Dagiti Tampok iti Napalabas a Tawen

DAGITI report manipud iti intero a lubong pasingkedanna nga okupado unay dagiti Saksi ni Jehova a mangikaskasaba iti naimbag a damag mainaig iti Pagarian “iti intero a mapagnaedan a daga.” (Mat. 24:14) Kas resulta ti panagibtur, panagkaykaysa, ken ti naayat a panagbannogda, ‘ti sao ni Jehova naibunannag iti tunggal lugar ket nagrakurak a sisasaknap ti pammatida iti Dios.’​—1 Tes. 1:8.

MAKAPAREGTA KEN MAKAPARAGSAK A SANGAPAMILIAAN A PANAGDAYDAYAW

Idi Enero 1, 2009, nangaramid dagiti Saksi ni Jehova iti napateg a panagbalbaliw iti eskediul ti linawas a gimongda. Ti Panagadal iti Libro ti Kongregasion ket maawaganen iti Panagadal ti Kongregasion iti Biblia ken maangay dayta  sakbay ti Teokratiko nga Eskuelaan ti Panagministro ken ti Gimong ti Serbisio. Naiparegta iti amin nga usarenda nga agdaydayaw kas pamilia ti rabii a nailatang idi para iti Panagadal iti Libro ti Kongregasion.

Ania ti reaksion dagiti adipen ni Jehova iti daytoy a naayat a panagbalbaliw? Adu ti umanamong iti insurat ti maysa nga asawa a lalaki: “Pagyamanan, pagyamanan, ken pagyamanan. Dimi mayebkas ken baketko no kasanokami a mabembenepisiaran iti Sangapamiliaan a Panagdaydayaw iti rabii. Ad-adda nga immuneg ti panagayatmi ken Jehova ken ad-adda a simmingedkami kas agassawa. Anian a nagsayaat ken nainsiriban daytoy nga urnos ti nailangitan nga Amatayo!”

Ania ti ar-aramiden dagiti pamilia tapno naan-anay a magunggonaanda iti daytoy nga oportunidad a makapagkakaduada? Insurat ti maysa nga ina: “Iti dadduma a rabii, adalenmi ti panid 31 ti Agriingkayo! ken adda met dagiti rabii nga agbuyakami iti maysa kadagiti video ti organisasiontayo. Saan laeng nga agsukimat ti ar-aramiden dagiti annakmi no di ket kaay-ayoda met ti agsursuro ken tagtagiragsakenda ti panawen a panagadalmi a sangapamiliaan. Mangibagakami iti maysa a karakter iti Biblia sa makabulan nga agsukimatda maipapan iti dayta. Kalpasanna, ilawlawagda dayta iti sumaganad a bulan. Kasta met laeng ti ar-aramidenmi ken lakayko. Ti anakmi a lalaki nga agtawen iti sangapulo ket nagsayaat ti panangipalawagna iti umuna a presentasionna maipapan ken Noe! Imbagana pay no kasanomi nga iyaplikar ita dagita nga impormasion sa inruarna ti replika ti daong nga inaramid ni Noe. Iti simmaganad a lawas, imparang met ti anakmi a babai ti pasetna maipapan kadagiti panagdaliasat ni apostol Pablo kas misionero. Nagpalakpakkami kalpasan dayta sa nangibangon kadagiti saludsod a pangrepaso nga inawaganna iti Malagipyo Pay? Nakaay-ayat dayta!” Para iti daytoy a pamilia, ti urnos a Sangapamiliaan a Panagdaydayaw ket talaga a bendision manipud ken Jehova. Kinuna ti ina: “Idi napan a tawen, adu a  narigat a situasion ti nakaipasanguanmi nga agassawa ket daytoy ti talaga a kasapulanmi tapno saankami a maupay.”

Insurat ti sabali pay a kabsat a babai: “Kayatko nga iyebkas ti panagyamanko iti daytoy nga urnos ta isu ti nangriing kaniak iti naespirituan! Idi dadakkelen dagiti annakmi ken awandan iti podermi, saankamin a regular nga agad-adal ken lakayko. Ita, regular manen nga agad-adalkami. Kaaduanna a dua nga oras ti panagadalmi ket dimi mapupuotan ti panaglabas ti oras!”

Bayat nga umadani nga umadani ti dakkel a rigat, sapay koma ta ti panawen nga inlatangyo para iti Sangapamiliaan a Panagdaydayaw tulongannakayo a mangadal a naimbag iti Sao ti Dios ken pabilgennakayo iti naespirituan tapno masarangetyo ti Diablo. Aprobetsarenyo a naimbag daytoy a nagpateg a tiempo nga ‘umadani iti Dios, ket isu umadaninto kadakayo.’​—Sant. 4:7, 8.

KANAYONAN A PANAGREGGET A MANGITUKON ITI PANANGYADAL ITI BIBLIA

Idi Enero 2009, naidagadag kadagiti kongregasion a mangilatangda iti maysa a Sabado wenno Domingo iti tunggal bulan para laeng iti panangitukon iti panangyadal iti Biblia. Ania ti resultana? Adu nga agibumbunannag ti nasdaaw ken naragsakan iti kasta unay​—nasdaawda gapu ta ti panangitukon iti panangyadal iti Biblia ket nalaklaka ngem iti ninamnamada ken naragsakanda gapu ta nadumaduma a tattao ti immanamong a mayadalan iti libro nga Ania a Talaga ti Isursuro ti Biblia? Impadamag dagiti agdaldaliasat a manangaywan a naragsakan dagiti kongregasion iti daytoy a baro nga urnos, ken iti apagbiit laeng a tiempo, addan dagiti nagsayaat a resultana. Kas pagarigan, iti umuna a lima a bulan, nasurok a 8,000 a baro a panangyadal iti Biblia ti nairugi idiay Italia.

Dagiti agibumbunannag a saan pay a pulos a naaddaan iti iyad-adalan iti Biblia ket addaanen kadagiti sarsarungkaran ken nakairugidan kadagiti panangyadal. Kinuna ni Carolina a taga-Peru: “Sakbay daytoy nga urnos, awan a pulos  ti iyad-adalak ngem inkagumaak ti mangirugi iti panangyadal iti Biblia idi naisingasing nga adda maysa nga aldaw iti tunggal bulan a mailatang para iti daytoy. Naipakitak kadagiti bumalay a simple ken apagbiit laeng ti panagadal iti Biblia. Agyamanak ken Jehova ta idi inyaplikarko daytoy a singasing, naaddaanak iti dua nga iyad-adalan iti Biblia.”

