag. Idi nakadissaagkamin, nagsasaritakami pay bassit, sa nagpakadaak manen. Dinamagda, ‘Papanam?’ ‘Mapanak makigimong,’ kinunak. Nagkinnitada ket kalpasanna dinamagda, ‘Mabalinmi kadi ti kumuyog kenka?’ ‘Maragsakanak a mangikuyog kadakayo!’ kinunak.” Ti agkabannuag a babai, a maysa nga abogada, ken ti kaanakanna a lalaki, nga estudiante iti unibersidad, nangngeganda idin ti kinapudno sumagmamano a tawen ti napalabasen, ngem saanda a nagtultuloy gapu iti panangbusor ti pamiliada. Idi kimmuyogda ken Antonio a nakigimong, namnamaenda a makita ti tao a damo a nakasaritada maipapan iti Biblia. Anian a pannakasorpresada ta nakitada ti kabsat a babai sadiay! Naragsakanda ta nakigimongda ket magagarandan nga agadal iti Biblia. “Ni Jehova ti nangiturong kadakami ditoy, ket manipud ita agtultuloykamin nga agadal ken makigimong,” kinuna ti agkabannuag a babai. Nayurnos ti panagadalda, a maikonkondukta iti mamindua iti makalawas.

 Idiay Haiti, ni Jacqueline, nga asawa ti manangaywan iti sirkito, kuykuyogenna a mangasaba ti kabsat a babai a payunir idi nakakitada iti agkabannuag a babai nga agmaymaysa a nakatugaw iti igid ti kalsada ken agsangsangit. Immasideg kenkuana dagiti kakabsat ket dinamagda no apay a maladingitan. Idi damo, saan a kayat ti agkabannuag a babai ti sumungbat, ngem gapu iti naalumamay a panangpilitda kenkuana, kinunana, “Naaramidkon ti kayatko.” Dagus a naawatan ni Jacqueline a ti babai ket imminum iti sabidong. Nagtung-ed ti babai idi sinaludsodna no imminum. Dagus nga impan dagiti kakabsat iti ospital tapno maagasan. Iti simmaganad a lawas, sinarungkaran ti payunir ket pinaregtana. Nairugi ti panagadal iti Biblia.

Iti pagbayadan iti maysa a supermarket idiay Paraguay, nakigtot ni Lourdes idi naammuanna a bugos ti kuarta a papel a pagbayadna. Ti kasier dagus a nangayab iti guardia. Impanda ni Lourdes ken Ingrid, ti lima ti tawenna nga anakna a babai, iti bassit a kuarto a pagurayanda iti polis. Sinaludsod ti manedyer iti supermarket ken ti guardia no nangalaan ti kabsat iti bugos a kuarta. Saan a malagip ni Lourdes no nakaalaanna iti dayta ken imbagana a dina ammo a bugos dayta. Nasimron ni Ingrid isu a pinerrengna ti manedyer ken ti guardia sa kinunana: “Kasla mannanakaw ti panangtratoyo kadakami. Saan nga agtatakaw ni nanangko. Saksi ni Jehova-kami, ket saankami nga agul-ulbod.” Dinamag ti manedyer no ni Lourdes ket maysa a Saksi. Kinunana a wen. Nakombinsir met laeng dagiti lallaki a ni Lourdes ket pudno a Saksi idi immawagda iti sanga nga opisina dagiti Saksi ni Jehova. Nagpadispensarda kada Lourdes ken Ingrid gapu ta nataktakda sa pinalubosanda idan. Ngem imbaga ni Ingrid a ti kadaksan iti amin a napasamak ket saanda a nagatang ti pagay-ayatna unay a sangasupot a popcorn.

