Dagiti Tampok iti Napalabas a Tawen

DAGITI pasamak iti napalabas a tawen ikkannatayo iti kanayonan a pammaneknek nga agbibiagtayon iti arinunos ti ‘maudi nga al-aldaw,’ a nailadawan iti Sao ti Dios kas “tiempo a narigat a pakilangenan.” (2 Tim. 3:1) Ngem bayat a rumigrigat ti kasasaad iti maudi nga al-aldaw, bumatbatad met ti pamendision ni Jehova kadagiti matalek nga adipenna iti intero a daga. Uray no agsagsagaba dagiti Saksi ni Jehova gapu iti natural a kalamidad, krimen ken kinaranggas, sakit, depresion, panaglakay wenno panagbaket, ibubusor, wenno kinaaleng-aleng, itultuloyda latta a ‘tarayen ti lumba a naikabil iti sanguananda’ gapu iti bileg nga ipapaay kadakuada ni Jehova.​—Heb. 12:1.

“ASIDEGEN NGA AGPATINGGA TI PALSO A RELIHION!”

Idi Oktubre ken Nobiembre 2006, ad-adda a ginagetan dagiti Saksi ni Jehova ti nangasaba iti intero a lubong tapno iwarasda  ti Kingdom News No. 37 a napauluan iti “Asidegen nga Agpatingga ti Palso a Relihion!” Ania ti reaksion dagiti tattao iti daytoy a makagutugot a mensahe?

“Umiso la unay ti mensahe a linaon dayta!” kuna ti maysa a lalaki a taga-Sweden a maup-upay gapu iti panaginsisingpet a makitkitana iti palso a relihion. Kas iti daytoy a lalaki, adu ti nakipagadal iti Biblia gapu iti Kingdom News.

Nepal

Idiay Kathmandu, inikkan ni Dil iti Kingdom News ti maysa a lalaki a nagaget a mapan makimismisa ngem dua a bulanen a pinanawan ni baketna gapu iti nalabes a panagin-inumna iti arak. Idi nagsubli ni Dil ken ni Buddha nga asawana tapno ilawlawagda ti Kingdom News, kinuna ti lalaki a saanna a kayat ti kababalin dagiti dadduma a miembro ti simbaan. Imbagana pay a ti mangmangngegna manipud kadagiti Saksi ni Jehova ket naiduma unay iti mangmangngegna iti simbaan. Impakita ti kabsat a lalaki ti Apocalipsis 18:2-4 ken impaganetgetna ti kinapateg ti iruruar iti “Babilonia a Dakkel.” Iti maikatlo nga isasarungkar, nairugi ti panagadal iti leksion 13 ti broshur a Kalikaguman. Iti maikalima nga isasarungkar, naam-ammoda ti asawa ti lalaki ta nagsublin iti pagtaenganda. Ammona ti maipapan kadagiti Saksi ni Jehova ken magustuanna ti mensahetayo. Iti maikapito nga isasarungkar, dagiti agassawa ket agpadan a mayad-adalan iti broshur. Kuna ti asawa a babai a saanen nga umin-inum iti arak ni lakayna.

Brazil

Ti maysa a drayber ti traysikel impigketna ti naited kenkuana a Kingdom News iti likud ti jacket-na. Sumagmamano nga aldaw nga inusarna dayta isu nga ad-adu ti nakakita iti polieto. Gapuna, nabasa dagiti pasahero ti akkub dayta bayat ti panagbiaheda.

Nakigtot ti dua a kakabsat a babbai a taga-Brazil a nakabasa iti kastoy a karatula a naikabil iti balay a tinurongda: “Sumrekkayo ngem saankayon a makaruar a sibibiag.” Gapu ta maamakda, sinaludsodda iti dua a kakabsat a lallaki no ania ti aramidenda. Inkeddeng dagiti kakabsat a lallaki nga isuda ti makisarita iti bumalay. Kalpasan ti panagkararagda ken Jehova maipaay iti panangiwanwan, nagtipat dagiti kakabsat a lallaki  tapno ammo ti bumalay nga adda sumarsarungkar iti pagtaenganna. Ti bumalay, a maysa a polis, siiisem nga inawatna ti Kingdom News. Inlawlawagna a tartarimaanenna ti balayda ken nakaad-adu ti materiales iti arubayanda isu a nangikabil iti karatula tapno awan ti makaitured nga agtakaw. Idi simmarungkar dagiti kakabsat, immanamong ti polis a makipagadal iti Biblia.

Mongolia

Namin-adu nga inkagumaan ni Tsetsegmaa a kasabaan ni manangna. Nupay napadpadasanen ni manangna ti nakigimong ken timmabunon iti Memorial iti dua a nagsaruno a tawen, saan unay a naginteres iti kinapudno ken nagkedked a mayadalan iti Biblia. Ngem natukay ti interesna idi nakitana ti Kingdom News No. 37 iti balay da Tsetsegmaa. Nakaad-adu ti inamadna ken Tsetsegmaa bayat ti dua oras a panagsarsaritada. Biblia ti inusar ni Tsetsegmaa a nangsungbat kadagita. Nasdaaw ni manangna kadagiti nangngegna ket kayatna ti makasursuro iti ad-adu pay. Ita, regularen a mayad-adalan iti Biblia.

Georgia

Nangitukon dagiti Saksi iti Kingdom News iti maysa a babai a nagsaludsod no maipapan dayta iti relihion. Idi pinasingkedan dagiti Saksi a maipapan dayta iti relihion, innala ti babai ti Kingdom News ket inkarina a basaenna dayta. Idi sinarungkaran dagiti Saksi, sinaludsod ti babai no isu ket naallilaw iti Orthodox Church. Maseknan ti babai maipapan iti kasasaad ti lubong ken iti agrakrakayan a moral a pagalagadan dagiti agtutubo. Kinunana a nagrigat ti mangpanunot iti banag nga agpada a paginteresanda nga agiina. Impabasa kenkuana dagiti Saksi ti 2 Timoteo 3:1-5, ket inawatna ti libro nga Isursuro ti Biblia. Idi agpakadan dagiti Saksi, kinuna ti babai: “Kombinsidoak a ti relihionyo ti pudno a relihion. Dayawek dagiti agtutuboyo gapu iti panagkawkawesda, iti kinamapagpiaranda, ken kadagiti nangato a moral a pagalagadanda.” Ita, maay-ayatan ken regularen nga agbasbasa kadagiti magasintayo daytoy a babai.

