Report iti Intero a Lubong

ASIA KEN TI MAKINTENGNGA A DAYA

PAGILIAN 47

POPULASION 3,930,343,401

AGIBUMBUNANNAG 591,750

PANANGYADAL ITI BIBLIA 477,609

Japan

Idi kabulanan ni Miho, marigatanen a makiraman iti ministerio. Gapu ta kayatna nga itultuloy ti agserbi kas payunir, kiniddawna iti manangaywan iti serbisio ti adres dagiti pagtaengan a narigat a makasabaan, kas kadagiti apartment a nainget ti pannakabantayna. Agarup sangagasut nga adres ti naited kenkuana. Iti pagtaenganna, inawaganna ti amin a kabaelanna nga awagan. Awan ti mayat a dumngeg idi damo, isu a naawaganna amin ida iti uneg laeng ti 30 minuto. Kalpasanna, sinuratanna dagiti inawaganna. Naibatay ti suratna iti aniaman nga impormasion a nangngegna idi immawag, kas iti sangit ti maysa nga ubing. No matantiarna a nakadanonen ti suratna, umawag tapno ilawlawagna ti pagimbagan ti panangyaplikar iti Nainkasuratan a giya a nadakamat iti suratna. Naminsan, adda maysa nga asawa a babai a saanna a kayat ti makisarita kenkuana iti telepono. Gapuna, isu ket sinuratan ni Miho. Idi immawag manen ni Miho, ti laeng estudiante nga anak a babai ti bumalay ti adda iti pagtaenganda, ken nabasana ti surat ni Miho. Isu ti kinasabaan ni Miho ken inkarina a patulodanna iti surat a naglaon kadagiti sumagmamano a Nainkasuratan a balakad maipapan iti panageskuela. Imbagana pay nga umawagto manen. Ti ina ti nakasungbat iti awag ket kinunana nga adda parikut ti anakna iti eskuelaan ngem nakatulong kano kenkuana dagiti imbaga ni Miho. Kalpasan ti sumagmamano pay nga awag ken surat, nakipagadalen dagiti agina.

 Nepal

Ni Prem, a maysa a mannursuro, ket nabayagen a birbirokenna ti kinapudno. Binasana ti Biblia ken nakimismisa iti simbaan nga asideg iti eskuelaan a pagisursuruanna. Ngem saan a nasungbatan dagiti saludsodna ken naupay gapu ta ti pastor ket kanayon a dumawdawat kadagiti donasion. Nagkararag ni Prem, a kiniddawna ti panangiwanwan ti Dios tapno mabirokanna ti relihion a makatulong kenkuana a mangammo iti kinapudno. Idi immakar ni Prem ken nagisuro iti sabali nga eskuelaan, sinaludsodna kadagiti baro a kaarrubana no sadino ti ayan ti simbaan. Adda estudiante a lalaki nga agnanaed iti dayta met laeng nga apartment, a ti nanangna ket sumagmamanon a daras a timmabuno kadagiti gimong idiay Kingdom Hall. Gapuna, idiay Kingdom Hall ti imbaga ti lalaki a papanan ni Prem. Iti palawag publiko a nangngeg ni Prem, nailawlawag ti maipapan iti Pagarian ti Dios, maysa a topiko a paginteresanna unay. Nayurnos ti panagadalna iti Biblia. Gapu ta maragsakan a masungsungbatan met laengen dagiti saludsodna, regularen a makigimgimong ni Prem ken ti pamiliana. Nagsuratda iti simbaanda tapno ibagada nga agikkatdan iti relihionda gapu ta kayatda ti agbalin a Saksi ni Jehova.

Taiwan

Nakiddaw kadagiti estudiante iti elementaria a mangisuratda iti salaysay para iti tinawen a salip iti panagsurat. Ti temana ket “Ti Paboritok a Libro.” Ti agtawen iti sangapulo a ni Weizhen insuratna a ti Biblia ti paboritona a libro. Saanna laeng a kinomentuan ti kinaumiso dagiti padto ti Biblia ken ti nasayaat a panangiwanwan nga ipapaay ti Sao ti Dios, no di ket inlawlawagna pay a ti Biblia ti nangsungbat kadagiti salsaludsod a saan a kabaelan a sungbatan dagiti mannursuro ken padana nga estudiante iti makapnek a pamay-an. “Kuna ti maestromi a bakes kano ti nagtaudan dagiti tattao,” insurat ni Weizhen. “Inut-utobko: ‘No bakes ti nagtaudan ti tao, saan kadi a rumbeng nga ipaayantayo ida iti nadayaw a debosion ken naimpusuan a panagyaman? Apay ngarud nga ipupoktayo ida kadagiti zoo? Saan ngata a nadagsen a basol dayta iti biangtayo?’ Ngem nalawag ti sungbat ti Biblia: Iti kinapudnona,  saantayo a nagtaud kadagiti bakes. Imbes ketdi, dagiti kapuonantayo ket naaramid iti tapuk ken naparsuada sigun iti ladawan ti Dios.” Inngudona ti salaysayna babaen ti panangisuratna: “Adda pagsasao idi ugma, ‘Ti panagbasa iti libro ket kasla pananglukat iti lakasa ti gameng.’ Para kaniak, napatpateg ti Biblia ngem ti balitok. Gapuna, daytoy a libro ti kaay-ayok a basaen.” Nupay adda pay laeng iti maikapat a grado ni Weizhen, inatiwna dagiti adda iti maikalima ken maikanem a grado gapu ta ti salaysayna ti nangabak iti umuna a premio. Idi insalaysayna ti kapadasanna, inadawna ti Hebreo 4:12 sa kinunana, “Itedko amin a dayaw ken ni Jehova a Dios.”

