Dagiti Tampok iti Napalabas a Tawen

ITI laksid dagiti narigat a kasasaad iti lubong, tinagiragsak dagiti Saksi ni Jehova ti sabali pay a nabunga a tawen iti sagrado a panagserbida. Gapu iti bendision ti Dios, ti kinapudno ti naimbag a damag ket ‘agbungbunga ken rumangrang-ay iti intero a lubong.’ (Col. 1:5, 6) Namnamaenmi a maparegtakayo ken mapabileg ti pammatiyo iti report ita a tawen.

 BARO NGA URNOS ITI PANAG-AUXILIARY PIONEER

Adu ti naragsakan idi nayurnos a dagiti auxiliary pioneer ket makapagpilida no 30 wenno 50 nga oras ti busbosenda iti ministerio para iti bulan ti Abril. Sigagagar a ginundawayan dayta ti adu a saan idi a makabael a makiraman iti daytoy a kita ti serbisio. Rinibu nga agibumbunannag ti nag-auxiliary pioneer iti damo a gundaway, ken adu a nagpaypayunir iti naglabas ti naragsakan a nagpayunir manen. Kasta met, adu nga agibumbunannag a saan a makapag-auxiliary pioneer ti nangikagumaan a mangasaba iti ad-adu nga oras. Ania ti resulta?

Kaaduan a sanga nga opisina ti nakaireport iti panagrang-ay a nangatngato nga amang ngem kadagiti napalabas a kangatuan a bilang. Iti intero a lubong, 2,657,377 nga agibumbunannag ti nag-auxiliary pioneer​—agarup lima a daras a nangatngato ngem iti kangatuan a bilang idi napan a tawen! Walopulo porsiento iti sangalubongan a pamilia ti Bethel​—16,292 kadagiti 20,290 a kakabsat​—ti nakiraman iti daytoy a pribilehio ti panagserbi. Saan kadi a makaparagsak a maammuan nga ad-adu ti nagapuanan dagiti ad-adipen ni Jehova idi Abril ngem iti naaramidanda iti aniaman a bulan iti pakasaritaan dagiti Saksi?

Nasurok laeng a makatawen kalpasan ti makadidigra a ginggined a nakatayan ti agarup 300,000 a tattao, nakaireport ti Haiti iti baro a kangatuan pay laeng a bilang idi Abril no mainaig iti panangasaba. Kadagiti 17,009 nga agibumbunannag sadiay, 6,185 ti nag-auxiliary pioneer. Ti espesial  a kampania a panangiwaras iti broshur a No Adda Matay nga Ay-ayatenyo, a nabiit pay a nairuar iti Haitian Creole, ket nakaipaay iti kasapulan unay a liwliwa ken namnama kadagiti agledleddaang nga umili.

Sabali met ti nakaipasanguan dagiti kakabsattayo idiay Nigeria bayat ti Abril. Iti uppat nga aldaw a nailatang para iti eleksion (tallo kadagita ket Sabado), pinaritan ti gobierno dagiti tattao a rummuar iti alas siete ti bigat agingga iti alas singko ti malem malaksid no mainaig dayta iti eleksion. Nupay kasta, saan a bimmaaw ti espiritu ti kinapayunir. “Kayatmi nga iyebkas ti rag-o ken panagyamanmi kadakayo gapu iti naisangsangayan a tiempo a natagiragsakmi iti daytoy a bulan,” insurat ti maysa a kongregasion. Iti sabali a kongregasion, 92 kadagiti 127 a bautisado nga agibumbunannag ti nag-auxiliary pioneer, a pakairamanan ti amin a panglakayen ken ministerial nga adipen. Kadagiti 688 a kameng ti pamilia ti Bethel, 555 ti nag-auxiliary pioneer.

 Nakapagpayunirda iti Laksid Dagiti Tubeng. Ni Jeannette ket agnanaed iti bambantay ti Burundi. Nabayagen a  tartarigagayanna ti agpayunir ngem adda nakaro a sakit ti pusona isu a saan a makapagna iti adayo wenno makasang-at kadagiti nangato a turod. Naragsakan idi naammuanna a naksayan ti makalikaguman nga oras para kadagiti ag-auxiliary pioneer bayat ti Abril. Tapno makapagpayunir kas iti tartarigagayanna, inyurnos dagiti panglakayen a ti pangasabaanna ket iti teritoria nga asideg iti balayna. Malaksid iti dayta, iti pagtaengan ni Jeanette ti pangyadalan dagiti payunir ken agibumbunannag kadagiti iyad-adalanda iti Biblia. Iti ngudo ti bulan, naragsakan ni Jeannette a nakairugi iti uppat a panagadal iti Biblia. “Kayatko ti agpayunirto manen,” kunana, “ket agtalekak a tulongannak ni Jehova.”

Iti isla ti Grenada, maysa nga agtutubo a tuleng a kabsat a babai ti nagpayunir nupay marigatan a magna gapu iti depekto dagiti sakana. “Talaga a marigatanak a magna iti adayo a mapan aglugan iti bus no kasdiay a mapanak mangasaba,” kinunana. Maysa pay, awan trabaho daytoy a kabsat, isu a sipapasnek a nagkararag ken Jehova tapno dumawat iti tulong. Maitunos kadagiti kararagna, naglako kadagiti ginansiliona ken kadagiti inaramidna nga aritos, kuentas ken pulseras tapno masustentuanna ti bagina. “Naan-anay a nasuportarak ti trabaho a panangasaba,” kinunana idi agangay, “ken nariknak ti tulong ken pammaregta dagiti kakabsat. Dayta ti pudpudno a nangparagsak kaniak!”

Ni Toshi ket maysa a kabsat idiay Japan nga agtawen iti 101 ngem magagaran a nag-auxiliary pioneer idi Abril. Gapu ta saan a makaruar iti pasilidad a pakaay-aywananna, mangasaba ni Toshi babaen ti surat ken kaskasabaanna dagidiay trabahador a mapan iti siledna. “Nakapsut ti panagdengngegko,” kuna ni Toshi, “isu a napigsa ti panagsaok. Kas resultana, mangngegdak uray dagiti tattao iti aglawlaw.”

Ni Felix a taga-Costa Rica ket nag-auxiliary pioneer nupay paralisado dagiti saka ken imana. Ngem kasano  a nakapagpayunir? Naiplastar iti sango ti balayna ti maysa a lamisaan a nakaiparabawan dagiti literatura tapno makasabaanna dagiti aglabas. Nabambannog ni Felix idi agngudo ti bulan, ngem nabang-aran iti naespirituan ken naragsakan a nakairugi iti uppat a panagadal iti Biblia.

Adu nga agtutubo nga agibumbunannag ti nagagaran met a nakiraman iti espesial nga aktibidad iti Abril. Kas pagarigan, idiay Spain, kayat ni Sandra nga agtawen iti 11 ken ni adingna nga Alejandro nga agtawen iti pito, ti mangbusbos iti ad-adu nga oras iti panangasaba. Tartarigagayanda ti ag-auxiliary pioneer gapu ta natignayda iti kinaregta ti kongregasionda ken iti nagsayaat nga ulidan dagiti nagannakda. Ngem kasanoda a makapagpayunir idinto ta saanda pay a nabautisaran? Nangaramidda a dua iti eskediul tapno maragpatda ti isu met laeng nga oras a busbusbosen dagiti nagannakda iti panangasaba ken nagsaganada babaen ti panangensayoda kadagiti presentasionda bayat ti Panagdaydayaw ti Pamilia. Impagarup dagiti dadakkelda a baka mabannog dagiti ubbing bayat dayta a bulan. Ngem talaga a determinado dagitoy dua nga ubbing nga agibumbunannag. Idi Abril 30, naragpatda amin ti kalatda a 30 nga oras malaksid ken Alejandro, nga agkurang pay iti tallo nga oras. Gapuna, iti maudi nga aldaw, nangasabada ken tatangna tapno maragpatna ti kalatna iti dayta a bulan. Anian a ragsakda ta naaddaanda iti  okupado ken makapnek a gundaway a nagkakadua kas pamilia!

“Inaldaw nga inkararagko a sapay koma ta mabalinanmi ken lakayko a Philip ti mangasaba iti tallopulo nga oras,” kuna ni Jean. Nagserserbi idi ni Philip kas manangaywan iti distrito ngem gapu iti cerebral aneurysm, naidalit iti ospital idiay Spain ket saanen a makagaraw ken makapagsao. Ti laeng pamay-anna a makikomunikar ket babaen ti panagkiremna, maminsan no wen ken mamindua no saan.

