Sangalubongan a Panangasaba ken Panangisuro

IDI un-unana, iti maysa a naimpadtuan a sirmata, adda nakita ni apostol Juan a dakkel ken di mabilang a bunggoy “manipud kadagiti amin a nasion ken kadagiti tribu ken kadagiti ili ken kadagiti pagsasao.” Nadakamat a nalasatanda ti “dakkel a rigat” nga agturong iti baro a lubong ti Dios. (Apoc. 7:9, 14) Dagiti bilang ken kapkapadasan kadagiti sumaganad a panid ipakitana a saan laeng a maur-urnong ti dakkel a bunggoy no di ket dumakdakkel pay ti bilangna. Saan kadi a makatulong daytoy a mangpabileg iti pammatiyo iti kinasigurado dagiti kari ni Jehova?

 AFRICA

PAGILIAN 57

POPULASION 949,533,064

AGIBUMBUNANNAG 1,267,314

PANANGYADAL ITI BIBLIA 2,819,310

NALIWLIWA GAPU ITI MAYSA A SURAT. Idiay South Africa, sursuratan ni Iris dagidiay natayan iti ipatpateg tapno liwliwaenna ida. Iragpinna kadagiti suratna dagiti polieto nga Asidegen nga Agpatingga ti Amin a Panagsagaba! ken Aniat’ Namnama Kadagiti Ing-ingungoten a Natayen? Iti nabiit pay, nagsubalit ti maysa a lalaki nga agnagan Sidney, a natayan iti asawa kalpasan ti 38 a tawen a naragsak a panagdennada. Insuratna: “Nupay impakpakauna kaniak dagiti doktor a saanen nga agbayag ti ing-ingungotek nga asawa, nakasasaem latta ti ipupusayna. Naburiboran ken nasaktanak unay. Agyamanak iti Apo ta adda dagiti tattao a kas kenka. Apresiarek unay ti panangipapaaymo iti panawen ken panangikagumaam a mangilawlawag kadagiti karkari ti Dios kadagiti tattao a dimo pulos am-ammo. Malaglagipkonto ti ebkas ti pammatim bayat ti panangdaerko iti pakarigatan. Idi nabasak ti surat ken dagiti polieto nga impatulodmo, dayta ti damo a gundaway a nakariknaak iti kinatalinaay ken naawatak ti bambanag.”

NALIKLIKAN TI ABORSION. Ni Gloria, maysa nga agtutubo a kabsat idiay Benin, ket madama a mangaskasaba idi aguni ti selpon ti kaskasabaanna nga estudiante ti unibersidad a ni Arnaud. Nagpakada ni Arnaud ta agpatpatulong ti immawag a gayyemna. Dagus a nangala ni Gloria iti magasin iti bagna, sa inyawatna dayta ken ni Arnaud. Innala ni Arnaud sa pimmanaw a dina kinitkita no ania ti linaon dayta.

 Isu gayam a nagtelepono ti gayyem ni Arnaud tapno ipakaammona a masikog ti nobiana ket planona a piliten nga agparegreg. Bayat ti ipapanna iti gayyemna, kinita ni Arnaud ti magasin. “Kasla diak patien idi mabasak ti sao nga ‘aborsion’ iti akkub ti magasin,” kinunana idi agangay. Ti naipaima ni Gloria ket ti Hunio 2009 nga Agriingkayo! a nangitampok iti serye nga “Aborsion​—Apay a Kontrobersial?” Idi mabasa dayta ti gayyem ni Arnaud, saandan nga intuloy nga iparegreg ti sikog. Idi agangay, nangipasngay ti nobiana iti maysa a nakapimpintas a maladaga.

SAAN A RUMBENG A PAGBUTNGAN DAGITI MANGKUKULAM. Ni King, a regular pioneer, ket immakar iti maysa a lugar idiay Zimbabwe nga addaan dakdakkel a panagkasapulan. Bayat a mangaskasaba a kaduana ti sumagmamano a kakabsat a babbai, immasideg iti balay ti agdindinamag a mangkukulam. Nupay bumdeng dagiti kakaduana a makisarita iti mangkukulam, inkeddeng ni King a kasarita ken itukonan iti panagadal iti Biblia. Idi mapasungadan ida ti mangkukulam, impagarupna nga umayda agpatulong kenkuana isu a dinamagna no ania ti kasapulanda. Impakita ni King ti libro nga Ania a Talaga ti Isursuro ti Biblia? ket intukonna ti panagadal iti Biblia. Immannugot a mayadalan. Kinuna ni King: “Nasdaawkami ta nagadu ti saludsodna. Gapuna, inyurnosmi a sarungkaran ken iyadalan.” Kalpasan ti tallo a lawas, inawisda a makigimong, ket timmabuno. Dinadaelna amin nga us-usarenna iti espiritismo ket alisto a rimmang-ay iti naespirituan. Isu ket nabautisaran kalpasan ti sumagmamano a bulan.

 “IKARARAGYO MAN TA SARUNGKARANDAK!” Sangapulo a tawen ti napalabasen, inkeddeng ni Patrick ti umakar idiay Estados Unidos manipud Angola. Ngem pasaray teleponuanna ni Felicidade a nanangna, a maysa a Saksi. Di nagbayag, makitadan ti maysa ken maysa babaen ti Internet video call. Bayat ti panagsaritada, nadlaw ni Patrick nga adda kadua ni nanangna iti balay ket sinaludsodna no siasino dayta. Insungbat ni Felicidade: “Kakongregasionko. Immaynak binisita.”

Kinuna ni Patrick: “Apay ngata nga awan ti sumarsarungkar kaniak a Saksi? Sangapulo a tawenkon ditoy, ngem dida pay pulos im-immay. Ikararagyo man ta sarungkarandak!”

Nasdaaw da Felicidade ken ti kabsat a babai a kaduana ket kinunada kenkuana: “Bay-am ta ikararagmi dayta.”

Kalpasan ti tallo laeng nga aldaw, nagtuktok iti ruangan ni Patrick ti maysa a Saksi ni Jehova. Kasta unay ti siddaaw ni Patrick isu a sinaludsodna ken nanangna no isu ti nangyurnos iti isasarungkar kenkuana ti maysa a kabsat idiay Estados Unidos. Kinuna ni nanangna a saan, isu nga imbilangna a ti isasarungkar ket sungbat ti Dios. Isu ket nagpayadal iti Biblia ken dagus a nangrugi a makigimong. Idi makitana manen ni nanangna babaen ti video call, siraragsak nga impakitana ti kapitulo ti libro nga Isursuro ti Biblia nga ad-adalenna. Imbagana pay a gimmatang iti amerikana a pakigimongna.

 NASDAAWDA ITI KIDDAWNA A PANAGPABAUTISAR. Iti umuna nga aldaw ti 2010 a kombension distrito idiay Brazzaville, Republic of the Congo, kinuna ti agtutubo nga agnagan Edvard a kayatna ti agpabautisar. Idi maisaludsod no ania ti kongregasionna, insungbatna: “Mossaka.” Yantangay awan ti Saksi iti dayta nga adayo a purok, pinampanunot dagiti kakabsat no ania ti nangtignay kenkuana nga agpabautisar.

Inlawlawag ni Edvard kadagiti panglakayen a bayat ti kaaddana idiay Brazzaville idi 2007, inyadalan ni apongna  a lakay iti broshur a Kalikaguman ket napagadalandan ti 14 a kapitulo ti libro nga Isursuro ti Biblia. Kalpasanna, immakar ni Edvard idiay Mossaka tapno makipagnaed kadagiti nagannakna. Yantangay awan ti aktibo a Saksi sadiay, kiniddaw ni Edvard ken ni tatangna a tulonganna a mangadal iti nabatbati a paset ti libro nga Isursuro ti Biblia. Ni tatangna ti mangibasa kadagiti saludsod, ket ni Edvard ti agsungbat. Nalpas nga inadal ni Edvard ti libro iti kasta a pamay-an. Idi agangay, nariknana a kasapulan nga isurona met iti sabsabali ti naammuanna a kinapudno. Gapuna, idi Oktubre 2009, nangrugi a nangasaba a bukbukodna idiay Mossaka nga inusarna ti broshur a Kalikaguman. Insuratna ti oras a nabusbosna iti ministerio ken regular nga impatulodna dagiti reportna ken ni apongna idiay Brazzaville. Ngem dagiti reportna ket saan nga in-inted ni apongna iti kongregasion.

