Sangalubongan a Panangasaba ken Panangisuro

NARIRIBUKAN la ketdi dagiti adalan ni Jesus idi umuna a siglo gapu iti imbagana kadakuada. Impadtona nga agbalindanto a puntiria ti pananggura ti amin a nasion​—mapapatay ken mayawatdanto iti rigat. Kasta met, adunto ti maitibkol ken maliputan. Nupay kasta, kinuna ni Jesus a maikasabanto ti naimbag a damag iti intero a daga. (Mat. 24:9-14) Kasano kaballigi ti sangalubongan a panangasaba iti laksid ti ibubusor iti intero a lubong? Kadagiti sumaganad a panid, maammuanyo ti sungbat iti dayta a makapainteres a saludsod.

 Pakadagupan iti 2010

Sanga nga Opisina Dagiti Saksi ni Jehova: 116

Bilang Dagiti Pagilian a Nagreport: 236

Dagup Dagiti Kongregasion: 107,210

Bilang Dagiti Timmabuno iti Memorial iti Intero a Lubong: 18,706,895

Bilang Dagiti Nakiraman iti Memorial iti Intero a Lubong: 11,202

Kangatuan a Bilang Dagiti Agibumbunannag iti Serbisio ti Pagarian: 7,508,050

Promedio nga Agibumbunannag a Mangaskasaba iti Kada Bulan: 7,224,930

Porsiento ti Irarang-ay no Idilig idi 2009: 2.5

Dagup Dagiti Nabautisaran: 294,368

Promedio nga Auxiliary Pioneer nga Agibumbunannag iti Kada Bulan: 287,960

Promedio a Payunir nga Agibumbunannag iti Kada Bulan: 844,901

Dagup ti Oras a Nabusbos iti Tay-ak: 1,604,764,248

Promedio a Panangyadal iti Biblia iti Kada Bulan: 8,058,359

Bayat ti 2010 a tawen serbisio, nangbusbos dagiti Saksi ni Jehova iti nasurok a $155 milion iti pannakaipaay ti kasapulan dagiti special pioneer, misionero, ken agdaldaliasat a manangaywan.

▪ Iti sangalubongan, agdagup iti 20,062 ti bilang dagiti ordinado a ministro nga agserserbi kadagiti sanga nga opisina. Miembroda amin ti Worldwide Order of Special Full-Time Servants of Jehovah’s Witnesses.

 AFRICA

PAGILIAN 57

POPULASION 888,219,101

AGIBUMBUNANNAG 1,222,352

PANANGYADAL ITI BIBLIA 2,596,614

MAYSA A GRUPO A NANGSAPUL ITI KINAPUDNO. Iti maysa a bassit a purok idiay Madagascar, inkeddeng ti 80 a tattao nga umikkatda iti National Protestant Church. Nangibangonda iti kapiliada ket saggaysa nga inusigda dagiti relihion iti lugarda tapno maammuanda no ania kadagita ti pudno. Natakuatanda a saan nga ad-adalen dagiti Katoliko ti Biblia ken saan nga agtutunos dagiti kameng ti Lutheran Church. Nabigbigda a saan nga isursuro dagiti Pentecostes ti kinapudno, ken nagadu ti maiparit kadagiti Adbentista. Kalpasanna, immasidegda iti maysa a kabsattayo ket insaludsodda  no mabalinna nga isuro kadakuada ti Biblia. Immanamong a dagus ti kabsat.

Inyurnos ti sumagmamano nga agibumbunannag a sarungkaran dagitoy nga interesado. Nadanon dagiti kakabsat ti 26 a tattao a naguummong iti kapilia nga imbangonda, ken nakasaganada nga umimdeng iti impormasion a naibatay iti Biblia. Inlawlawag dagiti kakabsat no kasano a masarakan ti relihion nga anamongan ti Dios, nga inusarda ti kapitulo 15 ti libro nga Isursuro ti Biblia. Napnek dagitoy nga interesado iti inlawlawagda. Idi nagsubli dagiti kakabsat, 73 ti nakitaripnongen kadakuada. Ket iti maikatlo nga isasarungkar, 142 ti timmabunon!

NAYAW-AWAN A ‘TEKS.’ Maysa a Saksi idiay Ethiopia nga agnagan iti Menen, ti nagteks iti iyad-adalanna iti Biblia tapno maparegtana. Inteksna ti teksto iti tawen 2009. Ngem sabali a numero ti natalmeganna, ket sabali ti nakaawat iti mensahe. Ti babai a nakaawat iti dayta inulit-ulitna a binasa ti mensahe: “‘Naan-anay a mangsaksi iti naimbag a damag.’​—Aramid 20:24, NW.” Kas maysa a managbuteng iti Dios, anamonganna ti ibagbaga ti mensahe ngem saanna nga ammo no kasanona a mayaplikar dayta. Pinampanunotna met no ania ti kaipapanan ti “NW” [New World Translation] iti ngudo ti mensahe. Dina malipatan dayta uray iti panaglabas ti adu a lawas. Kamaudiananna, inawaganna ti tao a naggapuan ti teks. Nasdaaw ti kabsattayo a babai idi maammuanna a nayaw-awan ti teks-na, ngem inusarna dayta a gundaway tapno sungbatan ti napasnek a saludsod ti babai. Nagresulta dayta iti panagadal iti Biblia, a maikonkondukta iti mamindua iti makalawas.