“Idi nadakamatko ti maipapan iti panag-auxiliary pioneer,” intuloy ni Jean, “impasimudaagna a kayatna met ti agpayunir.” Ngem kasano a maragpatna dayta a kalat?

Kadagiti naglabas a bulan, nangaskasaba da Jean ken Philip kadagiti pasiente, bumisbisita a kameng ti pamilia, ken empleado iti ospital. “Planomi nga iti Abril, mangasabakami iti mismo a siledmi iti ospital iti agarup maysa nga oras iti kada aldaw bayat a siririing ni Philip ket mabalinna ti makiraman babaen ti panagkiremna.”

Ngem iti Marso, nayakar ni Philip iti siled a di mabalin nga adda kakuartona. Kaskasdi, nasurotda latta ti eskediulda, ta kinasabaanda dagiti empleado ti ospital iti sumagmamano a minuto iti nagduduma nga oras ti aldaw. Maysa kadagiti nars a napaimaanda iti libro nga Ania a Talaga ti Isursuro ti  Biblia? ti kimmita ken ni Philip ket inkarina nga agsubli iti sumaganad nga aldaw tapno agbasa kadagiti teksto ti Biblia. Idi nagsubli ti nars, kiniddaw ni Jean a basaenna ti Juan 17:3 sana impailawlawag kenkuana no ania ti naawatanna iti dayta. Kadawyanna a kasta ti ar-aramidenda, nga agkirem ni Philip tapno ipakitana no umiso wenno saan ti sungbat ti nars. Uray no saan a ti nars ti nakaiskediul iti siled ni Philip, mapan latta sadiay tapno ipanamnamana ken Philip nga ikarkararagna a kayatna ti suminged ken Jehova.

Ibilang dagiti ad-adipen ni Jehova a ti panangpalawada iti ministerio ket maysa a pamay-an a panangipakitada iti ayatda kadagiti kaarrubada, iti panagyamanda iti sakripisio ni Jesu-Kristo, ken iti debosionda iti nailangitan nga Amada. Sigagagar a padpadaananda ti Marso 2012, inton mabalindanto manen ti agpili no 30 wenno 50 ti ragpatenda nga oras iti dayta a bulan.

 DAGITI ESKUELAAN A MANGISURSURO ITI DALDALAN NI JEHOVA

Nakapatpateg iti organisasion ni Jehova ti padto iti Isaias 2:3: “Sumang-attayo iti bantay ni Jehova, iti balay ti Dios ni Jacob; ket isuronatayto maipapan kadagiti dalanna.” Kas pagarigan, idi kangitingitan ti Gubat Sangalubongan II, nausig ti klase matalek ken masirib nga adipen a kasapulan nga agpaisuro ken Jehova dagiti tattao manipud iti amin a nasnasion sakbay ti panungpalan ti sistema ti bambanag ni Satanas. Gapuna, nangaramidda kadagiti urnos tapno maorganisar dagiti eskuelaan a kas iti Watchtower Bible School of Gilead ken Teokratiko nga Eskuelaan ti Panagministro. Itay nabiit, pinasayaat ti Bagi a Manarawidwid dagiti nagduduma nga eskuelaan a mangipapaay iti naisangsangayan a panagsanay.

Idi Oktubre 2010, ti Ministerial Training School ket maawaganen iti Bible School for Single Brothers. Dagiti awanan assawa a panglakayen ken ministerial nga adipen ket agtultuloy a maipasalista iti daytoy a dua a bulan a panageskuela. Addan 37,445 a nagunggonaan iti daytoy a kurikulum iti intero a lubong, ket adu kadakuada ti agserserbin kas payunir, agdaldaliasat a manangaywan, misionero, ken Bethelite.

Ti baro a dua a bulan a Bible School for Christian Couples ket nangrugin idi Hulio 2011. Idiay Patterson, New York, a naangay ti umuna a klase. Kualipikado nga agpasalista dagiti agassawa no makapagsaoda iti Ingles,  agtawendan iti 25 agingga iti 50, nasalun-atda, di kumurang a duan a tawen nga agassawada, addadan iti amin-tiempo a serbisio iti di kumurang a dua nga agsaruno a tawen, ken no ti asawa a lalaki ket addan dua a tawenna a panglakayen wenno ministerial nga adipen. Mangrugi iti 2012, dagiti klase ti Bible School for Christian Couples ket maangayto kadagiti lugar a pakaar-aramidan ti Bible School for Single Brothers.

Nadisenio ti Bible School for Christian Couples a mangipaay iti naisangsangayan a panangsanay kadagiti  agassawa tapno ad-adda pay a mausar ida ni Jehova ken ti organisasionna. Kaaduan nga aggraduar ti agserbinto kas regular pioneer kadagiti lugar nga adda dakkel a panagkasapulan iti pagilianda. Ngem addada met dagiti maibaonto kas temporario nga special pioneer ken dadduma ti masanay pay iti trabaho iti sirkito. Mabalin a sumagmamano ti maibaonto nga agserbi iti sabali a pagilian no kualipikadoda ken no ipalubos ti kasasaadda.

Masapul a nataengan iti naespirituan ken managsakripisio dagiti agaplikar iti daytoy nga eskuelaan. Dagiti mangisuro kadakuada ket dagiti met laeng instruktor iti Bible School for Single Brothers, nga isu met laeng a kurikulum ti kangrunaan a surotenda. Sumagmamano a yunit ti maisuro kadagiti kakabsat a lallaki bayat a mapan mangasaba ti assawada. Dagiti kanayonan a detalye ken makalikaguman kadagiti interesado nga agaplikar ket maipaayto kadagiti miting a maangay kadagiti kombension distrito.

Imbalabala ti Bagi a Manarawidwid dagiti panagbalbaliw iti Watchtower Bible School of Gilead. Sipud maika-132 a klase, a nangrugi idi Oktubre 24, 2011, ti pannakasanay ket maipaay laengen kadagiti agassawa nga addan iti espesial nga amin-tiempo a panagserbi, kas kadagiti misionero a saan pay a nageskuela iti Gilead, special pioneer, agdaldaliasat a manangaywan, ken Bethelite. No ti agassawa ket makapagsao ken makapagsurat a silalawag iti Ingles, mabalin nga irekomenda ida ti Komite ti Sanga iti pagilianda.

Dagiti agturpos iti Gilead ket maibaondanto a mangpabileg ken mangpasayaat iti pannakaorganisar ti ministerio ken sanga nga opisina, agserbida man a misionero, agdaldaliasat a manangaywan, wenno Bethelite. Dagiti maibaon iti tay-ak ket agserbidanto kadagiti dadakkel  ti populasionna a lugar, a sadiay manamnama a dakkel ti maitulongda iti panangasaba ken kadagiti aktibidad ti kongregasion. Mabalin nga itultuloy dagiti Komite ti Sanga ti agkiddaw kadagiti nagturpos iti Gilead no adda dakkel a panagkasapulan iti teritoriada. Mabalinda met ti mangirekomenda kadagiti kualipikado a kakabsat iti teritoriada nga adda iti espesial nga amin-tiempo a panagserbi tapno tumabuno iti Gilead School. No dadduma, mabalin a kiddawen ti Komite ti Sanga nga agsubli dagitoy iti pagilianda kalpasan ti panagturposda.

Ti School for Branch Committee Members and Their Wives ket maang-angay idiay Patterson mamindua kada tawen iti pagsasao nga Ingles. Iti manmano a kasasaad, maawis met nga ageskuela dagiti kameng ti Country Committee. Dagiti kameng ti Komite ti Sanga a nakapageskuela idin ket maawis nga ageskuela iti maikadua a gundaway a kaduada dagiti agdadamo nga ageskuela. Ti assawa dagiti kameng ti Sanga a Komite ket mabalin a tumabuno iti kaaduan kadagiti klase a kaduada ti assawada. Ngem adda  dagiti yunit a mainaig iti panangorganisar a maisuro kadagiti kakabsat a lallaki laeng, bayat a maipaayan ti assawada iti nagduduma a trabaho iti Bethel.

Kanayonanna, mamindua kada tawen a maangayto idiay Patterson ti School for Traveling Overseers and Their Wives. Dagiti klase a maang-angay idiay Estados Unidos ket iramanna itan dagiti kakabsat a lallaki a nakapageskuela idin, nga agarup kagudua kadakuada ti mangbukel iti tunggal klase. Maawis ti assawa dagiti agdaldaliasat a manangaywan a tumabuno iti kaaduan a sesion ti klase.