Mangaskasaba ti maysa a kabsat a lalaki idiay Costa Rica ket inkeddengna a kasabaan ti kaarrubana a Katoliko. Maam-amak  ti kabsat ta ti lalaki kagurgurana dagiti Saksi; pagsasawanna pay ketdi ida. Ngem nasdaaw ti kabsat ta pinastrek ti lalaki sa inlawlawagna ti panagbalbaliw ti kababalinna. Adda gayyem ti lalaki a nangawis kenkuana a bumisita iti adayo a komunidad tapno umatender iti maysa a kapilia Ebanghelikal. Idi addan sadiay, naawis nga agsao maipapan iti personal a “pammatina.” Imbagana laeng nga isu ket maysa a Katoliko. Saan a kayat dagiti tattao dayta isu a pinaruarda iti kapilia. Imbagada iti gayyemna a mabalin a makondenar gapu ta makilanglangen iti Katoliko. Pimmanaw ti lalaki iti kapilia, ngem tangay adda iti ganggannaet a lugar nga adayo iti pagtaenganna, dina ammo no sadino ti pagturoganna. Napan iti maysa a balay ken inlawlawagna ti napasamak, ket pinastrekda. Pinakan ken pinadagusda. Kinasabaan met dagiti bumalay daytoy a lalaki. Wen, Saksi ni Jehova dagitoy. Nagsayaat ti epekto dayta iti lalaki ta naammuanna a dagiti Saksi pudno nga ay-ayatenda ti kaarrubada! Ita, ti lalaki ket makipagad-adalen iti Biblia kadagiti Saksi.

Insurat ti maysa a kabsat a babai idiay Trinidad: “Idi mangaskasabaak iti lansangan, immasideg kaniak ti maysa a babai ket nagkiddaw kadagiti kabaruan a ruar ti magasin. Kalpasan ti panangipaimak iti sumagmamano a magasin kenkuana, intukonko ti libre a panagadal iti Biblia. Imbaga ti babai a nagadal idin ngem nabiit pay nga immakar iti lugar a pagnanaedanna. Dinamagko ti nagan ken adresna, ngem nagkedked, a kunkunana a no talaga nga agserserbitayo iti pudno a Dios, isurona kaniak no sadino ti pagnanaedanna. Iti simmaganad nga aldaw bayat a namalaybalaykami, nagtuktokak iti maysa a ridaw, ket linuktan dayta ti isu met la a babai. Idi nakitanak ken ti kaduak, sisisiddaaw a nagkatawa ken kinunana, ‘Kasano a nagbiit a nasarakannak?’ Sinaludsodko no malagipna ti imbagana kaniak iti napalabas nga aldaw. Pinastreknakami iti pagtaenganna, ket nairugi ti panagadal iti Biblia. Ti babai ket maysa itan a di bautisado nga agibumbunannag.”

 ◼ ASIA KEN TI MAKINTENGNGA A DAYA

Bilang dagiti pagilian: 47

Populasion: 3,971,703,969

Bilang dagiti agibumbunannag: 574,927

Bilang dagiti panangyadal iti Biblia: 444,717

Ni Ghanshyam ket maysa a regular pioneer idiay Nepal. Drayber ti taksi ti pagsapulanna. Gapu iti trabahona, adu ti naam-ammona a tattao a nadumaduma ti nalikudanda ngem nadlawna nga agap-apura ti kaaduan kadakuada uray rabiin, ken bassit ti panawenda a makisarita. Kaskasdi, ikagkagumaanna ti mangirugi iti saritaan. No adda gundawayna, ikkanna dagiti pasaherona iti maitutop a tract ken itedna ti adres ti kaasitgan a Kingdom Hall. Adu kadagiti pasaherona ti nangapresiar. Lima kadakuada ti makipagad-adalen iti Biblia ken ni Ghanshyam.

 Idiay Taiwan ti kabsat a babai ket kanayon a bugkawan ni lakayna, nangruna no nakasaganan a tumabuno iti Nakristianuan a gimong. Maysa nga aldaw, naistrok ni lakayna. Naparalisado ken naospital. Siaanus nga inaywanan ti kabsat ken sitataktika nga inusarna ti tiempo a panagpaimbag ni lakayna tapno tulonganna a mangawat iti kinapudno ti Biblia. Kinunana: “Masapul a watwatem ti utekmo, isu nga adda ibagak kenka nga impormasion ket masapul a laglagipem, Wen?” Ammo ni lakayna a masapul nga agpanunot, isu nga immanamong. Nagusar ti kabsat iti impormasion manipud iti nadumaduma a broshur tapno isurona ken lakayna ti sumagmamano a pamunganayan a kinapudno, kas iti nagan ti Dios, dagiti galadna, ken ti tema ti Biblia. Kanayonanna, adu a kakabsat ti bimmisita kenkuana ket impakitaanda iti asi. Daytoy ti nangtukay unay iti riknana isu nga idi nagawiden manipud iti ospital, immanamong nga agpayadal iti Biblia. Naka-wheelchair a tumabtabuno itan kadagiti gimong, ken us-usarennan ti napigsa a timekna nga agkomento.