NAGPAYUNIR DAGITI AGTUTUBO. Ni Persis, nga agnanaed idiay Cameroon, ket nagbalin a di bautisado nga agibumbunannag idi isu ket agtawen iti innem. Sangapulo a panangyadal iti Biblia ti damo nga inreportna. Impagarup ti sekretario ti kongregasion a nagkamali ni Persis. Idi dinamag ti sekretario kenkuana, inlawlawag ni Persis a talaga  a sangapulo a nagduduma a tao ti iyad-adalanna. Insaludsodna pay: “Kasanom ngay nga ammo no mano nga oras ti ireportmo ket awan met ti relom?” Insungbatna a maysa nga oras ti kapaut ti recess-na. Isu ket mangasaba manipud rugi agingga a malpas ti recess. Gapu iti turedna a mangasaba, naparegta ti nanang ken ti kasinsinna, ket nagbalinda a di bautisado nga agibumbunannag idi agangay. Ita ta agtawenen iti sangapulo, bautisadon ni Persis ken agserserbi kas auxiliary pioneer bayat nga ages-eskuela. Maysa metten a di bautisado nga agibumbunannag ti walo ti tawenna a gayyemna a ni Aasy. Maysa a mayad-adalan iti Biblia ti nagkomento maipapan kadakuada: “Kadagiti gimong, maragsakanak a makakita kadagiti ubbing a mangkabkablaaw iti isuamin, nangruna dagiti natataengan, sakbay a mapanda makikatugaw kadagiti dadakkelda. Awan ti kasta iti simbaanmi. Ammok a dagiti ubbing a kasta ti pannakapadakkelda ket agbalindanto a naimbag nga umili.”

 DAGITI PAGILIAN TI AMERICA

PAGILIAN 55

POPULASION 918,834,998

AGIBUMBUNANNAG 3,673,750

PANANGYADAL ITI BIBLIA 3,967,184

SAAN A NAGTUKTOK. Ni Miriam, nga agnanaed idiay Bolivia, ket makalawas a nagkarkararag iti Dios. Inkararagna: “Pangngaasim, tulongannak koma a mangam-ammo kenka, ngem diak kayat a dagiti Saksi ni Jehova ti tumulong kaniak. Diak kayat ti kanayon a panagtuktokda iti ruanganko.”

Iti dayta met laeng a lawas, nagtelepono kenkuana ti special pioneer a ni Candy, a nangidiaya nga iti uneg ti maysa nga oras, mapanna ikkan ni Miriam kadagiti magasintayo. Immanamong ni Miriam. Iti uneg ti maysa nga oras, addan ni Candy iti ruangan ni Miriam. Dagus a linuktan ni Miriam ti ridaw, ket pinastrek ken pinagtugawna ni Candy. Kalpasanna, agwingwingiwing nga agkarapagna ni Miriam, a madlaw a maburiboran. Sinaludsod ni Candy no apay. “Masmasdaawak!” kinuna ni Miriam. “Makalawas nga indawdawatko iti Dios nga iturong ken iwanwannak koma, ngem imbatadko a diak kayat ti tulong dagiti Saksi ni Jehova a kanayon nga agtuktok iti ridawko! Kalpasanna, nagteleponoka imbes nga agtuktokka! Sipud nagteleponoka, maysa nga oras ti napalabasen, inkarkararagko iti Dios a saanka nga um-umay sumarungkar kaniak. Ngem immayka! Masmasdaawak! Nakabatbatad a dakayo a Saksi ni Jehova ti kayat ti Dios a tumulong kaniak.” Dagus a nairugi ti panagadal.

NAKABKABIL AGINGGA A NAIPAGARUP A NATAYEN. Idiay Suriname, ni Pasensi ket maysa a sigud a nalatak a lider iti  purok wenno kapiten ken nasinged a kaaliado ti granman, ti panguluen wenno ari iti intero a sulsulinek a lugar a lumasatan ti karayan. Raraemen ken itantandudo ni Pasensi dagiti lokal a tradision. Busbusorenna dagiti Saksi ni Jehova gapu ta ipagarupna a daddadaelenda dagiti tradision.

Idi agangay, maysa nga agkabannuag a lalaki ti agkuna a kabaelanna nga ilasin dagiti pumurok a mangkukulam. Kumuykuyog kenkuana ti adu a pasurotna bayat nga unorenda ti karayan a nakaluganda iti takuli ket kabilenda dagiti atapenda a mangkukulam sada samsamen ti amin a sanikuada. Dakkel a kantidad ti masapul a maibayad iti lalaki tapno “dalusanna” dagiti maatap a mangkukulam manipud iti dakes nga espiritu a limmugan kano kadakuada. Maysa ni Pasensi kadagiti adu nga inosente a biktima, a kinabkabilda agingga a naipagarup a natayen. Saan a nakatulong kenkuana uray ti gayyemna a granman, a maamak di la ket ta maibabain wenno maisagmak no tulonganna ti maysa a maatap a mangkukulam. Maparitan dagiti gagayyem ken kakabagian a mangipaay iti aniaman a tulong. Ngem ti manugang ni Pasensi a lalaki situtured nga impanna ti katuganganna iti purok a Saksi ni Jehova ti kaaduan  nga agnanaed. Nagpapatang dagiti kakabsat maipapan iti dayta ket inkeddengda ti tumulong uray no ammoda nga agpeggadda. Babaen ti maysa a takuli, impanda ni Pasensi iti maysa a kabangibang a purok a sadiay nga agtartrabaho ti maysa a kabsat kas manedyer ti bassit nga eropuerto. Manipud sadiay, daytoy a sigud a bumusbusor ket naipan iti maysa a siudad tapno maipaagas.

