Dagiti Tampok iti Napalabas a Tawen

KADAGITI kallabes a tawen, kimmaro dagiti natural a didigra kadagiti adu a pagilian. Kasta met laeng ti napasamak iti 2005 a tawen serbisio. Siempre, naapektaran met dagiti kakabsattayo kadagiti kasta a trahedia. Ngem kas makitatayo, nagtignay dagiti kakabsat buyogen ti Nakristianuan nga ayat idi nakapasarda kadagiti pannubok, a nangpatibker iti panagkakabsat ken nangallukoy kadagiti napudno ti panagpuspusoda a tattao nga umawat iti kinapudno.​—Mal. 3:18; Juan 13:35.

Dagiti kumarkaro a didigra ad-adda met a pinagpanunotna a naimbag dagiti adu a tattao maipapan iti masanguanan ken no ania a talaga ti napateg iti biag. Gapuna, anian a pribilehiotayo a tulongan dagiti kasta a tattao a mangtarus iti kinapateg ti tiempo a  pagbibiagantayo babaen ti espesial a kampania a panagiwaras iti broshur nga Agtultuloyka nga Agbantay! Kadagiti adu a pagilian, nangrugi ti kampania idi Oktubre 18, 2004, ken adu ti nagsayaat a resultana.

Ti Kampania a Panagiwaras iti Agtultuloyka nga Agbantay!

Argentina: “No adda dumteng a didigra, siasino ti makalasat​—daydiay dakes a tao, daydiay naimbag, wenno daydiay mangipangag iti pakdaar?” Kasta ti epektibo a panangidatag ti maysa a kabsat a babai iti broshur nga Agbantay! iti teritoria nga adu ti di mangikankano.

Adda kabsat a lalaki nga agnagan iti Juan a nakaipaima iti broshur iti maysa a lalaki a 16 ti tawenna. Binasana dayta ken sigagagar nga imbagana ken ni tatangna no ania ti nasursurona. Gapu ta interesado ti ama a mangammo iti ad-adu pay, binasana ti broshur ken kinitana pay dagiti teksto. Inapresiarna unay ti nabasana isu nga inrugina nga adalen ti broshur a kadua ti pamiliana. Idi nagsubli ni Juan, intukonna iti lalaki ti libre a panagadal iti Biblia. “Dayta a talaga ti kasapulanmi​—ti panagadal iti Biblia kas pamilia,” insungbat ti lalaki. Nairugi ngarud ti panagadal iti Biblia.

France: Nangted ni Jocelyne iti kopia ti Agtultuloyka nga Agbantay! ken ni Alicia, maysa nga agkabannuag a babai a nakipagadal idin iti Biblia. Siraragsak nga inawatna ti broshur ken immanamong nga adalenda dayta ken ni Jocelyne. Inkeddeng pay ni Alicia a basaenna a regular ti Biblia. “Kalpasan laeng ti dua a lawas,” kuna ni Jocelyne, “imbagana a nakalua kadagiti salaysay iti Biblia maipapan iti biag ni Jesus.”

Imbaga ni Alicia iti nobiona a kayatna nga agkasarda tapno maay-ayona ti Dios ken kayatna ti agbalin a maysa kadagiti Saksi ni Jehova. Nasdaaw ta kinuna ti nobiona: “Sige. Dika kayat a lapdan a mangaramid iti pagayatan ti Dios.” Sipud idin, timmabunon ni Alicia iti umuna a gundaway iti asamblea sirkito.

Madagascar: Ni Nana ket ina ti dua nga ubbing a babbai. Idi agtutubo pay laeng, natabtabunuannan dagiti Nakristianuan a gimong a kadua dagiti dadakkelna ngem nagsardeng idi saanen nga  agserserbi ken ni Jehova dagiti nagannak kenkuana. Bayat ti espesial a kampania, inawat ni Nana ti broshur manipud iti maysa a misionera ken immanamong nga agadal iti Biblia. Ita, tabtabunuannan dagiti amin a gimong a kadua dagiti dua nga annakna ken ikagkagumaanna ti agbalin a di bautisado nga agibumbunannag. Maysa pay, immanamong met dagiti dadakkelna nga adalenda ti broshur. Ni Josia, ti 14 ti tawenna a kabsat ni Nana, iyad-adalanna pay ketdin ti gayyemna, a regular itan a tumabtabuno kadagiti Nakristianuan a gimong.

Nigeria: “Ti ipapatay ni nanangko, a napasamak idi panawen ti kampania, ti nangted kaniak iti gundaway a mangasaba kadagiti kapurokak,” kinuna ti maysa a payunir a kabsat a lalaki. “Sakbay ti pumpon, nagdungdung-aw ken nagpakpakleb iti daga dagiti kabagianmi. ‘Apay a kasta ti ar-aramidenyo?’ insaludsodko. ‘Nasakit para kadatayo amin ti ipapatay ni Nanang, ngem isu ket matmaturog ken patay. Agungarto met laeng.’ Nupay agsangsangitak met, inukagko ti broshur nga Agbantay! iti panid 8 ken inlawlawagko ti ladawan maipapan iti panagungar. Kas resultana, nakaipaimaak iti 195 a broshur, agraman ti 45 a broshur nga Agbantay! Iti pumpon, siak ken ti dadduma pay a kakabsat ket nakaipaima iti 100 a kopia ti Mayo 1, 2005 a Pagwanawanan, a nakaitampokan ti topiko nga ‘Agbiagto Pay Kadi Dagiti Natay?’”

Russia: Ni Irina, nga special pioneer idiay Zelenogradsk, insuratna: “Siak ken ti kabsat a kaduak intukonmi ti broshur nga Agbantay! iti maysa a babai nga agnagan iti Alla, a nangpastrek kadakami. Para ken Alla, awanen ti panggep ti biag gapu ta bimmaton ti puso dagiti tattao. Inyurnosmi a sarungkaran. Kalpasan ti sumagmamano nga aldaw, bayat a magmagnaak a kaduak ti isu met laeng a kabsat, adda nangngegmi a babai a mangpukpukkaw kadakami. Isu dayta ni Alla. Nagyaman kadakami gapu iti broshur, sa inruarna dayta manipud iti bagna, ken impakitana kadakami dagiti punto nga inugedanna. Ita, tagtagiragsakennan ti regular a panagadal iti broshur a Kalikaguman.”

Iti maysa a lugar idiay Russia, ni Vera ken ti asawana a ni Vitaliy, nagsardengda iti maysa a kiosko nga adda iti igid ti kalsada,  a pagtartrabahuan ni Lyuda, nga am-ammo ni Vera. Imbaga idin ni Lyuda a saanna a kayat ti makisarita kadagiti Saksi maipapan iti Biblia, isu a bumdeng ni Vera a mangitukon iti broshur. Ngem gapu iti panangpatibker kenkuana ni Vitaliy, intukonna dayta, ket nasdaaw ta naipaimana ti broshur. Immawag ni Lyuda kalpasan ti dua nga aldaw. “No adu ti nasursurok iti maysa a broshur,” kinunana, “ad-adu pay ti masursurok iti regular a panagadal iti Biblia!” Iti laksid ti ibubusor dagiti kabagianna, dagus nga inrugi ni Lyuda ti agadal iti Biblia ken tumabuno kadagiti gimong. Agad-adal met iti Biblia ti anakna a lalaki ken babai. “Sumagmamano a tawen sakbayna, naikkan ni Lyuda iti libro a Pannakaammo ngem saan a naginteres,” kinuna ni Vera. “Nupay kasta, makaparagsak ta natukay ti interesna iti broshur nga Agbantay!”