Ni Rohana, nga special pioneer iti maysa nga away idiay Sri Lanka ket binusor ti maysa a lalaki a drayber iti pedikab wenno bisikleta nga addaan iti sidecar. Idi nakitana ni Rohana a mangaskasaba, sipipigsa nga inlunodna. Naminsan, binutbutengna ni Rohana a bagsolenna no dina isardeng ti mangasaba iti dayta a lugar. Ngem naalumamay latta ni Rohana. Di nagbayag, naaksidente ti lalaki ket naospital gapu ta nakaro dagiti sugatna. Binisita ni Rohana idiay ospital ken sinagutanna. Idi nakita ti lalaki no asino ti bimmisita kenkuana, nagsangit ken dimmawat iti pammakawan ken Rohana gapu kadagiti panangabusona kenkuana. “Sir, gapu iti panangtratok kenka, naim-imbag pay koma no pinang-ornak laengen ngem ti umayka ditoy tapno liwliwaennak,” kinuna ti lalaki. Ita nakaruaren iti ospital ket agmanmaneho manen iti pedikabna. Regular metten nga agbasbasa kadagiti magasintayo.

Adu a ganggannaet ti napan idiay Hong Kong tapno agtrabaho kas katulong. Maysa kadakuada ti babai a nakairugi a  nangadal iti broshur nga Ania ti Kalikaguman ti Dios Kadatayo? idi adda pay laeng iti Pilipinas ket kayatna nga ituloy ti panagadalna iti Biblia. Ngem dina ammo no pangbirokanna kadagiti Saksi, isu a nagkararag maipaay iti tulong tapno masarakanna ida. Iti aldaw a panaginana iti trabaho, nagbiahe a bimmallasiw iti baybay tapno mapan iti kangrunaan a lugar ti negosio ken iti central park a pagdadagupan dagiti Pilipino no ngudo ti lawas. Nagbirok ngem awan ti mailasinna a Saksi ni Jehova, nupay kanayon a mangaskasabada iti parke no ngudo ti lawas. Nupay kasta, nakakita iti broshur a Kalikaguman iti pagbasuraan. Pinidutna ti broshur ket nakitana nga adda naisurat a numero ti telepono. Numero dayta ti kabsat a babai a nakaipaima iti broshur. Nasdaaw ti babai ket naragsakan unay a nakaammo a ti kabsat ket agtartrabaho iti isu met laeng a pasdek a pagtartrabahuanna. Intultuloyna ti nagadal iti Biblia ken makigimgimongen.

Ti maysa a manangaywan iti sirkito ken ti sabali pay a panglakayen idiay Republika ti Korea maitutop unay ti panangsarungkarda iti kabsat a babai a sangapulo a tawenen a di aktibo. Ti asawana, a maysa nga ateista, inkeddengna ti tumabuno iti maysa a simbaan kalpasan a naopera. Idi simmarungkar dagiti kakabsat, naam-ammoda ti lakayna, ket inawatna ti broshur a Kalikaguman kalpasan ti naingayyeman a panagsasaritada. Ti panglakayen pinaregtana ti kabsat a babai bayat ti pannakipagadalna ken ni lakayna. Inawat ti asawa a lalaki ti awis a tumabuno iti kombension distrito, sa insardengnan ti makimisa ken kanayonen a makigimgimong. Rimmang-ay met ti kabsat a babai ket kiniddawna a masarungkaran ti uppat nga annakna nga agnanaed iti sabali a siudad. Kas resultana, nabautisaranen ni lakayna, kasta met ti inauna nga anakna a babai ken ti asawana, ken ti inaudi nga anakna a babai. Kalpasanna, nabautisaran met ti inauna nga anakna a lalaki ken ti asawana, isu nga adda innem a baro a Saksi.