Mongolia

Ni Bolortsetseg, maysa a kabbaro a nabautisaran a kabsat a babai idiay Mongolia, nadamagna nga adda natay a kabagianna ken kasta unay ti ladingit ti nabalo a ni Evsanaa. Gapuna, isu ket pinatulodan ni Bolortsetseg kadagiti amin a publikasiontayo a nakaimprenta iti pagsasao a Mongolian. Binasa dagita ni Evsanaa iti maysa la a rabii. Kabigatanna, inawaganna ni Bolortsetseg tapno awisenna a mapan a dagus idiay balayda tapno agsaritada. Nangikuyog ni Bolortsetseg iti maysa a kabsat a babai idi simmarungkar ken ni Evsanaa, a nakaad-adu ti insaganana a saludsod. Sigagagar nga inimdenganna dagiti sungbat manipud iti Biblia. Kalpasan ti napaut a saritaan, inlawlawag dagiti kakabsat nga ad-adda a magunggonaan ni Evsanaa no saggaysa laeng a topiko ti pagsasaritaanda a naan-anay. Intukonda ti panagadal iti Biblia. Dagus nga immanamong ni Evsanaa nga agadal iti mamitlo iti kada lawas. Iti uneg ti makabulan, imbellengnan dagiti didiosenna ken timmabunon kadagiti gimong. Dua a bulan kalpasan ti panagbalinna a di bautisado nga agibumbunannag, nakasaganan nga ag-auxiliary pioneer ngem nailawlawag kenkuana a masapul nga agpabautisar pay nga umuna. Saan a naupay ni Evsanaa no di ket determinado a mangbusbos iti di kumurang a 50 nga oras iti tunggal bulan iti panagserbi iti tay-ak ken padpadaananna ti kombension tapno agpabautisar.

Kazakhstan

Idiay siudad ti Rudny, adda maysa a payunir a nakisarita iti agkabannuag a lalaki nga agnagan iti Nikolay, a  nagkuna nga interesado iti panagadal iti Biblia. Nupay kasta, adda problema. Nakaad-adayo ti purok a pagnanaedan ni Nikolay ken ti pamiliana, ken manmano laeng a mapan idiay Rudny tapno sumarungkar kadagiti kabagianna. Sinaludsod ti kabsat no mabalinna a sarungkaran ni Nikolay idiay purokda, ngem inlawlawag ni Nikolay a 200 kilometro ti kaadayo ti purokda ken nagrigat a papanan.

Nupay kasta, ti kabsat insuratna ti adres ni Nikolay ken inkarina nga agkitadanto manen. Ti kabsat inyurnosna ti sumarungkar idiay purok da Nikolay ken nangawis iti kaduana a maysa a kabsat a lalaki ken dua a kabsat a babai iti kongregasionda. Kalpasan ti dua a lawas, nagluganda iti tren. Idi nakadanonda iti kaasitgan nga estasion ti tren, naammuanda a 18 kilometro pay ti kaadayo ti purok da Nikolay ken awan ti lugan a mapan sadiay. Magna laeng ti mabalinda nga aramiden. Saan a kaskarina daytoy ta panawen idi ti lam-ek ken nakalamlamiis ti palayupoy ti angin. Di nagbayag, adda nangsardeng kadakuada a traktora a mangibibiahe iti tangke ti gatas. Kinuna ti drayber nga agluganda​—iti uneg ti tangke! Impagarup dagiti agibumbunannag nga agang-angaw ti lalaki, ngem namaga ken awan ti nagyan ti tangke, isu a nagluganda. Nupay nalamiis iti uneg ti tangke, nasalaknibanda met iti napigsa nga angin. Kinuna ni drayber nga idissaagna ida pito a kilometro manipud iti papananda. Itultuloydanto sadiay ti magmagna. Dua nga oras pay a nagnagnada iti pito a kilometro nga agturong iti purok da Nikolay.

Naragsakan ni Nikolay ken ti asawana a ni Valya idi nakasangpet sadiay dagiti kakabsat. Inikkanda dagiti sangailida iti pagpapudot ken pinakanda ida sa nagsasaritada maipapan iti Biblia. Kalpasan ti dua a lawas, nagsubli manen sadiay dagiti kakabsat a taga-Rudny. Malagip ti kabsat a lalaki a payunir: “Sinabatnakami ni Nikolay idiay estasion ti tren. Adu a pumurok ti mayat a makisarita ‘kadagidiay simmangpet a nakalugan iti tangke ti gatas,’ gapuna, nangaramid ni Nikolay iti urnos tapno makasaritami amin nga interesado. Immay amin a nailista  sigun iti eskediulda ken immanamongda nga agadal iti Biblia.” Idi agangay, dandani amin a nakipagadal iti Biblia iti dayta a purok ket nagsayaat ti panagrang-ayda iti naespirituan. Nabautisaran da Nikolay ken Valya kalpasan ti dua a tawen. Di bautisado nga agibumbunannag itan ti dua nga anakda a lalaki, ken nabiit pay a nadutokan ni Nikolay kas panglakayen iti dayta a naiputputong a grupo.

Georgia

Nangaskasaba dagiti payunir kadagiti naiputputong a rehion iti kabambantayan ti Georgia. Dua a kabsat a babbai a payunir ti nagnagna iti walo a kilometro nga agturong iti nasulinek a purok iti ungto ti desdes iti bantay ken nangasabada sadiay iti binalaybalay. Di nagbayag, adda maysa a lakay iti dayta a purok a nangpasardeng ken ni Ketevan, maysa kadagiti kabsat a babbai, ken impailawlawagna no apay a mangaskasaba idinto ta isu ket saan nga Orthodox. Inkagumaan ni Ketevan nga ilawlawag ngem saan a dimngeg ti lakay. Kalpasanna, indumudomna ni Ketevan sana pinangpang-or iti sarukod. Adu ti nakakita iti napasamak ket nagdindinamag dayta iti purok. Di nagbayag, nagsubli manen ni Ketevan iti dayta a purok tapno mangasaba. Idi isu ket nakita ti maysa a babai a dati a bumusbusor, kinunana: “Nagsublika manen uray no nakabkabilka! Dayawek ti kinaturedmo! Inta idiay balay tapno makapagsaritata a naimbag.” Kalpasan a dimngeg ti babai, kinunana nga uray ania nga aldaw, nawaya ni Ketevan a sumarungkar iti pagtaenganna tapno mangasaba manen kenkuana.

 AFRICA

PAGILIAN 57

POPULASION 802,232,357

AGIBUMBUNANNAG 1,043,396

PANANGYADAL ITI BIBLIA 1,903,665

Rwanda

Adda idi tiempo a dagiti lumablabas iti kalsada nakapidutda iti libro a Mabalinyo ti Agbiag nga Agnanayon iti Paraiso a Daga. Impakitada dayta iti maysa a mamangulo iti relihionda a Protestante. Binasa dayta ti panguluen ti relihion buyogen ti napasnek nga interes sa binirokna dagiti Saksi ken nagpayadal iti Biblia kadakuada. Immuneg ti pannakaammona maipapan iti kinapudno ti Biblia isu a nagikkat iti relihionna ken nagpabautisar kas Saksi. Kabayatanna, sireregta nga insarsaritana ti kinapudno kadagiti dadduma a dati a karelihionanna, ket 25 kadakuada ti nagikkat met iti relihionda ken nagbalin a Saksi ni Jehova. Ti lalaki a nangsukat kenkuana kas mamangulo iti simbaan ket nakipagadal met iti Biblia kadagiti Saksi. Idi agangay, nagikkat met iti relihionna. Ita, tumabtabunon kadagiti Nakristianuan a gimong ken  inyebkasnan ti tarigagayna nga agbalin nga agibumbunannag. Nabautisaran ti asawana iti nabiit pay nga aldaw ti espesial nga asamblea. Nakaskasdaaw a panunoten a nangrugi amin dagitoy iti maysa a libro a napidut iti kalsada!

