Baro a Lokasion ti Sangalubongan a Hedkuarter

Idi Hulio 2009, gimmatang dagiti Saksi ni Jehova iti lote iti estado ti New York, U.S.A. gapu iti plano a pannakayakar ti sangalubongan a hedkuarterda. Masarakan ti 102 nga ektaria a lote iti agarup 80 a kilometro iti amianan a laud ti agdama a pasilidad iti Brooklyn, New York, nga ayanna sipud pay 1909.

Agarup 800 a Bethelite ti agnaed ken agtrabahonto kadagiti baro a pasilidad, a pakairamanan ti maysa a pagopisinaan a pasdek, service building, maintenance building, ken uppat a residence building. Plano met ti pannakaaramid sadiay ti bassit a museo a pakakitaan  iti moderno-aldaw a pakasaritaan dagiti Saksi ni Jehova.

Aganay a 18 nga ektaria ti mausar para iti pasilidad isu nga agtalinaed a kabakiran ken baresbes ti nabati a paset ti nagatang a lote. Saanto unay a nalawa ti landscape. Maibagay dagiti pasdek iti aglawlawna a kakaykaywan. Dagiti arkitekto dinisenioda dagitoy a nainut iti koriente ken enerhia isu a saan a makadadael iti aglawlaw ken basbassit ti magastos. Kas pagarigan, mamulaanto ti atep dagiti pasdek kadagiti naandur ken nalaka nga aywanan a mula tapno makontrol ti panagayus ti tudo ken ti temperatura iti uneg dagiti pasdek. Nadisenio dagiti opisina tapno makastrek ti lawag ti init. Maipangpangruna met ti panaginut iti danum.

Ania ti rason iti dayta a yaakar? Dati, Brooklyn laeng ti agim-imprenta kadagiti Biblia ken naibatay iti Biblia a literatura, ngem agim-imprenta met itan ti dadduma a sanga nga opisina. Idi 2004, ti pagimprentaan ken ti shipping iti United States ket nayakar iti Wallkill, New York, agarup 145 a kilometro iti amianan a laud ti Brooklyn. Naikabilangan met ti gastos. Dakkel ti gastos iti panangusar ken panangmantener kadagiti dumadaan ken agaaddayo a pasilidad. Isu a no agaassideg dagiti pasilidad ken adda iti maymaysa a lugar, nasaysayaat ti pannakausar dagiti naidonar a pondo.

Napagtitipon Dagiti Sanga nga Opisina

Manipud idi Septiembre 2012, naipabiangen kadagiti daddadakkel a sanga ti panangimaton iti nasurok a 20 a sanga nga opisina dagiti Saksi ni Jehova. Adda dua a kangrunaan a rason:

1. Pinasimple ti teknolohia ti trabaho. Iti napalpalabas a tawen, bimmassit ti kasapulan a Bethelite kadagiti  daddadakkel a sanga nga opisina gapu ta rimmang-ay ti teknolohia ti komunikasion ken panagimprenta. Gapu ta basbassiten ti agtrabtrabaho kadagiti daddadakkel a sanga, addan pagyanan ti dadduma a dati nga agtrabtrabaho iti babbabassit a sanga nga opisina iti sabali a pagilian.

Ita, manipud kadagiti daddadakkel a sanga nga opisina, maysa a grupo dagiti aduan kapadasan a Saksi ti mangasikaso iti trabaho a panangisuro iti Biblia. Kas pagarigan, ti trabaho a panangasaba iti Costa Rica, El Salvador, Guatemala, Honduras, Nicaragua, ken Panama ket imatmatonanen ti sanga nga opisina ti Mexico. Isu a nagserran dagita nga innem a sanga nga opisina. Dagiti 40 a Bethelite kadagita a sanga ket nayakar iti sanga nga opisina ti Mexico. Agarup 95 ti nagtalinaed iti bukodda a pagilian kas amin-tiempo a ministro.

Dadduma a kameng dagiti dati a sanga nga opisina kadagiti pagilian ti Central America ket nagtultuloy a nagtrabaho kadagiti translation office iti panangiwanwan ti sanga nga opisina ti Mexico. Kas pagarigan, iti Panama, agarup 20 ti agipatpatarus kadagiti publikasiontayo kadagiti lokal a pagsasao. Iti Guatemala, 16 met ti agipatpatarus kadagiti publikasion iti uppat a lokal a pagsasao. Ti dati a 300 a Bethelite iti Central America ket agarup 75 laeng itan gapu iti panagtitipon dagiti sanga nga opisina.

2. Ad-adun dagiti amin-tiempo a mangaskasaba. Gapu iti panagtitipon ti dadduma a sanga nga opisina, mas maipamaysan dagiti adda idi kadagiti babbabassit a sanga nga ikasaba ti naimbag a damag. Insurat ti maysa a kabsat idiay Africa a nadutokan kas payunir: “Narigatanak iti panagbaliw ti kasasaadko nangruna iti umuna a bulbulan. Ngem gapu ta inaldaw  a mangasabaak, nakaragragsakak ken nakaad-adu ti bendisionko. Iti agdama, 20 ti yad-adalak iti Biblia ken makigimgimongen ti dadduma kadakuada.”

Ti Nabayagen a Karatula iti Brooklyn

Iti aldaw ken rabii iti las-ud ti nasurok nga 40 a tawen, pamiliaren kadagiti agnanaed iti New York City dagiti nalabaga a letra nga 4.6 a metro ti kadakkelda iti tuktok ti sangalubongan a hedkuarter dagiti Saksi ni Jehova. Adu kadakuada ti agpannuray kadagiti agparang nga oras ken temperatura iti dayta a karatula.