Ni Satya, a maysa a payunir idiay Britania, ket marigatan a mangitukon iti panangyadal iti Biblia iti damo a pannakisaritana iti bumalay. Ngem iti aldaw a nailatang para iti panangitukon iti panangyadal, inkeddengna ti saan nga agawid no dina mapadas daytoy a metodo. Naragsakan idi adda babai a dagus nga immanamong a mayadalan. Nalaklaka nga amang ti mangitukon iti panangyadal ngem iti ninamnama ni Satya!

Ni Luca, a maysa a kabsat idiay Palermo, Sicily, ket kanayon a mangibatbati kadagiti magasin iti maysa a balo a babai a maamak a mangpastrek iti siasinoman iti balayna. Maysa a malem ti Sabado, iti aldaw a panangitukon iti panangyadal iti Biblia, ni Luca inasitganna ti balo, nga igge-iggemna ti libro nga Isursuro ti Biblia. Silulukat ti libro ken imbasana ti sumagmamano a paset dayta. Naginteres ti balo iti libro ket inwayaanna ti makisarita ken Luca. Imbaga ni Luca nga adda iti libro nga iggemna ti sungbat dagiti saludsod ti balo, kas koma iti no makitananto ngata manen ti asawana. Inukag ni Luca ti panid 72 ti libro a nakailawlawagan ti panagungar. Natukay ti puso ti balo iti daytoy a namnama a naibatay iti Biblia ken immanamong a mayadalan. Ita, isu ket regularen a mayad-adalan ken saanen a maamak a mangawis kadagiti Saksi iti pagtaenganna.

Impadamag ti maysa a manangaywan iti sirkito idiay Peru: “Manipud pay iti damo, adun a kongregasion ti natulongan daytoy nga urnos a mangpaadu iti bilang dagiti mayadalan iti Biblia. Ti maysa a kongregasion idiay Chiclayo ket nakaireport iti 25 a kabbaro a panangyadal iti Biblia iti maysa a bulan. Idiay Chepén, nakaireportda met iti 24 a kabbaro a panangyadal iti Biblia.”

 Dagiti agtutubo nga agibumbunannag nagballigida met a nangitukon iti panangyadal iti Biblia. Kinuna ni Giovanna, nga agtawen iti 11 a taga-São Paulo, Brazil: “Maysa a malem ti Sabado, agkaduakami ken nanang a napan iti tunggal balay tapno mangitukonkami kadagiti panangyadal iti Biblia babaen ti libro nga Isursuro ti Biblia. Iti umuna a balay a napananmi, dinamagko iti bumalay a maysa a nalatak a negosiante, no patienna a ti Biblia ket impaltiing ti Dios. Kinunana a mamati iti dayta. Kalpasanna, impabasak kenkuana ti 2 Timoteo 3:16. Imbagana a maayatan a makakita iti maysa a balasitang a mangisarsarita kenkuana iti kasta nga agkakapintas a bambanag, ken innalana ti libro.

“Idi sinarungkarak ti negosiante, nagpakuyogak ken ni lolok gapu ta agam-ammoda. Pinastreknakami ti negosiante. Impakitak kenkuana dagiti linaon ti libro nga Isursuro ti Biblia ket pinagpilik iti topiko a paginteresanna. Pinilina ti kapitulo 11 a napauluan iti, ‘Apay nga Ipalubos ti Dios ti Panagsagaba?’ Kalpasan a nabasa ti umuna a dua a parapo, nagadu ti sinalsaludsodda ken baketna. Kasta unay ti ragsakda a nakaammo kadagiti sungbat dagita iti Biblia, ket immanamongda a mayadalan a regular. Anian a ragsakko ta nakairugiak iti panangyadal iti Biblia iti immuna a balay a napananmi!”

Siempre, saan nga amin ket mayat a mayadalan iti Biblia, ken saan nga amin a nairugi a mayadalan ket makapagtultuloy. Ngem kas katrabahuan ti Dios, itultuloytayo ti mangitukon iti panangyadal iti Biblia iti adu a tattao aginggat’ mabalin gapu ta ammotayo a ni Jehova iyad-adanina dagiti marakarnero a tattao iti organisasionna sakbay a madadael ti sistema ti bambanag ni Satanas.​—Juan 6:44; 1 Cor. 3:9.

NAKATULONG TI TEKNOLOHIA A ‘MANGPAPARDAS’

Maragragsakan dagiti adipen ni Jehova iti pannakatungpal daytoy a makaparagsak a padto: “Daydiay met laeng bassit agbalinto a sangaribu, ket daydiay nagbassitan maysa a mannakabalin a nasion. Siak, ni Jehova, papardasekto dayta iti bukodna a tiempo.” (Isa. 60:22) Awan duadua nga  agtultuloy nga us-usaren ni Jehova dagiti panagrang-ay iti teknolohia a mangpapardas iti naespirituan nga irarang-ay iti daytoy a naganat a tiempo. Gapuna, impalubos ti Bagi a Manarawidwid ti pannakaaramid ti maysa nga administration software system a mausar dagiti amin a sanga nga opisina iti intero a lubong.

Dagiti kakabsat a mangar-aramid iti daytoy a software ket dati a nakabase iti sanga nga opisina iti South Africa ngem immakardan iti Sangalubongan a Hedkuarter iti Brooklyn, New York, ket sadiay nga itultuloyda a pasayaaten ken manteneren daytoy a software. Agarup 20 a sanga nga opisina ti agserserbi kas regional support center a tumulong kadagiti kabangibangda a sanga nga opisina tapno mabenepisiaranda kadagiti napateg a pakausaran daytoy a software.

Ania dagiti pagsayaatan daytoy? Gapu ta agpapada ti software nga us-usaren dagiti amin a sanga nga opisina, mabalinda ti agririnnanud iti impormasion. Kas pagarigan,  amin a sanga nga opisina iti intero a lubong nga agim-imprenta mabalindan a maammuan no ania a literatura ti mabalin a magun-odan kadagiti dadduma a sanga nga opisina. No adda agsobsobra a literatura iti maysa a sanga nga opisina, mabalin a kiddawen dayta ti sabali a sanga nga opisina imbes a mangyimprentada. Gapu iti daytoy a program, agraman ti dadduma pay a tools a mangipakita kadagiti kasapulan a literatura maibatay kadagiti pedido iti tay-ak, bimmassiten dagiti sobra a literatura a naipempen kadagiti amin a sanga nga opisina.

