Report iti Intero a Lubong

◼ ASIA KEN TI MAKINTENGNGA A DAYA

Bilang dagiti pagilian: 47

Populasion: 3,896,182,946

Bilang dagiti agibumbunannag: 582,360

Bilang dagiti panangyadal iti Biblia: 453,069

Kyrgyzstan: Adda maysa a balay iti teritoria ni Svetlana, maysa nga auxiliary pioneer, nga awan a pulos ti madandanonna a bumalay. Maysa nga aldaw bayat a limmabas iti dayta a balay, pampanunotenna nga awan serbina no sumarungkar sadiay, yantangay awan met dagiti bumalay. Kaskasdi, impadasna latta ti sumarungkar ket naklaat ta adda nadanonna nga agkabannuag a babai. Naragsakan ti babai a nakakita iti maysa kadagiti Saksi ni Jehova ken kinunana a nakipagadal idi iti Biblia ngem awanen ti komunikasionna kadagiti kakabsat. Dinamag ni Svetlana iti babai no kayatna ti regular a maitulodan kadagiti magasin ngem  kinuna ti babai a saan laeng a dagiti magasin ti kayatna no di ket kayatna ti regular a mayadalan iti Biblia! Dagus a nairugi ti panagadal, ket ita tumabtabunon kadagiti Nakristianuan a gimong.

Japan: Adda dua a kakabsat a babbai a mangaskasaba iti lugar ti negosio. Simrekda iti opisina ti maysa nga abogado a nalatak gapu iti panangtulongna kadagiti nakurapay. Dagus a pinapanaw ida ti maysa a babai a nagkuna nga isu ket okupado ngem immawat kadagiti magasin. Agmaymaysa daytoy a babai idi nasarakan manen dagiti kakabsat. Sakbay pay a makablaawanda, sipupungtoten a kinuna ti babai: “Apay a mapappapatay dagiti ubbing nga awan basolna? Apay a kastoy ti lubong? Kayatko ti makapnek a panangilawlawag! No ammoyo dagiti sungbat, ibagayo kaniak!” Bayat a bumaybayag ti saritaanda, inlawlawag dagiti kakabsat ti isyu maipapan iti sapasap a kinasoberano. In-inut a nagbalbaliw ti kababalin ti babai. Nagyaman kadagiti kakabsat gapu iti panangusarda iti Biblia a nangsungbat kadagiti saludsod nga impagarupna nga awan ti siasinoman a makasungbat. Idi nagpakadan dagiti kakabsat, inted ti babai ti adres ken ti numero ti teleponona sana kinuna: “It-itedko laeng daytoy kadagiti tattao a nasinged unay kaniak, ngem naidumdumakayo. Kayatkayo a makasaritanto manen. Nakapatpateg ti napagsasaritaantayo.” Nairugi ti panagadal iti Biblia.

Nepal: Adda maysa a babai a makimismisa iti adun a tawen ngem naupay gapu iti kinaagum ken panagririkiar a napaliiwna kadagiti kameng dayta a relihion. Nupay nagbalin a pastor ni lakayna, napapanaw gapu ta adda timmaud a susik maipapan kadagiti donasion. Nangrugin nga agbartek ken saannan a supsuportaran ti pamiliana. Kasta unay ti panangikagumaan ti babai a mangbirok iti kinapudno ken inkarkararagna dayta iti inaldaw. Tapno masuportaranna ti pamiliana, nagtrabaho iti pagipempenan kadagiti basura a papel. Maysa nga aldaw bayat ti panamaglalasinna kadagiti libro, magasin, ken periodiko, nakitana ti libro a Nagkaykaysa iti Panagdayaw iti Maymaysa a Pudno a Dios. Imbulsana dayta ken inyawidna. Inaldaw a binasana ti libro ken  intultuloyna ti nagkararag. Maysa nga aldaw, nagtuktok iti ridawda ni Bishnu, a maysa nga special pioneer. Interesado ti babai iti ibaga ni Bishnu isu a pinaunegna. In-inut a nabigbig ti babai nga agpada ti ibagbaga ni Bishnu ken ti nabasana iti libro. Idi agangay, impakitana ken ni Bishnu ti libro ket naragsakan a nakaammo a maysa dayta kadagiti librotayo. Ita, agad-adalen iti Biblia ken regular a tumabtabunon kadagiti amin a gimong a kaduana dagiti annakna.

Sri Lanka: Uray no saan pay laeng a di bautisado nga agibumbunannag ni Punchibanda, inkeddengna nga iranud ti mensahe ti Pagarian kadagiti sabsabali iti di pormal a pamay-an. Kinasaritana ti maysa nga agpalpalama iti kalsada a nagkuna a ti inauna nga anakna a babai ket nagsakit ken natay. Napanda kano iti kapilia ti Assemblies of God ta namnamaenda a maagasan iti milagro a pamay-an ngem awan ti napasamak. Inlawlawag ni Punchibanda a saanen a mangag-agas ti Dios iti kaaldawantayo no di ket maagasanto dagiti sakit iti sidong ti Pagarian ti Dios. Inikkanna ti agpalpalama kadagiti magasin a mangilawlawag iti daytoy a topiko. Di nagbayag, inawisna ti agpalpalama iti Kingdom Hall. Nagawid ti agpalpalama ken imbagana iti pamiliana ti maipapan iti awis ken impakitana kadakuada dagiti magasin. Imbaga ni baketna nga isu ket nakaawat met kadagiti magasin ken naawis met iti Kingdom Hall. Inkeddeng daytoy a lalaki nga isu pay laeng ti mapan iti Kingdom Hall. Isu ket sibabara nga inabrasa dagiti kakabsat. Ita, isuda ken ni baketna, agraman ti anakda a lalaki, ken ti dua nga annakda a babbai tabtabunuandan dagiti gimong ken pagrag-oanda ti makitimpuyog kadagiti adipen ni Jehova.