Nasurok a 70 a tawenen ti napalabas, adda karatula nga inkabil ti immuna a makinkukua iti dayta a pasdek. Binaliwan dayta dagiti Saksi ni Jehova kalpasan a nagatangda ti pasdek idi 1969.

Namin-adun a nabaliwan dayta a karatula tapno ad-adda a mapagpannurayan ken eksakto. Iti katengngaan ti dekada 1980, nanayonan dayta iti temperatura a Celsius a kasinnublat ti panagparang ti oras ken temperatura a Fahrenheit.

Kinuna ni Eboni a makakitkita iti dayta a karatula manipud iti apartmentna iti Brooklyn: “Tuman-awak laeng iti tawa, makitakon ti oras ken temperatura sakbay a mapanak agtrabaho. Diak maladaw ken maibagayko ti ikawesko sigun iti temperatura.”

Agtalinaedto ngata ti karatula iti sumaganad nga 40 a tawen? Gapu iti plano a pannakayakar ti sangalubongan a hedkuarter dagiti Saksi ni Jehova, agpannurayto daytan iti makagatang iti pasdek.

Baro a Banag iti Manhattan

Idi Nobiembre 2011, rinugian ti maysa a grupo dagiti Saksi ni Jehova nga iranud ti mensahe ti Biblia kadagiti tattao iti Manhattan babaen kadagiti makaawis a literatura a naidispley iti lamisaan ken cart. Maar-aramid daytoy iti makin-abagatan a paset ti Manhattan, ti kaukopaduan ken kabayaganen a distrito ti New York City. Nabingay ti Manhattan iti uppat a paset. Iti tunggal paset, adda sumagmamano a nakaipuestuan dagiti lamisaan wenno cart a nakaidispleyan dagiti publikasion a naibatay iti Biblia a mabalin a sardengan dagiti aglabas. Adda met payunir nga agbambantay kadagita. Kaaduan kadagitoy ket masarakan iti asideg wenno mismo a pagsardengan  dagiti lugan a pinullo a ribu a tattao ti aglabas kada aldaw.

Kadagita a lugar, maammuan dagiti tattao ti sungbat ti Biblia iti adu a saludsod. Dagiti agap-apura mabalinda ti mangala iti literatura a basaendanto. Magun-odan dagiti publikasion iti adu a lengguahe. No awan ti publikasion iti lengguahe a kayatda, mabalinda ti agkiddaw sada sublian kalpasan ti sumagmamano nga aldaw.

Inapresiar ti publiko ken uray dagiti autoridad dayta a kampania. Kinuna ti maysa a polis: “Apay nga ita laeng nga inaramidyo daytoy? Talaga nga adda kadakayo ti kasapulan dagiti tattao.” Maysa a lalaki ti bigla a simmardeng idi nakitana ti libro nga Ania a Talaga ti Isursuro ti Biblia? Napaliiwna a basbasaen dayta dagiti tattao iti subway ket pampanunotenna no sadino ti nangalaanda. Ita, ammonan.

Iti uneg ti innem a lawas, inaldaw a malabsan ti maysa nga agtutubo ti maysa kadagita a lamisaan no mapan agtrabaho. Idi agangay, dimmagas ket kinunana, “Kasapulak ti tulong.” Maragragsakan dagiti agbambantay iti lamisaan a timmulong kenkuana. Inikkanda iti Biblia ken imbagada no kasano a magunggonaan iti dayta. Adda dagiti sumardeng tapno makisaritada maipapan iti Biblia, ket iti uneg ti walo a bulan, 1,748 ti nagpayadal iti Biblia. Agingga idi Hunio 2012, babaen iti daytoy a kampania, 27,934 a magasin ken 61,019 a libro ti naipaiman iti publiko.

Dagiti Magasintayo—Naksayan ti Panidna, Immadu a Lengguahe

Mangrugi iti Enero 2013, ti 32 ti panidna nga Agriingkayo! ken ti publiko nga edision Ti Pagwanawanan ket  agbalinen a 16 ti panidna iti kada ruar. Gapu ta manmanon ti artikulo dagita a magasin, ad-adun a lengguahe ti pakaipatarusanda. Iti agdama, maipatpatarus ti Agriingkayo! iti 98 a lengguahe ken 204 Ti Pagwanawanan. Agtalinaed a 32 ti panid ti pagadalan nga edision Ti Pagwanawanan.

Ti dadduma a linaon dagiti magasin ket agparang laengen iti Web site a www.pr418.com. Dagitoy ket “Para Kadagiti Agtutubo,” “Dagiti Masursurok iti Biblia,” ken ti report maipapan iti panagturpos iti Gilead manipud iti publiko nga edision Ti Pagwanawanan, agraman ti “Adalen ti Pamilia” ken “Saludsod Dagiti Agtutubo” manipud iti Agriingkayo!

Kanayonanna, adda serye dagiti artikulo a magun-odan laeng iti Web site a mangipapaay kadagiti nalawag ken direkta a sungbat kadagiti saludsod maipapan iti Biblia ken kadagiti Saksi ni Jehova. Mai-download met iti Internet dagiti nayimprenta a pagbasaantayo. Babaen ti kompiuter wenno elektroniko a gadyet, nalakan a makita wenno magun-odan dagiti publikasiontayo iti www.pr418.com iti nasurok nga 440 a lengguahe.

