Dagiti Tampok iti Napalabas a Tawen

“IDAYDAYAWKONTO ni Jehova bayat ti panagbiagko. Mangipaayakto iti samiweng iti Diosko bayat nga addaak.” (Sal. 146:2) No sibibiag pay koma ti salmista, ania ket ngatan a ragsakna a makakita nga ita pay laeng ti kasayaatan a pannakaidaydayaw ni Jehova! Resulta dayta ti libro nga Ania a Talaga ti Isursuro ti Biblia? a mangdandanon iti puso ti adu a tattao a mangbirbirok iti kinapudno maipapan iti Dios.​—Ara. 17:27.

Tapno narayrayray ti pannakaidaydayaw ni Jehova, adu a sanga ti nangyurnos kadagiti klase a pakasursuruan iti sabali a lenguahe tapno dagiti agibumbunannag ken payunir maidanonda ti naimbag a damag iti ad-adu pay a tattao. Nalabit matignayka a mangutob no kasano a mapalawam ti ministeriom babaen ti panagsursuro iti sabali a lenguahe.

 Ti sabali pay a pamay-an ti panangidayaw ken ni Jehova ket ti tallo a lawas a sangalubongan a kampania a panangiwaras iti espesial a handbill a mangipakpakaammo kadagiti “Asidegen ti Pannakaisalakan!” a Kombension Distrito, a naangay iti agarup 155 a pagilian. Riniwriw nga agibumbunannag iti Pagarian manipud iti 99,000 a kongregasion ti nakiraman iti daytoy damo a kampania. “Natignay ti dadduma a kabbaro nga irugidan ti mangasaba, ken adda dagidiay di aktibo a nagutugot nga agbalin nga aktibo manen,” insurat ti Komite ti Kombension. Adda maysa a kabsat a lalaki a di aktibo iti 35 a tawen nga immawat iti handbill iti mismo a ridawna. Sipud idin, saanen a limmangan kadagiti gimong! Dagiti sumaganad ket sumagmamano laeng kadagiti kapadasan a naawat manipud kadagiti nagduduma a sanga.

Francia

Adda agassawa a Katoliko a nakakita iti handbill iti pagtaengan ti sinarungkaranda a kabagian. Naginteresda kadagiti saludsod a nailanad iti dayta a handbill. Inkuyogda ti tallo nga annakda idi timmabunoda iti kombension. Apaman a simmangpetda idiay pagkombensionan, adda attendant a sibabara a nangkablaaw ken nangted kadakuada kadagiti Biblia sa pinagtugawna ida iti abay ti maysa a pamilia a Saksi. Tallo a kilometro laeng ti nagbaetan ti pagtaengan dagitoy a pamilia! Nagkakaduada iti agmalem ken inyurnosda ti panagadal iti Biblia. Makalawas kalpasan ti kombension, daytoy nga interesado a pamilia ket timmabuno iti gimong ti kongregasion bayat ti ibibisita ti manangaywan iti sirkito.

India

Ni Sunita, a nalatak a kumakanta ket napan nagpabuya idiay Canada. Adda dagiti Saksi sadiay a nakisarita ken nangawis kenkuana a tumabuno iti gimong iti pagsasao a Punjabi. Pinatganna ti awis ken tinagiragsakna ti gimong nangruna ta naipamaysa dayta iti Biblia. Idi naawatna ti handbill iti kombension, dagus a kinanselarna dagiti panagpabuyana iti dayta a ngudo ti lawas tapno makatabuno iti tallo nga aldaw. Saan a nagbabawyan ni Sunita dayta a desision. “Daytoy ti kinapudno,” kinunana kalpasan ti umuna nga aldaw. Apaman a nakasubli  idiay India, napan ni Sunita iti Kingdom Hall idiay lugarda, a kaduana ni nanangna, ti anakna a lalaki, ti kaanakanna, ken ti maysa a gayyemna. Idi inasitgan dagiti pastor iti dati a relihionna, inyebkasna ti pangngeddengna nga agbalin a maysa a Saksi ni Jehova. Kinapudnona, imbagana kadakuada a mapanda met idiay Kingdom Hall!

Serbia

Agnanaed idiay Belgrade ti babai a Tsino nga awagantayo iti nagan a Mei Li. Idi 2006, damo a binasana Ti Pagwanawanan iti bukodna a pagsasao. Idi naikkan ni Mei Li iti handbill a mangaw-awis kenkuana a tumabuno iti kombension idiay Leipzig, Germany, iti pagsasao a Tsino, isu ket determinado a tumabuno nupay agarup 1,000 kilometro ti kaadayo ti Leipzig idiay Belgrade. Nangala ni Mei Li iti tallo-aldaw a visa sa nageroplano a napan idiay Munich, ken naglugan iti tren nga agturong idiay Leipzig. Katupag ti sueldona iti dua a bulan ti nagastosna iti daytoy a biahe. Natukay ti pusona gapu kadagiti nasursurona iti programa ken iti pannakilangenna kadagiti dadduma pay a delegado. Idi nagsubli ni Mei Li idiay Belgrade, immanamongda ken ni nanangna nga agadal iti Biblia ken timmabunoda iti panagadal iti libro iti pagsasao a Tsino.

Estados Unidos

“Napaliiwmi nga adu ti sangaili a timmabuno iti tallo nga aldaw,” impadamag ti Komite ti Kombension. “Ti maysa kadagiti sangaili ket ti babai nga immawat iti imbitasion iti aldaw kalpasan ti panagkararagna iti Dios maipaay iti panangiwanwan iti biagna. Dua nga oras a nagmaneho tapno matabunuanna ti kombension iti Sabado ken Domingo ken immanamong nga agadal iti Biblia.” Intuloy ti report: “Adda kabsat a nangted iti imbitasion iti maysa a lalaki. Idi nakasibeten ti kabsat, isu ket kinamakam ti ama ti lalaki. Saan nga ammo ti kabsat no apay ngem naragsakan idi kiniddaw kenkuana ti ama nga agsubli tapno makapagsaritada. Iggem daytoy a tao ti Bibliana. Adu ti insaludsodna ket inrugida ti nagadal.”

Ti kabsat a lalaki inikkanna iti handbill ti maysa a lalaki nga adda iti lugar a pagibangbangonan. “Mabalin kadi nga ibagak daytoy kadagiti sabsabali?” insaludsod ti lalaki.

“Wen, mabalin!” kuna ti kabsat, ngem dina ammo a daytoy a lalaki ket adda programana iti radio tunggal agsapa ti Sabado. Tinungpal  daytoy a lalaki ti sinaona ta imbagana kadagiti sabsabali ti maipapan iti imbitasion babaen ti panangibasana iti dayta bayat ti programana! Kas resultana, adu a tattao ti nagimtuod maipapan iti handbill.