Lebanon: Ti maysa a kabsat a babai nga special pioneer a naggapu iti Pilipinas kinunana: “Adda naam-ammok a Pilipina bayat ti panangasabak iti lansangan. Sinarungkarak iti pagtrabahuanna ken nayadalak iti Biblia. Nakaad-adu ti saludsodna. No dadduma, adda manen saludsodna uray diak pay nasungbatan daydiay maysa. Ngem di nagbayag, binusor dagiti nasinged  a gagayyemna nga aktibo a kameng ti relihionda. Nakalkaldaang ta saanna a nadaeran ti ibubusor isu nga insardengna ti agadal iti Biblia, nupay pinaregtak a saan koma a sumuko. Nupay kasta, pinampanunotko a no isu ket marakarnero, dumtengto ti aldaw nga itultuloyna ti agadal. Limmabas ti maysa a tawen, ken sipapanunotak pay laeng kenkuana. Gapuna, inkeddengko a suratan tapno ibagak a maseknanak kenkuana ken maragsakanak a makakita manen kenkuana. Inawagannak isu a sinarungkarak. Iti daytoy a gundaway, nakitak nga ad-adda nga interesado. Adda pay laeng iti pusona dagiti bambanag a napagadalanmi idi, ken naimpusuan nga inapresiarna dagita. Imbagana kaniak nga adun a relihion ti simrekanna ngem awan ti nakaisuro iti kinapudno. Gapuna, intultuloyna ti nagadal, rimmang-ay, ken bautisado itan. Ti 12 ti tawenna nga anakna a lalaki ket maysan a di bautisado nga agibumbunannag.”

India: Insurat ti maysa a kabsat a babai: “Bayat a mangaskasabakami iti binalaybalay, adda napaliiwmi nga agtutubo a babai a simrek iti balayna apaman a nakitanakami. Di nagbayag, adda rimmuar a lalaki a nangpapanaw kadakami. Bayat a pumampanawkami, nakitami ti babai a makisarsarita iti lalaki. Di nagbayag, bayat nga agur-uraykami iti bus, nakabisikleta ti babai nga immasideg ken kinunana: ‘Ammok a ni Jehova ti pudno a Dios. Pangngaasiyo ta isuroyo kaniak ti Biblia. Simrekak iti balay tapno paunegenkayo koma ngem saan nga immanamong ti makinkukua iti balay.’ Insaludsodmi kenkuana no apay nga ammona a ni Jehova ti pudno a Dios. Kinunana a dua a tawen sakbayna bayat nga agbibiahe a nakalugan iti bus, adda nakitana a kasla dakkel a Nakristianuan a panagtataripnong. Maysa dayta kadagiti kombension distritotayo. Dimsaag iti bus ken tinabunuanna ti tallo nga aldaw a programa. Nabayagen nga agur-uray kadagiti Saksi ni Jehova a sumarungkar iti pagtaenganna. Idi nakitami nga interesado, impanmi daytoy nga agtutubo iti balay ti maysa a kabsat a babai ken inyadalanmi iti Biblia. Inrugina ti tumabuno a kanayon kadagiti gimong ken nasayaat ti panagrang-ayna iti naespirituan.”

 ◼ AFRICA

Bilang dagiti pagilian: 56

Populasion: 781,767,134

Bilang dagiti agibumbunannag: 1,015,718

Bilang dagiti panangyadal iti Biblia: 1,820,540

Uganda: Ni Lucy ket maysa a Saksi nga agtartrabaho iti dakkel a botika. Isu ken ti dadduma a katrabahuanna ket naayaban nga agsapata no talaga nga awan ti ammoda maipapan iti mapukpukaw a dakkel a kantidad ti kuarta a naduktalan kalpasan ti kuenta. Idi batangen ni Lucy nga iparabaw ti imana iti Biblia tapno agsapata a saan nga isu ti nangala iti kuarta, inukagna ti Proverbio 15:3 ken imbasana iti napigsa: “Dagiti mata ni Jehova addada iti amin a lugar, a sisisiput kadagidiay dakes ken kadagidiay naimbag.” Nagari ti ulimek iti siled. Kalpasanna, ti nakabasol ket immasideg iti superbisor ken impudnona nga isu ti nangala iti  kuarta. Insingasing ti superbisor nga iti masanguanan laglagipenda amin ti “teksto ni Lucy.” Di nagbayag, ngimmato ti sueldo ni Lucy ken naikkan iti responsabilidad a mangiggem kadagiti tulbek ti botika.

Benin: Adu a pannakaumsi ti inibturan ni Josué iti eskuelaan. No saan nga umiso ti sungbatna iti klase, uyawen dagiti dadduma a kaklasena, a kunkunada, “Padi ni Jehova, apay nga agkamalika?” Pasarunsonan met dagiti dadduma babaen dagiti manglais a sasao, kas iti, “Nakaad-adu la a tiempo ti busbusbosenna nga agpagnapagna a nakaawit iti portpoliona.”

Inaklon ni Josué, “Nangnangruna a kaamakko ti makakita kadagiti kaklasek no mangasabaak iti ngudo ti lawas.” Inkararagna daytoy a banag ken nagpatulong iti maysa a panglakayen, a nangparegta kenkuana nga agbalin a natured babaen ti panangbusbosna iti ad-adu nga oras iti ministerio iti tay-ak ken situtured a mangitukon kadagiti literatura kadagiti kaklasena. Nagballigi ni Josué iti tallo a banag. Kinunana: “Masansan a makapagserbiak itan kas auxiliary pioneer. Iyad-adalakon iti Biblia ti dua kadagiti kaklasek a dati a manguy-uyaw kaniak ken dakkel met ti ngimmatuan dagiti gradok.”

