Kapkapadasan Dagiti Saksi ni Jehova iti Moderno a Panawen

Papua New Guinea

Dakkel a karit ti panangiwaragawag iti naimbag a damag iti daytoy a tropikal a pagilian, nga aduan bambantay, nasamek a kabakiran, ken aluguog. Addaan daytoy iti nasurok a sangaribu a tribu ken nasurok a 800 a lenguahe. Basaem no kasano a napagballigian dagiti natured a kakabsat dagitoy a tubeng tapno maipakaammoda ti kinapudno a linaon ti Biblia. Basaem met ti maipapan iti kinatured ken determinasion dagiti kapammatiantayo a limmapsut iti an-anito ken di Nainkasuratan a tradision tapno agbalinda a matalek nga ad-adipen ni Jehova. Dagitoy a salaysay sigurado a pabilgenda ti pammatim.

Estonia

Makapagagar daytoy a salaysay maipapan kadagiti naanep a kakabsat a nangitandudo kadagiti interes ti Pagarian iti laksid ti nakaro a pannakaidadanes. Ammuenyo no ania ti “karuahe ti nailangitan a Pagarian” ken no kasano a nablo ti takiag ti maysa a polis idi napan iti sanga nga opisina. Kitaenyo no kasano nga imbangon dagiti kakabsat ti bukodda a pagimprentaan ken no kasano a nagaramidda iti bukodda a tinta. Ammuenyo no kasano a dagiti napakumbaba nga ad-adipen ni Jehova naibturanda ti makabannog a dua a lawas a biahe iti tren ken no kasano a nalasatanda ti nakalamlamiis a paniempo ti Siberia. Basaenyo no apay a kinuna ti maysa a kabsat a babai, “Adda pagsayaatanna idi naipupokak nga agmaymaysa.” Wen, makapagagar daytoy a salaysay ti kinasungdo, kinatured, ken kinalaing nga agiremedio dagiti matalek nga adipen ti Dios idiay Estonia.