Idi immimbagen ni Pasensi, natignay gapu iti ayat nga impakita kenkuana dagiti tattao a binusbusorna. Rinugianna ti makipagadal iti Biblia, ket nabautisaran idi Disiembre 009. Ni Pasensi ket maysan a naregta a manangaskasaba iti naimbag a damag, ken nupay agtawenen iti 80, nag-auxiliary pioneer idi Abril 2010.

IMPAGARUPNA A KABESADONAN TI BIBLIA. Idiay Estados Unidos, adda maysa a barbasan a lalaki nga agnagan Eric a timmabuno iti gimong ti kongregasion nga iggemna ti Bibliana. Idi kinablaawan ti maysa a kabsat, rinugianen ni Eric ti agsaludsod maipapan kadagiti patpatientayo. Pinagkedkedanna ti libro nga Isursuro ti Biblia ta ti Biblia laeng ti kayatna nga usaren. Iti inaldaw, 20 a panid ti Biblia ti basbasaen ni Eric, ket saannan a malagip no namin-anon a nabasana ti intero a Biblia. Kalpasan ti gimong, nasurok a tallo nga oras pay a nagsaritada iti kabsat. Idi agpakadan, kinuna ni Eric, “Nagbiddutak.” Idi damagen ti kabsat no apay, insungbat ni Eric: “Impagarupko a kabesadokon ti Biblia. Ngem iti daytoy a pannakigimongko, nabigbigko a nagadu ti saanko pay nga ammo.” Kalpasanna, inawatna met laeng ti libro nga Isursuro ti Biblia.

Kabigatanna, rinugiannan ti makipagadal iti Biblia iti kabsat. Sakbay dayta, impuyatan ni Eric a binasa ti umuna a sangapulo a kapitulo dayta a libro. Ania ti konklusionna? “Nasarakak met laengen ti kinapudno!” Tallo agingga iti uppat nga oras kada aldaw ti panagadalda, lima nga aldaw kada lawas. Kasta met, agsagsagana ken tabtabunuanna ti amin a gimong a kaduana ti intero a pamiliana. Iti umuna a lawas, sinuratannan ti tallo a nakaikamenganna a relihion tapno ipakaammona nga umikkaten; ken nagibarbas  payen, ken inkeddengna a saannan a rambakan dagiti nangina nga aldaw. Iti las-ud ti dua a lawas, nagpasalista iti Teokratiko nga Eskuelaan ti Panagministro, ket iti las-ud ti uppat a lawas, nagbalinen a di bautisado nga agibumbunannag. Nabautisaran ni Eric idi Abril 2010, innem laeng a bulan sipud idi damo a makasaritana dagiti Saksi ni Jehova!

NABAUTISARAN IDI AGTAWEN ITI PITO. Ni Paola, nga agnanaed idiay makinlaud a Mexico, ket dimmakkel iti poder da apongna. Idi agtawen ni Paola iti lima, nangrugi ni lolana a makipagadal iti Biblia kadagiti Saksi ni Jehova. Bayat dagita a panagadal, dumdumngeg ni Paola ket rimmamut ti kinapudno iti naganus a pusona. Nupay saan a rimmang-ay ni lolana, nangrugi a makigimong ni Paola nga is-isuna. Kiddawenna kada apongna a tulonganda nga agrubbuat ken bumallasiw iti kalsada iti ipapanna iti Kingdom Hall.

Idi ammonan ti agbasa ken agsurat, dagus a nagpasalista ni Paola iti Teokratiko nga Eskuelaan ti Panagministro ket nagbalin nga agibumbunannag. Gapu iti panagayatna  ken Jehova, nagpabautisar ni Paola idi agtawen iti pito. No adda agsaludsod no apay a makigimgimong ken nakaregregta a mangasaba uray no maymaysana a Saksi iti pamiliana, kastoy ti sungbat ni Paola, nga agtawen itan iti sangapulo: “Magustuak unay dagiti palawag ta parparegtaendak nga agtultuloy nga agadal iti Biblia ken umadayo iti peggad. Mangaskasabaak met gapu ta kayatko nga isuro kadagiti tattao no ania ti aramidento ni Jehova agpaay kadakuada ken gapu ta ti Biblia ti mamagbalin kadakuada a naragsak uray ita.”

PANANGASABA KADAGITI NAILAW-AN A NAGTELEPONO. Idiay Dominican Republic, adu ti mailawlaw-an nga agtelepono iti maysa a kabsat a babai, ket makasinga dayta iti trabahona. Kalpasan ti sumagmamano nga aldaw, napanunotna nga usaren dayta a gundaway a mangasaba. Kasano? No sumungbat kadagiti mailaw-an nga agtelepono, sitataktika nga ibagana a sabali ti numero a natalmegan ti nagtelepono. Sana inayon, “Adda man laeng maisaludsodko, Nagbasaka kadi iti Biblia ita nga aldaw?” Nupay adda dagiti mangibaba iti telepono, adda met dagiti mangibaga a saanda a binasa ti Biblia. Kalpasanna, isaludsodna kadakuada, “Ammom kadi no apay a nakapatpateg dayta?” Kas sungbat, basaenna ti Biblia iti Salmo 1:1-3. Maysa nga opisial ti gobierno ti nakitungtong kenkuana iti napaut ket imbagana nga awan ti Bibliana. Nayurnos ti pannakaipaima kenkuana ti Biblia ken ti sumagmamano a literatura a naibatay iti Biblia. Dua a lawas kalpasanna, nagtelepono daytoy nga opisial, ket agyamyaman iti kabsat gapu iti pannakaseknanna ken kadagiti intedna a literatura.

