Dagiti Tampok iti Napalabas a Tawen

MAKAPARAGSAK a makita ti ibambanag ni Jehova babaen kadagiti ad-adipenna iti intero a lubong. Ipadamag daytoy a Tinawen a Libro ti irarang-ay iti tay-ak ti sign language ken ilawlawagna no kasano ti panagsirarak ti Writing Department. Basaenyo ti maipapan kadagiti internasional a kombension ken kadagiti makapainteres a detalye maipapan iti baro a pagkantaantayo. Ammuenyo dagiti kaudian a damag mainaig kadagiti kaso nga ilablaban dagiti Saksi ni Jehova iti nadumaduma a pagilian, damdamag manipud Haiti, ken dagiti nabiit pay a naangay a panangidedikar kadagiti sanga nga opisina. Namnamaenmi a maragsakan ken maparegtakayo iti mabasayo.

 ‘KAYAT TI DIOS NGA ISU KET MAAM-AMMO DAGITI TULENG’

Usigenyo ti mapaspasamak iti tay-ak ti sign-language. Ni Salvatore, idiay Estados Unidos, ket maysa a tuleng a ti asawana ket Saksi ni Jehova. Nupay adun a tawen a naammuanna ti kinapudno iti Biblia, saan a rimmang-ay iti naespirituan. Insingasing ni baketna nga inaldaw a basaenna ti Biblia iti las-ud ti maysa a tawen. Ngem naupay idi saanna a maawatan ti basbasaenna iti laksid ti panangikagumaanna. “Pulos a diakto masursuro nga ayaten ni Jehova,” insennaayna.

Nupay kasta, nangrugi nga agbalbaliw ti biag ni Salvatore idi maibaga kenkuana nga addan DVD ti dadduma a paset ti Baro a Lubong a Patarus ti Nasantuan a Kasuratan iti American Sign Language. Kalpasan ti panangad-adalna iti Sao ti Dios iti sign language, naikunana, “Masiguradok a kayat ti Dios a maam-ammok isuna!” Nakipagadal ni Salvatore iti Biblia, ket maragragsakan itan nga agserserbi ken Jehova kas bautisado a Saksi.

Kas ken Salvatore, dagiti dadduma a tuleng iti intero a lubong mariknada ti nabara nga ayat ken kasta unay a pannakaseknan ni Jehova babaen kadagiti Biblia iti sign language ken dadduma pay a publikasion a magun-odanen iti DVD, agraman dagiti mai-download iti Internet. Dagiti publikasion ket magun-odanen iti 46 a sign language, ken iti kanayonanto pay a 13. Ti Pagwanawanan ket magun-odanen iti siam kadagita a lenguahe, ken dagiti paset ti Baro a Lubong a Patarus ket nairuaren iti American, Brazilian, Colombian, Italian, Mexican, ken Russian a sign language.

Kanayon a makatukay rikna a makita no kasano a matignay ti puspuso dagiti kabbaro gapu kadagiti publikasion iti sign language. “Idi 1981 ti damo a pannakipagadalko, a nausar dagiti publikasion a naisurat iti Japanese,” insalaysay ni Natsue, maysa a tuleng a babai idiay Japan. “Ngem insardengko ti nagadal idi saanko a matartarusan ti ad-adalek ken mangrugin a bumusor ti pamiliak.”

 “Idi Abril 2007, maysa nga agibumbunannag ti nangipakita kaniak iti Japanese Sign Language nga edision ti You Can Be God’s Friend!—On DVD. Dayta ket 26 a tawenen ti napalabas sipud idi damo a nakipagadalak iti Biblia. Dagus a nakipagadalak manen ket nariknak a mapempennek ti naespirituan a kasapulak. Nabautisaranak idi Nobiembre 2008.”

Iti intero a lubong, adda itan nasurok a 16,000 a tuleng nga agibumbunannag. Daydayawenda ni Jehova babaen kadagiti ima ken ekspresion ti rupada. Ti tulong a magunggun-odanda babaen ti 30 a libro, broshur, polieto, video, ken naibatay-Biblia a drama a naipatarus iti nagduduma a sign language ipatalgedna kadakuada ti ayat ni Jehova ken ti panangipategna iti nasungdo a panagserbida.

Adu nga ebkas ti panagyaman manipud kadagiti kakabsat ken interesado a tattao ti maaw-awat ti 54 a sanga nga opisina a mangipatpatarus kadagiti publikasion iti sign language. Salaysayen dagiti suratda no kasano karagsak dagiti tuleng idi maammuanda dagiti naun-uneg a naespirituan a kinapudno iti bukodda a sign language. Ni Emi, a taga-Japan, a tuleng dagiti nagannakna, ti maysa kadagiti nangyebkas iti panagyaman.

“Adu a tawen nga immun-una a nabautisaran dagiti dadakkelko,” kuna ni Emi, “ngem marigatanda a mangtarus kadagiti publikasion a naisurat iti Japanese. No adda saanda a maawatan, kiddawenda ti panangilawlawagko. Ita, mailawlawagdan ti kinapudno buyogen ti kompiansa. Kinuna ni Nanang, ‘Nangrugi laeng a matarusak dagiti detalye ti  Biblia idi addan dagiti publikasion iti sign language.’ Kas resultana, nasingsingedda itan ken Jehova ken nasaysayaaten ti relasionmi kas pamilia.”

‘PANANGTUNTON ITI AMIN A BAMBANAG BUYOGEN TI KINAUMISO’

Kinuna ni Jesus a ti matalek nga adipen ket nainsiriban ti panangipaaynanto iti “taraon iti umiso a tiempo” kadagiti katulongna. Impasimudaag ngarud ni Kristo a naannad, manakem, ken mannakaawatto dagidiay mangipaay iti dayta a naespirituan a “taraon” kadagiti pudno nga agdaydayaw iti Dios.​—Mat. 24:45-47.

Iti panawentayo, dagiti napulotan a kakabsat ni Kristo us-usarenda ti Writing Department idiay Brooklyn, New York, a mangipaay iti naespirituan nga impormasion babaen kadagiti magasin, broshur, libro, ken dadduma pay a nayimprenta ken elektroniko a material. Kas iti pisikal a taraon, kasapulan met a maisagana a naimbag dagitoy a naespirituan a taraon. Uray dagiti mannurat iti Biblia, nga inwanwan ti nasantuan nga espiritu, siniguradoda a nasirarak a naimbag ken umiso dagiti insuratda nga impormasion. Kas pagarigan, ni Lucas kinasaona ti adu a nakasaksi ken ‘tinuntonna ti amin a bambanag manipud iti pangrugian buyogen ti kinaumiso.’​—Luc. 1:1-4.

Ti Writing Department sursurotenda met ti kasta a padron a ‘panangtunton iti amin a bambanag buyogen ti kinaumiso.’ Ngem pakasarakantayo iti mapagtalkan nga impormasion? Nupay ti Internet ket kombeniente ken alisto a pagalaan iti adu nga impormasion, dagiti managsirarak ti Writing Department saanda nga agpampannuray kadagiti blog wenno kadagiti saan a napatalgedan nga impormasion a naiserrek kadagiti Website nga insurat dagiti saan a nagpabigbig ken saan a kualipikado nga indibidual. Kas pagarigan, ti Wikipedia, maysa nga online encyclopedia, mamakdaar a dadduma kadagiti artikulo iti mismo a site-na ket “aduan iti di umiso nga impormasion, dagiti linaonna ket saan a kas iti kinamapagtalkan dagiti linaon ti ensiklopedia, wenno mabalin a naigagara a nanayonan, naksayan,  wenno nabalbaliwan ti linaonna.” Innayonna pay a “masapul nga agannad dagiti manglukat iti dayta a site.” Gapuna, ti Writing Department ket agsuksukimat kadagiti mapagtalkan a reperensia, artikulo nga insurat dagiti mabigbigbig nga eksperto, ken libro a pinutar dagiti mararaem a managipablaak.