Ethiopia: Agarup dua a tawen ti napalabasen, nakapidut ni Asnakech iti lisensia ti drayber ken inkeddengna nga isubli dayta iti babai a makinkukua nga agnagan iti Elsa. Nasdaaw ni Elsa iti kinamapagtalkan ni Asnakech ken kayatna nga ikkan iti kuarta kas panagyaman. Saan nga inawat ni Asnakech ti kuarta no di ket intukonna ken ni Elsa ti broshur nga Ania ti Kalikaguman ti Dios Kadatayo? Iti simmaganad nga aldaw, inrugi ni Elsa ti agadal iti Biblia. Kinunana a nangnangngegnan ti nagan a Jehova gapu ta imbaga dayta kenkuana ni tatangna, a maysa a padi. Nakipagadal met iti Biblia ni lakayna kalpasan ti itatabunoda a sangapamiliaan iti kombension distrito. Ngem nakapungtot ti padi a tatang ni Elsa idi naammuanna dayta, nga inawaganna dagiti Saksi ni Jehova kas awan kaes-eskanda. Gapu ta determinado ni Elsa a mangitultuloy iti panagadalna, sidadayaw nga imbagana  ken ni tatangna a saan nga umiso ti ibagbagana maipapan kadagiti Saksi. Gapu ta nadismaya, innala ni tatangna ti broshur a Kalikaguman a saan nga am-ammo ni Elsa. Binasana dayta iti sumagmamano a daras ken natukay ti pusona. Kalpasan dayta, no bendisionanna dagiti lumablabas kas iti dati nga ar-aramidenna, saanen nga iti nagan ti Trinidad. Di nagbayag, inawaganda nga “apostata,” ken adda dagiti mayat a mangkabil kenkuana. Gapuna, immakar idiay Addis Ababa, a sadiay nga inrugina met ti makipagadal iti Biblia. Ni Elsa ket nagbalin a bautisado a Saksi agraman ti pito a kameng ti pamiliana. Nasayaat met ti panagrang-ay ni lakayna ken ti anakda a lalaki.

Côte d’Ivoire: Nangibati ni Anderson iti broshur nga Ania ti Kalikaguman ti Dios Kadatayo? iti maysa nga agbambantay iti tiendaan a regular nga agbasbasa iti Biblia. Di nagbayag, nairugi ti panagadal iti Biblia. Nangnangruna a naginteres ti lalaki iti leksion a napauluan iti “Biag ti Pamilia a Makaay-ayo iti Dios.” Inlawlawagna: “Diak ammo nga adda gayam espesipiko nga akem ti asawa a lalaki ken babai. No naladawak a makaawid, diak maanusan ti aniaman a sawen ni baketko. Ibagak kenkuana a siak ti lalaki isu a makapanak iti sadinoman a kayatko. Yantangay isu ti babai, masapul nga agyan iti balay. Ita, agaw-awidakon a dagus kalpasan ti trabahok ken tultulongak ni baketko a mangaramid kadagiti trabaho iti balay.”

Kenya: Ti pito ti tawenna nga ubing nga adda iti maikadua a grado nadamagna ti maipapan iti ibibisita ti manangaywan iti sirkito. Makalawas sakbayna, inasitganna ti prinsipal iti eskuelaan tapno agpakada a tumabuno kadagiti gimong iti malem ti Martes. Isu ket napalubosan. Ngem iti kabigatanna, napagawid ti ubing manipud iti eskuelaan ken nabilin nga agsubli a kaduana dagiti dadakkelna ken ti ibagbagana a sangaili. Gapuna, ti manangaywan iti sirkito napan iti eskuelaan a kaduana ti tatang ti ubing. Nasdaaw ti prinsipal a nakakita a talaga nga immay ti sangaili ken nasurok a maysa nga oras a simmang-at iti katurturodan tapno makitana ti prinsipal. Inawat ti prinsipal dagiti  literatura ken sipud idin, nagbalinen a mannakigayyem ken mannakikooperar.

Malawi: Bayat a mangaskasaba ti maysa a kabsat, adda lalaki a nakabisikleta a masansan a mangrirriribuk kenkuana. Apaman a makitana ti kabsat a mangaskasaba, agsardeng ti lalaki ken ikagumaanna ti mangirugi iti argumento. Pinadpadasna pay nga agawen ti Biblia ti kabsat. Maysa nga aldaw, limmabas ti lalaki bayat a ti kabsat ket mangyad-adal iti Biblia. Bayat nga agpatpataray, adda ginarawna iti bisikletana ngem nasagidna dagiti rayos ti pilid a nakaigapuan ti nakaro a pannakasugat dagiti ramayna. Nupay agtirtiritiren ti lalaki gapu iti ut-ot, ti laeng timmulong kadagiti amin a nakakita kenkuana ket ti kabsat. Binarabadan ti kabsat dagiti ramay ti lalaki ken impanna iti ospital. Di nagbayag, simmarungkar ti kabsat iti balay ti lalaki. Mabain ti lalaki gapu iti kababalinna idi. Imbagana a kasdiay ti kababalinna gapu ta namati kadagiti ulbod a sarsarita. Kinunana: “Talaga a dakayo ti agdaydayaw iti maymaysa a pudno a Dios. Pulos a diak impagarup a kaasiannak iti laksid ti naalas a panangtratok kenka.”

Cameroon: Nakatugaw ti maysa nga agtutubo a kabsat a babai iti adu ti taona a siled a pagurayan iti ospital idi adda simrek a masakit a lakay. Yantangay awanen ti bakante a pagtugawan, nagtalinaed a sitatakder ti lakay. Malagip ti kabsat: “Naasianak iti lakay isu nga intedko kenkuana ti tugawko. Nagkikinnissiim dagiti tattao gapu ta ti panangitedko iti tugawko kaipapananna met ti panangitedko kenkuana iti batangko nga agpakonsulta. Kalpasanna, adda immasideg kaniak a maysa a babai ken insaludsodna no ania ti relihionko. Imbagak a maysaak a Saksi ni Jehova. Kinomendarannak gapu ta para kenkuana manmano laeng dagiti agtutubo a mangaramid iti kasta. Ginundawayak dayta nga oportunidad tapno kasabaak ti babai ken dagiti dadduma pay babaen ti tulong ti sumagmamano a polieto nga intugotko. Adu ti nasungbatak a salsaludsodda. Dadduma kadagiti nakasaritak ti nangbalbaliwen iti panangmatmatda kadagiti Saksi ni Jehova ken kayatda itan nga adda dagiti Saksi a sumarungkar kadagiti pagtaenganda.”