Ni Yuki, a maysa nga estudiante iti haiskul idiay Japan, marigatan a mangibaga kadagiti kaklasena nga isu ket maysa a Saksi ni Jehova. Gapu ta ammona a masapul a mangasaba, napanunotna a rumbeng nga isu ti umuna nga agsao, yantangay saan a  pulos a pagsasaritaan dagiti kaklasena ti maipapan iti relihion. Inkeddengna nga ipakita kadagiti kaklasena ti panagkararagna bayat ti pangngaldaw. Binigat nga agkarkararag a sipapasnek tapno maaddaan iti tured. Kalpasanna, imbes nga agdardaras tapno awan ti makadlaw iti panagkararagna bayat ti pangngaldaw, indumogna ken imbaybayagna ti nagkararag. Idi nalpasen, dinamag ti maysa a kaklasena no adda rikriknaenna. Nupay kasta, saan a naitured ni Yuki ti nangasaba. Maladingitan iti dayta, isu a nagkararag tapno dumawat iti pammakawan ni Jehova ket kiniddawna manen a tumured koma. Iti sumaganad nga aldaw, kalpasan a nagkararag ni Yuki, dinamag manen ti kaklasena no adda rikriknaenna. Nagpanunot ni Yuki, ‘Masapul a mangasabaak itan!’ Inlawlawagna nga isu ket maysa a Saksi ni Jehova. Idi damo, nasdaaw ti kaklasena, ngem kalpasanna nagadun ti saludsodna​—Ania ti ikarkararagmo? Ania ti nagan ti Dios? Asino ni Jesus? ken dadduma pay. Naragsakan ni Yuki.

Idiay Kupang, Indonesia, agdinamag ni Glenn a mammartek ken adikto iti droga. Tangdanan dagiti tattao tapno butbutngen wenno kabilenna ti sabsabali. Makikabkabbalay idi kadagiti nagannak kenkuana idi adda dua a Saksi ni Jehova a simmarungkar ken nakisarita kadakuada maipapan iti Biblia. Di nagbayag ni Glenn nakipagadal iti Biblia ken inkagumaanna nga ikkaten dagiti dakes nga ugalina. Maysa nga aldaw adda lalaki a makinkukua iti pagtagilakuan a nangtangdan kenkuana ken nangipauna iti dakkel a gatad ti kuarta tapno kabilenna ti maysa a lalaki. Pinampanunot ni Glenn dayta a tukon ngem inkeddengna a saannan nga awaten dagiti kasta a trabaho. Insublina ti kuarta ken pinagkedkedanna ti trabaho. Kalpasanna idi napan ni Glenn iti sabali a pagtagilakuan, nagamak ti makinkukua di la ket ta immay a mangkabil kenkuana. Kinombinsir ni Glenn ti makinkukua nga isu ket agad-adalen iti Biblia ken natalnan ti panagbiagna. Ti makinkukua nakipagadal met iti Biblia ken inikkanna ni Glenn iti trabaho iti paglakuan. Nabautisaran ni Glenn iti kombension distrito idi napan a tawen, ket timmabuno ti makinkukua iti pagtagilakuan.

 ◼ EUROPA

Bilang dagiti pagilian: 46

Populasion: 728,373,014

Bilang dagiti agibumbunannag: 1,490,345

Bilang dagiti panangyadal iti Biblia: 733,728

Kalpasan ti ipapatay ni Jacoba, a maysa a kabsat a baket nga agtawen iti 88, nga agnanaed idiay Netherlands, nakaawat dagiti kabagianna iti surat manipud kadagiti polis. Adu a tawen a simamatalek a nangitultulod kadakuada kadagiti magasin. Kuna ti paset ti surat: “Nakapatpateg ti baket kadakami. Kanayon a bisitaenna ti presintomi, ket pagay-ayatmi ti makikadua kenkuana nga uminum iti tsa. Apresiarenmi ti kinaturedna​—ta uray baketen rummuar pay laeng a nakabisikleta, agtudtudo man wenno agin-init, a bumisita kadagiti tattao tapno iwaragawagna dagiti patpatienna. Mailiwkaminto unay kenkuana.”