Napapintas ti Web Site-tayo

Iti napalabas a bulbulan, adu a Saksi ni Jehova iti sangalubongan a hedkuarter iti New York ti nagtitinnulong a nangpapintas ken namagbalin iti www.pr418.com nga al-alisto a sukisoken, iti man kompiuter wenno elektroniko a gadyet. Kanayonanna, adda dua a panggep no apay a binaliwan ken pinasayaatda ti Web site:

1. Tapno mapagmaymaysa dagiti Web site-tayo. Ti tallo a Web site dagiti Saksi ni Jehova ket napagtitiponen iti opisial a Web Site​—ti www.pr418.com. Saanen a mausar ti www.watchtower.org ken ti www.jw-media.org. Gapu ta napagtitiponen ti linaon dagita, maymaysan ti luktan dagiti agbirbirok iti impormasion maipapan kadagiti  Saksi ni Jehova ken kadagiti publikasionda. Kas pagarigan, mabalinen a basaen, denggen, wenno yimprenta dagiti panid ti Biblia ken dagiti publikasion iti adu a lengguahe.

2. Tapno makaipaay iti ad-adu nga impormasion. Naglaon ti napabaro a Web site kadagiti sungbat dagiti saludsod iti Biblia ken impormasion maipapan kadagiti sanga nga opisina, Kingdom Hall, kombension, ken panangasaba dagiti Saksi ni Jehova. Ti benneg a “News” ipadamagna dagiti pasamak maipapan kadagiti kakabsattayo iti intero a lubong. Adda met benneg a mabalin a pakipasetan dagiti pamilia, tin-edyer, ken ubbing.

Iti kada aldaw, ginasut a ribu ti agbasbasa kadagiti publikasiontayo iti Web site. Dandani kagudua a milion nga audio, EPUB, PDF, wenno sign-language a video ti mai-download-da. Inaldaw nga agarup 100 a tattao ti agkidkiddaw a mayadalan iti Biblia.

Ti Innem a Pie a Biblia

Ti kompleto a Baro a Lubong a Patarus ket magun-odanen iti Braille nga English, Spanish, Italian, ken dadduma pay. Ti pormat nga embossed paper ket buklen ti 20 agingga iti 28 a tomo ken agkasapulan iti bookshelf nga agatiddog iti di kumurang nga innem a pie ken lima a pulgada! Ngem basbassit nga espasio ti kasapulan ti dadduma a pormat ti Braille. Kas pagarigan, makainotar ti bulsek iti tulong ti Braille notetakers ken mabasana dagiti naiserrek nga impormasion iti dayta a gadyet nga addaan kadagiti pins a ngumato ken bumaba tapno mapataud ti simbolo a Braille. Mabirokan ken mangngeg  met ti bulsek dagiti publikasion iti tulong ti screen reader, a mangbasa kadagiti naiserrek a sasao.

Nasurok a 100 a tawenen nga agipabpablaak dagiti Saksi kadagiti naibatay-Biblia a publikasion para kadagiti bulsek ket magun-odanen dagita iti 19 a lengguahe. Nupay saan a mailaklako dagitoy a publikasion kadagiti interesado a bulsek, adu ti mangipapaay iti boluntario a donasion.

Nangaramid dagiti Saksi iti computer program a kabaelanna nga i-convert dagiti naiserrek a sasao iti adu a lengguahe a Braille. Naiserrek iti dayta a program dagiti maus-usar a letra iti lokal a pagsasao ken dagiti kaibatoganda a karakter ti Braille isu a mai-convert dayta a program dagiti naiserrek a sasao iti Braille. Mapagbalinna met dagiti publikasion a nalaka a basaen dagiti bulsek. Gapu iti daytoy a program, makapatauden kadagiti Braille a publikasion, a pakairamanan ti Biblia, iti aniaman a lengguahe nga addaan iti karakter a Braille, uray pay dagidiay saan nga agus-usar iti Roman nga alpabeto.

Dati, no adda mairuar a baro a publikasion kadagiti kombension, maipakaammo iti tallaong a maorderto dagiti Braille a publikasion iti sumagsaganad. Idi napan a tawen, nagsurbey ti sanga nga opisina ti United States kadagiti kongregasion tapno maammuan no sadino ti plano a pakikombensionan dagiti bulsek ken no ania a pormat ti kayatda (embossed paper, electronic notetaker, wenno electronic screen reader).

Naipatulod dagiti embossed paper a publikasion kadagiti kombension a tinabunuan dagiti bulsek isu a nakaawatda kadagiti nairuar a publikasion a kagiddan ti amin a timmabuno. Makalawas kalpasan ti  kombension, dagiti elektroniko a pormat ket naipatulod babaen iti e-mail kadagiti nagkiddaw kadagita.

Kuna ti maysa a bulsek a kabsat a babai: “Nakaragragsak ti makaawat iti literatura a kagiddan ti amin. Kuna ti Salmo 37:4 nga ited ni Jehova ti kiddaw ti pusotayo. Inaramidna dayta ita a kombension!” Sabali pay a bulsek a Saksi ti nakasangit ken nagkuna, “Agyamanak ken Jehova iti napalalo a pannakaseknanna kadakami!”

Rinibu ti Nakasursuro nga Agbasa ken Agsurat

Idi 2011, nasurok a 5,700 a tattao ti natulongan dagiti Saksi ni Jehova nga agbasa ken agsurat. Kastoy ti mapaspasamak iti sumagmamano a pagilian:

Ghana: Iti napalabas a 25 a tawen, nasurok a 9,000 ti natulongan nga agbasa ken agsurat.

