Pakasaritaan Dagiti Saksi ni Jehova iti Moderno a Panawen

Russia

Ti salaysay maipapan kadagiti Saksi ni Jehova idiay Russia ket pakasaritaan ti pammati ken tured, maysa nga estoria ti di maisin a kinasungdo iti Dios iti laksid ti nakaro ken awan sardayna nga ibubusor. Uray ti pannakaidestiero, pannakaibalud, inkapilitan a panagtrabaho, dina napaulimek wenno nadadael ti kinasungdo dagiti Saksi.

Saan a naliday daytoy a pakasaritaan. Dagidiay nangipakita iti pammati ken Jehova ammoda a maidadanesdanto. Saanda nga inay-ay ti bagida no di ket imbilangda dagiti pakarigatan kas gundaway a mangipaneknek iti kinasungdoda iti Dios. Kinuna ti maysa a kabsat, “Idi naibasa ti sentensiami, awan ti naglagaw kadagiti iyad-adalak iti Biblia. Naragsakanak unay iti dayta! Nasentensiaanda nga uppat iti 25 a tawen a pannakaibalud kadagiti kampo. Nadagdagsen ti sentensiak . . . Apaman a rimmuarkami iti nakabistaanmi, nagyamankami ken Jehova gapu iti panangsaranayna kadakami. Nasdaaw dagiti guardia no apay a naragsakkami.”

Basaem ti maipapan iti babai a nakaammo iti kinapudno babaen ti sursurat a naigalot kadagiti bato sa naipalladaw iti ruar ti alad ti pagbaludan. Ammuem no kasano a nakapagtalinaed a natibker iti naespirituan dagiti balud. Kitaem no ania ti napasamak iti maysa a pagassawaan a Saksi a napabasol iti panangpingas iti anakda a babai.

Paset laeng ti pakasaritaan ti Russia ti dinekdekada a pannakaiparit. Iti napalabas a 20 a tawen, nagdakkel ti ngimmatuan ti bilang dagiti Saksi iti daytoy naglawa a pagilian. Kitaem no kasano a sinango ken napagballigian dagiti kakabsat dagiti karit a mainaig iti dayta a nakaskasdaaw a panagrang-ay. Maragsakankami ta naipamaysa ti intero a historikal a benneg daytoy a Tinawen a Libro iti maysa laeng a pagilian​—ti Russia.