Iti sabali pay a nayaw-awan nga awag iti telepono, insaludsod ti maysa a balasang, “Maysaka kadi a Saksi ni Jehova.” Idi sinungbatan ti kabsat, nagsangiten ti balasang. Inlawlawagna nga isu ket maysa a di aktibo nga agibumbunannag. Pinaregta ti kabsat daytoy a balasang ken nayurnos nga adda tumulong kenkuana tapno makapagserbi manen ken Jehova. Daytoy a balasang ket aktibo itan nga agibumbunannag.

 ASIA KEN TI MAKINTENGNGA A DAYA

PAGILIAN 47

POPULASION 4,587,021,833

AGIBUMBUNANNAG 652,251

PANANGYADAL ITI BIBLIA 601,306

“TI SAMARITANA.” Bayat ti nadagaang a kalgaw idiay Kazakhstan, mangaskasaba ti dua a payunir, maysa a brother ken maysa a sister, idi makitada ti maysa a babai nga agsaksakdo iti bubon. Nagkiddaw ti brother iti mainum a danum iti babai, ket bayat nga umin-inum, kinasabaan ti sister ti babai. Naginteres ti babai ket inawisna dagiti payunir iti pagtaenganna tapno ad-adu pay ti maammuanna maipapan iti ibagbagada. Nagsasaritada iti apagbiit, ket kalpasanna, pinaimaanda iti pagbasaan a naibatay iti Biblia. Inkari ti sister a sumarungkarto kalpasan ti dua nga aldaw.

Kas inkarina, nagsubli ti sister, a kaduana ni nanangna, a maysa met a Saksi. Nakitada ti babai nga agur-uray iti ruar ti balayna, nga iggemna ti pagbasaan nga impaimada kenkuana. Insublina dayta iti sister ket kinunana: “Pagbasaan daytoy dagiti Saksi ni Jehova! Relihion dagiti Ruso ti relihionyo!”

Kiniddaw ti ina no mabalinna ti mangibasa iti maysa a teksto ti Biblia sakbay a pumanawda. Kayatna nga ipakita iti babai ti nagan ti Dios iti Biblia, isu a binasana ti Exodo 3:15, nga agkuna: “Ni Jehova a Dios dagidi ammayo, ti Dios ni Abraham, ti Dios ni Isaac ken ti Dios ni Jacob, imbaonnak kadakayo.” Nasdaaw ti agina ta inawis ida ti babai a sumrek iti balayna. Apay a kellaat a nagbalbaliw ti panunotna? Agnagan gayam iti Abraham, Isaac,  ken Jacob dagiti inapona. Kinunana a no ni Jehova ti Dios dagiti inapona, saan a rumbeng a papanawenna dagiti Saksi ni Jehova. Iti simmaganad a panagsarungkarda, nairugin a mayadalan iti Biblia. Magagaran unay a mangammo iti kinapudno isu a mamindua iti kada lawas ti panagadalda. Iti laksid ti ibubusor dagiti annakna a lallaki, rimmang-ay iti naespirituan, ket maysa itan a di bautisado nga agibumbunannag. Malaksid iti dayta, ti manugang ken ti abalayanna a babai ket agad-adalda metten iti Biblia ken makigimgimongdan a regular. Yantangay umasping iti salaysay iti Juan 4:3-15 ti situasion idi damo a makasabaan ti babai, isu ket pagaammo iti kongregasion kas “ti Samaritana.”

“ADDA SUMAGMAMANO A SALUDSODKO.” Kastoy ti insurat ti maysa a baket a payunir idiay Cyprus: “Iti maysa nga agsapa ti Mierkoles, saan a nasayaat ti rikriknak, ngem imbes nga agpupokak iti balay, kayatko unay ti mangasaba iti lansangan. Gapuna, nagkararagak ken Jehova, a kiniddawko nga adda koma makaiwaya nga umay agtugaw iti abayko a mabalinko nga iyadalan iti Biblia. Di nagbayag, immasideg ti maysa a lalaki a taga-Nepal. Iggemko dagiti magasin, ket sakbay pay a rugiak ti agsao, dinamagna no ania dagiti iggemko a magasin. Idi imbagak a naibatay dagita iti Biblia, kinunana: ‘Nang, mabalin kadi ti makikatugaw kadakayo? Adda sumagmamano a saludsodko maipapan iti Biblia a kayatko a damagen kadakayo.’

