Surat ti Bagi a Manarawidwid

KAS panangtulad iti ulidan ni Jesus, sipapasnek nga ikararagtayo iti Dios: “Masantipikar koma ti naganmo.” Ti nabileg a tarigagaytayo nga agbiag a maitunos iti dayta a kararag ket maiparangarang iti wagas a panangusartayo iti biagtayo kas Saksi ni Jehova. Siempre, saan laeng a ti nagan ti Dios ti rumbeng nga ammuentayo. Nasken a gundawayantayo ti tunggal oportunidad a mangidaydayaw iti dayta a nagan. Kinapudnona, ti katan-okan a dayaw a mabalin a tagiragsaken ti siasinoman kadatayo ket ti pannakaawag kas maysa kadagiti Saksi ni Jehova.​—Mat. 6:9; Isa. 43:10.

Maitunos iti Salmo 110:3, situtulok a makiramraman ti ili ni Jehova iti trabaho nga imbilinna a masapul a mairingpas. Apay a dagiti tattao, ubing man wenno nataengan ken nagduduma ti kasasaadda, ket makiramraman iti trabaho a panangasaba? Kangrunaan iti amin, gapu iti ayatda iti Dios ken iti personal a debosionda kenkuana. Ibilin kadatayo ti Deuteronomio 6:5, 6 nga ayatentayo ni Jehova iti ‘isuamin a puso, kararua, ken bikastayo.’ Daytoy a naimpusuan nga ayat gutugotennatayo a mangusar iti tiempo, pigsa, ken sanikuatayo para iti pannakayadelantar dagiti interes ti Pagarian ti Dios. Ti maysa a pamay-an tapno maaramidtayo daytoy ket ti naan-anay a pannakiramantayo iti ministerio bayat nga ipalubos ti kasasaadtayo.

Imbilin ni Jehova a maiwaragawag ti naimbag a damag ti Pagarianna iti intero a daga gapu ta ipatpategna ti sangatauan. Saanna a kayat nga adda siasinoman a madadael no di ket kayatna nga agbabawi ti amin iti dakes a danada ken agsublida iti Namarsua tapno agbiagda. (2 Ped. 3:9) “Maragsakanak,” kuna ni Jehova, “saan nga iti ipapatay ti nadangkes, no di ket iti daydiay itatallikud ti maysa a nadangkes manipud iti dalanna ket pudno nga agtultuloy nga agbiag.” (Ezeq. 33:11) No makiramramantayo iti ministerio, pampaneknekantayo nga ay-ayaten ni Jehova dagiti padatayo a tao. Awan duadua a  daytoy ti mangyeg kadatayo iti rag-o ken pannakapnek no makiramantayo iti daytoy napateg a trabaho.

Maiparangarang pay ti nauneg nga ayattayo ken ni Jehova babaen ti wagas a panangmatmattayo iti naipaltiing a Saona, ti Nasantuan a Kasuratan. No awan ti Biblia, saantay koma a naam-ammo ti Dios ken saantay a makaadani kenkuana, kas iyaw-awis kadatayo ti Santiago 4:8. Saantay met koma a matarusan no apay nga addatayo ditoy ken no ania ti mapasamak iti masanguanan. Saantay koma nga ammo a ni Adan ti nagtaudan dagiti parikuttayo. (Roma 5:12) Saantay koma a naammuan ti naindaklan nga ayat ti Dios babaen ti panangipaayna iti bugbugtong nga Anakna kas subbot agpaay kadatayo. Iti adu a dadduma pay a wagas, ipapaayannatayo ni Jehova iti pannakaammo, sirib, ken pannakaawat. Anian a panangipategtayo iti sagut nga intedna kadatayo, ti impaltiing ti espiritu a Saona! Ti panangapresiartayo iti daytoy nakaskasdaaw a sagut gutugotennatayo a ‘manggatang iti tiempo’ para iti panagbasa, panagadal, ken panangutob iti sasaona. (Efe. 5:15, 16; Sal. 1:1-3) Pulos a saantay koma a masayangan iti tiempo a busbosentayo iti inaldaw a panagbasa iti Sao ti Dios. Imbes ketdi, ti ayattayo iti Dios ti manggutugot kadatayo a mangbasa iti Saona, a tumulong kadatayo a mangpauneg iti pannakaammo ken mangparayray iti ayattayo kenkuana.

Naammuantayo manipud iti Biblia nga idi nagbasol ni Adan maibusor ken Jehova, nagbalin a nakaay-ay-ay, awanan namnama ti kasasaad dagiti  amin a kaputotan ni Adan, a pakairamanan ti tunggal maysa kadatayo. Ngem ti Dios kabaelanna ti mangipaay ken talaga a nangipaay iti dalan a pagruaran ti sangatauan, a nangaramid kadagiti addang tapno maibanag ti panggepna ditoy daga.​—Gen. 3:15.

Awan duadua nga addaan ti tunggal maysa kadatayo iti nabileg a tarigagay a mangidaydayaw iti nakaskasdaaw a nagan ti Diostayo. Bayat nga umun-uneg ti pannakaammotayo maipapan iti kinasayaat ni Jehova a Dios, matignaytayo a makikooperar kenkuana ken iti organisasionna iti panangipakaammo iti nadayag a nagan ken panggepna. Ad-adda a manamnamatayo itan ti anamong ken pamendisionna ket makapagtalektayo nga iti masanguanan, agbiagtayto nga agnanayon iti baro a lubong.

Dakami a miembro ti Bagi a Manarawidwid kayatmi nga iyebkas ti ayatmi kadakayo a patpatgenmi a kakabsat. Kayatmi pay nga idanon ti napasnek nga apresasionmi iti kinapingetyo a mangidanon iti naimbag a damag kadagiti adu a tattao aginggat’ mabalin bayat daytoy nabatbati a tiempo sakbay a dumteng ti “dakkel a rigat.” (Apoc. 7:14) Babaen ti panangaramidyo iti dayta, iranranudyo kadakuada ti oportunidad nga inawatyo, ti pananggun-od iti pannakaammo maipapan iti Dios ken iti Kristo a mangiturong iti agnanayon a biag.​—Juan 17:3.

Dagiti kakabsatyo,

Bagi a Manarawidwid Dagiti Saksi ni Jehova

[Ladawan iti panid 4]

Carey W. Barber

[Ladawan iti panid 4]

John E. Barr

[Ladawan iti panid 4]

Samuel Herd

[Ladawan iti panid 4]

Geoffrey Jackson

[Ladawan iti panid 5]

Theodore Jaracz

[Ladawan iti panid 4]

Stephen Lett

[Ladawan iti panid 5]

Gerrit Lösch

[Ladawan iti panid 5]

Anthony Morris III

[Ladawan iti panid 5]

Guy Pierce

[Ladawan iti panid 5]

David Splane