 Kastoy ti kapadasan manipud iti Switzerland. Maysa a pamilia a Saksi ni Jehova a mapan agbakasion ti nangitalek kadagiti tulbek ti apartment-da iti anak a lalaki ti sabali pay a pamilia a Saksi, a kiniddawda a pakanenna dagiti lames iti aquarium-da bayat ti kaawanda. Idi damo a napan ti lalaki iti apartment, narigatan a manglukat iti ridaw. Adda babai iti kabatogda nga apartment a simmirip iti ridawna gapu ta adda nangngegna nga uni. Idi nakitana ti lalaki a mangluklukat iti ridaw ti apartment, impapanna a mannanakaw isu a nangayab kadagiti polis. Idi a ti lalaki napakannan dagiti lames, rimmuar ket nasabatna ti dua nga armado a polis! “Ania ti ar-aramidem ditoy?” dinamagda. “Pinakanko laeng dagiti lames, ta imbilinda a pakanek,” kinunana. Saan a namati kenkuana dagiti polis. Inlawlawagna: “Maysaak a Saksi ni Jehova, ket Saksi met ti pamilia nga agnanaed ditoy. Impakaasida a pakanek dagiti lames bayat ti kaawanda, isu nga imbatida kaniak dagiti tulbekda.” Saan a nakombinsir dagiti polis ket kayatda nga ikuyog iti presinto. “Aguraykayo,” kinuna ti agtutubo. “Insurat dagiti gagayyemko ti numero ti cell phone-da iti daytoy a papel; awaganyo ida itan ta damagenyo no agpayso ti imbagak.” Inawagan dagiti polis ti numero ket pinaneknekanda ti imbaga ti lalaki. Kalpasan dayta, nagpadispensarda sa pimmanawdan. Idi nakaawiden ti pamilia a nagbakasion, inawaganda ti babai a nabiit pay nga immakar iti batog ti apartment-da. Nagyamanda iti pannakaseknanna. Kalpasanna inlawlawagda a ti lalaki ket padada a Saksi isu a naan-anay a mapagtalkan. Tangay awan unay ti ammo ti babai maipapan kadagiti Saksi ni Jehova, nairugi ti panagsasarita ket immanamong a mayadalan iti Biblia.

Bayat ti panagbalaybalay ti kabsat a babai idiay Italia, nakabirok iti gundaway a makisarita iti maysa nga agkabannuag nga ina nga okupado unay iti trabahona. Namin-adun a pinadas ti kabsat a sarungkaran, ngem dina maabutan, isu a tineleponuanna. Iti telepono, imbaga ti agkabannuag a babai a  talaga nga awan ti tiempona a makisarita maipapan iti Biblia. Kinuna ti kabsat: “Iti 10 wenno 15 minuto, adda baro a maadalmo uray iti telepono.” “No iti telepono laeng, sige mabalin!” kinuna ti babai. Nabiit pay a nangibati kenkuana ti kabsat iti libro a Pannakaammo a Mangiturong iti Biag nga Agnanayon ket rinugianda ti nagadal babaen ti telepono. Kadawyan nga agadalda iti agsapa ti Sabado, ngem nagbalinen a 30 minuto ti 10 wenno 15 minuto.

Ni Angela ket maysa kadagiti umad-adu a bilang dagiti agibumbunannag idiay Britania a nangikagumaan a mangasaba iti adu a ganggannaet nga agnanaed sadiay. Idi sinarungkaranna ti maysa a paglakuan dagiti Tsino iti naluto a taraon, maysa kadagiti aglaklako ti nangpapanaw kenkuana. Ngem idi pumampanawen ni Angela, adda maysa a babai a Tsino a rimmuar manipud iti likudan ti paglakuan, a mangipukpukkaw iti nagan ti Dios iti pagsasao a Tsino. Kalpasan dayta a damo a panagsaritada, ni Angela kanayonen a mangibati kenkuana kadagiti magasin. Nupay pagay-ayatna dagiti publikasion, inlawlawagna a narigatna a patien a pinarsua ti Dios ti uniberso. Pagarupenna a naiparna laeng a timmaud ti amin a bambanag.

Agluto iti egg roll ti trabaho ti babai iti paglakuan ti taraon. Dinamag ni Angela no mano a ramen ti usarenna tapno makaaramid iti egg roll. “Lima,” kinunana. Imbaga ni Angela nga inton agluto  manen iti egg roll, ipallatokna dagiti lima a ramen ket kitaenna no mano nga egg roll ti pagbalinanda. Idi simmarungkar ni Angela iti simmaganad a lawas, sinabat ti babai a Tsino. Nangted kenkuana iti kalutluto nga egg roll, ken imbagana a patiennan nga inaramid ti Dios ti uniberso. Nairugi ti regular a panagadal iti Biblia, ket nagsayaat ti irarang-ay ti pannakaammo daytoy a babai maipapan iti kinapudno manipud iti Sao ti Dios.