Bangladesh

Ni Richel nga agtawen iti 19 inwarasna ti Kingdom News No. 37 iti teritoria a saan pay idi a nakaskasabaan. Nupay adayo dayta iti pagnanaedanna, narikna ni Richel a masapul  a mapan yantangay espesial a kampania dayta. Iti maikadua a balay a napananna, naam-ammona ti dua a babbai nga agkunkuna a Kristianoda ken dua a bulanen nga ulilada iti ama. “Apay nga impalubos ti Dios a mapasamak daytoy kadakami?” insaludsodda. Biblia ti inusar ni Richel a nangsungbat iti saludsodda, ket sidadaan nga inawatda ti Kingdom News sa kinunada, “Ti Dios ti nangiturong kenka ditoy balaymi.” Nabigbig ni Richel nga agkasapulan dagitoy a babbai iti naespirituan a tulong isu nga intukonna ti panagadal iti Biblia, ket sidadaan nga immanamong dagiti babbai. Napasnekda nga agadal ken nagadu ti saludsodda. Adu a panagsukimat ti masapul nga aramiden ni Richel, ngem talaga a mariknana ti pannakapnek nga itden ti panangisuro iti kinapudno kadagiti tattao a mabisbisin iti naespirituan.

Armenia

Ni Eliza a regular pioneer ket inawagan ni Lilit a dati nga iyad-adalanna iti Biblia. “Masapul a kanselarem ti aniaman  a planom nga aramiden inton bigat ket umaynak sarungkaran tapno itultuloyta ti agadal,” kinunana. Ania ti napasamak? Idi damo a nakipagadal ni Lilit kadagiti Saksi ni Jehova, imbaga kenkuana ni lakayna, “Agpilika, siak wenno ni Jehova.” Gapuna, insardengna ti nakipagadal iti Biblia. Kalpasan ti dua a tawen, nakaawat ni Lilit iti Kingdom News No. 37 bayat nga ipaspasiarna dagiti annakna iti maysa a parke. Daytoy ti nangriing manen iti interesna ket situtured nga imbagana ken lakayna, “Mabalin a kontentokan nga agbiag a nasalun-at iti agarup 50 a tawen sa uray mataykanton, ngem siak, saan a dayta ti kayatko!” Kalpasanna, inkarina a no agadal iti Biblia mabalbaliwanna dagiti naalas a kababalinna. Dayta ti gapuna a saanen a binusor ni lakayna. Ita, palpalubosanen ni lakayna a makipagadal manen iti Biblia, ket ni lakayna ti mangay-aywan kadagiti annakda no madama ti panagadalna.

Cambodia

Kabayatan ti espesial a kampania, kinasabaan ti misionero a ni Hugues ti maysa a lalaki a Muslim. Kalpasan a nabasana ti Kingdom News, immanamong ti lalaki a rumbeng a saan a makiraman dagiti relihion kadagiti gubat. Isu ket dismayado a mismo iti bukodna a relihion, a kinunana a nagdakes ti pakasarsaritaan dayta gapu kadagiti panatiko iti relihion. Imbasa ni Hugues iti lalaki ti Salmo 46:9, maipapan iti inkari ti Dios a lubong nga awanan iti gubat. Iti simmaganad a lawas, impakita kenkuana ni Hugues ti libro nga Isursuro ti Biblia. Daytoy a lalaki ap-apresiarenna unay itan ti Biblia ken regularen a mayad-adalan.

Russia

“Ammok nga adda kadakayo ti kinapudno ket ti Diosyo a ni Jehova dadaelennanto amin a palso a relihion malaksid iti relihionyo,” kuna ti maysa a padi nga Orthodox nga immawat iti Kingdom News manipud iti dua a kakabsat a babbai. Kalpasanna, imbagana no ania ti ammona maipapan iti nailangitan a namnama ken iti paraiso a daga. Insaludsod dagiti kakabsat no apay nga agtaltalinaed pay laeng iti relihionna idinto ta ammona a madadaelto dayta. “Bueno, trabahok daytoy,” insungbatna. “Tallo ti apartmentko ken uppat ti luganko. Diak kayat a mapukaw amin dagita.”

 ESPESIAL A KAMPANIA A PANANGIBUNANNAG ITI MEMORIAL

Idi Lunes, Abril 2, 2007, dagiti Saksi ni Jehova iti intero a daga intandudoda ti di kaikarian a kinamanangngaasi ken ti ayat ti Dios babaen ti panangrambakda iti Pangrabii ti Apo. Kas panagsagana iti daytoy a napateg nga okasion, adda espesial nga imbitasion a naiwaras iti intero a daga manipud idi Marso 17 agingga idi Abril 2. Adu nga estudiante iti Biblia ken annak ti nangaprobetsar iti daytoy a gundaway nga agserbi kas di bautisado nga agibumbunannag iti naimbag a damag.

Estados Unidos

Iti rabii a pannakaangay ti Memorial, ti kabsat a resepsionista iti sangalubongan a hedkuarter dagiti Saksi ni Jehova iti Brooklyn, New York, ket agarup dua nga oras a simmungsungbat kadagiti agsasaruno nga awag iti telepono manipud kadagiti tattao nga agdamdamag no sadino ti mabalinda a tumabunuan iti Memorial. Adu nga awag ti naggapu kadagiti tattao a nakaawat iti imbitasion iti Memorial. Kinuna ti maysa a babai: “Kaaw-awidko laeng ket nakitak ti imbitasion maipapan iti okasionyo ita a rabii. Kayatko ti tumabuno ngem diak ammo no ania nga oras.”

Ni Jacquelin nga agtawen iti 16, inikkanna ti maestrana iti imbitasion iti Memorial sa inlawlawagna ti kinapateg dayta nga okasion. Naragsakan ta timmabuno ti maestrana. Gapu ta iti maysa kadagiti Assembly Hall dagiti Saksi ni Jehova ti pakaangayan ti Memorial, impasiar ni Jacquelin ti maestrana iti pasilidad kalpasan ti programa. Inapresiar unay ti maestra ti kinadalus ken ti nagsayaat a pannakaorganisar ti amin  nangnangruna ti pannakaibangon ken pannakamantener ti intero a pasilidad babaen kadagiti boluntario. Kalpasan ti panangyebkas ti maestra iti apresasionna iti palawag, insaludsodna, “Kasano a mayadalanak iti Biblia kas iti imbaga ti ispiker?” “Maragsakanak a mangyadal kenka, ma’am!” sigagagar nga insungbat ni Jacquelin. Iyad-adalan ni Jacquelin ti maestrana tunggal Lunes kalpasan ti klaseda.

