Surat ti Bagi a Manarawidwid

BAYAT nga umad-adani ti baro a sistema dagiti bambanag, nasken a kanayon a mangnamnamatayo ken Jehova. (Sof. 3:8) Kinuna ni mammadto a Daniel a “ti Dios . . . Manangipalgak kadagiti palimed, ket impakaammona . . . no ania ti mapasamak iti kamaudianan a paset dagiti aldaw.” (Dan. 2:28) Talaga a nagsayaat a pribilehio ti agbiag iti panungpalan dayta a naipadto a tiempo ken ti maaddaan iti pannakaawat kadagiti nadiosan a palimed nga ipakpakaammo ni Jehova!

Babaen “ti matalek ken masirib nga adipen,” in-inut nga impalgak ni Jehova ti panggepna a mangurnong iti internasional a “dakkel a bunggoy” dagiti managdaydayaw bayat dagitoy nariribuk a “maudi nga aldaw.” (Mat. 24:45; Apoc. 7:9; 2 Tim. 3:1) Sigun iti Isaias 2:2, 3, mapasamak daytoy sangalubongan a panagurnong “iti kamaudianan a paset dagiti aldaw.” Kada tawen, agtultuloy daytoy a panagurnong nupay agraraira ti riribuk ken kinaranggas ditoy lubong.

Bayat ti tawen 2004, ad-adda a naipabigbig kadatayo a masapul a tungpalentayo dagiti sasao ni Jesus: “Agtultuloykayo nga agbantay . . . Paneknekanyo a sisasaganakayo.” (Mat. 24:42, 44) Agpayso a dakkel ti kaipapanan dagiti mapaspasamak iti lubong kadagiti Kristiano a makatarus ‘kadagiti pagilasinan ti tiempo’ ken agtigtignay sigun iti dayta. (Mat. 16:1-3) Kas kaitungpalan ti Saona, itultuloy ni Jehova nga andingayen dagiti adipenna nga inorganisarna a mangitungpal iti trabahona iti laksid ti aniaman nga ibubusor a pakaipasanguanda.

 Nupay ikagkagumaan ti dadduma a lapdan wenno pasardengen ti pannakaiwaragawag ti Pagarian, itultuloy dagiti kakabsattayo ti agsao iti kinapudno ken agtataripnong. (Ara. 5:19, 20; Heb. 10:24, 25) Idiay Russia idi Hunio 2004, ti korte a pagapelaran iti Moscow pinatalgedanna ti desision ti nababbaba a korte a mangiparit kadagiti aktibidad dagiti Saksi ni Jehova ken mangwaswas iti legal a korporasionda iti dayta a siudad. Nupay kasta, saan a naupay dagiti kakabsat; ammoda no ania ti kalikaguman ti Dios kadakuada, ket agtungpalda kenkuana kas Agturay imbes a kadagiti tattao. (Ara. 5:29) Agtalekkami nga iturong ni Jehova dagiti adipenna iti laksid ti di nainkalintegan a pannakaiparitda.

Iti Republika ti Georgia iti napalabas a sumagmamano a tawen, dagiti kakabsat napukawanda iti sanikua, rinanggasan ida dagiti manangriribuk a tattao, ken naimatanganda ti pannakapuor dagiti literaturada. Ngem saan a nagballigi ti aniaman nga igam a maibusor kadakuada. (Isa. 54:17) Iti 2004 a tawen serbisio, binigbig manen ti Georgia dagiti Saksi ni Jehova kas legal a relihion. Naangay dagiti kombension nga awan ti pannakasinga, ket siwayawaya a naipatulod dagiti literatura iti pagilian. Naipadamag dagiti baro a kangatuan a bilang dagiti agibumbunannag ken dagiti timmabuno iti Memorial.

Idiay Armenia, Eritrea, Republika ti Korea, Rwanda, ken Turkmenistan, naibalud dagiti kakabsat gapu iti pammatida. Nupay nairurumenda, ammoda ti Nainkasuratan a rason iti pannakasuotda, ket nakatulong daytoy kadakuada a mangsalimetmet iti kinatarnawda bayat a mangnamnamada iti panangisalakan ni Jehova.​—1 Ped. 1:6; 2 Ped. 2:9.

Bayat a basaem Dagiti Tampok ti Napalabas a Tawen ken amirisem ti 2004 a Sangalubongan a Report, maragsakankanto  iti kinaimbag ni Jehova. (Sal. 31:19; 65:11) Mangnamnamakami a maparegtaka iti daytoy a Tinawen a Libro nga agtultuloy a magna iti wagas a makaay-ayo iti Dios.​—1 Tes. 4:1.

Agtultuloy a maikagkagumaan ti panangidanon iti kinapudno iti amin a kita ti tattao. Kas pagarigan, adda dagiti naisagana a video, DVD, ken dadduma pay a material iti sign language ken publikasion iti Braille tapno matulongan iti naespirituan dagiti tuleng ken bulsek. Adu nga agibumbunannag iti Pagarian ti nagsursuro kadagiti lenguahe dagiti imigrante nga agnanaed iti teritoria ti kongregasionda.

Kanayonanna, nabuangay dagiti ginasut a naiputputong a grupo kadagiti narigat a madanon a teritoria. Iti maysa a sanga nga opisina, adda nasurok a 300 a naiputputong a grupo a buklen ti nasurok a 7,000 nga agibumbunannag. Talaga a daytoy ti mangipamatmat a dakkel ti posibilidad a mabuangayto ti adu a baro a kongregasion! Maysa pay, kadagiti 16,760,607 a timmabuno iti Memorial iti daytoy a tawen serbisio, nasurok a 10 a milion ti saan a Saksi. Daytoy ti mangipamatmat nga adu pay ti anien.

Agyamantayo ken Jehova gapu iti nabaknang a bendision ken naayat a panangaywanna kadatayo iti inaldaw. (Prov. 10:22; Mal. 3:10; 1 Ped. 5:7) Bayat nga umabantetayo a sangsangkamaysa iti daytoy “kamaudianan a paset dagiti aldaw,” mangnamnama ken agtalektayo ken ni Jehova. Aniaman dagiti parikut a mapasarantayo, ipapusotayo ti tekstotayo iti 2005: “Ti tulongko aggapu ken Jehova.” (Sal. 121:2) Mangnamnamakayo iti ayat ken karkararagmi maigapu kadakayo.

Dagiti kakabsatyo,

Bagi a Manarawidwid Dagiti Saksi ni Jehova