“Siempre, immannugotak ta dayta ti mismo nga inkararagko ken Jehova! Kalpasanna, insaludsod ti lalaki: ‘Ti umuna a saludsodko ket ania aya a talaga ti isursuro ti Biblia?’ Saanak a nakasungbat a dagus gapu iti siddaawko! Inruarko iti bagko ti libro nga Ania a Talaga ti Isursuro ti Biblia? ket impakitak dayta kenkuana. Kinitana ti libro, kimmita kaniak, sana insaludsod, ‘Saan aya a ti paulo  daytoy a libro ti mismo a saludsodko kadakayo?’ Gapuna, dagus a nairugik ti panagadal iti Biblia iti mismo a nagtugawak iti parke! Daytoy a lalaki ket regular itan a mayad-adalan iti Biblia ken makigimgimong, ken inyebkasnan ti tarigagayna nga agpaset iti Teokratiko nga Eskuelaan ti Panagministro. Apresiarek unay ti kinapateg ti naan-anay a panagpannuray iti bileg ken panangiwanwan ni Jehova iti panangitungpal iti Nakristianuan a ministeriok, uray no adda rikriknaek no dadduma.”

INYADALANNA TI NANGPAPATAY ITI APOKONA. Napapatay ti apoko ni Miguel sumagmamano a tawen ti napalabasen. Natiliw ti nangpapatay a ni Esmeraldo, ngem saanna nga inamin iti korte nga isu ti pimmatay. Nupay kasta, nasentensiaan ni Esmeraldo a maibalud gapu kadagiti ebidensia.

Idi agangay, maysa a panglakayen ti nangawis ken Miguel a mangkadua kenkuana iti mismo a nakaibaludan ni Esmeraldo idiay Pilipinas. Nagkedked ni Miguel, ta ammona nga adda sadiay ti nangpapatay iti apokona. Ngem simmurot latta ken nakiraman iti panangisuro iti sumagmamano  a balud a mayad-adalan iti Biblia. Bayat ti panagadal, nakitana ni Esmeraldo nga umas-asideg kenkuana. Tapno maliklikan ti aniaman a gulo, sitatanang a kinuna ni Miguel kenkuana: “Esmer, saan a makiriri ti immayak ditoy no di ket tapno ipakitak ti ayat kadagiti tattao a kas kenka. Kas makitam, makisarsaritakami iti daytoy a lalaki maipapan iti Biblia. Ti napasamak kenka ket saan koma a napasamak no naammuam ti linaon ti Sao ti Dios. Pangngaasim, makipagadalka iti Biblia kadakami.” Nasdaaw ni Miguel ta dimngeg ni Esmeraldo agingga a nalpas ti panagadal. Natukay iti nangngeganna, inaminna nga isu a talaga ti nangpatay iti apoko ni Miguel ket dimmawat iti pammakawan.

Gapu ta saan a nangngeg ti panglakayen ti nagtungtonganda, ken nadlawna a kasla nasayaat ti panagsarsaritada, kiniddawna ken Miguel nga isu ti mangyadal ken Esmeraldo. Medio adda buteng ni Miguel idi damo ta ammona a saan laeng a ti apokona ti pinapatay daytoy a lalaki. Nupay kasta, immanamong ni Miguel. Nabayag met a nakidangadang ni Esmeraldo kadagiti pagkapuyanna tapno maitunosna ti biagna kadagiti prinsipio ti Biblia; ngem saan a nasayang ti panagan-anus ken panagreggetna, ta idi Pebrero 1, 2010, isu ket nabautisaran kas simbolo ti dedikasionna ken Jehova. Kas panangipakita iti Nakristianuan a pammakawan ken ni Esmeraldo, ipampamuspusan itan ni Miguel ti pannakapaababa ti sentensia ni Esmeraldo tapno naan-anay a mairanudna dagiti kinapudno iti Biblia.

 EUROPA

PAGILIAN 47

POPULASION 739,193,855

AGIBUMBUNANNAG 1,575,094

PANANGYADAL ITI BIBLIA 830,888

NATUNGPAL TI DUA A TARIGAGAYNA. Ni Nelena, nga agtawen iti 19 ken agnanaed idiay Bulgaria, ket adda dua a tarigagayna​—agpabautisar ken agserbi kas auxiliary pioneer. Ngem addaan ni Nelena iti motor and sensory neuropathy, natawid a sakit nga awan pay agasna. Aganges ni Nelena iti tulong ti makina, ket dayta ti manglimitar iti gunayna. Ti umuna a tarigagayna ket agpabautisar, ngem saan a kaskarina a maibanag dayta gapu ta saanna a kabaelan ti mapan iti asamblea gapu iti kasasaadna. Isu nga idi agtawen iti 18, iti pagtaenganna a naaramid ti palawag ti bautismo ket kalpasanna, naitaneb iti bath-tub.

Ngem ti ngay tarigagayna a makapagserbi kas auxiliary pioneer? No nasayaat ti kasasaad ti panawen, kabaelanna no dadduma ti aganges iti maysa nga oras wenno napapaut pay uray no saan nga agusar iti makina. Nagaplikar ngarud kas auxiliary pioneer, ket maysa nga agibumbunannag ti mangiduron iti wheelchair-na bayat ti panangasabada iti binalaybalay. Ni Nelena ket mangyad-adal met iti Biblia babaen ti voice call iti Internet. No dadduma, iti pagnanaedan  ni Nelena ti pangaramidan dagiti kakabsat iti panangyadalda iti Biblia tapno mabalinna ti makipaset. Gapuna, namitlo a nakapag-auxiliary pioneer ni Nelena idi napalabas a tawen. Kunana: “Maragsakanak ta natungpal ti dua a tarigagayko. Gapu iti dayta, ad-adda a simmingedak iti naayat a Namarsua a ni Jehova.”

