Surat ti Bagi a Manarawidwid

Patgenmi a Pada a Saksi ni Jehova:

Anian a makapagagar ti panawen a pagbibiagantayo! Ken anian a rag-o ti adda kadatayo! Talaga a pakaragsakanmi ti “abagan-abaga” a pannakipagtrabaho kadakayo patgenmi a kakabsat iti kapapatgan pay laeng a panangsaksi iti nailangitan nga Amatayo, a ni Jehova.​—Sof. 3:9; Juan 14:12.

Ti rag-otayo iti panagserbi ken Jehova saanna a kaipapanan a ditay maipasango kadagiti nadagsen a parikut. Bayat ti napalabas a tawen serbisio, dadduma kadakayo ti nagsagaba gapu iti ginggined, layus, bagyo, ken dadduma pay a didigra. (Mat. 24:7) Adu ti marigrigatan iti inaldaw gapu kadagiti makapakapsut nga epekto ti sakit ken panaglakay. Masapul nga ibturantayo amin ti dumegdegdeg nga “ut-ot ti panagrigat.” (Mat. 24:8) Iti adu a pagilian, a pakairamanan ti Armenia, Eritrea, ken South Korea, adu a kakabsat ti naibalud gapu iti pammatida.​—Mat. 24:9.

Ania ti nakatulong kadatayo a mangtaginayon iti positibo a kababalin iti laksid dagitoy a pakarigatan? Ti tekstotayo idi tawen 2010 impalagipna kadatayo ti maysa a napateg a banag: ‘Ti ayat ibturanna ti amin a bambanag. Ti ayat saan a pulos aggibus.’ (1 Cor. 13:7, 8) Wen, ti ayattayo iti maysa ken maysa​—ken ti ayattayo ken Jehova​—ti mangpabpabileg kadatayo nga agibtur a sibaballigi.

 Adu nga agkunkuna a Kristiano ti masmasdaaw iti kinasaknap ken kinaawan sarday ti trabahotayo a panangasaba. Nupay mabalin a dida umanamong kadagiti patpatien ken pannursurotayo, dadduma ti natignay pay ketdi a mangyebkas, “Ar-aramidenyo ti trabaho a dakami koma ti rumbeng a mangaramid!” Ania ti maysa a nakatulong kadagiti Saksi tapno maitultuloyda ti mangasaba iti inaldaw? Manen, ti sungbat ket ayat. Kas iti nailangitan nga Amatayo, saantayo a kayat nga adda siasinoman a madadael. (2 Ped. 3:9) Ti tarigagaytayo a ti isuamin makagtengda iti panagbabawi ket iyanninaw ti 7,508,050 a baro a kangatuan a bilang dagiti agibumbunannag idi napalabas a tawen serbisio. Adda kadi pay sabali a narelihiosuan nga organisasion a kasta kaadu ti ministrona nga aktibo a makiramraman iti dayta a trabaho a gapuanan ti ayat, nga agbolboluntario a mangipaay iti naespirituan a tulong iti sabsabali?

Makaparegta a makita ti agtultuloy a kaitungpalan ti padto a dinakamat ni Isaias: “Mapasamakto iti kamaudianan a paset dagiti aldaw a ti bantay ti balay ni Jehova sititibkerto ti pannakaipasdekna a nangatngato ngem iti tapaw ti bambantay, ket sigurado a maipangatonto iti ngatuen dagiti turod; ket amin dagiti nasion agayusdanto nga agturong iti dayta.” (Isa. 2:2-4) Karaman iti riniwriw nga agay-ayus iti balay ni Jehova ket ti 294,368 a nabautisaran idi napalabas a tawen serbisio. Abrasaentayo dagitoy a patpatgen a kakabsat iti timpuyogtayo. Ti koma Nakristianuan nga ayattayo ti mangtignay kadatayo nga agtultuloy a tumulong  kadakuada tapno mapagballigianda dagiti iraraut ti kabusortayo a ni Satanas a Diablo.​—1 Ped. 5:8, 9.

Ti kangatuan pay laeng a bilang a 18,706,895 a timmabuno iti Memorial idi Martes, Marso 30, 2010, ipasimudaagna a minilion pay ti potensial a makitimpuyog iti panagdayawtayo ken Jehova. Anian a yamantayo ta saan pay nga inyeg ni Jehova ti panungpalan daytoy dakes a sistema ti bambanag! Kabayatanna, ti ayattayo ti tumulong kadatayo nga agtultuloy nga agibtur.​—2 Tes. 3:5.

Ti “Agtalinaedkayo a Nasinged ken Jehova”! a Kombension Distrito, a kaaduanna ket naangay idi 2010 iti intero a lubong, pinabilegna ti relasiontayo iti nailangitan nga Amatayo a ni Jehova. Pudno unay ti kinuna ti salmista: “Naragsak ti ili a ti Diosna isu ni Jehova!” (Sal. 144:15) Aniaman ti mapasamak iti masanguanan, agtalektayo a no adda kadatayo ni Jehova, awan ti aniaman a pagbutngantayo. (Sal. 23:4) Iti din agbayag, babaen iti Anakna, ‘dadaelento ni Jehova dagiti aramid ti Diablo.’ (1 Juan 3:8) Siempre, il-iliwentayo ti idadateng dayta nga aldaw! Ngem kabayatanna, aduantayo iti trabaho a mamagtalinaed kadatayo nga okupado.​—1 Cor. 15:58.

Namnamaenyo nga “awan ressatna” ti panangdakamatmi kadakayo kadagiti kararagmi. (Roma 1:9) Sapay koma ta “pagtalinaedenyo ti bagbagiyo iti ayat ti Dios, bayat nga ur-urayenyo ti asi ni Apotayo a Jesu-Kristo a maipaay iti agnanayon a biag.”​—Jud. 21.

Ipatpategdakayo amin!

Dagiti kakabsatyo,

Bagi a Manarawidwid dagiti Saksi ni Jehova