Daytoy a program tultulonganna dagiti boluntario iti Bethel a mangasikaso a naimbag kadagiti trabahoda kas iti panangproseso kadagiti order a literatura ken magasin, panangkolekta kadagiti tinawen a report iti serbisio iti tay-ak, panangyurnos kadagiti kombension ken asamblea, ken panangdutok kadagiti agdaldaliasat a manangaywan ken special pioneer. Makatulong met daytoy a software iti Purchasing Department, Accounting Department, ken iti panangaramid kadagiti imbentario isu a saantayo unayen nga agpampannuray kadagiti nangina a software a mailaklako.

PANANGISILNAG ITI NAESPIRITUAN A LAWAG BABAEN TI INTERNET

Kas iti literal a lawag a masilnaganna dagiti nasipnget a suli, dagiti adipen ti Dios ‘isilsilnagda ti silawda’ iti amin a paset ti daga. (Mat. 5:16) Ti maysa a nagsayaat nga alikamen a mangipapaay iti lawag uray kadagiti kasusulinekan a paset ti lubong ket ti opisial a Web site-tayo a www.watchtower.org. Daytoy a Web site itampokna dagiti artikulo kadagiti magasin, tract, ken broshur iti agarup 383 a lenguahe, kasta met ti kompleto a Baro a Lubong a Patarus ti Nasantuan a Kasuratan iti 11 a lenguahe. No gupgopen, nasurok a 700 nga artikulo ti magun-odan iti daytoy a site. Ti home page-na a linawas a mapabpabaro itampokna dagiti kaudian nga artikulo maipapan kadagiti makapainteres a topiko. Ania ti naitulong ti pannakaikabil iti Internet dagiti publikasion a mayim-imprenta iti nakaad-adu a lenguahe?

 Ni Pat nga agnanaed iti Florida, U.S.A., nakitana a ti Web site ti kapartakan a pamay-an iti panangala iti literatura iti sabali a lenguahe. Insuratna: “Idi naiwarasmin ti tract a Kayatmo Kadi a Maammuan ti Kinapudno?, inyimprentak daytoy kadagiti lenguahe nga us-usaren ti sumagmamano nga immawat iti Ingles ngem sabali ti lenguaheda.” Ania ti resultana?

Inyimprenta ni Pat daytoy a tract iti pagsasao a Thai tapno itedna iti babai a makinkukua iti bassit a pagtagilakuan. Naragsakan ti babai ken kasla di makappapati a nagalisto a nakabirok ni Pat iti literatura iti pagsasao a Thai. Daytoy a babai ken ti dadduma pay a kostumer innalada ti adres ti Web site-tayo tapno maluktanda met dayta. Adda maysa kadagiti babbai a nangawis ken Pat iti pagtaenganna tapno maitultuloyda ti agsarita. Kas ken Pat, adu ti nakapaneknek a makagunggona ti mangyimprenta iti sumagmamano a panid dagiti artikulo iti nagduduma a lenguahe manipud iti Web site-tayo a mabalinda nga ited kadagiti interesado a tattao a sabali ti pulina.

Idi napan a tawen, nasurok a 24 a milion a tattao iti amin a kontinente ti nanglukat iti Web site-tayo. Manipud  idi 2007, immadu iti 33 porsiento ti nanglukat iti site-tayo. Dagiti tattao iti intero a lubong, agraman dagiti naiputputong nga isla, kiniddawda a masarungkaran wenno mayadalanda iti Biblia iti pagtaenganda. Manipud idi 2007, agarup 55 porsiento ti immaduan dagiti agkidkiddaw iti kasta babaen ti Internet. Wen, agsilsilnag ti naespirituan a lawag agingga kadagiti kasusulinekan a paset ti daga, nga agpaay a pakaidayawan ken pakaitan-okan ti nailangitan nga Amatayo.​—Mat. 5:16.

Malaksid iti Web site a www.watchtower.org, naaramid met ti www.pr418.com tapno mabalin nga i-download dagiti nairekord a partikular a publikasion. Kasano kapateg daytoy nga espesipiko a Web site?

Ni Trisha a taga-Missouri, U.S.A., inyebkasna ti karirikna ti adu idi kinunana, “Segseggaak unay ti Huebes.” Apay? Gapu ta gagangay nga iti Huebes ti mabalinna a panangi-download kadagiti kabbaro a ruar Ti Pagwanawanan ken Agriingkayo! manipud iti www.pr418.com. Maysa ni Trisha kadagiti rinibu a kakabsattayo iti intero a lubong a masansan a mangluklukat iti daytoy a Web site a napno iti naespirituan a taraon. Agida-download-da iti audio recording dagiti magasin, Biblia, drama, libro, broshur, ken dagiti tract iti 27 a lenguahe. Mabalin met nga i-download dagiti publikasion iti American Sign Language a magun-odan iti dua a popular a video format.

Siasino dagiti mangluklukat iti daytoy a Web site tapno agi-download-da kadagiti publikasiontayo? Dagiti kakabsattayo iti pammati ti nangnangruna ken uray met dagiti dadduma a tattao iti nasurok a 200 a pagilian, agraman dagiti lugar a pakaiparparitan ti trabahotayo. Adda dagiti regular a mangluklukat iti Web site-tayo kadagiti lugar a kas iti Papua New Guinea, St. Helena, ken uray iti Antarctica. Kasano a mabembenepisiaran dagiti kakabsattayo iti panagi-download-da kadagiti nairekord a publikasion? Ti maysa a pagarigan ket ti French Polynesia, a masansan a naladladaw ti pannakaitulod dagiti magasin ngem iti petsana. Yantangay  uray dagiti agibumbunannag kadagiti kasusulinekan nga isla ket addaan iti Internet, mabalindan a denggen dagiti kaudian a ruar dagiti magasin iti aldaw a pannakaikabil dagita iti Web site.

Ni Deborah, a taga-Illinois, U.S.A., ket addaan iti nakaro a parikut iti salun-at isu a saan unay a makagimgimong ken marigatan a mangtandaan kadagiti mabasbasana. Ita, isu ket agida-download ken dumdumngegen kadagiti nairekord a publikasiontayo. Kinunana: “Nalaklakak itan a matandaanan ti material, ken naturedak itan a mangisarsarita kadagiti nangngegko.”

