Surat ti Bagi a Manarawidwid

“MAADDAANKAY koma iti di kaikarian a kinamanangngaasi ken talna manipud iti Dios nga Amatayo ken iti Apo a ni Jesu-Kristo.” Daytoy a kablaaw ti inusar ni Pablo kadagiti adu a suratna kadagiti kongregasion. Kasta met ti tarigagayanmi nga agpaay kadakayo amin.​—Efe. 1:2.

Anian a yamantayo iti di kaikarian a kinamanangngaasi ni Jehova babaen ti subbot a sakripisio ni Kristo Jesus! Babaen ti subbot, naaddaantayo iti naanamongan a takder iti imatang ti Dios. Pulos a saantay a maaddaan iti kasta babaen ti bukodtayo laeng a panagregget, kasanoman ti kinaaneptayo nga agadal iti Biblia, mangikasaba iti naimbag a damag, wenno mangaramid kadagiti dadduma pay a kinaimbag. Mapakawan dagiti basbasoltayo ken naikkantayo iti gundaway nga agbiag nga agnanayon, saan a kas bayad dagiti panagreggettayo, no di ket kas sagsagut a mangiparangarang iti di kaikarian a kinamanangngaasi ni Jehova babaen ken Jesu-Kristo.​—Roma 11:6.

Insurat ni Pablo kadagiti kapammatianna: “Ipakaasimi . . . kadakayo a saanyo nga awaten ti di kaikarian a kinamanangngaasi ti Dios ket maikapiskayo iti panggepna. Ta kunana: ‘Iti makaay-ayo a tiempo dinengngegka, ket iti aldaw ti pannakaisalakan tinulonganka.’ Adtoy! Itan ti kangrunaan a makaay-ayo a tiempo. Adtoy! Itan ti aldaw ti pannakaisalakan.” Adda “makaay-ayo a tiempo” sakbay ti pannakadadael ti Jerusalem idi umuna a siglo. Naisalakan iti naespirituan a wagas dagiti napudno ti panagpuspusoda a tattao a  mangay-ayat ken ni Jehova. Idi agangay, nagbanag daytoy iti pannakaispal dagiti amin a matalek a nagtalaw idiay Jerusalem sakbay ti pannakadadaelna idi tawen 70 K.P.​—2 Cor. 6:1, 2.

Ita, agbibiagtayo met iti “makaay-ayo a tiempo” ken iti “aldaw ti pannakaisalakan.” Dagidiay awaten ni Jehova kas adipenna ken naisalakanen iti naespirituan a wagas ket addaan iti namnama a maispal iti “dakkel nga aldaw ni Jehova” a nakaas-asidegen.​—Sof. 1:14.

Dakkel nga annongen ti ited kadatayo ti iyaay ti dakkel nga aldaw ni Jehova. Pakdaarantayo dagiti tattao maipapan iti dayta nga aldaw ken tulongantayo dagiti napudno ti panagpuspusona a magunggonaan iti di kaikarian a kinamanangngaasi ni Jehova tapno maisalakanda met. Nabigbig ni Pablo ti kinaserioso daytoy nga annongen. Insuratna: “Pudno unay, asiak pay no diak indeklara ti naimbag a damag!” Inyebkasna pay ti riknana babaen kadagitoy a sasao: “Siuutangak . . . agpadpada kadagiti masirib ken kadagiti nakuneng: gapuna adda kinagagar iti biangko a mangideklara ti naimbag a damag.”​—1 Cor. 9:16; Roma 1:14, 15.

Manungsungbattayo ken ni Jehova no saantayo nga ikankano ti napateg a trabaho a panangpakdaar kadagiti tattao. Ammotayo ti kinuna ni Jehova ken ni propeta Ezequiel: “Anak ti tao, inaramidka a managwanawan iti balay ti Israel, ket masapul a dumngegka iti sasao manipud ngiwatko ket masapul a pakdaaram ida manipud kaniak. No kunaek iti maysa a nadangkes, ‘Di bumurong a mataykanto,’ ket pudno a saanmo a pakdaaran ken pagsawan tapno pakdaaram daydiay nadangkes manipud nadangkes a dalanna tapno isu taginayonem a sibibiag, yantangay nadangkes, matayto gapu  iti biddutna, ngem ti darana singirekto iti bukodmo nga ima.”​—Ezeq. 3:17, 18.

Dagiti maudi nga aldaw ket narigat a pakilangenan. Saan a nalaka a balansien dagiti bambanag a mainaig iti pamilia, sekular nga aktibidad, aktibidad ti kongregasion, ken panangasaba. Maysa pay, adu kadakayo ti masapul a mangdaer iti sakit, panagleddaang, panaglakay wenno panagbaket, ken uray pay ibubusor. “Madagdagsenan” ti kaaduan kadakayo. Kayatmi nga iyebkas ti pannakipagriknami kadakayo maitunos iti kinuna ni Jesus: “Umaykayo kaniak, dakayo amin a mabambannogan ken madagdagsenan, ket pagin-awaenkayto.” (Mat. 11:28) Kayatmi nga iyebkas ti nabara a komendasionmi kadakayo amin a mangikagkagumaan nga agtultuloy nga agserbi a simamatalek ken ni Jehova iti laksid dagiti karit, dadakkel man wenno babassit.

Kas resulta ti naganetget a panangasaba ken panangisuroyo ken gapu iti pamendision ni Jehova, agpromedio iti 4,762 ti nabautisaran iti kada lawas iti intero a lubong. Idi napalabas a tawen serbisio, adda 1,375 a kabbuangay a kongregasion. Namnamaen ken ikarkararagmi a ti baro a libro nga Ania a Talaga ti Isursuro ti Biblia? a magun-odanen iti nasurok a 120 a pagsasao ket riniwriw ti matulonganna a magunggonaan iti di kaikarian a kinamanangngaasi ken ti talna nga aggapu ken ni Jehova bayat daytoy “aldaw ti pannakaisalakan.”

Namnamaenyo a patpatgen ken ikarkararagandakayo ti Bagi a Manarawidwid. Agyamankami met kadagiti karkararagyo nga agpaay kadakami.

Dagiti kakabsatyo,

Bagi a Manarawidwid Dagiti Saksi ni Jehova