Auxiliary pioneer ti 12 ti tawenna a ni Morgan. Makalawas sakbay ti espesial a kampania, adda nakasaritana a lalaki nga adu ti saludsodna maipapan iti Biblia isu nga inawisna a dumngeg iti palawag publiko idiay Kingdom Hall-da. Timmabuno daytoy a lalaki nupay masapul a pumanaw a dagus ta makipamumpon iti maysa a kameng ti pamiliada. Idi nangrugi ti espesial a kampania, inikkan ni Morgan iti handbill daytoy nga interesado a lalaki. “Sigurado a tumabunoak iti Sabado ken Domingo, ngem agtrabahoak pay iti Biernes,” kinunana. Kalpasanna, sinaludsodna no ania ti ar-aramiden dagiti Saksi kadagiti kasta a kasasaad. “Kaaduanna nga agbakasionda iti dayta nga aldaw, ngem no dadduma, agikkatda iti trabahoda,” kuna ni Morgan.

Idi simmarungkar manen ni Morgan, imbaga ti lalaki a nagpakadan iti amona tapno  agbakasion iti Biernes ket no saan a mapalubosan, agikkat iti trabahona. Kuna ti amona a saanna nga itulok nga agikkat ti nalaing nga empleadona isu a pinalubosanna nga agbakasion iti Biernes kasta met iti Huebes tapno makapagsagana.

Timmabuno daytoy a lalaki iti tallo nga aldaw a kombension ngem saan laeng nga is-isuna. Kimmuyog dagiti 8 a kameng ti pamiliana ken ti 12 a gagayyem ken dagiti pamiliada​—agdagup daytoy iti 35 a tattao! Idi imbagana ken ni Morgan nga adda kaduana nga agarup 30, kinuna ni Morgan, “Diak maireserba ti kasta kaadu a tugaw.”

“Maawatak,” kinunana. “Agtugawkaminto lattan iti sadinoman a bakante.” Siempre nakabirokda amin iti komportable a pagtugawan.

“TI LIBRO . . . KET MANGISURSURO A KAS ITI INARAMID NI JESUS”

Ipakita dagiti report a ti libro nga Ania a Talaga ti Isursuro ti Biblia? a maus-usar kas katulongan iti panangyadal ket napaneknekan a naintiempuan ken makagunggona iti trabaho a panangasaba. “Luktanna dagiti matatayo ken pakanenna ti isip ken pusotayo,” kuna ti maysa nga estudiante iti Biblia. Impadamag ti maysa a manangaywan iti distrito: “Kabaelan daytoy a libro nga alaen ti atensiontayo gapu ta mangisursuro a kas iti inaramid ni Jesus. Ababa, direkta, ken nalawag dagiti nausar a sasao ngem kaskasdi a makaparegta unay.” Usigentayo dagiti sumaganad a kapadasan.

Australia

Bayat a ti kabsat a lalaki tartarimaanenna ti pagtaengan ti maysa a babai a masakit, insarsarita ti kabsat ti namnama nga itden ti Pagarian. Kalpasan ti sumagmamano nga aldaw, simmarungkar ti kabsat, a kaduana ti maysa a babai a payunir. Insaludsod ti bumalay ti maipapan kadagiti maudi nga aldaw. Inukag dagiti Saksi ti kapitulo 9 iti libro nga Isursuro ti Biblia sa inlawlawagda ti material. Napauluan daytoy iti “Agbibiagtayo Kadin Kadagiti ‘Maudi nga Aldaw’?” Nasdaaw ti babai kadagiti banag a linaon ti Biblia. “Nagbalinak nga ignorante gapu iti relihionko,” kinunana.

Insurat ti kabsat: “Idi nagsublikami, inadalmi ti kapitulo 1 a napauluan, ‘Ania ti Pudno Maipapan iti Dios?’ ken ti nainaig a  material iti apendise, a mangilawlawag no apay a naikkat ti nagan ti Dios iti dadduma a Biblia. Idi a ti babai nabasana iti pakauna ti Bibliana a dagiti managipatarus sinuktanda iti ‘Apo’ ti nagan a ‘Jehova,’ isu ket nakapungtot gapu ta naibaga kenkuana a nasayaat ti pannakaipatarus ti Bibliana. Inyebkas ti babai ti tarigagayna a tumabuno kadagiti Nakristianuan a gimong.

Belgium

Ti kabsat nga agnagan iti Ingrid nakasaritana ti maysa a babai a taga-Africa a mangidumduma kadagiti Saksi ni Jehova. Idi siaanus nga impakita ni Ingrid ti libro nga Isursuro ti Biblia, simmingpet ti babai gapu ta interesado a mangadal iti Sao ti Dios. Immanamong pay nga agadal iti Biblia ngem impapilitna a masapul a mabasa amin a teksto. Daytoy a babai ket tumabtabunon kadagiti gimong, masansan nga agkomento, ken kayatnan ti agbalin nga agibumbunannag iti Pagarian.

Brazil

Idi rugrugi ti kina-agtutubo ni Paulo, isu ket makipagad-adal iti Biblia kadagiti Saksi. Nakalkaldaang ta idi agtawenen iti 16, nagsina dagiti dadakkelna. Tapno masuportaranna ni nanangna, nakikadua ni Paulo iti banda nga agtoktokar iti samba, ngem di nagbayag, isu ket naigamer iti imoralidad ken panagbarbartek. Kaskasdi, nagtalinaed iti pusona ti dadduma a kinapudno. Kas pagarigan, naldaangan ni Paulo idi masapul nga agtokar idiay pagtataripnongan dagiti voodoo gapu ta ammona nga adda pakainaigan dayta iti demonismo. Naamirisna pay nga awan ti direksion ti biagna. Gapuna, idi adda agtutubo a kabsat a lalaki a nangipakita ken Paulo iti libro nga Isursuro ti Biblia idi 2005, natukay manen ti interesna ket intuloyna ti panagadalna iti Biblia. Idi agangay, nagikkat iti banda, ken tumabtabuno itan kadagiti Nakristianuan a gimong.

Britania

Bayat a makiramraman ni Marilyn iti ministerio a panagbalaybalay, nakasaritana ni Melanie, a maysa nga agkabannuag nga ina nga interesado iti Biblia. Nangibati ni Marilyn iti  polieto ken inkarina nga agsublinto. Ni Melanie ket nadanon ni Marilyn kalpasan ti sumagmamano nga isasarungkarna. “Dagus nga inusarko ti libro nga Isursuro ti Biblia,” kuna ni Marilyn, “ket nagbanag dayta iti progresibo a panagadal iti Biblia. Sakbay ti Krismas, nasdaawak idi kinuna ni Melanie a daytan ti maudi a gundaway nga agikabil iti Christmas tree ta nabasanan nga interamente ti libro ken naammuanna ti kinapudno maipapan iti Krismas.”

Colombia

Nagpakada ni Consuelo iti superbisorna nga agbakasion iti trabaho tapno tumabuno iti kombension distrito. Idi nagtrabahon ni Consuelo, sinaludsod ti superbisor no ania ti napasamak iti kombension. Nairugi ngarud ti makapainteres a saritaan. Idi impakita ni Consuelo ti libro nga Isursuro ti Biblia, sinaludsod ti superbisor no mabalinna a buloden dayta. Insublina ti libro kalpasan ti dua nga aldaw ket kinunana a makapainteres a basaen dayta. “Saan laeng a basaen dayta no di ket adalen,” kinuna ni Consuelo sa inlawlawagna no kasano nga adalen ti libro. “Kayatmo a sawen, mabalinko nga adalen daytoy a libro?” insaludsod ti superbisor. Gapuna, nayurnos ti panagadal, ket di nagbayag kalpasan dayta, kinasabaan daytoy a superbisor ti pamilia ken gagayyemna. Timmabuno pay kadagiti Nakristianuan a gimong, a no dadduma, kaduana ti anakna a lalaki ken ti apongna a baket.