Kas ili ti Dios, ditay kadi maragsakan a mangaprobetsar iti edukasion nga ipapaay ni Jehova? Kinuna a mismo ni Jesus: “Adda a naisurat kadagiti Mammadto, ‘Ket sursuruanto amin ida ni Jehova.’” (Juan 6:45; Isa. 54:13) Agtalekkami a dagitoy a panangpasayaat kadagiti eskuelaan ket ad-adda pay a mangpaalisto iti naganat a trabaho a panangikasaba iti naimbag a damag iti amin a mapagnaedan a daga sakbay a dumteng ti panungpalan.

 NAPIGSA A GINGGINED IDIAY JAPAN

Nagsasaganad a naipadamag iti intero a lubong dagiti dandani naggigiddan a kalamidad, a pakaibilangan dagiti ginggined, tsunami, allawig, bagyo, layus, uram, ken panagbettak ti bulkan. Nupay saantay a detalyado a maipadamag ti amin a nabiit pay a didigra, impakita dagiti kapammatiantayo idiay Japan no kasano katibker dagiti Saksi ni Jehova iti panangdaerda kadagiti kasta a pakarigatan.

Idi Biernes, Marso 11, 2011, iti 2:46 ti malem, ti Japan ket dinayyeg ti ginggined iti kapigsa a 9.0. Namataud dayta kadagiti tsunami a nangdidigra iti adu nga ili ken purok iti kosta ti Pacifico. Agarup 20,000 a tattao ti kompirmado a natay wenno saanen a nasarakan pay. Kadagiti naapektaran a lugar, uppat a Kingdom Hall ti nadadael ken uppat ti saanen a mabalin nga usaren. Agdagup iti 235 a balbalay dagiti kapammatiantayo ti nayanud wenno nakaro a nadadael, ken nasurok a sangaribu ti kasapulan a matarimaan.

Gapu iti ginggined ken tsunami, nakaro ti pannakadadael ti maysa a nuclear power plant ket simngaw dagiti makasabidong a radioaktibo a kemikal. Imbilin ti gobierno ti panagbakuit dagiti residente nga adda iti asideg ti planta, ket iti laeng nagpatnag, awanen ti matagtagitao iti adu a lugar. Dagiti kakabsat a naitimpuyog iti dua a kongregasion ket napilitan met a pumanaw iti dayta a lugar.

Kadagiti nasurok a 14,000 a Saksi ni Jehova nga adda kadagiti napakaruan a lugar, 12 ti natay, ken 5 ti nakaro a nadangran; 2 ti di pay nasarakan. Adu a nakalasat iti daytoy a makapakintayeg a pasamak ti naawanan iti pagtaengan,  sansanikua ken, kaaduanna, kadagiti ipatpateg iti biag.

“Naikagumaak nga impan iti luganko ni Nanang, a maysa a baldado, ket rinugianmin ti mapan iti nairanta a pagkamangan,” inlawlawag ni Kiyoko a taga-Ofunato. “Pagammuan ta adda nalang-abko nga asuk. Rimmuarak iti lugan ket nakitak ti dalluyon a mangal-alun-onen iti balaymi, ket um-umayen ti danum kadakami! Tinulongak ni Nanang a kumalay-at iti nangato a lugar nga ayan ti riles. Naimatanganmi ti pannakayanud ti luganmi.”

Kalpasan ti ginggined, maysa nga agtutubo nga agnagan Koichi ti nangikagumaan a dumanon iti pagtaengan dagiti nagannakna idiay Ishinomaki, a lima a kilometro ti kaadayona manipud iti baybay. Ngem idi asidegen, nakitana a natinepen ti intero a lugar. “Saanak a nakaasideg ta awan ti bangka.” Tallo a lawas kalpasan ti ginggined, nasarakanna ti bangkay ni tatangna iti maysa a morgue, sa ti bangkay ni nanangna tallo a lawas kalpasan dayta.

Apaman a nagsardeng ti ginggined, ni Masaaki a taga-Shichigahama imparadana ti luganna iti ruar ti Kingdom  Hall, a maysa a kilometro ti kaadayona manipud iti baybay. Kinuna ni Masaaki: “Adda kabsat a babai a nagkamang met sadiay. Impagarupko a saan a makadanon sadiay ti tsunami. Ngem di nagbayag, natinepen dayta a lugar iti narugit a danum. Idi kuan, tumpawen dagiti luganmi. Linuktak ti tawa ti luganko, rimmuarak, saak nagtakder iti tuktokna. Ngem nayanud ti lugan ti kabsat a babai ket diakon nakita pay! Inkararagko laengen ken Jehova a tulonganna koma ti kabsat.”

“Agtudtudo idi iti niebe, ket nasnaslep ken agkutkutimermerak. Simmardeng ti panagtinnag ti niebe, ngem nakalamlamiis ti angin. Di nagbayag, limneken ti init ket sumipngeten. Naraniag ken nakapimpintas dagiti bituen. Sitatakderak iti tuktok ti luganko, a kasla maysa nga isla iti tengnga ti nakalamlamiis a danum. Addada met dagiti padak a saan a makapanaw kadagiti nagtakderanda a rebba wenno tuktok dagiti pasdek. Diak ammo no mabigatanak pay a sibibiag. Kas pangliwliwak ti bagik, inulitko nga impalawag dagiti malagipko a paset ti palawagko dua a lawas laeng ti napalabas. Apag-isu unay ti temana: ‘Sadino ti Pakasarakanyo iti Tulong iti Tiempo ti Riribuk?’ Kalpasan dayta, kinantak ti kakaisuna a kabesadok a kanta: ‘Amak, Diosko ken Gayyemko.’ Inulit-ulitko a kinanta dayta. Bayat a kankantaek, linagipko no kasano nga inusarko ti biagko iti panagserbik ken Jehova, ket pagammuan ta agarubosen ti luak.

“Idi kuan, adda nagpukkaw manipud iti balay iti ballasiw ti kalsada, ‘Umayka tulongan!” Nagaramid daytoy a lalaki iti balsa manipud kadagiti timpaw a kaykayo ket salsalbarenna dagiti tattao iti asideg. Babaen ti tulongna, nakastrek ni Masaaki iti balay iti asideg babaen ti tawa iti maikadua a kadsaaran. Idi agangay, nabang-aran gapu ta naammuanna a naalaw met ti kabsat a babai a nayanud a nakalugan.

Masegseggaan ti kasar da Kohei ken Yuko, a maangay koma iti Kingdom Hall idiay Rikuzentakata iti Sabado,  Marso 12. Napasamak ti ginggined kalpasan a nairehistro ti kasarda iti city hall iti Biernes. Idi mangngeg ni Kohei ti pakdaar ti siudad nga adda umay a tsunami, nagdardaras a nagkamang iti nangato a lugar. “Nakitak ti panagkakaribuso ti intero a siudad,” kinunana. “Awan ti nabati malaksid iti sumagmamano a dadakkel a pasdek. Agingga iti dayta a kanito, ti pakaringgorak ket dagiti urnosmi iti dayta a malem, ngem nausigko idi agangay nga adda nakaro a pagteng a nangnangruna a pakaseknak.”

Iti Sabado, nagmalmalem da Kohei ken Yuko a timmulong kadagiti kakabsat iti kongregasion. “Nakaawatkami kadagiti pangsaranay nga abasto manipud kadagiti kabangibang a kongregasion,” kinuna ni Kohei. “Maragsakanak idi kinuna ni baketko nga isu ket maay-ayatan iti panangbusbosmi iti panawen ken pigsami para kadagiti kakabsat. Agyamanak ken Jehova iti daytoy naisangsangayan nga asawa. Inyanud ti tsunami ti baro a balaymi, ti luganmi, ken amin a sanikuami. Ngem agyamyamanak iti nainkabsatan nga ayat nga impakitada kadakami.”

Pisikal, Espiritual, ken Emosional a Panangsaranay. Dagus a nangorganisar ti sanga nga opisina ti Japan iti tallo a Disaster Relief Committee ken namin-adu a nangibaon kadagiti pannakabagi ti sanga nga opisina kadagiti apektado a lugar. Idi napan idiay Japan idi Mayo dagiti manangaywan iti sona a da Geoffrey Jackson ken Izak Marais manipud iti sangalubongan a hedkuarter, nakitaripnongda met kadagiti kakabsat nga agindeg iti maysa kadagiti lugar a napakaruan. Nayurnos ti maysa nga espesial a taripnong para kadagiti naapektaran a kongregasion ket babaen ti telephone hookup, naipatalged iti agarup 2,800 a kakabsat iti 21 a Kingdom Hall ti ayat ken pannakaseknan dagiti kakabsat iti intero a lubong.