Côte d’Ivoire

Bayat a magmagna ti agtutubo a Saksi a ni Berenger a mapan idiay kabesera a siudad ti Abidjan tapno makiraman iti panagserbi iti tay-ak, adda nalabsanna a babai nga aglaklako iti tinapay. Di napupuotan ti babai a natnag ti kuartana a 5,000 franc ($10, U.S.). Idi pinidut dayta ni Berenger tapno itedna iti babai, adda sabali a babai a nagpukkaw, “Itedmo kaniak dayta a kuarta; kukuak dayta!” Nupay kasta, sinaludsod ni Berenger iti babai no mano ti kantidad ti kuarta. Nakapungtot ti babai sa pimmanaw. Kalpasanna, kinamakam ni Berenger ti babai a nakatinnag iti kuarta. Nasdaaw ta saan nga aklonen ti babai nga isu ti nakaregreg iti dayta no di ket kinunana, “Al-allilawennak. Siguro kayatnak a takawan.” Ngem gapu ta nadlawna ti kinapasnek ken kinapinget ni Berenger, binilangna ti kuartana ket naduktalanna a talaga nga agkurang iti 5,000 franc. Balor dayta ti 50 a tinapay.

Kinuna ni Berenger: “Intedko kenkuana ti kuarta ken imbagak nga inaramidko dayta gapu ta ti Diosko a ni Jehova isursurona kadagiti adipenna nga agbalinda a napudno. Nagyaman kaniak ti babai ken kinunana: ‘No ti ugali ti tunggal maysa ket kas kadagiti Saksi ni Jehova, aggagayyem koma amin a tattao. Daytoy ti umuna a gundaway a nakakitaak iti agtutubo a nangaramid iti kas iti inaramidmo.’ Pinaimaak iti polieto, ket inkarina a dumngegton kadagiti Saksi ni Jehova. Iti dayta nga aldaw, 50 a franc laeng ti kuartak iti agmalem. Kaskasdi, maragsakanak ta nakaaramidak iti umiso.”

Democratic Republic of Congo

Ni Eugene, a maysa a panglakayen, ket agtartrabaho iti pagtagilakuan iti diamante kas paradalus ken parasiput. Malagipna: “Maysa a rabii, adda lalaki nga immay iti pagtagilakuan tapno mangilako kadagiti diamante nga aggatad iti $22,000 (U.S.). Ngem naregreg iti  bolsana ti pakete nga ayan dagiti diamante. Matartaranta a nangbirok iti dayta ngem saanna a nabirokan. Kabigatanna, ti amona ken ti katrabahuanna sinawarda ti kalsada ngem saanda a nabirokan ti pakete. Kalpasanna, inrugikon ti agsagad iti ruar. Iti sango a mismo ti ridaw ti pagtagilakuan, nakitak ti pakete dagiti diamante! Pinidutko dayta sa nagtarayak a napan iti amok, a maysa a lalaki a taga-Belgium. Kasta unay ti siddaawna ta naaramidko dayta. Imbagak kenkuana a maysaak a Saksi ni Jehova ken addaanak iti nadayaw a panagbuteng iti Diosko. Inapresiar unay ti makinkukua kadagiti diamante ti panagbalinko a napudno ken kinunana, ‘Diak makappapati!’

“Kinuna ti maysa kadagiti katrabahuak, ‘Eugene, sinalimetmetam ti reputasiontayo!’

“‘Pagyamanan! Ni Jehova ti maidaydayaw ta insuronak nga agbalin a napudno,’ insungbatko.”

Angola

Bayat a sumarsarungkar iti away ti misionero a ni João, nga agserserbi kas manangaywan iti sirkito, kayatna nga ipabuya kadagiti lumugar a kakabsat ken interesado a tattao ti DVD a napauluan iti Noah Walked With God​—David Trusted in God. Ti kabsat ket nangitugot iti bassit a generator, dua a loudspeaker, ken bassit a gasolina, malaksid iti laptop a kompiuterna. Iti umuna a purok, isu ket nagdagus iti bassit a balay a naaramid iti pitak, ken inyurnosna nga ipabuya ti video iti rumabrabii. “Nasdaawak,” kinunana, “ta agarup 38 a tattao ti immay, a nangitugotda kadagiti tugaw, bangko, bato, lata ti gatas, ken dadduma pay a banag a mabalinda a pagtugawan. Nailet ti balay ta dina pay malaon ti uray kagudua la koma iti bilang dagiti tattao nga immay, isu nga iti kannag ti nangbuyaanmi iti video. Iti sidong ti namituen a langit, imparabawko ti kompiuterko iti sumagmamano a damili a ladrilio, ket adu kadagidiay immay nagbuya ti nagdalupisak iti daga a naap-apan iti namaris a tela iti Africa.” Dagus a nagwaras ti damag iti dayta a lugar, ken adu ti napan kadagiti purok a sinarungkaran ni João. “Awan ti mayat a pumanaw  idi nalpasen ti pabuya,” malagipna. “Adu ti nangibaga a dayta ti kasayaatan a rabii iti biagda ken inyebkasda ti napasnek a panagyamanda ken ni Jehova gapu iti dayta a naespirituan a probision.” Bayat ti tallo a lawas nga isasarungkar ni João kadagiti grupo iti away, 1,568 a tattao ti nakabuya iti DVD!

Ghana

Ni Vida, a maysa nga agsupsuplay iti taraon idiay Accra, ket agduadua a mangitulod kadagiti kappuros a nateng idiay sanga nga opisina ti Ghana. Apay? Gapu ta imbaga ti pastorda a dagiti Saksi ket nauyong kadagiti saan a Saksi. Ngem idi damo a nangitulod ni Vida kadagiti taraon, nasdaaw ta naisem ken managyaman dagiti nangpasangbay kenkuana nga agtartrabaho iti kosina. Bayat dagiti simmaganad a lawas, am-ammonan dagiti boluntario iti sanga nga opisina, a napaliiwna a nasingpetda amin ken naammuanna a saan nga umiso ti imbaga kenkuana ti pastorda.