Idi agangay, adda dagiti temporario nga special pioneer nga imbaon ti sanga nga opisina nga agserbi idiay Mossaka iti tallo a bulan, ngem awan ti ammoda maipapan ken Edvard. Dua laengen nga aldaw sakbay a pumanawda sadiay, ni Daniel, a maysa kadagiti temporario nga special pioneer, nakitana ni Edvard a mangyad-adal iti Biblia nga us-usarenna ti broshur nga Ania ti Kalikaguman ti Dios Kadatayo? Gapuna, immasideg ni Daniel ken ni Edvard ket kinasaritana. Kinuna kenkuana ni Edvard: “Mangaskasabaak. Maysaak nga agibumbunannag. Saludsodenyo ken tatangko.” Kinasarita ni Daniel ti tatang ni Edvard, ket napatalgedan ti imbaga ni Edvard. Dagiti temporario nga special pioneer ginundawayanda ti nabatbati a tiempoda a mangsanay ken Edvard iti ministerio. Idi nakapanawdan, intultuloy ni Edvard ti nangasaba buyogen ti napabaro a regta, a mangikonkondukta iti nasurok a sangapulo a panagadal iti Biblia. Indedikarna metten ti biagna ken Jehova.

Babaen kadagita nga impormasion, iti Biernes ti kombension kas immunan a nadakamat, dua a panglakayen ti nakisarita ken Edvard ket inrepasoda kenkuana dagiti saludsod para kadagiti agtarigagay nga agbalin a di bautisado  nga agibumbunannag. Nasdaawda kadagiti ekselente a sungbatna. Naammuan dagiti panglakayen kadagiti special pioneer a mapagulidanan ti kababalin ni Edvard ken siam a bulanen a mangaskasaba nupay saan pay a naanamongan nga agibumbunannag. Gapuna, naanamongan kas di bautisado nga agibumbunannag. Yantangay adda kombension distrito iti lenguahe a Lingala a maangay iti sumaganad a ngudo ti lawas, inyurnos dagiti panglakayen a dagiti saludsod para kadagiti agpabautisar ket mairepaso ken Edvard sakbay dayta a kombension. Napaneknekanna a naawatanna a nalaing ti kinapudno ket nabautisaran iti Lingala a kombension idi Hulio 2010. Eksakto a makalawas kalpasan a naanamongan kas di bautisado nga agibumbunannag, inyanunsio dagiti panglakayen a ni Edvard ket maysan a bautisado a kabsat.

Kalpasan ti bautismona, nagserbi ni Edvard kas auxiliary pioneer iti dua a bulan idiay Brazzaville. Inyurnos dagiti panglakayen a mayadalan ni Edvard iti libro nga “Agtalinaedka iti Ayat ti Dios.” Kalpasan dayta, nagsubli idiay Mossaka. Maysa nga special pioneer ti nabiit pay a naibaon nga agserbi iti dayta a teritoria. Iti Abril, nagkaduada ken ni Edvard, nga auxiliary pioneer idin, a nangabrasa iti 182 nga interesado a timmabuno iti Memorial. Addaan ni Edvard iti 16 nga iyad-adalan iti Biblia, 7 kadagitoy ti tumabtabuno kadagiti gimong, nga idadauluan dagiti dua a kakabsat. Agtawen laeng ni Edvard iti 15 idi 2011.

 DAGITI PAGILIAN TI AMERICA

PAGILIAN 55

POPULASION 941,265,091

AGIBUMBUNANNAG 3,780,288

PANANGYADAL ITI BIBLIA 4,139,793

“SAAN A NAIPARNA LAENG A NAITALMEGKO TI NUMEROM.” Ni Sundie, maysa a kabsat idiay Estados Unidos, ket adda iti pagtaenganna idi naguni ti telepono. Saan nga am-ammo ni Sundie ti tao a sapsapulen ti babai a timmawag. Kinuna ni Sundie a baka sabali a numero ti natalmeganna. Kinuna ti immawag nga isu ket bulsek isu nga agkamali no dadduma. Inlawlawag ti babai a kayatna a makasao ti barona ta adda pakaburiboranna a kayatna nga ibaga kenkuana. Naduktalan ngamin dagiti doktor nga adda kanserna. Malmaldaangan ti babai ket inyebkasna ti pannakaupayna ta impalubos ti Dios a mapasamak dayta kenkuana. Napanunot ni Sundie a masapul nga iranudna iti daytoy a babai ti mensahe ti Biblia. Kalpasan ti apagbiit a panagkararagna tapno maaddaan iti tured, inranud ni Sundie ti sumagmamano a makaparegta a teksto a mangipaay iti liwliwa ken namnama. Inlawlawagna nga adda nagan ti Dios ken pinaregtana ti babai a mangusar iti dayta a nagan no agkararag ken espesipiko koma iti kararagna. Nagyaman ti babai gapu iti panagimdeng ken pammaregta ni Sundie. “Panagkunak, saan a naiparna laeng a naitalmegko ti numerom,” kinunana.

Kalpasan a naginnalada iti numero ken adres, nangibuson ni Sundie iti audio recording ti libro nga Isursuro ti Biblia ken inyurnosna nga adda payunir a kalugaran ti babai a mangsarungkar kenkuana. Kinuna ni Sundie, “Agyamyamanak ta siaayat a sansanayennatayo ni Jehova a mangliwliwa  kadagiti tattao a maipaspasango iti nagduduma a kasasaad.”

NASUNGBATAN TI POLIETO TI SALUDSODDA. Adda kakabsat a babbai a regular a mangaskasaba iti lansangan iti nalawa nga ospital idiay Puerto Rico. Maysa kadakuada ti immasideg iti dua a lallaki nga agdardaras a mapan iti maysa kadagiti ospital. Gapu ta agdardarasda, intukonna kadakuada ti polieto nga Addaanka Aya iti Imortal nga Espiritu? Manmano nga itukonna dayta a polieto iti lansangan, ngem naiparna a dayta laeng ti kakaisuna nga awitna. Kalpasanna, inasitgan ti dua a lallaki ti sabali a kabsat ket inlawlawagda a nakaawatda iti polieto idi mapanda sarungkaran ti kameng ti pamiliada a nakaro ti sakitna. Pagsarsaritaanda no agtultuloy ngata nga agbiag ti espiritu kalpasan ti ipapatay, ket ti polieto ti nakasungbat iti saludsodda. Imbagada a dakkel ti naitulong dayta kadakuada.

SURAT PARA KEN JEHOVA. Idiay Estados Unidos, ages-eskuela ti agtawen iti pito a ni Joshua. Bayat ti Disiembre, imbilin ti maestra nga agaramid ni Joshua ken dagiti kaklasena iti maysa a surat para ken Santa Claus. Idi siraraem a nagkedked ni Joshua, kinuna ti mannursuro, “Agsuratka ngarud iti uray siasino.” Napanunotna ti agsurat ken Jehova. “Agyamanak iti karim a paraiso,” insurat ni Joshua. “Agyamanak ta addaanka iti Anak, nga agnagan Jesus, a nangipaay iti biagna. Agyamanak ta pinarsuam dagiti bambanag a mangparparagsak kadakami. Ay-ayatenka, Dios a Jehova.”  Naipablaak iti pagiwarnak dayta a surat, agraman dagiti surat ti dadduma pay nga estudiante.

