Sangalubongan a Panangasaba ken Panangisuro

AFRICA

PAGILIAN 57

POPULASION 827,387,930

AGIBUMBUNANNAG 1,086,653

PANANGYADAL ITI BIBLIA 2,027,124

Côte d’Ivoire

Iti purok ti Bianouan iti makindaya a paset ti pagilian, mawaw dagiti tattao iti kinapudno. Alas sais pay laeng ti bigat, addan dagiti mangriing kadagiti agibumbunannag tapno makisaritada maipapan iti Biblia sakbay a sumalogda iti taltalon. Agkiddaw ti dadduma a mayadalanda iti Biblia no rabii kalpasan dagiti gimong ti kongregasion. Maysa nga aldaw, adda babai a nagkiddaw iti libro nga Ania a Talaga ti Isursuro ti Biblia? iti maysa a kabsat. Saanna nga ammo ti agbasa ngem kinunana nga ipaibasana dayta iti asawana. Inted ti kabsat ti libro ket kabigatanna, sinarungkaranna ti babai iti pagtaenganna. Siaanus nga agur-uray kenkuana dagiti agassawa. Saan a napan nagtrabaho idiay talon ti asawa a lalaki ta nagpatpatnagda ken baketna a nangbasa iti libro. Ita kayatna a pagsaritaanda iti kabsat ti nabasana. Nairugi ti panagadal iti Biblia kadagitoy nga agassawa.

Benin

Nangrugi a nagadal iti Biblia ti maysa a dakkel a pamilia nga agnanaed iti nasulinek a lugar. Ti ama ket pastor ti maysa a relihion a nabayagen sadiay. Dua a lawas kalpasan ti damo a panagadalda, pinatgan ti pamilia ti awis kadakuada a tumabuno iti kombension distrito. Iti rabii ti sabado, bigla a nagsakit ti inaunaan nga anakda a babai ket natay. Iti laksid ti nakalkaldaang a pasamak, tinabunuan latta ti ama dagiti sesion iti Domingo. Kinalunesanna, kinunana, “Gapuanan daytoy ni Satanas tapno upayennakami, ngem saanmi nga itulok a sangapamiliaan a mapasamak dayta.” Inruarna amin a gargaretna iti simbaan kas iti sutana, kallugong, barikes, pangkonsagrar a lana, ken sarukod ti pastor. Kasta met ti inaramid ti asawana nga adda met laeng  saadna iti simbaan. “Gupdenmi itan ti aniaman a pakainaiganmi iti daytoy a relihion,” kinuna ti pastor. Kalpasanna, kas iti nailanad iti Aramid 19:19, amin dagiti gargaretda ket pinuoranna iti imatang ti publiko. Agtultuloy ti panagrang-ay ti pamilia.

Madagascar

Idi napan a tawen, iti purok nga addaan 500 nga agnanaed, adda Saksi a taga sabali a purok a nangted iti libro nga Isursuro ti Biblia iti maysa a pastor. Kalpasan a nabasana a naimbag ti libro, patien ti pastor a nasarakannan ti kinapudno isu nga inranudna kadagiti miembro ti simbaanda dagiti naammuanna. Di nagbayag, kaduana ti pamiliana ken 20 a sabali pay a nagikkat iti simbaanda ket nangrugidan a mangangay kadagiti gimong a kas iti ar-aramiden dagiti Saksi ni Jehova iti nadumaduma a lugar. Simmangpet dagiti special pioneer a tumulong kadakuada. Inyadalanda iti Biblia dagiti adu nga interesado ken inyurnosda ti regular a pannakaangay ti Panagadal iti Libro ti Kongregasion ken Panagadal iti Pagwanawanan. Iti Oktubre, lima ti nagbalin a saan a bautisado nga agibumbunannag, ket ita inyurnosen dagiti payunir ti pannakaangay ti Miting Publiko ken Teokratiko nga Eskuelaan ti Panagministro. Agpromedio iti 40 ti bilang dagiti tumabtabuno iti gimong ken nasurok a 20 a panagadal iti Biblia ti maikonkondukta.

 South Africa

Mangaskasaba idi iti binalaybalay ni Hennie ken ti asawana. Bayat a magmagnada iti abay ti alad a nanglikmut iti maysa a balay, adda nauyong nga aso a nangipasngat iti ulona iti nagbaetan dagiti barandilias ti alad ket kinagatna ti ima ni Hennie. Gapu ta nakaro ti panagdara ti sugatna, nagdardarasda a nagawid ket dinalusan sa binedbedan ni baketna ti nakagat nga imana. Inyurnos ni Hennie ti ipapanna iti doktor. Kinunana ken baketna a dina ipalubos a ti maysa laeng nga aso ti mangpasardeng kenkuana a mangasaba isu a nagsublida iti teritoria kalpasan ti agarup maysa nga oras. Intuloyda iti balay a kaabay ti nakakagatanna iti aso. Kalpasan ti ipapanda iti sumagmamano a balay, maysa a lalaki ti nangpauneg kadakuada. Dimngeg a naimbag ti lalaki ken magagaran a masarungkaran manen. Nairugi ti panagadalna iti Biblia ken di nagbayag, tumabtabunon kadagiti gimong. Idi nagikkat iti Dutch Reformed Church, adda panglakayen iti simbaanda a bimmisita kenkuana ket intukonna ti kinadiakono, ngem tinakderan ti lalaki ti pangngeddengna nga agikkat iti simbaan. Nagtultuloy ti nasayaat a panagrang-ayna ket nagpasalistan iti Teokratiko nga Eskuelaan ti Panagministro.