Ti maysa a pagassawaan iti bassit nga ili iti Texas, U.S.A. ket adda iyad-adalanda a taga-Siberia. Maragragsakanda ta mabalindan ti mangi-download kadagiti nairekord a magasin iti pagsasao a Ruso para iti iyad-adalanda. Kaay-ayo met ti maysa a kabsat a lalaki a taga-California, U.S.A. ti ag-jogging iti bigbigat bayat a naka-earphone tapno dumngeg iti nairekord a pannakaibasa dagiti magasin iti digital player-na.

Ti maysa a pagassawaan iti bassit nga ili iti makin-amianan a deppaar ti New Zealand ket linawas nga agida-download kadagiti nairekord a publikasion a maadal iti gimong kas iti artikulo a maadal iti Pagwanawanan, dagiti kapitulo manipud kadagiti libro nga “Agtalinaedka iti Ayat ti Dios” ken Agsursuroka iti Naindaklan a Mannursuro, ken ti nayeskediul a panagbasa iti Biblia para iti lawas. Denggenda dagita iti uneg ti makalawas. Kinuna ti asawa a lalaki: “Dagiti naespirituan a bambanag itan ti ad-adda a pagpatpatanganmi imbes a dagiti problema iti trabahomi.” Kasta met laeng ti rutina ti adu a pamilia iti intero a lubong.

Iti kada lawas nangruna iti Martes, rinibu a daras a maida-download dagiti kapitulo iti Biblia a nayeskediul a mabasa. Ti maadal nga artikulo Ti Pagwanawanan ti kaaduan a maida-download iti tunggal Sabado ken Domingo. Malaksid iti dayta, dagiti panglakayen iti kongregasion mabalinda met nga iyimprenta dagiti porma ti organisasion  ken dagiti balabala ti palawag manipud iti mismo a Web site. Makatulong dagitoy a probision tapno makainut ti organisasion iti panawen, kuarta, ken pigsa.

‘AGBANAGTO DAYTA A KAS PANGSAKSI’

Nupay ikagkagumaan dagiti Saksi ni Jehova “ti agbiag a natalinaay ken naulimek buyogen ti naan-anay a nadiosan a debosion,” saanda a masdaaw no maidadanesda. (1 Tim. 2:1, 2) Pinakdaaran ni Jesu-Kristo dagiti adalanna nga agbalindanto a puntiria ti pananggura idi kinunana: “Tiliwendakayto dagiti tattao ket idadanesdakayo, nga iyawatdakayo kadagiti sinagoga ken kadagiti pagbaludan, a maisaklangkayo iti sanguanan ti ar-ari ken dagiti gobernador maigapu iti naganko.” Ngem impatuldo ni Jesus a ti kasta nga ibubusor ket agballatek kadagiti bumusbusor iti nasin-aw a panagdaydayaw. Impakpakaunana: “Agbanagto dayta kadakayo a kas pangsaksi.”​—Luc. 21:12, 13, 17.

Kas kaitungpalan ti impadto ni Jesus, dagiti Saksi ni Jehova iti nadumaduma a lugar ket makidangdangadang iti di nainkalintegan a pannakatrato. Dagiti panangabakda iti korte ket nakatulong tapno masalimetmetanda ti wayawayada, a pakairamanan ti kalinteganda a mangasaba iti binalaybalay ken agtataripnong tapno agdaydayaw. Nupay adda pay laeng dagiti pakasuotan, adu dagiti kaso a napagballigiantayo iti korte iti daytoy a tawen a nangpasingked a narelihiosuan ti aktibidadtayo.

Austria

Kas resulta ti 30 a tawen a pannakidangadang dagiti kakabsattayo, ti Federal Ministry of Education, Art, and Culture iti Austria, impaayna kadagiti Saksi ni Jehova ti kangatuan a pannakabigbig kas narelihiosuan nga organisasion idi Mayo 2009. Dagiti Saksi ni Jehova ti maika-14 a narelihiosuan nga organisasion a mabigbigbig iti Austria. Kalpasan ti paborable a desision ti European Court of Human Rights idi Hulio 2008, adda pay tallo a kaso a pinaboran ti Korte agpaay kadagiti kakabsat idiay Austria a mangipakita a dagiti Saksi ni Jehova ket mabigbigbig kas narelihiosuan nga organisasion.

 South Africa

Idi 2005 ti kaso maibusor iti South African Department of Labour ket nayuli iti Labour Court of South Africa maigapu iti Watch Tower Bible and Tract Society of South Africa ken dagiti miembro ti Worldwide Order of Special Full-Time Servants of Jehovah’s Witnesses nga agserserbi iti Bethel iti South Africa. Ti panggep dayta ket tapno matingiting ti korte a dagiti Bethelite ket saan nga empleado isu a saan ida a sakup dagiti paglintegan ti South Africa mainaig iti panagtrabaho. Idi Marso 2009, inyetnag ti Labour Court ti desision a mangpasingked a dagiti Bethelite ket saan nga empleado kasta met a narelihiosuan ti trabaho a maar-aramid iti Bethel.

Uganda

Idi 2007, inkeddeng ti Uganda Revenue Authority (URA) a dagiti miembro ti Worldwide Order of Special Full-Time Servants of Jehovah’s Witnesses nga agserserbi iti Bethel iti Uganda ket empleado kas sagudayen ti linteg ti Uganda mainaig iti panagbuis. Gapuna, nayuli ti kaso maibusor iti URA iti High Court of Uganda nga adda iti Kampala maigapu iti International Bible Students Association (IBSA). Idi Hunio 2009, ti High Court pinaboranna ti IBSA, a mangpasingked a saan nga empleado dagiti Bethelite iti Uganda. Naammuan ti korte ti kinapudno a dagiti Bethelite ket “agpapada ti maaw-awatda nga allowance aniaman ti trabahoda.” Inkeddeng ti korte a dagiti Bethelite ket miembro ti religious order ken maipapaayanda iti taraon, pagyanan, ken bassit nga allowance para iti personal a kasapulanda bayat a tumultulongda kadagiti sabsabali ken ar-aramidenda ti narelihiosuan a trabaho iti Uganda.