Venezuela: Ti asawa ti manangaywan iti sirkito kasarsaritana iti ruangan ti maysa a lalaki, ti asawana, ken dagiti uppat nga annakda. Impakita ti kabsat ti buya ti Paraiso iti panid 16 ken 17 ti broshur nga Agbantay! tapno maipaganetgetna no kasano kapateg ti panangammo ti amin a kameng ti pamilia ti maipapan iti Dios. Kalpasanna, inawisna ida nga innem a tumabuno iti gimong iti rabii ti Huebes ken imbagana a sabtenna ida iti asideg a pagsardengan ti bus. Napan ti kabsat ken ti asawana iti pagsardengan ti bus iti napagnunummuanda nga oras, ngem awan ti naurayda. Saanda nga ammo a nasapsapa a nakalugan ti pamilia ken addadan iti Kingdom Hall! Ita, tagtagiragsakenen ti lima a kameng daytoy a pamilia ti regular a panagadal iti Biblia ken ti itatabuno kadagiti gimong, nupay napaut ti biahe ken nangina ti pleteda.

Nagtuktok ti kabsat a babai a payunir iti maysa a balay, ngem awan ti nangilukat iti ridaw. Idi nagsubli kalpasan ti sumagmamano nga oras, adda nakasaritana a lakay a karuruarna laeng iti balay. Inlawlawag ti lakay nga isu ket adda tultulengna ken saanna a mangngeg no adda agtuktuktok wenno, nakabumbuntog ngamin ta uray la a nakapanawen ti agtuktuktok sakbay a mailukatna ti ridaw. Nangted ti kabsat iti broshur nga Agbantay! ken inawisna ti lakay a tumabuno iti gimong ti kongregasion.

Kabayatan ti gimong, ti kabsat insalaysayna ti kapadasanna, ngem saanna nga ammo a timmabuno gayam ti lakay! Isu ket  regular itan nga iyad-adalan iti Biblia ti maysa a kabsat a lalaki, tumabtabunon kadagiti amin a gimong, ken inyebkasnan ti tarigagayna a mangikasaba iti naimbag a damag. Idi napagsaludsodan no apay a timmabuno idi iti gimong, impakitana ti kopiana nga Agtultuloyka nga Agbantay! ken kinunana, “Gapu iti daytoy a broshur!”

Panagipatarus iti Biblia

Sipud idi ngudo ti dekada 1800, gimmatangen ti organisasion ni Jehova iti nakaad-adu a Biblia ken inwarasda dagita kadagiti interesado, a no dadduma nalaklaka iti 35 porsiento ti bayadna no idilig iti talaga a presiona. Nangrugi idi 1926, nangyimprenta ken nangdaiten dagiti kakabsat iti sumagmamano a Biblia iti bukodda a pagimprentaan. Karaman ditoy ti The Emphatic Diaglott ken ti King James ken American Standard a patarus. Kalpasanna idi 1961, nairuar ti maymaysa a tomo ti Baro a Lubong a Patarus ti Nasantuan a Kasuratan iti Ingles.

Komusta met dagiti dadduma pay a pagsasao? Idi rugrugi ti maika-20 a siglo, inrugin dagiti sanga ti gumatang kadagiti patarus iti Biblia manipud kadagiti nadumaduma a pagipablaakan ken inwarasda dagita iti isu met laeng a presio a pananggatangda. Dadduma kadagitoy a Biblia ti pinataud dagiti napasnek a managipatarus, nga inusarda pay ti nagan ti Dios​—a Jehova​—iti bukodda a pagsasao. Ngem idi agangay kaaduan a managipatarus ti nangikkat iti nagan ti Dios kadagiti patarusda. Ita, adda pay ketdin dagiti nangikkat iti nagan ti Dios ken sinuktanda dayta iti nagan ti didiosen iti lugarda! Kas pagarigan, ti Biblia a Chichewa a maawagan iti Buku Loyera, a maus-usar idiay Malawi, Mozambique, ken Zambia, impatarusna ti Tetragrammaton kas “Chauta,” a nagan ti didiosen iti tribu a ti kaipapananna ket “Katan-okan a Pumapana.”

Adu pay ti sinukatanda. Kas pagarigan, ti Africano a patarus tinukoyna ni Lucas kas manggagamud. Ti Biblia a Tuvalu binalbaliwanna ti orihinal a teksto iti Judas 23 a kunana: “Mangipakitayo iti nasged nga ayat kadagiti sodomita; agannadkayo laeng ta dikay agbalin a sodomia.” Ngem iti orihinal a teksto, awan ti nadakamat a sodomita wenno sodomia!

 Dagiti Bible society idi ti kangrunaan nga agpatpataud ken agiwarwaras kadagiti Biblia. Ngem kadagiti kallabes a tiempo, adda dagiti Bible society a nangipalubos kadagiti relihion ti Kakristianuan nga agimprenta ken agiwaras. Malaksid iti nangina a panangilakoda iti Biblia, dagiti relihion iti dadduma a pagilian saanda a kayat nga ilako dagiti Bibliada kadagiti Saksi ni Jehova. Kas pagarigan, idiay Kyrgyzstan, adda Protestante a relihion nga addaan iti karbengan a mangimprenta ken mangiwaras iti Kristiano a Griego a Kasuratan iti pagsasao a moderno a Kirghiz. No gumatang dagiti kakabsat iti maysa a kopia, masansan a mapagsaludsodanda, “Maysaka kadi a Saksi ni Jehova?” wenno “Ammom kadi ti nagan ti Dios?” No wen ti sungbatda, saanda a makagatang.

Gapu kadagitoy ken ti dadduma pay a rason, imbilin ti Bagi a Manarawidwid a maipangpangruna ti panagipatarus iti Biblia. Ti kompleto a Baro a Lubong a Patarus ket magun-odan itan iti 35 a pagsasao, ken ti Baro a Lubong a Patarus ti Kristiano a Griego a Kasuratan, iti 55 a pagsasao. Iti agdama, kadagiti 33 a grupo nga agipatpatarus iti Biblia iti intero a lubong, 19 kadakuada ti mangipatpatarus iti Hebreo a Kasuratan, 11 iti Kristiano a Griego a Kasuratan, ken 3 iti Reference Bible. Gagangay a tallo agingga iti innem a tao ti mangbukel iti maysa a grupo nga agipatarus iti Biblia. Babaen ti tulong ti computerized translation tools ken ti napasayaat a pamay-an ti panagipatarus, ti dadduma a grupo nakompletoda ti Kristiano a Griego a Kasuratan iti awan pay dua a tawen.

Ania ti narikna dagiti kakabsat idi naawatda ti Baro a Lubong a Patarus iti bukodda a pagsasao? Ti payunir idiay Albania itakderanna ti rikna ti adu. “Nakaluaak,” kinunana. “Pulos a diak pay nakarikna iti kastoy no agbasbasaak iti Sao ti Dios. Kayatko nga ipapuso ti tunggal bersikulo!”