South Africa

Nasdaaw ti maysa a kongregasion nga adda iti nasulinek a lugar a buklen ti siam nga agibumbunannag no apay a maymaysa laeng nga imbitasion iti Memorial ti naawatda manipud iti sanga nga opisina idinto ta 500 ti pinedidoda. Naammuanda idi agangay a saan nga intulod ti post office iti lugarda ti naipakete nga imbitasion gapu ta naikkat daydiay nakaisuratan ti adres a pakaitulodanna. Dagiti agtartrabaho iti post office linuktanda ti pakete bareng maammuanda no siasino ti pakaitulodanna wenno no siasino ti nangipatulod iti dayta. Idi nakitada dagiti imbitasion iti Memorial, impapanda a  nasken a maiwaras dagita isu a nangikabilda iti saggaysa nga imbitasion iti tunggal kahon a pakaikabilan ti surat. Isuda ngaruden a mismo ti nangiwaras kadagiti imbitasion. Nasdaaw dagiti kakabsat idi maymaysa laeng nga imbitasion ti naikarga iti kahon a pakaikabilan ti surat ti kongregasionda imbes a 500. Ngem anian a ragsak ti siam nga agibumbunannag ta 42 ti timmabuno iti Memorial. Adu kadagiti timmabuno ti nangitugot iti imbitasion a naikarga iti kahon a pakaikabilan ti suratda!

Italia

Nangted ni Patrizia iti imbitasion iti Memorial iti iyad-adalanna iti Biblia a ni Gabriella, sa inlawlawagna ti kinapateg ti itatabuno iti dayta. Dumdumngeg a naimbag ni Mattia, ti lima ti tawenna nga anak a lalaki ni Gabriella, ket dinamagna no mabalin a dumawat iti imbitasion nga itedna iti maestrana. Kabigatanna, ni Mattia inikkanna iti imbitasion ti maestrana sa inlawlawagna ti kinapateg ti Memorial ken imbagana a namnamaenna a tumabuno koma. Kalpasan ti sumagmamano nga aldaw, iti miting dagiti nagannak ken mannursuro, imbaga ti maestra ken Gabriella nga apresiarenna unay ti narayray a pannakisarita kenkuana ni Mattia isu nga inkeddengna ti sumurot kadakuada a tumabuno iti Memorial. Sipapasnek a nagimdeng ti mannursuro bayat ti palawag ken naayatan iti nakasaysayaat a kababalin dagiti amin nga ubbing. Kalpasanna, imbagana a maawatannan no apay a naikuna ni Mattia a napateg ti Memorial. Manipud idin, inikkan ni Mattia ti maestrana iti kopia Ti Librok Dagiti Estoria ti Biblia para iti anakna a lalaki, ket inyurnos da Gabriella ken Patrizia ti nabaybayag a pannakisaritadanto pay kenkuana.

Mexico

Ti maysa a panglakayen kinasabaan ken inawisna a tumabuno iti Memorial ti maysa a ministro a Presbiteriano. Siraragsak a pinatgan ti ministro dayta nga awis, ket nasdaaw ti panglakayen idi sinaludsod ti ministro no mabalin a dumawat iti imbitasion nga itedna kadagiti parokianona. Naragsakan dagiti kakabsat iti rabii ti Memorial ta timmabuno ti ministro agraman ti 40 a miembro ti relihionda. Igge-iggem ti tunggal maysa kadakuada ti imbitasion nga ipakitada sakbay a sumrekda. Kuna ti ministro nga adu pay ti mayat a tumabuno  ngem ipagarupda a saanda a mapastrek no awan ti imbitasionda. Kasta unay ti ragsak ti 11 nga agibumbunannag iti daytoy a kongregasion ta 191 ti timmabuno iti Memorial!

Australia

Ti agkabannuag a lalaki a makipagad-adal iti Biblia kadagiti Saksi insarsaritana kadagiti sabsabali iti gym a pagtartrabahuanna ti maipapan iti panagad-adalna iti Biblia. Ti maysa kadakuada ket ti babai nga immanamong a tumabuno iti Memorial. Idi agtutubo pay laeng ti babai, nangngegnan nga adda agkankanta iti Kingdom Hall ket sinaludsodna kadagiti dadakkelna no mabalin a mapan tumabuno ngem pinaritan dagiti dadakkelna a makipulapol kadagiti Saksi ni Jehova. Nupay kasta, timmabuno latta kadagiti dadduma a gimong ngem naputed ti komunikasionna kadagiti Saksi idi immakarda a sangapamiliaan. Iti rabii ti Memorial, nayam-ammo iti maysa a kabsat a babai nga isu metten ti nangyadal kenkuana iti Biblia. Tumabtabunon kadagiti gimong ti kongregasion ken naginteres metten ni lakayna. Iti sabali a bangir, ti agkabannuag a lalaki nga agtartrabaho iti gym ket maysan a di bautisado nga agibumbunannag ken agngayngayangayen nga agpabautisar.

Kazakhstan

Imbaga ti maysa nga interesado a babai a saan a makatabuno iti Memorial gapu ta ubbing pay dagiti annakna. Ngem iti aldaw ti Memorial, nagrubbuat ti lima ti tawenna nga anakna a babai sa napan nga is-isuna iti Kingdom Hall. Idi nadlawna nga awan dayta nga anakna, dagus a napanna binirok. Napanunotna a mabalin a napan ti anakna idiay Kingdom Hall tapno tumabuno iti Memorial, ket pudno nga adda sadiay ti ubing. Gapu ta adda met laengen idiay Kingdom Hall, nagtugawen ti ina iti abay ti anakna ket inimdenganna a naimbag ti palawag ti Memorial.

LEGAL A PANANGIPASDEK ITI NAIMBAG A DAMAG

Francia

Idi pay 1996 nga iruprupir ti dadduma nga agtuturay idiay Francia a masapul a bayadan ti sanga nga opisina ti buis ti sustento dagiti kameng ti pamilia ti Bethel idiay Louviers. Ngem idi Marso 28, 2007, inkeddeng ti Administrative Court of Paris a saan a masapul nga agbayad iti buis dagiti kameng ti pamilia  ti Bethel yantangay saanda a masusuelduan. Imbaga ti korte “a permanente nga agtartrabaho sadiay dagiti miembro ti Bethel gapu iti narelihiosuan a patpatienda.” Dayta a desision ket umarngi iti desision nga inyetnag ti nangato nga administratibo a pangukoman idiay Brazil ken pasingkedanna a narelihiosuan dagiti aktibidad ti pamilia ti Bethel.

Idiay met siudad ti Lyon, saanda a kayat nga ipaabang kadagiti Saksi ni Jehova ti pasilidad ti munisipio a pakaangayan koma ti Memorial. Ngem idi Marso 15, 2007, ti maysa a hues iti administratibo a pangukoman imbilinna iti siudad nga ipaabangna ti pasilidad kadagiti Saksi ni Jehova. Nagapelar ti siudad iti State Council, ngem sinuportaran ti State Council ti desision ti administratibo a pangukoman. Kuna ti State Council a ti inaramid ti siudad ket “nakaro ken nabatad nga ilegal a panangipaidam iti wayawaya nga agtataripnong, wayawaya a karbengan” dagiti umili. Imbilin pay ti State Council a ti siudad isublina iti lokal nga asosasion dagiti Saksi ni Jehova dagiti nagastoda iti pannakaipagna ti kaso.