Ti Writing Department ket addaan iti bukodna a komprehensibo a libraria a naglaon iti rinibribu a libro. Malaksid iti dayta, dagiti managsirarak ti Writing Department agsukimatda met kadagiti kabangibang a libraria nga us-usaren ti publiko ken dagiti estudiante. Babaen ti interlibrary loan, mabalinda met ti bumulod kadagiti material a nalawa ti panangilawlawagna iti maysa nga espesipiko a topiko. Ti maysa kadagiti dakkel a libraria ti unibersidad a pagsuksukimatan dagiti managsirarak ti Writing Department ket addaan iti agarup lima a milion a libro, 58,000 a magasin, 5.4 a milion a microform (babassit a film a naglaon kadagiti impormasion), ken rinibribu nga elektroniko a database (kamalig ti impormasion). Addaan met ti Writing Department iti dakkel nga artsibo dagiti kapkapadasan, nakartib nga artikulo ken ladladawan, ken historikal nga impormasion. Kanayon a mapabaro dagita babaen kadagiti impormasion manipud kadagiti lokal a gubuayan ken sanga nga opisina iti intero a lubong.

Siempre, kas ipalagip ti Eclesiastes 12:12, “ti panagaramid iti adu a libro awan pagnguduanna.” Uray dagiti mabigbigbig a gubuayan ket mabalin met a naglaon kadagiti biddut nga impormasion. Isu a kasano ti panangsukimattayo iti kalidad, kinaumiso, ken kinamapagtalkan ti impormasion?

Alaentayo a pagarigan daytoy a dinakamat ti broshur a Naparsua Kadi ti Biag? maipapan iti saput ti lawwalawwa kas maysa kadagiti kalagdaan a material ditoy daga: “No mapadakkel dayta a kas iti pagay-ayaman iti football, ti kasla iket a balay ti lawwalawwa nga addaan iti saput a maysa a sentimetro ti kapuskolna ken uppat a sentimetro ti  nagbabaetanda kabaelanna a pasardengen ti tumaytayab a nagdakkel nga eroplano!” Nupay mabigbigbig a magasin ti siensia ti nangibaga iti dayta, saan a dayta ti orihinal a gubuayan, ken saan a nalawag ti orihinal nga impormasion. Gapuna, dagiti managsiraraktayo masapul a kontakenda daydiay nagtaudan ti orihinal nga impormasion ken sukimatenda no kasano a nagtengna dayta a konklusion. Nasken nga ammuenda met ti pormula ken ti impormasion a kasapulan tapno makalkularda no ania ti mapasamak no maidungpar ti dakkel nga eroplano iti saput ti lawwalawwa a kas kadakkel ti pagay-ayaman iti football. Kalpasan ti adu nga oras a panagsirarak ken naannad a panagkalkular, napatalgedan idi agangay ti kinaumiso dayta a nakaskasdaaw a bassit nga impormasion.

Ngem no dadduma, uray ti kasla mabigbigbig a gubuayan ket saanna a naan-anay a mapasingkedan dagiti  detalye. Kas pagarigan: Pasaray maadaw idi daytoy nga imbaga kano ni Gandhi ken ni Lord Irwin idi addada iti ashram (lugar a pagkarkararagan) ni Ghandi: “No agkaykaysa ti ilim ken ti ilik kadagiti sursuro nga impaay ni Kristo iti daytoy a Sermon iti Bantay, marisuttayo saan laeng a dagiti parikut iti ilita no di ket iti intero a lubong.” Nupay kasta, kalpasan ti panangsukimat a naimbag kadagita a sasao, awan ti nakita a pammaneknek a simmarungkar ni Lord Irwin iti ashram ni Gandhi. Namataud dayta kadagiti di pay nasungbatan a saludsod maipapan no sadino ken kaano a naisawang dagita a sasao ken no agpayso nga imbaga ni Ghandi dagita. Gapuna, saanen nga ad-adawen dagiti publikasiontayo dagita a sasao.

Mabalin a nabasayo met ti maipapan iti maysa nga insidente mainaig ken Sir Isaac Newton ken ti modelo ti sistema solar. Naipadamag a maysa a bisita nga ateista ti nangisaludsod: “Siasino ti nangaramid iti daytoy?” Idi nga insungbat ni Newton, “Awan!” kinuna ti ateista, “Imposible dayta!” Kalpasanna, imbaga kano ni Newton iti dayta nga ateista a ti inaramidna a modelo ti nadadaeg nga amang a sistema solar paneknekanna nga adda la ketdi ti nangdisenio wenno nangaramid iti dayta. Nupay makapainteres dayta a salaysay, ti kinaagpayso dayta a panagpatang ket saan a mapaneknekan dagiti historikal a gubuayan ken uray dagiti iskolar ken biograpo a mangad-adal kadagiti gapuanan ni Newton. Makapainteres ta kadagiti damo a pannakadakamat dayta nga insidente idi rugrugi ti maika-18 a siglo, ti nausar ket saan a ti nagan ni Newton, no di ket ti nagan ti Aleman nga iskolar a ni Athanasius Kircher. Gapuna, saanen nga us-usaren ti Writing Department dayta a salaysay kadagiti publikasiontayo.

No dadduma, uray ti simple a detalye ket masapul a masukimat a naimbag tapno mapatalgedan ti kinaumisona. Kas pagarigan, mabalin a kunaen ti maysa a kabsat iti pakasaritaan ti biagna nga isu ket naipasngay idiay Czechoslovakia idi 1915. Ngem idi laeng 1918 a naawagan iti Czechoslovakia dayta a lugar. Sadino ngarud ti nakayanakanna?  Tapno masungbatan dayta, masapul a mausig dagiti daan a mapa wenno historikal a rekord.

Iti panangisalaysayna iti kapadasanna, mabalin met nga ibaga ti maysa a kabsat nga isu ket nabautisaran idiay San Francisco iti espesipiko a petsa. Ngem idi mausig, naammuan nga awan ti kombension wenno asamblea a naangay iti dayta a petsa iti dayta a siudad. Kasano a mapagtunos dayta? No dadduma, agpalia ti lagiptayo. Nupay saan a nalipatan ti kabsat ti lugar a nakabautisaranna, mabalin a saan nga husto ti petsa a malagipna. Kaaduanna a posible a mapasingkedan ti kinaumiso dagiti detalye babaen ti panangsukimat ken panangidilig kadagiti nadumaduma a gubuayan ti impormasion.

Kas sumario, dagiti laeng umiso ken pudno nga impormasion ti kayat nga usaren ti Writing Department, uray kadagiti kasla di unay napateg a detalye. Kas resultana, kankanayon a makaipaay ti “matalek ken masirib nga adipen” iti naespirituan a taraon a pakaidayawan ti “Dios ti kinapudno,” ni Jehova.​—Sal. 31:5.

TULONG TAPNO ‘MAKAPAGTULTULOY NGA AGBANTAY’

Minilion a Saksi ni Jehova iti intero a lubong ti nangapresiar iti kinapraktikal ken kinanaintiempuan ti programa a naidatag kadagiti adu nga “Agtultuloy nga Agbantay”  a Kombension Distrito idi 2009. Karaman kadagiti timmabuno ti nasurok 200,000 a delegado manipud iti 136 a pagilian a naawis a tumabuno iti maysa kadagiti 37 nga internasional a kombension. Naangay dagita a kombension idiay Austria, Chile, Côte d’Ivoire, France, Germany, Ghana, Italy, Kenya, Korea, Mexico, Myanmar, Peru, Poland, South Africa, Trinidad ken Tobago, ken United States. Ti kangatuan a bilang dagiti timmabuno kadagitoy nga internasional a kombension ket agdagup iti 1,495,045, ken 15,730 ti nabautisaran.

Ania ti panggep dagiti internasional a kombension? Dagitoy a panagtitipon ket iyur-urnos ti Bagi a Manarawidwid iti kada sumagmamano a tawen kadagiti siudad a nasayaat ti lokasionna​—no dadduma, kadagiti pagilian a sigud a maiparit  ti aktibidad dagiti Saksi ni Jehova. Nairanta dagita a kombension a mangpabileg kadagiti kakabsat ken tumulong tapno ad-adda a maparayray ti pannakaikasaba ti naimbag a damag kadagita a pagilian.

