Surat ti Bagi a Manarawidwid

Patgenmi a Pada a Saksi ni Jehova:

Anian a pribilehio ti mangawit iti nagan ni Jehova a Soberano iti Uniberso! Agnanayon ken awan kaaspingna dayta a nagan. Ni Jehova ti nangigalad iti naganna kadatayo, ket manipud idi 1931, naipabigbigtayo kas saksina. (Isa. 43:10) Gapuna, ditay ibain nga iyam-ammo ti bagbagitayo kas Saksi ni Jehova.

Ti Diablo kanayon nga ikagkagumaanna a lapdan ti pannakaiwaragawag ti nagan ti Dios. Ti lubong nga iturturayanna um-umsienna ti nagan ni Jehova. Ti Babilonia a Dakkel, ti imperio ti ulbod a relihion, kagurana ti nagan ti Dios ken inikkatna dayta iti adu a patarus ti Biblia. Maisupadi iti dayta, intandudo ni Jesus ti nagan ni Amana ken impangpangrunana dayta iti pagtuladan a kararag nga insurona kadagiti pasurotna. Kinunana: “Agkararagkayo, ngarud, a kastoy: ‘Amami nga adda iti langlangit, masantipikar koma ti naganmo.’” (Mat. 6:9) Idi agangay, naimpusuan nga inkararagna iti Amana: “Imparangarangko ti naganmo kadagiti tattao nga intedmo kaniak manipud iti lubong.” (Juan 17:6) Kas panangsurot iti ulidan ni Jesus, ad-adda a determinadotayo ita a  mangiwaragawag a sipipinget iti nagan ni Jehova iti intero a daga.

Ti teksto iti tawen 2009 a, “Naan-anay a mangsaksiak iti naimbag a damag,” tinignaynatayo a mangitungpal a naan-anay iti ministeriotayo. (Ara. 20:24) Awan duadua a sibabaknang a binendisionan ni Jehova dagiti panagreggettayo iti napalabas a tawen serbisio. Nakaipaaytayo iti nasaknap a panangsaksi iti intero a lubong. Pakaidayawan ken pakaitan-okan dayta ti nagan ni Jehova. Ti 7,313,173 a baro a kangatuan a bilang dagiti agibumbunannag ket sangsangkamaysa a nangasaba ken sinuruanda dagidiay napudno ti panagpuspusona a mangbirbirok kadagiti solusion ti adu a parikut a pakaipaspasanguanda iti inaldaw. Ti 18,168,323 a timmabuno iti Panglaglagip iti ipapatay ni Kristo ipakitana a riniwriw pay ti mabalin nga umawag iti nagan ni Jehova sakbay nga agpatingga daytoy a sistema ti bambanag.

Agingga nga ipalubos ni Jehova, itultuloytayo nga ikasaba a sireregta ti naimbag a damag maipapan iti Pagarian, nga aramidentayo ti amin a pamay-an tapno madanontayo dagiti tattao kadagiti teritoriatayo. (Mat. 24:14; Mar. 13:10) Mangaskasabatayo man iti tunggal balay, kadagiti lansangan, babaen ti surat ken telepono, wenno iti di pormal a pamay-an, sapay koma ta ikagumaantayo nga iyam-ammo ti nagan ni Jehova ken ti panggepna iti adu a tattao aginggat’ mabalin.

Adu ti panggapuantayo a mamati a mabiiten nga agtignay ni Jehova tapno santipikarenna ti naganna.  (Ezeq. 36:23) Umad-adanin ti tiempo a pannakadadael dagiti amin a mangtabtabbaaw iti dayta. Anian a nagdayagto dayta nga aldaw para kadagiti amin a nasungdo nga adipen ni Jehova, a nangiwaragawag iti naganna ken nangitandudo iti kinasoberanona!

Ti panangipateg ni Jehova kadagiti adipenna ket nabatad a naiparangarang kadagiti “Agtultuloykayo nga Agbantay!” a Kombension Distrito ken Internasional a Kombension a naangay iti adu a paset ti lubong idi 2009. Nagpateg ken nakallalagip dagitoy a kombension. Ginutugotnatayo nga agbalin nga ad-adda a nasiput iti aldaw ni Jehova.​—Mar. 13:37; 1 Tes. 5:1, 2, 4.

Pudno a nakaim-imbag kadatayo ni Jehova; pinunnona ti pusotayo iti rag-o. Pagiddaennatayo iti naraber a pagaraban ken paginanaennatayo iti nasayaat ti pannakadanumna a lugar.​—Sal. 23:1, 2; 100:2, 5.

Namnamaem nga agtultuloy a bendisionannaka ni Jehova bayat nga okupadoka nga agserbi kenkuana kadagiti sumaganad a bulbulan!

Idanonmi ti Nakristianuan nga ayatmi kadakayo a kakabsatmi iti intero a lubong.

Dagiti kakabsatyo,

Bagi a Manarawidwid Dagiti Saksi ni Jehova