Mozambique: Nasurok a 19,000 ti nakasursuro nga agbasa iti napalabas a 15 a tawen. Kinuna ti maysa nga estudiante a ni Felizarda: “Maragsakanak ta maibasakon dagiti teksto ti Biblia iti sabsabali. Marigatanak idi a mangaramid iti dayta.”

Solomon Islands: Insurat ti sanga nga opisina: “Idi, saan a makapageskuela ti adu nga agnanaed kadagiti nasulinek a lugar ken manmano nga ubbing a babbai ti makapageskuela. Isu a nangnangruna a nagunggonaan dagiti babbai kadagiti klase a pakasursuruanda nga agbasa ken agsurat. Idi nalpas ti panagadalda, adu ti ad-addan nga agtalek iti bagida.”

Zambia: Manipud 2002, dandani 12,000 ti limmaing nga agbasa ken agsurat. Kinuna ni Agnes nga agtawen iti 82: “Idi naipakaammo iti kongregasion nga adda maangay a klase ti panagbasa ken panagsurat, dagus a nagpasalistaak. Iti immuna a leksion, nasursurok nga isurat ti naganko!”

Agipatpatarusen dagiti Saksi ni Jehova kadagiti naibatay-Biblia a literatura iti agarup 600 a lengguahe. Narigat a trabaho ti pannakaipatarus ti intero a pagkantaan a naglaon iti 135 a kanta. Ngem iti uneg ti tallo a tawen, naipatarus ti intero a baro a pagkantaan, ti Kantaanyo ni Jehova, iti 116 a lengguahe. Adda kanayonan a 55 a lengguahe a nakaipatarusan ti bersion a naglaon iti 55 a kanta, ken maipatpatarusen dayta iti adu pay a lengguahe.

Panggep dagiti agipatpatarus iti kanta a makapataudda kadagiti liriko a nabagas, napintas, ken nalaka a matandaanan. Maysa pay, masapul a simple dagiti mausar a sasao tapno maawatan ti agkanta ti kababagas  ken panggep dagita. Iti tunggal lengguahe, masapul nga agtunos dagiti sasao ken musika ken pagbalinen a natural a kas man la sasao dagita ti mismo nga agkankanta.

Kasano nga aramiden dayta dagiti agipatpatarus? Imbes nga ipatarusda a sao por sao dagiti liriko iti Ingles a Sing to Jehovah, mangaramidda iti baro a liriko a maibagay iti musika a mangyallatiw iti kababagas ti orihinal a kanta. Bayat nga ikagkagumaanda a saan a mapukaw dagiti Nainkasuratan nga ideya iti tunggal kanta, agaramatda kadagiti sasao a gagangay a maus-usar iti lengguaheda a nalaka a matarusan ken matandaanan.

Umuna, sao por sao a maipatarus ti Ingles a kanta. Sumaganad, maysa a Saksi a nalaing nga agsurat iti kanta ti mangurnos kadagiti sasao tapno agbalin a makaay-ayo ken nabagas dagiti liriko iti baro a lengguahe. Kalpasanna, kitaen dayta ti translation team ken dagiti proofreader tapno masigurado a kanayon a maitunos dayta iti Kasuratan. Dakkel a trabaho ti panangipatarus iti pagkantaantayo ngem di mailadawan ti ragsak dagiti Saksi ni Jehova iti intero a lubong a mangkanta kadagiti kanta ti panagdayaw iti bukodda a lengguahe.

Naipadto iti Apocalipsis a dagiti napulotan iti kaaldawantayo awisenda dagiti tattao nga umay ‘umawat iti danum ti biag nga awan bayadna.’ (Apoc. 22:17) Awis daytoy iti ‘amin nga ili ken pagsasao.’ (Apoc. 7:9) Dati, kaaduan nga agipatpatarus ket agtrabtrabaho kadagiti sanga nga opisina uray no iti sabali a lugar ti pakaus-usaran ti lengguaheda. Karit kadakuada ti panangammo no kasano nga us-usarenen dagiti tattao ti lengguahe iti lugarda ken ti panangdanon iti puso dagidiay agbasbasa kadagiti naipatarus a publikasion. Ngem adu itan a grupo dagiti agipatpatarus ti nayakar iti lugar a pakaus-usaran dagiti lengguaheda. Adu ti nagimbagan daytoy kas ipakita dagiti sumaganad a komento dagiti agipatpatarus.

 Maysa nga agipatpatarus iti lengguahe a Maya iti Mexico ti nagkuna: “Kayarigak ’tay bassit a mula a nayakar iti daga ken aglawlaw a timmubuanna.” Kinuna ti maysa nga agipatpatarus iti makin-abagatan a Russia: “Para kadagiti agipatpatarus, paraiso ti kaaddada iti lugar a pakaus-usaran ti lengguahe nga ipatpatarusda. Dagiti sasao a maus-usar iti telebision, libro, ken Internet ket dakkel ti nakaidumaanna kadagiti sasao nga us-usaren dagiti tattao iti inaldaw. Ad-adda a natural ti panagipatarusmi no mangngegmi ti aktual a panagsasarita dagiti tattao.”