Dagitoy a kombension ket nangipaay met kadagiti kakabsattayo iti naidumduma a gundaway tapno matagiragsakda a mismo ti naisangsangayan a “singgalut ti panagkaykaysa” ti internasional a panagkakabsattayo. (Col. 3:14) Anian a makaparagsak a makita ti ayat, talna, ken panagkaykaysa kadagiti kasta a kombension nupay nagduduma ti nasionalidad, kultura, ken lenguahe dagiti timmabuno! Dagitoy a grupo a nagduduma ti pulida ket impakitada ti pudpudno nga ayat bayat a sisisinged a naglalangenda sakbay ken kalpasan ti sesion​—iti nainkabsatan a panagiinnabrasa, panagpapangan, panagreretrato, ken panagsisinnukat iti simple a sagut, numero ti telepono, ken adres. Adu kadagiti delegado ken lumugar a Saksi ti nagbado kadagiti tradisional a kawes.

Ti maysa a naisangsangayan a paset ti programa kadagiti internasional a kombension ket ti “Damdamag Manipud Kadagiti Sabali a Pagilian,” a naiparang iti amin nga uppat nga aldaw. Kinuna ti maysa nga agdaldaliasat a manangaywan manipud Italia a dagita a damdamag impariknana iti amin a timmabuno a “pasetda ti pudno nga internasional a panagkakabsat a mangitungtungpal iti maymaysa a panggep​—ti pannakaikasaba ti Pagarian.” Anian a makaparagsak a mangngegan dagiti makaparegta a kapadasan dagiti misionero ken dadduma pay nga amin-tiempo nga ad-adipen a nagbakasion kadagiti pagilianda manipud nakaidestinuanda a pagilian! Dagiti nagsayaat nga ulidanda ti agtultuloy a gubuayan ti pammaregta para kadagiti agtutubo ken natataengan!

 Kadagitoy nga internasional a kombension, makaparagsak met a makadua dagiti miembro ti Bagi a Manarawidwid a mangipaay iti naintiempuan a naespirituan nga instruksion ken naayat a pammaregta. Dagiti palawag dagiti miembro ti Bagi a Manarawidwid, agraman ti “Damdamag Manipud Kadagiti Sabali a Pagilian,” ket naggigiddan a naipatarus tapno magunggonaan ti amin a grupo ti nagduduma a lenguahe a dumdumngeg iti programa. Kas pagarigan, iti maikadua nga internasional a kombension a naangay idiay Honolulu, Hawaii, ni Stephen Lett a kameng ti Bagi a Manarawidwid ket nangiparang iti uppat a palawag iti Ingles, a naggigiddan a naipatarus iti Chuukese, Iloko, Japanese, Mandarin, Marshallese, ken Samoan.

Iti pannakayurnos dagiti internasional a kombension, ikabilangan ti Bagi a Manarawidwid ti kadakkel dagiti pasilidad a mabalin a pagkombensionan, ti kaadu dagiti tumabunonto a Saksi iti dayta a lugar ken dagiti aggapu kadagiti sabali a pagilian, ken ti kaadu ti mabalin a pagdagusan dagiti delegado. Kalpasanna, dagiti responsable a kakabsat iti tunggal siudad a pagkombensionan mangalada iti pammalubos kadagiti lokal nga autoridad ken makikontratada kadagiti mangimanmanehar kadagiti pasilidad a pagkombensionan.

Yantangay dagiti dadakkel nga estadium ti kaaduanna a pakaangayan ti kombension, adu a panagplano ken trabaho ti kasapulan tapno masigurado a presentable dagitoy a lugar a pagdayawan ken Jehova. Kas pagarigan, idiay Peru, adda paay-ayam iti soccer sakbay unay ti kombension. Gapuna, sa laengen nakastrek dagiti kakabsat tapno agdalus ken agurnos iti estadium iti rabii sakbay ti panangrugi ti sesion. Nupay 3,000 a boluntario ti nakiddaw a tumulong, nasurok a 7,000 a kakabsat a lallaki ken babbai ti simmangpet iti alas sais ti malem ket inkagumaanda nga inringpas amin a trabaho iti nagpatnag.

Iti panagngudo ti internasional a kombension a naangay idiay Long Beach, California, U.S.A., tallo a trabahador a  mangmanmantener iti estadium ti nagkuna: “Adun a relihion ti nagusar iti daytoy nga estadium, ngem awan pay ti nakaaramid iti kas iti inaramidyo. Nakaskasdaaw dayta.” Maysa kadagiti trabahador ti nangadmitir a no adda agtuktok a Saksi ni Jehova iti ruanganna, masansan a kunaenna iti bagina, “Sige agtuktokkayo laeng, ngem diakto pulos luktan ti ruangan.” Ngem ita, kinunana nga inton agtuktok manen dagiti kakabsat, ilukatannanton ida ken agdengngeg. Natignay pay ketdi ti maysa kadakuada a mangibaga, “Diak pay pulos naikameng iti aniaman a relihion, ngem daytoy a relihion ti kayatko a pakaikamengan.”

Anian a nagbileg a panangsaksi ti naipaay iti amin a siudad a nakaangayan ti kombension a pakaidayawan ni Jehova! Ken anian a yamantayo ken Jehova gapu iti panangyurnosna kadagiti makapabileg a kombension tapno ‘makapagtultuloytayo nga agbantay’!​—Mat. 24:42.

PANAGKANTA A PAKAIDAYAWAN NI JEHOVA

Ti panagkanta ket nagpateg a paset ti panagdayawtayo ken Jehova. Gapuna, kadagiti kombension idi 2009, kasta unay ti ragsak dagiti ad-adipen ti Dios idi nayanunsio nga addan baro a pagkantaan a napauluan, Kantaanyo ni Jehova. Ngem apay a kasapulan ti baro a pagkantaan?

Kadarato a marebisar dagiti pagkantaan tapno maitunos dagita iti rumanraniag a naespirituan a lawag. (Prov. 4:18) Gapuna, ti panangisagana iti baro a pagkantaan ket mangipaay iti gundaway tapno maaramid dagiti kasapulan a panangbalbaliw kadagiti liriko dagiti kantatayo. Napili dagiti sasao tapno nalaklaka a maipapuso ti kababagas dagiti kanta bayat a makankansion ken tapno nalaklaka a lagipen ti lirikoda. Tapno ad-adda pay a  maikabesa dagiti kanta, adu kadagitoy ti napaababa. Adda dagiti kanta a maitutop a naikkan iti koro tapno maulit ken maipaganetget dagiti kangrunaan a punto. Kanayonanna, naaramid ti panagregget tapno ti tunggal silaba ti tunggal sao ket maaddaan iti maysa laeng a kaibatogan a nota, imbes a nasursurok a maysa a silaba ti kaibatogan ti maysa a nota.

Kalpasan ti naannad a pananganalisar iti dati a pagkantaantayo nga Agkanta iti Daydayaw ken Jehova, naammuan a kasapulan a mabalbaliwan ti dadduma a tono tapno nalaklaka a kantaen. Kas resultana, nababbaba itan ti tono ti dadduma kadagiti kanta tapno nalaklaka a kantaen dagiti nangatngato a nota. Kasta met, saan nga amin a kanta ket eksakto ti pannakakansionna a kas iti naisurat iti libro. Gapuna, iti dadduma a kaso, nabaliwan ti mismo a tono tapno maibagay iti mas natural a panangkanta dagiti kakabsat iti sangalubongan.

Nausig met a naimbag dagiti detalye, a kas iti no kasano a mayimprenta dagiti musika iti panid. Nupay dua a panid ti inokuparan dagiti atiddog a kanta tapno malaonna ti at-atiddog ti pannakaipatarusna a liriko iti dadduma a lenguahe, nayurnos dagitoy iti pamay-an a saanen a kasapulan a lukiben ti sabali a panid bayat ti panagkanta. Awan ti kanta nga at-atiddog ngem tallo nga estansa.