Tanzania

Iti maysa a kampania a panangwanas kadagiti naiputputong a teritoria idi Oktubre 2005, siam a kakabsat a lallaki manipud iti Kongregasion ti Iringa ti nagdaliasat iti 75 a kilometro a napan idiay Pawaga. Naammuanda nga adda maymaysa nga agibumbunannag iti dayta a lugar isu a mapanda biroken. Kalpasan ti panagdamdamagda iti adu a tattao, nasarakanda met laeng ti kabsat. Kinunana a 20 a tawennan nga agnanaed iti dayta a lugar ken impagarupna a maiparit pay laeng ti trabaho ti Pagarian idiay Tanzania. Saan a nagsardeng a nangaskasaba iti unos ti naglabas a tawtawen, ken kinunana nga adda sumagmamano a pudpudno nga interesado iti mensahe ti Biblia. Adda dagiti kakabsat iti Kongregasion ti Iringa a nagboluntario nga agtalinaed iti dua lawas idiay Pawaga iti tunggal ibibisitada tapno masukay ti interes dagidiay agtarigagay nga agadal iti Biblia. Idi 2006, dua a regular pioneer ti immakar sadiay tapno maasikaso dayta a nabunga a teritoria. Napabileg iti naespirituan ti agmaymaysa idi a kabsat, ket ita, addan siam nga agibumbunannag  iti dayta a bassit a grupo. Iti agdama, aggigimongda iti sirok ti maysa a kayo ngem maiplamplano ti pannakaibangon ti bassit a paggigimongan babaen ti panangusar kadagiti lokal a materiales.

Rwanda

Nalatak ti balasitang a ni Gentille gapu iti laingna a pumuntos no agay-ayam iti soccer. Inawaganda iti Manayibitego, a ti kayatna a sawen iti pagsasao a Kinyarwanda ket “Dios dagiti Puntos.” Napaliiw dagiti Italiano ti abilidadna isu a sinanayda pay a naimbag. Kalpasanna, inawisda nga agay-ayam iti soccer idiay Italia. Nagsayaat nga oportunidad ti umakar idiay Europa ken agbalin a nalatak iti intero a lubong kas managay-ayam iti soccer. Ngem ammo ni Gentille a no awatenna ti tukon kenkuana, kasapulan a panawanna ti pamiliana. Saksi ni nanangna, ket nupay nakipagad-adal ni Gentille iti Biblia, saanna nga impasnek dayta. Soccer ti kapatgan iti biagna. Kalpasan nga inyuman ni Gentille dayta a banag ken nanangna, naamirisna a no awatenna ti tukon, adu ti pakaipasanguanna a sulisog a nalabit mangituggod kenkuana a mangsalungasing kadagiti bilin ti Dios. Inkeddengna a saannan nga awaten ti tukon ken iyun-unanan iti biagna dagiti interes ti Pagarian. Nabautisaran ni Gentille iti nabiit pay nga asamblea.

 Dagiti Pagilian ti America

PAGILIAN 55

POPULASION 893,357,181

AGIBUMBUNANNAG 3,367,544

PANANGYADAL ITI BIBLIA 3,236,692

Curaçao

Idi napan nangyadal iti Biblia ti maysa a kabsat, adda bala nga inyawat kenkuana ti iyad-adalanna ket dinamagna iti kabsat no ammona no ania dayta. Inlawlawag ti lalaki a sakbay ti damo a panagbisita ti kabsat, sumagmamano a bulanen a pampanunotenna ti agpakamatay gapu ta naikkat iti trabahona ken awanen ti pamiliana. Gapu ta dina a maiwaksi iti panunotna ti panagibales, inkeddengna a gudasen ti uppat a tao nga ipagarupna a puon dagiti problemana. Kinargaanna ti paltogna iti uppat a bala sa nangidulin iti maysa a para kenkuana no kas pagarigan ta kasapulan a gibusanna metten ti biagna. Nupay kasta, sakbay a rimmuar iti balayna, inkeddengna ti dumawat iti tulong ti Dios. Linuktanna ti telebision ket bayat nga agsapsapul iti estasion a mainaig iti relihion, apag-isu met a nagtuktok iti ridawna ti dua a Saksi. Idi agangay, inyadalanda iti Biblia. Imbellengna ti uppat a bala ngem nalipatanna ti maikalima. Idi nakitana dayta iti bulsana, impakitana iti kabsat ken insalaysayna ti napasamak. Kinunana a nagdakkel ti nagbaliwan ti biagna sipud idi nakipagadal iti Biblia. Kinunana a lima a tattao ti naispal gapu kadagiti Saksi ni Jehova. Ita, daytoy a lalaki ket tumabtabunon kadagiti gimong.

Uruguay

Maysa a babai ti nangpauneg iti dua a Saksi. Agsangsangit a nangilawlawag a nagpatpatnag a nagkarkararag ken nagpakpakaasi iti Dios nga ipakaammona koma kenkuana ti pagayatanna. Ti babai ket nabiit pay a sinarungkaran  dagiti pastor ti relihionda ngem napanda laeng tapno alaenda ti apagkapullo ti dakkel a kantidad a naawatna. Maup-upay ta malaksid iti dayta a gundaway, pulos a dida man la sarungkaran, uray no agkiddaw iti tulongda no adda pakarigatanna. Nasurok a makabulan a saan a napnapan iti simbaanda. Kamaudiananna, imbagana iti maysa kadagiti pastor a makatikaw dagiti agsisimparat a sursuroda. Ngem imbes a lawlawagan ti pastor dagiti tuktukoyenna a di agtutunos a sursuroda, kinunana ketdi nga agsagrap ti babai iti pito a lunod gapu ta pinanawanna ti relihionda. Inlawlawag dagiti kakabsat nga us-usaren ti Dios dagiti anghelna a mangbirok kadagiti tattao nga agsapsapul iti kinapudno. Adu ti saludsod ti babai isu a dagus a rinugianda nga inyadalan iti libro nga Ania a Talaga ti Isursuro ti Biblia? Idi agangay, nakipagadal met ti asawa ti babai ken timmabunoda iti Memorial ken espesial a palawag. Nagustuanda ti kalidad ti panangisuro a maang-angay iti Kingdom Hall ken nasdaawda ta awan ti agkolkolekta iti kuarta. Agtultuloy ti panagrang-ayda a dua ken adun ti gagayyemda iti kongregasion.

Chile

Maikonkondukta ti panagadal iti Biblia iti maysa a babai nga agnanaed iti paset ti Cape Horn a kasla kasusulinekanen iti abagatan. Ti babai ket asawa ti agbanbantay iti parola iti daytoy a lugar. Idi adda pay la idiay Punta Arenas, uppat a lawas nga inyadalan iti Biblia ti maysa nga auxiliary pioneer agingga nga immakar ti babai idiay Cape Horn. Sipud idin, intultuloyda ti nagadal iti Biblia babaen ti telepono. Agtultuloy ti nasayaat a panagrang-ayna.