 Guyana

Ni Joseph, a maysa a regular pioneer, ket nakairugi iti panangyadal babaen ti libro nga Isursuro ti Biblia iti maysa a lalaki nga adda idi dagiti nakasaritana a Saksi idiay kabesera a Georgetown sumagmamano a tawenen ti napalabas. Iti damo a panangyadal ni Joseph, nasangpetanna nga agur-uray daytoy a lalaki ken ti dua nga annakna agraman dagiti assawada, nga immawat met kadagiti kopia ti libro. Iti simmaganad a lawas, imbaga ti lalaki a ti libro nga Isursuro ti Biblia ket binulod ti maysa a mannursuro iti lugarda tapno basaenna. “Naglaon daytoy iti kinapudno,” kinuna ti mannursuro. Nakipagadal met daytoy a mannursuro. Kabayatanna, nadamag ti maysa a kaarruba ti maipapan iti panagadal ket sinaludsodna no mabalin a makipagadal met. Iti dayta a tiempo, inawis amin ida ni Joseph a tumabuno iti Memorial. Nupay ti lalaki a damo nga inyadalan ni Joseph ket saan a nakatabuno gapu ta masakit, nakatabuno ti pamiliana kasta met ti mannursuro ken ti pamiliana. Nagsayaat ti panagrang-ayda amin.

Poland

Bayat a mangaskasaba ni Lucjan iti lansangan, nakasaritana ti 50 ti tawenna a ni Jan, a dati a gayyemna iti eskuelaan ngem nabayagen a dida nagkita. Karaman iti saritaanda dagiti punto manipud iti libro nga Isursuro ti Biblia. Imbaga ni Jan a natayen ti asawana isu a nasursuronan ti agsigarilio ken nagbalinen a mammartek. “Nangikuyogak iti maysa a  gayyem idi sinarungkarak ni Jan kalpasan ti sumagmamano nga aldaw,” kuna ni Lucjan, “ket inur-uraynakami ni Jan. Pinatganmi ti kiddawna nga adalenmi a dagus ti libro nga Isursuro ti Biblia.” Gapu ta maipappapuso ni Jan ti kinapudno, ikagkagumaannan a daeran dagiti bisiona ken medmedan ti naalas a panagsasaona.

Espania

Apay a ti maysa a hematologo iparparegtana ti panagadal iti Biblia iti maysa a pasiente nga agsagsagaba iti depression? Adda dua a miembro ti Hospital Liaison Committee a simmarungkar iti daytoy a doktor ken pinaimaanda iti libro nga Isursuro ti Biblia. Daytoy a doktor ken ti pasientena ket agsagsagaba iti depression gapu iti nakaro a sakit. Gapu ta natukay ti pusona iti libro nga Isursuro ti Biblia, impakitana dayta iti pasientena, nga impasiguradona a no makipagadalda kadagiti Saksi, maaddaanda iti positibo a panangmatmat iti masanguanan. Kalpasan ti dua nga aldaw, ti pasiente ket immanamong nga agadal iti Biblia idi adda nakasaritana a payunir a kabsat a babai a mangaskasaba iti lansangan. Ti hematologo ket nagadal met iti Biblia ken tumabtabunon kadagiti Nakristianuan a gimong.

Zambia

Ni Goliath, a panguluen iti maysa a purok ket addaan iti dua nga asawa ken sangapulo nga anak. Nagdakkel ti rimmang-ayanda a sangapamiliaan no iti naespirituan. Nangaramid ni Goliath kadagiti panagbalbaliw di nagbayag kalpasan a nabasana ti libro nga Isursuro ti Biblia. Idi Enero 2006, timmabunoda a sangapamiliaan kadagiti Nakristianuan a gimong, ket idi Pebrero, insinana ti maikadua nga asawana ken inkallaysana ti umuna nga asawana. (Mat. 19:4-6; 1 Tim. 3:2) Idi Marso, nagikkat ni Goliath kas panguluen iti purok, ken idi Abril, nagbalin a di bautisado nga agibumbunannag agraman ti asawana a ni Esther. Nabatad a ti desisionda nga agserbi ken ni Jehova ket kagura dagiti sairo, isu a pinarigatda ni Esther. Ngem kas imbilin ti Santiago 4:7, ni Esther binusorna dagiti sairo. Ania ti resultana? “Nakaruk-atkamin ken ni lakayko iti pannakabalin dagiti sairo,” kinunana.

PANANGIKAGUMAAN A MANGASABA ITI SABALI A LENGUAHE

Adda dagiti pagilian nga aduan kadagiti imigrante a sabali ti lenguaheda, ket adu kadagitoy a tattao ti naggapu kadagiti pagilian  a maiparit ti trabaho a panangasaba. Kas resultana, ‘naluktan ti maysa a dakkel a ruangan a mangiturong iti panagaramid,’ ket adu a kakabsat ti sumsumrek iti dayta a ruangan babaen ti panagsursuroda iti sabali a lenguahe. (1 Cor. 16:9) Malaksid iti dayta, adda sumagmamano a pagilian nga aduan kadagiti katutubo nga umili nga adda bukodda a lenguahe. Dagiti agibumbunannag iti Pagarian ad-adalenda met dagitoy a lenguahe ket agap-apitda kadagiti nabaknang a gunggona.

Tapno mayadelantar ti trabaho kadagiti kasta a teritoria, adda sumagmamano a sanga nga opisina a nangorganisar kadagiti klase a pakasursuruan kadagiti sabali a lenguahe. Masansan a naipamaysa dagiti leksion kadagiti aktual a mapaspasamak iti ministerio tapno al-alisto ti panagsursuro. “Makatulong daytoy a kurso tapno nalaklakam a masursuro ti sabali a lenguahe,” kuna ni Elisa, nga agad-adal iti Albaniano.

Belgium

Impadamag ti sanga nga opisina a nasurok a 300 nga agibumbunannag ti timmabuno kadagiti 17 a klase a pakasursuruan iti sangapulo a lenguahe. Siam agingga iti 71 ti tawen dagiti estudiante. “Nasursurok ti lenguahe a Turko ken immuneg ti ayatko kadagiti tattao,” kuna ni Enora. Ni Annelies nga agad-adal iti Tsino ket ininterbiu ti reporter manipud iti maysa nga estasion ti telebision iti pagilianda. Kayat ti reporter ti mangipabuya iti estoria maipapan iti maysa a tao nga agsursuro iti baro a banag. Siempre, inlawlawag ni Annelies no apay nga agsursuro iti Tsino. Idi nagsubli ti reporter kalpasan ti makatawen, inlawlawag ni Annelies dagiti nasayaat a resulta a napaliiwna iti ministeriona. Nabatad nga inapresiar dayta ti reporter ta ti programana ket naipabuya iti oras ti aldaw nga adu ti agbuybuya iti telebision. Nairaman iti dayta ti pannakainterbiu ni Annelies kasta met ti ababa a video maipapan iti panangasabana iti maysa a Tsino nga adda iti pagurayan iti bus.