Napaliiw ti maysa nga agipatpatarus iti Tshiluba iti Congo: “Kanayon nga us-usarenmi ti lengguahemi​—kadagiti inaldaw nga aktibidadmi kas iti panaggatang ken pannakisarita kadagiti kaarruba, iti panangasabami, ken kadagiti gimong. Us-usarenmi dagiti  impatarusmi a publikasion iti panagadal ken ministerio, isu a maammuanmi a mismo no matarusan met la dagiti tattao dagiti nausar a sasao.”

Kinuna ti maysa nga agipatpatarus iti Lhukonzo iti Uganda: “Nakaragragsak ti makigimong iti lengguahe nga us-usaren ken ipatpatarusmi. Ad-adda met a matagiragsakmi ti ministerio gapu ta makasaritami dagiti tattao iti bukodmi a lengguahe.”

Nagunggonaan met dagiti kongregasion a nakaikamengan dagiti agipatpatarus. Kuna ti maysa a babai maipapan kadagiti agipatpatarus iti Maya: “Naparegtakami gapu iti nasayaat a panagsasao ken ulidanda. Kasla adda Bethel ditoy lugarmi, ket talaga a naisangsangayan dayta.”

Maparparegta met uray dagiti agipatpatarus. Kuna ti maysa nga agipatpatarus iti Kenya: “Manmano ti pagbasaan a naipablaak iti lengguahe a Luo isu a masmasdaaw dagiti tattao a makakita kadagiti dekalidad a publikasion iti bukodda a lengguahe ken maragragsakanda a makaawat kadagita. Idi nakitak ti reaksionda, napabilegak ken ad-adda a determinadoak a mangaramid iti amin a kabaelak ken mangitultuloy iti annongek.”

Adu kadagitoy nga agipatpatarus ti agserserbi iti sanga nga opisina iti adun a tawen, wenno dinekdekada pay ketdi. Maapresiar unay ti nasayaat nga ulidan ken kinatulokda a mangyun-una iti pagimbagan dagiti adipen ni Jehova imbes a ti bukodda a pagimbagan, ket mabembendisionanda gapu iti dayta. Kas iti marikrikna ti kaaduan, kinuna ti maysa nga agipatpatarus iti Xhosa iti South Africa: “Nagsayaat ti desision ti Bagi a Manarawidwid a mangipasdek kadagiti remote translation offices. Naragsakkami idi iti Bethel, ngem naragragsakkami ita iti translation office.”

“Inaywanandakami a Naimbag Dagiti Kakabsat”

Idi Domingo, Hunio 3, 2012, adda trahedia iti tangatang iti Nigeria. Natnag ti maysa nga eroplano iti natao a paset ti Lagos a kadakkelan a siudad ti Nigeria. Natay amin ti 153 a pasaherona ken saan nga ammo no mano ti natay iti nakatnaganna.

Agnanaed ni Collins Eweh ken ti pamiliana iti maikatlo a kadsaaran ti apartment a tinamaan ti eroplano. Idi napasamak ti aksidente, madama a makigimgimong ti intero a pamilia iti Kingdom Hall.

Iti agarup 3:35 ti malem, bayat ti Panagadal iti Pagwanawanan, nadlaw da Collins ken ni baketna a  Chinyere, nga adu ti umaw-awag iti selponda ngem dida sinungsungbatan. Kalpasan ti gimong, sinungbatan a dagus ni Chinyere ti selponna. Impadamag dagiti kaarrubada a mapupuoran ti apartmentda. Idi nakaawidda, nakita ti pamilia Eweh a tinamaan ti eroplano ti apartmentda sakbay a natnag iti asideg a pasdek sa nauram.

“No addakami iti balaymi,” kinuna ni Chinyere, “sigurado a nataykami koman. Kalpasan ti trahedia, dagiti laeng kawesmi a nakigimong ti nabati kadakami, ngem sibibiagkami. Dagus a nangorganisar ti manangaywan iti sirkito iti relief committee, ket inaywanandakami a naimbag dagiti kakabsat isu nga agyamyamankami unay.”

Kinuna ni Collins: “Nagbalbaliw dagiti kakabagiak a dati a bumusbusor iti panagbalinko a Saksi. Kuna ti maysa kadakuada: ‘Sinungbatan ti Diosyo a Jehova dagiti kararagyo. Diyo pampanawan ta tultulongannakayo.’ Adda pay nagkuna: ‘Itultuloyyo ti naimpusuan a panagserbiyo iti Dios.’ Maragsakanak unay ta talaga a nariknami ti tulong ni Jehova.”

Ti Parliamento Aprobaranna ti Pannakairehistro ti Relihion

Idi Pebrero 27, 2012, inaprobaran ti gobierno ti Hungary ti pannakairehistro dagiti Saksi ni Jehova kas relihion iti komunidad maitunos iti Linteg ti Relihion. Dakkel ti maitulong daytoy iti pannakaikasaba ti naimbag a damag iti Hungary. Saanen nga agbayad iti buis ti organisasion dagiti Saksi ni Jehova, mabalindan ti umawat kadagiti donasion, ken mabisitadan dagiti balud ken adda iti ospital tapno maipaayanda kadagiti Nainkasuratan a balakad.

 Espesial a Nakaangayan ti Memorial

Inestoria ti special pioneer iti Rundu, Namibia, ti tinabunuanna a Memorial iti maysa a purok. Gapu ta adu ti interesado sadiay, inkeddeng dagiti kakabsat ti mangangay iti Memorial iti lokal a lengguahe a Rumanyo iti umuna a gundaway. Insuratna: “Nagpintas ti nakaangayanna, iti ruar a masilsilnagan ti kabus a bulan, kingki, ken dua a debateria a silaw.” Gapu iti dayta, nariknada nga asidegda ken Jehova. Maymaysa ti agibumbunannag iti dayta a purok. Inrugina ti nangasaba iti Marso ngem 275 ti timmabuno iti Memorial!