NAGINTERES TI PAMILIA. Ni Alejandro ket maysa a kabsat idiay Colombia. Kayatna a kasabaan dagiti kameng ti pamiliana ngem adayo ti pagnanaedanda. Gapuna, sinuratan ken pinatulodanna ida iti sumagmamano a Pagwanawanan ken Agriingkayo! Idi binasa ti kabagianna a ni Pablo dagiti magasin ken kinitana dagiti teksto ti Biblia, nabigbigna a palso dagiti sursuro ti Iglesia Katolika. Gapu iti gagarna, inranudna ti impormasion kadagiti kameng ti pamiliana, ket nabigbigda met ti kinapudno isu a nagikkatda a Katoliko.

Di nagbayag, 15 a kameng ti pamiliana ti nangrugi nga agtataripnong iti kada rabii tapno pagadalanda ti Biblia  nga usarenda dagiti magasin. Gapu ta kayatda nga ad-adu pay ti maammuanda, sinapulda dagiti Saksi kadagiti kabangibang nga ili, ngem awan ti nabirokanda. Kabayatanna, inranudda kadagiti kaarrubada dagiti banag a naadalda. Idi agangay, naammuanda nga adda Kingdom Hall iti maysa nga ili nga agarup 80 a kilometro ti kaadayona. Dagus a napanda sadiay ket nagkiddawda iti tulong.

Ita, maysa a regular pioneer ti linawas a mapmapan mangyadal iti grupo a buklen ti 26 nga indibidual, a pakaibilangan ti pamilia ni Alejandro ken ti 11 a dadduma pay nga interesado. Nangarkilada iti lugan tapno makatabuno ti kaaduan kadakuada iti Miting Publiko ken Panagadal iti Pagwanawanan.

TALAGA KADI A NAGKAMALIDA ITI NAPANAN A BALAY? Maysa nga aldaw, nagsakit ti maysa a kabsat a babai isu a kiniddawna iti dadduma a Saksi nga isuda pay laeng ti mapan iti iyad-adalanna iti Biblia iti maysa nga away idiay Ecuador a ti lenguaheda ket Quichua. Saan a masigurado dagitoy a kakabsat no sadino ti pagnanaedan ti pamilia ngem nagsaludsodda iti maysa a bumalay no ti pamiliada ti mayad-adalan iti Biblia. Sibabara a pinastrekda ida dagiti bumalay, a kasla ket tay pinadpadaananda ida. Idi laengen nalpas ti panagadal a nadlaw dagiti kakabsat a saan pay gayam a nayad-adalan dayta a pamilia! Maragsakan la gayam ti pamilia a maaddaan iti panagadal iti Biblia isu a kasla siguden a mayad-adalanda. Gapuna, addan baro a panagadal iti Biblia a maikonkondukta, ken ti iyad-adalan ti kabsat a babai a dida nasarakan iti dayta nga aldaw ket agtultuloy met a makipagad-adal.

NAKASABAAN GAPU ITI CUPCAKE. Agtawen iti innem ni Caleb. Iti umuna nga aldaw ti panageskuela idiay Canada, agkasangay ti maysa kadagiti kaklasena, isu a nangyeg ti ina kadagiti cupcake para iti klase. Siraraem a nagkedked ni Caleb. Gapuna, isu ket inasitgan ti ina a ni Natalie tapno damagenna no adda allergy-na iti makan. “Awan,”  kinuna ni Caleb, Inlawlawagna no apay a saan a nangan iti cupcake: “Agserserbiak ngamin ken Jehova.”

Kalpasan ti klase, inasitgan ni Natalie ti ina ni Caleb ket dinamagna, “Saksikayo kadi?” Idi kinunana a wen, naragsakan ni Natalie gapu ta nakipagad-adal gayam kadagiti Saksi idi tin-edyer pay. Ngem insardengna ti nakipagadal gapu iti nakaro nga ibubusor ti pamiliana. Idi naisaludsod no kayatna nga ituloy ti agadal iti Biblia, immanamong ni Natalie.

SAAN A PAGAYATAN TI DIOS DAYTA. Maysa a tuleng ni Laly, nga agnanaed idiay Peru. Idi dinamagna ken nanangna no apay a tuleng isuna, kinuna ni nanangna a pagayatan ti Dios dayta. Dayta ti namagleddaang ken ni Laly ket kaguranan ti Dios. ‘Apay a kastoy ti inaramidna kaniak?’ napanunotna.

Iti panaglabas dagiti tawen, nakiasawa ni Laly iti padana a tuleng. Ti inauna nga anakda ket addaan iti Down syndrome. Maburiboran ken maup-upay ni Laly, isu nga inasitganna manen ni nanangna tapno agpatulong, ket insaludsodna, “Apay a kastoy ti anakko?” Imbaon ni nanangna a mapan iti padi. Kas iti immunan a sungbat ni nanangna, kinuna ti padi, “Pagayatan ti Dios dayta.”

Gapu ta desperadon, kinuna ni Laly: “Apay a nakaul-ulpit ti Dios? Maawatko a tulengak ken pannusa ti Dios dayta, ngem apay a dusdusaenna ti anakko? Ania koma ti basolna ket kayan-anakna laeng?” Sipud idin, saannan a kayat ti dumngeg maipapan iti Dios ket saannan a kayat ti makimisa.

 Kalpasan ti sumagmamano a tawen, simmarungkar ti maysa a makapagsenias a Saksi ni Jehova ket intukonna ken Laly nga iyadalanna iti Biblia. Nagkedked ket kinunana a saan a mamati iti Dios. Siaanus nga inlawlawag ti kabsat a Jehova ti nagan ti Dios a dina kayat a maam-ammo ken sidadaan dayta a Dios a mangipaayto kenkuana iti gundaway a makangngeg ken makapagsao. Nupay agduadua, kiniddaw ni Laly iti kabsat a paneknekanna ti imbagana. Linuktan ti kabsat ti Biblia ket imbasana ti Isaias 35:5: “Maluktanto ti matmata dagidiay bulsek, ket maluktanto ti mismo a laplapayag dagidiay tuleng.” Nasdaaw ni Laly, ket immannugot a mayadalan iti Biblia ken rimmang-ay agingga a nabautisaran. Tumabtabunon kadagiti amin a gimong a kaduana ti anakna, a nakasursuro metten nga agsenias. Dumakdakkel ti apresasion ni Laly kadagiti kari ti Biblia, ken agserserbi itan kas regular pioneer.

 ASIA KEN TI MAKINTENGNGA A DAYA

PAGILIAN 47

POPULASION 4,194,127,075

AGIBUMBUNANNAG 664,650

PANANGYADAL ITI BIBLIA 629,729

DUA A SALUDSOD A DIDA MASUNGBATAN. Iti maysa a pagilian iti Asia a sadiay maiparit ti trabahotayo, maysa nga agkabannuag a lalaki nga agtawen iti 24 ti immannugot a makipagadal iti Biblia tapno paneknekanna nga ulbod ti isursuro dagiti Saksi ken umiso ti patpatien dagiti Katoliko. Ngem di nagbayag, nabigbigna a dagiti Saksi ni Jehova ti mangisursuro iti kinapudno.

Idi naammuan ti pamiliana nga isu ket agad-adal iti Biblia, pinaayabanda tapno agtataripnongda kas pamilia ket pinilitda nga agsubli a Katoliko. Gapu ta nagkedked, inummong ti pamiliana ti amin a kakabagianda iti purok tapno pilitenda a mangtallikud iti baro a pammatina. Kinabkabilda ngem saan a nagkompromiso. Kalpasanna, isu ket inreport ti pamiliana iti padi, a nangidatag kenkuana iti sanguanan ti konsilio ti paroko. Kinuna ti agkabannuag iti sango ti konsilio nga agsubli laeng iti simbaan no masungbatan ti padi ti dua a saludsodna: Ania ti nagan ti Dios? Apay nga ipalubos ti simbaan a mangan dagiti miembrona iti dara idinto ta iparit dayta ti Biblia? Gapu ta saanna a masungbatan ti aniaman kadagiti saludsod, tinungpa ti padi daytoy nga agkabannuag  a lalaki tapno kano “mapaksiat ti demonio a limmugan kenkuana.”