Netherlands

“Malaksid nga umadu dagiti manangaskasaba iti tay-ak a ganggannaet ti pagsasaona, dagiti klase a pakasursuruan iti sabali a lenguahe tinulonganda met dagiti kakabsat a mangidaulo kadagiti kongregasion,” insurat ti sanga nga opisina. Idiay Netherlands, adda naganat a panagkasapulan iti  kabbuangay a grupo a Romaniano ti pagsasaona. Pasaray nangorganisar ti sanga nga opisina kadagiti gimong, ngem maymaysa ti kabsat a lalaki a makabael a mangidaulo ken nakapuy pay ti salun-atna. Babaen ti klase a pakasursuruan iti sabali a lenguahe, immadu dagiti kualipikado a kakabsat a mabalin a mangidaulo. Ti maysa a kabsat ikonduktana ti linawas a panagadal iti libro, ket ti maikadua ikonduktana ti Panagadal iti Pagwanawanan, bayat a ti maikatlo ket agserbi kas managipatarus no adda dagiti agpalawag iti Olandes.

Espania

Sipud idi 2003, addan ti 48 a klase a pakasursuruan iti sangapulo a lenguahe nga inorganisar ti sanga nga opisina. Kas resultana, immadu iti kasta unay ti bilang dagiti panangyadal iti Biblia ta immabut dayta iti dandani 50,000. Da Juan ken Mari Paz, agassawa nga special pioneer, ket naawis iti pagtaengan ti maysa a pamilia a Romaniano. Di nagbayag, addan ti 16 a tattao a napan dimngeg, a pakairamanan ti 19 ti tawenna a ni Mario, nga isu ti kapasnekan a dimngeg. Nupay saan nga ammo dagiti payunir ti agsao iti Romaniano ken saan met nga ammo ni Mario ti agsao iti Espaniol, inawatna ti broshur a Kalikaguman iti bukodna a pagsasao. Iti simmaganad a lawas, kiniddaw ni Mario nga isu ket mayadalan iti Biblia. Tinabunuanna pay ti aldaw ti espesial nga asamblea uray no bassit laeng ti matarusanna. Kalpasan ti sumagmamano a lawas, tinabunuannan ti amin a gimong iti kongregasion ken mangipapaay iti simple a komento iti pagsasao nga Espaniol. Nataknengen ti panaglanglangana ken iranranudnan kadagiti sabsabali ti namnama a kabbaro a naammuanna. Ita, adda agassawa a Romaniano nga iyad-adalanna iti Biblia, ket nagsayaat ti panagrang-ay dagitoy.

Kabayatanna, nagadal da Juan ken Mari iti pagsasao a Romaniano ket di nagbayag, mangikonkonduktadan iti 30 a panangyadal iti Biblia iti dayta a lenguahe! Mangikonkondukta pay ni Juan iti panagadal iti libro iti pagsasao a Romaniano. Kalpasan ti panagadal, sangapulo nga agibumbunannag ti tumabtabuno iti klase a pakasursuruan iti Romaniano nga ikonkondukta a mismo ni Mario, ti orihinal nga estudiante iti Biblia.

Estados Unidos

Nasurok a 50 milion a tattao ti saan nga agsasao iti Ingles iti pagtaenganda. Kadagiti Saksi ni Jehova, agarup  254,000 nga agibumbunannag ti agserserbi iti 3,052 a kongregasion ken 53 a grupo nga Espaniol ti pagsasaona. Kanayonanna, adda ti 26,000 nga agibumbunannag nga agserserbi iti 690 a kongregasion ken grupo a ganggannaet ti pagsasaona malaksid iti Espaniol. Tapno lumaka ti trabaho iti daytoy naglawa a tay-ak, addan ti nasurok nga 450 a klase a pakasursuruan iti 29 a lenguahe nga inorganisar ti sanga nga opisina. “Iti napalabas a dua a tawen, addan ti uppat a kabbuangay a kongregasion iti sirkitomi,” inreport ti maysa a manangaywan iti sirkito. “Tallo kadagita ti nabuangay kas resulta dagiti klase a pakasursuruan iti pagsasao a Pranses.”

“Natungpal ti arapaapmi,” kuna ti maysa a kabsat a lalaki a nagadal iti Espaniol. “Adun a tawen a kayatmi ken ni baketko ti agbalin a misionero, ngem adda dua nga annakmi. Ita dadakkeldan, ken nagretiroakon iti sekular a trabahok. Tallo a bulanen nga immakarkami ken ni baketko iti kongregasion nga Espaniol ti pagsasaona ken naikkankamin kadagiti paset iti Teokratiko nga Eskuelaan ti Panagministro. Adu met ti sarsarungkaranmi ken posible a makairugikami iti lima a panangyadal iti Biblia. Ita ta 67 ti tawenkon ken 64 met ken ni baketko, naammuanmi a saan a lapped ti edad iti panagsursuro iti ganggannaet a pagsasao.”

No saan a nabunga ti teritoriayo ket ipalubos ti kasasaadyo nga agsursurokayo iti sabali a lenguahe tapno umakarkayo iti teritoria nga addaan iti ganggannaet wenno katutubo a pagsasao, apay a diyo ikararag dayta? Mabalin a nagsayaat ti ibunga ti kasta nga addang ken mabalin a parayrayenna ti ministerioyo.

Alemania

Nangrugi dagiti klase a pakasursuruan iti sabali a lenguahe iti daytoy a pagilian nasurok a 30 a tawenen ti napalabas, ket nasurok a 1,000 nga estudiante ti nasanayen iti siam a lenguahe, manipud iti Albaniano agingga iti Vietnamese. “Nasaysayaat nga amang daytoy ngem iti kurso nga inadalko iti unibersidad,” kuna ti maysa a kabsat a babai. Gapu ta  adalen met dagiti estudiante no kasano ti panagpampanunot dagiti tattao a naggapu iti sabali a pagilian, nalaklakada a danonen ti puso dagidiay kasabaanda.

Ni Paula, nga agtawen iti 82, ket nagadal iti pagsasao a Vietnamese ken agdaldaliasat iti agarup 150 kilometro tapno makatabuno kadagiti gimong. “Natabbedak no iti panagsursuro iti sabali a lenguahe,” kunana, “ngem agyamanak unay ken ni Jehova ta inikkannak iti kasta unay a rag-o.” Inyadalan ni Paula ti maysa a pamilia a Vietnamese. Ti asawa a lalaki ti immuna a naginteres iti kinapudno. Kalpasanna, naginteres met ni baketna. Ita, agpadadan a bautisado.

Sipud idi nabautisaranda, natungpal ti arapaap daytoy nga agassawa kasta met ti balasangda, nga agserbida ken ni Jehova iti pagilian a nakayanakanda. Nangibangonda iti balay a mabalin a pakaangayan dagiti gimong ti kongregasion. Agserserbi kas panglakayen ken auxiliary pioneer ti asawa a lalaki idinto ta regular pioneer met ni baketna. Nalapunos iti rag-o ni Paula idi nakaawat iti surat manipud iti daytoy a pamilia. Nailanad iti dayta a surat a ti ama binautisaranna a mismo ti balasangna. Kastoy ti insurat ti balasang ken ni Paula: “Patgek a ‘Lelang.’ Mailiwak kenkan. Masansan a pampanunotenka. Sika ti agnanayon a lelangko a Paula. Patpatgenka.” Anian a makaparagsak daytoy a kapadasan para iti ipatpategtayo a kabsat, a nagsursuro iti sabali a lenguahe uray no baketen!