Napateg a petsa ti Nobiembre 19, 2011 iti pakasaritaan ti organisasion ni Jehova iti Central African Republic ken Chad. Iti dayta nga aldaw, 269 a kakabsat ti nagtataripnong iti sango ti baro a pasilidad ti sanga. Maragsakanda iti kaadda ni Samuel Herd, miembro ti Bagi a Manarawidwid, a nangidedikar ken Jehova iti baro a pasilidad ti Bethel a mausar iti panagserbi Kenkuana. Naisalaysay iti programa ti pakasaritaan ti trabaho a panangasaba iti dua a pagilian a nangrugi idi 1947 iti Central African Republic ken idi 1959 iti Chad. Naisalaysay met iti simmaganad  a palawag dagiti detalye ti konstruksion ken ti amin a naaramid tapno mairingpas dagiti pasdek. Kalpasan ti pannakaibasa dagiti kablaaw ti nagduduma a pagilian, tinagiragsakda ti palawag ti dedikasion nga impaay ni Kabsat Herd. Agyamyaman ti 42 a kameng ti Bethel iti kaadda ti walo a translation office, kitchen, dining room, ken laundry. Addaan daytoy iti 22 a residence room ken dadduma pay a pasilidad, kas iti reception area, administrative offices, ken shipping area isu a makapagtrabaho a naimbag ti pamilia ti Bethel.

Nakallalagip ti pasamak idi Sabado, Mayo 26, 2012, kadagiti Saksi ni Jehova iti Congo (Kinshasa). Kalpasan ti walo a tawen a panagibangon ken panangpasayaat, naidedikar dagiti pasilidad ti sanga. Espesial ti okasion gapu ta dayta ti damo a pannakaidedikar ti sanga nga opisina iti Congo, nupay agarup 50 a tawenen nga adda dayta. Ni Geoffrey Jackson, a miembro ti Bagi a Manarawidwid, ti nangipaay iti palawag ti dedikasion iti sanga nga opisina a tinabunuan ti 2,422. Nasurok nga 40 a tawenen a bautisado ti kaaduan a timmabuno. Adda 117 a bisita manipud 23 a pagilian. Dadduma a dati a misionero iti Congo adu a tawen sakbayna ti nangipaay kadagiti makaparegta a kapadasan. Maragsakan ti amin ken determinadoda a mangusar kadagitoy a pasilidad agpaay laeng iti pakaidayawan ni Jehova.

Idi Hunio 30, 2011, impaulog ti European Court of Human Rights (ECHR) ti desisionna a linabsing ti gobierno ti France ti kalintegan dagiti Saksi ni Jehova gapu iti panangsingirna iti 60 a porsiento a buis kadagiti amin a donasion a naawat dagiti Saksi ni Jehova iti France manipud 1993 agingga iti 1996. Nupay insingasing ti Korte nga aginnareglo ti gobierno ti France ken dagiti Saksi ni Jehova, impetteng ti gobierno a saan nga illegal ti dakkel a buis a singsingirenna isu nga imposible ti panaginnareglo. Gapuna, iti desision a naipaulog idi Hulio 5, 2012, imbilin ti ECHR a bayadan ti gobierno ti France ti “amin a danios” wenno perhuisio a resulta ti panagsingirna iti buis. Malaksid iti panangisubli ti gobierno iti 4,590,295 euro  ($5,749,440 U.S.) a nakolektana sipud pay naipataw ti buis (agraman naurnong nga interes), agbayad pay kadagiti Saksi iti 55,000 euro ($68,890 U.S.) a nagastos iti kaso.

Naikkat ti kalintegan kas umili dagiti nasungdo nga adipen ni Jehova iti Eritrea gapu iti panagtalinaedda a neutral. (Isa. 2:4) Adu ti naaresto iti napalabas a 17 a tawen, ket iti agdama, nakabalud ti agarup 50 a kakabsat agraman dagiti babbaket ken ubbing a dua pay laeng ti tawenda. Nakalkaldaang ta idi Hulio 2011, ni Kabsat Misghina Gebretinsae ti kaunaan a Saksi a natay iti pagbaludan ti Eritrea. Sakbay a natay, makalawas a naibartolina iti metal a bariles; kunada a “misterioso” ti ipapatayna. Ikagkagumaan dagiti kakabsat nga ilawlawag kadagiti opisial a ti panagbalin a mannakikappia ken panagtalinaedtayo a neutral dina kaipapanan nga awan panagraemtayo iti gobierno ti Eritrea.

Itultuloy dagiti Saksi ni Jehova iti India nga ibturan ti panangranggas kadakuada dagiti tattao bayat ti ministerioda. Dagiti lallaki, babbai, ubbing, ken uray ti 60 anyos a baket ken ti 18 ti bulanna a maladaga napadasanda ti napagsasawan ken nadangran. Dadduma ti nalabusan ken napangtaan iti ipapatay. Ad-adu pay ti biktima a Saksi gapu ta saan nga agtigtignay dagiti polis ken mangidumdumada. Imbes nga arestuenda dagiti mangrangranggas, imbaludda ketdi dagiti Saksi gapu kadagiti di umiso nga akusasion. Masansan a dawatanda dagiti maaresto iti dakkel a piansa, pagsasawan ken kabkabilen ida dagiti  polis, ken dida pay ipapaayan ida iti taraon, danum, ken saanda a maipaagas. Adu a tawen a mabisbistada kas kriminal sakbay a maabsueltoda. Sumagmamano a reklamo maipapan iti kalintegan dagiti umili ti naipila iti National Human Rights Commission a manamnama a makatulongto kadagiti kakabsattayo.