Nupay paborable ti desision idiay Lyon, dagiti Saksi ni Jehova idiay Francia ket puntiria latta dagiti bumusbusor, ti media, ken uray dagiti opisial ti gobierno. Alaentayo a pagarigan ti napasamak idi 2005. Nainterbiu iti publiko ti dati a pannakabagi ti French National Assembly ket inakusaranna dagiti Saksi ni Jehova “a maor-organisarda nga umasping iti estruktura ken aktibidad ti Mafia.” Dagiti Saksi ni Jehova inyulida dayta a pammardaya idiay korte, ket idi Hulio 2007, ti Court of Appeals idiay Rouen pinaboranna dagiti Saksi, a kinunana a “ti nakaro nga akusasion ti naidarum ket interamente a saan a maiparbeng ken maibilang a panangabuso iti wayawaya nga agsao.” Ti gobierno ti Francia agtultuloy ti panangirupirna iti isyu maipapan iti saan a nainkalintegan ken ilegal a panagbuis maibusor iti Asosasion Dagiti Saksi ni Jehova. Us-usigen ita ti European Court of Human Rights (ECHR) daytoy a banag, ket dagiti kakabsat agtaltalekda latta a tultulongan ida ni Jehova.

Uzbekistan

Naidokumento ti nasurok a sangaribu a pannakaaresto, pannakaibalud, wenno pannakaraut dagiti  kakabsattayo. Kaaduan a pannakaaresto ket napasamak bayat ti panangrambakda iti Memorial idi 2005 ken 2006. Ngem maragsakankami a mangipadamag nga awan ti naireport a kasta a parikut mainaig iti Memorial idi 2007. Nupay kasta, apagbiit laeng dayta a kaawan ti parikut. Di nagbayag kalpasanna, adda kabsat a lalaki ken kabsat a babai a naaresto ken napabasol iti krimen a panangisuro maipapan iti relihion. Ti kabsat a lalaki, a naasawaan ken addaan iti dua nga annak, ket dagus a naipupok kalpasan a nasentensiaan iti dua a tawen a pannakaibalud. Nasentensiaan ti kabsat a babai iti dua a tawen a pannakaibalud iti kampo a pagtrabahuan, a pakairamanan ti dusa nga impataw kenkuana ti gobierno a maksayan ti sueldona iti 20 porsiento.

Georgia

Idi Mayo 3, 2007, inyetnag ti ECHR ti nagkaykaysa a desisionna maikontra iti gobierno ti Georgia gapu iti panangpanuynoyna iti kinaranggas kadagiti Saksi ni Jehova gapu iti relihionda ken imbilinna a mabayadan iti danios perhuisio dagiti biktima. Manipud idi Oktubre 1999 agingga idi Nobiembre 2002, addan ti 138 a naranggas a panangdarup kadagiti Saksi ni Jehova. Naimatangan dagiti polis ti dadduma kadagita a panangdarup ngem saanda nga inkaluya dagiti biktima. Inkeddeng ti korte a gapu ta saan a nasalakniban dagiti kakabsattayo manipud kadagiti panatiko iti relihion, ti dati a gobierno ti Georgia saanna laeng a sinalungasing dagiti obligasionna iti sidong ti European Convention on Human Rights no di ket sinalungasingna pay ti narelihiosuan a wayawaya dagiti kakabsattayo. Daytoy a nalawag a pangngeddeng nabatad nga ipakitana a saan a tagtagilag-anen ti ECHR ti narelihiosuan a wayawaya ket dagiti Saksi ni Jehova masapul a masalaknibanda uray no busbusoren ida ti kaaduan.

Eritrea

Lima a tawen kalpasan ti nainget a tignay ti gobierno a mangkontrol kadagiti amin nga independiente a narelihiosuan a grupo nga awan iti babaen ti autoridad dagiti uppat a relihion nga inanamongan ti gobierno, agtultuloy ti pannakaipasango dagiti Saksi ni Jehova iti nakaro nga ibubusor. Uray no kadagiti pribado a pagtaenganda ti paggigimonganda, maar-aresto,  matutuok, ken maparparigat iti nakaro dagiti kakabsat tapno paglikudanda ti pammatida. Manipud idi Abril 2007, 24 a Saksi ni Jehova ti adda pay laeng iti pagbaludan gapu iti itatabuno kadagiti gimong, panangasaba, wenno panagkedkedda nga agserbi iti militar gapu ta saan nga ipalubos ti konsiensiada. Kadagiti nakabalud a Saksi, tallo ti agtawen iti 60 wenno natataengan pay, sangapulo ti adda iti narigat unay a kasasaad, ken tallo ti addan iti pagbaludan sipud pay idi 1994. Nupay saan pay laeng a naballigi dagiti kanayonan a panangikagumaan a mangtulong kadagiti kakabsattayo, mangnamnamatayo latta a mabiiten a makasarakda iti bang-ar, ken itultuloytayo ti agpannuray ken Jehova a subbotennanto dagiti adipenna manipud “iti pannakairurumen ken iti kinaranggas.”​—Sal. 72:14.

Andorra

Idi Disiembre 14, 2006, nagbalin met laengen a legal ti estado dagiti kakabsattayo. Idi pay 1973 a kidkiddawenda dayta iti gobierno. Addan ti nasurok a 150 nga agibumbunannag idiay Andorra.

Korea

Iti nasurok a 50 a tawenen, naibalbalud dagiti kakabsat a lallaki idiay South Korea gapu iti panagkedkedda nga agsoldado. Lima ti natay kas resulta dayta. Kalpasan ti panangipadasda iti amin a legal a remedio idiay South Korea, nagapelar da Kabsat Yoon ken Choi iti Human Rights Committee iti United Nations. Idi Nobiembre 3, 2006, indeklara ti komite a ti South Korea sinalungasingna dagiti kalintegan dagiti kakabsat ken imbilinna nga agbayadda iti danios perhuisio kadagiti kakabsat. Indagadag pay ti komite a masapul a mangaramid ti South Korea kadagiti addang tapno masigurado a dagiti dadduma pay nga agkedked nga agsoldado gapu ta saan nga ipalubos ti konsiensiada ket saan a mapilit nga agpili no salungasingenda dagiti prinsipioda wenno maibaludda. Agpromedio iti 70 a kakabsat ti maibalbalud iti kada bulan.