Canada

Sipud idi 2002, agdagupen iti 554 nga estudiante ti timmabuno iti 31 a klase a pakasursuruan iti sabali a lenguahe a maang-angay iti sangapulo a siudad. Ni Paul, a maysa a panglakayen ken paralitiko, ket agad-adal iti Mandarin. Ni Linda, a nars a mangas-asikaso kenkuana ket maysa a Tsino. Saan a kayat ni Linda a denggen ti mensahe maipapan iti Pagarian gapu ta dagiti Saksi ket pinadpadakes ti relihionna. Maysa nga aldaw, kayat ni Paul ti dumngeg iti palawag publiko iti pagsasao a Mandarin isu a nagpakadua ken ni Linda idiay Kingdom Hall. Nagtulnog ni Linda ngem saan a nakilangen ken saan a nangipakita iti interes. Di nagbayag kalpasanna, kinaduana ni Paul iti panagadal iti libro. Iti daytoy a gundaway, dimngeg a naimbag ni Linda, a maysa nga agsolsolo nga ina, gapu ta ti topiko ket  maipapan iti biag ti pamilia. Kalpasanna, immanamong nga agadal iti Biblia idi adda kabsat a babai a payunir a nangitukon kenkuana iti dayta. Alisto a rimmang-ay ni Linda iti naespirituan ket maysa itan a kabsattayo.

Adu ti katutubo nga umili idiay Canada nga addaan iti bukodda a lenguahe. Sumagmamano a tawenen ti napalabas, ti kabsat a babai a payunir nga agnagan Carma kinasabaanna ti lalaki a maysa a Blackfoot Indian. “Saanna a kayat ti dumngeg idi inkagumaak a kasabaan iti Ingles,” kuna ni Carma, a kaduana dagiti dadakkelna nga agnanaed iti lugar a nailatang kadagiti Blackfoot. “Kunana a miembroak iti relihion dagiti puraw ken ti Biblia ket libro kano dagiti puraw. Pinampanunotko, ‘No ad-adu laeng koma ti ammok maipapan iti lenguahe ken kultura dagiti Blackfoot, nalabit dumngeg kaniak.’” Desidido ni Carma a mangadal iti lenguahe ti lalaki ket idi agangay, tinulonganna ti 23 nga agibumbunannag a timmabuno iti linawas a klase a pakasursuruan iti lenguahe dagiti Blackfoot.

Ti maysa kadagiti estudiante kinasabaanna ti agassawa a Blackfoot a sumarsarungkar iti masakit nga anakda idiay ospital. Maragsakan dagitoy nga agassawa gapu ta interesado ti kabsat a babai iti lenguaheda, isu nga intedda kenkuana ti adresda. Naammuan ni Carma a ti asawa a lalaki ket isu met laeng ti lalaki a nakasaritana makatawenen ti napalabas! Gapuna, kinuyogna ti kabsat idi napan  simmarungkar. “Saanda laeng a dimngeg no di ket immanamongda pay iti ibagbaga ti Biblia,” kuna ni Carma. “Ti kabsat ket nangitukon iti Biblia ken katulongan iti panagadal iti Biblia. Nakalua ti babai a nangarakup kadagita a publikasion, bayat nga agtungtung-ed met ni lakayna kas tanda ti pananganamongna. Agad-adal itan ti asawa a babai, ken dumdumngeg ni lakayna bayat dagiti panagadalna.”

Kas panangipatuldo iti panagballigi ti klase a pakasursuruan iti sabali a lenguahe, impadamag ti sanga nga opisina nga adda 34 a Blackfeet a timmabuno iti Memorial idi 2006 a naangay iti mismo a lenguaheda!

Italia

Agarup 7,200 nga agibumbunannag ti timmabuno kadagiti klase a pakasursuruan iti 18 a lenguahe. Maysa kadagitoy nga estudiante ti nakisarita ken ni Samson, a naggapu iti pagilian a maiparit ti trabaho mainaig iti Pagarian. Iti edad a 24, inrugi ni Samson ti aw-awaganna a panagdaliasat buyogen ti namnama. Dinaliasatna nga umuna ti desierto sa naglayag nga agturong idiay Italia. Naam-ammona sadiay ti maysa a kabsat a lalaki a nagsursuro iti mismo a lenguahena. Dimngeg ni Samson buyogen ti interes ken timmabuno pay iti Nakristianuan a gimong. Awan ti komunikasionda iti uneg ti sangapulo a bulan, ngem idi nagkitada manen, ni Samson ket inyadalan ti kabsat. Naikondukta ti panagadal kadagiti restawran, estasion ti tren,  ken kadagiti paradaan. Kalpasan a timmabuno iti Memorial, inrugin ni Samson ti agbiag maitunos iti Biblia. Insinana pay ti babai a kabkabbalayna iti agarup makatawen. Ita, isu ket maysan a kabsattayo.

Nicaragua

Bayat ti 2006, nakaipaay dagiti kakabsat iti nasayaat a panangsaksi iti umuna a gundaway kadagiti katutubo a Mayangnan. Kaaduan a Mayangnan ket miembro ti relihion a Moravian a maysa a grupo dagiti Protestante. Gagangay a ti pastor ti agserserbi kas pannakamayor iti tunggal ili. Maysa kadagitoy a pastor ti nangsalungasing iti tradision ket pinalubosanna da Hamilton ken Abner​—nga special pioneer—​nga agtalinaed iti ili. Nangbirok pay iti pagdagusanda ken inikkanna ida iti kompleto a Biblia iti pagsasao a Mayangna. Dagiti kakabsat inadalda dayta a pagsasao ket di nagbayag, adun ti iyad-adalanda iti Biblia. Kinapudnona, nagserbi dagiti payunir kas managipatarus idi adda 13 a tattao a timmabuno iti gimong bayat ti damo nga ibibisita ti manangaywan iti sirkito, ken 90 ti timmabuno iti Memorial. Iti Memorial, dagiti kakabsat impatarusda iti Mayangna ti dua a kanta, ket naimpusuan a nagkanta ti amin.

Gapu iti nagpaiduma nga interes dagiti tattao, immanamong ti sanga nga opisina nga agtalinaed sadiay dagiti payunir agingga iti kaykayatda. Ngem umanamong ngata dagiti lokal nga agtuturay? Iti maysa a miting iti ili, adda dagiti nangakusar kadagiti Saksi ni Jehova kas antikristo. Nupay kasta, ti maysa a lalaki nga agserserbi kas konsilio iti ili ket nakipagadal kadagiti Saksi. “Sipud idi adda ditoy ilitayo dagiti dua nga agkabannuag a lallaki,” kinunana, “pulos a diak pay nakita a nagpaluto wenno nagpalabada. Isuda a mismo ti mangas-asikaso kadagiti kasapulanda. Inadalda pay  ti lenguahetayo! Maysa pay, insuroda kadatayo dagiti bambanag manipud iti Biblia a pulos a ditay ammo. No dagitoy a lallaki ket saan nga imbaon ti Dios, sigurado a naumada koman.” Napalubosan dagiti kakabsat nga agtalinaed iti ili.