Gapu ta magagaran ni Vida a mangammo iti ad-adu pay, kiniddawna a mayadalan iti Biblia nupay saanna nga ammo ti agbasa. Iti uneg ti innem a bulan, nasursuro ni Vida a basaen ti bukodna a Biblia, ken iti nabiit pay a kombension distrito, isu ket nabautisaran. Iti laksid ti panangumsi dagiti kameng ti pamilia ken dati a kakaduana, natulongan ni Vida ti kasinsinna a makakualipikar kas di bautisado nga agibumbunannag.

Sudan

Bayat ti pannakiraman ti maysa a kabsat a babai iti ministerio a panagbalaybalay, adda dua a babbai a nangpasangbay kenkuana. Nakaskasdaaw ta saan a kayat dagiti babbai ti agpatulong iti kabsat a mangbirok iti teksto iti Bibliada. Idi agangay, naammuan ti kabsat a dagiti babbai ket pinakdaaran ti padi iti dayta a lugar a no adda Saksi ni Jehova a mangiggem iti Bibliada, dagus nga agbaliw ti linaonna ken tumunos iti pannursuro dagiti Saksi. Saan pay ketdi a kayat dagiti babbai ti makialamano iti kabsat. Ngem idi nabirokanda a mismo ti teksto, naammuanda a ti binasada ket maitunos iti imbaga ti kabsat. Inkeddengda ti agadal iti Biblia gapu ta naduktalanda a nagulbod ti padi. Naklaat ti padi isu nga  inkarina nga ikkanna ida iti kuarta a panggatangda iti taraon​—no la ket ta isardengdan ti makipagadal iti Biblia. Ania ti insungbatda? “Saanmi a kayat ti mabsog iti taraon. Kaykayatmi ti mabsog iti sao ti Dios.” Tumabtabuno itan dagitoy a babbai kadagiti gimong iti kongregasion.

Ethiopia

Saan unay a naginteres ni Awoke iti kinapudno nupay ti asawana ket agarup sangapulo a tawenen a Saksi. Nupay kasta, idi nagbiahe iti sabali a deppaar ti pagilian tapno agadal iti dua a bulan, inkeddengna a biroken dagiti Saksi. Apaman a simmangpet, isu ket napan iti maysa nga opisina a pagtartrabahuan ti maysa a kabsat a babai. Nabayagen nga inkarkararag ti kabsat nga adda koma kabsat a lalaki a mapan tumulong iti kongregasion sadiay. Idi naibaga kenkuana nga adda lalaki nga agbirbirok kadagiti Saksi ni Jehova, nalagipna ti inkararagna. Idi nakitana ni Awoke, a nanakman ken nadalimanek ti panagkawkawesna, impagarupna nga isun ti kabsat a lalaki nga inkarkararagna. Siraragsak nga immasideg ken sibabara a kinablaawanna ni Awoke. Gapu ta kasta unay ti ragsak ti kabsat, saan a naitured ni Awoke nga ibaga nga isu ket saan a Saksi, ken saanna a kayat a mabainan ti kabsat idi inyam-ammona kenkuana dagiti kakabsat. Kabayatan ti kaaddana sadiay, tinabunuanna ti amin a gimong. Idi nalpasen ti klasena ken panawenen tapno agawid idiay lugarda, adda grupo dagiti kakabsat a babbai a nangawis kenkuana iti pangngaldaw, ken kiniddawda nga isu ti mangikararag. Nalagipna no kasano ti panangikararag ni baketna bayat a nakadalungdong, a nagyaman gapu iti taraonda, ken impadalanna dayta iti nagan ni Jesus. Naballigi ti pannakairingpas ti kararag ken ti panagkakaan. Gapu ta natukay ti pusona iti kinaimbag a naipakita kenkuana bayat ti kaaddana sadiay, inkeddeng ni Awoke ti agbalin a pudpudno a kabsat. Apaman a nakaawid iti pagtaenganda, inruginan ti agadal iti Biblia, ket nabautisaran iti nabiit pay nga asamblea. Kasta unay ti ragsak ni baketna. Iti sabali a bangir, mangbirbirok met ni Awoke iti gundaway tapno ibagana ti kapadasanna iti kongregasion a sinarungkaranna.

 EUROPA

PAGILIAN 46

POPULASION 730,776,667

AGIBUMBUNANNAG 1,506,019

PANANGYADAL ITI BIBLIA 744,319

Ukraine

Adda maysa nga elektrisian a napan idiay Kingdom Hall tapno tarimaanenna ti kontador. Pagaammo iti purokda a mammartek daytoy a lalaki. Bayat a tartarimaanenna ti kontador, napaliiwna ti teksto para iti tawen: “Umadanikayo iti Dios, ket isu umadaninto kadakayo.” (Sant. 4:8) Nagsardeng iti apagbiit sa nagsaludsod iti maysa kadagiti kakabsat: “Talaga kadi a posible a makaadanitayo iti Dios? Dagiti ngay managbasol, mabalinda kadi ti umadani iti Dios?” Simmungbat ti kabsat babaen ti Biblia ken inawisna ti lalaki a makigimong. Iti Domingo, inkeddeng ti lalaki ti makigimong iti sabali a purok gapu ta saanna a kayat a makita dagiti kaarrubana nga isu ket mapan idiay Kingdom Hall. Ngem nairana a ti ispiker iti palawag publiko iti dayta nga aldaw ket ti maysa a panglakayen a kapurokanna. Inkagumaanna ti aglemmeng apaman a nakitana ti kabsat. Ngem isu ket nabigbig ken sibabara nga inabrasa ti panglakayen. Gapu iti dayta, inkeddeng ti lalaki a makigimongen iti mismo a purokda. Isu ket nayadalan iti Biblia, ken nabautisaran kalpasan ti makatawen.

Iti dayta a tiempo, agtartrabaho idiay ballasiw taaw ti asawa ti lalaki. Saanna a patien a saanen nga agbarbartek ni lakayna ken maysan a Saksi ni Jehova. Gapuna, nagawid tapno mapaneknekanna. Maragsakan ta saanen nga agbarbartek ni lakayna ken as-asikasuennan dagiti annakda, ngem dina kayat ti panagbalinna a Saksi ni Jehova. Ngem maysa nga aldaw, kiniddaw ni lakayna, “Mabalin kadi a mapantayo a sangapamiliaan idiay Kingdom Hall?” Immanamong ti babai. Isu ket nayadalan  iti Biblia, ken di nagbayag, nabautisaran agraman ti tallo a babbalasangda. Gapuna, ti maysa a teksto ti Biblia tinulonganna ti lima a tattao nga umadani iti Dios.