Idi Nobiembre 2011, nagkaykaysa ti desision ti ECHR a linabsing ti Turkey ti kalintegan ni Yunus Erçep a mangsurot iti konsiensiana. Isu ket maysa a Saksi ni Jehova a naakusaran ken naibalud ta nagkedked nga agsoldado maigapu iti konsiensiana. Manipud idi Marso 1998, namin-39 a naayaban nga agsoldado ken nasurok a 30 a daras a nabista. Namulta, naibalud, ken naiserrek ni Kabsat Erçep iti psychiatric hospital gapu ta saan kano a limpio ti panagpampanunotna.

Idi Oktubre 2004, nagapelar ni Kabsat Erçep iti ECHR. Sigun iti desision ti Korte, “ti nagapelar, kas maysa a Saksi ni Jehova, ket nagkedked nga agsoldado saan a gapu iti personal a pagimbagan wenno pagnam-ayanna no di ket gapu iti panangsalimetmetna iti narelihiosuan a patpatienna.”

Ni Feti Demirtaş ti maysa pay a Saksi ni Jehova iti Turkey a nagkedked idi naayaban nga agsanay kas soldado idi 2005. Naaresto, nakabkabil, nabista, ken naibalud iti 554 nga aldaw agingga a nawayawayaan idi Hunio 2007. Gapu ta saan nga inkompromiso ni Kabsat Demirtaş dagiti naibatay iti Biblia a patpatienna, nangaramidda iti report a mangibilang kenkuana kas agmauyong. Sigun iti panangusig ti ECHR, natakuatanda a ni Kabsat Demirtaş ket minaltrato dagiti autoridad ti Turkey ken linabsingda ti kalinteganna a mangsurot iti konsiensiana.

 Dagita a dua a desision ket sinaruno ti nagpateg a desision ti ECHR idi Hulio 2011 (Bayatyan v. Armenia). Iti dayta a kaso, ti Grand Chamber ti ECHR pinatalgedanna a ti European Convention salsalaknibanna ti kalintegan dagiti agkedked gapu iti konsiensiada. Agaplikar dagitoy a paglintegan iti amin nga estado a miembro ti Council of Europe, a pakairamanan ti Turkey.

Idi Enero 2012, nangipaulog met ti ECHR iti desision kontra iti Armenia kadagiti kaso a Bukharatyan v. Armenia ken Tsaturyan v. Armenia. Pinatalgedan ti desision a linabsing ti Armenia ti narelihiosuan a wayawaya ti dua a Saksi ni Jehova a nagkedked nga agsoldado gapu iti konsiensiada. Idi ipaulog ti Korte ti desisionna, dinakamatna ti desision nga inaramidna iti kaso a Bayatyan v. Armenia.

 Ngem iti laksid dagitoy a nagpateg a desision kontra iti Armenia, itultuloy latta ti gobierno nga arestuen, akusaren, ken ibalud dagiti agkedked gapu iti konsiensiada. Usigento pay laeng ti parliamento dagiti panagbalbaliw a maaramid iti Law on Alternative Service nga inaprobaran ti gobierno ti Armenia idi Marso 2012. Manamnama nga ipatungpalto ti gobierno ti Armenia ti desision ti ECHR ket wayawayaanna dagiti nakabalud a kakabsat a nagkedked nga agsoldado.

Agtultuloy nga idaddadanes ti gobierno dagiti Saksi ni Jehova iti Azerbaijan: mararaut ken maar-aresto dagiti aggigimong, marekisa dagiti literaturada, maideporta dagiti ganggannaet a Saksi, kabkabilen ken pagsasawan ida dagiti polis, ken mapangtaanda a maikkat ti pannakairehistro ti relihionda. Yantangay imbasura ti State Committee for Work with Religious Associations ti aplikasion dagiti Saksi nga agparehistro manen, ad-adda a riniribuk dagiti polis ti natalna a panaggigimong dagiti Saksi, pinaritanda ida a mangasaba, mangiserrek, ken mangiwaras kadagiti naibatay iti Biblia a literaturada. Nangipataw dagiti korte iti dadakkel a multa kadagiti Saksi ni Jehova a makigimong ken agiwaras kadagiti literaturada. Kas pagarigan, namulta ti maysa a kabsat a babai iti $1,909 (U.S.) gapu iti pannakigimongna iti siudad ti Ganja. Gapu kadagitoy a pananglabsing iti kalintegan ti panagdayaw a pinatalgedan ti European Convention on Human Rights, adu a kaso ti naipila iti ECHR a manamnama a mamagpatingga iti naranggas a panangidadanes kadagiti Saksi ni Jehova iti Azerbaijan.