Dagiti Disaster Relief Committee ken boluntario ket makumikom a nangipaay kadagiti pangsaranay nga abasto. Dagiti madagdagus a kasapulan ket taraon, danum, ken gas. Inyurnos pay dagiti relief committee ti pannakaipatulod dagiti nagduduma ti kadakkelna a kawes para kadagiti  naapektaran a kongregasion. Dagiti lugar a pagtataripnongan ket temporario a nausar a pakaikabilan dagiti naka-hanger a kawes ken adda met dagiti naiplastar a pagsarmingan.

Anian a yaman dagiti nadidigra a kakabsat ta impaay ni Jehova dagiti pisikal ken emosional a kasapulanda! Nangnangruna a napabilegda kadagiti Nakristianuan a gimong. “Nakatulong dagiti gimong tapno maaddaanak iti talna ti panunot,” insurat ti maysa a kabsat iti nadidigra a lugar. “Dagita ti mangipapaay iti naespirituan a bilegko.”

Mangted-namnama a Mensahe. Alisto dagiti Hapon a kakabsat a mangiranud iti makaliwliwa a mensahe ti Sao ti Dios kadagiti nadidigra a kaarrubada. Iti maysa a siudad a saan a nadidigra, adda grupo dagiti agibumbunannag a napan nangasaba iti lansangan nga adda awitda a dakkel a karatula, “Apay nga Adda Dagiti Kasta a Didigra? Sungbatan dayta ti Biblia.” Adu ti naginteres, ket nakaipaima dagiti kakabsat iti 177 a libro nga Isursuro ti Biblia iti maysa ket kagudua laeng nga aldaw.

Kadagiti nadidigra a lugar, umuna a napan liniwliwa dagiti Saksi dagiti mayad-adalan iti Biblia ken dagiti sarsarungkaranda, sada insaruno dagiti kaarrubada. “Nagsangit ti maysa a bumalay idi imbasak kenkuana ti Mateo 6:34,” kuna ni Akiko. “Agparang a madandanagan unay. Idi inlawlawagko no kasano a makatulong ti Biblia tapno maaddaan iti talna ti panunot, dagus nga immanamong ket nagyaman. Daytoy ti nangpabaro iti apresasionko iti bileg ti Kasuratan a mangtignay iti puspuso dagiti tattao.”

“Nakaad-adu ti relihion,” kinuna ti maysa a lalaki, “ngem dakayo laeng ti immay kadakami, uray iti kastoy a kasasaad.” Kinuna ti sabali pay a lalaki buyogen ti panagraem, “Nakaskasdaaw ta agtultuloykay latta a mangaskasaba kabayatan ti krisis.” Kinuna ti maysa a panglakayen: “Adu ti nagyaman iti isasarungkarmi. Kinunada, ‘Dakayo ti kaunaan a simmarungkar iti pagtaenganmi sipud idi napasamak ti didigra. Umaykayto manen.’”

 BARO A LUBONG A PATARUS ITI 106 A LENGUAHE!

Ti Biernes, Hulio 15, 2011, ket maysa a nakallalagip nga aldaw iti pakasaritaan ti ili ti Dios idiay Latvia ken Lithuania. Iti maysa a palawag a naipangngeg kadagitoy dua a pagilian babaen ti telephone hook-up, impakaammo ni Stephen Lett, a kameng ti Bagi a Manarawidwid, a magun-odanen ti Baro a Lubong a Patarus ti Kristiano a Griego a Kasuratan iti Latvian ken Lithuanian, a dagitoy ti maika-99 ken maika-100 a lenguahe a nakaipatarusanen ti Biblia. Iti napalabas a pito a tawen, kasta unay ti panangipangpangruna ti Bagi a Manarawidwid iti pannakaipatarus ti Biblia. Kas resultana, ti Baro a Lubong a Patarus ket maipabpablaak itan kadagiti lenguahe a mamindua nga ad-adu ngem idi 2004, ken agtultuloy ti naanep a panagtrabaho dagiti managipatarus iti intero a lubong tapno maipatarus ti Biblia iti ad-adu pay a lenguahe.

Siempre, dagiti kakabsat sigagagar nga inawatda ti Biblia iti mismo a lenguaheda. “Napateg ti maaddaan iti Biblia,” kinuna ti maysa a kabsat idiay Central African Republic, “ngem ti kapatgan ket maawatam dayta iti nakayanakam  a pagsasao. Ti Baro a Lubong a Patarus iti lenguahe a Sango ket talaga a danonenna ti puso. Idi binasak dagiti Ebanghelio, mailadawak itan iti panunotko dagiti tattao a salsalaysayen ti Biblia ken maawatakon ti rikriknada.” Maysa nga agtutubo a kabsat a babai a taga-Ethiopia ti nangyebkas iti rikna ti kaaduan idi kinunana: “Saan nga umdas ti panangibagak iti ‘pagyamanan’ tapno mayebkasko ti apresasionko. Kanayon idi nga ikarkararagko nga ipaayannakami ni Jehova iti Baro a Lubong a Patarus iti mismo a lenguahemi. Ita, impaaynan dayta kaniak!”

 DAMDAMAG MANIPUD ITI INTERO A LUBONG

Napaulimek ti Maysa a Maton Idiay Russia. Ni Vera ket maysa a baket a nabayagen a rirriribuken ti maysa a kaarrubana a lalaki. Daytoy a lalaki ket kagurgurana dagiti Saksi ni Jehova. Pinangpangtaan ken pinagsasawanna iti dakes ni Vera iti sango dagiti appokona, a masansan a bumisita kenkuana. Gapu ta sipapanunot ni Vera iti kunaen ti Roma 12:18, nagtalinaed a kalmado ken saan a nakisubsubang kenkuana. Idi Enero 2011, kimmaro ti kinauyong dayta a kaarrubana. Gapu ta agpeggaden ti biagna, kinontak ni Vera ti maysa a polis. Makapainteres ta idi Marso 2010, simmarungkar daytoy a polis iti balay ni Vera a kaduana ti maysa nga opisial iti ili tapno kitaenda no adda ekstremista nga aktibidad nga ar-aramiden ni Vera ken ti dadduma pay a Saksi nga agtataripnong iti balayna. Ngem iti daytoy a gundaway, nakita ti polis no ania a talaga ti parikut. Inungtanna ti kaarruba ken minultana iti 3,000 rubles (agarup $100 U.S.) gapu kadagiti pangtana. Kalpasan dayta, awanen ti parikut ni Vera iti kaarrubana. Kas panangipakita iti panagyamanna, nagsurat ni Vera tapno agyaman iti departamento ti polisia. Nasdaaw ta nakaawat iti subalit manipud iti hepe ti polisia. Nagyaman ken ni Vera gapu iti nasayaat a komentona maipapan iti polis a timmulong kenkuana. Innayon pay ti hepe: “Ipakita dagiti komentom nga agtalekka kadakami, nupay negatibo ti panangmatmat ti kaaduan a tattao kadakami a polis.” Kuna ni Vera a kanayonen a mapmapan ti polis iti pagtaenganna tapno siguraduenna a nasayaat ti kasasaadna.

 Ti “Basurero” Idiay Turkey. Timmabuno iti kombension distrito ti dua a lallaki a nabiit pay a makipagad-adal iti Biblia. Insuratda: “Kasla di nakappapati. Nakaisem, mannakigayyem, ken nadayaw ti isuamin. Bayat ti pangngaldaw, nagpagnapagnakami iti aglawlaw a saanmi a narikna a bisitakami laeng. Kalpasanna, inasitgannakami ti kabsat a mangyad-adal kadakami iti Biblia. Adda iggemna a supot a pagibasuraan. Liklikanmi koma gapu ta impagarupmi nga agkolkolekta iti basura ti trabahona, ket saanmi a kayat ti maibilang a gayyem ti maysa a nanumo a basurero. Gapuna, pinanawanmi ket pinadasmi nga ilemmengan. Napanunotmi, ‘Apay a makipagad-adalkami iti Biblia iti maysa a basurero imbes nga iti maysa kadagiti agpalpalawag iti plataporma?’

“Ngem bayat nga intultuloymi ti nagadal, naammuanmi a ti ‘basurero’ a mangyad-adal kadakami ket kameng ti Komite ti Sanga ken agserserbi iti sanga nga opisina dagiti Saksi ni Jehova. Intultuloymi ti rimmang-ay ket indedikarmi ti biagmi ken Jehova. Naawatanmi a dayta a kabsat ket sipapakumbaba nga agtigtignay kas “maysa a nanumnumo.” (Luc. 9:48) Apresiarenmi unay ti nakapatpateg a leksion a naadalmi iti dayta a dakkel a taripnong a damo a tinabunuanmi!”

