Pakasaritaan Dagiti Saksi ni Jehova iti Moderno a Panawen
Pakasaritaan Dagiti Saksi ni Jehova iti Moderno a Panawen
Romania
Dagiti espia, tiktik, sinankakabsat, ti pannakaparigat, pannakaibalud, ken inkapilitan a panagtrabaho—dagitoy ti sumagmamano kadagiti napaay a gandat nga inusar ni Satanas tapno upayenna a saggaysa dagiti Saksi ni Jehova ken tapno dadaelenna ti organisasionda idiay Romania. Basaentayo ti maipapan ken ni Ioan, a nagkararag a sipipigsa iti imatang dagiti mangpaltog kenkuana. Ammuentayo ti maipapan ken ni Teodor agraman dagiti dadduma pay a Saksi, a nagkanta kadagiti kanta ti Pagarian bayat ti panagtinnag dagiti bomba iti aglawlawda. Sukimatentayo ti maipapan kadagiti indibidual a nagnagna a sakasaka iti agarup 100 kilometro tapno tumabuno kadagiti gimong. Ken kitaentayo no apay a kinuna ti maysa nga ubing a lalaki, “Tatang, kasla teksto iti inaldaw ti angotmo!”
Zambia
Dagiti panangiparit ti gobierno iti trabaho, ti pannakaideporta dagiti misionero, ken ti pannakapapanaw iti eskuelaan—dagitoy ti sumagmamano kadagiti karit a naipasango kadagiti kakabsattayo idiay Zambia. Iti daytoy a salaysay, ammuentayo ti maipapan iti estudiante a babai a situtured a nangidepensa iti naimbag a damag iti korte, ti baldado a nagbakuit a “naparpartak ngem kadagiti agila,” ken ti nasapsaplit a nagkauna nga Estudiante ti Biblia. Basaentayo ti maipapan iti maur-uram a Land Rover, ti bimtak a bunton dagiti kuton, ken ti paggigimongan a kasla nangisit a kabalio. Dagiti lamok, ngilaw a maawagan iti tsetse, uleg, ken leon ket paset amin ti salaysay maipapan iti panangikagumaan dagiti kakabsattayo a mangiwaragawag iti naimbag a damag iti intero a paset daytoy nagpintas a pagilian ti Africa.