 Costa Rica

Iti daytoy a pagilian, adda agarup 10,000 a Guaymi Indian a kaaduan kadagitoy ket agnanaed iti bassit nga ili ti Sixaola nga asideg iti pagbeddengan ti Panama. Adu kadagitoy a katutubo ti pudpudno nga interesado a makasursuro ti maipapan iti Biblia. Tapno maasikaso ti naespirituan a kasapulan dagitoy a tattao, naidestino sadiay ti agkabannuag a pagassawaan nga special pioneer. Nagsursuroda iti pagsasao dagiti katutubo. Iti tulong ti 26 a kakabsat a Guaymi, adu ti magapgapuanan. Iti umuna a gundaway, naangay ti Memorial iti pagsasao a Guaymi ket makaparagsak ta 264 ti bilang ti timmabuno. Sipud idin, nagtultuloy ti panagrang-ay. Kas pagarigan, iti maysa a grupo ti Panagadal iti Libro ti Kongregasion a buklen ti 13 nga agibumbunannag, agpromedio idi damo iti 20 ti bilang ti tumabtabuno. Ita, addan 40 a tumabtabuno. Kas resultana, dua pay a grupo ti Panagadal iti Libro ti Kongregasion ti nabuangay.

Panama

Idi 2004, ni Ramiro a maestro iti physical education ket nakipagadal iti Biblia kadagiti Saksi ni Jehova. Iti dayta a tiempo, 12 nga oras laeng kada lawas a suruanna ti innem a grupo nga adda iti babaenna, isu nga adda pay 12 nga oras nga awan ti aramidenna. Gapuna, kinuna ti direktor ti eskuelaan a masapul nga usarenna dayta a tiempo a mangisuro kadagiti innem a grupo iti maipapan iti relihion. “Basta ibagam kadakuada ti maipapan iti Dios, ken Jesus, ken iti Biblia,” kinuna ti direktor. Insuro ni Ramiro dagiti maad-adalna a mismo. Iti dayta a tawen, inusarna ti libro a Pannakaammo  a Mangiturong iti Biag nga Agnanayon, a nangisuro iti 150 nga estudiante iti maikanem inggat’ maikawalo a grado. Idi nairuar ti publikasion nga Ania a Talaga ti Isursuro ti Biblia? iti simmaruno a tawen, kualipikadon ni Ramiro kas di bautisado nga agibumbunannag. Intultuloyna a sinuruan dagiti klasena, ngem ti libro nga Isursuro ti Biblia ti us-usarennan. Dagiti estudiantena a nabingaybingay iti innem a grupo ket agdagupen iti 160. Ania ti resultana? Ni Ramiro ken ti dadduma nga agibumbunannag iti kongregasion iyad-adalandan iti Biblia ti sumagmamano kadagiti estudiante. Dagiti nagannak ti dadduma kadagiti estudiante inyebkasda ken Ramiro ti panagyamanda gapu ta nakitada a simmayaat ti kababalin dagiti annakda. Adda pay nagannak a timmabuno kadagiti gimong ken dimmar-ay kadagiti asambleatayo. No maipapan ken Ramiro, isu ket nabautisaran idi Nobiembre, 2006 ken agtultuloy a sireregta nga iranranudna ti kinapudno a linaon ti Biblia iti amin a maitutop a gundaway.

Guatemala

Iti Siudad ti Guatemala, napan ti agibumbunannag a ni Jeremy iti pagtaengan ti barito nga iyad-adalanna iti Biblia. Adda iti maysa nga eskinita ti pagtaengan. Idi nagtuktok ni Jeremy, ti manang ti iyad-adalanna ti nanglukat iti ridaw ket kinunana nga awan ni adingna. Adda pay la ni Jeremy iti ridaw idi immasideg ti dua a lalaki. Maysa kadakuada ti nangasut iti paltog ket indeppelna iti ulo ni Jeremy sa kinunana, “Nabayadanak a mangpatay kenka.” (Naammuan  idi agangay ni Jeremy a kasta ti ibaga dagiti mannanakaw tapno mapabutngan dagiti biktimada.) Insalaysay ni Jeremy: “Inrikep ti babai ti ridaw, ket dinamagko kadagiti lallaki no ania ti kasapulanda. ‘Ania ti ar-aramidem ditoy?’ insungbat ti maysa kadakuada. Imbagak nga ikaskasabak ti Sao ni Jehova. Sigugubsang a kinunana, ‘Itedmo kaniak dayta a mensahe!’ Agnernerbiosak ken diak ammo no ania ti aramidek. Linuktak ti bagko ket inruarko ti Biblia. Idi kuan nagsangit daydiay nakaiggem iti paltog ta ammona a dakes ti ar-aramidenna. Nagpakpakaasi a tulongak. Kinitana ti uneg ti bagko sa inruarna ti magasin nga Agriingkayo! nga addaan iti tema a maipapan iti kuarta. Ti kaduana a lalaki kinautna dagiti bulsak ta sapsapulenna ti pitakak ngem kinuna ti nakaiggem iti paltog: ‘Baybay-amon. Saanmon a kapkapan.’ Nagyaman kaniak, inarakupnak sa pimmanawda. Kalpasan dayta, nakakalkalman ti riknak, ket nagyamanak ken Jehova ta inispalnak iti daydi a kanito.”

Dominican Republic

Nagatendar ti dentista a kabsat iti maysa nga aldaw a seminar maipapan iti dental implant. Nailukat kadagiti 250 a timmabuno ti gundaway nga agpasalista iti nangina a kanayonan a kurso idiay Europa. Walo laeng a dentista ti maala. Iti ngudo dayta nga aldaw, napakaammuan ti kabsat nga isu ket saan laeng a maysa kadagiti napili nga ageskuela no di pay ket awan ti aniaman a bayadanna. Naklaat ti kabsat ket kinunana: “Pagyamanan iti intedyo a gundaway, ngem saanak a nagaplikar, ken saanko a mabalin nga awaten daytoy nagsayaat a tukonyo. Kas maysa a Saksi ni Jehova, awan ti napatpateg ngem ti espiritualidad ti pamiliak. No ageskuelaak, masapul a ganetgetak ti agadal ta narigat ti kurso, ngem adda lima a panagadalmi iti Biblia kada lawas nga agkasapulan iti naipamaysa nga atensionko. Naragsakakto ngata a nanayonan ti pannakasanay ken ti naturposko no masangpetakto met dagiti dua a babbaritok nga agdrogdrogan ken naiwawan gapu iti kaawanko?”

