Pakasaritaan Dagiti Saksi ni Jehova iti Moderno a Panawen

Samoa

Pakasaritaan daytoy ti nadiosan a debosion ken natured a kinasungdo dagiti Saksi ni Jehova iti “Kona ti Polynesia” (“Cradle of Polynesia”). Ammuenyo no kasano ti mangasaba kadagiti agindeg iti tropiko nga adu ti ammoda iti Biblia ken relihiosoda unay nga uray la a naisangsangayan ti bokabularioda no agkararagda wenno makisaritada maipapan iti Dios. Maam-ammoyo dagiti Saksi a nangdaer kadagiti dandani di mapagballigian a parikut iti salun-at tapno maitultuloyda ti agserbi ken Jehova. Basaenyo ti maipapan iti pamilia a magmagna iti 22 a kilometro iti kabambantayan iti itatabunoda kadagiti gimong, ken ammuenyo no apay nga ipukpukkaw ti dadduma nga ubbing iti purok ti sasao nga “Umayen ti Armagedon!”

Dagiti Pagilian ti Dati a Yugoslavia

Iti rehion nga agraraira ti kinaranggas ken guranggura gapu iti puli ken relihion, adda timmanor sadiay a naisangsangayan a pakasaritaan ti pammati ken kinatured. Iti panangdeskribirna iti maysa a grupo dagiti Saksi a naipasungalngal iti siudad a nakapasamakan ti kapautan a pananglakub iti moderno a historia, kastoy ti kinuna ti maysa a kabsat: “Nagkaykaysakami iti nasin-aw a panagdayaw, nupay agpipinnatay dagiti kailianmi a Croatiano, Serbiano, ken Bosniano.” No basaenyo daytoy a report, mapabileg ti pammatiyo bayat a maammuanyo no kasano a tinaginayon dagiti kakabsat ti kinamatalekda kadagiti tiempo ti talna ken tiempo ti gubat.