Dagiti Kaso iti Korte

Armenia: Kalpasan ti 15 nga aplikasion, nairehistro met laengen dagiti Saksi ni Jehova idi Oktubre 8, 2004. Nupay kasta, agtultuloy ti pannakaibalud dagiti agtutubo a kakabsat a lallaki gapu ta saan nga ipalubos ti konsiensiada nga agsoldadoda. (Isa. 2:4) Agtultuloy nga inanamaenmi a daytoy a pannakairehistro ti  mangtedto kadagiti kakabsat iti narelihiosuan a wayawaya, a mangipalubos kadakuada nga umawat kadagiti literatura manipud kadagiti sabali a pagilian ken mangangay kadagiti kombension. Kinapudnona, idi Hunio 2005, dagiti literatura a damo a naipatulod idiay Armenia ket pinalubosan ti aduana ken naited kadagiti kakabsat.

Austria: Iti unos ti nasurok a 30 a tawen, nakidangdangadang iti korte dagiti Saksi ni Jehova maipaay iti naan-anay a pannakabigbig ti relihionda. Gapu iti daytoy a parikut, nangtedda iti lima nga aplikasion iti European Court of Human Rights. Idi Pebrero 1, 2005, inkeddeng ti Korte nga adalenda ti dua a kaso mainaig kadagiti kakabsat a lallaki a saan a nailaksid iti panagsoldado uray ministroda gapu ta ti Saksi ni Jehova ket saan a mabigbigbig kas relihion. Idi Hulio 5, immanamong ti Korte nga usigenna ti aplikasion, nupay saanna nga inlawlawag no kasano a mataming dayta.

Eritrea: Idi Enero 24, 2004, dagiti autoridad inarestoda dagiti 38 a lallaki, babbai, ken ub-ubbing a naitimpuyog iti Kongregasion ti Saba idiay Asmara. Innem ti tawen ti kaubingan ken 94 ti kalakayan. Saan a bautisado ti dadduma kadakuada. Kalpasan ti tallo a rabii a kaaddada iti pagbaludan, nawayawayaan dagiti kaubingan kadakuada. Dagiti nabati a 28 ket nayakar iti pagbaludan nga adda iti ruar ti Asmara ken naipupokda kadagiti metal a pagkargaan kadagiti maibiahe a bambanag a maisarang iti pudot ti aldaw ken lamiis iti rabii. Idi Setiembre 2, 2004​—kalpasan ti nasurok a pito a bulan​—nawayawayaan ti dua a kalakayan a kakabsat, nga agtawen iti 94 ken 87. Simmaruno met a nawayawayaan dagiti dadduma. Ngem adda pay laeng innem a nabati, agraman ti 16 a dadduma pay a kakabsat, a 3 kadakuada ti 11 a tawenen a nakabalud. Pangngaasiyo ta laglagipenyo nga iraman kadagiti kararagyo dagitoy a patpatgen a kakabsat.​—Ara. 12:5.

France: Kas naipadamag iti 2001 Tinawen a Libro, dagiti agtuturay pinatawanda iti baro a buis dagiti donasion dagiti kakabsat. Bayadanda pay ti buisda iti uppat a tawen manipud 1993 agingga iti 1996. Nanginngina amin dagitoy iti 60 porsiento, malaksid pay kadagiti multada! Nagapelar dagiti kakabsat ngem naabakda iti nababbaba a korte ken iti korte suprema. Idi Pebrero 25, 2005, nangisubmitirda  iti aplikasion iti European Court of Human Rights, a nagapelarda maibatay iti nabatad a pannakaidumduma ti relihionda.

Republic of Georgia: Manmano laengen dagiti naranggas a pannakaidadanes. Mabalin itan ti agipatulod sadiay kadagiti literaturatayo, ken saanen a marirriribuk dagiti Nakristianuan a panagtataripnong. Kaskasdi, adu kadagiti panangabuso iti napalabas ti saan pay laeng a narisut kadagiti korte. Adda uppat nga aplikasion dagiti kakabsat maibusor iti Georgia nga agur-uray iti pannakadengngegna idiay European Court of Human Rights. Mainaig dagitoy iti naranggas a pannakaidadanes a napasaran dagiti kakabsattayo, ti pannakaiserra dagiti legal a korporasiontayo, ken ti saan nga itutulong ti korte tapno marisut dagitoy a bambanag. Idi Hulio 6, 2004, immanamong ti Korte a mangusig iti kaso ti Gldani Congregation of Jehovah’s Witnesses kontra iti Georgia.

Alemania: Idi nagkaykaysa manen ti pagilian, inkagumaan dagiti kakabsat a pagbalinen a legal ti Religious Association of Jehovah’s Witnesses ken irehistro iti publiko kas maysa a korporasion nga addaan kadagiti karbengan a mayannurot iti linteg ti publiko. Dayta ti nangrugian ti 12 a tawen a pannakidangadang iti korte. Positibo ti desision ti Federal Constitutional Court idi 2000. Linaksidna ti kapanunotan a ti Estado mabalinna a kiddawen ti kinasungdo dagiti Saksi ni Jehova a maikontra iti Nakristianuan a konsiensiada. Narisut dagiti bambanag kadagiti simmaganad a pannakadengngeg ti kaso. Idi Marso 24, 2005, ti Higher Administrative Court of Berlin binilinna ti State of Berlin nga ikkanna dagiti Saksi ni Jehova kadagiti karbengan ti maysa a korporasion nga adda iti sidong ti linteg ti publiko. Adda gandat ti Estado nga agapelar mainaig iti daytoy a desision.

Russia: Kas naipadamag iti 2005 Tinawen a Libro, ti Golovinsky Intermunicipal District Court inkeddengna idi Marso 26, 2004 ti pannakaiparit dagiti amin nga aktibidadtayo idiay Moscow. Sipud idin, addan dagiti parikut mainaig iti panangala kadagiti kontrata iti panangabang kadagiti pasdek a pakaangayan dagiti gimong ti kongregasion ken dagiti daddadakkel a taripnong. Nupay kasta,  addaan dagiti kakabsat iti bukodda a Kingdom Hall complex nga adda lima nga auditoriumna, a pagsisinnublatan ti 44 a kongregasion ken 2 a grupo. Nupay dakkel ti magastos ken narigat, 17 a kongregasion idiay Moscow ti nagtataripnong iti ruar ti siudad, bayat a 31 a kongregasion ti nangikondukta kadagiti dadduma wenno kadagiti amin a gimongda kadagiti babassit a grupo kadagiti pribado nga apartment. Adda sumagmamano a gundaway a nangriribuk dagiti polis, ngem awan ti naaresto. Nayapelar iti korte ti nayetnag a pannakaiparit idi Marso 26.

Idi Setiembre 9, 2004, nadengngeg idiay European Court of Human Rights ti kaso a Kuznetsov and Others kontra iti Russian Federation. Idi Oktubre 4, immanamong ti Korte a mangusig iti kaso. Mainaig daytoy iti maysa nga opisial a nangibaon kadagiti polis a mangriribuk iti panagtataripnong ti sign-language a kongregasion idiay Chelyabinsk idi Abril 2000. Nagbalin a komplikado ti kaso gapu ta madlaw nga adda dasdasigan ti korte bayat ti immuna a pannakadengngegna. Ur-urayenmi ti desision.