Idiay Alemania, no maibiahe babaen iti tren dagiti basura a radioaktibo manipud kadagiti nuklear a planta ti koriente, masansan nga agprotesta dagiti aktibista a mangsalsalaknib iti aglawlaw. Ngarud, dagiti polis guardiaanda a naimbag dagiti biahe ti tren. Masapul a nawada ti riles sakbay a lumabas ti tren. Idi Nobiembre 2003, adda naaramid a kasta a panagibiahe iti asideg ti pagpaypayuniran ni Gudrun. “Napanunotko nga adu nga oras nga agtugaw ken aguray dagiti polis,” kinunana, “isu nga inkeddengko nga asitgan ida tapno mangitukon iti basaenda.” Nadlaw ni Gudrun a naingayyeman dagiti polis. Awit-awitna ti basket a napno kadagiti kopia ti Ti Pagwanawanan ken Agriingkayo!, ken saan a narigatan a nakisarita kadagiti polis. Ti grupo dagiti polis a naggapu idiay Bavaria rinetratoda pay ni Gudrun a mangituktukon kadakuada iti Agriingkayo! iti luganda. Iti dua nga aldaw, nagbiahe iti nasurok a 120 kilometro a nakisarita iti nasurok a 100 a polis iti dalan. Nakaipaima iti 184 a magasin. “Diakto pulos malipatan dayta a kapadasan!” kinunana a siraragsak.

Maysa nga aldaw idiay Espania, idi nga agawid ni Ana María manipud iti trabahona, napan iti pagsardengan ti bus, ket bayat nga agur-uray sadiay, rinugianna a binasa dagiti naipaskil a pakaammo. Maysa kadagita ti nangawis a dagus iti atensionna. Kuna ti pakaammo: “Kasapulak unay dagiti Saksi ni Jehova tapno maitultuloyko ti panagadalko iti Biblia.” Inawagan a dagus ni Ana María ti naisurat a numero ti telepono ken  inyurnosna ti makisinnarak iti babai nga agnagan iti Felicitas. Nabiit pay a simmangpet ti babai manipud iti Ecuador, a sadiay ti nagadalanna iti Biblia iti dua a tawen. Dagus a naituloy ti panagadal iti Biblia, ket sipud idi, ni Felicitas ken ti anakna a lalaki tabtabunuandan ti amin a gimong. Agyamanda ta apagbiit laeng a isardeng ti naespirituan nga irarang-ayda.

Maysa a babai idiay Bulgaria ti nakikadua iti apokona a lalaki a nakipagadal iti Biblia kadagiti Saksi, ket naragsakan a nakaammo a Jehova ti nagan ti Dios. Tangay awan ti nagan ti Dios iti Bibliana, napan iti pagtagilakuan iti libro tapno gumatang iti maysa nga addaan iti nagan ti Dios. Dinamag ti aglaklako no ania ti birbirokenna. Idi imbagana, binugkawan ti lalaki: “Miembroka dayta a sekta!” Apag-isu nga adda simrek a padi iti pagtagilakuan. Idi dinamag ti aglaklako no, “Ania ti nagan ti Dios?” simmungbat ti padi: “Siempre, Jehova. Isu a saanmon a bugkawan daytoy a babai.” Nasdaaw ti aglaklako. Nagsayaat ti irarang-ay ti babai ken ti tallo a miembro ti pamiliana.

Nagladingit ti maysa a pamilia idiay Russia ta natay ti ing-ingungotenda nga anak a lalaki. Iti rabii sakbay ti pumpon, inawagan ti ina ti numero ti telepono ti amin a gayyem ti anakna, a nakitana iti kuadernona. Karaman kadagita ti numero ti telepono ti maysa a pamilia a Saksi ni Jehova, nga inawis met ti ina nga umay makipamumpon. Ti pamilia a Saksi saanda nga am-ammo ti nagannak ti lalaki, ngem napanunotda a nagsayaat dayta a gundaway tapno liwliwaenda ti pamilia. Nakisarita ti kabsat a lalaki iti ama maipapan iti namnama a panagungar ken nangibati iti broshur a No Adda Matay nga Ay-ayatenyo. Dua nga aldaw kalpasanna, sinarungkaran ti kabsat. Kinuna ti ama: “Nagustuanmi unay ti broshur. Napagnunumuanmi a mangiwayakami iti tiempo nga agadal iti Biblia.” Nagpasalistan ti asawa a babai iti Teokratiko nga Eskuelaan ti Panagministro ket agsagsaganan nga agbalin a di bautisado nga agibumbunannag.

