Pagaammon iti intero a lubong ni Caleb, ti bassit nga ubing iti serye ti video nga Agbalinka a Gayyem ni Jehova iti jw.org. Ti umuna a video daytoy nakaay-ayat nga ubing ket naipatarusen iti nasurok a 130 a lengguahe, ken ginasut a surat ti maaw-awat maipapan kadagitoy a video.

Kastoy ti insurat ti agkabsat a babbai nga agtawen iti 11 ken 8: “Kayatmi ti mangted iti kontribusion para iti sangalubongan a panangasaba. Naglakuanmi daytoy a kuarta iti tinarakenmi a dua nga urbon a baka a da Big Red ken Earl. Itedmi daytoy tapno makaaramidkayo iti ad-adu pay a video nga Agbalinka a Gayyem ni Jehova.  Adda koma met babai nga ading ni Caleb tapno makitami ti aramidenna no maipaayen ken adingna ti amin nga atension. Paboritomi ti video ni Caleb!”

Kabesadon ti adu nga ubbing ti intero a video agraman ti kanta ken ibagbaga ti narrator. Insurat ti maysa a kabsat a babai nga iti kongregasionda a buklen ti 100 nga agibumbunannag, adda 40 nga ubbing a kaaduanna ket awan pay 10 ti tawenda. Nakatugaw ti kabsat iti maikatlo a linia idi makanta ti numero 120 iti ngudo ti gimong. Nakasangit idi mangngegna a nakagangganaygay a kankantaen ti amin nga ubbing “ti kantada.”

Kinuna ti maysa a Lola a kalpasan ti namindua a pannakabuya ti apokona iti video, imbaga ti apokona: “Agdalusak iti kuartok tapno awan ti maigalis ken masaktan gapu kadagiti ay-ayamko.” Determinado a mangdalus iti kuartona ta impilitna a leppasen nga umuna dayta sakbay a mangan.

Iti maysa a bario iti South Africa, adu nga ubbing ti inaldaw a rummuar-sumrek iti balay ti maysa a Saksi. Ipagarup ti dadduma a gapu ta aglaklako ti pamilia iti kendi. Ngem ti agpayso ket nagiinnawis dagiti ubbing a mangbuya iti animated video nga Umimdeng, Agtulnog, ket Mabendisionan iti lengguaheda a Xhosa. Naminsan, 11 nga ubbing ti naggigiddan a nagbuya, ket naikabesada ti intero a kanta.

Idiay Ecuador, adda agkabsat a saan a Saksi nga agsasao iti Quichua—da Isaac ken Saul nga agtawen iti walo ken lima. Ur-urnongenda ti pagmeriendada iti kada aldaw tapno igatangda iti paltopaltog, espa-espada, ken  sinsinan soldado. Maysa nga aldaw, imbaga ni nanangda a dalusanda ti kuartoda ken ikabilda amin nga ay-ayamda iti karton iti sirok ti katre. Kalpasanna, adda nangiregalo kadakuada iti baro a DVD nga Agbalinka a Gayyem ni Jehova ket binuyada dayta. Kalpasan ti makalawas, bayat nga agdaldalus ti ina, nakitana nga awanen ti nagyan ti karton malaksid iti kotsekotse. Dinamagna kadagiti annakna, “Ayandan dagitay ay-ayamyo?” “Imbellengmin ta saan a kayat ni Jehova dagidiay nga ay-ayam,” insungbatda. Ita, no agay-ayam dagiti kaarrubada nga ubbing kadagiti ay-ayam nga adda koneksionna iti kinaranggas, ibaga ni Isaac: “Dikay agay-ayam iti kakasta, iparit ni Jehova!”