Turkmenistan: Nasentensiaan iti 18 a bulan a pannakaibalud ti tallo a kakabsat a da Mansur Masharipov, Atamurat Suvkhanov, ken ni Vepa Tuvakov gapu iti panagkedkedda nga agsoldado ta saan ngamin nga ipalubos ti konsiensiada. Ti maikapat, a ni Begench Shakhmuradov, ket nasentensiaan iti makatawen a pannakaibalud. Idi Pebrero 16, 2005, adda naipatulod a surat manipud kadagiti opisina dagiti Saksi ni Jehova a mangas-asikaso kadagiti legal a bambanag para iti embahada ti Turkmenistan idiay Washington, D. C., a kidkiddawenna ti awan kondisionna a pannakawayawaya dagitoy nga uppat a kakabsat. Idi Abril 16, nawayawayaanda amin gapu iti espesial nga amnestia nga impaay ti presidente ti Turkmenistan. Bayat ti tawen, adu a kakabsat ti inaresto ken pinalutpot dagiti polis. Adda gandatda a mangpilit kadakuada a mangtallikud iti pammatida, ngem saanda a nagballigi.

Tawen Dagiti Natural a Didigra

Kadagiti dadduma a pagilian, nangipaay ti tawen 2004 kadagiti baro a rekord dagiti natural a didigra. Kasano a naapektaran dagiti kakabsattayo kadagiti kastoy a trahedia?

 Carriacou, Grenada, ken Petite Martinique: Idi Setiembre 7, 2004, dinupar ti Bagio nga Ivan dagitoy nga isla, a pinerdi wenno dinadaelna ti nasurok a 90 porsiento a pagtaengan. Makapakellaat ta ti kaadu dagiti napukaw gapu iti nasaknap a panagtakaw ket kas met laeng iti kaadu ti dinadael a mismo ti bagio! Adu a sanikua ti napukaw dagiti kakabsat gapu iti didigra, ken nakaro ti pannakadadael ti dua kadagiti innem a Kingdom Hall idiay Grenada. Awan kadagiti Saksi ti nakaro a nadangran.

Ti sanga ti Barbados, a mangas-asikaso kadagitoy nga isla, binalakadanda idi dagiti kongregasion a mangyurnosda iti paset iti Gimong ti Serbisio maipapan iti panagsagana iti panawen ti bagio, nupay ti naudi a panangdidigra ti bagio iti dayta a rehion ket idi 1955. “Apay a dagiti bagio ti pagsasaritaantayo idinto ta adda met dagiti napatpateg a bambanag a pakaseknantayo?” insaludsod ti maysa a kabsat a babai idiay Grenada. Nupay kasta, idi dimteng ti bagio nga Ivan, inkeddengna a pulos a saannanton a kueskuestionaran dagiti urnos ti organisasion! Dagus a nangbuangay ti sanga iti komite a mangsaranay kadagiti nadidigra, ken timmulong met dagiti sanga ti Guyana ken Trinidad. Adda ginasut a kakabsat a taga-Caribbean ken Estados Unidos a timmulong iti panagibangon manen.

Jamaica ken ti Cayman Islands: Saan a nadangran dagiti kakabsat iti bagio nga Ivan, ngem adu kadakuada ti napukawan kadagiti material a sanikua. Apaman a simmayaat ti paniempo, dagiti panglakayen iti 199 a kongregasion kadagiti isla sinapulda dagiti amin nga agibumbunannag. “Talaga a maseknankayo iti tunggal maysa,” kinuna ti maysa nga agpalpaliiw.

Haiti: Idi ngalay ti Setiembre, ti Bagio a Jeanne dinuparna ti makin-amianan a Haiti, a nagbanag iti makadidigra a layus a nanglapunos iti ili nga adda iti kosta ti Gonaïves ken kadagiti kabangibang a lugar. Nagkamang dagiti tattao kadagiti tuktok ti balay ngem pagattumeng latta ti kaadalem ti danum! “Agpatnag a nakangngegkami kadagiti marmarpuog a balay ken agririaw a tattao,” kuna ti maysa a kabsat a lalaki. Adda agarup 2,900 a natay, agraman ti 83 ti tawenna a baket a kabsat.

 Kuna ti maysa a kabsat a lalaki, “Agyamanak ken ni Jehova ta nakalasatkami a sangapamiliaan nupay pinanawanmi dagiti sanikuami.” Kalpasan ti sumagmamano nga aldaw, nangyeg kadagiti taraon ken danum dagiti Saksi manipud kadagiti kabangibang nga ili. Nagiwaras met ti sanga iti sangatrak a suplay. Malaksid iti panagdalus, iti ngudo ti lawas nakatabuno man aminen dagiti kakabsat kadagiti Nakristianuan a gimong ken nakiramanda iti panangasaba. “Uppat a pulo a boluntario ti nangtarimaan iti balayko iti uneg ti uppat nga aldaw,” kuna ti maysa a kabsat a babai. “Pininturaanda pay dayta! Dagitoy amin ti nangtukay iti puso dagiti kameng ti pamiliak a saan a Saksi. Sipud idin, nakipagadalen ti maysa kadakuada.”

Estados Unidos: Bayat ti Agosto ken Setiembre 2004, ti estado ti Florida ket dinupar ti uppat a bagio: Charley, Frances, Ivan, ken Jeanne. a Nadadael ti nasurok nga 4,300 a pagtaengan dagiti kakabsat ken di kumurang a sangapulo a Kingdom Hall. Kalpasan ti bagio, ti tserman ti Emergency Operations Committee (EOC) idiay Florida sinukimatna dagiti suplay ti EOC tapno masigurado nga umiso ti pannakausarda. Kinunana nga awanen ti sabali a grupo nga umarngi kadagiti Saksi ni Jehova no iti kinasayaat ti pannakaorganisarna. Imbagana iti komite a mangsaranay kadagiti nadidigra a mabalinda ti maaddaan iti aniaman a suplay a kasapulanda.

Adda maysa a kongregasion a temporario a mangus-usar iti maysa a patakder nga ab-abanganda iti $50 tunggal gimongda. Ngem nadadael met dayta a patakder idi dimmupar ti immuna a bagio. Adda dagiti natangdanan a trabahador a mangtarimaan ngem saanda a nalpas ti trabaho. Nagboluntario dagiti kakabsat nga isuda laengen ti mangtarimaan. Immanamong dagiti makinkukua iti patakder ket dagus a nairingpas ti trabaho. Kas subad, saan a pinabayadan dagiti makinkukua ti tallo bulan nga abang dagiti kakabsat.

Japan: “Ti bilang dagiti bagio a dimmupar iti Japan [idi 2004] ti kangatuan pay laeng sipud idi nangrugi ti Japan a mangidulin kadagiti  rekord idi 1551,” kuna ti maysa a damag. Kadagiti distrito ti Niigata ken Fukui, nadadael ti nasurok a 34,000 a pagtaengan ken dadduma pay a patakder, agraman ti maysa a Kingdom Hall ken 60 a pagtaengan dagiti kakabsat gapu iti nakaro a kasasaad ti paniempo idi Hulio. Ginasut a Saksi manipud kadagiti kabangibang a kongregasion ti dagus a timmulong. Iti uneg ti dua a lawas, naibangon manen ti Kingdom Hall.

Timmulong met dagiti kakabsat a mangdalus ken mangdis-impekta kadagiti pagtaengan dagiti saan a Saksi nga adda iti asideg ti Kingdom Hall. Nakalua buyogen ti panagyaman ti maysa a lalaki a dati a bumusbusor iti mensahe ti Pagarian. Nangipatulod pay ketdi ti lokal a gobierno iti surat ti panagyaman iti komite a mangsaranay kadagiti nadidigra kas panangbigbig kadagiti panagregget dagiti kakabsat.