 Togo: Idi nangasaba iti naiputputong a teritoria ti sumagmamano a kakabsat, adda nakasaritada nga agkabannuag a lalaki a nangyebkas iti ragsakna a nakaam-ammo kadakuada. Impakitana kadakuada ti dua a kuaderno a nangisuratanna iti amin a linaon ti libro a Mabalinyo ti Agbiag nga Agnanayon iti Paraiso a Daga ken ti dadduma a paset ti libro a “Make Sure of All Things.” Nakitana dagita a libro iti balay ti maysa a pastor ti relihion a nakipagnaedanna iti sumagmamano a tiempo. Ti pastor ket addaan iti dua nga estante ti libro. Para kadagiti paboritona a libro daydiay maysa ken para kadagiti “saan a napateg” a libro daydiay maikadua. Nakita ti lalaki dagiti librotayo iti estante nga ayan dagiti “saan a napateg” a libro. Idi nabasana ti sumagmamano a panid ti maysa kadagita, naallukoy iti mensahena. Kinopiana dayta yantangay saanna a mabalin nga alaen ti libro ken saanna nga ammo no sadino ti pakaalaanna iti kasta. Idi insarsaritana kadagiti sabsabali ti maipapan iti nabasana, isu ket binusor ni nanangna ken ti pastor. Dagiti kakabsat imbatianda ti lalaki kadagiti literatura ken tultulonganda a rumang-ay iti naespirituan.

South Africa: Ni Thandi, a maysa a Saksi, ket kiniddaw ti amona a makisarita iti katrabahuanna a ni Bella gapu ta adda parikutda ken ni lakayna. Polis ti asawa ni Bella, a mangab-abuso kenkuana iti pisikal ken emosional, isu nga inkeddeng ni Bella ti makidiborsio. Ni Thandi inikkanna ni Bella iti dua a kopia ti libro a Ti Sekreto ti Kinaragsak ti Pamilia ken imbagana ken ni Bella nga itedna ti maysa ken ni lakayna. Kalpasan ti maysa a lawas, nakisarita kenkuana ni Thandi. Naammuanna a ti libro ket basbasaen ti asawa ni Bella ken natalnan ti kasasaadda nga agassawa. Tallo a bulan kalpasanna, kinuna ni Bella ken ni Thandi nga inispal ti Dios ti relasionda nga agassawa babaen ti kararag ken ti libro a Kinaragsak ti Pamilia. Idi nadamag daytoy ti amo ni Bella, inrekomendana kadagiti 2,000 nga empleadona a mangalada kadagiti kopia ti libro. Nakaipaima ni Thandi iti 96 a libro a Kinaragsak ti Pamilia kadagiti padana nga empleado. Nangted ti kompania iti donasion para iti sangalubongan a trabaho dagiti Saksi ni Jehova.

 ◼ DAGITI KONTINENTE TI AMERICA

Bilang dagiti pagilian: 56

Populasion: 879,073,403

Bilang dagiti agibumbunannag: 3,199,835

Bilang dagiti panangyadal iti Biblia: 3,022,276

Venezuela: Nabiit pay a naikabil ti linia ti telepono iti pagtaengan ti maysa a pamilia a Saksi ken baro ti numero ti teleponoda. Ngem gapu iti depekto iti linia, adu ti naawatda nga awag manipud kadagiti tattao nga umaw-awag iti lokal nga estasion ti telebision tapno makasaritada ti maysa a babai nga astrologo, a madama nga adda iti dayta nga estasion. Inkeddeng ti pamilia a gundawayan daytoy a pasamak. Babaen ti tulong ti libro a Panakirinnason Manipud Kadagiti Kasuratan, nangisaganada iti sumagmamano nga impormasion ken teksto iti Biblia nga iranudda kadagiti umaw-awag. Ti ina, a ni Graciela ket nagbalin nga eksperto iti daytoy a banag.  Maysa nga aldaw, adda immawag a nagkuna: “Hello. Sika kadi ti didiosen dagiti bituen?”

“Hello. Siak ni Graciela, sika ngay?”

“Siak ni Carmen.”

“Apay a kayatmo a kasarita ti didiosen dagiti bituen, Carmen? Kasapulam kadi ti tulong wenno balakad?”

Imbaga ni Carmen iti kabsattayo ti maipapan iti personal a parikutna. Iti naasi a pamay-an, inlawlawag ni Graciela no sadino ti pakaalaantayo iti kasayaatan a balakad, ken imbasaanna ni Carmen kadagiti teksto ti Biblia. Kalpasanna, insaludsod ni Graciela ken ni Carmen, “Iti panagkunam, rumbeng ngata nga umadanitayo iti Namarsua kadatayo no agkasapulantayo iti mapagtalkan a giya itan ken iti masanguanan?” Impudno ni Carmen nga isu ket nakipagadal idi iti Biblia kadagiti Saksi ni Jehova, isu nga inyurnosda ti panagtultuloyna nga agadal. Idi agangay, adu a dumawdawat iti tulong ti nakasarita ti pamilia ni Graciela, a masansan nga impaayanda ida iti nasayaat a panangsaksi, pinabilegda ida a dumngeg kadagiti Saksi no sumarungkarda, ken imbagada a mapanda kadagiti Kingdom Hall iti lugarda.

Colombia: Idi Marso 2005, natakaw ti kotse ti maysa a kabsat a babai nga agnanaed idiay Cali. Nasarakan dayta kalpasan ti sumagmamano nga aldaw. Nagur-uray ti kabsat ken ti di manamati nga asawana iti kotse agingga a sumangpet dagiti polis, ngem gapu ta nagbayag dagiti polis, inkeddeng dagiti agassawa nga alaenda lattan ti kotse. Nupay kasta, gapu ta nausar ti kotse iti maysa a krimen, dagiti agassawa ket tiniliw, inaresto, ken imbalud dagiti polis. Apaman a nakastrek ti kabsat a babai iti pagbaludan, inruginan ti nangasaba, ken iti sumagmamano laeng a tiempo, nakairugi iti sumagmamano a panagadal iti Biblia. Nawayawayaan ti maysa kadagiti iyad-adalanna ngem kiniddawna nga apaman a mawayawayaan ti kabsat, ituloynanto ti agadal. Daytoy nga estudiante imbagana met iti lalaki a kabkabbalayna a kayatna nga agkasarda tapno maay-ayona ti Dios.