 ASIA KEN TI MAKINTENGNGA A DAYA

PAGILIAN 47

POPULASION 3,993,686,009

AGIBUMBUNANNAG 607,112

PANANGYADAL ITI BIBLIA 496,577

Israel

Ti agtutubo nga auxiliary pioneer a ni Ella nakitana ti maysa a baket a marigrigatan a mangbagkat iti sangasupot a basura. Tinulongan ni Ella ti baket ken kinasabaanna iti apagbiit. Inted ti baket ti adresna ken Ella, ngem saanda a nakapagsarita uray namin-adu a simmarungkar ni Ella iti pagtaengan ti baket. Kamaudiananna, nagkitada met laeng. Adda gayam tultuleng ti baket isu a saanna a nangngeg ti panagtuktok ni Ella kadagiti napalabas nga isasarungkarna. Nairugi ti panagadalda iti Biblia. Idi damo, ti baket ket saan a mamati iti Dios, ngem idi agangay, napatanorna met laeng ti panagayat ken apresasionna iti Dios ken iti Biblia. Kalpasan ti dua a tawen, indedikarna ti biagna ken Jehova ket nabiit pay a nabautisaran iti edad a 92.

Mongolia

Imbakbaketen ni Terbish ti panagtrabahona iti paglakuan iti libro. Idi nakisarita kenkuana ti 18 ti tawenna a payunir nga agnagan iti Munkhzaya, kinuna ni Terbish a nagadun ti nabasana a libro isu nga alistona laeng a maawatan ti aniaman a libro, rugianna man a basaen dayta iti rugrugi, iti tengnga, wenno iti ud-udi ti libro. Ngem naiduma ti Biblia. Uray mamin-aduna a basaen dayta, dina latta maawatan. Saan met a nakatulong ti ipapanna iti simbaan isu a nagadal a bukbukodna ken naginotar kadagiti teksto. Kayatna la unay a maawatan ti Hebreo 11:6. Inlawlawag ni Munkhzaya ti teksto sa intukonna ti panagadal iti Biblia ken inimbitaranna ni Terbish a tumabuno idiay Kingdom Hall. Idi nangngegna ti ayan ti Kingdom Hall, kinuna ni Terbish: “Dayta kadi daydiay patakder nga adda  nagpipintas a sabsabong iti ruarna? Kada lumabasak sadiay, agsardengak ta magusgustuak dagiti mulmula. Di la mabalin nga iyam-ammonak iti mangtartaripato kadagita?” Naragsakan ni Munkhzaya a nangaramid iti dayta. Maragragsakan itan ni Terbish nga agsursuro maipapan iti Namarsua ken tumabtabuno kadagiti gimong. Kuna ni Munkhzaya: “Inunaandak dagiti sabong a nangasaba kenni nana Terbish.”

Japan

Saanen a kas iti dati ti panangasaba ni Hiroko nga agtawen iti 78 gapu ta nasasakiten dagiti gurongna. Nagkarkararag a dimmawat iti panangiwanwan ti Dios, ket nakasarak iti pagsardengan ti bus a kanayon nga adu ti tao nga agur-uray iti lugan. Sadiay nga agtugaw iti 30 minuto. Kanayon a nakaisem ken aganninaw iti rupana ti pannakaseknanna kadagiti tattao. Adda ospital iti asideg isu a no lumabas dagiti tattao a nakaiggem iti agas, komustaenna ida. No adda marigatan a mangbasa iti eskediul dagiti bus, tulonganna ida, ket no adda met dagiti ganggannaet iti lugar, ibagana dagiti nasayaat a pagpasiaran. Dumngeg no agsaoda ket kalpasanna tukonanna ida iti magasin. Regular a makasarsaritana ti dadduma isu nga adda maireportna a panagsarungkar.

Myanmar

Maysa ni Lazaru nga agipuspuslit iti droga. Paset ti panagbiagna ti droga, panangpapatay, ken amin a kita ti bisio. Nupay kasta, idi impakita kenkuana ti maysa a payunir manipud Biblia a Jehova ti nagan ti Dios, dagus a nailasin ni Lazaru ti kinapudno isu nga immanamong nga agadal iti Biblia. Nabayag a nayadalan, ngem uray kaskasano, in-inut a rimmang-ay iti naespirituan. Ti karigatan nga addang nga inaramidna ket ti naan-anay a panangbalbaliwna iti estilo ti panagbiagna. Idi  imbagana kadagiti kakaduana nga umikkaten iti grupoda, nadanaganda agsipud ta adu unay ti ammona maipapan iti panagandar ti trabahoda a panagipuslit iti droga. Nupay adda sumagmamano a naibaon a mangpatay kenkuana, nalisian amin ida ni Lazaru. Idi agangay, immakar ni Lazaru iti sabali a lugar ket sadiay a nabautisaranda ken baketna.

Taiwan

Sumagmamano nga agibumbunannag ti simmardeng iti ruar ti maysa a kapeteria nga addaan iti naisangsangayan a nagan​—The Book of Ezra Coffee Shop (Ti Libro ni Esdras Kapeteria). Gapu ta masdaaw, maysa kadagiti agibumbunannag ti nagdamag iti makinkukua no apay a kasta ti nagan ti kapeteriana. Kinunana a nabayagen nga ap-apresiarenna ni Esdras gapu iti kinaregtana a nangitandudo iti pudno a panagdayaw. Adu a tawen a nakimismisa ti lalaki ngem nabiit pay a nagsardeng ta dagiti sermon ket saan a maawatan ti asawana a taga-Vietnam. Immanamong ti agassawa idi intukon ti agibumbunannag nga agsubli tapno ikkanna ida iti Vietnamese a Biblia. Kamalmanna, nagsubli ti kabsat ket anian a ragsak ti agassawa nga immawat iti dayta. Nangrugi a mayadalan ti intero a pamilia.