Idi a ti Japan ket dinupar ti dua a bagio idi Setiembre ken Oktubre, naglayus ken nagreggaay ti daga a nakaigapuan ti ipapatay ti maysa a kabsat a lalaki ken maysa a kabsat a babai ken nangted kadagiti pakarigatan dagiti agarup 100 a dadduma pay a Saksi. Nalayus ti Siudad a Toyooka idiay Distrito ti Hyogo. Timmulong ti manangaywan iti sirkito a nangorganisar iti trabaho a panangsaranay uray nalayus dagiti bukodna a pagdagusan.

Idi naabbatanen ti nasurok a maysa a metro ti kaadalemna a napitak a danum iti apartment ti maysa a kabsat a babai a payunir, dinalusan dayta dagiti lumugar a kakabsat. Natukay unay ti puso ti saan a Saksi a makinkukua iti dayta. Kinuna ti kabsat a babai: “Nadamdamagkon ti panangsaranay nga ar-aramiden ti organisasion ni Jehova, ngem iti daytoy a gundaway personal a napadasak dayta. Ipagpannakkelko unay ti Diostayo, a ni Jehova, ken ti organisasionna.”

Maysa pay, idi Oktubre, adda napasamak a nakaro a ginggined idiay makin-amianan a Japan, a nakatayan iti 40 ken nakaigapuan ti inkapilitan nga ipapanaw ti nasurok a 100,000 kadagiti pagtaenganda. Awan ti kabsat a nadangran wenno napapatay, nupay nasurok a 200 a pamilia ti naapektaran ken adda maysa a Kingdom Hall a saanen a mausar. Napasamak ti ginggined bayat  ti panagtataripnong dagiti panglakayen iti sirkito kas panagsagana para iti asamblea sirkito. Ania ti inaramidda? Maitunos iti instruksion ti sanga nga opisina ken ti Regional Building Committee iti lugarda, dagus nga inorganisarda ti panangsaranay. “Naipalagip kadakami a masapul a maaddaankami iti naespirituan a panangmatmat maipapan kadagitoy a pasamak,” kuna ti maysa a panglakayen. Naangay ti asamblea sirkito, ken timmabuno uray dagidiay naapektaran iti ginggined.

“Natukay ti puso ni lakayko gapu iti ginggined,” insalaysay ti maysa a kabsat a babai nga addaan iti saan a Saksi nga asawa ken nadadael ti pagtaenganna. Idi nakitana ti panagtignay ti Nakristianuan nga ayat bayat ti trabaho a panangsaranay, timmabuno ti asawa a lalaki iti gimong ti kongregasion iti umuna a gundaway iti unos ti panagbiagna. “Naan-anay nga agtalekak iti organisasionyo,” kinunana. “Pulos a saannakami a pinaay.”

Pilipinas: Iti maudi a paset ti 2004, dinupar ti bagio dagiti probinsia ti Quezon ken Aurora. Natay ti maysa a pamilia a Saksi, agraman ti uppat nga annakda idi nalapunos ti pagtaenganda iti danum ken lan-ak. Adda idiay Quezon ti manangaywan iti sirkito, a  ni Felimon Maristela idi napasamak ti layus. “Nagbiit a natinep ti Kingdom Hall,” insuratna, “ken nayanud ti luganko. Dakami ken ni baketko agraman ti dua pay a kakabsat pinalabasmi ti rabii iti atep ti Kingdom Hall, a dimmanon ti danum agingga iti sagumaymayna. Iti 3:00 ti malem iti sumuno nga aldaw, bimmabaak. Pagabbarukong pay laeng ti danum.”

Iti laksid dagiti peggad, binirok ni Kabsat Maristela dagiti agibumbunannag tapno makitana no natalgedda. Idiay Dingalan, Aurora, adda maysa a panglakayen a mabalin koma nga aglugan iti helikopter tapno makapanaw iti dayta a lugar, ngem kinaykayatna ti agtalinaed tapno matulonganna dagiti Kristiano a kakabsatna.

Ti Kadawelan Pay Laeng a Tsunami

Idi Disiembre 26, 2004, adda napasamak a ginggined a 9.0 ti kapigsana iti laeng asideg ti makinlaud a kosta ti makin-amianan a Sumatra, Indonesia, a nakaigapuan ti kadawelan pay laeng a tsunami iti historia. Sigun kadagiti pattapatta, nasurok a 280,000 ti natay ken mapukpukaw! Uray idiay Somalia, Africa, nga adda iti makinlaud a deppaar ti taaw Indiano, agarup 290 ti natay gapu kadagiti dalluyon.

Indonesia: Nupay daytoy a pagilian ti kaaduan iti bilang dagiti natay, awan ti natay a Saksi wenno interesado a tao. Gapu kadagiti immun-una a napasamak a kinaranggas, adu a Saksi ti pimmanaw idiay Aceh​—ti naapektaran unay a lugar​—ken napanda iti nasulinek a paset ti pagilian. Naapektaran met iti kasta unay ti isla ti Nias, ngem nakapagkamang dagiti kakabsat iti natalged a lugar.

India: Awan ti natay a kakabsat, nupay adu ti napukawan kadagiti pagtaengan ken dadduma pay a sanikua. Idiay siudad ti Pondicherry, mangaskasaba idi ni Lakshmi idi nadamagna ti maipapan iti tsunami. Idi nagawid iti balayna a naaramid iti pitak ken adda iti nasulinek a lugar a tallo kilometro ti kaadayona, nakitana a kasta unay ti pannakadadaelna. Timmulong dagiti kakabsat a mangdalus ken mangtarimaan iti dayta.

Idiay Madras, ti 13 ti tawenna a ni Naveen ket agay-ayam iti cricket idi nakitana dagiti nagdadakkel a dalluyon. Imbagana  daytoy kada nanang ken manangna sa nagkamangda iti natalged a lugar. Kaskasdi, kasapulan a subaenda ti napegges a dalluyon a nangkamakam kadakuada nga addaan kadagiti tumtumpaw nga alikamen ti balay ken bangkay.

Ti pito ti tawenna a ni Lini ket kaduana ti uliteg ken ti kasinsinna iti baybay nga asideg idiay Kanniyākumāri idi isu ket inyanud dagiti dalluyon agingga a naisalat iti alad a kayo. Agtultuloy ti panagsabuag ti danum kenkuana. Nakalasat ti uliteg ken ti kasinsinna, ngem nayanud ti antipara ni ulitegna isu a saan unay a makakita. Kaskasdi, intultuloyna a binirok ni Lini. Di nagbayag, naalawna met laeng ni Lini gapu ta nangngegna ti panagpukkaw ni Lini nga umar-araraw ken ni Jehova iti baet dagiti agsasaruno a dalluyon. Ita, isarsaritan ni Lini kadagiti isuamin a dinengngeg ni Jehova dagiti ararawna.

Andaman ken Nicobar Islands: Ni Mary ken ti walo ti tawenna nga anakna a lalaki, a ni Alwyn, ket simmarungkarda kadagiti kabagianda idi a nagginggined. Nagtatarayda amin a rimmuar. Nakita ni Mary dagiti kasla pader a dalluyon iti baybay. Apag-isu nga adda simmangpet a bus. Nagluganda nga agina tapno makapanawda. Nupay kasta, adda dagiti nagsubli kadagiti pagtaenganda tapno alaenda dagiti sanikuada ngem nayanudda. Saanda pay laeng a nakaad-adayo iti panagdaliasatda, nagginggined manen isu a dimsaag dagiti amin a nakalugan iti bus ken nagkamangda iti nangato a lugar a nagdadarisonan ti agarup 500 a tattao. Naimatanganda dagiti dalluyon a nangyanud iti bus ken immabut pay ti danum agingga iti pagtaktakderan dagiti tattao nga uray la kagudua pay a metro ti kaadalemna.