Nupay nabiit pay nga inkarkararag ti kabsat a babai a maaddaan koma iti ad-adu a tiempo a mangasaba, pulos a saanna nga  impagarup a mapasamak dayta iti pagbaludan! Isu ket naitukonan iti ab-ababa a tiempo a panagtalinaed iti pagbaludan, ngem gapu ta mariknana ti pannalaknib ni Jehova ken kontento a mangaskasaba, pinagkedkedanna dayta. Nawayawayaanda ken ni lakayna kalpasan ti 45 nga aldaw a pannakaibaludda. Kinuna ti kabsat a bimmileg ti pammatina. Bayat daytoy a tiempo, ni lakayna ket sinarsarungkaran ken tinultulongan dagiti kakabsat. Kalpasan ti 20 a tawen a panangyaleng-alengna iti naespirituan, inruginan ti tumabuno kadagiti gimong ken inyebkasnan ti tarigagayna nga agadal iti Biblia. Regular itan a sumarsarungkar ti kabsat a babai iti pagbaludan tapno mangikondukta iti uppat a panagadal iti Biblia kadagiti babbai a balud. Isu ket agyamyaman ken ni Jehova gapu ta nasungbatan dagiti karkararagna ken gapu iti pananggunggonana kenkuana iti adu a wagas.

Brazil: Dua a tawen ti napalabasen, masansan idi a makita ti bulsek a ni Renildo nga agpalpalama kadagiti tiendaan iti nakayanakanna nga ili ken kadagiti kabangibang a siudad. Nupay inaramidna daytoy kas pangnayon iti pensionna gapu iti kinabulsekna, ti panagpalama ket dakkel a panguartaan, ta nakagatang iti bukodna a lugan ken pagtaengan nga addaan kadagiti nagpipintas nga alikamen ken makagatang iti nawadwad a taraon a saan a kabaelan a gatangen dagiti ordinario a tattao iti dayta a napanglaw a lugar. Ti pannakipagadalna iti Biblia kadagiti Saksi ni Jehova ti in-inut a timmulong kenkuana a mangmatmat iti panagbiagna sigun iti panangmatmat ni Jehova, a nanggutugot kenkuana a mangaramid iti natured a pangngeddeng. Kalpasan ti panangilawlawagna ken ni baketna ken kadagiti tallo nga annakna no ania ti mabalinda nga aramiden kas pamilia tapno saanda a maikawa uray basbassiten ti kuartada, insardeng ni Renildo ti agpalama. Di nagbayag, isu ken ti pamiliana rimmang-ayda iti naespirituan ken nabautisaranda kalpasanna iti maysa a kombension distrito. Ita, am-ammodan ni Renildo, saan a kas agpalpalama, no di ket kas maysa a naregta nga agibumbunannag iti naimbag a damag, nga agpromedio iti 40 nga oras ti busbusbosenna a binulan iti panagserbi iti tay-ak.

Ecuador: Maysa a payunir ti regular a mangitultulod kadagiti magasin iti pagsasao a Tsino iti makinkukua iti maysa a restawran.  Dayta a lalaki ket sinarungkaran ti maysa a gayyem nga addaan met iti restawran. Ti gayyem nakitana dagiti magasin ken binasana dagita. Kasta unay ti panaginteresna ta uray la a nagsurat iti sanga idiay Hong Kong tapno agkiddaw iti ad-adu pay a magasin, maysa a Biblia, ken ti libro nga Umadanika ken Jehova. Nagkiddaw pay iti panagadal iti Biblia. Ti sanga ti Hong Kong ket nakiuman iti sanga ti Ecuador. Di nagbayag, adda dagiti payunir a simmarungkar iti pagtaengan ti interesado a lalaki, nga awit-awitda dagiti literatura a kiniddawna. Nagsublida kalpasan ti uppat nga aldaw. Nabasana ngatan dagiti literatura? Kinuna ti lalaki: “Rinugiak a binasa ti Genesis ket addaak itan iti libro nga Ezequiel, ngem adda sumagmamano a saludsodko. Apay a nakaim-imbag ni Jehova kadatayo a tattao? Kukuana amin a bambanag, isu nga apay a kasta unay ti panangikagumaanna a tumulong iti sangatauan? Ania ti magunggonana iti dayta?” Nairugi ti panagadal iti Biblia, ket dagus a timmabuno ti lalaki kadagiti gimong. Insardengnan ti agsigarilio ken agsugal. Nasapa pay ti panangiserrana iti restawranna kadagiti rabii nga adda gimong tapno makatabuno. Ita, ti lalaki ket nakasaganan nga agbalin a di bautisado nga agibumbunannag ken mangisursuro iti Tsino kadagiti kakabsat iti dayta a lugar a mayat a  tumulong kadagiti dadduma pay a Tsino ti pagsasaona iti dayta a pagilian.

Honduras: Idiay Guatemala idi Enero 2005, ti kabsat a babai nga agnagan iti Flor kinasabaanna iti di pormal ti 15 ti tawenna nga agnagan Sebastián, a bulbullagaw iti maysa a sirko. Isu ket naginteres ngem bassit laeng ti panawenna a makisarita. Maysa nga aldaw, natnag ni Sebastian manipud iti tuktok ti dakkel a tolda isu a naospital. Ita, adun ti panawenna a mangutob kadagiti naespirituan a bambanag. Inaldaw a sinarungkaran ni Flor tapno sungbatanna dagiti adu a saludsodna. Di nagbayag, naginteres met ti inana a ni Doris, a nasigo a magna iti nairteng a tali. Gapuna, isu ket inyadalan ni Flor iti Biblia. Ni Dalila, a nalaing nga agpabuya iti trapeze, ken ni Sofía, a maysa a sumasala a nakipagadal idin kadagiti Saksi, nakiramanda iti panagadal agraman dagiti annakda a babbai. Ti grupo ket buklen ti pito katao. Iti uneg ti dua a bulan, lima agingga iti pito a daras iti kada lawas nga inyadalan amin ida ni Flor.

Idi dimteng ti tiempo a ti sirko ket umakar idiay Honduras, imparegta ni Flor iti grupo a birokenda dagiti Saksi kadagiti ili a sarungkaranda tapno maitultuloyda ti panagadalda ken tumabunoda kadagiti gimong. Idi nakadanonda iti ili ti Copán, naitultuloy ti panagadalda iti Biblia babaen ti agassawa nga special pioneer nga agserserbi iti dayta a lugar. Idi immakar ti grupo iti ili ti Gracias, sabali manen nga special pioneer ti nangikondukta iti panagadal. Idi panawenen tapno umakarda idiay ili ti Santa Rosa de Copán, nakaawat iti awag ti telepono ti agassawa a misionero, a makidkiddaw kadakuada nga ikonduktada ti panagadal iti sumaganad a tallo a lawas.