Grecia

Napaliiw ti kabsat a lalaki nga adda maysa a babai a regular a sumarsarungkar iti bassit a kapilia nga adda iti igid ti kalsada a pagpagnaanna nga inaldaw no mapan agtrabaho. Dagiti kasta a kapilia nga adda iti igid ti kalsada idiay Grecia ket gagangay a tanda ti lugar a nakapasamakan ti makapapatay nga aksidente. Tapno matulongan daytoy a babai, nangaramid ti kabsat iti ababa a surat a naglaon iti makaliwliwa ken Nainkasuratan nga impormasion maipapan iti kasasaad dagiti natay ken ti namnama a panagungar. Insuratna pay ti nagan ken numero ti teleponona sa imbatina ti surat iti uneg ti kapilia. Kabigatanna, immawag kenkuana ti babai ken nangipakita iti napasnek nga interes iti naimbag a damag. Regular itan a masarsarungkaran daytoy a babai.

Norway

Adda innem a kakabsat a babbai a napan iti maysa a restawran kalpasan ti panagserbida iti tay-ak. Pagtutungtonganda ti nagsayaat a palawag publiko a nangngegda idiay Kingdom Hall dua nga aldawen ti napalabas. Maipapan dayta iti panagungar. Pagammuan ta immasideg iti lamisaanda ti maysa a babai a dumdumngeg. Sinaludsodna no mabalin a makikatugaw tapno denggenna ti pagsasaritaanda. Imbagana kadakuada a nabiit pay a natay dagiti dadakkelna. Nairugi ngarud ti makapabileg a saritaan. Dagiti kakabsat dinawatda ti numero ti telepono ti babai, ket maysa kadakuada ti nangsarungkar ken nangyadal iti Biblia kenkuana idi agangay.

Lithuania

Ni Olga, a maysa nga agtutubo nga amin-tiempo a managebanghelio ket nakairugi iti panagadal iti Biblia iti mismo a ruangan ti maysa a babai a Ruso. Bayat ti maysa kadagiti immun-una a panagadalda, impailawlawag ti babai no ania ti kayat a sawen ti sasao iti Biblia a dagiti “maudi nga aldaw.” (2 Tim. 3:1) Inkari ni Olga nga ilawlawagna dayta iti sumaruno nga isasarungkarna. Iti agarup makabulan, saan a nadanon ni Olga daytoy a babai iti pagtaenganna, nupay namin-adu a simmarungkar. Uray no awan ti nangilukat iti ridaw, napaliiw ni  Olga nga adda sumirsirip kenkuana iti abut a pagsiripan. Kinuna ni Olga: “Diak kayat a panunoten a saanen a kayat daytoy a babai nga itultuloy ti panagadalmi iti Biblia. Nalabit, sabali ti sumirsirip iti ridaw. Gapuna, inkeddengko ti agsurat kenkuana tapno ilawlawagko ti banag a pakaseknanna. Kalpasan ti tallo nga aldaw, simmarungkarak manen iti pagtaenganna. Anian a ragsakko idi linuktanna ti ridaw! Natukay ti pusona iti surat ken ti personal nga interes a naipakita kenkuana.”

Nagyaman ti babai ken ni Olga sa kinunana: “Namin-adu a binasak ti suratmo ken natarusak amin a linaonna.” Kas resultana, saanen nga iti ruangan ti pagad-adalanda iti Biblia no di ket iti uneg ti balay ti babai, nga us-usarenda ti libro nga Isursuro ti Biblia. Ita, tunggal mapan mangyadal ni Olga, isu ket sibabara a paspasangbayen daytoy nga interesado a babai.

Switzerland

Idiay dakkel a siudad ti Geneva, adda kabsat nga agnagan iti Marie a nakisarita iti maysa a babai nga agnanaed idiay Makintengnga a Daya. Yantangay agad-adal ni Marie iti pagsasao nga Arabe, dayta a lenguahe ti inusarna a nakisarita iti babai. Kinuna ni Marie nga isu ket mamati iti maymaysa a pudno a Dios. Gapuna, ti babai inarakup ken inagkanna ni Marie, a kunkunana nga isu ket malmalday ken kalkalpasna a nagkararag idi nakisarita kenkuana ni Marie. Kinuna ti babai nga iti sumaruno nga aldaw, agawiden iti pagilian a nakayanakanna. Inukag ni Marie ti Bibliana sa binasana ti 1 Pedro 3:7 ken inlawlawagna a ti Dios ipatpategna dagiti babbai. Kalpasanna, imbagana a kayat ni Jehova a ti tunggal asawa a lalaki padayawan ken raemenna ti asawana. Nasdaaw ti babai isu nga insaludsodna: “Maysaka kadi nga anghel, wenno maysaka a tao? Malmaldaanganak ta  saan nga ar-aramiden ni lakayko no ania ti kuna ti Dios iti daytoy a teksto. Regular nga agkarkararagak iti Dios tapno tulongannak. Ket ita inukagmo daytoy a libro sa imbasam kaniak daytoy a teksto.” Kalpasanna, kiniddaw ti babai nga isurat ni Marie ti imbasana a teksto. Iyawidna kano dayta a papel tapno ipakitana iti pamiliana ken estoriaenna kadakuada ti naisangsangayan a kapadasanna. Maladingitan ni Marie ta pumanawen ti babai, ngem nagtulagda a maaddaanda iti regular a komunikasion.

Netherlands

Ti siudad ti Rotterdam ti ayan ti maysa kadagiti kadakkelan a puerto iti lubong. No adda maisanglad a kargamento, mayakar dagita kadagiti trak sa maitulod kadagiti pagilian iti European Union wenno iti labesna. Gapuna, nakaad-adu a trak ti lumablabas idiay Netherlands. Iti maysa kadagiti kangrunaan a kalsada nga agturong iti kabangibang nga Alemania, adda nalawa a pagsardengan dagiti trak. Inoras nga agingga iti 1,500 a trak ti sumarsardeng iti dayta. Gapu ta adu a drayber ti masapul nga aginana sadiay, ginundawayan dagiti kakabsat ti oportunidad a mangasaba iti tunggal trak. Naam-ammoda dagiti drayber a taga-Europa, Makintengnga a Daya, ken dandani amin a pagilian a dati a sakup ti Soviet. Talaga a kaay-ayo dagiti drayber a basaen dagiti magasintayo. Idi napan a tawen, 82 a daras a nangasaba dagiti kakabsat idiay pagsardengan dagiti trak ken nakaipaimada iti nasurok a 10,000 a magasin iti 35 a lenguahe.