PANAGIPATARUS AGPAAY KADAGITI TULENG

Estados Unidos

Idi 2006, nairuar ti DVD a The Good News According to Matthew iti American Sign Language. Iti damo a gundaway, dagiti tuleng nga agibumbunannag nabasada dagiti intero a kapitulo ti Baro a Lubong a Patarus iti bukodda a lenguahe. “Daytoy ti kasayaatan pay laeng a surat a naawatko manipud ken Jehova,” kuna ti maysa a panglakayen a tuleng. Kinuna ti sabali pay, “Maawatak itan no kasano a ti tunggal bersikulo ket maitunos iti kontekstona.” Ti maysa a kabsat a babai a nangikeddeng a mangbasa iti maysa a kapitulo iti tunggal aldaw, insuratna: “Diak napupuotan a nalpaskon ti uppat wenno lima a kapitulo isu a dandani naladawak iti nakaeskediul nga aramidek iti dayta nga aldaw!”

Brazil

Kasta unay ti irarang-ay ti trabaho kadagiti teritoria nga ayan dagiti tuleng. Iti agdama, addan ti  232 a kongregasion ti sign-language, a mangbukel iti sangapulo a sirkito ken maysa a distrito. Nasurok a 1,000 a panglakayen ken ministerial nga adipen ken 146 nga special pioneer, a 8 kadakuada ket tuleng, ti mangas-asikaso iti trabaho kadagiti kongregasion ti sign-language ken iti tay-ak. Kadagiti panglakayen ken ministerial nga adipen, nasurok a 100 ti nagkuna a ti irarang-ayda iti naespirituan ket maigapu kadagiti nagsayaat a publikasion nga ipabpablaak ti organisasion ni Jehova agpaay kadagiti tuleng. Dagitoy a katulongan iti panagadal ramanenda ti Pannakaammo a Mangiturong iti Biag nga Agnanayon, Ania a Talaga ti Isursuro ti Biblia?, Agtultuloyka nga Agbantay!, Ania ti Kalikaguman ti Dios Kadatayo?, ken Ti Pagwanawanan. Sipud idi 2006, ti Teokratiko nga Eskuelaan ti Panagministro ket naibagay iti kasapulan ti sign language, a nausar dagiti publikasion a magun-odan iti dayta a lenguahe.

Kinuna ti maysa a mannursuro nga agtawen iti 30: “Adun a relihion ti nastrekko ngem bigbigek a dagiti laeng Saksi ni Jehova ti talaga a makabael a mangisuro iti Biblia kadagiti tuleng.” Imbagana a saan a lohikal ken saan nga epektibo ti isursuro ti relihionna. Determinado daytoy a mannursuro nga agtultuloy a tumabuno kadagiti Nakristianuan a gimong iti laksid ti panangumsi dagiti gagayyemna. Sapay koma ta itultuloy ni Jehova nga iyadani iti Anakna dagiti kasta a napudno ti panagpuspusoda a tattao!​—Juan 6:44; Apoc. 14:6.

DAGITI KASO ITI KORTE

Eritrea

Gapu ta saan a nagbutos dagiti kakabsattayo iti nasional nga eleksion, ti dekreto ti presidente idi 1994 imbilangna a saanen nga umili iti Eritrea dagiti Saksi ni Jehova. Kas resultana, rimmigat iti kasta unay ti biag dagiti kakabsattayo isu a ginasut ti pimmanaw iti dayta a pagilian ken nagkamangda iti sadinoman. Adda met dagidiay nagtalinaed, a pakairamanan dagiti addaan annak nga ages-eskuela. Apaman a makadap-awda iti maikasiam a grado, amin nga estudiante​—lalaki man wenno babai—​ket masanay nga agsoldado. Gapuna, adu nga agtutubo ti nagsardeng nga ageskuela apaman a makaturposda iti maikawalo a grado.

 Napeggad ti tumabuno kadagiti gimong ti kongregasion; adda dagiti kongregasion a naaresto! Kaskasdi, dagiti natured a kakabsat itultuloyda ti ‘agtulnog iti Dios kas agturay imbes a kadagiti tattao.’ (Ara. 5:29) Iti agdama, adda nakabalud a 31 a kakabsat, a pakairamanan ti 73 ti tawenna a kabsat a lalaki a taga-Netherlands. Naibalud dagiti dadduma gapu iti panagkedkedda nga agserbi iti militar. Idi pay 1994 a nakabalud ti tallo a kakabsat​—da Paulos Eyassu, Isaac Mogos, ken Negede Teklemariam.

Francia

Idi Pebrero 25, 2005, adda naisubmitir nga aplikasion iti European Court of Human Rights (ECHR) maipapan iti saan a nainkalintegan a pannakaipataw ti buis iti Association of Jehovah’s Witnesses. Nasurok a 874,000 a tattao iti intero a nasion ti nagpirma iti petision maibusor iti daytoy a kinaawan ti hustisia. Gapuna, ti dokumento ket naisubmitir iti Korte. Kaskasdi, idi Enero 2006, dagiti agipatpataw iti buis imbilinda kadagiti kakabsat a bayadanda ti utangda a buis.

Dagus a nakiuman dagiti Saksi ni Jehova iti ECHR tapno ipakaammoda dagitoy a pasamak. Saan nga intungtungkua ti Korte nga adalen ti aplikasion. Idi Mayo 4, 2006, ti Korte kiniddawna iti gobierno ti Francia a mangisubmitir iti surat a mangilawlawag iti dasigna. Ti panggep daytoy ket tapno maikeddeng no nasalungasing ti wayawaya ti relihion dagiti Saksi ni Jehova ken no adda aniaman a panangidumduma.

Alemania

Idi Pebrero 10, 2006, ti Federal Administrative Court idiay Leipzig inkeddengna a ti Estado ti Berlin masapul a bigbigenna a maysa a publiko a korporasion ti Religious Association of Jehovah’s Witnesses idiay Alemania. Daytoy ti nagpatinggaan ti 15 a tawenen a kaso iti korte. Ti Religious Association ket saanen a mapatawan iti buis ken addaanen kadagiti dadduma a pribilehio a tagtagiragsaken dagiti kangrunaan a relihion. Idi Hulio 5, 2006, ti Estado ti Berlin opisial a binigbigna ti asosasion dagiti Saksi ni Jehova, nga intedna ti sertipiko kadagiti dua a miembro ti Komite ti Sanga.

Grecia

Adun a tawen a naitantan wenno saan a naipalubos ti pannakaibangon wenno panangusar kadagiti Kingdom Hall  gapu ta ikalikagum ti linteg a masapul nga aprobaran pay dayta ti obispo ti Greek Orthodox. Idi Mayo 30, 2006, inyetnag ti parliamento a ti Ministry of National Education and Religions ti mangasikason kadagiti permiso mainaig kadagiti relihion a saan nga Orthodox.