Naisangsangayan daytoy a panagadal gapu ta pito agingga iti sangapulo katao ti agtataripnong iti sirok ti dakkel a tolda ti sirko. Mamindua iti kada lawas ti panagadalda ken nakasaganada a naimbag, agraman ti kaubingan, ti siam ti tawenna nga ubing a babai nga agnagan iti Julietta, a maysa nga agpabpabuya iti trapeze. No tumabuno ti grupo kadagiti gimong, masansan a pumanawda a dagus ken agdardarasda nga agsukat kadagiti kawesda tapno saanda a maladaw iti panangrugi ti pabuya. Ngem situtulokda a mangaramid iti dayta.

 OCEANIA

Bilang dagiti pagilian: 30

Populasion: 35,237,787

Bilang dagiti agibumbunannag: 93,961

Bilang dagiti panangyadal iti Biblia: 47,864

New Zealand: Bayat ti pangngaldaw idi a basbasaen ti agkabannuag a babai nga agnagan Cecilia ti naibatay iti Biblia a broshur, sinaludsod ti katrabahuanna no ania ti linaon dayta. Idi inlawlawag ni Cecilia, 15 a tattao ti dimngeg, agraman ti amona, a nangawis kenkuana idi agangay iti opisinana. Kinuna ti amo ni Cecilia nga apresiarenna ti nangngegna. Imbagana pay kadagiti trabahadorna a ti siled a pangpangananda iti pangaldaw ket agbalin a siled a pagaadalanda iti Biblia. Nagbalin nga 60 ti 30 minuto a panaginana ni Cecilia para iti pangngaldaw tapno adda panawenna a mangan ken mangilawlawag iti Biblia. Iti uneg ti  uppat a lawas, adda iti nagbaetan ti 9 ken 15 ti timmabuno kadagitoy a saritaan maipapan iti Biblia. Dua kadagiti babbai ti regular itan nga agad-adal iti Biblia, nasayaat ti panagrang-ayda, ken mangaskasabada kadagiti kameng ti pamiliada ken kadagiti gagayyemda.

Tuvalu: Ni Peteli, a “Bethel” ti kaipapanan ti naganna iti Ingles, ket 14 ti tawenna a balasitang ken maysa a tuleng. Adda kakabagianna a Saksi ni Jehova isu a natabunuannan dagiti sumagmamano a gimong, ngem saan unay a nagunggonaan gapu ta saan a makangngeg ken makabasa. Personal nga inadal ni Peteli no kasano a basaen ti panaggaraw ti bibig. Iti nabiit pay, ni Dale, a maysa a misionera, inyadalanna ni Peteli iti broshur a Tagiragsakenyo ti Biag nga Agnanayon Ditoy Daga! Inusar ni Dale dagiti ladawan tapno maisurona ken ni Peteli ti maipapan iti Biblia, ken dagiti parapo tapno maisurona no kasano ti agbasa. Nagrigat daytoy gapu ta kabbaro a misionera ni Dale ken agsursuro pay laeng iti lenguahe, ket ni Peteli agkasapulan iti tulong nga agsursuro a mangibalikas a siuumiso kadagiti sasao. Sigagagar ken siaanep ni Peteli nga agsursuro. Kalpasan laeng ti tallo a bulan, ammonan ti agbasa. Kaduana ti mannursurona a misionera nga agsagana kadagiti komento para kadagiti gimong. Sakbay ti gimong, agensayo a naimbag ni Peteli ken sikokompiansa nga agkomento kabayatan dagiti gimong. Iti Kingdom Hall, agtugaw iti sango tapno maipamaysana a basaen ti panaggaraw ti bibig ti ispiker. Insurat ni Dale: “Ni Jehova ket nagbalin a napaypayso a gayyem ni Peteli. Masansan nga agarubos ti luana no pagsaritaanmi ti maipapan iti tiempo a ‘maluktanto ti mismo a laplapayag dagidiay tuleng.’”​—Isaias 35:5.

 Samoa: Ni Elena, a maysa a kabsat a babai a payunir, inyadalanna ti maysa a babai a Metodista a ti balayna ket sanguen ti balay ti pastor iti lugarda. Naikondukta ti panagadal iti nawayang a paset ti balay, a nalaka a makita ti pastor. Maysa nga aldaw bayat nga agad-adalda, simmarungkar ti pastor. Insaludsod ti estudiante iti Biblia no ania ti gagarana. Simmungbat ti pastor: “Birbirokek daydiay buriasko. Dandani makabulanen a diak nakitkita.” Kalpasanna, kimmita ken ni Elena sa insaludsodna, “Ammom kadi no apay a pinanawannak daydiay buriasko?” Gapu ta impagarup ni Elena a literal a burias ti tuktukoyen ti pastor, kinunana a nalabit isu nga isu a taraon ti ipakpakanna isu a nagtalaw daydiay burias. Insingasingna a padasenna a pakanen iti sabali. Naklaat ni Elena ta intudo ti pastor ti iyad-adalanna iti Biblia ken kinunana, “Isu ti buriasko!” Innayon pay ti pastor: “Tinakawmo kaniak. Isardengyon a dagus daytoy a panagadal ken pulos a saanyon nga ul-uliten.” (Nabileg ti impluensia dagiti pastor ti simbaan kadagiti purok idiay Samoa.) Nagsangit ti babai. Inkagumaan ni Elena a pagkalmaen ken inlawlawagna a naipadto iti Biblia a mapasamak ti kasta a banag kadagidiay agad-adal iti Biblia.

Binaliwan ni Elena ti eskediulda. Sinuktanna ti aldaw, oras, ken lugar a pagadalanda. Inlawlawagna: “Imbes nga agadalkami iti nawayang a paset ti balay, immakarkami iti bassit a siled iti likudan ti balay ti babai. Nagdagaang dayta a siled, ngem uray ta maitultuloymi met ti agadal. Dua a bulan nga inaramidmi daytoy. Maysa nga aldaw, kalpasan ti panglukat a kararag, di ninamnama nga immay ti pastor. Impagarupko no immay tapno pasardengenna ti panagadal, ngem nagbalbaliwen.”