Armenia

Dagiti agtuturay agtultuloy nga ar-arestuen ken ibalbaludda dagiti kakabsattayo nga agkedked nga agsoldado gapu ta saan nga ipalubos ti konsiensiada. Idi Agosto 2009, addan ti 74 a kakabsat iti pagbaludan. Yantangay amin a nababbaba a korte ket saan a pabor kadagiti kakabsat, uppat nga aplikasion ti nayuli iti European Court of Human Rights tapno agpatulongda. Intultuloy met ti gobierno ti mangipataw iti nangato unay a Value Added Tax para kadagiti  narelihiosuan a literatura manipud iti sabali a pagilian a maaw-awat dagiti kakabsat. Maikkat man wenno saan dagiti di nainkalintegan a babayadan dagiti kakabsat, manamnamatayo nga agtultuloy a mataraonanda a naimbag iti naespirituan.​—Isa. 65:13.

Azerbaijan

Agtultuloy a maipapaidam ti wayawaya dagiti kakabsattayo nga agdaydayaw. Rumigrigat ti pananggun-odda iti literatura ken ti panagtataripnongda tapno agdaydayaw. Nupay nairehistro ti relihion dagiti Saksi ni Jehova idiay Baku a kabesera, saan a nairehistro dayta iti dadduma a siudad isu a masansan dagiti ilegal a panangraut dagiti polis kadagiti gimong a maang-angay kadagiti pribado a pagtaengan sa maibalud dagiti kakabsat iti sumagmamano nga oras kadagiti estasion dagiti polis. Maar-aramid daytoy nupay saan a kidkiddawen ti linteg a mairehistro ti panagtataripnong tapno agdaydayaw kadagiti pribado a pagtaengan. Idi Abril 9, 2009, nangipasa dagiti kakabsat iti aplikasion iti gobierno ti Azerbaijan para iti pannakairehistro ti relihionda iti intero a pagilian. Sapay koma ta mapalag-ananto met laeng dagiti kakabsattayo gapu iti daytoy a panagparehistroda.

Egipto

Iti napalabas a tallo a tawen, dagiti kakabsattayo iti Egipto, kasta met iti Belgium, Italia, ken Estados Unidos ket immasideg kadagiti agtuturay iti Egipto tapno agbalin a legal ti trabahotayo. Kas resultana, dagiti agtuturay pinalubosanda dagiti kakabsat iti Egipto nga agdaydayaw a sitatalna kadagiti pribado a pagtaengan kadagiti grupo a buklen ti 30. Nupay kasta, mamalmaltrato latta no kua dagiti kakabsat. Dagiti opisina ti State Security agtultuloy a sipsiputan ken masansan a palpalutpoten ken pangpangtaanda dagiti kameng ti kongregasion. Malaksid iti direkta nga iyaasideg kadagiti agtuturay, ikagkagumaan pay laeng dagiti kakabsat ti agapelar iti korte tapno agbalin a legal ti aktibidadda.

Eritrea

Gapu ta naan-anay a naipaidam dagiti kangrunaan a kalintegan dagiti umili, idi Hunio 28, 2009, inaresto dagiti agtuturay ti 23 a kameng ti maysa a kongregasion a pakairamanan  dagiti babbaket a kakabsat ken tallo nga ubbing nga agtawen iti dua agingga iti uppat. Nupay nawayawayaanen dagiti babbaket a kakabsat, nakabalud latta dagiti ubbing a kadua dagiti innada ken nabayagen a naibalud dagiti ammada isu a nakabaluddan a sangapamiliaan. Ita, addan ti 64 a kakabsattayo a nakabalud. Karaman kadakuada dagiti tallo a kakabsat a lallaki nga idi pay 1994 a naibalud gapu iti neutral a takderda mainaig iti panagsoldado ken saan a naibaga no ania dagiti nasalungasingda a linteg.

India

Iti napalabas a sumagmamano a tawen, dagiti Saksi ni Jehova idiay India napasaranda ti idadarup dagiti managderraaw bayat a mangaskasabada iti publiko. Inibturanda pay ti berbal ken pisikal a panangabuso, pangta a maibalud, ken pannakapuor ti literaturada. Kalpasan a mapangpang-or dagiti kakabsat, masansan a maaresto ken maibaludda sa mabistada a kas man la adda krimen nga inaramidda. Ti nauyong a bunggoy dagiti managderraaw sugsugsoganda dagiti agtuturay a bumusor kadagiti kakabsat babaen ti panangakusarda kadakuada a salsalungasingenda dagiti lokal a linteg.

Kas pagarigan, idi Disiembre 008, adda tallo a Saksi ni Jehova (ina agraman ti anak ken ti sangapulo ti tawenna nga apokona) idiay Kundapura, Karnataka, a nangsarungkar iti maysa a babai a taga-Koni Village nga interesado nga agadal iti Biblia. Di nagbayag, dagitoy a tallo a Saksi ket puersado nga impan ti lima wenno innem a lallaki iti presinto. Naguummong dagiti nauyong a tattao, ket dagiti polis inakusaranda dagiti kakabsat iti trespassing (panagbasakbasak), panangisungsong iti guranggura, ken pananginsulto iti sabali a relihion. Idi agangay, napalubosan met laeng dagiti Saksi nga agawid. Dagitoy a kakabsat nga adda iti kasta a kasasaad ket tultulongan dagiti abogado.

Moldova

Dagiti kakabsattayo idiay Transnistria, a saan a mabigbigbig a rehion ti Moldova, ket naregta latta a mangitantandudo kadagiti interes ti Pagarian nupay agarup 12 a tawenen a maipangpangta a maparitan wenno mapasardeng  ti relihionda. Iti laksid ti adu a karit, binendisionan ni Jehova dagiti kakabsat ken nagballigida a nangidepensa kadagiti interes ti Pagarian kadagiti korte. Adtoy ti tallo a pagarigan: Napaneknekan a nakabasol ken namulta ti maysa a padi nga Orthodox a nangdangran iti dua a kakabsattayo a babbai iti berbal ken pisikal a pamay-an bayat a mangaskasabada iti purok ti Ordăşei, ti korte idiay Tiraspol pinatganna ti kiddaw dagiti kakabsat a mangirehistro iti relihiontayo sadiay, ken adda naaramid a desision maibusor iti Rîbniţa City Tax Inspectorate gapu iti saan a nainkalintegan a panangipatawda iti buis kadagiti taraon dagiti boluntario bayat ti panagibangonda iti Kingdom Hall.