India

Iti maysa nga ili a nakaro ti ibubusor iti trabaho a panangasaba, uppat nga aldaw a naibalud ti lima a kakabsat a babbai gapu iti panangasabada. Idi damo, ti warden ket nasabrak kadakuada ken binallaaganna ida a saanda nga ikaskasaba ti Kristianidad iti pagbaludan. Ngem iti panaglabas ti aldaw, napaliiwna ti naemma ken naayat a kababalin dagiti kakabsat isu a nagbaliw ti panangtratona kadakuada. Dagiti kakabsat ranudanda dagiti dadduma a balud ken ti warden kadagiti prutas wenno dadduma pay a makmakan nga iyeg dagiti Saksi. Maysa a rabii, nangngeg ti warden ti panagsasarita dagiti kakabsat maipapan kadagiti punto a linaon ti libro nga Umadani ken Jehova. Di nagbayag, nakatugawen ti warden iti pagserkan ti selda dagiti kakabsat ket nakiraman iti saritaanda. Iti aldaw ti pannakawayawaya dagiti kakabsat, ti warden ket natayan iti kabagian isu a liniwliwa dagiti kakabsat babaen ti panangiranudda iti namnama a panagungar.

 Sakbay ti pannakawayawayada, sabali pay a warden ti nagdamag no ania ti basol a naaramidda. Maysa kadagiti kakabsat ti nangilawlawag nga adda dagiti mangipapan nga ilegal a panangomberte ti panangasaba nga ar-aramiden dagiti Saksi. Nasdaaw ti warden iti nangngegna ket kinunana: “Kalmado latta ti panagsasaoyo uray nakabaludkayo. Siak ti tao nga ababa ti pasensiana isu a mabainak kadakayo. Pangngaasiyo ta palagipandak no nagubsang ti panagsasaok, ken suruandak nga agsao iti naalumamay a kas iti panagsasaoyo. Diak maawatan no apay nga ibaludda dagiti naimbag a tattao a kas kadakayo.” No adda wayana, mapan iti ayan dagiti kakabsat ket kunana: “Iranudandak pay iti ad-adu maipapan iti Biblia. Talaga a ti Biblia palag-anenna ti barukongko.” Ti mensahe ti Biblia ket nagustuan met ti dua a balud a nakabasol iti panangpapatay. Sitataktika dagiti kakabsat a nangasaba kadagitoy a dua ken kadagiti sabali pay a balud. Ita ta nawayawayaandan, ikagkagumaan dagiti kakabsat a surnadan ti interes dagiti nasarakanda bayat ti kaaddada iti pagbaludan.

Indonesia

Ti special pioneer a ni Resmawati ket agawid koman manipud pangasaabaan idi adda babai a nangayab kenkuana iti pagtaenganna ta kayatna ti makisarita maipapan iti Biblia. Kalpasan ti tallo nga aldaw, sinarungkaran ni Resmawati ti babai. Iti daytoy a gundaway, agsangsangit ti babai a nagestoria  maipapan iti naranggas nga asawana. Imbasa ni Resmawati ti Hebreo 4:12 sa inlawlawagna nga adu a banag ti mabalbaliwan ti panagadal iti Biblia. Inestoriana ti kapadasan ni Tony a masarakan iti 2003 Calendar of Jehovah’s Witnesses. Nagustuan dayta ti babai isu a nagkiddaw iti maysa a kopia ti kalendario. Inted dayta ni Resmawati iti simmaruno a panagsarungkarna. Inrugida nga inadal ti libro nga Isursuro ti Biblia. Iti sumaruno a panagsarungkar, dinamag ti asawa ti babai no mabalinna ti makiraman iti panagadalda. Natukay ti pusona iti nabasana a kapadasan ni Tony iti kalendario. Naiparparna a Tony met ti nagan ti asawa ti babai, ken kapadana ti dati a kababalin ken ugali ni Tony iti kalendario sakbay a naammuanna ti kinapudno. Idi nabasana ti kapadasan iti kalendario, kinunana iti asawa ken annakna: “Naganko daytoy, saan kadi? Kasano a naammuan ti mangaskasaba ti naganko ken kasano a naisuratna ti maipapan kaniak?” Kinuna ti asawana: “Saan nga ammo dagiti Saksi ti naganmo. Ken uray no ammoda, saanda a dagus a maikabil dayta iti kalendario, uray iti kalendario ti 2007, nakarkaro manen a saan iti kalendario ti 2003!” Gapu ta nadlawna ti panaginteres ti asawana, sitataktika a dinamagna, “Kayatmo kadi ti agbalin a kas iti Tony dita kalendario?” Dina ninamnama ti insungbat ni lakayna, “Kayatko a padasen.” Kas ken Tony iti kalendario, ni Tony a taga-Indonesia inlintegnan ti biagna, impaputednan ti atiddog a buokna ken simmayaaten ti panaglanglangana. Agtultuloyda a sangapamiliaan a mayad-adalan iti Biblia.

Malaysia

Iti dadduma a paset ti Borneo, us-usaren dagiti kakabsat dagiti masarakanda iti Internet a ladawan nga ala ti sattelite tapno masapulanda dagiti pagtaengan. Kuna ti reportda: “Makatulong daytoy kadakami iti panagsapulmi kadagiti pagtaengan iti kabakiran. Dadduma kadagiti ‘atep’ a nakitami kadagiti ladawan ket pagiyaponan met gayam kadagiti kalding, isu a makakatawakami ta napankam nangasaba kadagiti ‘kalding.’ Nupay kasta, dadduma kadagiti atep a nakitami ket talaga a pagtaengan dagiti tattao. Saankam pay idi a nangasaba kadagitoy a teritoriami iti kabambantayan. Nasamek ken nagrigat a masurotan dagiti desdes iti kabakiran isu a dakkel a tulong kadakami dagiti ladawan nga ala ti satellite.”