Dagiti Pammadakes Idiay Armenia. Maysa a nasaknap a kampania a mangpardaya kadagiti Saksi ni Jehova ti nangrugi iti media kalpasan a siuulbod a naipadamag a Saksi ni Jehova ti maysa nga agkabannuag a lalaki a nangpapatay kadagiti nagannakna iti siudad ti Sevan. Tapno mailinteg dayta, maysa a panangilawlawag ti dagus a naiwaras kadagiti media. Ngem nagtultuloy latta ti panangpardaya, ket maysa nga espesial a report ti naipabuya iti telebision a mangipetpetteng a ti lalaki ket maysa a Saksi ni Jehova. Makasair ken makainsulto dagiti sasao nga inusarda maibusor kadagiti Saksi ni Jehova, ket maysa a kapsion bayat ti programa ti mabasa a kastoy, “Dagiti  Naulpit ken Awanan Prinsipio a Manangpapatay ni Jehova.” Pinaregtana pay dagiti agbuybuya a dangranda dagiti Saksi no sumarungkarda. Kas resultana, limmanlan ti ibubusor kadagiti Saksi ni Jehova iti pagilian. Maysa a darum ti naidatag maibusor iti estasion ti telebision, a mangikalkalikagum nga ibabawida ti pammadakesda, agpadispensarda, ken agbayadda iti panangdadaelda iti nasayaat a nagan ken reputasiontayo. Idi mayimprenta daytoy a 2012 Tinawen a Libro, saan pay nga imbabawi ti estasion ti telebision ti pammadakesda, nupay madama idi ti negosasion tapno maareglo dayta.

Masanguanan nga Inheniero iti Venezuela. Maysa a grupo dagiti ubbing ti binigat a lumabas iti lugar a pakaibangbangonan ti Kingdom Hall no mapanda agbasa iti Kindergarten iti ili ti San José de Guaribe. Kanayon nga agsardeng ken agbuyada biit, a maay-ayatanda iti amin a makitkitada. Maysa nga aldaw iti klase, sinaludsod ti maestrada no ania ti kayatdanto inton dumakkelda. Nasdaaw ta saan laeng a maysa no di ket sumagmamano ti simmungbat a kayatda ti agbalin nga “inheniero a kas kadagiti Saksi ni Jehova”! Gapu ta kayatda a maammuan no apay, inkeddengna ken ti maysa pay a maestra nga ipasiar ti intero a klase iti lugar a pagibangbangonan. Idi nakagtengda, maysa a trabahador ti nangipasiar kadakuada. Napalalo ti ragsak dagiti ubbing, nangruna idi pinagkallugongda ida kadagiti namaris a hard hat. Adu ti saludsod dagiti maestra, ket naipaayanda iti nasayaat a panangsaksi.

 Agyim-imprentan ti Canada iti Ad-adu Pay a Magasin. Tapno mausar a naimbag dagiti donasion, kiniddaw ti Bagi a Manarawidwid iti sanga nga opisina ti Canada a suplayanda iti Pagwanawanan ken Agriingkayo! dagiti amin a kongregasion idiay Bermuda, Guyana, Canada, United States, ken ti kaaduan nga isla iti Caribbean. Gapuna, idi rugrugi ti 2011 a tawen serbisio, sangapulo ket dua a daras nga ad-adun ti magasin nga ipabpablaak ti sanga nga opisina ti Canada. Agyim-imprenta itan ti Canada kadagiti magasin iti 30 a lenguahe, a dandani kakapat iti amin a magasin a mapatpataud iti intero a lubong.

Nayawis iti Publiko ti Panagpasiar iti Sanga Idiay Finland. Iti pammalubos ti Bagi a Manarawidwid, naorganisar ti maysa nga espesial a kampania, a nangitampok iti maipapan kadagiti Saksi ni Jehova ken iti mensahe nga iwarwaragawagda idiay Finland iti sangagasuten a tawen. Sireregta nga inwaras dagiti kakabsat ti magasin nga Agriingkayo! nga Agosto 2010, a nangitampok kadagiti serye a “Dagiti Saksi ni Jehova​—Siasinoda?” Nagresulta dayta iti adu a nasayaat a panagsasarita maipapan iti trabahotayo. Kalpasanna, iti ngudo ti Agosto, inyurnos dagiti kakabsat a mayawis iti publiko ti panagpasiar iti sanga nga opisina. Nakipaset ti intero a pamilia ti Bethel iti panangilawlawag iti trabaho a maar-aramid sadiay. Nangiplastarda kadagiti eksibit tapno mayam-ammo kadagiti bisita ti maipapan iti trabahotayo. Nagisuot pay ti dadduma a Bethelite iti nagkauna a kawes ken indemostrada no kasano a nausar dagiti sandwich-sign iti panangyawis kadagiti palawag publiko idi dekada 1940 ken 1950. Nangisagana met ti sumagmamano a departamento kadagiti babassit a sobenir para kadagiti bisita. Agarup 1,500 ti napan bimmisita. Kalpasan dayta, nagsayaat ti impadamag dagiti pagiwarnak, radio, ken telebision maipapan kadagiti aktibidadtayo.

Riribuk Idiay Côte d’Ivoire. Ti 2011 a tawen serbisio ket nangrugi buyogen ti kinapositibo ken panangnamnama iti ad-adda pay a panagrang-ay, kas ipakita ti 23,019 a panagadal  iti Biblia nga ikonkondukta ti 8,656 nga agibumbunannag. Ngem iti arinunos ti Nobiembre 2010, nagbalin a nariribuk ti pagilian gapu iti eleksion. Nagresulta dayta iti gubat a dimmanon iti kabesera ti komersio idiay Abidjan iti Marso ken nagtultuloy agingga iti Abril 2011, isu nga adu a sibilian ti pimmanaw iti siudad ken iti pagilian. Karaman kadakuada ti adu a kapammatiantayo, a nangpanaw kadagiti balay ken sansanikuada ket nagnagnada a nagtalaw.

Kabayatan daytoy a narigat a kasasaad, ti neutral a takder dagiti kakabsattayo ket masansan a nagserbi a proteksion. Adda naminsan a simrek dagiti soldado iti eskuelaan ti elementaria bayat a mangsemseminar dagiti mannursuro ken mamalbalakad. Naibilin iti isuamin nga agpaklebda ket iyawatda ti amin a napateg nga ik-ikutanda. Idi inyawat kadakuada ti maysa a kabsat ti bagna a naglaon kadagiti publikasiontayo, dagus a nabigbig dagiti soldado nga isu ket Saksi ni Jehova. Insublida ti bagna kasta met ti kuarta ken ti selponna, a kunkunada: “Saankayo a pangta kadakami.”

 PAKAIDAYAWAN TI DIOS TI PANNAKAIDEDIKAR DAGITI SANGA NGA OPISINA

Idi Disiembre 18, 2006, nangrugi a napalawa ti sanga nga opisina ti Chile tapno manayonan iti baro a pagopisinaan a pasdek a dua ti kadsaaranna, maysa a pagnaedan a tallo ti kadsaaranna, ken napalawa a bodega. Idi Oktubre 16, 2010, adda 5,501 a timmabuno iti programa ti dedikasion, a ti nagpalawag iti Espaniol ket ni David Splane a kameng ti Bagi a Manarawidwid.

Idi Pebrero 19, 2011, agdagup iti 210 ti timmabuno iti pannakaidedikar ti napalawa a country office idiay Burkina Faso. Ti palawag ti dedikasion ket impaay ni John Kikot, manipud iti sangalubongan a hedkuarter. Ti trabaho a panangasaba iti daytoy a pagilian ket tartarawidwidan ti sanga nga opisina iti Côte d’Ivoire agingga idi Mayo 2011,  idi a ti Burkina Faso ket tartarawidwidanen ti sanga nga opisina ti Benin. Ti nasayaat a kababalin a naipakita iti lugar a pagibangonan ket nakaited iti dakkel a pakaidayawan ti nagan ni Jehova. “Awan ti agbugbugkaw,” kinuna ti maysa nga empleado ti dakkel a kompania a mangipapaay kadagiti suplay. “Dimi pay napadpadasan ti makipagtrabaho iti proyekto ti panagibangon nga addaan kadagiti kalmado ken naragsak a tattao a kas kadakayo.”

Kasta unay ti ragsak dagiti kakabsat idi naidedikar dagiti baro a pasilidad iti sanga nga opisina ti Hong Kong idi Agosto 27, 2011. Dagiti baro nga opisina ket adda iti maika-19 a kadsaaran ti 37 ti kadsaaranna a pasdek a manipud iti dayta, matannawagan ti Victoria Harbor. (Kitaem ti arrow iti baba.) Impaay ni Stephen Lett, a kameng ti Bagi a Manarawidwid, ti palawag ti dedikasion. Siraragsak nga inimdengan dayta ti 290 a kakabsat nga adda iti dining room, kadagiti opisina, ken iti shipping department. Ti baro nga opisina ket para iti departamento ti Translation, Service, Audio/Video, Purchasing, Shipping, ken Accounting.