Kasano a nairingpas ti nagdakkel a trabaho a panangisagana iti baro a pagkantaan? Idi Agosto 2007, maysa a grupo dagiti aduan kapadasan a kompositor ken paraputar ti liriko ti naawis a tumulong iti Bagi a Manarawidwid iti daytoy a proyekto. Amin a kanta ti daan a pagkantaan ket nausig a naimbag tapno makita dagiti kuestionable a liriko mainaig iti doktrina, sasao a di umiso ti pannakaipaganetgetna, ken aniaman a parikut mainaig iti tono. Agparang a nasayaat ti dadduma a daan a tono ngem kasapulan a mapabaro dagiti lirikona. Adda met dagiti kanta a bassit laeng ti kasapulan a mabaliwan iti lirikoda ngem kasapulan ti dakkel a panangbalbaliw iti tono dagitoy. Kalpasanna, ti Teaching Committee  ti Bagi a Manarawidwid inaprobaranda ti maysa a listaan dagiti topiko a maikabilangan kadagiti kanta a makansion kadagiti Nakristianuan a gimong, asamblea, kombension, ken programa ti dedikasion.

Kanayonanna, dagiti kompositor nangbusbosda iti tiempo a mangusig manen iti estilo ti musika a kankantaen dagiti kakabsat kadagiti gimongtayo. Tapno makapataudda kadagiti nadayaw ngem makaay-ayo a kanta, indumada dagita kadagiti musika a ti ayugda ket kas kadagiti himno iti Kakristianuan. Saanda met a kayat a dagiti kanta a pagdayaw ken Jehova ket umarngi kadagiti estilo ti kanta a gagangay iti adu a karismatik a relihion.

Iti intero a proyekto, siaannad a binantayan ti Bagi a Manarawidwid ti pannakaputar ti tono ken liriko ti tunggal kanta. No saan a pamiliar ti Bagi a Manarawidwid iti grupo dagiti baro a kanta, irekord dagiti kumakanta dagita tapno denggen ken repasuen ti Bagi a Manarawidwid. Apaman a maanamongan dagitoy a kanta, maipatulod dagitoy kadagiti agipatpatarus a sanga tapno maipatarus dagiti  liriko dagiti kanta. Iti kasta, dagiti pagkantaan iti nadumaduma a lenguahe ket mairuar a kagiddan ti Ingles a pagkantaan.

Kanayonanna, idi 2007, inyurnos ti Bagi a Manarawidwid a mairekord dagiti kanta a kinansion ti maysa a grupo dagiti kumakanta tapno adda usaren dagiti kongregasion a pagsurotan. Iti adu a tawen, maysa nga orkestra dagiti boluntario manipud 14 a sanga ti nagtataripnong iti agarup mamindua kada tawen idiay Patterson, New York. Ti panggep ket tapno agirekord iti musika para kadagiti programa iti panangisuro a patpatauden dagiti Saksi ni Jehova, a pakairamanan dagiti drama, video, ken musika a maus-usar kadagiti kombension ken asamblea. Dagitoy a dedikado a kakabsat a lallaki ken babbai, nga adu kadakuada ti amin-tiempo a ministro, us-usarenda ti tiempo ken sanikuada tapno makapanda agirekord iti musika a pakagunggonaan dagiti kakabsat iti intero a lubong. Nalaingda  amin iti musika. Dagiti nairekord nga orkestra ket naipatulod kadagiti sanga nga opisina iti intero a lubong tapno mausar kadagiti kombension ken iti pannakapataud dagiti nairekord a kanta iti adu a lokal a lenguahe. Adu kadagiti kanta a nairekord kadagiti sanga nga opisina ti mabalinen a mai-download iti Web site a www.pr418.com.

Ania dagiti komento mainaig iti baro a pagkantaan a Kantaanyo ni Jehova? Ginasgasut a surat ti panagyaman ti umasping iti daytoy a surat ti maysa a kabsat a babai: “Umuna iti amin, kayatko ti agyaman kadakayo gapu kadagiti agkakapintas a baro a kanta iti baro a pagkantaantayo. Makagutugot, makapabileg pammati, ken makaliwliwa dagita a kanta​—pudno a nakaay-ayat a sagut manipud ken Jehova.”

Sapay koma ta ti pagkantaan a Kantaanyo ni Jehova ket agbalin a gubuayan ti liwliwa ken pammaregta kadagiti kakabsattayo iti intero a lubong. Iti man panagmaymaysatayo wenno iti panagtataripnongtayo a kadua dagiti kapammatiantayo, usarentayo koma daytoy a pagkantaan a mangyebkas iti ayattayo iti nailangitan nga Amatayo, a ni Jehova!

“MAISAKLANGKAYTO ITI SANGUANAN DAGITI GOBERNADOR KEN AR-ARI . . . MAIPAAY A PANGSAKSI”

Imbaga ni Jesus kadagiti adalanna a maisaklangdanto “kadagiti lokal a pangukoman,” ken kadagiti “gobernador ken ar-ari.” Ngem kinunana a dayta ket “maipaay a pangsaksi kadakuada ken kadagiti nasion.” (Mat. 10:17, 18) Bayat ti napalabas a tawen, napasaran dagiti Saksi ni Jehova ti mismo nga impakpakauna ni Jesus. Kas kinuna ti Apoda, ti saan a nasayaat a pannakatratoda ket nangipaay kadakuada kadagiti nagsayaat a gundaway a mangsaksi.

Armenia

Ni Vahan Bayatyan, a maysa kadagiti Saksi ni Jehova, ket nasentensiaan a maibalud iti dua ken kagudua a tawen gapu iti panagkedkedna nga agsoldado. Kalpasan a naabak iti kaso ken iti panagapelarna kadagiti korte iti Armenia, indatagna dayta iti European Court of Human Rights (ECHR) idi 2003. Kamaudiananna, idi  Oktubre 27, 2009, nagdesision ti ECHR pabor iti Armenia maitunos iti kaskaso iti naglabas a nasuroken a 50 a tawen. Ngem maysa a hues ti saan a kimmanunong gapu ta dayta a desision ket “maikontra kadagiti agdama a pagalagadan iti Europa no mainaig iti panagkedked nga agsoldado gapu iti konsiensia.”

Gapu iti kinapateg dayta nga isyu, napagnumuan ti European Court nga idatag daytoy a kaso iti Grand Chamber dayta a korte. Nayeskediul a maaramid ti bista idiay Strasbourg, France, idi Nobiembre 24, 2010. Saan pay nga ammo ti desision ti Grand Chamber idi naaramid daytoy a report.

Azerbaijan

Marigrigatan pay laeng dagiti Saksi ni Jehova a mangiserrek kadagiti narelihiosuan a literatura iti pagilian. Inaprobaran dagiti autoridad ti pannakaiserrek ti dadduma a narelihiosuan a literatura ngem saanda nga inaprobaran ti dadduma a publikasion gapu kano ta ti “itantandudo dagitoy ket ti laeng pammati dagiti Saksi ni Jehova ken ti linaonna ket makainsulto iti dadduma a Kristiano a relihion.” Kas resultana, rinaut dagiti autoridad ti pagtaengan ti dadduma a kakabsat ket kinompiskarda dagiti literaturada a naibatay iti Biblia.

Idi Abril 25, 2010, iti siudad ti Qazax, agarup 250 a Saksi ni Jehova a nakalugan iti lima a dadakkel a bus ken maysa a bassit a lugan ti agaw-awiden kalpasan ti asambleada idiay Georgia. Dagiti polis iti pagbeddengan kinumpiskarda dagiti naibatay-Biblia a literatura dagiti kakabsat, agraman ti 33 a Biblia. Adu kadagiti  Saksi, a pakairamanan pay dagiti lallakay, babbaket, ken addaan an-anayen, ti pinagur-urayda iti walo nga oras iti pagbeddengan sakbay a naituloyda ti biaheda. Tapno maliklikan ti kasta a pasamak ken masigurado nga agtultuloy a makaawat dagiti kakabsat idiay Azerbaijan iti naespirituan a taraonda, naidatag itan dayta nga isyu iti European Court of Human Rights.