Kalpasan dayta a taripnong, ti pamilia daytoy a lalaki inummongda ti amin a gagayyemda tapno pilitenda nga agparintumeng iti imahen ni Maria. Kinabkabilda manen, ngem saan latta a nagkompromiso. Gapuna, inyurnos ti pamiliana nga adda napintas a balasang a mangibaga a makiasawa kenkuana no agsubli a Katoliko. Kinuna ti agkabannuag a lalaki nga isu ket agsubli a Katoliko no masungbatan ti balasang ti dua nga insaludsodna iti padi. Pimmanaw ti balasang ket saanen a nagsubli. Kamaudiananna, kalpasan ti pito a bulan a saanda a panangpalubos kenkuana a pumanaw iti purokda, naglibas a nagsubli iti siudad sana sinapul dagiti kakabsat. Maysa a bulan kalpasanna, nagbalin a di bautisado nga agibumbunannag. Nabautisaran iti maysa nga asamblea sirkito idi Marso 2011.

OPISIAL ITI PAGBALUDAN INDEPENSANA TI KABSAT A BABAI. Idiay South Korea, maysa nga ina a regular pioneer ti bimmisita iti anakna a naibalud gapu iti Nakristianuan a neutralidad. Bayat ti kaaddana iti siled a pagurayan, inikkanna iti polieto ti maysa a lalaki a nakatugawna. Binugkawan ti lalaki, a kunkunana, “Apay aya nga uray iti daytoy a lugar ket mangaskasabakayo, dakayo a kameng ti palso a relihion?” Nakigtot dagiti 30 wenno 40 a bisita nga adda iti pagurayan. Gapu iti dayta, ti opisial iti pagbaludan inungtanna ti lalaki, a kunkunana: “Ti laeng relihion dagitoy a tattao ti pudno. Isuaminen a relihion ket palso. Adu a tawen a pinalpaliiwko dagitoy a tattao bayat ti panagtrabahok iti daytoy a pagbaludan, ket nabigbigko nga isuda laeng ti mangal-alagad iti isursuroda.” Saan a nakatagari ti abusado a lalaki.

SURSURAT ITI DIDING. Idi mangrugi ni Harindra a makipagadal iti Biblia, sangapulo a tawenen nga agsolsolo nga agbibiag. Agtartrabaho ngamin iti dakkel a siudad idiay Nepal  tapno masuportaranna ti pamiliana nga adda iti probinsia. Gapu ta dina ammo ti agbasa ken agsurat, ti broshur a Tagiragsakenyo ti Biag nga Agnanayon Ditoy Daga! ti inusar ti Saksi a mangiyadal kenkuana. Gapu ta saan pay idi a naipatarus dayta iti Nepali, Ingles a kopia ti inusarda. Maysa nga aldaw, isu ket sinarungkaran ni baketna a naggapu iti probinsia. Nasdaaw ni baketna idi makitana nga Ingles a broshur ti ad-adalen ni lakayna. Saan metten nga agin-inum ken saannan a kabkabilen ni baketna. Idi naammuan ni baketna a maigapu amin dayta iti panagadal ni Harindra iti Biblia, nakipagadal met iti Biblia ken makigimgimong payen iti probinsiada. Tarigagayan ni Harindra a maammuan ti ad-adu pay maipapan ken Jehova, isu nga inkeddengna ti agsursuro nga agbasa ken agsurat. Kiniddawna iti mangyad-adal kenkuana nga isuratna dagiti Nepali a letra iti papel, sana impigket dagita kadagiti diding ti siledna agingga nga awanen ti pagipigketan. Kalpasanna, prinaktisna a basaen dagiti amin a baro a sasao ken letra agingga nga in-inut a nasursurona ti agbasa. Idi agangay, inawisna ti pamiliana a makipagnaed kenkuana iti siudad tapno sangsangkamaysada nga agdaydayaw ken Jehova. Isu ket nabautisaran iti uneg ti dua a tawen. Ita, ni Harindra ken ti pamiliana ket sangsangkamaysadan a makigimgimong ket agpaspaseten ni Harindra iti panagbasa ti Biblia iti Teokratiko nga Eskuelaan iti Panagministro. Kunana: “Dakkel ti nagbalbaliwan ti biagmi gapu iti edukasion nga impaay ni Jehova.”

NAGKEDKEDANNA TI $200,000. Ni Zarkhanum, nga agnanaed idiay Azerbaijan, ket naigamer iti espiritismo. Iti 15 a tawen, isu ket pagaammo nga addaan iti extrasensory perception ken kabaelanna ti agipadles. Patien pay dagiti tattao nga adda pannakabalinna a mangpaimbag ken mangikkat iti gamud. Nalatak ni Zarkhanum, ket adu kadagiti klientena a nangangato nga opisial ken dagiti assawada ti agbaybayad iti $2,000 agingga iti $4,000 (U.S.) iti tunggal panagpatulongda kenkuana tapno makasaritada dagiti  natay. Dayta ti bimmaknanganna. Nupay addaan iti pannakabalin, isu ket mabisbisinan iti naespirituan, ket adu a salsaludsod ti mangburburibor kenkuana. Nagsinada iti asawana, ket awan direksion ti biagna. Maysa nga aldaw, bayat nga iyeb-ebkasna iti Dios dagiti pakariribukanna, adda nagtuktok. Linuktanna ti ridaw, ket dua a kakabsat a babbai ti nangasaba kenkuana. Natignay ni Zarkhanum iti imbagada maipapan iti panangay-ayo iti Dios saan laeng nga iti sao no di ket iti aramid. Adu a tattao ti am-ammona a relihioso ngem saan a nadiosan ti ar-aramidda. Ammona met a basol ti pannakiuman kadagiti dakes nga espiritu. Immannugot ngarud a makipagadal iti Biblia. Idi agangay, us-usarennan ti nagan a Jehova iti kararagna ken napaneknekanna a masungsungbatan dagiti kararagna. Ngem marigatan a mangisardeng iti espiritismo ta kanayon a riribuken dagiti demonio ken dangdangranda pay. Kamaudiananna, iti tulong ni Jehova, nakaruk-at met laeng iti impluensia dagiti demonio ken dinadaelna ti adu a ramramitna a nainaig iti espiritismo ken palso a relihion.

Di nagbayag, nagbalin ni Zarkhanum a naregta nga agibumbunannag ti naimbag a damag ken nabautisaran idi Mayo 2011. Dagus a nag-auxiliary pioneer ket saan a narigatan a nangragpat iti makalikaguman nga oras gapu ta sakbay pay a nabautisaran, 70 nga oras ti busbusbosennan a mangasaba iti kada bulan iti laksid ti nakapuy a salun-atna. Dua a bulan sakbay ti bautismona, $200,000 (U.S.) ti naitukon kenkuana tapno paimbagenna ti nagamud nga asawa ti opisial ti gobierno. Patien ti babai nga adda nanggamud kenkuana isu nga agsaksakit, a nakaigapuan ti pannakaputed ti gurongna. Imbes nga awaten ni Zarkhanum dayta a tukon, nangibaon ketdi iti dua a Saksi a mapan iti ospital tapno kasabaanda daytoy a babai. Sireregta a kinaskasabaan ni Zarkhanum dagiti dati a klientena, nga ibagbagana kadakuada a saan a makaay-ayo iti Dios dagiti ar-aramidenna idi. Kas resultana, daydiay  mismo a nangyam-ammo kenkuana iti asawa ti opisial ti gobierno ket makipagad-adalen iti Biblia ken makigimgimong payen.