 DAGITI KONTINENTE TI AMERICA

PAGILIAN 56

POPULASION 883,782,291

AGIBUMBUNANNAG 3,256,287

PANANGYADAL ITI BIBLIA 3,111,358

Peru

Ni Jorge ket maysa a regular pioneer. Agpinta kadagiti ladawan ti pagsapulanna. Kinasabaanna ti sabali pay a pumipinta, a ni Hubert, nga immanamong met nga agadal iti Biblia. Iti uneg laeng ti innem a bulan, nairingpas ni Hubert nga adalen ti libro a Pannakaammo a Mangiturong iti Biag nga Agnanayon iti laksid ti nakaro nga ibubusor dagiti kameng ti pamilia, gagayyem, ken kaarrubana. Inkarkararag ni Hubert a ni Jehova tulonganna koma ti pamiliana a mangammo iti kinapudno. Kasta unay ti ragsakna idi makipagadal ken makigimgimong metten ti kabsatna a ni Jhon. Iti simmaganad a lawas, nakipagadal met ti kayong ni Jhon a ni Cesar. Nupay dati a bumusbusor, nakipagadal met ti asawa ni Cesar. Idi agangay, ni Reynaldo a kaeskuelaan ni Hubert kayatna met ti makipagadal. Gapu iti nakaro nga ibubusor, napilitan ni Reynaldo nga agadal idiay balay da Hubert. Di nagbayag kalpasanna, nakipagadal met ni Milton nga ading ni Hubert. Kalpasan ti damo a panagadalna, kinasabaan ni Milton ti dua a padana nga estudiante a da Darwin ken Christian. Nakipagadal ken nakigimong met dagitoy. Adda pay ti dua a manong ni Hubert. Isu da Ronald ken  Martin. Nakikadua ni Ronald iti panagadal ni Hubert. Nakaad-adu ti saludsodna maipapan iti Biblia, isu nga inlawlawag ni Jorge a masungbatan amin a saludsodna no agadal iti Biblia. Immanamong ni Ronald. Kalpasanna, nakipagadal met ni Martin ken ti dua nga annakna a babbai. Nabautisaran da Hubert ken Jhon iti “Asidegen ti Pannakaisalakan!” a Kombension Distrito. Sigun iti nabiit pay a panangbilang, addan ti 18 a tattao a nakasursuro iti maipapan ken ni Jehova, kas resulta ti panangasaba ni Jorge.

Brazil

Agnanaed ni Paulo iti maysa a rantso nga adda iti makin-amianan a deppaar ti pagilian. Isu ket immanamong nga agadal iti Biblia tapno laeng maay-ayo ti babai a kabkabbalayna ken inkallaysana idi agangay, ngamin, agad-adal daytoy iti Biblia. Kabayatanna, dagiti agtartaraken iti baka idiay rantso kinamat ken pinapatayda ti maysa a jaguar a mangpappapatay kadagiti baka. Kas pananggundaway iti situasion, inawaganda ti makinkukua iti rantso tapno dumawatda iti kuarta a pangtangdanda kano iti nasigo a mangnganup iti jaguar. Nakikumplot kadakuada ni Paulo, nga imbagana iti amona ti kasta met laeng nga ulbod nga estoria. Nupay kasta, nasidir ti konsiensia ni Paulo gapu kadagiti naadalna manipud iti Biblia. Nupay ammona a mabalin a mapukaw ti trabahona ken makapungtot kenkuana dagiti gagayyemna, inawaganna ti amona tapno ibagana ti pudno. Idi agangay, nagbalin ni Paulo a manedyer iti rantso gapu iti panagbalinna a napudno. Ita, ni Paulo ken ti asawana ket bautisadon nga agibumbunannag iti naimbag a damag. Anian a makaparagsak a makita daytoy a napudno a lalaki a mangmanmaneho iti traktorana no mapan  idiay Kingdom Hall, a kaduana ti asawa ken ti dua nga annakda!

Mexico

Ni María, a maysa a naregta a regular pioneer, ket timmabuno iti miting dagiti nagannak ken dagiti mannursuro iti eskuelaan a pagad-adalan dagiti dua a babbalasangna. Napaliiwna a maseknan dagiti mannursuro iti rebelioso ken imoral a kababalin ti dadduma nga estudiante. Kinuna ti maysa a mannursuro: “Dakayo a nagannak, no saanyo a kayat a makita dagiti annakyo nga addadan iti kalsada kas maysa a delingkuente, pangngaasiyo ta tulongandakami. Kasaritayo dagiti annakyo. Igatanganyo ida iti libro. Tulonganyo ida gapu ta adu ti salsaludsodda. Diyo ipalubos a dagiti kakaduada ti mangsungbat kadagita a saludsod.” Kalpasan ti miting, napan ni María iti opisina ti prinsipal tapno komustaenna ti kababalin dagiti annakna. Kuna ti prinsipal nga awan ti problema kadakuada. Inrekomenda ni María ti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo kas praktikal a giya kadagiti agtutubo. Dimngeg a naimbag ti prinsipal sa nagkiddaw iti maysa a kopia. Intulod dayta ni María iti sumaganad nga aldaw. Ti prinsipal siraragsak a pinabalasbasanna ti libro sa nagkiddaw iti maysa pay a kopia para iti sikologo iti eskuelaan. Kalpasan a nabasa ti sikologo, insingasingna nga agbalin dayta a paset ti kurikulum iti eskuelaan. Nagpedido ti prinsipal iti saggaysa a libro para kadagiti 12 a mannursuro ken 50 a libro para iti libraria iti eskuelaan.