Nakipagadal ken nagsalsaludsod pay. Kalpasan ti panagadal, kinunana iti babai: “Adda kayatko nga ibaga kenka. Idi rabii, napankami idiay ili ngem idi agaw-awidkamin, naperdian ti luganmi iti asideg ti maysa a purok. Adda agkabannuag nga agassawa ken agtutubo a lalaki nga immay timmulong a mangtarimaan iti luganmi. Saan nga agandar ti luganmi, isu a kinunada nga  ibatimi dayta iti balayda ken ituloddakami kadagiti pagtaenganmi. Idi nakastrekak iti luganda, napaliiwko dagiti Pagwanawanan ken dadduma pay a publikasion. Napampanunotko a dagitoy a tattao ket mabalin a karelihionan ti babai a sumarsarungkar kenka.”

Simmungbat ti babai: “Wen, hustoka. Annak ida ni Elena.” Nagpadispensar ti pastor ken kinunana: “Itultuloyyo ti ar-aramidenyo. Ita, ammokon a dagiti Saksi ni Jehova ket nakaim-imbag ken naayatda a tattao. Dispensarennak iti naibagak. Daytoy a kita ti programa matulonganna dagiti miembro ti relihionko a mangbalbaliw kadagiti kababalinda.” Manipud iti dayta nga aldaw, imbes nga agadalda iti nailet ken nadagaang a siled iti likud ti balay, nagyanda iti naparpariir ken nawayang a sanguanan ti balay, a makitkita ti pastor, a saanen a nangistorbo pay kadakuada.

Saipan: Iti daytoy nga isla, ti kinapudno ti Pagarian ti Dios tinukayna iti kasta unay ti puso ti babai nga agnagan Helen. Isu ket agad-adal iti Biblia iti tulong ti maysa a misionera. Kayatna nga ipakita ti panagyamanna gapu kadagiti bambanag a nasursurona. Iti ngudo ti maysa a panagadal, adda bassit a bag nga inted ni Helen iti misionera ken kinunana, “Awan ti adu a kuartak, ngem kayatko nga ited daytoy kas donasion iti trabaho a panangasaba.” Iti uneg dayta a bag, adda nagpintas a perlas manipud iti nakayanakanna nga isla ti Pohnpei. Insingasing ni Helen a mailako ti perlas tapno adda maidonarna. Nangato ti kalidad ti perlas, ket siraragsak ti makinkukua iti paggatangan ti alahas a nanggatang iti dayta iti $100. Naited ti kuarta ken ni Helen tapno maikeddengna no mano ti idonarna, ngem saanna nga inawat ti kuarta ken kinunana, “Itinnagyo amin dayta iti kahon.” Ania ti nanggutugot kenkuana nga agbalin a managparabur? Kas iti pangngarig nga insalaysay idi ni Jesus, nabirokan ni Helen ti perlas a nangatngato ti pategna, ti namnama ti Pagarian.​—Mat. 13:45, 46.

 EUROPA

Bilang dagiti pagilian: 46

Populasion: 731,536,437

Bilang dagiti agibumbunannag: 1,498,142

Bilang dagiti panangyadal iti Biblia: 717,797

Belarus: Ages-eskuela iti pioneer school ti agassawa a da Pavel and Mayya, nga agserserbi kas special pioneer. Maysa a rabii, inkeddengda ti magmagna, nga awan ti planoda a mangasaba. Nupay kasta, tugottugotda ti bokleta a Good News for People of All Nations. Idi adda nakitada a dua a ganggannaet, inkeddengda a kasabaan ida. Naammuanda a dagitoy a dua a lallaki ket naggapu idiay Pakistan ken Urdu ti pagsasaoda. Gapu ta naitugotda ti bokleta, impabasada dayta kadagiti lallaki. Maysa kadakuada ti naginteres ken immanamong a mayadalan iti Biblia. Iti dayta met laeng a lawas, isu ket timmabuno iti gimong ti  kongregasion. Ti pannakitimpuyogna kadagiti adipen ni Jehova ti nangpabileg unay kenkuana isu a naikunana, “Iti uneg ti tallo a tawen a kaaddak ditoy Minsk, daytoy ti umuna a gundaway a naam-ammok dagiti pudno a Kristiano.” Intultuloy ti lalaki ti panagadalna iti Biblia.

Britania: Ni Richard ket maysa a panglakayen a bulsek ken adda nasanay nga aso a mangigiya kenkuana. Irvin ti nagan dayta nga aso. Dakkel a parikut ti ministerio a panagbalaybalay para ken ni Irvin gapu ta isu ket nangnangruna a nasanay a mangikabesa iti tunggal lugar a sarungkaran ni Richard. Idi dinakamat ni Richard ti kasasaad kadagidiay nangalaanna iti aso, inlawlawagda a dakkel unay a karit daytoy a kita ti ministerio para ken ni Irvin. Inrekomendada ken ni Richard nga ikuyogna ni Irvin kadagiti lugar ti negosio, a sadiay nga agbalin a pamiliar ti aso kadagiti nadumaduma a lugar a regular a sarungkaranna. Kanayon a marigatan ni Richard a mangasaba iti lugar ti negosio, ngem di nagbayag babaen ti tulong ni Irvin, nagbalin met laeng a nasigo ni Richard iti daytoy a porma ti panangasaba.