PANANGASABA ITI PAGBALUDAN. Idiay India, naarestar ti dua a kakabsat a babbai gapu iti panangasabada ket napatawanda iti lima nga aldaw a pannakaibalud. Insalaysay ti maysa kadakuada: “Idi naibaludkami, sinaludsod dagiti polis no ania ti makagapu, ket dayta ti nangted kadakami iti gundaway a mangasaba kadakuada. Yantangay naarestarkami bayat a mangaskasabakami, adu ti awitmi a magasin ken polieto. Kinasabaanmi ti isuamin ket adu ti naipaimami a literatura. Nagpinnaregtakami iti kaduak, nagkarkararagkami, ken binasbasami dagiti awitmi a publikasion.

“Idi agangay, nayakarkami iti sabali a pagbaludan iti siudad. Dagus a dinamag dagiti preso no apay a naibaludkami. Ginundawayanmi dayta a mangipakaammo no ania ti ikaskasabami ken mangyam-ammo ti bagimi kas Saksi ni Jehova. Nangngeg ti babai a warden ti ibagbagami ket kinunana, ‘Naibaludkayo gapu iti panangasabayo idiay ruar, kaskasdi a mangaskasabakayo latta ditoy uneg!’” Ikagkagumaan  ita dagitoy a kakabsattayo a sarungkaran dagiti balud a naginteres iti kinapudno.

NADLAW TI MAYSA A POLIS TI AYATDA. Idiay Bethlehem, agsagsagana ti dua a kakabsat a babbai a mapan mangasaba kadagiti babassit a paglakuan. Pagammuan ta adda dua a babbai nga immasideg ket maragragsakan a sinaludsodda iti Espaniol no Saksida. Dagitoy a babbai ket Saksi a naggapu iti Mexico. Addada idiay Israel tapno agpasiar a kaduada ti maysa a grupo dagiti turista ket nakitada dagiti literatura nga iggem dagiti kakabsat. Nagiinnarakup, nagiinnagep, nagparetratoda, ken nagiinnalada iti adres. Kalpasan dayta, sinublian dagiti Mexicana a kakabsat ti grupoda, ket intuloy dagiti dua a kakabsat ti nangasaba kadagiti paglakuan.

Sumagmamano nga oras kalpasanna, immasideg ti maysa a polis kadagiti mangaskasaba a kakabsat ket sinaludsodna no Espaniolda. Kinuna dagiti kakabsat a saan. Kinuna ti polis a buybuyaenna ida nga uppat ket impagarupna no agkakabagian wenno nabayagdan nga aggagayyem. Inlawlawag dagiti kakabsat nga agpapadada a Saksi ni Jehova ket uray no nagduduma ti pagilian dagiti Saksi ni Jehova wenno uray saanda a dati nga agaammo, kaslada agkakapamilia gapu ta adda ayat iti nagbabaetanda. Masdaaw unay ti polis isu a nangala kadagiti literatura ken sinaludsodna no pakagun-odanna iti ad-adu pay nga impormasion maipapan iti relihionda. Nayurnos ti panagsarungkar.

“BAKA ADDA MAYSA A DUMNGEG SADIAY.” Ni Yusuke ket maysa nga agtutubo a payunir a naitimpuyog iti maysa nga Ingles a grupo idiay Japan. Maysa nga aldaw, naammuanna nga iti sumaganad nga agsapa adda sumanglad a barko a dagiti pasaherona ket aggapu iti nagduduma a pagilian. Sinapsapana ti nagriing ket nupay napigsa ti tudo, nagmaneho iti dua nga oras a napan iti pagsangladan idiay Nagasaki. Uray agtudtudo, nagtakder nga is-isuna iti pantalan, ket  adu a nagdissaag a pasahero ti immasideg kenkuana gapu ta impagarupda no isu ket maysa kadagiti mangiturturong kadagiti pasahero. Dayta ti nangted iti gundaway ken Yusuke a makaipaima iti 70 a magasin ken 50 a broshur iti nagduduma a lenguahe iti kagudua laeng nga oras.

Nagsubli iti luganna tapno mangala iti ad-adu pay a literatura, ket idi addan sadiay, nakitana ti maysa nga agtutubo a pasahero a nakatakder nga agmaymaysa. Idi asitgan ni Yusuke, sinaludsod ti agtutubo iti Ingles: “Maysaka kadi a Saksi ni Jehova?” Idi imbaga ni Yusuke a wen, nagsangit ti agtutubo. Inawis ni Yusuke a mapanda pay laeng iti pagmeriendaan tapno makapagsaritada.

Jason ti nagan ti agtutubo ken agtawen iti 21. Inlawlawagna a naregta a Saksi dagiti nagannakna ken isu ket maysa a di bautisado nga agibumbunannag agingga iti maudi a tawtawen ti kinatin-edyerna. Agarup innem a bulan sakbayna, insardengnan ti makitimpuyog kadagiti Saksi ni Jehova ket naglugan iti barko a mapan iti adu a pagilian iti Asia, ta pagarupenna nga awan ti Saksi iti Asia. Ngem gapu ta nagsakit ti tianna, saan a dimsaag idiay Thailand, Vietnam, ken Taiwan. Idiay Japan ti umuna a dimsaaganna, ket Saksi ni Jehova ti immuna a nakasaritana! Dagus a napanunot  ni Jason a dinanto pulos maitarayan ni Jehova, ket dayta ti makagapu a nakasangit.

Bayat ti panagmeriendada, inlawlawag ni Yusuke ken ni Jason ti sumagmamano a parapo ti libro nga “Ayat ti Dios” tapno maipatalgedna nga isu ket ay-ayaten ni Jehova. Impakpakaasina ken ni Jason a saanna a pampanawan ti organisasion. Ngem ababa laeng ti tiempo a makapagsaritada ta iti dayta a rabii, nagluas ti barko a nagluganan ni Jason a mapan idiay Inchon, South Korea, a sadiay ti plano ni Jason a pagpasiaran iti sumagmamano nga aldaw.

Pinampanunot ni Yusuke no ania pay ti maitulongna ken ni Jason ket nalagipna ti maysa a kabsat a naam-ammona iti internasional a kombension idiay South Korea. Makapagsao iti Ingles ti kabsat ken agnanaed idiay Inchon. Isu a nagtelepono kenkuana ni Yusuke iti dayta a rabii. Siempre, saan nga ammo dayta ni Jason. Idi dumsaag ni Jason iti barko iti simmaganad nga agsapa, nakitana ti dakkel a karatula a “Welcome to Korea, Jason!” nga iggem ti lima nga umis-isem a Saksi.” Saanen nga intuloy ni Jason ti amin a planona nga agpasiar ket nakikadua ketdi kadagiti kakabsat. Kasta unay ti pannakatignayna idi mangngegna ti mismo kapkapadasan dagiti kaedadna nga agtutubo a kakabsat a naibalud gapu iti pammatida. Malaksid iti dayta, nakatabuno pay iti Memorial sadiay.

Nagsubli ni Jason idiay Estados Unidos, nagbalin manen nga aktibo nga agibumbunannag, ken kiniddawna kadagiti panglakayen a mamimpat a mayadalan iti kada lawas. Nairingpasna dagiti libro nga Isursuro ti Biblia ken “Ayat ti Dios” ket nakualipikar a mabautisaran. Nabautisaran ni Jason 107 nga aldaw kalpasan daydi panagsaritada ken Yusuke. Nag-auxiliary pioneer iti simmaganad a bulan.

Malagip ni Yusuke nga iti daydi nalam-ek ken matutudo nga agsapa, napigsa ti pakinakemna a mapan idiay Nagasaki uray no awan ti kaduana. Napanunotna, “Baka adda maysa a dumngeg sadiay.”

