Surat ti Bagi a Manarawidwid

Patgenmi a Pada a Saksi ni Jehova:

Maragsakankami unay nga agsurat kadakayo patgenmi a kakabsat! Mariknami ti kas iti narikna ni apostol Juan, a nangibaga a ‘pudno nga ay-ayatenna’ dagiti kapammatianna ken naragsakan ta “magmagnada iti kinapudno.” (2 Juan 1, 4) Anian a nagdakkel a bendision ti itden ti kinapudno para kadatayo amin! Dayta ti nangwayawaya kadatayo iti Babilonia a Dakkel ken kadagiti doktrina ken tradisionna a mangibabain iti Dios. Ti panagtulnogtayo iti kinapudno ti nakatulong kadatayo nga agbalin a naayat, naimbag, ken manangngaasi a tattao. Kasta met, ti kinapudno ti nanglukat iti dalan tapno maaddaantayo iti nadalus a takder iti imatang ti Dios ken iti namnama a biag nga agnanayon.

Kasta unay met ti panagyamantayo iti espiritu ni Jehova, nga inaldaw a mangiwanwanwan ken mangpabpabileg kadatayo! Iti nabiit pay nga “Agpaidalankayo iti Espiritu ti Dios” a Kombension Distrito, masiguradomi a tinagiragsakyo nga inusig dagiti nadumaduma a pamay-an ti siaayat a panangiwanwan ken panangpabileg kadatayo ni Jehova babaen ti espirituna. Bayat a dumakdakes ti kasasaad iti lubong, nasken nga agpaiwanwantayo iti nabileg nga espiritu ni Jehova bayat ti ilalasattayo kadagitoy napeggad nga al-aldaw.

Ammomi a natukay dagiti pusoyo idi binasayo dagiti makapainteres a salaysay iti Tinawen a Libro maipapan kadagiti kakabsattayo a nangibtur iti kasta unay a panagsagaba  maigapu iti pammatida. Makaparagsak met a maammuan nga adu kadagitoy a matalek a kakabsattayo ti nabiit pay a nabautisaran wenno saanda pay a nabautisaran idi timmaud ti pakarigatanda. Anian ti panagayattayo kadakuada gapu iti kinasungdoda ken iti determinasionda a mangitandudo iti kinalinteg! Ti nagsayaat nga ulidanda ket pudno unay a makapabileg iti determinasiontayo nga agtultuloy a nasungdo iti Pagarian aniaman ti rigat a maipasango kadatayo.​—1 Tes. 1:6-8.

Patgenmi a kakabsat, ammomi nga adu dagiti parikut a kas iti rigat ti biag a nasken a sanguenyo tapno mataginayon ti singgalut ti ayat iti pamiliayo. Para iti dadduma kadakayo, maysa a karit uray ti regular ken sisusungdo a panangsuporta iti trabaho a panangikasaba iti Pagarian ken dadduma pay a napapateg nga aktibidad iti kongregasion. Dayta ti makagapu a kalpasan ti adu a panagpapatang ken panagkararag, nangaramidkami iti sumagmamano a panagbalbaliw kadagiti gimong ti kongregasion mangrugi inton Enero 1, 2009. Agtalekkami nga aprobetsarenyo dagitoy nga urnos tapno ad-adu ti gundawayyo para iti personal ken sangapamiliaan a panagadal.

Iti nagduduma nga asamblea ken kombension iti naglabas a tawen, talaga a makaparagsak a makita nga adu ti nabautisaran. Karaman kadagitoy dagiti nagpabautisar uray agtutuboda pay. Makomendarankayo a nagannak gapu ta pinadakkelyo dagiti annakyo nga addaan iti panangipateg iti kinapudno ken pinaregtayo ida nga agdedikar tapno agserbida ken Jehova bayat ti kinaagtutuboda. Ti panagbalinda a kualipikado a mabautisaran iti laksid ti adu a karit a maipaspasango kadakuada iti eskuelaan ket mangipakita a nagsayaat ti pannakasanayda iti pagtaengan.​—Sal. 128:1-6.

 Kayatmi met a dakamaten a dakkel ti paset dagiti naanep a misionero ken special pioneer iti nagsayaat nga irarang-ay ti trabaho a panangyadal iti Biblia. Apresiaren unay ti Bagi a Manarawidwid ti napateg a paset dagiti kakabsat a lallaki ken babbai iti intero a lubong a mangibagbaga iti “Umayka!” kadagiti napudno ti panagpuspusoda a tattao, nga aw-awisenda ti amin a mawaw nga ‘awatenda koma ti danum ti biag nga awan bayadna.’ (Apoc. 22:17) Sibabara nga abrasaentayo iti sangalubongan a panagkakabsattayo ti 289,678 a nangisimbolo iti dedikasionda babaen ti bautismo iti danum iti naglabas a tawen!

Nasayaat a kanayon a laglagipentayo ti sasao ni apostol Juan idi insuratna: “Ti lubong aglabas ken kasta met ti tarigagayna ngem ti agaramid iti pagayatan ti Dios agtalinaed iti agnanayon.” (1 Juan 2:17) Ket ammotayo a nakaas-asidegen ti tiempo inton ti lubong “aglabas”! Anian a nainsiriban nga ipamaysatayo ti biagtayo iti ‘panagaramid iti pagayatan ti Dios’ ken ‘agtultuloy nga agbantay.’ (Mat. 24:42) Awanto ti aniaman a pagbabawyantayo no aramidentayo dayta, ken apitentayo dagiti gunggona ti naayat a kinamanangngaasi ni Jehova.​—Isa. 63:7.

Mangnamnamakami a dagiti makagutugot a salaysay manipud iti adu a pagilian a nailanad iti daytoy a Tinawen a Libro ket mangparegta kadakayo amin a mangyun-una iti interes ti Pagarian iti biagyo. Manamnamayo nga ipatpategdakayo unay ket kanayon nga addakayo iti panunot ken karkararagmi. Sapay koma ta sibabaknang a bendisionannakayo ni Jehova.

Dagiti kakabsatyo,

Bagi a Manarawidwid Dagiti Saksi ni Jehova