AGKURKURBATA ITAN. Maysa a kabsat a babai idiay Armenia ti mauy-uyaw iti pagtrabahuanna gapu ta isu ket maysa a Saksi ni Jehova. Maysa a katrabahuanna ti masansan a manglais kenkuana, a mangibagbaga nga isu ket inallilaw “dagiti nakakurbata a tattao” tapno sumrek iti relihionda. Namin-adu nga inkagumaan ti kabsat nga ilawlawag ti takderna, ngem saan nga ikankano ti katrabahuanna isu nga inkeddengna nga agulimek lattan kas panangtulad ken Jesu-Kristo. (Mat. 27:12) Nagangayanna, naikkat iti panggedan dayta a trabahador gapu iti saan a nasayaat nga ugalina ken gapu iti panangrirriribukna iti kabsat. Kalpasan ti adu a bulan, maysa a lalaki ti mangsapsapul iti kabsat iti pagtrabahuanna. Isu dayta ti dati a katrabahuanna a manglalais idi kenkuana. Nasdaaw ti kabsat idi makitana, ta nakakurbata ken nakaawit metten iti bag, idinto ta um-umsienna idi dagiti Saksi gapu iti panagkurbatada. Kinunana iti kabsat: “Pasensiakan iti nasakit a panagsasaok idi. Naammuakon ti kinapudno.” Daytoy a lalaki ket nagpayadal iti Biblia kadagiti Saksi ni Jehova, ket nabautisaran ken maysan a regular pioneer iti laksid ti ibubusor ti pamiliana.

“AM-AMMOM KADI NI MRS. NADIA?” Ni Nadia ket agserserbi kas payunir iti maysa a kongregasion iti makin-amianan nga Italia. Idi Setiembre 2009, inusarna ti intercom tapno makasaona ti maysa a lalaki a dagus a nangibaga a saanna a kayat ti makisao gapu ta nabiit pay a natay ni baketna. Iti simmaganad a Domingo, nagsubli ni Nadia tapno iyebkasna ti pannakipagladingitna ken tapno ilawlawagna ti maipapan iti namnama a panagungar nga ibagbaga ti Biblia. Kaskasdi, saan a nagbaliw ti reaksion ti lalaki. Iti  Panagadal iti Pagwanawanan iti dayta a malem, nairaman ti kapadasan ti maysa a kabsat a babai a nagsurat iti maysa a tao a natayan iti patpatgen. Gapuna, napanunot ni Nadia ti mangaramid iti surat ti pannakipagladingit para iti lalaki a nakasaona iti intercom, ket inlawlawagna iti dayta a surat ti namnama a panagungar. Dua nga aldaw kalpasanna, inkabilna dayta a surat iti mailbox dayta a lalaki.

Sumagmamano nga aldaw kalpasanna, bayat a mangaskasaba ni Nadia iti lansangan, kinasaona ti maysa a magmagna a lakay nga agtawen iti nasurok a 70 ket imbasaanna iti maysa a bersikulo ti Biblia. Sinaludsod daytoy a lakay no isu ket maysa a Saksi ni Jehova. “Wen,” insungbat ni Nadia. Kalpasanna, inlawlawag ti lakay nga adda simmarungkar kenkuana a Saksi ni Jehova, a nangibati iti nagsayaat a surat a nakatignayanna iti kasta unay. Kalpasanna, insaludsodna, “Am-ammom kadi ni Mrs. Nadia?” Nasdaaw ni Nadia ket inyam-ammona ti bagina, a nagsiddaawan met ti lakay. Inyurnos ni Nadia a kaduananto ni lakayna a sumarungkar kenkuana. Kas resultana, nangrugin a mayadalan iti Biblia daytoy a lakay ken regular payen a makigimgimong.

SAANDA A MAGABENAN NGA IYADALAN TI AMIN. Idiay makin-abagatan a Serbia, uppat a bautisado a Saksi ti agnanaed iti ili ti Bujanovac. Kasta unay ti ragsak dagitoy nga agibumbunannag ti Pagarian gapu ta 460 ti bilangda a timmabuno iti Memorial idi 2010! Dagiti panglakayen iti kabangibang  a kongregasion nangorganisarda kadagiti regular a gimong idiay Bujanovac, iti maysa a naabangan a pasdek. Iti promedio, nasurok a 50 ti timmabuno​—a kaaduan ket Roma ti kapuonanda. Gapu iti kaadu ti umaw-awat iti mensahe ti Pagarian, dagiti special pioneer a naibaon iti daytoy a teritoria saanda a magabenan nga iyadalan iti Biblia ti amin nga interesado. Gapuna, dagiti laeng makigimong a nakasagana a naimbag ti iyadalanda.

AGTAWEN ITI NASUROK SANGAGASUT! Ni Elin, ti kabaketan nga agibumbunannag idiay Sweden, ket agtawenen iti 110, ti kapaut ti biag a nadanon ni Josue. (Jos. 24:29) Agnanaed ni Elin iti maysa a pasilidad para kadagiti lallakay ken babbaket, ket ap-aprobetsarenna ti amin a gundaway a makisarita kadagiti bisita ken iti amin a maam-ammona sadiay. Adu a libro ti maipapaimana. Idi nangasaba iti binalaybalay ti maysa a panglakayen ken ti balasangna iti lugarda, naam-ammoda ti maysa a balasang a nangibaga nga isu ket kinasabaan ni Elin ken inikkanna iti libro. Nagresulta dayta iti nasayaat a panagsarita. *