 EUROPA

PAGILIAN 47

POPULASION 736,505,919

AGIBUMBUNANNAG 1,589,052

PANAGADAL ITI BIBLIA 843,405

NAKASARAKDA ITI MAYSA A NAKAPATPATEG A BANAG. Ni Ani a taga-Bulgaria ket napan nagtrabaho idiay Holland iti sumagmamano a bulan. Maysa nga aldaw, nagsardeng iti igid ti kalsada gapu ta maup-upay ket inkararagna iti Dios nga adda koma sumarungkar kenkuana a lider iti relihionna. Bayat nga agkarkararag, adda dua a Saksi a babbai a magmagna ket simmardengda iti ayanna tapno kasabaanda. Imbilang ni Ani dayta kas sungbat ti kararagna, isu a dimngeg kadakuada ket rinugiannan ti mapan makigimong. Nupay saanna a maaw-awatan dagiti gimong, nadlawna nga adda ayat dagiti Saksi iti maysa ken maysa. Naidumada unay kadagiti di agtutunos a kapammatianna idiay Bulgaria, isu a nakombinsir a nakasarak iti maysa a nakapatpateg a banag. Idi agsublin ni Ani idiay Bulgaria, inkeddeng ti kabsat a mangyad-adal kenkuana idiay Holland ti sumurot tapno tulonganna ni Ani a mangsapul kadagiti Saksi idiay Sofia. Dayta ti ad-adda pay a nangkombinsir ken ni Ani a nasarakannan ti pudno a relihion.

Di nagbayag, makipagad-adal ken makigimgimongen ni Ani ken ni Ivo a lakayna. Iti panagtultuloy ti panagadalda, adda dagidiay mapan agdengngeg. Maysa kadagitoy ni Assen a pastor ti maysa a relihion. Napan kada Ani ken Ivo tapno paneknekanna nga ulbod dagiti Saksi ni Jehova, ngem di nagbayag, naammuanna a saan nga umiso ti panangmatmatna. Nauneg dagiti saludsodna maipapan iti Biblia. Gapuna, immannugot a mayadalanda a sangapamiliaan  idi maitukon kenkuana ti panagadal. Iti sumagmamano a tiempo, intultuloy ni Assen nga idaulo ti gimong iti relihionna, ngem ti isursuronan ket dagiti kinapudno a maad-adalna iti libro nga Isursuro ti Biblia. Idi agangay, ti diakono iti grupoda a ni Dencho kayatna metten ti agpayadal iti Biblia. Di nagbayag, tallo a pamilia iti dayta a grupo ti makipagad-adal metten iti Biblia. Yantangay nagadu kadakuada ti makipagad-adalen kadagiti Saksi ni Jehova, inkeddengda nga isardengdan ti panagtataripnongda ket nangrugidan a makigimong idiay Kingdom Hall. Nagbalin nga agibumbunannag ni Dencho ket sumagmamano kadagiti gagayyemna ti iyad-adalanna iti Biblia. Gapu iti panangasaba dagiti kakabsat idiay Holland ken ni Ani, agarup 30 a tattao ti makipagad-adalen iti Biblia ken tumabtabunon kadagiti gimong.

IMBASANA LATTAN DAGITI KASURATAN MAIPAPAN ITI PANAGASAWA. Idiay Czech Republic, adda agkabannuag a pagassawaan a taga-Mongolia a mayad-adalan iti Biblia iti Kingdom Hall. Ti agassawa a Saksi a mangyad-adal kadakuada ket marigatan nga agsao iti Mongolian nupay ikagkagumaan dagitoy nga adalen dayta a pagsasao. Ngem agparang nga inawat ti agassawa a taga-Mongolia ti kinapudno iti Biblia buyogen ti kinapakumbaba ken panagan-anus. Iti maysa a rabii, agmaymaysa a simmangpet ti asawa a babai iti gimong. Kinunana nga inrantana a pinanawan ni lakayna gapu ta adda dida nagkinnaawatan. Sumagmamano a minuto kalpasanna, simmangpet ni lakayna, ngem di man la kimmitkita ken baketna. Nabatad a nadagsen ti parikutda. Ti kabsat a lalaki inayabanna ti asawa a lalaki iti libraria ti Kingdom Hall tapno pagsaritaanda ti parikut. Ngem gapu ta marigatan nga agsao iti Mongolian, saanna a maawatan no ania ti napasamak kadakuada nga agassawa ket saanna nga ammo no ania ti ibalakadna. Gapuna, imbasaanna lattan iti Biblia ti asawa a lalaki. Binasana amin a teksto a malagipna maipapan iti panagasawa ken komunikasion. Agparang a natignay ti asawa a lalaki iti tunggal teksto a  naibasa. Pagammuan ta nagdardaras a rimmuar iti libraria, napan ken baketna, sana inagkan. Idi pumanawdan iti Kingdom Hall, impetteng ti asawa a lalaki nga isun ti mangawit iti bag ni baketna gapu ta naadalna a rebbengenna dayta.

Iti simmaganad nga aldaw, kasda la kakaskasar ket siraragsak a nagsarsaritada, nga inyeb-ebkasda ti napalaus a panagyamanda ken ni Jehova ken iti nainsiriban a balakad ti Biblia maipapan iti panagasawa. Idi agangay, nagsublida idiay Mongolia tapno aywananda ti dua nga annakda. Awan kongregasion iti ili a pagnanaedanda. Nabautisaranen ti asawa a babai, ket agtultuloy met a rumangrang-ay ni lakayna nga agturong iti bautismo.

“APAY A KASDIAY TI INARAMIDNA?” Idiay Ukraine, maysa a payunir nga agnagan Olha ti nangasaba iti drayber ti maysa a trak nga agitultulod iti taraon. Insaludsodna iti drayber, “Adda kadi siasinoman a mapagtalkantayo?”

“Awan,” insungbat ti drayber. “Pinanawannak ni baketko ken intugotna ti anakmi nga agtawen iti dua. Ania pay koma ti sapulenna? Igagaedko ti agtrabaho iti inaldaw ken ar-aramidek ti amin para kenkuana. Intedko amin a kayatna​—singsing, boots, kuentas. Ngem apay a kasdiay ti inaramidna?”

Nainggayyeman a sinaludsod ti kabsat no kasano kaadu ti panawenna iti asawa ken anakna. “Kasano koma nga adda panawenko kadakuada ket agtartrabahoak agingga iti tengnga ti rabii? Agsubliak iti trabaho iti alas kuatro ti parbangon. Agtrabahoak pay kadagiti ngudo ti lawas.”

Impakita ni Olha ti Oktubre 2009 nga Agriingkayo! a nangitampok kadagiti espesial a serye dagiti artikulo a “Ti Sekreto Dagiti Naballigi a Pamilia.” Inlawlawagna ti umuna a sekreto, “Dagiti Umiso a Prioridad.” Kalpasan a rinepasoda ti artikulo, agparang a natignay ti lalaki ket kinunana: “Impagarupko a kuarta ti tulbek ti naragsak a pamilia ket saanen a napateg ti dadduma pay a banag. Mautobko itan  a saan gayam a kuarta ti kapatgan. Ammokon no ania ti nagkurangak ken no ania ti kasapulan ni baketko.”

Makalawas kalpasanna, nakasarita manen ni Olha ti drayber. Kinuna ti drayber a nabasanan ti magasin, nagpampanunot, ket inkabilanganna ti adu a bambanag. Tineleponuanna ni baketna, ket nagsinnubliananda. Kalpasanna, inikkan ni Olha ti drayber iti libro a Kinaragsak ti Pamilia. Iti simmaganad a lawas, idi makita ni Olha ti trak, sabalin ti drayberna. Inlawlawag ti baro a drayber a nagikkaten ti dati a drayber ket immakardan a sangapamiliaan iti sabali a lugar. Ngem nangibati ti drayber iti mensahe ken ni Olha: “Agyamanak kenka, Olha, ken iti Diosmo a ni Jehova, gapu ta tinulongandak a mangsalbar iti pamiliak. No addanto maam-ammok manen a Saksi ni Jehova, sigurado nga itultuloyko ti makisarita kadakuada.”