 REPORT MAINAIG KADAGITI KASO

Adda naimbag a rason ti matalek a propeta a ni Jeremias nga agtalek nga isu ket saanto a pulos baybay-an ti Mannakabalin-amin a Dios. “Pudno unay a makirupakdanto kenka,” kinuna ni Jehova, “ngem saandanto nga agballigi kenka. Ta addaak kenka, tapno isalakanka ken tapno ispalenka.” (Jer. 15:20) Kas ipakita dagiti sumaganad a report, tultulongan met ni Jehova dagiti moderno-aldaw nga ad-adipenna bayat nga itungtungpalda ti annongenda a mangasaba iti laksid ti ibubusor.​—Mat. 24:9; 28:19, 20.

Armenia Ni Vahan Bayatyan, a maysa a Saksi ni Jehova, ket nasentensiaan a maibalud iti dua ket kagudua a tawen gapu iti panagkedkedna nga agsoldado maigapu iti konsiensiana. Kalpasan a naabak kadagiti kaso ken panagapelarna kadagiti korte iti Armenia, ti kasona ket dinengngeg ti European Court of Human Rights (ECHR). Idi Oktubre 27, 2009, pito kadagiti hues ti ECHR ti nangyetnag iti desision maibusor ken Kabsat Bayatyan a pabor iti Armenia. Ngem maysa a hues ti saan nga immanamong gapu ta ti desision ti Korte ket “saan a maitunos kadagiti agdama a pagalagadan iti Europa mainaig iti isyu ti panagkedked maigapu iti konsiensia.” Gapu iti kinapateg daytoy nga isyu, immanamong ngarud ti ECHR a maidatag daytoy a kaso iti Grand Chamber, a buklen ti 17 a hues.

 Idi Hulio 7, 2011, babaen ti butos a 16 kontra maysa, inkeddeng ti Grand Chamber a buklen ti 17 a hues, a sinalungasing ti Armenia ti kalintegan ken wayawaya ni Kabsat Bayatyan nga agbiag maitunos iti konsiensiana. Nakita ti Korte a “ti panagkedked ti aplikante nga agsoldado ket nalawag a maigapu iti narelihiosuan a patpatienna, a sipapasnek nga an-annurotenna ken maikontra unay iti obligasionna a mangitungpal iti serbisiona iti militar.” Daytoy a nakapatpateg a desision ket manamnama nga agbanag iti pannakawayawayanto dagiti 69 a kakabsat a naibalud idiay Armenia, agraman dagiti kakabsat a maipaspasango iti umasping nga isyu idiay Azerbaijan ken Turkey. *

Bulgaria Idi Abril 17, 2011, nasurok a 100 a tattao, a pakaibilangan ti babbai, ubbing, ken natataengan, ti sitatalna a mangramrambak iti Memorial ti ipapatay ni Kristo iti maysa a Kingdom Hall idiay Burgas idi a maysa a grupo dagiti managderraaw a buklen ti agarup 60 a lallaki ti immay ket inuborda iti dadakkel a batbato dagiti Saksi nga agtaktakder iti pagserkan. Kalpasanna, pinadasda ti  sumrek iti Kingdom Hall, ngem linapdan ida dagiti kakabsat. Dagus nga inawaganda dagiti polis, ngem nabuntog ti panagresponde dagitoy. Adu a Saksi ti nasugatan, ket lima ti impan ti ambulansia idiay ospital. Iti laksid dayta nga iraraut, intuloy latta ti kongregasion ti panangrambakda iti Memorial. Dayta a di gagangay nga iraraut ket nagbanag iti positibo a publisidad gapu ta kadawyanna a mararaem dagiti Saksi ni Jehova idiay Bulgaria. Iti panangiwanwan ti Bagi a Manarawidwid, 13 a sanga nga opisina ti nangidatag iti reklamo kadagiti embahada ti Bulgaria kadagiti pagilianda mainaig iti dayta nga iraraut. Sipud idin, ti gobierno ti Bulgaria kinondenarna dayta nga iraraut ken nangidatag ti lokal a prosecutor iti kaso maibusor iti walo kadagiti rimmaut.

South Korea Nasurok a 800 a Saksi ni Jehova ti nakabalud pay laeng idiay South Korea kas resulta ti panagkedkedda nga agsoldado maigapu iti konsiensiada a naibatay iti narelihiosuan a patpatienda. Sipud 1950, nasuroken a 16,000 a Saksi ni Jehova ti nasentensiaan a maibalud iti nasurok a 31,000 a tawen gapu iti panagkedkedda nga agserbi iti militar. Apay a nagadu nga agkabannuag a lallaki ti nangikeddeng a di agkompromiso?

Tunggal agkabannuag a lalaki nga agkedked nga agserbi iti militar ket mangaramid iti personal a desision a naibatay iti konsiensiana. Kas pagarigan, inlawlawag ni Kim Ji-Gwan iti pannakabistana: “Naallukoy unay ti riknak kadagiti isursuro ti Biblia a dagiti tattao ‘saandanto a sursuruenen ti pannakigubat’ ken ‘ayatenda ti padada a tao a kas iti bagida.’ Naadalko met a ti naprinsipiuan nga ayat ti mangtignay kadatayo a mangayat kadagiti kabusortayo. Maibatay kadagitoy ken iti dadduma pay a kasuratan ken kas resulta ti natibker a personal a patpatiek, nagdesisionak a saan nga agsoldado.”​—Isa. 2:4; Mat. 5:43, 44; 22:36-39.

 Iti agdama, dagiti agkabannuag a lallaki idiay South Korea ket awanan iti pagpilian nga agserbida koma laengen iti komunidad. Tapno marisut dayta a problema, sangapulo a kaso ti nayapelar iti Constitutional Court ti Korea. Idi Nobiembre 11, 2010, inusig ti korte dagiti argumento, a ti maysa kadagita ket no maibilang a panaglabsing iti kalintegan dagiti umili ti Korea ti kaawan ti alternatibo nga urnos para kadagiti agkedked nga agsoldado gapu iti konsiensiada.

Kabayatanna, idi Marso 24, 2011, inkeddeng ti United Nations Human Rights Committee (UNHRC) a linabsing ti South Korea dagiti pagalagadan mainaig kadagiti kalintegan ti tao a mabigbigbig iti intero a lubong. Napasamak dayta idi impaibalud ti South Korea ti 100 a Saksi ni Jehova a nagkedked nga agsoldado gapu iti konsiensiada. (Nagapelar dagitoy a 100 a kakabsat iti UNHRC gapu iti pannakaibaludda.) Kanayonanna, ti desision ti Grand Chamber ti ECHR (kitaem ti report ti Armenia iti panid 34-35) a pabor ken ni Kabsat Bayatyan ket naisumite iti Constitutional Court ti Korea tapno mausig bayat a maur-uray ti desision kadagiti sangapulo a napagkaykaysa a kaso. Kaskasdi, ti Constitutional Court dina pulos sinurot dagiti desision ti UNHRC ta idi Agosto 30, 2011, impaulogna ti Military Service Law ken ti agtultuloy a pannakaibalud dagiti agkedked nga agsoldado maigapu iti konsiensiada. Yantangay nakitada a ti Military Service Law ket maikontra iti panangbigbig ti konstitusion iti wayawaya a mangsurot iti konsiensia, dua kadagiti siam a hues ti saan nga immanamong iti desision ket sinuportaranda ti pannakaadda ti alternatibo a panagserbi iti komunidad.

Turkey Idi Hulio 31, 2007, naragsakan dagiti kakabsattayo iti daytoy a pagilian gapu ta addaandan iti legal a pannakabigbig kas maysa a relihion. Nupay adda  pay laeng dagiti parikut mainaig iti neutralidad ken iti pannakaaramat dagiti Kingdom Hall, agtultuloy ti teokratiko nga irarang-ay iti daytoy a pagilian. Idi Abril 26, 2011, ti Ministry of National Education for the Turkish Republic ket nangipaulog iti pammilin a mangibagbaga a ‘saanen nga inkapilitan a tumabuno dagiti Saksi ni Jehova kadagiti klase iti eskuelaan mainaig iti relihion.’ Inlawlawag ti Ministry a “dagiti Saksi ni Jehova ket maysa a Kristiano a relihion, nupay saanda nga awaten ti dadduma a gagangay a patpatien ti Kristianidad.” Dayta a desision ket makaparagsak kadagiti agtutubotayo a naikkan iti nababa a grado iti naglabas a tawtawen gapu ta saanda a timmabuno kadagiti klase mainaig iti relihion.