Idi immes-es ti danum, nagawid a dagus ni Mary. Nabirokanna ti Bibliana ken ti bokleta a Panangsukimat Kadagiti Kasuratan iti Inaldaw, nga isu ti gubuayan ti bilegna kadagiti simmaruno nga al-aldaw. Idi naipadamag nga adda dagiti bapor a mangipanaw kadagiti tattao manipud iti isla, ginasut a tattao ti napan iti igid ti baybay ken timmapugda ta agur-urayda iti sumanglad a bapor. No mano nga oras iti tunggal aldaw nga agur-uray ni Mary ken ti anakna iti pagassiket a danum, a napalikmutanda kadagiti tumtumpaw  a bangkay. Innem nga aldaw kalpasan ti tsunami, adda met laengen ti bapor a nangipanaw kadakuada. Yantangay adu ti mangpabpabasol iti Dios gapu iti trahedia, nakaipaay ni Mary iti nasayaat a panangsaksi. Kinapudnona, ti ipagna ket agad-adal itan iti Biblia ken tumabtabunon kadagiti Nakristianuan a gimong.

Ni Prasanthi ken ti anakna a lalaki a lima ti tawenna, a ni Jehoash, napanda idiay Hut Bay tapno sarungkaranda ti lakayen a tatangna, ni Kabsat Prasad Rao. Nariknada ti ginggined bayat nga addada sadiay, nakitada dagiti dalluyon, isu a nagkamangda iti nangatngato a lugar. Lima a metro ti kaadalem ti danum iti kalsada ken natinep ti balay ni Prasad. Nayanud dagiti katre, reprihiradora, ken telebisionna, agraman dagiti libro a Katan-okan a Tao a suplay ti kongregasion. Di nagbayag, dagiti nakalasat nakitada ti sumagmamano kadagiti libro ken binasada dagita. Iti uneg ti lima nga aldaw, nangan da Prasad, Prasanthi, ken Jehoash kadagiti tedtedda a taraon, ken inanduranda dagiti rineprep a lamok ken ngilaw. Idi simmangpet dagiti bapor, binallasiw da Prasanthi ken Jehoash, agraman dagiti adu a dadduma pay, ti pagabbarukong a danum nga agturong kadagiti mangispal kadakuada, uray no adu a buaya ti aglalangoy iti asideg! Innem a bulan idin a masikog ni Prasanthi. Di nagbayag, nakikabbalayen kadakuada ni tatangna.

Nayanud amin a balay idiay Teressa Island. Dagiti 13 a kakabsat sadiay binusbosda ti innem nga aldaw iti kabakiran, nga inibturanda ti bisin ken kagat dagiti insekto sakbay a nayakarda idiay Camorta Island. Nakipagnaedda sadiay ken ni Mark Paul, maysa a kabsat nga agnanaed iti nangato a lugar ken maus-usar ti balayna kas Kingdom Hall. Idi aldaw a napasamak ti tsunami, 300 ti timmabuno iti gimong ti kongregasion imbes a ti laeng gagangay a 10 agingga iti 12! Sipud idin, addan ti 18 a kabbaro a mayad-adalan iti Biblia a regular a tumabtabuno kadagiti gimong, ta nakitada ti naayat a pannaranay nga ipapaay dagiti adipen ni Jehova iti maysa ken maysa.

Sri Lanka: Nalapunos iti dalluyon ti dua a kakatlo ti kosta iti daytoy nga isla, isu a nakaad-adu ti nadadael. Napasamak ti tsunami iti bigat ti Domingo. Kaaduan a kakabsat ket tumabtabuno  kadagiti gimong ti kongregasion kadagiti lugar a saan a nadanon ti tsunami. Sangapulo a kongregasion ti naapektaran, ken adda natay a maysa a kabsat a babai gapu ta ginuyod ti dalluyon ti balayna. Nagladingit iti kasta unay dagiti kakabsat gapu iti ipapatay daytoy a nagsayaat a kabsat. Adda met sumagmamano nga interesado a natay, ken adu a kakabsat ti napukawan kadagiti kakabagian. Adda maysa a panglakayen a natay ti 27 a kameng ti pamiliana! Nupay kasta, “nakalung-aw ken nadaeran dagiti kakabsat daytoy a trahedia, a dida ‘kimmapuy’ iti naespirituan,” insurat ti sanga.

Ti Bethel ket aglaplapusanan kadagiti suplay a pangsaranay, ken kaaduan a kameng ti pamilia ti bethel ti timmulong iti trabaho a panangsaranay. Dagiti kakabsat iti dayta a lugar nga addaan kadagiti lugan impanda dagiti suplay kadagiti lugar a nadidigra. Iti uneg ti uppat nga aldaw, nabirokanda dagiti amin a kakabsat ken naikkanda kadagiti taraon ken kawes. Idi napagsaludsodanda no ania pay ti kasapulanda, insungbatda: “Dagiti Biblia ken libro! Nayanud ngamin dagiti kopiami.” Naited a dagus dagiti kasapulanda.

Iti dayta a tiempo, adda idiay Colombo ti manangaywan iti sirkito a ni Gerrad Cooke. Pito nga oras a nagmaneho iti kalsada a delikado no nasipngeten gapu kadagiti atap nga elepante. Idi nakasangpet iti 10:30 ti rabii, isu ken ti maysa a kabsat iti dayta a lugar​—a ti balayna ket natinep iti danum—​dagus a sinarungkaranda dagiti pamilia ken nagiwarasda kadagiti suplay agingga iti parbangon.

 Thailand: Awan ti kakabsat iti dayta a lugar a nadangran wenno natay, ken awan ti napukawan iti pagsapulan. Ngem adda dagiti ganggannaet a bakasionista a mapukpukaw ken naipagarupen a natay. Karaman kadakuada ti maysa a kabsat a lalaki a taga-Finland, maysa nga agassawa a taga-Sweden, maysa a kabsat a lalaki a taga-Austria, ken ti di manamati nga asawa ti maysa a kabsat a babai. Adda dua a pagassawaan a taga-Sweden a nakiraman iti grupo a panangasaba iti lugar nga adayo iti kosta. Idi nagsublida iti pagdagdagusanda a hotel, awan ti nakitada no di dagiti bangkay ken ti nadadael nga aglawlaw.

Iti bigat ti Lunes kalpasan ti ginggined, ti mamangulo a manangaywan iti Phuket a Kongregasion adda naawatna nga awag iti telepono manipud iti sanga ti Thailand, a mangipakpakaammo kenkuana a ti kabsat a babai a taga-Finland, a ni Kristina, ket adda iti ospital a 90 minuto ti kaadayona. Dagus a napan iti ospital a kaduana ti sabali pay a kabsat. Insurat ti mamangulo a manangaywan: “Iti unos ti panagbiagko, pulos a diak pay nakakita iti kasta unay a rigat​—tattao nga awan dagiti assawada, nagannak nga awan dagiti annakda, annak nga awan dagiti dadakkelda. Adda dagiti agpatpatulong; adda met dagiti nakamulengleng a nakatangad wenno nakadumog. Makapaladingit unay ti kasasaad isu a sagpaminsan masapul a rummuarkami iti siled tapno pagkalmaenmi ti riknami ken agkararagkami maipaay iti bileg.”