 ◼ OCEANIA

Bilang dagiti pagilian: 30

Populasion: 34,820,382

Bilang dagiti agibumbunannag: 94,087

Bilang dagiti panangyadal iti Biblia: 48,307

Agtawen laeng iti 12 ni Olena idi nabautisaran idi Disiembre 2003, idiay Hawaii. Saan a kas kadagiti agtutubo a panaglinglingay laeng ti pampanunotenda, adda dagiti espesipiko a naespirituan a kalat ni Olena. Kinunana: “Maragsakanak a nag-auxiliary pioneer idi Marso ken Mayo, ken talaga a tinagiragsakko ti nakikadua kadagiti payunir ken kadagiti natataengan. Kas pagarigan, kadagiti malem ti Sabado, naaddaanak iti pribilehio a nakikadua iti dati a misionero kadagiti panagsarungkar ken panangyadalna iti Biblia kadagiti Tsino. Magustuak ti pagsasao. Kalatko ti agbalin a regular pioneer iti kongregasion nga  agus-usar iti ganggannaet a pagsasao. Tapno maragpatko dayta a kalat, rummuarak kalpasan ti klasek iti Mierkoles agraman iti Sabado ken Domingo. Kasta met, planok ti masansan nga ag-auxiliary pioneer agingga a kabaelak.” Ania pay ti patien ni Olena a makatulong kenkuana tapno maragpat dagiti kalatna? Kinunana: “Ti panangsaluadko iti pusok kaipapananna a masapul a makita kadagiti tignayko a napateg kaniak ti panangay-ayo ken Jehova. Ti pannakilangen kadagidiay kasta met laeng ti panangmatmatda ken Jehova ket makatulong kaniak nga agtalinaed iti dalan ti kinalinteg. Ti panangbusbos iti ad-adu a tiempo nga agserbi ken Jehova kaipapananna ti panangbusbos iti basbassit a tiempo a makikadua kadagiti tattao a nailubongan ti kababalinda. Iti kasta saanko a mapanunot a makaparagsak kaniak dagiti material a bambanag ken imoral a panaglinglingay.”

Gagangayen idiay Solomon Islands a dagiti nagannak itedda kadagiti kabagianda ti maysa wenno dua kadagiti annakda. Idi naammuanda no ania ti namnamaen ni Jehova kadagiti nagannak, inyurnos ti maysa nga agassawa a pagsublien ti anakda a ni Deborah, a tin-edyer idin. Ania ngata ti mapasamak no kellaat a maammuan ni Deborah nga isu ket kameng ti maysa a pamilia a Saksi, nga okupado kadagiti gimong, panangasaba, ken panagadal iti Biblia? Malagip ni Deborah: “Uray idi damok ti nakigimong, mariknak a maragsakan dagiti timmabuno ta timmabunoak. Impagarupko a makakitaak sadiay kadagiti klero a karkarna ti kawesda, ngem awan ti nakitak. Makipaspaset ti amin iti gimong, uray dagiti ubbing.” Di nagbayag, nakipaset metten ni Deborah. Ti maysa pay a nakaallukoy kenkuana ket ti pamay-an ni tatangna a mangisuro kenkuana ken kadagiti kakabsatna. Kinunana: “Tultulongannakami ni Tatang a mangutob kadagiti ulidan dagiti tattao iti Biblia. Talaga a nakatulong daytoy kaniak no adda parikutko.” Ni Deborah, a maysa itan a di bautisado nga agibumbunannag, imbagana a maragsakan unay ta ti kinapudno manipud iti Sao ti Dios tinignayna dagiti  dadakkelna a mangpasubli kenkuana iti pamilia ken iti dalan nga agturong iti biag.

Kabambantayan ti dadduma a paset ti Papua New Guinea, ket adu a purok ti saan a madanon ti kalsada. Adayo unay iti moderno a sibilisasion ti dadduma kadagitoy a purok. Nupay kasta, nakadanon ti naimbag a damag kadagitoy a lugar. Maysa a lalaki nga agnagan iti Leanna ti timmabuno iti gimong ti kongregasion iti kabesera a Port Moresby. Nasdaaw dagiti kakabsat a nakaammo nga isu ti panguluen ti maysa a nasulinek a purok iti tuktok ti kabambantayan, ket dagiti tattaona saanda pay a napadasan ti aniaman a moderno a pagnam-ayan. Lima nga aldaw a pinagpagna ni Leanna ti kabakiran tapno makadanon iti haywey. Manipud sadiay, naglugan iti trak nga immay iti kabesera. Imbagana nga agarup uppat a tawen ti napalabasen, immay iti siudad ket naam-ammona ti maysa a kabsat a lalaki a nakaipaima kenkuana iti magasin a Pagwanawanan. Inyawid ni Leanna ti magasin iti purokna, ket idi nabasanan, rinugianna nga insuro dagiti tattao iti purokna maipapan iti magasin. Dinomingo nga inaramidna dayta iti sumagmamano a tawen. Nagsayaat ti panangakkubna iti magasin tapno saan a madadael. Kamaudiananna, inallukoy dagiti tattao iti purokna a birokenna dagiti nangipablaak iti magasin. Nagsubli iti siudad ket binirokna dagiti kakabsat, a nangyurnos iti panagadalna. Nakipagnaed ni Leanna iti agarup dua a lawas iti pamilia a Saksi ket inleppasna nga inadal ti broshur a Kalikaguman. Idi naibaga kenkuana nga adda kongregasion iti ili a di unay adayo iti purokna, naragsakan unay ket kinunana: “Nalaka laeng dayta! Dua laeng nga aldaw a pagnaen dayta manipud iti purokmi!” Nagawid iti purokna nga awit-awitna ti maysa a bag a napno iti literatura ken addaanen iti naun-uneg a pannakaawat iti kinapudno iti Sao ti Dios. Nayurnos a mabiiten a masarungkaran daytoy a purok tapno dagiti tattao sadiay siuumiso a masursuruan iti Biblia.