NAGKIDDAW ITI TANDA MANIPUD ITI DIOS. Maysa nga agkabannuag a lalaki idiay Latvia ti naginteres iti mensahe ti Biblia idi kinasabaan dagiti Saksi 15 a tawenen ti napalabas. Sagpaminsan idi a makipagad-adal iti Biblia, ngem gapu ta ibilangna a maysa “laeng” a libro ti Biblia, dina patien a makatulong dayta iti panangsapulna iti Dios. Namnamaenna a ti Dios a mismo ti mangipalgak iti kinasiasinona, nalabit iti namilagruan wenno karkarna a pamay-an. Isu nga insardengna ti makipagadal iti Biblia ket awanen ti nakasarsaritana a Saksi. Sumagmamano a tawen kalpasanna, naipasango iti agtutupatop a parikut, isu a nagkararag a dimmawat iti tulong ti Dios. Ngem awan latta ti  milagro. Idi timman-aw iti tawa, nakitana ti dua a kakabsat a babbai a mangaskasaba. Apaman a nakapagkararag sumagmamano a lawas kalpasan dayta, nakitana manen dagiti isu met laeng a kakabsat a lumablabas. Idi nagkararag manen maysa a lawas kalpasanna, iti maikatlo a gundaway, nakitana manen ida bayat a mangaskasabada. Napanunotna a maysa la ketdi dayta a tanda manipud iti Dios! Nagtaray a rimmuar ket imbagana kadagiti masmasdaaw a kakabsat a kayatna ti makipagadal manen iti Biblia kalpasan ti sumagmamano a tawen manipud idi impaisardengna ti panagadalna. Idi agangay, naaddaan iti bileg a mangsaranget kadagiti parikutna ket simminged iti Dios. Kasano? Babaen ti tulong ti Biblia! Nabautisaran iti kombension distrito idi 2010.

NAGLAPAYAG URAY DAGITI BABASSIT A KASEROLA. Idiay Denmark, kaipapanan dayta a pagsasao a dumdumngeg gayam dagiti ubbing iti saritaan dagiti nataengan. Agarup 16 a tawen ti napalabasen, maysa a kabsat a babai a taga-Denmark ti mangyad-adal iti babai nga addaan tallo nga annak a lallaki. Masansan a kadua daytoy a babai ti amin nga annakna  no mapan agpayadal iti pagtaengan ti agassawa a Saksi. Ngem nagsardeng nga agadal idi agtawen iti walo ti buridek nga anakna a ni Ronnie. Bayat a dumakdakkel ni Ronnie, adu ti mapaspasaranna a pakarigatan. Ngem maysa nga aldaw idi 2008, idi isu ket agtawenen iti 22, nakitana dagiti magasintayo iti pagtaengan ni nanangna ket bigla a nalagipna ti sumarungkar kadagiti Saksi a nangyad-adal kenkuana idi ubing pay. Kalpasan ti 15 a minuto, nag-doorbell iti balay ti agassawa a Saksi. Idi luktan ti asawa a lalaki ti ruangan, basta simrek lattan ni Ronnie. Isu ket saan a dagus a nailasin ti kabsat, ngem idi mabigbigna ni Ronnie, naragsakanda a nagkikita manen. Inikkanda ni Ronnie iti libro nga Isursuro ti Biblia ket immannugot a mayadalan iti Biblia. Nagtultuloy ti panagadalna. Gapu ta naigamer ni Ronnie kadagiti computer game, a dadduma kadagitoy ket mainaig iti okulto ken kinaranggas, masansan a dagita a banag ti sangkasaona. Ngem inlawlawag kenkuana dagiti Saksi a ti pannakaawattayo kadagiti naespirituan a bambanag ket saan koma a maimpluensiaan kadagiti kasta nga ay-ayam. Naawatan dayta ni Ronnie ket kinunana: “Pangngaasiyo ta atipaendak no marugiak a  dakamaten ti maipapan kadagita nga awan mamaayna a bambanag!” Sipud idin, rumangrang-ayen iti naespirituan. Nupay maysa laeng a ‘bassit a naglapayag a kaserola’ idi damo a mangngegna ti kinapudno bayat a mayad-adalan ni nanangna, daytoy nga agkabannuag ket maysa itan a di bautisado nga agibumbunannag.

LIWLIWA MANIPUD ITI KASURATAN. Iti maysa a sementerio idiay Britania, nadlaw ti maysa a kabsat a lalaki ti maysa a lakay a nakaparintumeng nga agsangsangit iti sango ti pantion. Dinamag ti kabsat no mabalinna ti makisarita kenkuana. Immanamong ti lakay nga agnagan iti Alf. Inlawlawagna: “Nabiit pay a natay ti anakko a babai. Agtawen laeng iti 42. Duadan ken baketko a naitanem ditoy.” Kiniddawna iti gobierno nga adda koma sikologo a tumulong kenkuana ngem imbagada kenkuana a masapul nga aguray iti tallo a bulan. “Maysaak a nabaknang a negosiante, ket adu ti negosiok,” kinuna ni Alf, “ngem awan mamaayna ti amin no awan ti pamiliak. Itedko amin a kinabaknangko iti siasinoman a makaisubli iti biag dagiti patpatgek.” Kinuna ni Alf nga adda pammatina iti Dios, raraemenna ti Biblia, ken makimismisa, ngem awan ti nagun-odanna a makapnek a sungbat kadagiti saludsodna. Iti simbaan, idi nagkiddaw iti liwliwa, naibaga nga agsindi iti kandila wenno agsurat sana ibitin iti kayo. “Saan nga umanay ti papel a pangisuratak iti amin a kayatko nga ibaga,” insungbatna. Ni Alf ket liniwliwa ti kabsat babaen ti Kasuratan, ket makipagad-adal itan iti Biblia.

 OCEANIA

PAGILIAN 29

POPULASION 38,162,658

AGIBUMBUNANNAG 94,309

PANANGYADAL ITI BIBLIA 58,465

INAWISDA TI ASAWA TI IYAD-ADALANDA. Impadamag ti maysa a kabsat idiay New Zealand nga idi intulodna ni baketna tapno mangyadal iti maysa nga agkabannuag nga ina, nadlawda nga adda ni lakayna isu nga inawisda a makipagadal. Immannugot ti asawa a lalaki, ket nayurnos nga iyadalandanto iti oras a kaaddana. Immanamongda ken baketna a makigimong iti Domingo, ket sibabara nga inabrasa ida dagiti kakabsat ken natagiragsakda dagiti napagadalan iti gimong. Iti simmaganad a gimong, nagkomento ti asawa a lalaki bayat ti panagadal iti Pagwanawanan. Ti mapagadalan nga artikulo imparegtana ti panagdaydayaw ti pamilia, ket sinaludsodna no ania ti aramidenna tapno maidaulona ti panagadal a kadua ti asawa ken ti baritona nga agtawen iti uppat. Inyebkasna met ti tarigagayna a mangyaplikar iti dadduma a naadalna kadagiti gimong. Intultuloy ti interesado nga agassawa ti makipagadal, makigimong, ken rumang-ay iti naespirituan. “Anian a yamanmi,” kuna ti kabsat a lalaki, “ta inawismi ti asawa a lalaki a makipagadal!”