 Europa

PAGILIAN 47

POPULASION 732,610,687

AGIBUMBUNANNAG 1,533,790

PANANGYADAL ITI BIBLIA 749,911

Hungary

Maysa a 12 ti tawenna a kabsat a babai ti nangipadamag: “Siam a bulanen ti napalabas sipud idi nabautisaranak, ken tallo a bulan metten nga agserserbiak kas auxiliary pioneer. Dakkel ti maitultulong kaniak ni nanangko. Adu ti masmasdaaw no kasano a mapaggiddanko ti panag-auxiliary pioneer ken panageskuelak, ngem iti panagkunak, marigatanak nga ag-auxiliary pioneer no saanak nga ages-eskuela. Mangasabaak bayat nga agur-urayak iti sumaruno a klasek. Lima a kaklasek ti regular a kapatpatangko maipapan iti Biblia ken dua ti iyad-adalak. Talaga a mariknak ti pamendision ni Jehova. Para kaniak, saan a makapadagsen ti panagpayunir no di ket gubuayan ti rag-o. Regular pioneer ni nanangko ket kayatko met ti agbalin a kas kenkuana. Kayatko a pagserbian ni Jehova iti amin-tiempo.”

Britania

Nangrugi ni Susan nga agadal iti Biblia idi 2001 ket intultuloyna dayta iti agarup dua a tawen. Kabayatan dayta a tiempo, marigatan a mangisardeng iti panagsigariliona. Namin-adu nga inkagumaanna ngem napaay isu nga insardengna ti panagadalna ngem timmabtabuno latta kadagiti gimong. Kalpasan ti uppat a tawen, nagpatulong ni Susan iti kongregasion gapu ta mariknana a kasapulanna ti rumang-ay iti naespirituan. Nakipagadal manen ket nakitana a makatulong dagiti impormasion iti libro nga Umadanika ken Jehova. Nagdakkel ti epektona ken Susan ti detalyado a pannakailawlawag ti ayat ni Jehova kadatayo ken kasta met no kasano a maipakitatayo ti ayattayo kenkuana. Iti uneg ti walo a lawas, namimpinsan a  naisardengnan ti agsigarilio. Marikna ni Susan a ti panangadalna iti daytoy a publikasion ti timmulong kenkuana nga agtalek ken Jehova. Nagsayaat ti panagrang-ayna. Indedikarna ti biagna kenni Jehova ken insimbolona dayta babaen ti panagpabautisarna iti napalabas a “Surotenyo ti Kristo” a Kombension Distrito.

Estonia

Naginteres iti kinapudno ken nakipagadal iti Biblia ti 17 ti tawenna nga estudiante a ni Helgi, ken awanen iti poder dagiti nagsina a dadakkelna. Idi damo, adu a gimong ti malangananna ta adu a tiempo ti busbusbosenna kas para kanta iti maysa a banda iti lugarda. Bayat nga umun-uneg ti pannakaammona, rugrugianna metten a baliwan ti estilo ti panagbiagna. Inlawlawagna kadagiti kakaduana iti banda no apay a saan a makapagtrabaho no panawen ti gimong. Nagpasalista iti Teokratiko nga Eskuelaan ti Panagministro ket rimmang-ay agingga a nakualipikar kas di bautisado nga agibumbunannag. Maysa a pasalip iti panagkanta a maangay iti intero a pagilian ti nakipasetan ni Helgi. Ti mangabak ket alaen ti maysa a nalatak  a kompania iti tay-ak ti musika. Nupay adu ti saan a naala iti damo a pannakasagat dagiti nakisalip, dagus a nagustuan dagiti hurado ni Helgi, ket immabante iti sumaruno a tukad ti pasalip. Ngem ti sumaruno a tukad ti pasalip ket mairana iti kauunaan a panangiparang ni Helgi iti pasetna iti Teokratiko nga Eskuelaan ti Panagministro. Ania ti aramidenna? Insingasing ni nanangna a saan a Saksi ni Jehova a kanselaren wenno ipayakarna laengen ti petsa ti pasetna. Kinuna ni Helgi a saan la a maipapan daytoy iti panangiparangna iti pasetna no di ket no ania ti iyun-unana iti biagna​—dagiti naespirituan wenno pisikal a banag. Pinampanunotna a naimbag dayta ket inkeddengna nga iparang ti pasetna imbes a mapan makisalip. Imparang ni Helgi ti pasetna, ket rinaem ni nanangna ti pangngeddengna.

Adda reporter iti telebision a dimmar-ay iti “Surotenyo ti Kristo!” a Kombension Distrito. Panggepna nga iraman kadagiti padamagda ti maipapan iti kombension ken iti bautismo. Idi nakitana ni Helgi nga umas-asideg iti pagitaneban, in-video-na ti pannakaitaneb ni Helgi sa ininterbiuna daytoy. Karabiyanna, nairaman dayta kadagiti damdamag, a naipakita pay ti panagkanta ni Helgi iti immun-una a tukad ti pasalip ken ti panagpabautisarna ken ti nakaisem a panangibagana iti: “Daytoy ti kasasayaatan a desision nga inaramidko iti intero a panagbiagko.”

Bulgaria

Nakapupok ni Ivelin iti pagbaludan idiay Belene. Iti suratna iti sanga nga opisina dagiti Saksi ni Jehova iti daytoy a pagilian, kinunana: “Bayat ti kaaddak iti pagbaludan, nakakitaak iti magasin a Pagwanawanan ket ita nagadu ti saludsodko. Nagbabawyakon dagiti basolko ken kayatkon a baliwan a mamimpinsan ti katataok ken kabibiagko. Adda koma kiddawek kadakayo. Nalabit a saan a nalaka a banag daytoy ken diak met ketdi namnamaen a mapatgan, ngem di la mabalin a suratandak tapno makasursuroak maipapan ken Jehova a Dios? Diak ammo no masubalitandak ngem pakaragsakak ti pannakaammok iti maipapan ken Jehova. Tarigagayak ti makasursuro iti ad-adu pay saan laeng a para kaniak no di  ket uray kadagiti dadduma pay a balud. Pangngaasiyo ta laglagipenyo a no man saankayo a makapagsurat kaniak, addanto aldaw a mawayawayaanak ket sapulenkayonto!” Dagus a sinurnadan dagiti kakabsat ti interes daytoy a balud. Iti agdama, mayad-adalanen ti sangapulo a balud, a pakairamanan ni Ivelin.