Belarus

Idi Nobiembre 6, 2009, ni Dmitry Smyk, a maysa a Saksi ni Jehova, ket mamulta koma iti 3,500,000 a ruble ($1,154 U.S.) gapu iti panagkedkedna nga agsoldado. “Ikagkagumaak a suroten dagiti pannursuro ti Biblia iti amin nga aspeto ti biagko,” kinuna ni Kabsat Smyk. “Para kaniak, ramanen dayta ti panamati a saan a rumbeng a masanay wenno makiraman ti maysa a tao iti pannakigubat.”​—Isa. 2:1-4.

Nupay garantisaran ti Konstitusion ti Belarus ti kalintegan nga agpili iti alternatibo a serbisio agpaay kadagiti sibilian, awan ti sagudayen ti linteg a maipatungpal dayta. “Agparang iti konstitusion nga adda kalintegak a mangpili iti alternatibo a serbisio agpaay kadagiti sibilian, ngem iti kinapudnona diak maaprobetsar dayta a kalintegan,” inlawlawag ni Kabsat Smyk.

Gapu iti dayta, idi Pebrero 18, 2010, ti presidente ti Belarus nangbuangay iti komision a mangpanday iti linteg maipaay iti alternatibo a serbisio. Di nagbayag kalpasanna, inkeddeng ti korte nga awan ti basol ni Kabsat Smyk ket nakanselar ti nadagsen a multa a naipataw kenkuana. Gapu ta kasta met laeng ti parikut a sangsanguen dagiti agtutubo a Saksi idiay Belarus nga agkedked nga agsursuro iti gubat, manamnama nga iti din agbayag, mangaramidto ti gobierno iti linteg para iti alternatibo a serbisio maipaay kadagiti sibilian.

Belgium

Ti pasilidad ti Bethel idiay Brussels, Belgium, agraman ti amin a pasdek ti relihion idiay Belgium, ket saan idi a mabuisan. Ngem idi 1993, nagbaliw ti takder ti administrasion ket pinagkedkedanna ti naan-anay a pannakailaksid iti buis. Kinuna ti administrasion a saan a naan-anay  a narelihiosuan ti panggep ti Bethel, nga aggangganansia kano daytoy, ken dagiti Bethelite ket saanda kano nga aktibo iti amin-tiempo a narelihiosuan nga aktibidadda. Kamaudiananna, idi 2008, nabista dayta a kaso iti nababbaba a korte, ngem pinaboran ti hues ti administrasion ti panagbuis. Nayapelar dayta a desision, ket idi Mayo 4, 2010, ti korte ti panagapelar binaliktadna ti desision ti nababbaba a korte. Kastoy ti mabasa a pangngeddeng ti tallo a hues: “Ti biag dagiti Saksi nga agnanaed iti Bethel ket nabuyogan iti napasnek a narelihiosuan a patpatien nga agkalikagum iti naan-anay a panangisukoda iti biagda nga agserbi iti Dios. . . . Dagitoy a ministro ket kamengda amin ti Worldwide Order of Special Full-Time Servants, ket maymaysa ti pagnanaedanda ken agkararag, agkanta, ken agadalda a sangsangkamaysa. Makiramramanda met iti organisado a panagdaydayaw iti agsapa.”

Eritrea

Dagiti Saksi ni Jehova idiay Eritrea agtultuloy nga ib-ibturanda ti adu a rigat iti panangikagumaanda nga agserbi a simamatalek iti Dios. Iti agdama, adda 58 a Saksi a nakabalud, a pakairamanan dagiti babbai ken ubbing. Gapu iti naulpit a panangiparit ti gobierno ken ti kanayon a peggad a maarestar, nagrigat ti mangala iti impormasion maipapan kadagidiay naibalud. Adu a tawen nga inkagumaan dagiti Saksi ni Jehova a tulongan dagiti agsagsagaba a kapammatianda idiay Eritrea babaen kadagiti ahensia a mangitantandudo iti diplomasia. Nagapelarda kadagiti opisial ti U.S. Department of State, ti European Union, ken iti nadumaduma nga embahada. Nakisaritada met iti adu nga opisial ti Horn of Africa, kas kadagiti pannakabagi ti African Union. Iti nabiit pay, nangisubmitir dagiti Saksi ni Jehova iti surat iti 18 nga embahada ti Eritrea iti intero a lubong. Naglaon dayta a surat iti listaan dagiti balud a saan pay a mabalin nga agsoldado gapu iti edadda. Iti dayta a surat, nayapelar ken Presidente Afewerki a wayawayaanna amin a balud a saan a mabalin nga agsoldado gapu iti edadda, agraman dagiti ubbing ken natataengan. Ngem agingga ita, awan pay ti aksion ti gobierno.

 Greece

Idi Enero 15, 2010, ti Council of State a kangatuan a korte ti Greece natakuatanna a ni Evangelos Delis, maysa a Saksi ni Jehova, ket addaan iti karbengan nga agkedked nga agserbi kas reserve officer iti militaria. Sakbay a nagbalin a Saksi ni Jehova, ni Kabsat Delis ket dati nga agserserbi iti militaria. Ngem idi maawagan nga agsanay kas reserve officer, nagkedked gapu iti sinanay-Biblia a konsiensiana. Nupay saan a pinaboran ti Administrasion ti panagkedkedna gapu iti konsiensiana, kinuna ti Council of State nga uray no ti maysa a tao ket agserserbi idi iti militaria, addaan latta iti kalintegan a mangbalbaliw iti relihionna ken agkedked nga agsoldado gapu iti konsiensiana a naibasar iti baro a narelihiosuan a patpatienna. Ti pangngeddeng ti Council of State ket naibatay kadagiti artikulo ti European Convention of Human Rights. Dagiti umili iti Greece, agraman dagiti agnanaed iti dadduma a pagilian a kas iti Armenia, Azerbaijan, South Korea, ken Turkey nga agkedked nga agsoldado gapu iti konsiensiada ket sigurado a magunggonaan iti dayta a paborable a desision ti kangatuan a korte ti Greece.

 Portugal

Idi Setiembre 25, 2009, ti Ministry of Justice nagkaykaysa nga inaprobaranna ti Association of Jehovah’s Witnesses kas Long-Standing Religious Community wenno relihion a nabayagen ti kaaddana. Dagiti Saksi ni Jehova idiay Portugal ket addaanda itan iti kangatuan a legal ken narelihiosuan a klasipikasion, a tumultulong kadakuada a mangitungpal iti ministerioda. Adu a pagimbagan ti ili ni Jehova ti itden dayta a baro a legal a pannakabigbig. Kas pagarigan, mabalin a maaddaanda iti autorisado a ministro a mangitungpal kadagiti legal a seremonia ti kasar kadagiti Kingdom Hall ken mapalubosanda a sumrek kadagiti ospital ken pagbaludan tapno mangipaay iti naespirituan a tulong kadagidiay agkiddaw iti dayta.

Puerto Rico

Idi Enero 27, 2010, iti maysa a nakapatpateg a desision, ti Korte Suprema ti Puerto Rico intandudona ti kalintegan ti maysa nga adulto a pasiente nga agkedked iti maysa a kita ti pannakaagas. Binigbig pay ti Korte ti kalintegan ti pasiente nga agusar iti nasaksakbay a naisurat a bilin ken mangdutok iti pannakabagina a mangilawlawag iti takderna iti kanito nga awan ti puotna. Sakbay a napan iti ospital ni Victor Hernandez, a maysa a Saksi ni Jehova, nangisagana iti nasaksakbay a naisurat a bilin. Maysa a korte ti nagkedked a mangsurot iti desision ni Kabsat Hernandez kas nailanad iti naisurat a bilinna a sinuportaran ti pannakabagina iti panagpaagas. Kas panangbaliktad iti desision ti nadakamat a korte, binigbig ti Korte Suprema a “ti nagpateg a kalintegan ti tao a mangsalaknib iti mismo a bagina ket maysa a naan-anay ken di masupiat a kalintegan.” Dagiti magunggonaan iti daytoy a balligi ket saan laeng a ti nasurok a 25,000 a Saksi ni Jehova idiay Puerto Rico no di ket ti amin a dadduma pay a pasiente iti intero nga isla.