Idi Hulio 15, 2005, dagiti mangimatmaton iti adda linongna nga estadium a para publiko idiay Loutraki, Corinth, imbabawida ti panangipaabangda kadagiti pasilidad para iti kombension distrito dagiti kakabsat. Kinuestion ti administrasion no dagiti Saksi ni Jehova ket “mabigbigbig a relihion.” Nakibiang ti ombudsman, ket idi Pebrero 2006, inkari dagiti opisial iti estadium nga ikabilanganda dagiti baro nga aplikasion gapu ta ammodan a mabigbigbig ti relihion a Saksi ni Jehova.

Nepal

Idi Oktubre 2005, naballigi ti pannakairehistro dagiti Saksi ni Jehova kas maysa a narelihiosuan nga organisasion. Ti maysa a panggep a nailanad iti karta daytoy nga organisasion ket tapno “maitandudo ti naespirituan nga edukasion.” Makatulong daytoy a pannakairehistro iti pannakayadelantar ti naimbag a damag iti daytoy a pagilian nga ad-adu dagiti Hindu.

Romania

Nupay nairehistro dagiti Saksi ni Jehova kas maysa a relihion idi 1990, saanda a nairaman iti listaan nga inyetnag ti Estado idi 1997 a nakailanadan dagiti relihion nga opisial a mabigbigbig. Kas resultana, saan a napalubosan dagiti kakabsat a mangibangon kadagiti Kingdom Hall, ken saanda a nailaksid nga agsoldado​—dagiti kalintegan a maipapaay kadagiti mabigbigbig a relihion. Ti Romanian Supreme Court imbilinna iti gobierno a bigbigenna dagiti Saksi ni Jehova kas maysa a relihion, ngem maulit-ulit a linaksid ti gobierno dayta a bilin. Idi Marso 2006, babaen ti tulong ti ECHR, naki-areglo ti gobierno kadagiti Saksi ni Jehova ket dita a nagpatingga ti siam a tawenen a kasoda iti korte. Inaklon ti gobierno a ti organisasiontayo masapul a tagiragsakenna “amin a kalintegan ken obligasion nga ipapaay ti linteg” kadagiti mabigbigbig a relihion.

Turkey

Idi nagaplikar ti sanga nga opisina para iti pannakairehistro dagiti Saksi ni Jehova kas maysa a relihion, imbaga ti gobierno a narigat a mapatgan dayta a pannakairehistro, uray  no nabaliwanen dagiti linteg tapno tumunos iti pagalagadan ti European Union. Daytoy a kaso ket adda pay laeng iti nababa a korte ngem mabalin a maipanto iti ECHR.

Ti sabali pay a parikut ket maipapan iti panagsoldado. Mamitlo wenno mamimpat iti kada tawen a maayaban dagiti kakabsat nga agsoldado agingga a lumbesda iti maikalikagum nga edad. Masentensiaanda tunggal agkedkedda. Adda dagidiay maulit-ulit a nagmulta, ken naibalud met dagiti dadduma. Idi 2004, nagdarum ni Yunus Erçep iti ECHR. Nupay namin-adu a nagmulta, naibalud latta ni Kabsat Erçep idi Oktubre 2005. Sangapulo ket dua a bulan ti sentensiana ngem nawayawayaan idi nakabusbosen iti lima a bulan. Iti aldaw a pannakawayawayana, isu ket naayaban manen iti korte ken nagmulta gapu kadagiti panagkedkedna idi nga agserbi iti militar.

Uzbekistan

Iti napalabas nga uppat a tawen, addan ti nasurok a 1,100 a kaso dagiti kakabsattayo a naaresto, naibalud, namulta, wenno nakabkabil. Nasurok a 800 kadagitoy ti napasamak bayat ti Memorial idi 2005 ken idi 2006. Kadagiti adu a lugar, simmangpet dagiti polis a nakaiggem iti batuta ken nakalugan kadagiti bus ket inarestoda amin a timmabuno. Adu ti namulta ken nakaro met ti pannakakabkabil dagiti dadduma.

Nupay kasta, nakaipaay dagiti kakabsat iti nasayaat a panangsaksi. Usigenyo ti kapadasan ti maysa a kabsat a lalaki ken kabsat a babai a naidarum gapu iti panangasaba ken itatabunoda kadagiti gimong ti kongregasion. Kiniddaw ti abogadoda a mausig iti korte dagiti literatura a nakompiskar bayat ti pannakaaresto dagiti kakabsat. Naibasa iti napigsa ti libro a Pannakaammo ken ti broshur a Kalikaguman, ket sinurot ti ukom ti pannakaibasa ti sumagmamano a pasetna. Gapu ta nangnangruna nga interesado ti ukom iti kapitulo 5 ti libro a Pannakaammo a napauluan, “Makinpanagdayaw ti Anamongan ti Dios?” kiniddawna nga agtultuloy ti pannakaibasa dayta agingga iti pangngaldaw.

Apaman a nakotar ti Mateo 28:19, 20, kinuna ti ukom, “No kasta, dayta ti makagapu no apay a mangaskasabakayo!” Idi sinaludsodna no apay a naidadanes dagiti Saksi ni Jehova iti rehimen a Nazi nga inturayan ni Hitler, isu ket naikkan kadagiti kopia ti tallo a videocassette: Purple Triangles, Jehovah’s Witnesses  Stand Firm Against Nazi Assault, ken The Bible​—Accurate History, Reliable Prophecy. Nupay namulta ti kabsattayo a lalaki ken babai, nakasabaanda dagiti opisial iti korte ken dagiti polis iti wagas a dida pulos ninamnama.​—Luc. 21:12, 13.

Sudan

Idi Hunio 2006, nairehistron dagiti Saksi ni Jehova kas maysa a relihion iti walo nga estado. Kadagitoy a lugar, nawayan dagiti kakabsat nga agibangon kadagiti Kingdom Hall ken mangangay kadagiti dadakkel nga asamblea. Nawayada payen nga umawat kadagiti literaturatayo, ken nakaipasdekdan iti opisina idiay Khartoum.

Russia

Idi Abril 12, 2006, ti maysa a kongregasion a buklen ti 200 nga agibumbunannag idiay Moscow ang-angayenna ti Memorial iti naabangan a pasilidad idi giddato a simrek ti nasurok a 50 nga armado a polis. Ti panguluen ti Lyublino Police Department pinasardengna ti Memorial, a kunkunana a saan a maipalubos dagiti kasta a taripnong gapu ta maiparit ti trabaho dagiti Saksi ni Jehova idiay Moscow. Sinukimat dagiti polis dagiti papeles a pakabigbigan dagiti timmabuno, kinumpiskarda dagiti literatura, sa impanda dagiti 14 a kakabsat iti estasion dagiti polis idiay Lyublino, a sadiay a naibaludda iti nasurok nga uppat nga oras. Adda maysa a kabsat  a lalaki a napan idiay departamento dagiti polis tapno mangipaay iti legal a tulong, ngem indumudom dagiti polis ken pinaturonganda iti kutsilio. Imbagada kenkuana a saan nga agdarum. Nupay kasta, idi Abril 17, nagdarum ti 4 kadagiti 14 a kakabsat maibusor iti Lyublino Police Department.