Iti napalabas, adu a kakabsat a maipaspasango iti kastoy nga isyu ti nangikeddeng a tungpalenda lattan ti desision ti korte a masapul a maibaludda iti maysa ket kagudua a tawen. Ngem iti nabiit pay, inkeddeng ti kaaduan nga agtutubo a kakabsat a lallaki ti agapelar ket kas resultana, ginasut itan nga  apelar ti maas-asikaso iti korte. Gapuna, impakaammo ti gobierno ti Korea ti panggepna a mangipatungpal iti alternatibo a serbisio nga awan iti babaen ti militar. Makitanto no talaga a maipatungpal dayta a serbisio ken no awaten ti konsiensia dagidiay mangaramid iti dayta a kita ti serbisio.

Argentina

Idi Hulio 2007, ti minister of justice and human rights pinirmaanna ti resolusion a mangbigbig a saan a nainkalintegan ti pannakaibalud ti Daniel Victor Guagliardo gapu iti panagkedkedna nga agserbi iti militar kas panangsurot iti konsiensiana a sinanay ti Biblia. Daytoy a desision ket mabalin a pabor met kadagiti sabsabali a saan a nainkalintegan a naibalud gapu ta saan nga ipalubos ti konsiensiada ti namilitariaan a serbisio.

Armenia

Naidarum iti kaso kriminal ti 19 a kakabsat a lallaki idi nagkedkedda a mangaramid iti alternatibo a serbisio ta maikompromiso ti Nakristianuan a neutralidadda no aramidenda dayta. Kalpasanna, idi Setiembre 2006, nakaawat dagiti kakabsat iti surat manipud iti opisina ti kangrunaan nga abogado ti gobierno. Nailanad iti dayta a saanen a matuloy ti pannakabistada ngem mangipatungpalto pay laeng ti gobierno iti sabali a kita ti serbisio a mabalin nga awaten ti maysa a Kristiano. Gapu iti dayta, idi ngalay ti 2007, 71 a kakabsat a lallaki ti nakabalud agingga iti tallo a tawen.

Ni Vahan Bayatyan ket maysa kadagiti adu nga agtutubo a Saksi a nabista ken naibalud idiay Armenia. Kalpasan a nasentensiaan a maibalud iti maysa ket kagudua a tawen, kiniddaw ti abogado ti gobierno a mapatawan iti nadagdagsen a sentensia ta para kenkuana, ti panagkedked ni Kabsat Bayatyan ket “awan pakaibatayanna ken napeggad.” Pinatgan dayta ti korte a pagapelaran ket ninayonanda iti maysa pay a tawen ti sentensiana. Immanamong met ti korte suprema. Gapuna, nagapelar ni Kabsat Bayatyan iti ECHR. Immanamong ti ECHR a denggenna ti kaso. Pakakitaan dayta a sidadaan ti ECHR a mangadal a naimbag iti dayta a banag. Sapay koma ta agballigi daytoy a kaso ket makatulong ken Kabsat Bayatyan ken kadagiti dadduma pay a maipaspasango iti daytoy nga isyu.

 Azerbaijan

Nupay legal ti estado dagiti Saksi ni Jehova idiay Azerbaijan, maipaspasango latta dagiti kakabsattayo iti adu a karit. Kas pagarigan, idi Disiembre 24, 2006, nasurok a 200 a kakabsat ken interesado a tattao ti madama nga aggigimong idiay Baku idi simmangpet dagiti armado a polis a kadua dagiti reporter iti estasion ti telebision ken dagiti lokal nga opisial tapno pasardengenda ti gimong. Dagiti polis nga awanan iti mandamiento nga agsukisok dinadaelda ti ridaw ti naabangan a pasilidad ken indetinerda dagiti timmabuno. Dua a lallaki ti nakabkabil. Kinompiskar dagiti polis ti adu a literatura a naibatay iti Biblia, ti adda nagyanna a kahon a pagitinnagan kadagiti kontribusion, dagiti papeles, ken ti sumagmamano a kompiuter a maus-usar iti panangipatarus iti Biblia ken kadagiti literatura a naibatay iti Biblia. Nawayawayaan ti kaaduan kadagiti naidetiner idi agngudon ti aldaw. Karaman kadagitoy ti innem a ganggannaet a boluntario ngem naideportada gapu ta napabasolda a “makiramraman iti narelihiosuan a propaganda.” Maibalbalud dagiti kakabsattayo iti daytoy a lugar gapu iti panagkedkedda iti serbisio militar. Narigat pay a makaawatda kadagiti literatura nga aggapu iti sabali a pagilian.

Israel

Idi Pebrero 5, 2007, ti Haifa District Court indeklarana a ti Haifa Congress Center (ICC) indaddadumana dagiti Saksi ni Jehova babaen ti panangipaidamna iti pasilidadna a pakaangayan ti kombension. Imbilin ti korte a mamulta ti ICC babaen ti itutulongna kadagiti kakabsat a mangbayad kadagiti nagastoda iti pannakaipagna ti kaso. Kuna ti abogado heneral a “ti administrasion ti ICC ket addaan iti “maysa kadagiti kangrunaan nga obligasion . . . a mangasikaso a padapada kadagiti klientena, maysa nga obligasion a nasalungasing kadagitoy a kasasaad.” Gapu iti daytoy a paborable a desision, nalaklakan a makapagtataripnong iti dadakkel a grupo dagiti kakabsattayo idiay Israel.

Tajikistan

Kinompiskar dagiti opisial ti aduana ti dua a kargamento dagiti literaturatayo ken naidagadag iti ministry of culture nga iparitna dagiti literatura ken ti organisasiontayo. Kas resulta daytoy nga ibubusor, napilitan a pimmanaw iti pagilian  ti dua a misionero a nagturpos iti Gilead. Kalpasanna, idi Oktubre 11, 2007, imparit dagiti agtuturay ti aktibidad dagiti Saksi ni Jehova. Nagapelar dagiti kakabsat maigapu kadagitoy a kinaawan hustisia, ket ikarkararagtayo ken Jehova a luktanna ti gundaway tapno maitultuloy ti panangasaba iti daytoy a nabunga a tay-ak, nga addaan iti 14 porsiento nga irarang-ay bayat ti 2007 a tawen serbisio.