Russia

Kadagiti kallabes a bulbulan, ti iturturong ti espiritu nga aktibidad ti ili ni Jehova ket naipasango iti kakaruan nga ibubusor sipud idi nawarawara ti Soviet Union. Idi Disiembre 8, 2009, ti Korte Suprema ti Russia inanamonganna ti desision ti nababbaba a korte ti Rostov a nagresulta  iti pannakaiparit ti lokal a narelihiosuan nga organisasion idiay Taganrog, pannakakompiskar ti Kingdom Hall, ken pannakaideklara ti 34 a publikasiontayo kas ekstremista (wenno mamagpeggad iti gobierno ken kultura), agraman dagiti libro nga adun ti mangbasbasa, kas iti Ania a Talaga ti Isursuro ti Biblia?, Ti Librok Dagiti Estoria ti Biblia, ken “Umayka Agbalinka a Pasurotko.”

Sumagmamano a lawas kalpasanna, ti Korte Suprema ti Altay Republic, iti makin-abagatan a Russia, nangaramid iti umasping a desision mainaig iti lokal a narelihiosuan nga organisasion iti siudad ti Gorno-Altaysk, a nagresulta iti pannakailista ti sabali pay a 18 a publikasion kas ekstremista. Gapu kadagita a desision ti korte, nagbalin nga imposible iti agdama ti pannakaiserrek iti Russia ti aniaman kadagiti nailista a publikasion. Malaksid iti dayta, dagita a desision ti korte ti nangpatured kadagiti kabusor ni Kristo a mangbutbuteng ken mangraut kadagiti natalna a paspasurotna iti nagduduma a siudad. Sipud nayetnag ti desision idi Disiembre , addan nairekord a nasurok 300 nga insidente ti panangraut, panangarestar, panangsukimat kadagiti balay, ken dadduma pay a panangriribuk iti panagdaydayaw.

Kas reaksion iti daytoy a lumanlanlan nga ibubusor, inaprobaran ti Bagi a Manarawidwid ti pannakaiwaras ti 12 a milion a kopia ti maysa a naisangsangayan a polieto a napauluan Could It Happen Again? A Question for the Citizens of Russia. Imbatad daytoy a polieto ti nagpadaan ti pannakaidadanes dagiti Saksi ni Jehova idi tiempo ti Komunismo ken dagiti parikut a sangsanguenda iti agdama. Inwaras dagiti Saksi ni Jehova daytoy a naisangsangayan a polieto iti intero a Russia idi Pebrero 26 agingga 28, 2010. Uray pay -40°C ti kalamiis ti temperatura, inwaras ti adu a kongregasion ti amin a polietoda iti las-ud laeng ti dua nga aldaw.

Kas pangontra, idi Abril 26, 2010, ti Federal Service for the Oversight of Communications, Information Technology and Mass Communications (Roskomnadzor) winaswasna ti lisensiatayo a mangiserrek kadagiti simmaganad a ruar ti  magasin a Pagwanawanan ken Agriingkayo!

Nupay kasta, “ti ima ni Jehova saan a nagbalin a nakaab-ababa tapno saan a makaisalakan.” (Isa. 59:1) Idi Hunio 10, 2010, inyetnag ti European Court of Human Rights (ECHR) ti maysa a nakapatpateg a desision maibusor iti Russia ken pabor iti interes ti Pagarian. Ti desision iti daytoy a kaso, a napauluan iti Jehovah’s Witnesses of Moscow v. Russia, indeklarana a ti pannakapasardeng ken pannakaiparit dagiti aktibidad ti Moscow Community of Jehovah’s Witnesses ket maisalungasing iti linteg ken pananglabsing  iti nagpateg a kalintegan ti tao a maaddaan iti wayawaya nga agpanunot, agtignay sigun iti diktar ti konsiensiana, ken agbiag sigun iti relihionna. Dayta a panangpasardeng ken panangiparit ket naipatungpal idiay Moscow sipud idi Marso 26, 2004, a nagresulta iti nakarkaro a panangidadanes ken naulpit a panangtrato. Ibatad dayta a desision a ti gobierno ti Russia ket “addaan iti legal nga obligasion . . . a mangpasardeng iti panaglabsing a naammuan ti Korte ken mangatur kadagiti epekto dayta a panaglabsing agingga iti mabalin.”

Daytoy a nalawa ti saklawenna a desision ket paborable a naibasar iti siam a panagbiktoria dagiti Saksi ni Jehova kadagiti nangato a korte idiay Canada, Japan, Russia, South Africa, Spain, ti United Kingdom, ken ti United States, agraman iti walo nga immun-unan a desision nga inyetnag a mismo ti ECHR pabor kadagiti Saksi ni Jehova. Gapu iti dayta, pinasingkedan ti korte nga agtultuloy a mamati ti ECHR nga umiso dagiti pangngeddeng kadagiti immun-una a kaso. Maibatay iti European Convention of Human Rights ken dagiti immun-una a desision, inkeddeng ti korte nga inosente dagiti Saksi ni Jehova kadagiti aniaman a pammabasol nga indatag dagiti autoridad ti Russia maibusor kadakuada.

Kuna ti korte nga “addan Saksi ni Jehova idiay Moscow ken legal ti aktibidadda iti nasuroken a 12 a tawen, sipud idi 1992 agingga 2004. Bayat dayta a tiempo, dagiti panglakayen ken kameng dayta nga organisasion ket saan pulos a nairaman iti aniaman a kaso a kriminal, administratibo, wenno sibil.” Maitunos iti dayta, inkeddeng ti korte a nalabsing dagiti kalintegan dagiti Saksi ni Jehova ken, kas innayonna pay, “addaan ti gobierno iti legal nga obligasion . . . a mangpili . . . kadagiti addang a mairaman iti paglintegan ti pagilianda tapno agpatinggan ti pannakaabuso ti kalintegan a natakuatan ti Korte.”

Idi Setiembre 9, 2010, kiniddaw ti gobierno ti Russia a maidatag daytoy a kaso iti Grand Chamber ti korte, nga  awan duadua a maysa daytoy a taktika tapno maitantan ti responsabilidadda a mangitungpal iti bilin ti korte. Ipalubos man ni Jehova ti panangrepaso ti Grand Chamber wenno saan, masiguradotayo nga agtultuloy a mangipaay dayta iti nabileg a panangsaksi.

Serbia

Kalpasan ti dandani uppat a tawen a legal a panangirupir iti kalintegan, nagtignay met laengen ti Serbian Ministry of Religious Affairs tapno ti “Jehovah’s Witnesses​—Christian Religious Community” ket mairaman iti Register on Churches and Religious Communities idiay Serbia. Sakbay dayta, pinagkedkedan daytoy ti aplikasion dagiti Saksi para iti pannakairehistroda, nupay dagiti Saksi ni Jehova, a maaw-awagan idi iti International Bible Students, ket addadan iti rehion sipud pay idi rugrugi ti dekada 1920. Ngem kalpasan a nangyetnag ti Serbian Supreme Court iti dua a desision a pabor kadagiti Saksi, pinatgan ti Ministry of Religious Affairs ti aplikasion para iti pannakairehistro.

Iti naglabas, dagiti bumusbusor a tultulongan ti media, masansan a padaksenda dagiti Saksi ni Jehova kas napeggad a sekta. Ti pannakairehistro dagiti Saksi kas legal a relihion awan duadua a tulonganna dagiti napudno nga umili idiay Serbia tapno mabigbigda a dagiti Saksi ni Jehova ket naimbag nga umili a mangraraem iti linteg ken saanda a peggad iti komunidad wenno kadagiti indibidual. Ti umuna a nasayaat a resulta daytoy a pannakairehistro ket mabalinen a maiserrek iti pagilian dagiti naibatay-Biblia a literatura ken dadduma pay a material a mausar kadagiti gimong ken panangasaba, a saanen a kasapulan ti agbayad iti buis ken iti aniaman a babayadan iti aduana.

