Surat ti Bagi a Manarawidwid

Patgenmi a Pada a Saksi ni Jehova:

Pakaragsakanmi unay ti agsurat kadakayo patgenmi a matalek nga ad-adipen ni Jehova, nga agdagup itan iti nasurok a pito a milion. No adda maam-ammotayo a kapammatian iti sabali a paset ti lubong, dagus a mariknatayo a nakasingsingedtayo kenkuana. (Juan 13:34, 35) Awan duadua a kasta met laeng ti mariknam bayat a basbasaem iti daytoy Tinawen a Libro dagiti makapainteres a salaysay maipapan iti pammati ken kinasungdo dagiti kakabsattayo iti nadumaduma a pagilian.

Ipakita dagiti report manipud iti intero a lubong nga adu kadakayo ti addaan iti regular a Panagdaydayaw iti Pamilia. Dadduma kadakayo ti nagusar iti nadumaduma a pamay-an tapno maala ken mataginayonyo ti atension dagiti babassit nga annakyo. (Efe. 6:4) Dagiti agassawa ket naaddaan iti nasingsinged a relasion kas resulta ti kasta a panagadalda. (Efe. 5:28-33) Pudno unay a mabembenepisiaran dagiti indibidual ken pampamilia iti daytoy nga urnos para iti napasnek a panagadal iti Sao ti Dios.​—Jos. 1:8, 9.

Makipagriknakami kadakayo amin a nagsagaba iti adu a pukaw kas resulta dagiti nabiit pay a kalamidad. Alaenmi daytoy a gundaway nga agyaman iti adu a kakabsat a sidadaan a nakipaset iti panangsaranay kadagiti naapektaran iti kalamidad. (Ara. 11:28-30; Gal. 6:9, 10) Kasta met, iti  tunggal kongregasion, nakitayo ti panagkasapulan dagiti kakabsattayo ket nagdisnudokayo a timmulong kadakuada. Kas ken ni Dorcas, aduankayo iti “naimbag nga ar-aramid ken sagsagut ti asi.” (Ara. 9:36) Manamnamayo a makitkita dayta ni Jehova ket supapakannakayto.​—Mat. 6:3, 4.

Kadagiti dadduma a pagilian, dagiti kalinteganyo ket immameg dagidiay mangbalbalusingsing kadagiti linteg tapno ‘mangbalabalada iti riribuk babaen iti bilin.’ (Sal. 94:20-22) Yantangay ammoyo nga impadto ni Jehova ti kasta a panangidadanes, situtured nga agib-ibtur ken agpampannuraykayo ken Jehova kas kamangyo. (Juan 15:19, 20) Manamnamayo, ipatpategmi a kakabsat, a kankanayon nga iramandakayo kadagiti kararagmi bayat nga itultuloyyo ti “agikalintegan iti sanguanan ti tunggal maysa nga agkalikagum kadakayo iti rason maipaay iti namnama nga adda kadakayo.”​—1 Ped. 3:13-15.

Sibabara a komendaranmi ti minilion kadakayo a tinawen a nagtalinaed a nadalus iti moral iti laksid ti awan sarday ken nasikap a panangisaknap ni Satanas iti kinalulok. Iti daytoy a panawen a kumarkaro ti panagrakaya dagiti moral a pagalagadan ti lubong, ‘gunggun-odenyo ti pannakabalin ti Apo ken ti kinabileg ti pigsana.’ (Efe. 6:10) ‘Inkapetyo ti naan-anay a kabal manipud iti Dios,’ isu nga agtaktakderkayo a sititibker maibusor kadagiti ‘pangallilaw a pamuspusan ti Diablo.’ (Efe. 6:11, 12) Laglagipenyo koma nga us-usaren ni Jehova ti ulidanyo a mangted iti nabatad a sungbat iti daydiay manangumsi a ni Satanas!​—Prov. 27:11.

 Maragsakankami ta iti 2011, adda 19,374,737 a timmabuno iti Memorial ti ipapatay ti Apotayo. Ti maysa a makagapu a nakaad-adu ti timmabuno ket ti nakasaysayaat a panangsuportayo iti awis a panag-auxiliary pioneer idi Abril. Minilmilion nga agnanaed iti intero a daga ti makangkangngeg iti nagkaykaysa a timek dagiti nasungdo a Saksi ni Jehova a mangidaydayaw kenkuana! (Roma 10:18) Karamankayo man kadagiti 2,657,377 a nagserbi kas auxiliary pioneer iti dayta a bulan wenno pinalawayo ti ministerioyo iti dadduma a pamay-an, maragsakankami unay gapu iti kinamasindadaan ken kinaregtayo iti trabaho.​—Sal. 110:3; Col. 3:23.

Itay napan a tawen, 263,131 a kabbaro ti nangisimbolo iti dedikasionda ken Jehova. Agyamantayo ken Jehova gapu iti dayta, ken agyamankami kadakayo amin iti pannakitinnulongyo kadakami tapno maidanon kadagiti adu pay a tattao daytoy nga awis: “‘Umayka!’ Ket ti asinoman a dumdumngeg kunaenna koma: ‘Umayka!’ Ket ti asinoman a mawaw umay koma; ti asinoman a mayat awatenna koma ti danum ti biag nga awan bayadna.” (Apoc. 22:17) Nangnangruna kalpasan a nausigtayo dagiti aspeto ti naipasdek a Pagarian ti Dios bayat ti 2011 a kombension distrito, napaspasnektayo itan a mangidawdawat nga, “Umay koma ti Pagarian ti Dios!” Gapu ta napabilegtayo iti pammatalged ni Jesus nga “umayak a sidadaras,” naimpusuan a sumungbattayo met a kas ken apostol Juan iti: “Amen! Umayka, Apo Jesus.”​—Apoc. 22:20.

Bayat a siriridam a padpadaananyo dayta a makapagagar a pasamak, mangnamnamakayo nga ipatpategmi ti tunggal maysa kadakayo a kakabsatmi, a mangpampaneknek iti ayatyo ken Jehova “iti aramid ken kinapudno!”​—1 Juan 3:18.

Dagiti kakabsatyo,

Bagi a Manarawidwid dagiti Saksi ni Jehova