United States Idi Mayo 2011, nangipaulog ti Kansas Court of Appeals iti paborable a desision iti kaso a Mary D. Stinemetz v. Kansas Health Policy Authority. Inkeddeng ti korte a ti panagkedked ti estado a mangipalubos  iti pannakaopera ni Kabsat Stinemetz nga awan ti mausar a dara ket panaglabsing kadagiti kalinteganna kas sagudayen ti konstitusion ti estado ken federal law. Gapu ta ti kayat ti kabsat a kita ti operasion a di agusar iti dara ket saan a maar-aramid idiay Kansas, imbilin ti korte iti estado nga ipalubosna a maoperaan ti kabsat iti sabali nga estado. Daytoy ket saan laeng a panagbiktoria ni Kabsat Stinemetz no di ket pagimbagan met dagiti dadduma pay nga agibumbunannag idiay Estados Unidos nga ipapaayan ti gobierno iti libre a pannakaagas.

Idi Agosto 10, 2011, inyetnag ti Korte Suprema ti Kansas ti desision a mangipapaay ken ni Monica McGlory, maysa a Saksi ni Jehova, iti kalintegan a mangaywan iti anakna. Ilablaban ti ama nga isu ti makinkalintegan a mangaywan iti anakda gapu ta (1) saan a kayat ti ina a mayalisonan ti anakda iti dara, (2) itugtugotna ti anakda iti panangasaba iti binalaybalay, ken (3) iyad-adayona kano ti anakda iti amana ken iti komunidad babaen ti panangisursurona iti anakda maipapan iti Armageddon.

Kastoy ti kinuna ti Korte Suprema ti Kansas kas panangpatalgedna kadagiti pagalagadan ti konstitusion a naipasdeken idi 1957: “Masapul a kanayon a maannurot ti narelihiosuan a wayawaya, kas ipanamnama ti konstitusiontayo, ken dagiti narelihiosuan a banag a maisursuro kadagiti ubbing rumbeng ken masapul a saan a maibilang a pagibatayan iti panangibilin no siasino ti mangaywan iti ubing.” No maipapan iti isyu ti panangyalison iti dara, kinuna ti korte: “Saanmi a mabalin a desisionan dagiti kaso [mainaig iti no siasino ti mangaywan iti ubing] maibatay kadagiti di pay napasamak nga aksidente wenno panagsakit a mabalin nga agkalikagumto [iti panangyalison iti dara].”

France Maragsakan unay dagiti kakabsat idi Hunio 30, 2011, idi nagdesision ti ECHR pabor iti Association  of Jehovah’s Witnesses of France. Daytoy ti nagnguduan ti 16 a tawen a kaso a nangrugi iti panangikalikagum ti gobierno iti nakangatngato ken di nainkalintegan nga 60 porsiento a buis kadagiti donasion a maaw-awat ti sanga nga opisina. Kadagiti amin a kangrunaan a relihion idiay France, dagiti laeng Saksi ti nakalikaguman nga agbuis iti kasta kadakkel. Ti gobierno ti France inobligarna dagiti Saksi ni Jehova nga agbayad iti pakadagupan a 58 milion a euro (nasurok a $82,000,000 U.S.), kantidad a dakdakkel nga amang ngem kadagiti sanikua ti Association. Kalpasan nga inanamongan dagiti korte iti France dayta a kadakkel ti buis, nayapelar ti kaso iti ECHR idi Pebrero 2005.

Idi Hunio 30, 2011, sangsangkamaysa a kinuna dagiti pito a hues ti ECHR a no anamonganda dayta a tignay ti France, kaawatan a laplapdan ti France ti wayawaya dagiti Saksi ni Jehova a mangalagad iti relihionda. Pinasingkedan ti Korte a dagiti proteksion a sagudayen ti European Convention on Human Rights ket agaplikar kadagiti Saksi ni Jehova. Daytoy a desision ket makatulongto iti adunto pay pay a kaso iti pananggun-od iti wayawaya ti panagdayaw iti dadduma pay a pagilian a masakupan ti ECHR, kas iti Armenia, Bulgaria, Georgia, ken Russia. Ti maysa pay a nakapatpateg a banag ket ti pannakaikeddeng iti kaunaan a gundaway a ti gobierno ti France ket nagbasol iti panangsalungasing iti sagudayen ti European Convention mainaig iti wayawaya ti relihion. Saanen a nagapelar ti gobierno ti France.

Russia Idi Huniov 10, 2010, nangabak dagiti Saksi ni Jehova iti kaso iti ECHR a Jehovah’s Witnesses of Moscow v. Russia. Maysa dayta a nakallalagip a legal a panagbiktoria dagiti Saksi maibusor iti gobierno ti Russia. Ti gobierno ti Russia ket nagapelar iti Grand Chamber ti Korte a buklen ti 17 a hues, ngem idi Disiembre 13, 2010, saan  a pinatgan ti Grand Chamber ti kalikagum ti gobierno, isu a nagbalin a pinal ti desision ti Korte idi Hunio 10. Sigun iti dayta a desision, ti gobierno ti Russia ket “addaan iti legal nga obligasion . . . a mangpasardeng iti panaglabsing a naammuan ti Korte ken mangatur kadagiti epekto dayta a panaglabsing agingga iti mabalin.” Ngem agingga ita, saan pay nga impatungpal ti gobierno dayta a desision. Imbes ketdi, ad-adda itan ti panangriribuk ken panaglappedda iti wayawaya dagiti Saksi a mangalagad iti pammatida.

Kas pagarigan, idi parbangon ti Agosto 25, 2011, rinaut dagiti polis ti 19 a balbalay dagiti kakabsat iti siudad ti Taganrog ket kinompiskarda dagiti literatura, kompiuter, ken rekord ti kongregasion. Dagita nga iraraut ket agparang nga imbatayda iti immun-una a desision ti Russian Federation Supreme Court a pannakarippuog ti lokal a narelihiosuan nga organisasion idiay Taganrog ken pannakaideklara ti 34 kadagiti publikasiontayo kas extremist. Maibasar kadagiti desision dagiti korte ti Russia, inraman  ti gobierno ti 63 kadagiti publikasiontayo iti Federal List of Extremist Materials.

Malaksid iti dayta, nagbalin a biktima dagiti kakabsattayo iti di kumurang a 950 nga iraraut, panangdangran, panangarestar, ken panangibalud dagiti polis. Nangidatag dagiti autoridad ti gobierno iti 11 a kriminal a kaso maibusor kadagiti kakabsattayo, ken adu a Kingdom Hall ti inggagara a dinadaelda. Nangikabil pay dagiti autoridad iti surveillance camera iti pagtaengan ti maysa a pamilia ken alikamen a mangmonitor iti komunikasion iti telepono ken e-mail ti adu pay a kakabsat iti panggep a makaimbentoda iti kriminal a kaso a pangidarumanda kadagiti kakabsat iti sidong ti anti-extremism law.

Maysa kadagiti inim-imbentoda a pammabasol ket maibusor iti 35-anyos a ni Aleksandr Kalistratov, iti siudad ti Gorno-Altaysk, a naakusaran a “mangisungsungsong iti guranggura wenno panagbibinnusor maigapu iti relihion” iti sidong ti anti-extremism law a nasaknap a kukuestionaran dagiti mangilablaban iti kalintegan ti tao. Bayat dagiti bista, a nagpaut sipud Oktubre 7, 2010 agingga idi Marso 18, 2011, awan kadagiti napalutpot a 71 a testigo ti nakapaneknek iti aniaman a krimen nga inaramid​—wenno panggep man laeng nga aramiden​—ni Aleksandr. Inusig a naimbag ti korte dagiti literatura ken pannursuro dagiti Saksi ni Jehova, ket idi Abril 14, 2011, inkeddeng ti hues nga inosente ni Aleksandr. Ngem ti prosecutor, inyapelarna ti desision, ket idi Mayo 26, 2011, inkeddeng ti Korte Suprema ti Altay Republic a maisubli ti kaso iti nababbaba a korte tapno usigen manen ti sabali a hues. Gapuna, kalpasan a naan-anay a naabsuelto ni Kabsat Kalistratov, interamente manen a nabista ti kasona a mabalin nga agbanag iti di umiso a pannakasentensiana kas extremist.

Siempre, nagdinamag ti trabahotayo iti dayta a bassit a siudad ti Gorno-Altaysk gapu iti kasta a kaso a  mainaig iti maipagarup a napeggad nga aramid. Komusta dagiti Saksi iti dayta a lugar, nga agpegpeggad met maidarum?