NASARAKANNA DAGITI LIBRO ITI SIMBAAN. Idiay Belarus, nasdaaw ni Tatyana idi teleponuan ti maysa a balasang a saanna nga am-ammo. Kayat dayta a balasang a maammuan ti sungbat ti Biblia kadagiti saludsodna. Nagresulta dayta iti nabiag a saritaan. Kasanona a naala ti numero ti telepono ni Tatyana? Inlawlawag ti balasang nga idi napan iti  simbaan, nakitana ti libro nga Isursuro ti Biblia ken ti Baro a Lubong a Patarus iti sirok ti tugaw ket naisurat kadagita a libro ti numero ti telepono ni Tatyana. Kasano a naipan iti simbaan dagita a libro? Ti ina ti balasitang nga iyad-adalan ni Tatyana ti nangipan kadagita iti simbaan. Nabatad a panggep ti ina nga isaludsod iti padi no rumbeng a basaen ti anakna dagita. Iti di ammo a makagapu, nabati dagita a libro iti sirok ti tugaw. Nakita dayta ti balasang ket inyawidna. Ti panagteleponona ket nagresulta iti kanayonan a panagsarita maipapan iti Biblia.

NAADDAAN ITI GUNDAWAY A MANGASABA GAPU ITI NAPUKAW NGA AMERIKANA. Maysa nga special pioneer, nga agnagan Elena ti nakakita iti maysa nga amerikana a naregreg iti kalsada idiay Minsk, Belarus. Nadalus ti amerikana ken saan met a kasla naibelleng. Idi pinidutna dayta, adda nakitana a 1,200 a doliar iti bulsana. Kinitana dagiti tattao iti aglawlaw, ket dagus a nabigbigna ti lalaki a makinkukua la ketdi iti amerikana. Agtartaray ti lalaki a kasla adda sapsapulenna. Masapul a kamaten ni Elena ti lalaki tapno makamakamna. Maysa a negosiante ti lalaki manipud Bangladesh, ngem agnanaed idiay Moscow. Maragsakan ta naisubli kenkuana ti amerikana agraman ti kuarta. Kayatna a maammuan no apay nga insubli ti kabsat ti amerikana, nga uray la a kinamatna tapno laeng maisublina dayta. Inlawlawag ti kabsat nga isu ket maysa a Saksi ni Jehova. Kinuna ti lalaki a sumagmamano nga aldaw sakbayna, adda dua a Saksi a nakisarita kenkuana. Kinunana nga agarup 30 a minuto a nakirinnason kadakuada ket inkalinteganna ti patpatienna. Kalpasanna, sinaludsod ti lalaki ken ni Elena no kasanona a masubadan ti kabsat gapu iti panangisublina iti amerikanana. Kinuna ti kabsat a saanna a kalikaguman ti aniaman a gunggona gapu iti inaramidna, ngem ti kasayaatan a pamay-an a maipakitana ti panagyamanna ket ti pannakipagadalna iti Biblia kadagiti Saksi ni Jehova inton agsubli idiay Moscow. Immanamong iti dayta.

 OCEANIA

PAGILIAN 30

POPULASION 39,384,408

AGIBUMBUNANNAG 101,483

PANANGYADAL ITI BIBLIA 62,367

PANANGDAER ITI DEPEKTO ITI PANAGSAO. Ni Hamish, agtawen iti 23 a kabsat nga agnanaed idiay Australia, ket nakaro ti depekto iti panagsaona. Agbeddal wenno saan a maawatan dagiti sasaona, wenno awan pay ketdi ti maibalikasna. Iti laksid dayta a depekto, nakaregregta latta nga agpalawag ken mangasaba. Kas pagarigan, tapno makapagpalawag iti Kingdom Hall, i-type nga umuna ni Hamish ti manuskritona iti elektroniko nga alikamen a makabael a mangipangngeg iti insuratna a sasao. Inton agpalawag, iplastarna dayta nga alikamen iti podium sa usarenna ti keyboard a mangpili ken mangipangngeg kadagiti sasao a nasaksakbay nga in-type-na. Mausar ti mikropono tapno mangngegan a naimbag dayta. No ti pasetna ket kalikagumanna ti panagkomento ti tallaong, kiddawenna ti komento ken agyaman babaen ti panag-type-na iti elektroniko nga alikamen. No mangasaba, makisarita babaen ti kasta met laeng a pamay-an, nga alistuanna nga i-type ti insaganana a sasao ken dagiti inadawna a kasuratan. Kas resulta, adu ti nasarungkaranna a sibaballigi.  Sipud 2007, idi nadutokan ni Hamish kas ministerial nga adipen, sumagmamano a daras a nagserbi kas auxiliary pioneer iti kada tawen.

NAPERDI TI PRINTER-NA. Idiay New Caledonia, ni David, nga agtartarimaan iti kompiuter, ket tineleponuan ti maysa a babai a naperdi ti printer-na. Alisto a natarimaan ni David ti printer, ngem masdaaw idi mabasana ti nayimprenta a dokumento: “SAANKAYO nga um-umay. Addan ni Jesus iti pagtaenganmi. Saanmi a kasapulan ti sabali a relihion.”

Kinuna ni David iti nagpatarimaan: “Bayat a tartarimaanek ti printer, nabasak ti mensahe a nakasurat iti dokumento. Mabalin kadi a maammuan no apay nga insuratyo dayta?”