Dagiti kakabsat nabirokanda ni Kristina bayat a maisagsagana para iti pannakaopera ti natukkol a sakana. Napukawna amin a dokumentona. Kalpasan ti operasion, ti dua a lumugar a kakabsat nagkararagda a kadua ni Kristina ken binantayanda agingga iti tengnga ti rabii. Kalpasan ti sumagmamano nga aldaw, nagsublin ni Kristina idiay Finland. Iti laksid dagiti pakarigatanna, “natured ken nabileg ni Kristina,” impadamag dagiti kakabsat. Nakalkaldaang ta natay ni lakayna iti tsunami.

Pannakaidedikar Dagiti Sanga

Angola, Enero 8, 2005: Daytoy nga espesial nga aldaw ket nagpateg a pasamak iti trabaho a panangasaba idiay Angola, maysa a  pagilian a makiramraman iti gerra sibil iti agarup 40 a tawenen. Ni Stephen Lett ti naikkan iti naisangsangayan a pribilehio a mangiparang iti palawag ti dedikasion maipaay kadagiti pasilidad ti sanga idiay Angola ken isu ti kaunaan a miembro ti Bagi a Manarawidwid a simmarungkar iti dayta a pagilian. Agarup 730 a delegado manipud iti 11 a pagilian ti timmabuno iti programa. Apay a kasapulan ti baro a sanga nga opisina? Idi 1975, impadamag ti sanga a 3,055 ti kangatuan a bilang dagiti agibumbunannag. Idi ngudo ti 2004, immadu dayta a bilang iti 18 a daras ta immabuten iti nasurok a 54,000!

Bulgaria, Oktubre 9, 2004: Iti uneg ti nasurok a tallo a tawen, adda 150 nga international volunteer ken agarup 300 a lumugar a kakabsat a timmulong iti pannakaibangon dagiti baro a pasilidad ti sanga idiay Sofia. Ni Gerrit Lösch a miembro ti Bagi a Manarawidwid ti nangiparang iti palawag ti dedikasion iti imatang dagiti agdengdengngeg a 364 manipud kadagiti 24 a nasion.

Ethiopia, Nobiembre 20, 2004: Idi rugrugi ti 2004, ti 60 a kameng ti pamilia ti Bethel ket naiwaras iti nasurok a siam a lokasion. Nakarigrigat daytoy a kasasaad. Masarakan ti nagsayaat ken baro a pagtaenganda a Bethel iti bakras nga adda iti makindaya nga igid ti kabisera, ti Addis Ababa, ken nasurok a 2,400 metro iti ngatuen ti patar ti baybay! No dadduma, mabtak ti ulimek iti rabii gapu laeng iti katawa dagiti hyena. Ti dimngeg iti palawag ni Gerrit Lösch ket 2,230, a pakairamanan ti 200 a ganggannaet a delegado manipud iti 29 a pagilian. Karaman kadagidiay nainterbiu ket ti sumagmamano a nagibtur iti pagbaludan ken naparparigat pay gapu iti pammatida. Ti anak a babai ti maysa a kabsat a lalaki a napapatay, kinunana: “Inton panagungar, maragsakanto ni Tatang a makaammo a sinurotko ti ulidanna iti nadiosan a debosion ken nagserbiak iti Bethel.”

Ghana, Marso 5, 2005: Ni Malcolm J. Vigo a naggapu iti sanga ti Nigeria ti nangiparang iti palawag ti dedikasion iti imatang ti 3,243 nga agdengdengngeg. Dagiti naidedikar a kabbaro a pasdek a nainayon iti agdama a sanga ramanenna ti tallo a pasdek a pagtaengan, 50 nga opisina, maysa a maintenance building, maysa a  Kingdom Hall, ken maysa a siled a panganan, kosina, ken paglabaan.

Guam, Hunio 25, 2005: Daytoy ti maikatlo a programa ti dedikasion a naangay sipud idi 1980, idi a maymaysa pay laeng ti kongregasion idiay Guam. Ita, addan ti sangapulo. Malaksid kadagiti panagtarimaan, ti kaudian a proyekto ramanenna ti baro a Kingdom Hall ken ti dua ti kadsaaranna a pasdek a pagtaengan. Ti 100 nga international volunteer ket naggapu idiay Australia ken Estados Unidos​—iti bukodda a gastos. Insurat ti sanga nga opisina a, “saan a makappapati” ti inspektor ti patakder iti dayta a lugar idi nadamagna ti maipapan iti daytoy ken idi nakitana ti kalidad ti trabaho. Ni Lorence Shepp nga agserserbi iti sanga ti Peru ti nangipaay iti palawag ti dedikasion.

Mauritius, Nobiembre 6, 2004: Ni Gerrit Lösch ti naikkan iti pribilehio nga agpalawag idi naidedikar ti pannakapalawa ti agdama a sanga. Dagiti nainayon ramanenna ti 12 a baro nga opisina para iti Translation Department ken ti baro a maintenance building. Dagiti bisita ket naggapuda idiay Europa, Madagascar, Mayotte, Réunion, Seychelles, ken South Africa.

Nicaragua, Disiembre 4, 2004: Adda nasurok a 330 nga international volunteer agraman ti ginasut a lumugar a kakabsat a nangibangon kadagiti baro nga opisina ken pasdek a pagtaengan iti sanga agraman ti awan didingna nga Assembly Hall a makalaon iti 2,400 a tattao. Ni Samuel Herd a miembro ti Bagi a Manarawidwid ti nangipaay iti palawag ti dedikasion. Dagiti delegado ramanenna dagiti misionero a nagserbi idiay Nicaragua. Panunotenyo ti ragsakda a nakakita saan laeng a kadagiti inyadalanda idi iti Biblia no di ket dagiti pay annak dagiti inyadalanda. Sumagmamano kadakuada ti addaan pay ketdin kadagiti appoko!

Panama, Marso 19, 2005: Nagpalawag ni Samuel Herd iti imatang dagiti agdengdengngeg a 2,967, a ti kaaduan kadakuada ket nasurok a 20 a tawenen nga agserserbi ken ni Jehova. Idi nangrugi ti proyekto, dagiti kakabsat nangabangda iti crane ken nangtangdanda iti opereytor tapno mayakar ti sumagmamano a trailer a  pagipempempenanda kadagiti bambanag. Idi simmangpet iti lokasion, ti opereytor pinagkedkedanna ti trabaho ta saan kano ngamin a naisagana a naimbag ti lugar. Nakirinnason dagiti kakabsat ngem awan ti naaramidanda. Sakbay a pimmanaw, insaludsodna, “Bueno, ania ti relihionyo?”

“Saksi ni Jehova-kami,” insungbat dagiti kakabsat.

Nagpanunot iti apagbiit sa kinunana, “Sige, aramidek ti trabaho.” Apay a nagbaliw ti panunotna? Adda dua a kakabsat a babbai a mangyad-adal kadagiti annakna, ken ap-apresiarenna ti ar-aramiden dagiti kakabsat.

Slovakia, Abril 16, 2005: Ni Theodore Jaracz, a miembro ti Bagi a Manarawidwid, imparangna ti palawag ti dedikasion kadagiti 448 a sangaili manipud iti 21 a pagilian. Kabigatanna, naangay ti espesial a panagtataripnong iti sports stadium, ken adu a delegado ti simmangpet a nakalugan iti bus. “Nagsayaat ken nagraragsakkayo,” kinuna ti maysa a drayber, “ken kabkablaawandak ti amin! Ammok no apay. Maigapu dayta iti pammatiyo. Masansan nga agitultulodak kadagiti ages-eskuela nga ubbing ken kadagiti mannursuro. Siak pay ti umuna a mangkablaaw kadagiti ubbing; ket dagiti mannursuro​—pulos a didak pay komustaen!”