“Bayat dayta a narigat a kasasaad, ad-adda a tinagipategmi ti Biblia,” kuna ti kabsat a ni Inna. “Ad-adda nga imbilangko a kapamiliak dagiti kakabsat, ken mariknak a nasingsingedak itan ken Jehova!” Nupay naiparit ti sumagmamano kadagiti publikasiontayo, adu ti narugian a panagadal a Biblia laeng ti mausar. Ti bilang dagiti agibumbunannag idiay Altay Republic ket rimmang-ay iti 24 a porsiento. Ngimmato iti 33 a porsiento nga oras ti nabusbos dagiti Saksi iti ministerio. Ti bilang dagiti timmabuno iti Memorial ket 16 a porsiento a nangatngato ngem idi napan a tawen ken mamindua nga ad-adu ngem iti bilang dagiti agibumbunannag iti intero a pagilian!

Kabayatanna, nangidatag dagiti Saksi ni Jehova idiay Russia iti 13 a baro nga aplikasion iti ECHR maibusor iti gobierno ti Russia. Maysa kadagiti aplikasion ti mangkukuestion iti desision ti Korte Suprema idi Disiembre 8, 2009, ken sabali pay ti mangkukuestion iti desision ti Korte Suprema idiay Altay Republic a nangideklara nga extremist ti 18 kadagiti publikasiontayo.

[Footnote]

[Blurb iti panid 14]

“Adda a naisurat kadagiti Mammadto, ‘Ket sursuruanto amin ida ni Jehova.’”

[Blurb iti panid 25]

“Saan nga umdas ti panangibagak iti ‘pagyamanan’ tapno mayebkasko ti apresasionko”

[Kahon iti panid 12]

Dagiti Komentoda Maipapan iti Panag-auxiliary Pioneer:

• “Iti damo a gundaway iti biagko, nakapagserbiak kas auxiliary pioneer. Diak ammo no kasanok nga iyebkas ti panagyamanko iti daytoy a naited a gundaway!”

• “Pagyamananmi unay daytoy a baro nga urnos. Naaddaankami iti dakkel a rag-o gapu iti dayta.”

• “Nakallalagip daytoy iti pakasaritaan ti kongregasionmi.”

• “Nakatulong iti talna ken panagkaykaysa ti kongregasion ti nagadu a nag-auxiliary pioneer.”

• “Asideg sa nga agpayson ti Armageddon!”​—Saan a Saksi a nakadlaw iti kinaoku- pado dagiti Saksi iti ministe- rio idi Abril.

[Kahon iti panid 43]

‘AGDIR-IDA A SIRARAG-O’

KUMARKARO ti nakaay-ay-ay a kasasaad ti lubong nga iturturayan ti makapungpungtot a ni Satanas. (Apoc. 12:12) Naiduma unay dagiti ad-adipen ni Jehova ta ‘agdir-ida a sirarag-o gapu iti nasayaat a kasasaad ti puso.’ (Isa. 65:13, 14) Aginggat’ mabalin, awan sarday nga aw-awisenda ti adu a tattao tapno agdayawda iti pudno a Dios, ta pagaammoda nga “amin dagidiay agkamang ken [Jehova] agrag-odanto; agingga iti tiempo a di nakedngan agdir-idanto a sirarag-o.”​—Sal. 5:11.

 [Tsart/Graphs iti panid 26]

(Para iti aktual a pannakaurnosna, kitaem ti publikasion)

MAGUN-ODANEN ITI 106 A LENGUAHE

Kompleto a Baro a Lubong Kristiano a Griego

a Patarus: 62 a Kasuratan: 44

Afrikaans American Sign Language

Albanian Amharic

Arabic Azerbaijani

Armenian Azerbaijani (Cyrillic)

Bulgarian Brazilian Sign Language

Cebuano Cambodian

Chichewa Chitonga

Chinese (Simplified) Colombian Sign Language

Chinese (Traditional) Estonian

Cibemba Ewe

Croatian Fijian

Czech Gun

Danish Haitian Creole

Dutch Hiligaynon

Efik Hindi

English Hiri Motu

Finnish Italian Sign Language

French Kannada

Georgian Kazakh

German Kikaonde

Greek Kiribati

Hungarian Latvian

Igbo Lithuanian

Iloko Luganda

Indonesian Luvale

Italian Malayalam

Japanese Mexican Sign Language

Kinyarwanda Myanmar

Kirghiz Nepali

Kirundi Pangasinan

Korean Papiamento (Curaçao)

Lingala Punjabi

Macedonian Russian Sign Language

Malagasy Sango

Maltese Silozi

Norwegian Sranantongo

Ossetian Tamil

Polish Thai

Portuguese Tok Pisin

Romanian Tongan

Russian Tumbuka

Samoan Ukrainian

Sepedi Uzbek

Serbian Vietnamese

Serbian (Roman)

Sesotho

Shona

Sinhala

Slovak

Slovenian

Spanish

Swahili

Swedish

Tagalog

Tsonga

Tswana

Turkish

Twi (Akuapem)

Twi (Asante)

Xhosa

Yoruba

Zulu

[Graphs]

◀ 76% ◁ 24%

[Ladawan iti panid 26]

Idi 2011, 76 porsiento iti populasion ti lubong ti addaanen iti “Baro a Lubong a Patarus” (intero wenno sumagmamano laeng a pasetna) iti nakayanakanda a pagsasao

110

100

90

80

70

60

50

40

30

20

10

0

1950 1955 1960 1965 1970 1975 1980 1985 1990 1995 2000 2005 2010

[Graph iti panid 8]

(Para iti aktual a pannakaurnosna, kitaem ti publikasion)

Iti Intero a Lubong, 2,657,377 nga Agibumbunannag ti Nag-auxiliary Pioneer

2.5 (MILION)

2.0

1.5

1.0

0.5

0

2008 2009 2010 2011

[Mapa iti panid 35]

(Para iti aktual a pannakaurnosna, kitaem ti publikasion)

UNITED STATES

FRANCE

BULGARIA

TURKEY

ARMENIA

AZERBAIJAN

RUSSIA

SOUTH KOREA

[Ladawan iti panid 6]

Ngato: Iti pagtaengan ni Jeanette ti pangyadalan dagiti payunir ken agibumbunannag kadagiti iyad-adalanda iti Biblia. (Kitaem ti  panid 8-9)

[Ladawan iti panid 7]

Grupo dagiti regular ken auxiliary pioneer idiay Madrid, Spain a mapan mangasaba

[Ladawan iti panid 10]

Kaskasabaan ni Toshi ti maysa a para-aywan iti nursing home

[Ladawan iti panid 11]

Ni Alejandro ken ni tatangna idiay Sant Celoni, Barcelona, Spain, iti maudi nga aldaw ti bulan

[Ladawan iti panid 13]

Watchtower Educational Center idiay Patterson, New York, U.S.A.

[Ladawan iti panid 18]

Kingdom Hall idiay Rikuzentakata, Japan

 [Ladawan iti panid 22]

Ngato: Dagiti boluntario a mangiruruar kadagiti rugit manipud iti balay ti maysa a kabsat idiay Shibata, Miyagi

[Ladawan iti panid 22]

Kannigid: Kameng ti Komite ti Sanga nga agpalpalawag iti balay ti maysa a kabsat idiay Rikuzentakata

[Ladawan iti panid 22]

Baba: Mangisagsagana dagiti boluntario iti pangngaldaw dagiti tumabuno iti aldaw ti espesial nga asamblea iti nadidigra a lugar

[Ladawan iti panid 24]

Lithuanian ken Latvian a patarus

[Dagiti Ladawan iti panid 31]

Pakalaglagipan a tanda iti Yankee Stadium, New York, U.S.A.

[Ladawan iti panid 32]

Dagiti trabahador iti panangibangon iti opisina ti Burkina Faso

[Ladawan iti panid 32]

Opisina ti Burkina Faso

[Ladawan iti panid 32]

Sanga nga opisina ti Chile

[Dagiti Ladawan iti panid 33]

Dagiti baro a pasilidad ti sanga nga opisina ti Hong Kong

[Ladawan iti panid 34]

European Court of Human Rights, Strasbourg, France

[Dagiti Ladawan iti panid 38]

Dagiti estudiante a mangig-iggem kadagiti report card-da iti eskuelaan. Maragragsakanda gapu iti saandan a pannakairaman iti klase mainaig iti relihion

[Ladawan iti panid 41]

Dagiti Saksi a mangaskasaba idiay Gorno-Altaysk, Republic of Altay