Kazakhstan

Ti General Prosecutor’s Office of the Republic of Kazakhstan ket nangisungsong kadagiti protesta a nagresulta iti desision ti korte a pabor kadagiti kakabsat. Dagiti korte iti Kyzylorda, Shymkent, ken Saryagash nangyetnagda idi iti bilin a maparitan iti innem a bulan dagiti narelihiosuan nga aktibidadtayo. Ngem kas resulta ti desision ti korte idi Nobiembre 2008, naisubli ti narelihiosuan a wayawayatayo idiay Kyzylorda Region, idiay Shymkent, ken iti intero a makin-abagatan a rehion ti Kazakhstan. Malaksid iti dayta, idi Disiembre 008, kalpasan ti pito a tawen a panangiparit ti lokal a gobierno, ti korte iti siudad ti Atyraū inkeddengna nga adda kalintegan dagiti Saksi ni Jehova a mangirehistro iti relihionda iti dayta a siudad.

Russia

Iti napalabas a tawen serbisio, ti Administrative Center iti Russia ket namin-adu nga inimbestigaran ti abogado ken dagiti agtuturay iti sabali nga Estado gapu ta nabatad a kayatna a pasardengen dagiti narelihiosuan nga aktibidadtayo nupay saan a nainkalintegan dayta. Maidaddadanes ti tunggal maysa kadagiti kakabsattayo ken ginasut a daras a naimbestigaranda nupay awan ti makagapu. Naminsan, naalisan ti maysa a masikog a kabsat kalpasan ti ilegal a panangraut dagiti polis iti panaggigimongda. Naibalud met ti 15 ti tawenna nga agtutubo a lalaki a presente iti dayta a gimong. Ti Law on Counteracting Extremist Activity ti pangibasbasaran  dagiti abogado ti gobierno a mangwaswas kadagiti lokal a kongregasion ken mangiparit kadagiti narelihiosuan a literaturatayo. Dagitoy a di umiso nga akusasion ket nangituggod iti dadduma pay a panangatakar iti narelihiosuan a wayawaya, a pakairamanan ti di nainkalintegan a panangaresto, pannakaideporta, ken iti saan a pannakaipalubos a sumrek iti Russia dagiti uppat a kakabsat nga abogado nga agserbi kas pannakabagi dagiti Saksi ni Jehova a tumulong a mangidepensa kadagiti Saksi maibusor kadagitoy a palso nga akusasion. Ti maysa kadagitoy a kakabsat ket naibalud idiay Moscow iti 23 nga oras.

Dagiti miembro iti Federal Security Service ket nakibiang iti panangabang dagiti kakabsat kadagiti lugar a paggigimongan ken pagkombensionanda isu a naibabawi dagita. Linapdan pay dagiti agtuturay ti pannakaibangon dagiti  baro a Kingdom Hall. Naparparigat dagiti Saksi bayat ti kaaddada iti presinto gapu iti ulbod nga akusasion maibusor kadakuada.

South Korea

Idi Hunio 16, 2008, imbabawi ti gobierno ti South Korea ti inyanunsiona idi Mayo 7, 2008 a dagiti agkedked nga agsoldado ket maikkan iti gundaway a makiraman iti alternatibo a serbisio a di nainaig iti militar. Kunana a “ti panagkedked nga agsoldado ket agkasapulan iti kanayonan a panangadal ken masapul nga anamongan ti intero a pagilian.” Agingga ita, awan pay laeng ti naipasa a linteg mainaig iti alternatibo a serbisio a tiningiting ti Korean National Assembly. Ur-urayen dagiti kakabsat ti desision ti Human Rights Committee of the United Nations, a pabor iti dua nga aplikasion. Idi Enero 2009, kinuna ti Korean Presidential Commission on Suspicious Deaths in the Military a ti gobierno ti Korea ti mapabasol iti naranggas nga ipapatay ti lima a Saksi ni Jehova a puersado a nagsoldado manipud idi dekada 1970 agingga idi dekada 1980. Daytoy ti kaunaan a nagpateg a desision a mangipakita a ti Estado ti makimbasol kadagiti ipapatay gapu iti kinaranggas iti militaria.

Tajikistan

Ti Religious Association of Jehovah’s Witnesses idiay Tajikistan ket naparitan idi 2007, ken kinompiskar dagiti opisial ti aduana dagiti literatura a naggapu iti Germany. Nagapelar dagiti kakabsat iti korte militar ngem idi Setiembre 2008, saan a napatgan dayta. Nagapelarda manen iti Military Collegium of the Supreme Court ngem kaskasdi a saan a napatgan ti panagapelarda. Dagitoy a desision pinasingkedanna ti pannakaiparit ken pannakakompiskar dagiti literaturatayo. Maar-aramid ita dagiti kanayonan a panagregget tapno matulongan dagiti kakabsattayo.

Turkey

Maipaspasango ita dagiti kakabsattayo idiay Turkey kadagiti karit mainaig iti panagsoldado. Adda maysa a kabsat a lalaki a dua a tawenen a nakabalud gapu iti natibker a takderna. Adu pay a kakabsat a lallaki nga immabuten iti edad a mabalin nga agsoldado ti agtultuloy a mapangpangtaan a mamulta, maibalud, ken maikkat kadagiti pagtrabahuan.  Idi Marso 2009, naipakaammo kadagiti kakabsat a ti Human Rights Committee iti United Nations rinugiannan ti nagimbestigar mainaig iti dua a reklamo a naisubmitir maigapu kadagiti Saksi.

Malaksid iti dayta, idi Mayo 2009, inkeddeng ti European Court of Human Rights a paggigiddanen ti tallo a naisubmmitir nga aplikasion para iti pannakairugi ti imbestigasion no agpayso a naipaidam ti kalintegan ti innem kadagiti kakabsattayo, a ti uppat kadakuada ket nabayagen a nakabalud. Agyamyaman dagiti adipen ni Jehova gapu iti pannakaseknan dagitoy dua a korte ken mangnamnamada nga iti din agbayag, mawayawayaandanto met laengen.