Wallkill, New York, U.S.A., Mayo 16, 2005: “Inkeddengtayo amin nga idedikar daytoy nagpintas a baro a pagimprentaan ken dagiti A, C, ken D a pasdek a pagtaengan iti maymaysa ken kakaisuna a pudno a Dios, a ni Jehova,” kuna ti miembro ti Bagi a Manarawidwid a ni John Barr bayat ti palawag ti dedikasion nga imparangna. Nangrugi ti trabaho babaen ti pannakaipasdek ti pundasion ti baro a pagimprentaan idi Mayo 1, 2003. Kalpasan laeng ti walo a bulan, ti immuna kadagiti dati a makina a pagimprenta ket nayakar iti baro a pagimprentaan.

Dagiti Regional Building Committee iti Estados Unidos, nangnangruna kadagiti kabangibang nga estado, nangipatulodda kadagiti trabahador. Adda dagiti trabaho nga inaramid dagiti kontratista a saan a Saksi. “Diak matangdanan dagiti trabahadorko tapno agubrada kas iti panagtrabahoyo,” kinuna ti maysa a lalaki.  “Sipapasnek ken sigagagarkayo nga agtrabaho.” Ti sabali pay a lalaki a manedyer ti maysa a proyekto, kinunana, “Iti uneg ti sumagmamano a bulan a panagtrabahok iti Watchtower, naapresiarko dayta ken ad-adu pay ti nasursurok maipapan iti abilidadko no idilig iti lima a tawen a panageskuelak!” Kinuna ti pannakabagi ti kompania a nangsuplay iti conveyor system: “Pagyamanan kadakayo, daytoy ti kaalistuan pay laeng a panagikabitmi. Maragragsakanak ta nagraragsakkayo amin ditoy! Nagpintas daytoy a lugar.”

Sumagmamano a tawen sakbayna, ti sanga ti Estados Unidos ket addaan iti 15 a web-offset a pagimprentaan​—11 iti Brooklyn ken 4 iti Wallkill. Ita, adda laengen ti lima ta nasaysayaaten ti teknolohia ken naiwarasen ti trabaho kadagiti dadduma a sanga babaen ti urnos a rehional a panagimprenta. Ti baro a pagimprentaan ket addaan met iti paper collection system a mangkolekta kadagiti nagtabasan a papel manipud iti makina a pagimprenta ken bindery, sa umuli kadagiti nangato nga air duct, ken agdiretso kadagiti automatic baler. Dagiti nagtabasan ket i-recycle ti maysa a kompania isu a tinawen a makainut ti sanga iti agarup $200,000!

Zambia, Disiembre 25, 2004: Kadagiti dandani 700 a timmabuno iti pannakaidedikar dagiti napalawa a pasilidad, 374 ti agserserbin ken ni Jehova iti nasurok nga 40 a tawen! Kabayatan ti palawag ti dedikasion nga impaay ni Stephen Lett, imbagana kadagidiay nakiraman iti proyekto, a kas kadagiti adipen iti maysa kadagiti pangngarig ni Jesus, maikarida a makomendaran iti “Nasayaat unay!”​—Mat. 25:23.

Nangipaay met dagiti kakabsat iti nagsayaat a panangsaksi idi madama ti panagibangbangonda. “Agnanaedkayo iti paraiso,” kuna ti maysa a kontraktor.

“Ania ti kayatmo a sawen? Pisikal wenno naespirituan?” insaludsod dagiti kakabsat.

“Agpada!” insungbatna.

[Footnote]

 [Kahon/Dagiti Ladawan iti panid 29]

Dagiti “Panagtulnog iti Dios” a Kombension

Kas nailawlawag kadagiti “Panagtulnog iti Dios” a Kombension Distrito, dagidiay laeng “makaammo iti Dios” ken dagidiay “agtulnog iti naimbag a damag” ti makalasat iti aldaw a panagibales ni Jehova. (2 Tes. 1:6-9) Gapuna, kayattayo nga aramiden ti amin a kabaelantayo a mangtulong kadagidiay nariro maipapan iti Dios wenno dagidiay agsaksakit ti nakemda kenkuana gapu kadagiti panagsagaba ditoy lubong. Ti polieto nga Asidegen nga Agpatingga ti Amin a Panagsagaba! ken ti libro nga Ania a Talaga ti Isursuro ti Biblia? ket nagsayaat a baro a probision a makatulong kadatayo.

Awan duadua a makaliwliwa ti baro a polieto kadagiti adu a biktima ti gubat, kinapanglaw, didigra, kinaawan hustisia, ken sakit babaen ti panangtulongtayo kadakuada a mangtarus a saan a ti Dios ti makimbasol kadagitoy a bambanag. Umasping iti dayta, makaay-ayo met ti baro a libro kadagidiay mayat a mangammo kadagiti naespirituan a kinapudno. Makaallukoy, nalaka a maawatan, ken nalawag ti pannakaisuratna, ken nagsayaat ti pannakayilustrar dagiti kangrunaan a punto, agpada kadagiti ladawan ken kadagiti parapo. Sakbay nga usarenyo daytoy a mangyadal kadagiti sabsabali, basaenyo pay nga umuna ti 14 a kanayonan a suheto iti apendise.

 [Chart/Dagiti Ladawan iti panid 12, 13]

DADDUMA A PASAMAK ITI 2005 A TAWEN SERBISIO

Setiembre 1, 2004

Oktubre 8: Nairehistron dagiti Saksi ni Jehova idiay Armenia.

Oktubre 9: Naidedikar ti sanga idiay Bulgaria.

Oktubre 18: Nangrugi ti kampania a panagiwaras iti broshur nga Agbantay!

Nobiembre 6: Naidedikar ti sanga idiay Mauritius.

Nobiembre 20: Naidedikar ti sanga idiay Ethiopia.

Disiembre 4: Naidedikar ti sanga idiay Nicaragua.

Disiembre 25: Naidedikar ti sanga idiay Zambia.

Disiembre 26: Napasamak ti ginggined a 9.0 ti kapigsana iti asideg ti Sumatra, Indonesia. Daytoy ti nangpataud iti tsunami a sigun iti historia, isu ti kadadawelan pay laeng.

Enero 1, 2005

Enero 8: Naidedikar ti sanga idiay Angola.

 Marso 5: Naidedikar ti sanga idiay Ghana.

Marso 19: Naidedikar ti sanga idiay Panama.

Marso 24: Impalubos ti Higher Administrative Court of Berlin a maikkan dagiti Saksi ni Jehova idiay Berlin kadagiti karbengan kas maysa a legal a korporasion.

Abril 16: Naidedikar ti sanga idiay Slovakia.

Mayo 1, 2005

Mayo 16: Naidedikar ti pagimprentaan ken dagiti pasdek a pagtaengan iti Wallkill, New York.

Hunio 25: Naidedikar ti sanga idiay Guam.

Agosto 31, 2005

[Ladawan iti panid 20]

Panagdalus iti nalayus a Kingdom Hall, Niigata Prefecture, Japan

[Ladawan iti panid 24]

Panagiwaras kagiti suplay a pangsaranay idiay Sri Lanka