Slovenia

Idi Nobiembre 27, 2009, ti “Jehovah’s Witnesses​—Christian Religious Community” ket nairamanen iti listaan dagiti relihion ken dadduma pay a narelihiosuan a komunidad a bigbigbigen ti Republic of Slovenia. Ti direktor ti Office for Religious Communities nga ahensia ti gobierno impakaammona kadagiti pannakabagitayo a ti “Jehovah’s Witnesses​—Christian Religious Community” ti maikawalo  iti 40 a narelihiosuan nga organisasion ken grupo iti Slovenia a sibaballigi a nakarehistro manen iti sidong ti baro a Religious Freedom Act. Babaen dayta a pannakairehistro, dagiti ministro ti relihion nga agserserbi iti amin a tiempo ket makaawatda kadagiti benepisio nga ipapaay ti gobierno.

Turkey

Ti Kingdom Hall dagiti Saksi ni Jehova idiay Mersin ket agarup 20 a tawenen nga us-usarenda idi pinaserraan dayta dagiti autoridad idi Agosto 2003 gapu kano iti pananglabsing iti zoning law. Inkagumaan dagiti kakabsat a solbaren daytoy a parikut babaen ti panagapelarda kadagiti korte. Kaskasdi, idi Disiembre 0, 2009, dayta nga apelar ket pinagkedkedan ti kangatuan a korte ti Turkey pabor iti opisina ti gobernador ti Mersin. Naidatagen dayta nga isyu iti ECHR.

NABUYOGAN-ARAMID A NAINKABSATAN NGA AYAT IDIAY HAITI

Idi Enero 12, 2010, maysa a nakapigpigsa a ginggined ti nangdidigra iti kabesera ti Haiti a Port-au-Prince ken kadagiti kabangibang a lugar. Ginasgasut a ribu ti natay, ken adu ti napukawan iti pagtaengan. Sumagmamano a ribu a Saksi ni Jehova ti naawanan iti pagtaengan, ken 154 ti natay. Adu pay dagiti nakaro a nasugatan ken dandani natay.

Ni Acloque ket adda iti balayna idi agginggined. Narsuod dagiti pader, ket nagdadarison dagiti haloblak a kasla domino, isu a naipadeg ni Acloque iti nagbaetan ti suelo ken ti narsuod a bobida. Ngem saan a nakaro a nadangran, isu a nagar-arikap iti kasipngetan. “Adda timba a nasagidko,” kinuna ni Acloque. “Diak maisin ti timba ngem naisawsawko dagiti ramayko iti danum ket impatedtedko iti bibigko. Adda met naiggamak a bato nga inusarko a pagtuktok bareng adda makangngeg a mangarayat kaniak.” Nagkarkararag ni Acloque ken intultuloyna ti nagtuktok ken naguray.

“Awan ti relok isu a diak ammo no ania ti orasen,” kuna ni Acloque. “Idi damo, insangitko nga impakpakaasi ken Jehova nga arayatennak. Ngem iti panaglabas ti oras, binaliwakon ti kararagko. ‘Ammok a pagungarennakto,’  inkararagko. ‘Ngem kabambannuagak pay laeng! No masalbarak, maitultuloyko ti agserbi kenka.’”

In-inut a narikna ni Acloque ti panagkapsutna, ket idi agangay, dina pay kabaelanen nga ituktok ti bato. Kalpasanna, naawananen iti puot.

Idi nagsubli ti puot ni Acloque, ikagkagumaanen dagiti Saksi a danonen ti ayanna tapno salbarenda. “Pagammuan ta naisin ti semento iti sibay ti sakak,” insalaysayna. “Napanunotko a ti tumengko ti sumaruno a matupakan, isu nga inkarigatak ti rummuar iti abut sa ginammatak ti ima ti mangar-arayat kaniak.” Kalpasan ti uppat nga aldaw a pannakaipadegna iti narsuod a pasdek, nasalbar met laeng ni Acloque.

MADAGDAGUS A PANNAKAIPAAY DAGITI TULONG

Iti las-ud ti 24 nga oras sipud naginggined, simmangpet ti umuna a Saksi a doktor manipud iti sanga nga opisina ti Dominican Republic. Kalpasanna, nagtultuloy ti panagsangpet dagiti Saksi a nasanay iti panangagas ken panangsaranay, agraman dagiti naidonar a bambanag. Maysa a temporario nga ospital ti naipasdek iti masakupan ti sanga nga opisina, ket sadiay a naagasan ti nasurok 1,000 a Saksi ken saan a Saksi.

Karaman kadagiti pasiente ti dua a babbalasang, nga agpada a naputed ti makannawan a takiagda. Kinuna ni Mylène, maysa a boluntario iti sanga nga opisina: “Kas iti amin a dadduma a babbaro wenno babbalasang a pasiente a naputed ti saka wenno imada, madanaganda nga amangan ta saandanto a makaasawa wenno maaddaan iti pamilia.” Gapuna, kinontak ni Mylène ti am-ammona a kabsat a babai idiay France a naputed ti takiagna idi ubing pay gapu iti aksidente iti lugan. Kiniddawna kenkuana a paregtaenna dagiti dua a babbalasang. Babaen ti e-mail, impatulod daytoy a kabsat idiay France dagiti retratona a kaduana ti asawa ken ti dua a nagpipintas nga annakna. Idi makita ti dua a pasiente dagita a retrato, kasta unay ti pannakaliwliwada ket maawatda itan ti kasasaadda.

 Malaksid iti taraon, kawes, ken agas, dagiti nakalasat ket agkasapulan unay iti pagtaengan. Dagiti Saksi a boluntario iti Haiti ken manipud kadagiti sabali a pagilian nangdisenio ken nangibangonda iti nasurok a 1,700 a temporario a pagnaedan dagiti pamilia a nadadael ti balbalayda. Iti kasta, agbalin a natalged ti kasasaad dagitoy a pamilia ken adda paglinonganda no agtudo. Idi Hunio, ti grupo dagiti mangsarsaranay nangrugidan a mangipatakder kadagiti temporario a Kingdom Hall, ket idi Hulio, nangrugin a mangipaay dagiti autoridad kadagiti building permit para iti pannakaibangon dagiti permanente a Kingdom Hall.

PISIKAL, EMOSIONAL, KEN NAESPIRITUAN A PANNAKAPAIMBAG

Idi Marso, maysa a Saksi a doktor nga espesialista iti panangtulong kadagiti agpaspasar iti post traumatic stress disorder ti nakitaripnong kadagiti panglakayen ti 115 a kongregasion a naapektaran iti ginggined. Ti doktor impaayanna dagiti panglakayen kadagiti praktikal a singasing no kasanoda a saranayen iti naespirituan dagiti kakongregasionda a na-trauma. Kalpasanna, personal a kinasarita ti doktor ti nasurok a 100 a kakabsat a lallaki ken babbai nga agkasapulan iti espesial a tulong.

Di nagbayag kalpasan ti ginggined, ni David Splane a kameng ti Bagi a Manarawidwid ket nagbiahe a napan idiay Haiti tapno mangipaay iti liwliwa ken pammaregta. Ni Kabsat Splane, a makapagsao iti Pranses, nagpalawag kadagiti kakabsat iti maysa nga asamblea sirkito ken nakitaripnong iti pamilia ti Bethel, kadagiti misionero, ken kadagiti manangaywan iti sirkito. Kasta unay ti panangapresiar  ti isuamin iti naayat a pannakaseknanna ken iti kinadungngo ti Bagi a Manarawidwid.

Iti laksid dagiti kasla di mapagballigian a lapped, ti Baro a Lubong a Patarus ti Kristiano a Griego a Kasuratan iti lenguahe a Haitian Creole ket nakompleto, nayimprenta, ken naipatulod iti sanga nga opisina. Simmangpet dagiti baro a Biblia sumagmamano laeng nga oras sakbay a nairuar iti kombension distrito idi Hulio. Bayat dagiti napartak a paspasamak idi 2010, manipud damo a panangsaranay agingga ita, nakita ken narikna ti isuamin ti naynay a panangiwanwan ken suporta ni Jehova kadagiti dadakkel ken babassit a pamay-an. Iti namin-adu a gundaway, dimteng dagiti kasapulan nga abasto, transportasion, ken manangsaranay iti apag-isu a tiempo ken kadagiti kasayaatan a wagas nga imposible a naiparparna laeng. Kastoy ti panangibaga ti maysa a nabayagen a misionero: “Masapul nga addakayo ditoy tapno mapaneknekanyo a talaga nga agtigtignay ni Jehova.”