Uzbekistan

Agpegpeggad latta ti kalintegan dagiti Saksi ni Jehova idiay Uzbekistan, ta isuda ti ad-adda a puntiria ti panangidadanes ti Estado. Idi Mayo 14, 2009, nakaruaren iti pagbaludan ti maysa nga ama nga addaan iti dua nga annak, ta naikaronan ti dua a tawen a sentensiana gapu iti panangaskasabana. Kabigatanna, naideporta idiay Tajikistan, a pagilianna. Nagtalinaed a nakabalud ti tallo pay a kakabsat gapu iti panangorganisarda iti maiparit kano nga aktibidad ti relihion. Dagiti abogado dagitoy a tallo a kakabsat ket mangisagsagana iti kanayonan a panagapelar iti Korte Suprema iti Uzbekistan. Dagiti kakabsat iti daytoy a pagilian ken dagiti kakabsat a naggapu iti sabali a pagilian ket namin-adun a nakisarita iti Uzbekistan State Committee of Religious Affairs ken kadagiti pannakabagi daytoy tapno ikagumaanda a tamingen dagitoy a banag.

EUROPEAN COURT OF HUMAN RIGHTS

Agdagup iti 22 ti kaso dagiti Saksi ni Jehova idiay Armenia, Austria, Azerbaijan, Cyprus, France, Georgia, Russia, Serbia, ken Turkey a nakapila iti European Court of Human Rights (ECHR) idiay Strasbourg, France. Nadakamat iti aplikasionda ti pannakaipaidam dagiti kangrunaan a kalinteganda a rumbeng koma a maipaay kadagiti umili a sakup ti European Convention on Human Rights. Ti siam kadagiti  aplikasion ket mainaig iti kalintegan nga agkedked nga agsoldado, ti pito ket mainaig iti pannakaidadanes ken panangidumduma maigapu iti relihion, ti uppat ket mainaig iti pannakaibabawi ti pannakairehistro wenno ti pannakaiparit ti legal nga ahensia nga us-usaren dagiti Saksi ni Jehova a mangorganisar iti trabaho a panangasaba, ken ti dua ket mainaig iti panangiparit ti gobierno iti kalinteganda nga agtataripnong a sitatalna tapno agdaydayaw.

Idi Hunio 17, 2008, inasikaso ti ECHR ti kaso nga inyuli ti Association Les Témoins de Jéhovah (ATJ) maibusor iti gobierno ti France. Dayta a darum ket maipapan iti di nainkalintegan a pannakaipataw ti 60 porsiento a buis a singsingiren ti gobierno manipud kadagiti amin a narelihiosuan a kontribusion a naurnong ti ATJ manipud idi 1993 agingga idi 1996. Nangibangon ti Korte kadagiti kanayonan a saludsod maipapan iti posible a pannakasalungasing ti Article 9 ti European Convention mainaig iti wayawaya ti relihion. Dagiti Saksi ni Jehova idiay France ken kadagiti dadduma pay a pagilian a sakup ti Council of Europe ur-urayenda itan no asikasuen ti Korte ti darumda.

Bayat nga ikagkagumaan ni Satanas a singaen ti pudno a panagdaydayaw babaen ti ‘panangbalabalana iti riribuk babaen iti bilin,’ dagiti Saksi ni Jehova ket agtultuloy a ‘natibker iti pammati, yantangay ammoda a ti isu met laeng a bambanag a sagsagabaen maitungtungpalda iti intero a timpuyog dagiti kakabsatda ditoy lubong.’ Sapay koma ta ti amin a pudno nga agdaydayaw agtultuloy a busorenda ni Satanas ken iyallatiwda ti amin a pakaringgoranda iti Dios ti amin a di-kaikarian a kinamanangngaasi ta ammoda nga isu ket maseknan kadakuada ken pagbalinenna ida a natibker ken napigsa.​—Sal. 94:20; 1 Ped. 5:7-11.

“KUALIPIKADO A MANGISURO ITI SABSABALI”

Ti panagsanay ket nagbalinen a paset ti Kongregasion Kristiano manipud pay idi rugrugina. Kinuna ni Pablo ken ni Timoteo: “Dagitoy a banag italekmo kadagiti matalek a lallaki, a, kalpasanna, makaanayto a kualipikado a mangisuro  iti sabsabali.” (2 Tim. 2:2) Ita, ti organisasion ni Jehova ket aduan iti programa a pakasanayan dagiti adipenna. Kas pagarigan idi 2008, adda 7,872 a panglakayen manipud kadagiti teritoria ti sanga nga opisina ti Estados Unidos, a pakairamanan ti Alaska, Bermuda, ken ti Turks and Caicos Islands, a timmabuno iti 84 a klase ti School for Congregation Elders iti Watchtower Educational Center idiay Patterson, New York.

Dayta a makalawas a naipamaysa a panagadal saklawenna ti nadumaduma nga aspeto ti biag dagiti panglakayen, a tumulong kadakuada a mangidaulo iti trabaho a panangasaba ken agbalin nga ad-adda nga epektibo a mannursuro iti kongregasion. (2 Tim. 4:5; 1 Ped. 5:2, 3) Dayta a klase pinaregtana met ida a mangtaginayon iti espiritualidadda ken ti espiritualidad ti pamiliada. Nasanayda pay a ‘mangaramat a siuumiso iti sao ti kinapudno.’ (2 Tim. 2:15) Dagiti sumaganad ket sumagmamano laeng kadagiti ebkas ti panagyaman dagiti panglakayen a timmabuno iti eskuelaan.

“Mapagulidanan ti kinapakumbaba dagiti instruktor no iti panangtrato kadagiti kakabsat iti kongregasion. Aglaplapusanan ti panagyamanko iti Bagi a Manarawidwid. Daytoy nga eskuelaan ket maysa kadagiti kasayaatan a pribilehio a naipaay kaniak kabayatan iti adun a tawen a kaaddak iti kinapudno.”

“Ammo ni Jehova a Diostayo no ania ti kasapulantayo ken no kaanona nga ipaay dayta. Napatibker ti pammatik ken rimmegtaak nga agserbi Kenkuana. Tinulongannak daytoy a kapadasan a mangtarus a naan-anay kadagiti ar-aramiden ni Jehova babaen ti makitkita a paset ti organisasionna ken tinulongannak a mangkita no kasano nga ay-aywananna ti amin nga adipenna.”

“Naisangsangayan daytoy a kapadasan. Bayat nga umad-adu ti masursurok iti eskuelaan, nariknak nga adu pay gayam dagiti banag a diak ammo. Ad-adda nga impategko ti personal a panagadal ken no apay a masapul nga iyaplikarko dagiti maad-adalko.”