Ukraine

Sakbay a maiparang ti espesial a palawag idiay L’viv Stadium idi Mayo 12, 2007, ti administrasion ti estadium ket sinugsogan dagiti bumusbusor isu nga imbabawida ti pannakausar ti estadium. Dagus a nakisarita dagiti kakabsat kadagiti opisial ti gobierno idiay Ukraine ken iti Estados Unidos tapno kombinsirenda dagiti mangimatmaton iti estadium a dagiti Saksi ni Jehova ket saan a pangta iti kinatalna ti siudad. Madama pay laeng nga agsasarita dagiti kakabsat, dagiti mangimatmaton iti estadium, ken dagiti opisial ti gobierno iti aldaw a pannakaiparang ti espesial a palawag idi rinibu a Saksi ni Jehova a naggapu iti nagduduma a paset ti Ukraine ti nagbiahe babaen ti kotse, bus, ken tren nga agturong idiay L’viv. Sitatalna a naguummong dagiti kakabsattayo iti ruar ti nakakandado a ruangan ti estadium, a siaanus nga agur-urayda bayat nga agtitimpuyogda ken agkankantada pay ketdi kadagiti kanta ti Pagarian. Duapulo minuto sakbay a mangrugi ti programa, nakombinsir dagiti mangimatmaton iti estadium a mangilukat kadagiti ruangan tapno makastrek dagiti kakabsat. Nasurok a 27,000 a kakabsat ti simrek iti estadium tapno dumngegda iti makaparegta a palawag ti manangaywan iti sona.

Turkmenistan

Saan a legal ti estado dagiti Saksi ni Jehova idiay Turkmenistan. Kalpasan ti panawen a panagraira bassit ti talna, dagiti agtuturay indadanesda manen dagiti kakabsattayo. Nupay kasta, situtured ngem siaannad a nagtataripnong ken nangasaba dagiti kakabsat kadagiti kaarrubada. (Mat. 10:16) Naaresto ti tallo nga agtutubo a kakabsat a lallaki gapu ta saan a maawat ti konsiensiada ti serbisio militar. Nasentensiaanda amin. Naitantan ti pannakaipatungpal ti sentensia ti dua kadakuada idinto ta dagus nga inkaro daydiay maysa ti sentensiana  a maibalud iti maysa ket kagudua a tawen. Gapu ta narigat ti kasasaad iti pagbaludan, saan la a dagiti kakabsat iti daytoy a pagilian ti maseknan iti kasasaad daytoy a kabsat. Saan a naikkan iti bisa a sumrek idiay Turkmenistan dagiti kakabsat nga abogado manipud iti sabali a pagilian. Dagitoy koma ti mangidepensa kadagiti kakabsattayo idiay korte. Ngem uray no kasta, saan a kabaelan dagiti natauan nga agtuturay a lapdan ti panangikarkararagtayo iti tulong ti Kangatuan a Dios.​—1 Tim. 2:1, 2.

Kazakhstan

Adda innem nga opisial manipud iti opisina ti abogado ti gobierno a nangriribuk iti gimong a maikonkondukta iti pagtaengan ti maysa a kabsat a babai iti rehion a saan pay laeng a legal ti estado dagiti Saksi ni Jehova. Dakkel a multa ti naipataw iti lima a kakabsat a babbai ken iti maysa a kabsat a lalaki a saan pay ketdi a timmabuno iti gimong. Nayapela ti napagtengda.

Turkey

Idi Hulio 31, 2007, naragsakan ti sanga nga opisina ti Turkey a nakaawat iti pammatalged nga opisial a nairehistron ti Association for the Support of Jehovah’s Witnesses. Napasamak ti rehistrasion kalpasan ti nasurok a dua a tawen a pannakaiproseso dayta, a pakairamanan ti panangkuestion ti gobierno no ti karta ti sanga nga opisina ket saan a maisalungasing iti konstitusion. Kalpasan a napasingkedan iti nababbaba a korte idiay Istanbul a legal ti karta, nagapelar ti gobierno iti korte suprema. Ngem ti korte suprema pinaboranna ti desision ti nababbaba a korte isu a nagbalin a posible ti pannakairehistro ti asosasion. Ti baro nga asosasion ipaayanna ti sanga nga opisina iti legal a karbengan a gumatang ken mangtagikua iti sanikua, mangabang kadagiti pasdek a pakaangayan dagiti kombension, umawat kadagiti donasion, ken mangirupir kadagiti kalintegan dagiti Saksi ni Jehova iti korte.

Multa ti sentensia ti dua a Saksi ni Jehova a naakusaran a “mangrirriribuk kadagiti umili” bayat ti panagiwarasda iti Kingdom News No. 37. Ngem ti Istanbul Sisli Peace Court kinanselarna ti multa ken imbagana a ti “panangiwaras kadagiti publikasion dagiti Saksi ni Jehova . . . ket karaman iti  wayawaya ti kapanunotan ken pammati” isu a dagiti umili ti Turkey “nawayada a mangiwaragawag kadagiti patpatienda.” Ngem adda dadduma pay a karit a pakaipaspasanguan dagiti kakabsattayo idiay Turkey, kas iti isyu maipapan iti neutralidad, a no agkedked a mangaramid iti serbisio militar dagiti kakabsattayo a lallaki nga addan iti edad, mabalin a maibalud ken mamultada.

Kas naammuantayo iti dadduma kadagiti nadakamat a report, masansan nga agapelar dagiti Saksi ni Jehova iti European Court of Human Rights no busoren dagiti pagilian iti Europa ti kalintegantayo nga agdaydayaw iti Dios. Iti ngalay ti 2007, addan ti 22 nga aplikasion nga agur-uray pay laeng a maasikaso iti daytoy a korte. Mainaig dagitoy kadagiti isyu kas iti neutralidad, rehistrasion, ken pannakaidadanes. Dagiti kakabsattayo a maipaspasango kadagiti kastoy a karit, idiay man Europa wenno iti sadinoman, sigurado a kasapulanda ti panangikarkararagtayo kadakuada.​—2 Cor. 1:10, 11.

KINAMATALEK KEN KINATARNAW

Iti historikal a benneg daytoy a Tinawen a Libro, mabasam no kasano a nataginayon dagiti kakabsattayo idiay Russia ti kinatarnawda kabayatan ti panawen ti Soviet idi maiparit pay laeng ti aktibidad dagiti Saksi ni Jehova. Naulpit ken nakaro ti ibubusor a napasaranda. Nupay kasta, uray kadagiti pagilian a nawayatayo a mangitungpal iti trabahotayo, awan sardayna nga ikagkagumaan ni Satanas ken dagiti pasurotna a dadaelen ti kinatarnawtayo babaen kadagiti nasikap a pamay-an. Ngem anian a ragsak ti puso ni Jehova no agtalinaed a matalek dagiti adipenna! (Prov. 27:11) Adtoy ti sumagmamano a kapadasan dagiti adipen ti Dios iti intero a lubong no kasano nga impakitada ti pammati ken kinasungdoda kenni Jehova kadagiti kasasaad a pakaipaspasanguanda iti inaldaw.