PAKAIDAYAWAN TI DIOS TI PANNAKAIDEDIKAR TI SANGA

Ti Pebrero 13, 2010 ket maysa a nakallalagip nga aldaw kadagiti Saksi ni Jehova idiay Solomon Islands. Ni Stephen Lett, a kameng ti Bagi a Manarawidwid, imparangna ti palawag ti dedikasion iti baro a pasilidad ti sanga nga opisina sadiay. Karaman kadagiti 368 a timmabuno ni Clement Fa’abasua, ti damo a Saksi iti isla. Maysa a bulan sakbayna, ti panagpasiar iti pasilidad ket nayawis kadagiti agnanaed iti asideg ti baro a pasilidad ti sanga, ket 273 a tattao ti naipasiar. Iti suratna iti kangrunaan a pagiwarnak iti pagilian, kastoy ti komento ti arkitekto a maysa kadagiti nagpasiar: “Naisangsangayan unay dayta a pasilidad [ti sanga nga opisina]. Maysa dayta a modelo iti komunidad ditoy Solomon Islands, a mangipakita no ania ti mabalin a magapuanan ditoy, siasinoman ti mangusar iti dayta. Ti diseniador, ti grupo dagiti trabahador a nagduduma ti paglainganda, ken dagiti agdama nga administrador ket makuna a nakapataud iti maysa a saniata iti paraiso.”

 Maysa a nakallalagip a programa ti dedikasion ti naangay iti sanga nga opisina ti Estonia idi Sabado, Abril 3, 2010. Dagiti 438 a timmabuno ket naan-anay a natagiragsakda ti programa, a pakaibilangan ti palawag ti dedikasion nga imparang ni Christian Muntean, manipud sanga nga opisina ti Greece. Iti lote a kaabay ti sanga nga opisina, maysa a dua ti kadsaaranna a pasdek ti nagatang manipud iti kompania ti danum iti dayta a lugar. Dayta a napabaro a pasdek ket addaan itan kadagiti estudio para iti audio ken video, agraman ti maysa a siled para iti panageskuela, a kas iti Bible School for Single Brothers.

Ti sanga nga opisina ti kabangibang a Latvia tinagiragsakda met ti programa ti dedikasion idi Abril 10, 2010. Adu a dekada a nakaro ti ibubusor iti trabaho a panangasaba idiay Latvia sipud idi narugian dayta idi 1918. Ngem ita, rumangrang-ay ti trabaho a panangasaba idiay Latvia, ket 248 a delegado manipud iti siam a pagilian ti timmabuno a kadua dagiti lokal a kakabsat tapno umimdeng iti palawag ti dedikasion nga impaay ni Christian Muntean.

 Idi Sabado, Mayo 8, 2010, nasurok a 2,200 ti nangtagiragsak iti palawag ni Gerrit Lösch, a kameng ti Bagi a Manarawidwid, iti naangay a dedikasion iti sanga nga opisina ti Paraguay. Adda naibangon a maysa a pagtaengan a 32 ti siledna ken maysa a baro a pasdek a pagopisinaan. Natarimaan ken napabaro met ti agdama a pagtaengan. Malaksid kadagita, adda naibangon a maysa a dakkel a tangke a makalaon iti 10,000 a galon ti danum. Sipud idi marugian ti proyekto, apresiarenen dagiti lokal nga autoridad ti kalidad ti trabaho dagiti internasional ken lokal a boluntario. Kinuna ti maysa nga opisial a nagadu ti parikut no dagiti sabali a  relihion ti agibangon iti pasdek, ngem nagsayaat ti pakasarsaritaan dagiti Saksi ni Jehova gapu iti umiso a panangaramidda iti bambanag. Kas resultana, dida pulos narigatan a mangala kadagiti building permit para iti pannakaibangon ti sanga nga opisina.

Iti sanga nga opisina ti Papua New Guinea, idi Sabado, Mayo 29, 2010, dandani 500 a kakabsat manipud 12 a pagilian ti nagtataripnong tapno denggenda ti palawag ti dedikasion nga imparang ni Winston Payne, manipud iti sanga nga opisina ti Australia. Ti napalawa a pasilidad ti sanga nga opisina ket ramanenna ti uppat ti kadsaaranna a pasdek nga addaan kadagiti siled a pagturogan, panganan, paglutuan, ken paglabaan; maysa a pasdek dagiti departamento a mangipapaay iti serbisio iti pamilia ken addaan iti Kingdom Hall; ken nalawa nga opisina dagiti agipatpatarus. Karaman kadagiti timmabuno ti maysa a grupo dagiti Saksi nga innem nga aldaw a nagnagna iti bambantay tapno tumabuno iti dedikasion. Nagkawes dayta a grupo iti tradisional nga Orokaiva ken sibabara nga inabrasada dagiti bisita babaen ti sala ken kanta. Maysa a nabayagen a kabsat a babai ti nakalua a nangyebkas iti rikna ti adu idi kinunana, “Mariknak a kasla addaak itan iti Paraiso!”

“AGTULTULOYKAYO A MANGPATAUD ITI ADU A BUNGA”

Awan duadua nga agtultuloy a mapadpadayawan ti Dios gapu iti nagkaykaysa a panagregget dagiti Saksi ni Jehova. “Ni Amak maipadayag iti daytoy,” kinuna ni Jesus, “nga agtultuloykayo a mangpataud iti adu a bunga ken paneknekanyo ti bagbagiyo nga ad-adalak.” (Juan 15:8) Babaen ti bendision ken naayat a panangiwanwan ni Jehova, ikagumaanda ti ‘magna a maikari ken Jehova iti panggep a panangay-ayo a naan-anay kenkuana bayat nga agtultuloyda nga agbunga iti tunggal naimbag nga aramid ken rumang-ay iti umiso a pannakaammo iti Dios, a mapabpabileg iti isuamin a pannakabalin iti madanon ti nadayag a pannakabalinna tapno naan-anay a makapagibturda ken maaddaanda iti mabayag a panagitured buyogen ti rag-o.’​—Col. 1:10, 11.

[Ladawan iti panid 8]

Intuloy ni Natsue ti panagadalna iti Biblia

[Dagiti Ladawan iti panid 11]

Siaannad a siguraduen dagiti managsirarak no umiso dagiti impormasion

[Ladawan iti panid 13]

Korea

[Ladawan iti panid 14]

Mexico

[Dagiti Ladawan iti panid 14]

South Africa

[Ladawan iti panid 15]

Ni Stephen Lett iti maysa kadagiti internasional a kombension idiay Hawaii

[Ladawan iti panid 22]

Ni Dmitry Smyk

[Ladawan iti panid 25]

Ni Evangelos Delis

[Ladawan iti panid 25]

Sertipikasion nga inted ti Ministry of Justice

 [Ladawan iti panid 33]

Simmangpet a dagus dagiti Saksi a doktor ken nars kalpasan ti ginggined

[Ladawan iti panid 33]

Dagiti Saksi a boluntario manipud Haiti ken kadagiti sabali a pagilian nangdisenio ken nangibangonda iti nasurok 1,700 a temporario a pagtaengan

[Ladawan iti panid 34]

Ti “Baro a Lubong a Patarus ti Kristiano a Griego a Kasuratan” ket nairuar iti lenguahe a Haitian Creole

[Ladawan iti panid 36]

Pannakapalawa ti sanga nga opisina ti Estonia

[Ladawan iti panid 37]

Ti sanga nga opisina ti Paraguay

[Ladawan iti panid 37]

Imparang ni Winston Payne ti palawag ti dedikasion para iti sanga nga opisina ti Papua New Guinea