Uruguay

Maysa nga aldaw sakbay nga agbannawag, adda maysa a lalaki nga agbibiahe manipud iti kabangibang nga Argentina nga agturong iti pagilianna nga Uruguay. Aglugan koman iti bapor nga aglayag idiay Río de la Plata idi adda immasideg kenkuana a balasitang a nangitukon iti magasin nga Enero 2006 nga Agriingkayo! Napauluan dayta iti “Anianto ti Mapasamak iti Masanguanan?” Mannakigayyem ti balasitang isu a siraragsak nga inawatna ti magasin. Apaman a simmangladda idiay Montevideo, naitulod dagiti pasahero idiay kangrunaan nga estasion ti bus. Nasdaaw ta adda manen immasideg kenkuana a maysa a Saksi, ngem iti daytoy a gundaway, maysa a baket a nakasarukod. Intukonna ti isu met laeng a ruar ti magasin, nga inawat met ti lalaki. Apaman a nakaawid daytoy a lalaki iti pagtaenganna iti dayta met laeng a rabii, adda nangngegna a nagtuktok iti ridaw.  Maysa manen a Saksi ni Jehova. Iti maikatlo a gundaway iti dayta met laeng nga aldaw, nangala manen iti isu met laeng a ruar ti magasin, kalpasan a dimngeg iti ababa a presentasion. Idi inlawlawag ti Saksi nga umaw-awattayo iti kontribusion para iti sangalubongan a trabaho, kinuna ti lalaki nga ammonan ti maipapan iti dayta sa immuneg tapno mangala iti kuarta. Idi nagsubli, intugotna ti dua a magasin a naipaima kenkuana iti dayta met laeng nga aldaw. Binasana ti saludsod nga “Anianto ti mapasamak iti masanguanan?” sa siiisem a kinunana: “Masiguradok nga iti masanguanan addanto manen ti umay a maysa a Saksi ni Jehova!”

Puerto Rico

Maysa a kabsat a babai ti simmarungkar iti balasangna idi giddato nga adda simrek nga agtatakaw. Adda paltog ti maysa kadakuada. Dumawdawatda iti kuarta, ngem idi kinuna ti babai nga awan ti kuartada, ti maysa kadagiti agtatakaw sinukimatna ti balay bayat a ti maikadua pinaturonganna iti paltog dagiti agina. Dagus a nagkararag ken ni Jehova dagiti agina. “Ania ti ar-aramidenyo?” insaludsod ti agtatakaw. Imbagada a maysada a Saksi ni Jehova ken agkarkararagda iti Diosda a ni Jehova. Bayat a dagiti agina kaskasabaanda ti agtatakaw a mangipatpaturong kadakuada iti paltog, nagsubli daydiay maysa nga agtatakaw, a kunana nga adda nabirokanna nga ATM card. Kalpasanna, nagluganda iti kotse ti ina tapno mapanda iti bangko. Intultuloy dagiti agina a kinasabaan ken kinasarita a siraraem dagiti agtatakaw. Ti ina kiniddawna iti agtatakaw nga ibabana ti paltogna, ket nasdaaw ta pinatgan dayta ti agtatakaw. Kinuna ti agtatakaw nga apresiarenna ti kinakalmado ti kabsat. Imbaga ti kabsat nga adda anakna a lalaki a katawtawenanda ngem naraniag ti masakbayanna. Indagadagna kadagiti agtatakaw nga ammuenda dagiti dana ni Jehova tapno maaddaanda met iti nasayaat a masanguanan. Nupay kasta, napanda latta amin idiay bangko, ket ti anak ti kabsat ti nangiruar iti sumagmamano a kuarta. Kalpasanna, dagiti agtatakaw impanda dagiti agina iti maysa nga eskinita, a sadiay ti nangpalusposanda kadakuada. Ti maysa kadagiti agtatakaw kayatna nga igalut dagiti agina ngem saan nga impalubos daydiay nakaiggem iti paltog. Imbagana kadagiti kakabsat nga adda mannakabalin a mangsalsalaknib kadakuada ta dagiti immuna a tinakawanda ket inggalut sa kinabkabilda.

 OCEANIA

PAGILIAN 30

POPULASION 35,914,649

AGIBUMBUNANNAG 94,323

PANANGYADAL ITI BIBLIA 49,667

Papua New Guinea

Kas dati a soldado, ammo ni Tom no kasano kapeggad ti gubat. Idi nakasaritana dagiti Saksi iti purok a pagnanaedanna, natukay ti pusona iti kari ti Biblia maipapan iti lubong nga awan ti gubat. Nagadal ni Tom iti Biblia ken rimmang-ay iti naespirituan, ngem nasubok ti pammatina idi inkeddengna ti tumabuno iti Memorial. Dati a pastor iti United church ti tatang ni Tom, ket ni Tom ti agdama a tserman iti dayta a relihion, a kaabay laeng ti Kingdom Hall. Bayat a sumsumrek ni Tom iti Kingdom Hall, nakitana dagiti karelihionanna​—dagiti nasinged a gagayyem, dati a katrabahuan, kasta met ti ministro iti simbaan—​a kumitkita kenkuana. Kayat ni Tom ti aglemmeng, ngem pinampanunotna: ‘Apay koma nga aglemmengak? Daytoyen ti tiempo tapno ipakitak kadagiti tattao a kayatko ti agbalin a Saksi ni Jehova.’ Kalpasan ti selebrasion ti Easter, inasitgan ni Tom ti ministro iti simbaan ket insaludsodna, “Nakitanak kadi idiay Kingdom Hall?”

“Wen, nakitaka,” kuna ti ministro sa nagkatawada a dua.

Kalpasanna, kinuna ni Tom: “Gayyem, patiek idi a ti daan a restawran ti kasayaatan a lugar a panganan, ngem naammuak nga adda sabidong ti taraon. Kalpasanna, adda nakitak a baro a restawran, a mangidasdasar iti naimas, nasustansia a taraon. Yantangay adda naramanak a kasta a naimbag a taraon, apay koma nga agsubliak iti daan a restawran?”

Natarusan ti ministro no ania ti punto ni Tom sa kinunana, “Tom, saanmo nga ibagbaga iti siasinoman, ngem kanayon nga  agbasbasaak iti magasin nga Agriingkayo!” Nagikkat ni Tom iti dati a relihionna ken nagbalin a dedikado nga adipen ni Jehova iti laksid ti adu a pannubok a naipasango kenkuana.

Solomon Islands

Idi Pebrero 18, 2006, adda 58 nga agibumbunannag a nagturpos iti damo a Basic Auslan Sign Language Course nga inorganisar ti sanga nga opisina dagiti Saksi ni Jehova. Sipud idi, addan ti sangapulo a tuleng a mayad-adalan iti Biblia ken tumabtabunodan kadagiti gimong ti kongregasion. Ni Moses ti maysa kadakuada. Maysa a kaarrubana ti nagkuna a ni Moses ket “ababa ti pasensiana ken managpungpungtot​—isu a nakarigrigat a kapatang.” Nupay kasta, sidadaan nga immanamong ni Moses nga agadal iti Biblia idi intukon dayta ti kabagianna a Saksi, a nagadal iti sign language. Kalpasan ti makabulan, timmabuno ni Moses iti gimong idiay Kingdom Hall iti umuna a gundaway ngem nakuso ti kawesna, nalampong, ken atiddog ti barbasna. Natukay ti pusona gapu iti pannakaabrasana ken kadagiti kinapudno a naammuanna. Nasdaaw a nakaammo manipud iti Biblia a no nasayaat ti panagkawkawes ken panaglanglanga ti maysa a tao, maidaydayawna ti Dios. Isu ket saan a nailasin dagiti kakabsat idi simrek idiay Kingdom Hall iti sumaganad a lawas ta nakapapukis ken nagibarbasen sa nataknengen ti panagkawkawesna. Binalbaliwanna payen ti kababalinna. Kinuna ti kaarrubana: “Ita, nadalusen ti panaglanglangana, ken kanayonen a nakaisem.” Rumangrang-ay ni Moses iti naespirituan ken tultulonganna dagiti dadduma pay a tuleng a mangtarus iti naimbag a damag.