Dagiti opisial a mangipatpatungpal iti linteg iti nagduduma a paset ti Russia intultuloyda a riniribuk ken indadanes dagiti Saksi ni Jehova ken sinugsoganda  dagiti korte a mangdusa kadagiti Saksi gapu iti panangusarda iti wayawayada nga agdayaw iti Dios. Maibatay iti nasaknap ti pannakakritikarna a law on extremism, indeklara dagiti korte ti Russia nga extremist ti di kumurang nga 64 a publikasion dagiti Saksi ni Jehova. Iti nabiit, kiniddaw ti maysa a hues a maideklara nga extremist ti Agsursuroka iti Naindaklan a Mannursuro, maysa a libro a mangisuro kadagiti ubbing maipapan ken Jesu-Kristo. Iti adu a paset ti Russia, saan nga impalubos ti korte a maluktan ti opisial a Web site dagiti Saksi ni Jehova. Impalubos dagiti korte a siputan dagiti opisial ti amin nga ar-aramiden dagiti kakabsat ken mangikabilda kadagiti nakalemmeng a video camera ken tipdenda dagiti surat. Kas resultana, regular nga aginterbiu dagiti polis kadagiti bumusbusor a kaarruba dagiti Saksi, sawarenda ti pagtaengan dagiti kakabsat, ken kompiskarenda dagiti publikasion ken dadduma a personal nga alikamenda. Maaresto dagiti Saksi bayat a magmagnada iti kalsada, agmanmanehoda, wenno dumsaagda iti tren. Singaen dagiti polis dagiti gimong, ken idemandada dagiti panglakayen gapu iti panangasikasoda kadagiti annongenda iti kongregasion. Iti dadduma a rehion, ikagkagumaan dagiti hues a sugsogan dagiti korte a mangpasardeng iti Local Religious Organizations (LRO) dagiti Saksi ni Jehova.

Idi Mayo 2012, iti siudad ti Taganrog, 17 a Saksi ti naakusaran a nangorganisar ken nakiraman iti krimen gapu laeng iti panagdayawda. Idi 2009, ditoy a pinasardeng ti korte ti LRO dagiti Saksi ni Jehova. Nakompiskar ti Kingdom Hall gapu ta maatap nga extremist isu a napilitan dagiti Saksi nga aggigimong kadagiti pagtaengan wenno kadagiti naabangan a pasdek. Ngem ikagkagumaan ita ti gobierno a lapdan  ti amin nga aktibidad iti panagdaydayaw dagiti Saksi. Idi Hulio 2012, bayat a mangaskasaba ti agassawa a payunir iti siudad ti Chita, Siberia, napabasolda a mangpatpataud iti riri gapu iti panagiwarasda iti maibilang nga extremist a libro nga Ania a Talaga ti Isursuro ti Biblia? a maus-usar iti panangyadal iti Biblia. Agpadada a nasentensiaan iti 200 nga oras nga inkapilitan a panagtrabaho, ngem yap-apelarda ti kalinteganda.

Nupay duan a dadakkel a panagballigi para kadagiti Saksi ni Jehova kontra iti Russia ti impaulog ti ECHR​—iti kaso a Kuznetsov and Others v. Russia idi 2007 ken iti kaso a Jehovah’s Witnesses of Moscow v. Russia idi 2010​—saan nga inkankano ti autoridad ti Russia ti desision ti mararaem a Korte. Iti agdama, 19 pay a kaso dagiti Saksi ni Jehova ti nakapila iti ECHR ket mangnamnamatayo a ti kanayonan a desision ti ECHR ti mangtignayto iti gobierno ti Russia nga agsardeng a mangidadanes kadagiti adipen ni Jehova ken mangipalubos kadakuada a ‘makapagtultuloy nga agbiag a natalinaay ken naulimek buyogen ti naan-anay a nadiosan a debosion ken kinaserioso.’​—1 Tim. 2:2.

Itultuloy latta ti South Korea nga ibalud dagiti agtutubo a lallaki gapu iti neutral a takderda kas Kristiano. Kada bulan, agarup 45 nga agtutubo ti maar-aresto ken masensentensiaan iti maysa ket kagudua a tawen a pannakaibalud. Kas resultana, agarup 750 a kakabsat ti adda ita kadagiti pagbaludan ti Korea. Daytoy ti kaaduan a bilang dagiti Saksi ni Jehova a naibalud gapu iti pammatida iti aniaman a pagilian. Sipud idi 1950, agarup 17,000 a Saksi ni Jehova ti nasentensiaan iti nasurok a 32,000 a tawen a pannakaibalud no pagdadagupen.

 Idi 2012, pinakaro ti autoridad ti panangidadanesna kadagiti Saksi nga agkedked nga agsoldado. Iti umuna a gundaway, maibalud metten uray dagidiay agkedked nga agbalin a reserba a soldado gapu ta saan nga ipalubos ti konsiensiada. Iti napalabas, mamulta laeng dagidiay agkedked a masanay kas reserba a soldado. Ngem gapu ta mamin-adu nga adda awag para iti panagsanay iti panaglabas ti tawen, maipaspasango iti adu a bista dagidiay agkedked. Kas pagarigan, idi Nobiembre 2011, nasentensiaan ni Ho-jeong Son iti walo a bulan a pannakaibalud. Nabista manen idi Hunio 2012 ket nasentensiaan iti innem a bulan a pannakaibalud. Dagus a naibalud kalpasan ti maikadua a pannakabistana ket gapu iti panagpiansana, nawayawayaan kalpasan ti 29 nga aldaw, nga ur-urayenna ti resulta ti panagapelarna. Nasentensiaan ita iti 14 a bulan a pannakaibalud.

Namin-adu nga inakusar ti United Nations Human Rights Committee ti pananglabsing ti South Korea iti kalintegan ti maysa a mangsurot iti konsiensiana. Adda pay dagiti baro a naipila a panagapelar iti daytoy a Committee ken iti South Korean Constitutional Court tapno masolbar ti isyu.