Sweden

Ti maysa a kabsat a babai a payunir nga agtartrabaho iti pribado nga ospital ket kanayon a maipaspasango iti karit no kasanona a liklikan ti seksual a pananggargari dagiti katrabahuanna. Ngem adda natakuatanna nga epektibo a pamay-an  no kasano a maliklikanna dagiti kasta a situasion. Iti damo pay laeng, ibagbaganan kadagiti kabbaro nga empleado nga isu ket maysa kadagiti Saksi ni Jehova ken masansan a dakamatenna nga adda asawanan. Ap-aprobetsarenna ti tunggal gundaway a mangestoria kadagiti katrabahuanna iti maipapan kadagiti paginteresanda nga agassawa, a mangipaganetget a natibker ti relasionda. No kasapulan a makisarita iti doktor maipapan iti maysa a pasiente, makitulag nga agkitada iti siled a panganan tapno adu ti makakita kadakuada. No di ninamnama nga adda sumrek iti siled a pagtartrabahuanna ket irikepna ti ridaw, dagus nga agkararag ken Jehova ken taginayonenna ti nainggayyeman ngem propesional a pannakilangenna.

Alemania

Sangapulo ket tallo a tawenen nga agtartrabaho ni Marian iti maysa a kompania idiay makin-amianan nga Alemania. Masansan a marigatan a tumabuno kadagiti gimong iti lawas gapu ta rabii ti oras a panagtrabahona no dadduma. “Saanak a naragsak iti dayta ta nagpateg kaniak dagiti gimongtayo,” inlawlawagna. “Maulit-ulit a kidkiddawek ken Jehova a tulongannak a mangsapul iti remedio tapno matabunuak amin a gimong.” Nagkararag ni Marian tapno dumawat iti tured a makisarita iti mismo a boss-na. Isu ket pinalubosan ti boss-na a pumanaw a nasapa kadagiti rabii ti gimong no la ket ta malpasna ti trabahona. Nagsayaat daytoy nga urnos ngem dimteng ti panawen a nasuktan ti boss ni Marian. Isu ket saan a pinalubosan ti baro a boss-na a pumanaw a nasapa. Ania ti inaramid ni Marian? “Siraraem nga imbagak iti baro a boss-ko a palubosannak a makisarita iti manedyer ti kompania,” malagipna. Iti pannakisaritana, nakasabaan ni Marian ti manedyer ken inlawlawagna dagiti makagapu no apay a kayatna ti tumabuno kadagiti gimong. Sipapalubos ti manedyer a pumanaw a nasapa ni Marian kadagiti rabii ti gimong no la ket ta umanamong dagiti amin a katrabahuanna. Gapuna, kinasarita ni Marian dagiti amin a katrabahuanna tapno ilawlawagna kadakuada dayta a banag ket nakasabaanna met ida. Matabtabunuan itan ni Marian dagiti amin a gimong iti lawas.  “Inkarigatak unay ti nangsapul iti pamuspusan tapno matabunuak dagiti gimong ngem ti napasnek a panagkararag ken Jehova ti nangted kaniak iti bileg a nalablabes ngem ti gagangay,” kuna ni Marian.

Britania

Ni Sophie, nga agtawen iti 16, ibilangna a suot iti pammati ti agtultuloy a pannakaawisna a tumabuno kadagiti pasken iti eskuelaan. “Nupay kasla makaay-ayo ti dadduma kadagita a pasken, ammok a pagbabawyak ti tumabuno gapu ta maipasangoak kadagiti situasion a mangisagmakto kaniak,” kinunana. “Iti nabiit pay, adda agtutubo a babai a nangawis kaniak a dumar-ay iti maysa a pasken. Kunana a simple nga ‘okasion laeng dayta’ ngem naammuak idi agangay a naipatang ti kasangayna iti dayta met la a ngudo ti lawas. Imbag laengen ta saanak a napan ta nadamagko nga adu kadagiti gagayyemna iti eskuelaan ti nabartek ta awan dagiti dadakkelna iti dayta a rabii. Dayta ti gapuna a kaykayatko ti makipaglinglingay kadagiti kapammatiak a nagduduma ti edadda ta matulongandak a bumileg iti naespirituan. Siak ken ti adingko a lalaki aw-awisenmi iti pagtaenganmi dagiti ubbing ken nataengan tapno agtotokarkami iti musika, agluto iti barbekiu, wenno agpagnapagna. Ita, no adda mangawis kaniak a dumar-ay kadagiti padaya, isaludsodko iti bagik no kasano a maapektaran dayta ti relasionko ken Jehova. Naamirisko nga awan a pulos ti pakaikapisam no aramidem ti umiso.”

Italia

Dagiti babbai iti eskuelaan sumagmamano a daras nga inyebkasda ti panagrayoda ken Giovanni nga agtawen iti 17. Ngem adda maysa a babai a napingpinget ngem kadakuada amin. Sinuratanna ni Giovanni idi makitana a saan daytoy nga interesado kenkuana. Kinunana: “Iti panagkunak, agbagayta. Kursonadaka. Magustuak ti kababalinmo, ken saan la a dayta. Sapay koma ta makaaramidka iti nasayaat a desision. ‘Toy agrayo kenka.” Insuratna ti naganna iti ngudo ti surat sa inagkanna ti sobre tapno agmarka iti dayta ti lipstick-na. “Aklonek a naburiboranak kadagiti simmaruno nga aldaw,” kuna ni Giovanni. “Insaludsodko iti bagik no addanto pay ngata  maam-ammok a babai a kas kenkuana ti kapintasna. Idi naammuan dayta dagiti kaeskuelaak, dinurogandak nga awatek ti ididiayana. Kinunada a saanko a palabsen dayta a gundaway ta maagak no paayek ti ayatna. Ngem nariknak a mapukpukawen ti pakabigbigak kas Kristiano. Nagkararagak ken Jehova sa nakisaritaak kadagiti dadakkelko. Naklaatda idi damo ta saanda nga ammo a maipaspasangoak kadagiti kasta a situasion. Inadalmi a naimbag ti Biblia, a ti nangnangruna nga inusarmi ket ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo. Nakisaritaak pay kadagiti nataengan ti panagpampanunotna a kakabsat a lallaki iti kongregasion. Nagangayanna, nakagtengak iti nasayaat a desision ket diak inaklon ti ayat nga idatdaton kaniak ti babai. Makunak nga ad-adda itan ti panagraem kaniak dagiti kaeskuelaak gapu iti kinatibkerko.”