Insungbatna: “Agkaraumay ngamin dagiti Saksi ni Jehova kada ngudo ti lawas. Naumakamin a makakitkita kadakuada. Uray agan-anoda, didanto makastrek iti pagtaenganmi.”

Insaludsod ni David: “Diyo kadi ammo a napastrekyon ti maysa kadakuada iti pagtaenganyo?”

“Imposible,” insungbatna. “Saanto pulos a mapasamak dayta!”

Kinuna ni David: “Maysaak a Saksi ni Jehova! Ket pinastrekdak!” Nasdaaw ken medio nabainan ti babai. Nainggayyeman nga inlawlawag ni David no apay a sumarsarungkar dagiti Saksi ni Jehova kadagiti tattao iti pagtaenganda, ket nagtultuloy dayta a panagsarita iti dua nga oras. Sumagmamano nga aldaw kalpasanna, simmarungkar manen ni David iti babai ken iti asawana. Inlawlawag ti agassawa a kalpasan a pinampanunotda ti napasamak, masiguradoda a ti Dios ti nangiturong ken David kadakuada. Gapuna, saanda a mapagkedkedan ti panagsarungkarna! Regular itan nga umaw-awatda kadagiti magasin.

NAKABALAN KADAGITI POLIETO. Ni Nathan, nga agtawen iti 12, ket agnanaed idiay Australia. Mangitugtugot kadagiti naibatay-Biblia a polieto nga ikargana iti pageskuela a  bagna ket regular a mangasaba kadagiti gagayyemna idiay eskuelaan. Naminsan, bayat a magmagna nga agawid manipud eskuelaan, nakitana ti maysa a baket nga agtaktakder iti sanguanan ti balayna. Immisem ti baket, isu nga iniseman met ni Nathan ket inikkanna iti maysa a polieto. Imbaga ti baket a tallon a tawen ti napalabas sipud idi natay ni lakayna. Gapuna, nangiruar ni Nathan iti polieto nga Aniat’ Namnama Kadagiti Ing-ingungoten a Natayen? Nagarubos ti lua ti baket idi dinakamat ni Nathan ti maipapan iti namnama a panagungar inton makitananto manen ni lakayna idiay Paraiso. “Ngem kaanonto nga agpatingga ti amin a panagsagaba?” insaludsod ti baket. Nangiruar ni Nathan iti sabali pay a polieto a napauluan Asidegen nga Agpatingga ti Amin a Panagsagaba! Kalpasanna, sinaludsod ti baket no ania pay ti patpatien ni Nathan isu nga inikkanna iti sabali pay a polieto nga Ania ti Pammati Dagiti Saksi ni Jehova. Kalpasanna, nagpakadan ni Nathan. Sumagmamano a lawas kalpasanna, nakitana manen ti baket iti arubayanna. Inayaban ti baket ken inarakupna. “Ammom kadi, Nathan?” kinunana. “Kalpasan nga inikkannak kadagiti polieto, simmarungkar kaniak ti dua a Saksi, ket iyad-adalandakon iti Biblia!”

MAYMAYSA LAENG TI AWITDA NGA IMBITASION PARA ITI MEMORIAL. Timmulong ni Michael iti pannakaibangon ti baro a pasilidad ti sanga nga opisina idiay Solomon Islands. Kalpasan dayta, inkeddengna ti mapan mangasaba idiay  Mbanika Island, maysa a naiputputong nga isla a nagnaedanna idi ubing pay ken pagnanaedan dagiti kakabsatna. Awan ti Saksi iti dayta nga isla. Awan met ti regular a biahe ti barko, awan ti koreo, ken maymaysa laeng ti telepono.

Napan ni Michael idiay Mbanika Island, a kaduana ti maysa nga agtutubo a payunir a ni Hansly. Apaman a simmangpetda, rinugianda ti agibangon iti bassit a Kingdom Hall a naaramid kadagiti bulong ti palma sa nagawisda kadagiti tumabuno iti Memorial ti ipapatay ni Kristo. Gapu ta maymaysa ti awitda a nayimprenta nga imbitasion, ipakitada laeng dayta kadagiti tattao sada ilawlawag ti kinapateg ti Memorial.

Maysa nga aldaw sakbay ti Memorial, dua nga oras a nagbilog dagitoy a kakabsat iti ipapanda iti bangir ti isla tapno awisenda ti maysa a pamilia sadiay. Ngem dagiti laeng annak ti nadanonda iti balay. Inkeddeng ni Michael nga ibati kadakuada ti kakaisuna a kopia ti imbitasion. Inyawatna dayta iti in-inauna a balasang ket kiniddawna nga itednanto dayta ken tatangna.

Iti simmaganad a malem, bayat nga agsagsagana da Michael ken Hansly para iti Memorial, nakitada a sumungsungad ti pamilia a nakalugan iti takuli. Nabasa ti ama ti imbitasion ket napanunotna a nakapatpateg la ketdi nga okasion ti Memorial, isu nga intugotna ti intero a pamiliana. Iti dayta a rabii, 52 ti timmabuno iti Memorial. Kalpasan ti Memorial, intultuloy da Michael ken Hansly a kinasabaan ken inyadalan iti Biblia dagidiay timmabuno.

[Footnote]

 [Tsart iti panid 40-47]

REPORT ITI 2010 A TAWEN SERBISIO DAGITI SAKSI NI JEHOVA ITI SANGALUBONGAN

 (Kitaem ti publikasion)

 [Dagiti Mapa iti panid 48-50]

 (Kitaem ti publikasion)