Nangrugi ti pannakabista ti kaso idi Mayo 16 idiay Lyublino District Court ti Moscow ket ti ukom a ni Z. V. Zubkova ti nangidaulo. Saan a presente dagiti opisial a rimmubbuot​—dagiti laeng abogadoda ti timmabuno. Saan nga inlawlawag ti ukom no apay a saanna a pinatgan dagiti abogado dagiti kakabsat a mangilinteg iti 50 nga argumento ken nagkedkedanna ti kaaduan kadagiti mosionda. Iti kasumbangirna, ti ukom pinatganna ti singasing ti abogado dagiti polis, a sukimatenna ti kopia ti desision nga inyetnag ti Golovinsky Intermunicipal District Court a nangiparit iti trabaho dagiti Saksi ni Jehova idiay Moscow ken ti kapanunotan ti sikologo a ni L. V. Kulikov, a nagtestigo maibusor kadagiti Saksi ni Jehova bayat dayta nga immun-una a pannakabistada.

Idi Hunio 15, 2006, inkeddeng ti ukom a saan a nainkalintegan ti pannakaibalud dagiti nagdarum ngem awan ti imbagana maipapan iti pannakariribuk ti Memorial. Inkeddengna pay a ti naabangan nga auditorium ket saan a maitutop a pakaangayan dagiti narelihiosuan nga okasion. Nagapelar dagiti Saksi Jehova idiay Moscow City Court idi Hunio 30, 2006, nga imbagada dagiti adu a sinalungasing ti Lyublino District Court bayat ti pannakabistada. Naballigi ti pannakaangay ti Memorial kadagiti 22 a dadduma pay a lugar idiay Moscow.

Iti panglukat a parapo daytoy a Tampok iti napalabas a tawen, nadakamat ti tarigagay ti salmista: “Mangipaayakto iti samiweng iti Diosko bayat nga addaak.” (Sal. 146:2) Ita, riniwriw nga adipen ni Jehova ti nangipakita iti nawadwad a pammaneknek nga addaanda iti kasta met laeng a napinget a tarigagay. Wen, bayat nga agtultuloy ti agdama a sistema ti bambanag, ditay koma ipalubos a dagiti pagbaludan, dekreto dagiti opisial, wenno ti lenguahe ti mangpasardeng kadatayo a mangipaay iti samiweng iti nailangitan nga Amatayo!

[Kahon/Ladawan iti panid 9]

Saan Laeng a Basta Imbitasion

Adda kupon a nakaimprenta iti handbill a mabalin a suratan dagiti tattao no kayatda ti agkiddaw iti panagadal iti Biblia, ti kopia ti libro nga Isursuro ti Biblia, wenno agpada a kiddawenda dagita. Di nagbayag, adun a nasuratan a kupon ti naawat dagiti sanga nga opisina iti intero a lubong. Ti sanga nga opisina ti Estados Unidos impadamagna a nakaawatda iti nakurang la bassit a 2,000 a kupon ken adda 300 a nagkiddaw a mayadalan iti Biblia. Nalawag nga agtultuloy a mangpataud kadagiti nasayaat a resulta ti kinagaget dagiti kakabsattayo nga agiwaras iti handbill.

[Kahon/Dagiti Ladawan iti panid 12, 13]

Agkaraibus Dagiti Libro nga Isursuro ti Biblia!

Iti ngudo ti Hulio 2006, nasurok nga 47 milion a kopia ti libro nga Isursuro ti Biblia ti nayimprenta iti 155 a lenguahe, malaksid pay iti 10 nga edision ti Braille. Iti uneg laeng ti maysa a bulan, agpromedio iti 42,000 a libro ti inaldaw a pedpediduen dagiti kongregasion iti Estados Unidos. Kakatlo iti dayta a bilang ti masapul a maitulod a dagus. Ti pamilia ti Bethel iti intero a lubong ibilangna a maysa a pribilehio ti agtrabaho a sipipinget tapno maipaay dagita a literatura kadagiti kakabsattayo.

 [Kahon/Dagiti Ladawan iti panid 28, 29]

 Pannakaidedikar Dagiti Sanga

Albania

Nagpatingga idi 1992 ti 50 a tawenen a pannakaiparit ti trabaho dagiti kakabsat. Adda 325 a kakabsat a timmabuno iti pannakaidedikar ti baro a sanga nga opisina a masarakan iti pagbeddengan ti Tiranë. Karaman kadagiti timmabuno ket ti uppat a nataenganen a Saksi a nagserbi iti Dios bayat dagiti tawen ti pannakaiparit ti trabaho. Adda pay dagiti delegado manipud iti 32 a pagilian. Idi simmangpet dagiti misionero idi 1992, siam laeng ti bautisado nga agibumbunannag iti pagilian ngem ita, addan ti 3,617. Da Theodore Jaracz ken Gerrit Lösch a miembro ti Bagi a Manarawidwid ti nagpalawag iti programa a naangay idi Hunio 3, 2006. Iti simmaganad nga aldaw, nagpalawagda iti nawayang nga estadium, iti imatang ti 5,153 a timmabuno, a dumdumngeg a naimbag iti laksid ti napigsa a tudo.

Croatia

Idi napan a tawen, immawat ti Croatia iti dua a bendision: ti pannakairuar ti kompleto a Baro a Lubong a Patarus ti Nasantuan a Kasuratan iti pagsasao a Croatiano bayat ti kombension distrito ken ti pannakaidedikar ti sanga nga opisina a nabiit pay a napalawa idiay Zagreb. Iti Biernes, Agosto 11, adda ti 142 a dimngeg ken ni Kabsat Jaracz bayat ti panangipaayna iti palawag ti dedikasion. Naangay ti damo a dedikasion idi 1999, pito a tawenen ti napalabas.

Slovenia

Iti Sabado, Agosto 12, impaay ni Kabsat Jaracz ti palawag ti dedikasion iti baro a sanga nga opisina idiay Kamnik, a maysa nga ili nga agarup 20 kilometro ti kaadayona iti amianan ti kabesera a Ljubljana, ken agarup 130 kilometro iti laud ti Zagreb, Croatia. Idi damo, agnanaed ti pamilia ti Bethel iti nagduduma nga apartment iti kabesera. Gapuna, kasta unay ti ragsakda ta makapagnaeddan a sangsangkamaysa kas pamilia! Ti 144 a timmabuno ket naggapu iti 20 a pagilian.

[Dagiti Ladawan]

Patakder iti sanga nga opisina idiay Albania

Ti espesial a gimong a tinabunuan ti 5,153

Dagiti napalawa a pasilidad iti sanga idiay Croatia

Sanga nga opisina ti Slovenia

[Ladawan iti panid 6]

Panangasaba iti babai a tuleng, Brazil

[Ladawan iti panid 17]

Ti damo a klase a pakasursuruan iti pagsasao a Hindi, Alemania

[Ladawan iti panid 19]

Da Linda ken Paul

[Ladawan iti panid 19]

Ni Carma a mangaskasaba iti lenguahe dagiti Blackfoot

[Ladawan iti panid 20]

Ti klase a pakasursuruan iti Espaniol, Roma, Italia

[Ladawan iti panid 20]

Panangasaba ken ni Samson

[Ladawan iti panid 21]

Da Hamilton ken Abner a mangyad-adal iti Biblia iti lenguahe a Mayangna

[Ladawan iti panid 27]

Ti Kingdom Hall idiay makin-abagatan a Sudan