Portugal

Insalaysay ti special pioneer a ni Jana: “Maysa nga aldaw, idi rimmuarak iti subway, nakakitaak iti Tsino ket inasitgak tapno kasabaak. Nasdaaw ta ammok ti pagsasaoda ken kinunana nga adda idiay ospital ni baketna ta masesarian, ket sadiay ti papananna. Agpadada nga agassawa a saan a makapagsao iti Portugues isu nga imbaga ti ospital a sumapulda iti paraipatarus. Nagpatulong kaniak ta desperadon. Kabigatanna, pinagbadodak dagiti doktor iti kas iti kawesda nga agopera tapno kaduaek ti ina kabayatan ti operasion. Bayat nga op-operaanda, inig-iggamak ti ima ti babai. Nagadu ti saludsodna maipapan iti Biblia ken iti trabahotayo. Kalpasan a naipasngay ti ina ti makaay-ayo a maladagana, napalaus ti panagyamanna nga uray la siak ti pinagpilina iti nagan ti anakna. Nagpanunotak biit ket pinilik ti nagan a Sara. Nagustuanna ti pilik ken magagaran unay a makaammo iti ad-adu pay maipapan ken Sara a nadakamat iti Biblia ken iti Dios a dinaydayawna. Idi nakaruaren iti ospital, intukonko ti regular a panagadalmi iti Biblia idiay pagtaenganda. Iti napalabas, saanda a kayat ken lakayna ti makipatang kadagiti Saksi, ngem nagbaliw ti panangmatmatda kalpasan ti panaganak ti babai gapu iti panangasistirko kenkuana. Dagus nga inawatda ti intukonko ket ita, tumabtabunodan kadagiti gimong.”

Slovakia

Naam-ammo ti maysa a pagassawaan nga special pioneer ti dua a babbaro a taga-Afghanistan. Kabayatan ti apagbiit a panagyanda idiay Slovakia, naginteresda iti Biblia. Sumagmamano a daras a sinarungkaran ida dagiti payunir ken inikkanda ida iti Biblia ken ti libro nga Ania a Talaga ti Isursuro ti Biblia? Indemostra pay dagiti payunir no kasano ti panagadal iti Biblia tapno makapagadalda nga is-isuda wenno kaduada ti sabali.

 OCEANIA

PAGILIAN 30

POPULASION 36,829,259

AGIBUMBUNANNAG 96,691

PANANGYADAL ITI BIBLIA 51,122

New Zealand

Maysa a malem kabayatan ti trabaho a panangasaba iti binalaybalay, naam-ammo ti kabsat nga agnagan iti Paul ti maysa a babai. Idi intukon ni Paul ti maysa a broshur, kinuna ti babai a nabiit pay nga imbaga ti kabagianna a kasapulanna ti kinapudno. Iti dayta met la a bigat, nagkararag ken Jehova, nga inusarna ti nagan ti Dios ken kiniddawna nga adda koma sumarungkar kenkuana. “Tallo nga oras kalpasanna,” kinuna ni Paul, “addaakon iti ruanganna. Maysa pay, napanak iti oras a kadawyan nga awan ti babai iti pagtaenganna.” Dagus nga inawatna ti naitukon a panagadal iti Biblia ket nagsayaat ti panagrang-ayna.

Australia

Agnanaed ti agkabannuag nga agassawa a da Armando ken Elvira idiay East Timor, nga adda iti panangaywan ti sanga idiay Australia. Idi 2006, awan sarday ti panangraut ti sabali a tribu iti lugarda isu a napilitanda a pimmanaw ta agpegpeggad ti biagda. Nagkamangda iti kampo dagiti nagbakuit. Dua laeng a banag ti naitugotda​—ti Biblia ni Armando ken ti broshur nga Ania ti Kalikaguman ti Dios Kadatayo? Kalpasan a nakaumanda dagiti kakabsat, inrugin da Armando ken Elvira ti agadal iti mamindua kada lawas ken tumabuno kadagiti gimong. Kinasabaan met ni Armando dagiti kabagianna nga agnanaed iti purok nga uppat ket kagudua nga oras ti kaadayona manipud Dili. Idi naginteres ti pamiliana iti mensahe ti Pagarian, indawat ni Armando kadagiti payunir a taga-Baucau a tulonganda ti pamiliana a makaammo iti ad-adu pay. Maysa ket kagudua nga oras ti kaadayo ti Baucau manipud Dili. Nasurok  a 20 ti naguummong a dumngeg kadagiti payunir. Ti tatang ni Armando nga isu ti pannakangiwat ti grupo, kinunana a sidadaanda a mangibelleng kadagiti imahenda ngem dinamagna no masalaknibanda pay ngata manipud kadagiti dakes nga espiritu. Impatalged dagiti payunir a tulongan ida ni Jehova. Ti grupo imbellengda dagiti imahenda. Ita, agad-adalen iti Biblia ti nasurok a 25 a tattao iti dayta a purok. Tartarigagayan ni Armando ti mabautisaran iti saan a mabayag, ket nagsayaat met ti panagrang-ay ni Elvira.

Guam

Iti isla ti Saipan, nga adda iti panangaywan ti sanga nga opisina idiay Guam, naragsakan ti maysa a kabsat a babai idi naammuanna nga ilimlimed ni lakayna ti agbasa kadagiti publikasion nga adda iti pagtaenganda. Malaksid kadagiti magasin a Pagwanawanan ken Agriingkayo!, nabasanan dagiti Tinawen a Libro ken ti libro a Ti Sekreto ti Kinaragsak iti Pamilia. Maysa nga aldaw, inayabanna ti asawana ken ti lima nga annakna para kano iti “napateg a panagsasarita ti pamilia.” Karkarna la unay daytoy. Panggep gayam ti ama a balakadan ti tallo a balasangna maipapan iti panagasawa. Insuratna iti dakkel a papel dagiti sapulenda iti agbalinto nga asawada. Ti di manamati nga ama inapresiarna unay ti kapadasan ni Sheila Winfield da Conceição, a nailanad iti Nobiembre 1, 2006 a ruar Ti Pagwanawanan. Kas ken Sheila, nangaramid ti ama iti listaan dagiti sapulenda iti maysa a nasayaat nga asawa. Binalakadanna dagiti babbalasangna a makiasawada laeng iti Saksi ni Jehova ken kitaenda a ti mangasawa kadakuada ket ay-ayatenna ni Jehova ken ad-adu ti ammona ngem kadakuada no maipapan iti Biblia. Kinunana kadagiti tallo a balasangna a tartarigagayanna nga agbalindanto a naragsak a kas iti nabasana iti magasin. Daytoy ti nangtukay iti riknada ken nangted kadakuada iti namnama a dumtengto met laeng ti aldaw a kaduadanton ni tatangda nga agserbi ken Jehova.