 Iti isla ti Kiribati, maysa a kabsat a babai nga agipatpatarus iti sanga nga opisina dagiti Saksi ni Jehova ti nangisalaysay iti daytoy a kapadasan: “Maysa nga agsapa nangikargaak iti magasin a Pagwanawanan iti bagko ket panggepko nga itukon dayta nupay daanen. Siak ken ti kaduak nakasabetkami iti maysa a lalaki. Nakiam-ammokami, ken intukonmi ti magasin kenkuana kalpasan nga insalaysaymi ti kunaen ti Biblia maipapan iti impierno. Nagdumog ken saan a nagtimek iti apagbiit, isu a dinamagko no ania ti napasamak. Idi timmangwa, nadlawko nga agsangsangit. Imbagana a makasangit gapu iti tema ti magasin. Natay ti anakna a lalaki sumagmamano laeng a lawas ti napalabas, ket agladladingitda pay la nga agassawa. Kanayon nga agkarkararagda nga agassawa tapno liwliwaen koma ida ti Dios agsipud ta patienda nga adda ti anakda iti umap-apuy nga impierno. Idi nangngegna ti pudno a kunaen ti Biblia maipapan iti kasasaad dagiti natay, nasdaaw ti lalaki ken naragsakan unay. Nairugi ti panagadal iti Biblia idi nasarungkaran. Masansan nga ibagana nga inkararagna iti Dios nga ipakitana kenkuana ti kinapudno ken kayatna a masarakan ti relihion a pudno a mangisursuro iti Biblia. Nangrugin a makigimong ken agsagsagana a naimbag tapno naimpusuan a makapagkomento bayat ti Panagadal iti Pagwanawanan.”

Idi Disiembre 2003, nasurok a 60,000 a delegado ti timmabuno iti kadakkelan a kombension nga inangay dagiti Saksi ni Jehova idiay Australia. Idi nagawid a naggapu iti kombension idiay Sydney, magagaran ti agtawen iti innem a ni Alyscea, a mangipakita kadagiti kaklasena iti baro a libro nga, Agsursuroka iti Naindaklan a Mannursuro. Idi dinagas ni nanangna iti dayta a malem, nasdaaw a nakakita kadagiti sasao nga “Idayawyo ti Dios” a naisurat iti dadakkel a letra iti pisara ti klase. Iti dayta nga agsapa nagreport ni Alyscea kadagiti tallo a mannursuro ken 24 a kaklasena maipapan iti kombension. Naragsakan ti amin iti baro a libro ken ti sibabara a panangrepaso ni Alyscea iti dadduma a tampok ti programa. Nagmalmalem a nagtalinaed iti pisara dagiti sasao nga “Idayawyo ti Dios.”

[Ladawan iti panid 43]

Ni Nafissatou, Niger

[Ladawan iti panid 43]

Ni Rantso (maikadua manipud kannawan) kaduana ti kasinsin ken kakabsatna, Lesotho

[Ladawan iti panid 48]

Ni Marie, Guadeloupe

[Ladawan iti panid 48]

Ni Antonio, Mexico

[Ladawan iti panid 52]

Ni Ghanshyam, Nepal

[Ladawan iti panid 56]

Ni Jacoba, Netherlands

[Ladawan iti panid 58]

Ni Angela, Britania

[Ladawan iti panid 61]

Ni Olena, Hawaii