Tahiti

Ti bassit, naiputputong nga isla ti Makemo, a nasurok nga 600 kilometro ti kaadayona manipud idiay Tahiti, ket addaan iti 720 laeng nga umili. Adda babai nga agnagan iti Ravahere a nakaammo iti kinapudno bayat ti panagyanna kadagiti kabagianna idiay Tahiti. Apaman a nakasubli idiay Makemo, inruginan ti agadal iti Biblia. Umuna, babaen ti surat, kalpasanna babaen ti fax, ken idi agangay babaen ti telepono. Nagkasar da Ravahere ken ti lalaki a kabbalayna ken nangaramid iti dadduma pay a panagbalbaliw tapno maannurotna dagiti pagalagadan  ni Jehova, iti laksid ti ibubusor ti dadduma a miembro ti pamiliana, a mayat nga agtalinaed ni Ravahere kas Mormon. Idi agangay, nakakualipikar ni Ravahere kas di bautisado nga agibumbunannag idi napan nakigimgimong iti kongregasion idiay Tahiti. Tunggal dua a lawas, adda dagiti maaw-awatna a makaparegta a surat manipud kadagiti agibumbunannag iti dayta a kongregasion.

Idi Hunio 2006, ni Ravahere ket sinarungkaran ti manangaywan iti sirkito ken ti asawana. Impadamag ti manangaywan iti sirkito a mangaskasaba ni Ravahere iti binalaybalay tunggal ngudo ti lawas. Adda inaramidna a mapa ti teritoriana ken nakairugin iti sumagmamano a panangyadal iti Biblia. Iplasplastarna pay dagiti magasintayo iti abay ti bassit a pagtagilakuanna ken mangikonkondukta iti panagadal iti libro, a tabtabunuan met ni lakayna.

Fiji

Ni Matthew, a maysa a panglakayen ken misionero a nasanay iti Gilead, iyad-adalanna iti Biblia ti uppat nga estudiante a mangal-ala iti kinamaestro. Dagiti ministro iti nagduduma a relihion regular a mapanda iti eskuelaan tapno mangmisa kadagiti kameng ti relihionda. Aramidenda dayta iti rabii. Ti panggep daytoy nga urnos ket tapno matulongan dagiti mangimatmaton iti  eskuelaan, a mangikagkagumaan a mangbalbaliw iti dakes a kondukta nga agraraira kadagiti estudiante.

Maysa a rabii, nakita ni Matthew a nagadu ti estudiante nga adda idiay kapeteria​—agarup 250 ti bilangda. Nakatugawda a siuulimek ken addaanda iti Biblia, kuaderno, ken ballpen. Ur-urayenda ti panangmisa ti ministro ti maysa a kangrunaan a relihion. Ngem gapu ta saan a simmangpet ti ministro, ni Matthew ti naawis nga agpalawag. Nagpaiduma ti pamay-an ni Matthew a nangidatag iti impormasion ta inusarna ti Kasuratan saan ket a kas iti gagangay nga ar-aramiden ti dadduma a ministro nga adda panagkakanta sa sarunuen ti bombastiko a panagbitla. Kas topiko ti di naisagana a palawagna, imparegta ni Matthew kadagiti estudiante a laglagipenda ti Namarsua kadakuada bayat ti kinaagtutuboda. Kalpasan ti panagpalawagna, nagsasaruno dagiti estudiante a nakialamano kenkuana kas ebkas ti panagyamanda. Ita, segseggaan ni Matthew ti panangsurnadna iti interes dagidiay dimngeg iti di ninamnama a palawagna.

Australia

Bayat a ti dua a kakabsat a babbai mangaskasabada iti binalaybalay, adda nakasaritada a maysa a babai a masakit. Imbaga kadakuada ti babai a nakaron ti sakitna a kanser isu nga okupadon a mangyim-impake kadagiti gargaretna tapno saanton a pakaburiboran dagiti sabsabali no ania ti aramidenda kadagiti gargaretna inton matay. Kuna ti babai nga awan ti pamilia ken gagayyemna isu a nakalidliday ti biagna. Inlawlawagna pay a saan a nasayaat dagiti kapadasanna kadagiti dadduma a relihion, ken iti panagriknana, isu ket binaybay-anen ti Dios. Di nagbayag, maysa kadagiti kakabsat ti napan nangted kenkuana iti sabong, ngem gapu ta awan ti babai, ti kabsat imbatina ti sabong iti mismo a ruangan sa nangibati iti bassit a surat. Kamalmanna, immawag ti babai tapno naimpusuan nga agyaman iti kinaimbag a naipakita kenkuana. Kinunana nga awan pay ti nangipakita kenkuana iti kasta a kinaimbag wenno nangted kenkuana iti sabong. Nagpadispensar pay gapu ta isu ket saan a nadanon ti kabsat. Agur-uray ti babai idi simmarungkar manen dagiti kakabsat. Intukonda ti libro nga Isursuro ti Biblia, ken nayurnos ti panagadal iti Biblia.

[Ladawan iti panid 43]

Ni Miho

[Ladawan iti panid 47]

Simmangpetkami a nakalugan iti tangke ti gatas

[Ladawan iti panid 47]

Ni Ketevan

[Ladawan iti panid 48]

Dadduma kadagiti dati a miembro iti simbaan

[Ladawan iti panid 55]

Ni Olga

[Ladawan iti panid 55]

Ni Marie

[Ladawan iti panid 57]

Da Hubert, Jorge, ken Jhon

[Ladawan iti panid 58]

Ni Paulo ken ti pamiliana

[Dagiti Ladawan iti panid 63]

Ni Ravahere iti pagtagilakuanna idiay Makemo

[Ladawan iti panid 63]

Ni Matthew