Hungary: Insurat ti maysa a manangaywan iti sirkito: “Idi Mayo 2004, adda nakasabaanmi a lalaki nga agnagan Csaba a mangas-asikaso iti hardinna. Imbagana nga isu ket miembro ti konsilio ti simbaan. Nagpakadakami kalpasan ti ababa a saritaan. Dua nga aldaw kalpasanna, nagsublikami a tugotmi ti libro a Pannakaammo sa inrugimi nga inyadalan iti Biblia. Iti ngudo ti panagsarungkarmi, imbagana kadakami nga adda dadael ti paglutuanna. Imbagak nga adda am-ammok a kabsat a nalaing nga agtarimaan ken itedkonto kenkuana ti numero ti telepono ni Csaba. Idi nagsubli dagiti kakabsat tapno parayrayenda ti interesna, insubli ni Csaba ti libro ken saannan a kayat nga ituloy ti panagadalna. Kabayatanna, immawag kenkuana ti kabsat nga inrekomendak a mangtarimaan iti paglutuanna. Tallo nga aldaw a tinarimaan ti kabsat ti paglutuan ni Csaba, ket bayat dayta a  tiempo, adu nga oras ti binusbosna a nangisarsarita ken ni Csaba ti maipapan iti kinapudno. Intultuloy ti lalaki ti panagadalna iti Biblia, ken nakipagadal met ni baketna. Idi Mayo 2005, nagbalinen a di bautisado nga agibumbunannag. Bayat ti ibibisitak iti kongregasion, nagkaduakami ken ni Csaba iti damo a pannakiramanna iti panangasaba. Nagdakkel ti rimmang-ayanna iti naespirituan gapu iti nainggayyeman, mannakitinnulong a kababalin dagiti kakabsat ken ti nakitana a nakaidumaan ti kababalin dagiti Saksi no idilig kadagidiay dati a karelihionanna.”

Belgium: Ti kabsat a lalaki sinarsarungkaranna ti maysa a babai nga adda iti suli ti kalsada ti balayna, ken kanayon nga iti ridaw ti pagsarsaritaanda. Maysa nga aldaw idi a pimmanawen ti kabsat iti dayta a balay, adda lalaki nga immasideg kenkuana ken kinunana: “Ibagbaga dagiti gagayyemko a dakayo a Saksi ni Jehova ket saan a rumbeng a pakilangenan. Ngem inkalintegankayo ken imbagak a saan a pudno dayta. Kinapudnona, bayat a magmagnaak a kadua ti asok, adu a daras a nagtaktakderak iti suli ken dumdumngegak iti saritaanyo iti babai iti dayta a balay. Masansan nga isarsaritam ti maipapan iti panagungar ken ti Paraiso. Kayatko a maammuan ti ad-adu pay maipapan iti daytoy. Agpapaimbag ni baketko iti ospital ta nabagbagsol iti 17 a daras. Desperadoak, ken talaga a diak ammon ti aramidek.” Nayadalan iti Biblia daytoy a lalaki.

Italy: Maysa a malem, agaw-awiden ti kabsat a lalaki manipud iti pagtrabahuanna. Idi asidegen iti balay a pagnanaedanna, adda dua a lallaki a nakamotor a nangkamat kenkuana. Daydiay makinlikud ket nangasut iti paltog ken sineniasanna ti kabsat nga isardengna ti luganna. Tinungpal dayta ti kabsat. Kalpasanna, ti lalaki a nakaiggem iti paltog pinababana ti kabsat ken imbagana nga itedna amin kenkuana ti kuarta nga adda kadagiti bulsana. Nagtulnog ti kabsat. Nagtugaw ti lalaki iti tugaw ti drayber ken nakasaganan a mangpataray iti lugan. Ngem idi  nakitana ti Tinawen a Libro Dagiti Saksi ni Jehova iti sanguananna, insaludsodna, “Maysaka kadi a Saksi ni Jehova?”

Simmungbat ti kabsat, “Wen, apay?” Saan a simmungbat ti lalaki. Bimmaba iti lugan ken nagpadispensar gapu iti napasamak sa imbagana iti kabsat nga agsublin iti luganna. Kabayatanna, imbaga ti kaduana a mannanakaw nga isublida ti kuarta nga innalada.

“Dispensarendakami manen,” kinuna ti lalaki a nakaiggem iti paltog sa inserranan ti ridaw ti lugan. Saan nga imbaga dagiti lallaki no apay a nagbalbaliw ti panunotda, ngem nabatad a raraemenda dagiti Saksi.

Sweden: Idi Abril 2003, ti maysa nga agibumbunannag nakasabaanna ti maysa a lakay nga agtawen iti agarup 90 nga immawat iti libro a Pannakaammo. Idi kabambannuaganna pay laeng, nakapasiaren kadagiti adu a pagilian ken nangala kadagiti ladawan dagiti adu a simbaan. Gapu iti dayta, isu ket nagbalin a mararaem a miembro ti maysa a grupo ti Swedish Church. Sinaludsod ti agibumbunannag no adda napaliiw ti lakay a nagan ti Dios iti aniaman kadagiti simbaan sa impakitana kenkuana ti ladawan ti nagan ti Dios iti maysa kadagiti simbaan idiay Sweden. Daytoy ti nangtukay iti interes ti lakay. Immanamong a mayadalan iti Biblia ken tinagiragsakna unay dayta. Kinunana: “Nabasakon ti Biblia sipud pay idi ubingak, ken patiek nga adu ti natarusak. Ngem no idilig iti naammuak itan, maikunak nga awan ti natarusak idi.” Di nagbayag, inruginan ti tumabuno kadagiti gimong iti Kingdom Hall. Idi Hunio 2005, iti tawen a 91, imparangna ti damo a pasetna iti Teokratiko nga Eskuelaan ti Panagministro​—ti panagbasa iti Biblia. Ita, isu ket di bautisadon nga agibumbunannag ken tartarigagayanna ti mabautisaran. Dimngeg kadagiti Saksi ni Jehova idi 2003 gapu iti maysa a programa iti telebision a nangpadakes kadatayo. Kayatna a maammuan no ania ti pudno maipapan kadatayo, ket ita ammonan ti kinapudno.

[Ladawan iti panid 43]

Ni Svetlana, Kyrgyzstan

[Ladawan iti panid 47]

Ni Lucy, Uganda

[Ladawan iti panid 52]

Ni Graciela, Venezuela

[Ladawan iti panid 55]

Ni Renildo ken ti pamiliana, Brazil

[Ladawan iti panid 57]

Da Dale ken Peteli, Tuvalu

[Ladawan iti panid 57]

Ni Cecilia, New Zealand

[Ladawan iti panid 58]

Ni Elena, Samoa

[Ladawan iti panid 61]

Da Pavel ken Mayya, Belarus

[Ladawan iti panid 61]

Ni Richard ken ti asona a ni Irvin, Britania