 “Ti eskuelaan pinagbalinnak nga ad-adda a responsable a mangaywan iti pamiliak ken iti kongregasion buyogen ti panunot ni Kristo. (1 Cor. 2:16) Tinulongannak daytoy a mangipakita iti pudpudno a kinataok.”

“Daytoy a makalawas a panagsursuro a kadua dagiti instruktor nga inusar ni Jehova ket diak maisukat iti edukasion a magun-odan iti unibersidad.”

“Anian a makapabileg ken makagunggona daytoy a kapadasan! Pinaregtanak daytoy nga agtultuloy nga agserbi ken Jehova, agbalin a managsakripisio, ken agbalin a gubuayan ti pammaregta kadagiti kakabsat. (Isa. 32:2) Agyamanak kenka, Jehova!”

“Nariknami ti ayat ni Jehova babaen daytoy a kurso. Kasla impastorannakami ni Jehova.”

“Agyamanak ken Jehova iti daytoy a pribilehio a makasursuro iti nasaysayaat a panangibaklay iti annongek a mangipadayag ken mangidayaw kenkuana.”

Addanto panawen nga ipakaammo ti Bagi a Manarawidwid dagiti urnos agpaay kadagiti panglakayen iti dadduma pay a lugar tapno mabenepisiaranda iti daytoy a naintiempuan nga instruksion.

MANGYEG ITI RAG-O TI PANNAKAIDEDIKAR DAGITI SANGA NGA OPISINA

Idi Enero 24, 2009, ni Samuel Herd a miembro ti Bagi a Manarawidwid ti nangipaay iti palawag ti dedikasion ti baro a sanga nga opisina idiay Tanzania iti East Africa. Iti napalabas a 25 a tawen, ti sanga nga opisina iti daytoy a lugar ket konkreto nga addaan iti tallo a siled laeng ken pagaammo iti intero a Tanzania kas House Number 46, Magomeni Quarters. Adu kadagiti 779 a nararagsak a bisita manipud iti 22 a pagilian ti nakalua idi malagipda ti panagrang-ay ti trabaho nanipud idi naikkat ti pannakaiparit idi 1987. “Ni  laeng Jehova ti namagbalin a posible iti kasta a banag iti daytoy a pagilian,” kinuna ti maysa a kabsat a nabayagen iti kinapudno. Ita, rimmang-ay ti trabaho a panangasaba, ken nasuroken a 14,000 nga agibumbunannag ti maragragsakan ken agyamyaman ken Jehova, ken mangipapaay iti samiweng iti naganna.​—Sal. 92:1, 4.

Idi Sabado, Mayo 2, 2009, agarup 600 a kakabsat manipud iti 31 a pagilian ti timmabuno iti palawag ti dedikasion ti sanga nga opisina iti Netherlands nga impaay ni Theodore Jaracz a miembro ti Bagi a Manarawidwid. Nanayonan iti pasdek a pagtaengan ti patakder a naibangon idi 1983, ken dagiti lugar a dati a pagimprentaan kadagiti magasin ket napagbalin nga opisina ken video studio para iti Regional Audio Video Center (RAVC). Ti RAVC ket tumultulong iti pannakaisagana ti audio wenno video a maikabil kadagiti CD ken DVD iti 24 a lenguahe, a kaaduan kadagitoy ket maus-usar idiay Europa. Malaksid iti dayta, tumultulong ti  RAVC iti panangpataud kadagiti video iti agarup 20 a nagduduma a sign language. Ramanen daytoy a trabaho ti panangorganisar iti panangpataud kadagiti CD idiay Europa, Africa, ken Oceania, ken dagiti DVD iti intero a lubong. Ti pay sanga nga opisina iti Netherlands ti gumatgatang ken mangipatpatulod kadagiti bambanag a kasapulan dagiti sanga nga opisina iti dadduma pay a paset ti lubong, isu a maitutop unay a napabaro dagiti pasilidad daytoy a sanga nga opisina para kadagitoy a trabaho.

“PAGTALINAEDENYO TI BAGBAGIYO ITI AYAT TI DIOS”

Talaga nga adu ti panggapuantayo nga agrag-o. Anian a pribilehio ti agbiag kadagitoy a makaparagsak a tiempo! Pudno a naipadto a ‘dagiti maudi nga aldaw’ ket “narigat a pakilangenan.” (2 Tim. 3:1) Ngem gapu ta nakaas-asidegen ti pannakaisalakan, nasken a determinado ti tunggal maysa kadatayo a mangipangag iti indagadag ni Judas: “Dakayo, dungdungnguen, babaen ti panangpabilegyo iti bagbagiyo iti kasasantuan a pammatiyo, ken panagkararagyo buyogen ti nasantuan nga espiritu, pagtalinaedenyo ti bagbagiyo iti ayat ti Dios, bayat nga ur-urayenyo ti asi ni Apotayo a Jesu-Kristo a maipaay iti agnanayon a biag.”​—Jud. 20, 21.

[Graph iti panid 13]

(Para iti aktual a pannakaurnosna, kitaem ti publikasion)

INALDAW A MANGLUKLUKAT ITI www.watchtower.org

70,000

50,000

30,000

10,000

1999 2001 2003 2005 2007 2009

[Mapa iti panid 21]

Para iti aktual a pannakaurnosna, kitaem ti publikasion)

Dagiti Lugar nga Addaan iti Kaso iti Korte

AUSTRIA

EGYPT

ERITREA

UGANDA

SOUTH AFRICA

ARMENIA

MOLDOVA

TURKEY

AZERBAIJAN

RUSSIA

KAZAKHSTAN

UZBEKISTAN

TAJIKISTAN

INDIA

SOUTH KOREA

[Ladawan iti panid 11]

Uray dagiti ubbing nga agibumbunannag tagtagiragsakenda ti mangitukon iti panagadal iti Biblia

 [Dagiti Ladawan iti panid 27]

Ti School for Congregation Elders tinulonganna ida a mangitungpal kadagiti nateokratikuan nga annongenda

[Dagiti Ladawan iti panid 28]

Ni Kabsat Jaracz a mangipapaay iti palawag ti dedikasion iti sanga nga opisina ti Netherlands

[Dagiti Ladawan iti panid 29]

Ni Kabsat Herd a mangipapaay iti palawag ti dedikasion iti sanga nga opisina ti Tanzania