Samoa

Maysa a pagassawaan a naggapu iti sabali a sanga nga opisina ti naidestino idiay Samoa. Iti kauunaan a balay a napanan ti kabsat a lalaki bayat ti panangasaba, intukonna ti libro nga Ania a Talaga ti Isursuro ti Biblia? Nasdaaw idi pinaunegda  iti pagtaengan. Nupay kasta, ti bumalay, a nagretiron a negosiante a babai kinunana, “Uppat a pulo ket lima a minuto laeng ti mabalinko a pannakipatang ita a bigat.” Awan pay a pulos ti kasta a reaksion a nakitana kadagiti nakasabaannan. Dagus a nairugi ti panagadal. Idi nagsubli ti kabsat ken ti asawana iti sumaruno a lawas, pinasangbay ida ti bumalay nga iggemnan ti Biblia ken ti libro nga Isursuro ti Biblia. Dakkel ti posibilidadna nga agtultuloy ti panagadal.

Solomon Islands

Ni Emily a regular pioneer ti kakaisuna a Saksi idiay lugarda iti isla ti San Cristobal. Mangikonkondukta ni Emily iti 20 a panagadal iti Biblia, a tallo kadakuada ket nagbalinen a di bautisado nga agibumbunannag, a pakairamanan dagiti dadakkelna. Nagbakasion ti agassawa nga international servants a da Lance ken Diane tapno tulonganda ni Emily iti panawen ti Memorial. Nagluganda iti barko a napno kadagiti kargamento ket nagdaliasatda iti 14 nga oras. Kuna ni Lance: “Apaman a nakasangpetkami, awanen ti kayatmi nga aramiden no di maturog, ngem napanunotmi a nasaysayaat no bisitaenmi nga umuna ti panguluen ti purok. Kalpasan nga inlawlawagmi ti gapu ti ibibisitami iti lugarna, kinuna ti panguluen: ‘Adu ti saan pay a naikkan iti imbitasion. Mabalin kadi a tumabunoda latta?’ Inggat lapayag ti isemmi a nangpatalged kenkuana a maabrasa ti amin nga umay.

“Idi dandanin mangrugi ti Memorial, dua laeng a babbai ken sumagmamano nga ubbing ti nakatugaw. Nupay kasta, nadlawmi nga adu ti adda iti asideg dagiti kayo iti saan unay nga adayo, isu a dinardarasmi nga inasitgan ken inayaban ida. Idi sumipngeten, pinaandarmi ti bassit a generator ket limmawag ti aglawlaw. Atentibo a dimngeg ti amin iti palawag iti Memorial.” Agarup 130 ti dimngeg iti palawag, a pakairamanan ti ministro dagiti Sabatista. Nagkiddaw ti ministro iti  kopia ti Baro a Lubong a Patarus gapu ta adayo a nalawlawag daytoy ngem iti Biblia nga us-usarenna. Iti dayta nga okasion, nairugi ti lima a baro a panangyadal iti Biblia.

Papua New Guinea

Napigsa ti impluensia ti Romano Katoliko iti dua a purok iti kaparanget ti maysa a bassit nga ili. Dayta ti gapuna a narigat ti mangasaba sadiay. Iti nabiit pay, pinasiar dagiti kakabsat dagiti pannakabagi dagiti purok tapno ilawlawagda ti trabahotayo a panangasaba ken ti rason no apay a kayattayo ti makipatang kadagiti tattao. Nairana met nga iti maysa a purok, kalkalpas ti miting dagiti pumurok, a nagsasaritaanda no kasano a matulonganda dagiti agtutubo a mangpasayaat iti kababalinda. Kinuna dagiti kakabsat a makatulong ti pannakaammo maipapan iti Biblia.

Naipalubos ti nawaya a panangasaba dagiti kakabsat, ket sumagmamano nga agtutubo a lallaki ti nairugi a mayadalan. Napaliiw dagiti pumurok a nagdakkel ti simmayaatan ti kababalin dagitoy nga agtutubo gapu iti pannakitimtimpuyogda kadagiti Saksi ni Jehova isu nga insardengdan ti panangbusorda iti trabahotayo. In-inut a nakipagadal dagiti gagayyem ken dadakkelda. Maysa kadakuada ti anak ti katekista a nangipangta idi kadagiti kakabsat. Kinuna ti katekista iti anakna: “Nakaro a biddut ti inaramidko. Sapay koma ta ti Dios ken dagiti Saksi ni Jehova pakawanenda ti basolko.” Kadagitoy a dua a purok, adda itan 27 a regular a tumabtabuno kadagiti gimong. Saan a kumurang iti uppat ti nabautisaranen ken auxiliary pioneer. Ragragpatendan ti panagbalin a regular pioneer.

[Mapa/Ladawan iti panid 48]

(Para iti aktual a pannakaurnosna, kitaem ti publikasion)

[Ladawan]

Ti parola idiay Cape Horn

[Mapa iti panid 63]

(Para iti aktual a pannakaurnosna, kitaem ti publikasion)

San Cristobal

[Ladawan iti panid 44]

Panangikondukta iti Panagadal iti “Pagwanawanan” idiay purok ti Antanandava, Madagascar

[Ladawan iti panid 46]

Panangyadal iti libro nga “Isursuro ti Biblia” iti grupo idiay Pawaga, Tanzania

[Ladawan iti panid 49]

Ti Panagadal iti Libro ti Kongregasion idiay Sixaola, Costa Rica

[Ladawan iti panid 50]

Ni Ramiro a nakaiggem iti libro nga “Isursuro ti Biblia”

[Ladawan iti panid 53]

Ni Hiroko bayat a mangaskasaba iti pagsardengan ti bus

[Ladawan iti panid 58]

Ni Helgi (kannawan) kabayatan ti pasetna iti Teokratiko nga Eskuelaan ti Panagministro

[Ladawan iti panid 64]

Da Lance, Diane, ken Emily