MEMORIAL ITI ADAYO NGA ISLA. Ti isla a Reao, a 362 laeng ti umilina, ket teritoria ti Vaiete Congregation, maysa kadagiti 18 a kongregasion idiay Tahiti. Ti Reao ket agarup 1,350 a kilometro iti daya ti Tahiti. Saan pay pulos a naang-angay ti Memorial iti daytoy nga adayo nga isla, ket 30 a tawenen a di simmarsarungkar dagiti Saksi iti dayta nga isla. Ni  Manoah, a manangaywan iti serbisio iti Vaiete Congregation, kayatna ti mangorganisar iti bassit a grupo a mapan mangasaba iti dayta nga isla bayat ti lawas ti Memorial sa angayenda ti Memorial sadiay. Ngem ti pleteda ken baketna iti eroplano a mapan idiay Reao ket agarup 65,000 franc ($740 U.S.), ket awan ti kasta a kuartada. Ngem idi agangay, nakaawat ni Manoah iti 65,000 franc a bonusna iti trabaho! Dagus nga imbilangda a bembendisionan ni Jehova ti planoda. Kamaudiananna, pito nga agibumbunannag ti napan idiay Reao, ket 47 ti timmabuno iti Memorial. Babaen ti telepono, dagiti interesado idiay Reao ket iyad-adalan ita dagiti agibumbunannag idiay Tahiti.

AWAN GUNDAWAYNA A MAMMIGAT. Umasping dayta iti kapadasan idiay Vanuatu, a sadiay maysa a kongregasion ti tumultulong iti grupo ti 11 nga agibumbunannag iti adayo nga isla a maawagan Ambrym. Dagiti panglakayen iti kongregasion pinaregtada dagiti aduan kapadasan nga agibumbunannag a tumulong iti dayta a grupo idiay Ambrym iti sumagmamano nga aldaw sakbay ti Memorial. Ginundawayan dayta ni Marinette, maysa nga aduan kapadasan a regular pioneer ken retirado a maestra. Maysa ni Marinette iti sumagmamano a kakabsat a nangikeddeng a mapan tapno makairugi kadagiti baro a panangyadal iti Biblia. Kalpasan ti sumagmamano laeng a tiempo a panangasabana, nasdaaw ni Marinette gapu iti kinaadu dagiti umay agpayadal nga uray la ngangngani imposible ti makapanaw iti balay a pagdagdagusanna. Kinunana: “Diak payen makapagdigus wenno makapammigat gapu ta agur-uray iti ruar dagiti tattao nga umay agpayadal iti Biblia. Agmalmalem a mangasabaak a saan a kasapulan a pumanawak iti dagusko! Nakaikonduktaak iti 31 a panagadal iti Biblia  iti uneg laeng ti makalawas.” Nagtalinaed ti grupo idiay Ambrym iti makalawas, nga okupadoda a nangisursuro iti naimbag a damag, ket 158 ti timmabuno iti Memorial. Malidayan ti grupo a pumanaw. “Kasano a mapanawam ti kastoy a lugar a nagadu a tattao ti mawaw iti kinapudno iti Biblia?” kinuna ni Marinette. Nangibaon ti sanga nga opisina kadagiti temporario nga special pioneer a tumulong kadagiti interesado iti daytoy a lugar.

NAGINTERES TI PRINSIPAL. Iti maysa nga eskuelaan ti haiskul idiay Solomon Islands, makalikaguman nga agtakder dagiti estudiante tapno kansionenda dagiti narelihiosuan a kanta ti South Seas Evangelical Church. Dua nga agtutubo a kakabsat a babbai ti immasideg iti prinsipal ket imbagada a saanda a mabalin ti makipaset iti panagkanta ta saan nga ipalubos ti konsiensiada. Nagyaman ti prinsipal iti siraraem nga iyaasidegda ket pinatganna ti kiddawda. Kinunana a saan a kasapulan nga agkantada no di ket agtugawda lattan a kaduada dagiti dadduma nga estudiante a Saksi.

Kalpasanna, kiniddaw ti prinsipal a mangawisda iti maysa a kabsat iti kongregasion a mangilawlawag kenkuana iti maipapan kadagiti Saksi ni Jehova ken maipapan iti edukasion. Maysa a misionera ti simmarungkar kenkuana, ket agarup maysa ket kagudua nga oras a nagsaritaanda ti maipapan iti patpatientayo ken dagiti parikut a pakaipaspasanguan dagiti agtutubo. Kinuna ti prinsipal a magustuanna ti agbasbasa iti Agriingkayo! ken mangibatbati pay kadagiti kopia iti opisina dagiti mannursuro.  Idi intukon kenkuana ti misionera ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo, Tomo 2, nagkiddaw ti prinsipal iti 16 a kopia para kadagiti mannursuro ken 367 para kadagiti estudiante. Uppat a gasut a libro ti naipatulod ken naiwaras.

Gapu iti kinatured dagitoy dua nga agtutubo a kakabsat a nakisarita iti prinsipal, adu ti nakasabaan, ken adu ti naawatda a nasayaat a komento maipapan iti naitulong ti libro kadakuada. Maysa nga agtutubo a babai, a dagiti nagannakna ket nabiit pay a nagsina, ti nagkuna a nakatulong unay ti libro kenkuana a mangdaer kadagiti parikutna. Agtultuloy ti panag-auxiliary pioneer dagiti dua a kakabsat ket regular met nga ipapaayanda ti prinsipal kadagiti magasin.

KINATARNAW ITI LAKSID TI IBUBUSOR. Idiay Solomon Islands, inyadalan ti maysa a misionera ti maysa a babai nga awagantayo iti Lisa. Nasayaat ti panagrang-ayna nupay kasapulan a magna iti nasurok a dua nga oras a mapan iti Kingdom Hall nga ubbana ti singin nga annakna a lallaki, bayat a sumursurot ti dua a babbalasitangna. Ib-ibturanna pay ti nakaro nga ibubusor ni lakayna. Kabkabilen ni lakayna ken pinuoran pay daytoy dagiti pakigimongna a kawes, Biblia, ken liblibro. Adda pay kamalala ni lakayna. Ngem iti laksid dagita, nabautisaran ni Lisa ket intultuloyna ti matalek a panagserbina ken Jehova.

Idi napan a tawen, natignay ti asawa ni Lisa a mangisina iti kamalalana ken agpayadal iti Biblia gapu iti nasayaat a panangtrato ni Lisa kenkuana iti laksid dagiti amin nga inaramidna. Siempre, kasta unay ti ragsak ti kabsattayo a ni Lisa gapu iti panagbalbaliw ni lakayna. Malaksid iti dayta, nanamnam-ay itan ti ipapanna pannakigimong ta adda nabuangay a maysa a grupo iti saan nga adayo, isu a nakurang a maysa nga oras laengen ti pagnaenna. Kasta met, gapu iti suporta ni lakayna, nakapag-auxiliary pioneer ni Lisa.

[Blurb iti panid 66]

“Apay a nakaul-ulpit ti Dios? . . . Apay a dusdusaenna ti anakko? Ania koma ti basolna ket kayan-anakna laeng?”

[Blurb iti panid 68]

Kinuna ti agkabannuag iti sango ti konsilio nga agsubli laeng iti simbaan no masungbatan ti padi ti dua a saludsodna

[Blurb iti panid 72]

“Naibaludkayo gapu iti panangasabayo idiay ruar, kaskasdi a mangaskasabakayo latta ditoy uneg!”

[Diagram/Mapa iti panid 84]

(Para iti aktual a pannakaurnosna, kitaem ti publikasion)

Tahiti → → → 1,350 a kilometro → → → Reao

[Ladawan iti panid 56]

Ngato: Panangyadal iti Biblia idiay Republic of the Congo (kitaem ti  panid 59)

[Ladawan iti panid 61]

Da Edvard (makannawan) ken Daniel iti tiendaan

[Ladawan iti panid 64]

Samaniego, Nariño, Colombia

[Ladawan iti panid 67]

Dagiti publikasion iti Sign-language ket magun-odan itan iti 59 a lenguahe

São Paulo, Brazil