Mexico

“Idi agtawenak iti 19,” malagip ni Antonio nga agtawen iti 59 ken 37 a tawenen a nabautisaran, “nadayagnos nga adda sakitko a juvenile rheumatoid arthritis. Makapaleddaang iti kasta unay ti maaddaan iti sakit a nangbaldado ken nangidalit kaniak iti de-pilid a tugaw iti unos ti 35 a tawen. Maup-upayak no dadduma. Ngem ti panagtalinaedko nga okupado kadagiti Nakristianuan nga aktibidad agingga nga ipalubos ti salun-atko ti nangpabileg kaniak.” Iti napalabas a pito a tawen, rimmigat ti kasasaad ni Antonio idi natay ni nanangna a mangas-asikaso kenkuana. Kasanon ni Antonio? “Manipud idin, nakitak a saan a baybay-an ni Jehova dagiti adipenna no di ket ipaayna ti  tulong a kasapulanda. Nangyurnos ti kongregasion iti maysa a kabsat a lalaki a mangasikaso kaniak, ken adda sumagmamano a kakabsat a lallaki a tumultulong a manggatang kadagiti masapsapulko,” kinunana. Padpadaanan ni Antonio ti tiempo inton matungpal amin a kari ti Pagarian.

“PAGBALINEM A NALAWLAWA TI DISSO TI TOLDAM”

“Pagbalinem a nalawlawa ti disso ti toldam. Ket bay-am nga iyunnatda dagiti lupot ti tolda ti naindaklan a tabernakulom.” (Isa. 54:2) Ti naisangsangayan a kaitungpalan dagitoy a naimpadtuan a sasao ket makita iti umad-adu a panagkasapulan kadagiti kanayonan a lugar a pagdaydayawan ken daddadakkel a sanga nga opisina. Malaksid kadagiti amin a dadduma pay a proyekto a panagibangon a maar-aramid iti intero a daga idi napan a tawen, ti pannakaidedikar ti sumaganad nga innem a sanga nga opisina ti nangnangruna a gubuayan ti dakkel a rag-o dagiti Saksi ni Jehova.

Puerto Rico

Sangapulo ket tallo a tawen pay laeng ti napalabas sipud idi nairingpas ti maudi a pasilidad ti sanga nga opisina, kasapulan manen ti pannakapalawa gapu ta immadu dagiti agtartrabaho iti dadduma a departamento. Ni David Splane a kameng ti Bagi a Manarawidwid ti nangipaay iti palawag ti dedikasion idi Sabado, Setiembre 16, 2006.

Colombia

Dagiti kakabsat manipud iti 30 a pagilian nagtataripnongda idiay sanga nga opisina ti Columbia idi Nobiembre 11, 2006, tapno tagiragsakenda ti pannakaidedikar dagiti napalawa a pasilidad idiay Facatativá, nga 42 kilometro ti kaadayona iti amianan a laud ti Bogotá. Adda 3,605 a timmabuno. Nagiinnarakup ti adu kadakuada ta 30 wenno 40 a tawenen a saanda a nagkikita. Tinagiragsakda amin ti dimngeg iti palawag ti dedikasion nga impaay ni Gerrit Lösch a kameng ti Bagi a Manarawidwid.

Fiji

Manipud iti puseg ti Suva a kabesera ti Fiji, lima a minuto laeng a pagpagnaen ti nagpintas a sanga nga opisina. Matannawagan iti dayta ti sasangladan. Idi Sabado, Nobiembre 11, 2006, ni Geoffrey Jackson a kameng ti Bagi a Manarawidwid, ti nangipaay  iti palawag ti dedikasion iti imatang ti 410 a timmabuno.

Burundi

Nakallalagip ti Nobiembre 25, 2006, para kadagiti Saksi ni Jehova iti daytoy nagpintas a pagilian iti sentral nga Africa. Ti 1,141 a timmabuno manipud iti 11 a pagilian naragsakanda a dimngeg ken Guy Pierce a kameng ti Bagi a Manarawidwid bayat ti panangidedikarna kadagiti nagpipintas a pasilidad ti baro a sanga nga opisina. Nabatad ti pamendision ni Jehova, ken dakkel ti posibilidadna nga ad-adunto pay ti makiraman kadatayo a mangidaydayaw ken Jehova.

Rwanda

Kalpasan ti 30 a tawen a nariribuk a pakasaritaanda, a pakairamanan dagiti pannakaiparit ken gerra sibil, naragsakan dagiti kakabsattayo idiay Rwanda a nangsangaili ken Guy Pierce para iti pannakaidedikar ti baro a sanga nga opisina a napalikmutan iti nagpipintas a hardin.

Iti laksid ti nakalkaldaang a pannakapapatay ti adu a kakabsat gapu iti panaginnibus ti dua a puli idiay Rwanda, nagtultuloy latta ti panagrang-ay ti trabaho ni Jehovah iti daytoy a pagilian a maaw-awagan kas Pagilian nga Ayan ti Rinibu a Turod (The Land of a Thousand Hills). Ti 553 a timmabuno, a pakairamanan ti 112 a delegado manipud iti 15 a pagilian, tinagiragsakda ti dimngeg iti palawag ti dedikasion a naipaay idi Disiembre 2, 2006.

Uganda

Naidedikar idi Sabado, Enero 20, 2007, ti baro a sanga nga opisina a masarakan iti makin-abagatan nga away ti Kampala, ti kabesera ti Uganda. Karaman kadagiti 665 a timmabuno ti 170 a delegado manipud iti agarup 20 a sanga nga opisina kasta met ni Anthony Morris, a kameng ti Bagi a Manarawidwid, a nangipaay iti palawag ti dedikasion.

“NAGARAMID NI JEHOVA ITI NAINDAKLAN A BANAG”

Awan duadua nga adda panggapuantayo nga agrag-o no utobentayo dagiti nakaskasdaaw nga aramid ni Jehova idi napan a tawen. Sangsangkamaysa a maibagatayo dagiti sasao ti panagyaman nga inyebkas ti salmista: “Nagaramid ni Jehova iti naindaklan a banag iti daydiay naaramidanna kadatayo. Nagbalintayo a narag-o.”​—Sal. 126:3.

[Kahon/Ladawan iti panid 9]

Pudno a Sangalubongan a Kampania

Agduadua ti dadduma a tattao iti nagduduma a lugar no talaga a maiwarwaras ti Kingdom News iti intero a lubong. Kas pagarigan, adda maysa a bumalay idiay Brazil a nangibaga iti agibumbunannag nga aguray ta awaganna ti gayyemna idiay Estados Unidos tapno damagenna no adda naawatna a polieto. “Wen,” kuna ti gayyemna, “adda naawatko a polieto sangapulo a minuton ti napalabas.” Nasdaaw ti bumalay isu nga inawatna ti Kingdom News ken inkarina a basaenna a naimbag dayta.

[Ladawan iti panid 12]

Maysa laeng nga imbitasion ti naikabil iti kahon a pakaikabilan ti surat ti kongregasion

[Ladawan iti panid 25]

Ni Antonio a nakasagana a rummuar iti ministerio iti tay-ak

 [Dagiti Ladawan iti panid 28, 29]

 Pannakaidedikar Dagiti Sanga

Puerto Rico

Rwanda

Colombia

Burundi

Fiji

Uganda