Kinuna ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mat. 24:14) Ti Web site a jw.org ket talaga a nakaep-epektibo a pamay-an tapno madanon ti “amin a nasion” iti ababan a nabatbati a tiempo sakbay a dumteng ti panungpalan.

Adda agassawa a misionero iti Solomon Islands a mangaskasaba iti purok dagiti mangngalap. Uppat a lallakay a nakaiggem iti selpon ti nakasaritada. Dinamagda no ammo dagitoy a lallakay ti ag-Internet. Gapu ta ammoda, impakita ti agassawa no kasano a luktan ti jw.org, biroken  ti lengguaheda, ag-download kadagiti magasin ken Biblia, ken usaren ti seksion para kadagiti pamilia ken ubbing. No mangaskasaba dagitoy a misionero, maay-ayatanda a mangipabuya kadagiti ubbing iti video a Pray Anytime. Maragragsakan ti maysa a grupo dagiti ubbing idi nabuyada dayta, nagtatarayda a napan iti bakir a mangikankanta iti “Anytime, anywhere, I can pray . . .”

Dagitoy ti sumagmamano laeng kadagiti adu a surat ti panagyaman a naawat ti sangalubongan a hedkuarter iti New York:

“Immakarkami ken lakayko iti Mexico, ket ikagkagumaanmi ti agadal iti Spanish tapno makasabaanmi ti amin a makasaritami. Tunggal luktak ti jw.org, agyamyamanak ken Jehova ta dayta ti tumultulong kaniak nga agimdeng ken agsursuro. Adu ti linaonna a magasin, libro, musika, ken drama a magun-odan iti nagadu a lengguahe. Ipatpategkayo ken agyamanak iti napinget a panagtrabahoyo.”—D.H., Mexico.

“Dandaniakon bulsek isu a magusgustuak ti Web site-yo ta adu ti rekording a mabalinko a denggen. Nagsuratak ta kayatko nga ibaga nga itultuloyyo koma ti agikabil iti MP3 format (audio files) ti ad-adu pay a libro, broshur, ken dadduma pay a nayimprenta a material tapno adda denggek iti inaldaw.”—K.G., United States.

“Magusgustuak ti jw.org! Nalaka nga usaren isu a naregregtaakon iti ministerio ken iti personal a panagadalko. Agtawenakon iti 72 ken bautisadoakon iti 47 a tawen. Nasuroken a 30 a tawen a payunirak. Maysaak nga ina ti 9 a bautisado nga annak, 16 nga appoko, ken 3 nga  appoko-iti-tumeng. Buklen ti uppat a henerasion dagiti regular pioneer iti pamiliami. Agyamanak ken Jehova iti daytoy naespirituan a taraon iti umiso a tiempo.”—M.T., United States.

“Alas kuatro iti parbangon nga isursuratko daytoy. Masansan a diak makaturog iti rabii gapu iti multiple sclerosis ken dadduma pay a sakit a marikriknak, kas iti mapaspasaran ti adu nga ipatpategtayo a kakabsat iti intero a lubong. Saan nga agsarsardeng ni Jehova a mangipaay kadagiti kasapulantayo a naespirituan, ket daytoy ti rason nga agyamanak kadakayo. Ad-adda a makapagpanunotak no adda dagiti ladawan, isu a makatulong unay kaniak ti disenio ti Web site. Magusgustuak dagiti tsart, video, ken ladawan nga addaan kadagiti nalawag a komento.”—B.B., New Zealand.

“Nakapagsuratak tapno agyaman kadakayo. Maysaak a doktor iti nasulinek a paset ti Sri Lanka ken awan ti maaw-awatko a magasin iti lengguahek. Ngem gapu iti Web site-yo,  maka-download ken makabasaakon kadagita iti lengguahek. Ti Web site-yo ti maysa kadagiti kasayaatan a sagut ni Jehova kadagiti tattao a kas kaniak.”—N.F., Sri Lanka.

“Thank you iti kinagagetyo a tumulong kadagiti tattao a mangam-ammo ken Jehova. Agaramidkayo koma iti adu pay a video iti jw.org. Makatulong kaniak dagitoy ken iti pamiliami no adda problemami. Paboritok ti video a Beat a Bully Without Using Your Fists. Thank you manen iti kinagagetyo.”—Y.S., 9 ti tawenna, United States.

“Agyamanak kadakayo ken ni Jehova gapu kadagiti naespirituan a taraon a maaw-awatmi. Dakkel a tulong kaniak ti Web site a jw.org, nangruna ti seksion a ‘Tin-edyer.’ Magustuak pay ti serye nga Agbalinka a Gayyem ni Jehova. Nagmayat ti epekto dagitoy kadagiti tallo nga adingko a babbai. Uray agaaddayotayo, makapagkaykaysatayo kas agkakabsat gapu ta ay-ayatentayo ni Jehova. Pagyamanan.”—A.B., Peru.